رواية الإكس أس 2 الفصل الثامن 8 بقلم فاطمة عبد الوهاب
رواية الإكس أس 2 الجزء الثامن
رواية الإكس أس 2 البارت الثامن
رواية الإكس أس 2 الحلقة الثامنة
قال بصدمة : ماما إنتي بتعملي إيه هنا ؟
قالت : هنت عليك تتجوز من غير ما تقول يا علي وتتجوز دي اللي دمرت حياتك قبل كدة طب ليه ما إنت فرحك كان النهاردة..
قال : ماما أبوس إيدك النهاردة أسعد يوم في حياتي بلاش تدمروه، انا مقولتش لحد عشان عارف إن محدش هيوافق وهيعتبرني مجنون، لأني لسة مخطط للفرح دا امبارح بس ..
قالت : وعملت كل دا امبارح ؟
قال : أيوة بصراحة يا امي انا بحبك ومش عاوز أخسرك، بس إنتي جيتي لوحدك إزاي وإزاي محدش جه معاكي..
قالت : لا احمد ربك ان انا اللي سمعتك امبارح وانت بتتكلم في الفون مع الهانم دي وعرفت إنها أكيد مش رنا لأنك عمرك ما كلمتها كدة وصحيت بدري وكلمت صاحبك وعرفت منه العنوان هنا بعد ما اتحايلت عليه واحمد ربك كمان ان ابوك كان نايم وانا نازلة ولسة مكتشفش المصيبة اللي انت كاتبهاأنا شيلت الرسالة وأهي معايا ، يا علي يبني تعالى تمم جوازك منها وبعدين اعمل اللي انت عاوزه انت اتجوزت دي ومشي الحال تعالى اتجوز رنا بقا متكسرش فرحتها وفرحة أبوك وفرحتنا كلنا عشان نفسك ..
قال : مش هقدر يا ماما انا خطبتها قبل كدة عشان خاطركم وضغطوا عليا عشان احدد معاد الفرح وقلت ماشي لان ريتال كانت مخطوبة وقتها بس خلاص هي خطوبتها اتفسخت وأنا أولى بيها وكفاية السنين اللي ضاعت وهي بعيد عني ..
قالت : طب وأبوك ..
قال: هيزعل شوية وبعدين ينسى
وركع على ركبته قدامه وكان هيبوس رجلها : ماما أبوس رجلك بلاش تبعديها عني روحي هتموت من غيرها، أنا ما صدقت أبقا سعيد مرة في حياتي متكسرينيش بالله عليكي، أنا مش هقدر أقرب من واحدة غير ريتال، مش هعرف. واحدة تانية تنام جنبي وأتمم جوازي معاها، روحي متعلقة بريتال يا أمي لو بعدت تاني هموت بجد …
قومته وقالت : خلاص يا علي اعمل اللي نفسك فيه يا حبيبي أنا عارفه إن طول عمرك حزين ونفسك مكسورة ويعلم ربنا اننا مجبرناكش على الخطوبة دي الا عشان كان نفسنا تبقا مبسوط ..
قال : وأنا وافقت عشان أرضيكم بس يعلم ربنا إني مش هبقا مبسوط غير معاها ..
قالت : طيب خلاص يبني ربنا يسعدك ويوفقك ..
قال : راضية عني ..
قالت : طول عمري يا عيون أمك ..
باس إيدها وقال : تسلميلي يا ست الحلوين..
قالت : بس المهم انا لما ارجع مش هعرف ابوك اني عارفه حاجه هتفاجأ زيه بالضبط عشان ميزعلش مني انا كمان ..
غمزلها وقال : وحاولي تهديه بطريقتك يا ست الكل ..
ضربته وقالت: اتلم ياض مشوفتش تربية ..
قال : فعلا انا متربتش وأبويا وأمي عارفين 😂
وبعدين همسلها في ودنها فبصتلي وبعدين راحت فتحت إيدها ليا فجريت عليها وحضنتها ..
قالت : علي دا الغالي حطيه في عيونك واقفلي عليه أنا مش عاوزة حاجة من الدنيا غير راحته، وطالما ابني بيحبك ومبسوط يبقا انا بحبك ومبسوطة ..
بوست إيدها وقلت : ربنا يحفظك لينا يا ماما ..
قالت : يلا أنا همشي بقا أحاول اوصل قبل ما ابوك يصحى ..
قال : آجي أوصلك ..
قالت : يا أخي اتنيل إنت عاوز تفضل لازق فيها اصلا متتحركش هتيجي توصلني ..
