رواية الإكس أس 2 الفصل السابع 7 بقلم فاطمة عبد الوهاب
رواية الإكس أس 2 الجزء السابع
رواية الإكس أس 2 البارت السابع
رواية الإكس أس 2 الحلقة السابعة
بصيت له والمأذون بيقول : بارك الله لكما وبارك عليكما وجمع بينكما في خير، حسيت إحساس غريب اوي، دموعي كانت بتنزل بلا توقف، وبجد إحساس ميتوصفش ..
Flash back قبل ١٢ ساعة :
نزلت من العربية ورجل بتأخر التانية مكنتش عاوزة أعرف رده أو بالأصح كنت خايفة ..
كنت خايفة يفضل أبوه عليا تاني ماهو عملها قبل كدة بس المرة دي لو عملها يبقا ميستاهلنيش بجد ولا يستاهل حبي ليه ..
وصلتله وقولتله : ها قررت ؟
قال : أيوة ..
قلت: إيه
غمضت عيوني وأنا منتظرة أسمع أسوأ خبر في حياتي، وكنت مستقبلة الصدمة وغمضت عشان متجيش في وشي ..
فضل ساكت شوية ففتحت عيوني : وقلت إنت بتعملي ساسبنس يعني ما تنجز ..
قال : لا مش بعمل كدة بس سرحت في حلاوتك وإنتي مغمضة، قمر من زمان وقمر دلوقتي وكل ما كبرتي سنة بتحلوي عن اللي قبلها ..
اتكسفت وقلت : أفهم من كدة انك يعني..
قال بصوت عالي : موااافق يا مجنونة، أنا طول عمري مجنون وبحاول أعقل بس معاكي مش هعرف..
وجري عشان يحضني فبعدت عنه بسرعة ..
قلت : إيه يااا إيه لسة متجوزناش ..
قال : كلها كام ساعة ويحصل ..
قلت : أما يبقا يعدو الكام ساعة نتلم بقا ..
قال : هحاول مع إني مش ضامن أتلم لغاية ما يعدوا ..
قلت : اه معلش مش هسمحلك أصلا ..
قال : طيب نستنى وأمرنا لله ..
قات : أيوة كدة مشوفتش تربية بجنيه ..
قال : ولا شميتها وحياتك 😂
قلت : قول لا اله الا الله يا بيه ومتحلفش بغير ربنا..
قال : لا اله الا الله ، ها مش يلا بينا بقا نلحق نجيب الورق بتاعنا عشان المأذون ونلحق نجيب فستانك، أنا بدلتي جاهزة..
قلت : طب يلا بسرعة مفيش وقت .
قال : لحظة طب وهعمل إيه في حوار أبويا دا ..
قلت : متقلقش أنا فكرتلك ..
قال : إشجيني ..
قلت : دلوقتي أول ما الليل يدخل ويناموا خد شنطة السفر بتاعتك والبدلة والورق وانا هرتب مع مأذون ٨ الصبح يبقا عندنا وبعدين اكتب ورقة إنك مش هتقدر تكمل الجوازة دي وإنك آسف وسامحوني وقولهم إنك سافرت لشغلك تاني ومش هترجع الا لما يسامحوك ..
وبعدين تقفل فونك هنقعد يوم او اتنين في الفيلا بتاعتي وبعدين نسافر تركيا نقضي شهر عسلنا هناك وبعدين أرجع انا على مصر وتكمل إنت لشغلك في الكويت وبين فترة والتانية تبقا تجيلي في السر كدة ومتقولش لحد إنك جيت، ومترجعش تروحلهم الا لما يسامحوك وكلمهم في الفون لما تروح هناك ولو سألوك كنت قافل فونك ليه قولهم كنت مكسوف منكم ومش عارف اوريلكم وشي وشوية لما يسامحوك تبقا تقولهم انك اتجوزت وتجيبني وشوية شوية هيحبوني وتخلص الحدوتة دي هي بس محتاجة صبر شوية
قال : شوية بس
قلت : شويات الصراحة بس معلش كله يهون عشان نبقا مع بعض او في حل تاني.
