رواية احتواء قلب الفصل التاسع والثلاثون 39 بقلم عبير سليم
رواية احتواء قلب الجزء التاسع والثلاثون
رواية احتواء قلب البارت التاسع والثلاثون
رواية احتواء قلب الحلقة التاسعة والثلاثون
يستمع إليها و هو غير مصدق ما تتفوه به أيعقل هذا لا يعرف بما يجيبها عما أخبرته بها لم يتوقع يوما حدوث ما سمعه أفكاره مشتته عقله يدار به
ذكريات كثيره تمر امام عينيه بحلوها و مرها و فجأة يتوقف عقله و يقف به الزمن عند تلك الكلمات التي تفوهت بها في آخر لقاء جمع بينهما
و اخيرا قرر الرد عليها بكلمات محدوده : ربنا يشفي كل مريض
همسه : أنا اسفه و الله يا أبيه اني خبيت على حضرتك بس صدقني غصب عني مكنتش حقدر افتح معاك سيرة موضوع زي ده و انا عارفه ان دي سيرة بتضايقك و بتوجعك
هادي : عشان كده و اللا عشان هيا خافت اني اشمت فيها
همسه : لا والله يا أبيه هادي أنا استحاله ييجي فبالي حاجه زي دي طبعا أنا عارفه مين أبيه هادي و بيفكر ازاي
هادي : أنا بقول هيا يا همسه مش انتي يا حبيبتي هيا اكيد قالتلك متقوليليش عشان مقلش ان ده ذنب اللي عملته فية
همسه : ربنا يمهل ولا يهمل يا أبيه لكن أنا مكنش ينفع اسيبها أو اتخللى عنها فمحنتها مينفعش مكنش جمبها فوضعها ده مهما كان و مهما اللي عملته و مهما كنت زعلانه منها لكن صدقني وقت ما عرفت انها تعبانه و محتاجاني مقدرتش أمنع نفسي من إني أكون جمبها و قلبي يوجعني عليها و اتمنالها الشفا من كل قلبي حقك علية يا أبيه هادي انا اسفه اني بقول كده قدامك بس غصب عني و الله مش بأيدي اختي يا أبيه مهما حصل اختي
هادي : متعتذريش يا همسه هو ده واجيك ناحيتها و حقها عليكي و مكنش ينفع تعملي غير كده اي تصرف تاني كنتي ممكن تتصرفيه مكنش حيبقى حلو فحقك و هي دي همسه اللي اعرفها
خليكي جمب اختك يا همسه هي دلوقتي محتاجاكي و متقلقيش من ناحية الشغل هنا خدي الإجازة اللي انتي عاوزاها ميهمكيش
يمسك ورقة الاجازة و يمضيها و يديهالها : اتفضلي يا همسه حطي المده اللي انتي عاوزاها و قدميها لشئون العاملين و لو خلصت و احتاجتي تاني خدي يا همسه و مرتبك حينزلك في الفيزا كل شهر متقلقيش
همسه : انا مش عارفه اقولك ايه يا ابيه و يا اشكرك ازاي
هادي : مفيش شكر و لا حاجه يا همسه انا بعمل كده عشان همسه حبيبتي
همسه : ربنا يخليك لية يا ابيه يارب
هادي : حبيبتي يا همسه قوليلي بقى عامله ايه انتي و عمرو
همسه : عمرو ده احلى حاجه حصلتلي فحياتي
هادي : ربنا يخليكم لبعض يارب
همسه : و يخليلك جنتك يا ابيه يارب
هادي : يا رب يا همسه ياللا قومي قدمي الاجازة و اتوكلي على الله
همسه : ابيه هادي هو انا ينفع اطلب منك طلب
هادي : عينيه ليكي يا همسه اطلبي يا حبيبتي
همسه : ممكن تسامحها يمكن ده يخفف عنها وجعها و الألم اللي هيا فيه
هادي و هو بيتنهد : ربنا اللي بيسامح يا همسه
همسه : حضرتك سامحت اللي اذوك و ضيعوا عمرك كله ممكن تسامحها هي كمان
هادي : اللي اذوني دول مكنتش اعرفهم معشتش معاهم محبتهمش مديتهمش كل حياتي و كل حاجه حلوة و برغم انهم السبب في كل اللي حصللي لكن حسوا بغلطهم فحقي و صلحوه
لكن هيا انا عملت معاها كل حاجه حلوة مشافتش مني غير كل خير و انتي عارفه كل حاجه يا همسه مش محتاج اعدد عملت معاها ايه لأنك عارفه كل حاجه
همسه : عارفه يا أبيه هادي عارفه انا اسفه يا أبيه عن اذن حضرتك
هادي : غصب عني و الله مش حقدر اسامح و لا اغفر
همسه : حقك يا ابيه انا اللي اسفه و الله اني طلبت منك طلب زي ده
هادي : يعني مش زعلانه مني يا همسه
همسه : أنا عمري مزعل من ابيه هادي أبداً حضرتك اخويا و مثلي الأعلى في الحياه ياريت كل الدنيا زيك عن اذن حضرتك يا أبيه
تخرج من عنده و هو يحدث ربه : يارب انت العالم بحالي و عالم هي وجعتني ازاي انا عارف ان النبي صلى الله عليه وسلم قال ما زاد الله عبدا بعفو إلا عزا بس مش بأيدي يارب غصب عني مش قادر اسامحها عاللي عملته فية اغفرلي يارب
………………………………………..