ضحك وقال : هو الصراحة معاكي حق بس ممكن أوصلك عادي ..
قالت : لا يا أخويا أنا هعرف اروح زي ما جيت يلا شيل عروستك واطلعوا فوق ومتنزلوش غير بعد شهر ..
ما صدق وشالني وقالها : متقلقيش لو عليا مش عاوز أنزل أصلا ..
طلعني فوق في أوضتي وانبهر بحلاوتها وقال : إيه دا كل دا عشانا ..
قلت : طبعا هو أنا بتجوز حبيبي كل يوم ..
قال : أخيرا نطقتيها يا بوووي دا لقد هرمنا من أجل هذه اللحظة والله ..
ضحكت وقلت: هتسمعها كتير بعد كدة إن شاء الله وعرفت بقا إن اللي بيصبر بينول ..
مسك إيدي وباسها وقال : وأنا صبرت كتير اوي وكنت مستعد أستناكي عمر فوق عمري بس تكوني ليا ..
بصيت في عيونه وقلت: بحبك..
ساعتها بصلي بنظرة أحلى مليون مرة من كلمة بحبك وخدني في حضنه حضن طويل أوووي
لدرجة رجلي وجعتني من الوقفة والكعب العالي بس كنت مبسوطة بجد واتنهدت تنهيدة راحة طويلة لأني حسيت وأخيرا إني وصلت مكاني هنا جنب قلبه تماما ..
لما لقيته طول اوي خبطت على كتفه وقلت : يا أخينا إنت نمت ولا إيه ..
بعد عني وقال : عيلة فصيلة وربنا أنا كنت فوق السحاب مش في الدنيا..
قلت : كنت أبغى أقولك وأنا كمان بس الكعب العالي بهدلني ..
قال : مش بقولك فصيلة ..
قولتله يلا نصلي ركعتين نبدأ بيهم حياتنا
قال : تمام يلا
واتوضينا وصلينا وبعدين قلت : طب يلا همتك معايا يا بطل عشان نفك دبابيس الطرحة عشان شكلهم كتير..
قال : اااه هنقضي اليوم في الدبابيس أنا مبصوصلي في أم اليوم دا من زمان ..
قلت : إنجز وبلاش رغي واشتغل ..
قال : أمرك يا فندم أي أوامر تانية..
قلت : لا فك وإنت ساكت بس ..
عض على شفايفه وقال في سره : صبرني يارب ..
قلت : سمعتك على فكرة ..
قعدت على البف وخلعت الجزمة ( أعزكم الله ) وبعدين أخيرا تنفست الصعداء كما يقال وحاولت أفك معاه الدبابيس ..
وأخيرا بعد ربع ساعة اتفكوا
قال : هوووه يا ستير يارب دا كان هم وانزاح كنتي مستحملة كل دول فوق دماغك إزاي يبنتي ..
قلت: عشان تعرف إن العروسة بتستحمل كتير أوي ..
قال : خدت بالي ..
قلت : طب يلا وسع لي هروح آخد شاور هموت من الحر
قال : هو إنتي ليه محسساني إني بايت معاكي بقالنا سنين وعادي محسيتش إني واحشك بجنيه ..
ضحكت وقلت : معلش أما أخرج هحسسك عيوني ..
قال : طيب تعالي أفكلك للفستان..
قلت : ولد عيب ..
قال : عند أمك العيب دا يلا يا بت ..
فكلي سوستة الفستان والحمد لله كنت ساترة نفسي تحته ولابسة بادي وبنطلون ..
قلت : يلا هاخد شاور وآجي ..
قال : مش عاوزة مساعدة
دخلت التويلت وقلت : لا شكرا راجل قليل الأدب
قال : أنا قليل الأدب ماشي ماشي أما تخرجيلي بس ..
قلت : روح خد شاور انت كمان في تويلت تاني برة يلا بسرعة عشان الريحة طلعت ..
قال : يبت بطلي استفزاز هضربك ..
قلت : متقدرش أصلا ..
قال : متحامية في الباب يعني ماشي ماشي ليك روقة يا جميل..
وبعدين سمعت صوت الباب بيتقفل دليل على انه خد هدومه ورايح ياخد شاور زي ما قولتله ..
بعد شوية خرجت وحطيت هير ميست وبادي سبلاش وبيرفيوم وروج خفيف وحطيت كريم مرطب على ايدي ورجلي وهو دخل وانا بحطه على رجلي ..
قمت بسرعة ولبست الروب وقفلته كويس ..
قلت : إنت مفيش آداب استئذان عندك مش تخبط ..
قال : مكانش قصدي انا ..