قال : ايه
قلت : ابعد انا وتروح تكمل فرحك وهبقا ولا كأنك شوفتني ولا عرفتني في يوم وهبعد وهسافر بلد بعيد عشان منتقابلش صدفة حتى وإنت تكمل فرحك عادي ومتزعلش حد وكله يبقا مبسوط إلا إنت ..
قال : عند أمك انا مش هاجي على نفسي وقلبي عشان حد تاني كفاية كدة أوي، طب وبالنسبة للأخت اللي خاطبها ملهاش مكان في خطتك، أكيد مش ههرب من الفرح كدة وأبعد ومقولهاش حتى ..
قلت : لا مش هتعمل كدة إنت قبل ما تقفل فونك هتبعتلها رسالة وتتأسف بكل أسف الدنيا وتقول إنك مقدرتش تحبها ومش عاوز تظلمها معاك وتقولها إنك هتدخل الطيارة وتسافر وبعدين تبعتها وتقفل فونك وبس ..
قال : طب وسواد الليل أقضيه فين عندك 🙃
قولتله: دا عندها يا حبيبي لا إنت هتقضيه عند حد من اصحابك ..
قال : طيب اصلا في كذا واحد من اصحابي عارف قصتنا ومش عاوزيني أتجوز وهيفرحوا لينا اوي وهخليهم يأجروا عربية لينا ويزفونا كمان يا قمر..
قلت : طيب وأنا هروح أجيب الفستان وارجع عالفيلا وهكلمهم دلوقتي أخليهم يزوقوا حوالين البيسين ورد وكدة وهروح دلوقتي بسرعة أجيب كرسيين عشان الكوشة وإيه كمان اه عاوزة أكلم الميك أب ارتيست تيجي تعمل لي ميك اب بكرة..
قال : بالراحة بس كل دا هنعمله سوا متتوتريش .
قلت: لا عشان أنا لوحدي بس عشان كدة كله على دماغي وهتجوز فجأة أصلا من غير ترتيب عشان كدة متوترة كان نفسي بس حد من اخواتي يبقا معايا يقف معايا أو أمي أي حد من اللي راحوا..
وعيوني دمعت قرب عشان يواسيني وكان هيحضني
قلت من بين دموعي: dont touch اتلم
قال : حتى وإنتي بتعيطي مركزة يا باي عليكي
قلت : بكرة نتجوز وهتزهق مني متقلقش .
قال : عمري ما أزهق من حب حياتي ..
وبعدين نط وزعق وقال : ياااااهوووووو هتجوزهااااا بكرررة شكرا يااااارب إنك استجابتلي شكرا يا حبيبي..
وشوية وقال بجنان : يا ولاد بلدنا يوم الخميس هكتب كتابي عليها أخيرا وأبقا عريس يلهوووووي يمااااا .
طبعا المكان في المقطم نو أشخاص فكان بيزعق براحته بقا وأنا مبسوطة وبضحك عليه من كل قلبي .
وبجد أول مرة أشوفه من بقاله كتير أوي : بيضحك وعيونه بتلمع كدة وبيتطنط من السعادة كدة، ربنا يقدرني وأسعدك يا روح روحي..
مشينا عشان نجهز باقي الحاجات رحنا نجيب الفستان واتخانقنا عشان هو مش عاوزة بجيبونة وأنا عاوزاه كدة وفي الاخر وافقت على كلامه كدة كدة الفرح عالضيق مش في قاعة ..
