رواية اسميته يوسف الفصل الثاني 2 بقلم شهد محمد جاد الله
رواية اسميته يوسف الجزء الثاني
رواية اسميته يوسف البارت الثاني
رواية اسميته يوسف الحلقة الثانية
_يا جماعه دي مش انا دي نسخه مني انا النسخه الحقيقيه
قولتها بصوت عالي ومحدش انتبه ليا ولا كإني اتكلمت
دخلت في وسطهم وولا كإني دخلت زي ما يكون كنت شفافه بنسبالهم
معقوله انا بحلم !
بس انا متأكده والله انا النسخه الحقيقيه
كنت همشي من البيت ادور على اي حد يساعدني بس قبل ما امشي
رجعت بصيت عليا انا والشاب اللي المفروض العريس كنا فرحانين زي ما يكون واخدين بعض عن حب كان وسيم اوي وانا كنت حلوه لكن كان في حاجه جديده في ملامحي اعتقد إنها الفرحه !
سيبت كل حاجه ونزلت اخدت تاكسي للعيادة بتاعت دكتور باسم
كنت مستغربه كل حاجه سواق التاكسي شافني وسامعني واتعاملت معاه إزاي محدش من اهلي شافني او سمعني !
بوصل للعيادة وبجري على البنت اللي قاعده قدام المكتب وبقول:
_عايزه ادخل لدكتور بسام بسرعه
_اولآ اسمه دكتور باسم ثانيا هو خلاص مش هيستقبل اي حالات تاني تعالي بكرا
_لأ هشوفه دلوقتي وبعد اذنك اتكلمي بأسلوب احسن من كدا
قولتها بصوت عالي وهو خرج على صوتي العالي
_إيه في إيه !
_عايزه ادخل ليك وهي مش عايزني ادخلك يا دكتور بسام
_سيبيها يا ملك تعالي يا شهد
بيقولها وبيفتح باب المكتب وبدخل معاه كان من الواضح انه بيجهز عشان ماشي لكن بيشد الكرسي وبيقعد قدامي وبيقول:
_ها حصل إيه؟
_في نسخه مني في البيت
_نعم !
_والله لأ وكمان دي بتتخطب انهارده
_انا مش فاهم حاجه
_ولا انا
_براحه طيب عشان افهم حصل إيه؟
ببدأ احكي ليه كل اللي حصل من بعد ما مشيت من عنده لحد بعد الحفلة
_ده معناه إيه بقى؟
_في نسخه منكم في عالم موازي ومش أصلية
_انا الأصلية والله
_يمكن انتي فاكره كدا يا شهد
_لأ انا الاصليه احنا نعمل اختبار بيني وبين النسخه التانيه نعمل رز واللي تعمل الرز معجن تبقى هي الاصليه
_شهد مش وقت أفكارك دي الله يخليكي
_ماهو انا مش فاهمه حاجه
_غالبآ النسخه دي بتوصلك رسالة
_إيه هي بقى؟
_الشاب بتاع الحفلة لازم تدوري عليه
_ليه وادور عليه فين اصلآ؟
_معرفش لازم تدوري عليه ده ليه دور مهم في الموضوع كله
_وبعد ما ادور عليه هيحصل إيه؟
_هاتيه وتعالي
_اتفقنا
قولتها وخدت شنطتي عشان امشي بس رجعت وقفت وقولت:
_على فكره البنت اللي بره دي طريقة كلامها مش لطيفه نهائي لو بتتكلم مع الكل كدا محدش هيجيلك تاني
بقولها وبمشي برجع البيت وبتعايش مع النسخه الموجوده بس بيني وبينكم برتاح على الأقل مش بغسل مواعين ولا بعمل اي حاجه
وببدأ ادور على الشاب ده في اكونت عمرو دياب اكيد عامل ليه فولو بس مكنش عندي طولة بال إني اكمل تدوير عليه
مش هنكر انه كان لطيف وجميل حتى وهو عريس من نسختي التانيه ياترى حكايته إيه !
بتعدي الأيام ومبيكونش قدامي اي مكان ادور عليه فيه غير اكونت عمرو دياب بقيت مخصصه ساعة في اليوم ادور فيها
وانهارده كنت متفقه مع اصحابي ننزل سوا نزلت خرجت معاهم روحنا كذا مكان قعدنا على كافيه لعبنا كوتشينه بعدها روحنا ناكل وفي الاخر روحنا نحلي من بــ لبن
روحنا سوا انا طلبت ايس كريم توت وهما طلبوا حاجات تانية
خدنا الاوردر وروحنا قعدنا في كافيه قريب وواحنا قاعدين وفي وسط الناس ظهر هو !
في لحظه لقيتني في عالم تاني مش مركزه في أي حاجه غير معاه هو وبس نفس الملامح اللي خطفت قلبي حطه واقف في إيديه كوفي وإيديه التانيه لابتوب ولابس شيميز مقلم وبنطلون اسود
فوقت من شرودي لما لقيته هيمشي قومت جريت من وسط أصحابي لحقته ونا بقول:
_استني
وقف بص وراه واتكلم بهدوء وقال:
_بتكلميني انا؟
_اه انت انا ..
كنت لسه هكمل كلامي بس قطع كلامي شاب بيقول:
_يلا يا يوسف هنتأخر
بص ليه وبصلي وقال:
_سوري انا لازم امشي
قالها واختفى من قدامي ده حتى مستناش الرد
رجعت لصحابي ونا كلي حزن من تاني ضاع مني تاني!
بس على الاقل عرفت اسمه على الأقل بصيت في إيديه الاتنين ومكنش فيهم دبله!
مكملتش قعده مع اصحابي ورجعت للبيت
ومن بعد اليوم ده وانا كل يوم في نفس الكافيه على أمل اني الاقيه
عدا اكتر من شهرين بروح بسأل عليه بوصف ملامحه بحكي ل أصحابي هو مين بس مكنش حد فيهم مقتنع
وانهارده وانا قاعده في مكاني زي كل مره جيه عادل ده شاب شغال في المكان وعارفني عشان كل يوم باجي فيه بسأل عليه جيه قدامي وهو بيقول:
_استاذه شهد الاستاذ اهو اللي بقالك شهرين بتيجي عشانه
رفعت عيني من على الموبيل ولقيت عادل واقف وهو جنبه
قومت وقفت مش مستوعبه الفرحه وفي نفس الوقت متوتره
_انت!!!
_اخيرآ لقيتك
ضحك وهو بيقول:
_هو في ايه قالولي انك قالبه الدنيا عليا مين حضرتك؟
_انا اا احم انا ..
كنت لسه هكمل بس جت بنت بتقول:
_يوسف الميتنج بدأ
بص ليا وقال:
_شوفي انا عندي ميتنج مهم في مكان قريب من هنا هخلص ونتقابل تقوليلي انتي مين وايه حكايتك استنيني متمشيش
أبتسمت وانا بقول:
_هستنى بس اوعي متجيش
_لا هاجي
عدا على اليوم ده شهر وأربع ايام ولسه مجاش وانا زي الهبله بروح كل يوم استناه المكان كله عرف اني باجي عشانه بقو يسخفه عليا بالكلام بس هنعمل ايه ما باليد حيلة
ولا هو اهل الحب صحيح مساكين ؟
سيبت فنجان القهوة رقم ٨ اللي عليه اثر الروج بتاعي على الترابيزه ومشيت وانا مقرره اني مش هرجع ادور عليه تاني
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية اسميته يوسف)