وسكت لحظة وقال : يا عين امك أنا جوزك..
قلت : ولو يعني المفروض تخبط ..
قال : أه ان شاء الله المرة الجاية..
قلت : انت بتاخدني على قد عقلي ..
قال: آه هنبتديها خناق بت بت قدامي عالسرير أنا تعبان ومصدع وعاوز أنام ومش فايق لخناق معاكي..
قلت : طيب هروح عالسرير انت هتخوفني يعني
نمت ولفيت وشي الناحية التانية عكسه ..
قال : مش بقولك محسساني إننا بقالنا ٢٠ سنة متجوزين وكل واحد مدي ضهره للتاني لفي يبت ..
لفيت وبصيت ببراءة وقلت : ليه في حاجة..
قال : لا مفيش بتطمن على حضرتك..
قلت : أنا تمام كويسة
قال : بت هتستفزيني هضربك ..
قلت : متقدرش
قال : ومقدرش ليه بقا
قلت : عشان أنا توتا حبيبتك وكمان إنت مش بتضرب بنات ..
قال : هم فين البنات دول إنتي شايفة حد أنا مش شايفه ..
ضربته وقلت : طب امشي بقا روح نام جوا مش هتنام جنبي ..
ضحك وقال : طب اهدى طيب أنا قصدي مش شايف بنات أنا شايف قمر، واحد بس منور حياتي ودنيتي كلها ومن غيره أضيع وأتوه ..
ابتسمت وقلت: أيوة كدة اتعدل ..
قال : اتعدلت أهو يا فندم
وفتحلي إيده وقال : مش هتيجي في حضن لولي ..
قلت : ياه إنت لسة فاكر الاسم دا ..
بص في عيوني وقال : أنا منسيتش أي حاجة قولتيها أبدا يا حبيبتي ربنا يارب يقدرني وأسعدك وتفضلي طول عمرك هنا ..
وشاور على قلبه ..
ابتسمت بكسوف وقلت : يارب ..
وحطيت راسي في حضنه وأخيرا بجد اتطمنت ..
ونمت بسرعة وإرهاق من تعب امبارح وتعب النهاردة
بالليل صحيت قبله وغسلت سناني وخدت شاور سريع ونزلت قلتلهم يحضروا العشا بسرعة..
وبالفعل حصل وأنا رحت أصلي اللي فاتني وبعدين خرجت للجنينة اخدت وردة وخدت العشا وطلعت فوق ..
لقيته لسة نايم صحيته بهدوء : علي قوم يلا فاتتك صلوات كتير ..
مصحيش ، كررت مرة تانية: لا حياة لمن تنادي
قلت مبدهاش بقا أخدت الوردة وقعدت العب على انفه شوية من فوق بيها قلق بس مصحيش رحت دخلت طرفها جواها راح صاحي وعطس ..
قال : إيه الغباء دا ريتال في حد يصحي حد كدة ..
قلت : أعملك إيه ما انت اللي مش راضي تصحى وفي صلوات كتير فاتتك وبعدين اصحيك برقة اكتر من كدة إيه دا انا بصحيك بوردة ..
قال : في الافلام بتمشيها على خدوده بتاع مش غباءك دا ..
قلت : دا للناس الطبيعية مش حضرتك فيل نايم ..
قال : أنا فيل طب خدي بقا هنا ..
خدني ونيمني وفضل يزغزغ فيا لغاية ما دمعت من الضحك ..
قال : دا عقابك ..
قلت : عقاب حلو عادي ..
غمزلي وقال : في عقاب تاني أحلى بس بعد الاكل ..
قلت : مش بقولك متربتش ..
قال : شفتي بقا انتي اللي دماغك وحشة ازاي أنا كانت نيتي سليمة أبو قلة أدبك ..
قلت : يولا
قال : يبت ..
قلت: طب قوم يلا عشان نتعشى وتصلي اللي فاتك وانجز حضر شنطتك ورانا طيارة كمان ٣ ساعات
قال : ايه دا طيارة ايه وأنا معرفش
قلت : مفاجأة يلا بس ..
قال : خدي بس طيارة ايه أنا لسة مدخلتش دنيا حرام عليكي يا شيخة ..
قلت: هو انا هعذبك دا شهر عسل ابقا ادخل الدنيا هناك، وبعدين الحاجات دي أنا رأيي إنها بتيجي فجأة من غير ترتيب إنما لو رتبنا ليها او عشان المفروض تحصل بتبقا مملة ومش حلوة عشان كدة انا عاوزة أجرب معاك كل حاجة مختلفة وحلوة ..