رحنا اشترينا كرسيين حلوين للكوشة وترابيزتين تلاتة عشان اصحابه والناس اللي هيتعبوا معايا في الشغل حقهم يحضروا كمان والورد والزينة بتاعة التزيين وكلمت الشغالات كلهم جم وبقوا شغالين على قدم وساق جابوا عصاير عشان الناس بتوع بكرة وعشانهم وعشانا وجاتو كمان
وكلمت بتوع الأنوار عشان يعلقوا النور جوا الفيلا وبراها وكان عندي سماعتين كبار زي الدي جي طلعناهم وشغلناهم وأزعجنا الناس، معلش مش لازم يناموا الليلة دي دا فرحي على عشق عمري يا ناس معلش افرحولي إنتو كمان ..
والشغالات كانوا شايفين ضحكتي وكل ما يقابلوني يزغرطوا وأنا أزغرط معاهم وبجد كان يوم بليلة مبهجين بكل الطرق..
كلمت واحدة من الشغالات ذوقها حلو قولتلها تخلي اوضتي اللي فوق متزينة بور احمر وشموع وبلالين، وتصورها بعد ما تخلص عشان مش عاوزة أنسى اليوم دا أبدا
خلصنا شغل بإنهاك عالساعة ٩ بالليل أنا عالترتيب دا كله هنام عالسطح عشان مبهدلش حاجة 😂
كان هو مشي قبلها بشوية حلوين عشان يجهز باقي الحاجات بتاعته
كافئت كل واحدة فيهم بمبلغ محترم وقولتلهم يروحوا بسرعة قبل ما المحلات تقفل يجيبوا فساتين سهرة عشان يحضروا معايا..
قعدت أفكر في باقي أهلي كل واحد ملهي في حياته ويادوب هسمع منهم مبروك اما يعرفوا عشان كدة معزمتهمش، كان نفسي بجد افتخر بحد من أهلي قدامه بس خلاص بقا الغاليين راحوا ..
لحظة لحظة نو نكد النهاردة خالص يلا إنتي عروسة قومي خدي شاور عروسة بقا ودلعي نفسك ..
وبالفعل قمت دخلت التويلت وجهزت حاجة الشاور عملت. بالصابون المغربي والطمي المغربي والنيلة الزرقا وماسك الحنة البيضا ودم الغزال والحمد لله كنت عاملة ليزر من قبلها بكتير 🙈☺️المهم وكام ماسك لوشي كدة ولشعري كنت بنور ..
خلصت دول وبعدين مليت البانيو وحطيت فيه كورة الشاور و زيوت عطرية متناغمة مع بعضها عشان أخرج ريحتي فواحة كدة
خرجت كنت بجد حسيت وقتها إني عروسة وبعد ٤ ساعات في الشاور نمت في أوضة تانية غير أوضتي عشان مبهدلهاش، حطيت البيرفيوم بتاعي والهير ميست والبادي سبلاش وحسيت للحظة إني في الجنة من كمية النضافة والسلام النفسي اللي كنت فيه، وحاولت بقدر الإمكان أنام ومتخيلش أي حاجة ممكن تحصل بكرة، عشان أنا عمري ما تخيلت حاجة حلوة وحصلت للأسف 💔 فقلت أتصدم بكرة بالواقع أحسن نو خيالات
لقيت فوني بيرن رديت قال : القمر بيعمل إيه ..
قلت : لسة مخلصة شاور وهنام أهو ..
قال : القمر هيتجوز بكرة وهتبقا عروسة قمر ..
قلت : امممم ممكن
قال : دا أكيد بحبك يا ريتال
اتكسفت وسكت
قال : مش هتقوليها بقا وحشني أوي اسمعها منك ..
قولتله : هانت بكرة هتسمع كل اللي نفسك فيه ..
قال : يا شمس نوري بقا وغوري يا ضلمة
قلت : مسيرها هتمشي متقلقش يلا تصبح على خير عشان تعبانة وعاوزة أنام
قال : تصبحي على الف خير يا وردتي
وقفلت ونمت .الحمد لله.
من الحماس كنت بقوم كل نص ساعة أشوف الشمس طلعت ولا لسة، حسيت للحظة إني رجعت طفلة تاني مستنية حدث مهم وفعلا هو أهم حدث في حياتي ..
وصدق من قال : يصبح للمرء أجنحة عندما يكون بين ثنايا حلمه .
والليلة دي بقا كنت المفروض أنام على السطح لأن الغرفة كانت لا تسع أجنحتي من الفرحة بجد، ربنا يجوز كل حبيب لحبيبه يارب ❤️
جه الصبح أخيرا وجت الميك أب ارتيست ٦ ونص زي ما قولتلها وأنا قمت خدت شاور تاني بعطور كمان عشان اكون فواحة كدة وعسل ويدوب فيا بقا أكتر ماهو، الصراحة عاوزة أنسيه اسمه وأهله وكل حد في حياته ويفتكرني انا بس🙃
وبدأت في الميك أب وخلصت في ساعة وبعدين لبست الدريس، كنت حاسة بجد إني ملكة متوجة، الضحكة مفارقتش وشي وخدودي كانت حمرا طبيعي من الحب والكسوف، وعيوني كانت بتلمع كدة، بجد أول مرة أحس بكمية السعادة دي الله يديمها عليا يارب بجد حبيتني أوي اليوم دا ..
٨ بالدقيقة سمعت صوت العربية بتزمر إن العريس وصل، بصيت من البلكونة كان جايب حوالي ١٠ من اصحابه وهو كان جاي بالبدلة ومظبط شعره ودقنه كان قمرررررررررر
أول مرة أشوفه بجد بالحلاوة دي دا يا بختي بيه بجد بقا ..
كان جايب مصور عشان يصور لحظة طلوعه عالسلم وهو متزين بالانوار والورد الاحمر كدة ولحظة دخوله ليا ولحظة كتب الكتاب ..
بالرغم من الأغاني اللي كانت شغالة برة كنت حاسة إني سامعة خطواته عالسلم، ومع كل خطوة قلبي بيضرب في الحيط، بجد كتير عليا السعادة دي والله ربنا يديمها ويكملها بخير يارب ..
دخل وأنا كنت لافة وشي وأول ما دخل لفيت وبصيتله، حسيته اتجمد للحظة اللي هو خلاص اتجوزتها وبقت عروستي أصلا مش مستوعب، أو يمكن اتجمد من حلاوتي جايز برضو..
حسيت الدموع بتلمع في عيونه والصراحة أنا كمان كنت عاوزة أعيط بجد بس كتمتها، كان المصور بيقوله احضنها عشان اللقطة يعني، برقتله
قاله : لا يعم هتدبحني خلينا في السليم أحسن، وقرب لوداني وقال : لينا روقة لوحدنا يا جميل..
قلت : اتلم ..
قال : والقمر قدامي مقدرش ..
نزلنا عالسلم بالبطئ مع التصوير ودخلنا عالكوشة وكان المأذون وصل ..
بصيت له والمأذون بيقول : بارك الله لكما وبارك عليكما وجمع بينكما في خير، حسيت إحساس غريب اوي، دموعي كانت بتنزل بلا توقف، وبجد إحساس ميتوصفش ..
ربنا يجمع كل حبيب بحبيبه يارب ..
مسك إيدي وقتها إترعشت خدني في حضنه جامد أوي،. خلاص أنا كدة تمام لو هموت دلوقتي مش عاوزة حاجه تاني بجد ..
الاغاني اشتغلت ورقصنا سلو ومرضيش يخليني ارقص على الاغاني مع انها كانت اسلامية يعني بس قال محدش يشوف مراته وهي بترقص غيره هو بس ..
اتضايقت شوية بس الصراحة فرحت إنه بيغير عليا ..
خلص الفرح وخدونا اصحابه ولففونا شوية بالعربية وزفة بقا وكدة ورجعونا تاني..
وصلنا الفيلا بنضحك من قلبنا ومبسوطين وإيدي في إيده. خلاص بقا جوزي بقا
وكان في استقبالنا آخر حد توقعت إنه يكون موجود في البيت ..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية الإكس أس 2)