قال : أما نشوف آخرتها يا آخرة صبري ..
قلت : اخرتها عسل ان شاء الله طالما إنت معايا .
قال : طبعا يا قلبي دا اكيد
مسك إيدي وباسها وقال: ربنا يخليكي ليا يا نور حياتي ..
قلت : ويحفظك ليا يا قلبي المهم يلا مش وقت مرقعة مستعجلين ..
قال : وربنا مفيش رومانسيه بربع جنيه فصيلة فصيلة يعني..
قلت : يلا انجز
قال : أمرك يا فندم ..
قام واتعشينا وصلي وجهز شنطته وخد شاور ونزلنا نلحق المطار ..
وصلنا تركيا زي ما كنت مقررة ووصلنا الاوتيل ..
دخل ياخد شاور وانا خرجت اللبس من الشنط وحطيته في الدولاب على ما يخرج وخلص ودخلت أنا ..
خرجت وشعري مبلول وبدون ميك اب كان شكلي كيوت زي ما بيقول عليا ..
وبصيت من فوق في الشباك كفضول اشوف الڤيو كان جامد اوي وتركيا من فوق حكاية بجد ..
قام وحضني وخد شهيق كبيير اوي، معرفش كان بيستنشق إيه مع إني مكنتش لحقت أحط بيرفيوم ولا حاجه بس قال ان ريحة الشامبو والشاور جامدين ..
قلت: تعرف إن تركيا من فوق جامدة أوي
قال : إنتي أحلى ..
اتكسفت وسكت لقيته بيقول : وحشتيني، وحشتيني أوي بجد تعرفي ان ريحتك الطبيعية حلوة جدا بعيدا عن البيرفيوم وكدة بس ريحتك انتي حلوة ..
قلت : دا الشاور
ضحك وقال : مفيش أمل وربنا بس بحبك أعمل إيه ..
قلت me too :
بص في عيوني وقال : توتا بصي أنا مش عاوز أتمم جوازنا عشان المفروض أعمل كدة لا خالص وانا لو كنت اتجوزت رنا مكانش هيحصل بينا حاجة مكنتش هتقبل دا كنت هقرف أصلا من نفسي، بس أنا بحبك إنتي وإتجوزتك إنتي وعاوزك انتي عشان بحبك مش عشان أي سبب تاني، تخيلي حد عاش ٦ سنين من عمره محروم من أكتر أكلة كان بيعشقها ونفسه ياكلها كان تعبان مثلا وممنوع منه الأكلة دي وخلاص بعد ٦ سنين تعب بقت متاحة ليه وفي حلال ربنا تفتكري هيعمل إيه ..
اتكسفت ونزلت عيوني وقلت : هياكلها بشغف ولهفةكبيرة طبعا ..
رفع راسي وبصلي نظرة دوختني وخلت قلبي يدق بعنف أوي وقال : طيب هتسمحيلي آكلها بنفس الشغف ؟
اتكسفت وخدودي احمرت من تلميحاته وحسيت إن كفاية كدة بجد عليه وحضنته وقلت : بحبك..
ودا كان أحلى رد لسؤاله ..
.
.
قمت تاني يوم كان هو لسة نايم، شكله كيوت أوي، هو كله على بعضه كيوت ويتحب أصلا، وبجد أول مرة أحس إني اتجوزت لما اتجوزته هو، أول مرة أحس إن قلبي سعيد أوي كدة ..
غنيت بصوت عالي شوية عشان يصحى وإيدي على خده : قلبي سعيد وياك يا حياتي، وياك يا حياتي قلبي سعيد، فرحان فرحة قلب اتهنى، ايوة اتهنى بيوم العيد، حبك خلى الكون في عنيا أجمل عالم من حواليا، حبك خلى الكون في عنيا أجمل عالم من حواليا، كله جديد في جديد، كله جديد في جديد يا حياتي يا حياتي قلبي سعيد..
صحي وفضل مبتسم وهو بيسمع صوتي، كان دايما بيقولي إن صوتي حلو وبيحب يسمعه ..
وبعد ما خلصت قال : صباح القمر يا قمر حياتي، عارفه يا توتا بجد على كمية السعادة اللي أنا فيها دي كأني معشتش حزن أبدًا ولو مت دلوقتي هبقا مبسوط وراضي أوي، بحبك يا توتا .
قلت :وأنا بحبك يا قلب توتا ..
وفجأة حد فتح أوضتنا بالكارت بتاع الاوضة ودخلوا ٢ أول مرة أشوفهم ..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية الإكس أس 2)