حبيبة قلبي وحشتيني يا قلب بابا
نجلاء : انتي اللي وحشتيني يا بطتي عامل ايه يا حبيبي طمني عليك
صلاح : ما دمت شفتك ابقى تمام
ازيك يا فهد عامل ايه
فهد : الحمد لله بخير يا بابا
فهد : نجلا يا قلب بابا طمنيني عليكي و على صلاح الصغير
فهد : صلاح مين ده أن شاء الله
صلاح : صلاح حفيدي يا بني آدم انت
فهد : و حضرتك ترضاها لحفيدك عاوز تسميه صلاح
صلاح : و ماله اسم صلاح ان شاء الله ده انا ابويا مسميني على اسم صلاح الدين الأيوبي
فهد : على اساس ان حضرتك اللي حتحرر القدس
صلاح : و هو طول ما البلد فيها ناس من أمثالك حنحرر حاجه
فهد : و ليه بس كده يا حمايا انا زعلتك في ايه بس
صلاح : اه مزعلني هو لما تنشف ريقي على ما تجيبلي بنتي تبقى مزعلتنيش
فهد : و اديني جيبتهالك اهي عندك اهيه اشبعوا ببعض
صلاح : و هو انت بتسيبنا نلحق تشبع ببعض مانت بتفضل قاعد كاتم على نفسنا
فهد : هههههههه هههههههه لا و الله
عالعموم انا مش قاعد اطمن انا حمشي الصبح عندي شغل
صلاح و هو بياخدها فحضنه : بجد يعني انت حتسيبها و تمشي
فهد : مش كتير هاه هما تلت ايام و حاجي اخدها
صلاح لنجلاء : ده احنا حنعمل عمايل
نجلاء : حنعمل ايه يا بابا
صلاح : حنتفسح و اوديكي كل الأماكن اللي بتحبيها و في بقى كام مطعم فتحوا إنما ايه حفطرك في مكان و اغديكي فمكان و اعشيكي فمكان
فهد : ده على اساس انكم بتقضوا شهر العسل يعني و اللا إيه
صلاح : و انت مالك انت هو انت مش ماشي
فهد : هي دي مش مراتي يعني و اللا إيه
صلاح : مراتك فبيتك يا حبيبي لكن هنا هي بنتي انا
فهد : طب و اللي فبطنها ده مش ابني و اللا إيه
صلاح : ايه عاوز تاخده معاك و انت ماشي و اللا ايه انا مش فاهم
فهد : يا لهوي يعني دلوقتي لما تفطروا و تتغدوا و تتعشوا و كل شويه خروج مش ده تعب عليها و على ابني يعني و اللا إيه
صلاح : ولا امشي اولا من هنا انت حتخاف على بنتي اكتر مني و اللا إيه يا بني آدم انت
فاديه و هي جايه عليهم : يا لهوي عليكم هو انتوا مفيش فايده فيكم ابدا علطول كده فضحتونا في العماره الناس تقول علينا ايه عيله مجانين
قوموا عشان تاكلوا تعالي يا نجلا ساعديني احط الاكل
صلاح : لاء متتعبيش البنت خدي الزفت ده يحط معاكي الأكل و سيبيلي بنتي
فاديه : تعالى يا زفت هههههه قصدي تعالى يا فهد
فهد : حاضر يا قمر و الله انت اللي فيهم يا جميل
صلاح : انت بتعاكس مراتي قدامي يا ولد
فهد : على اساس انك طول مانت قاعد مش واخد مراتي فحضنك
صلاح : دي بنتي قبل ما تكون مراتك يا فالح
فهد و هو بيحط ايده على كتف فاديه : و دي مامتي حبيبتي مزعل نفسك ليه بقى
صلاح : اشبعوا ببعض بس سيبولي نور عينيه
نجلا : حبيبي يا ناس وحشتني يا صلوحه
فاديه : هههههه هههههه
فهد : عاجبك اللي جوزك بيعمله ده . فاديه : معلش يا حبيبي استحمله شويه
فهد : عشان خاطر عيونك انت يا قمر عاملالنا اكل ايه لقى
فاديه : عاملالك الأكل اللي بتحبه
فهد : يااه الله سمك و جمبري و كابوريا اهئ اهئ
فاديه : انت بتعيط ليه
فهد : مانا حعمل ايه بالاكل ده و الليلادي بنتك حتنام فحضن البيه جوزك
فاديه : هههههه اطمن احنا الليلادي عندنا خطوبة بنت ابن عمه و لازم نروح و حاخده و نسيبكم مع بعض تسهروا براحتكم سوا لكن لما نرجع مضمنش بقى بصراحه اللي حيحصل
فهد : طب و حياتي عندك عطليه اقولك اديه منوم و خليه ينام عند الناس لحد ما امشي انا الصبح
فاديه : هههههههه لا اطمن العيله كلها حتبقى موجوده و اكيد حنسهر ياللا بقى تعالى كُل ده الأكل حيعجبك اوي
فهد : كل عمايل ايديكي قمر زيك يا فوفه
يقعدوا مع بعض عالسفره و كالعاده نجلاء طبعا جمب صلاح بياكلها و بيدلعها و بيتوشوشوا و يضحكوا و فاديه بتصبر فهد
صلاح : نوجه يا حبيبتي بعد ما ناكل حاخدك و ندخل نريح شويه
فهد : تدخلوا تريحوا فين على أساس اني راس جوافه و اللا ايه و لما انتوا تدخلوا تريحوا انا ادخل فين انا
صلاح : انت تدخل البلكونه تتفرج عالبحر و لو متضايق ارمي نفسك فيه و بعدين مانت معاك حماتك اهوه اقعدوا العبوا دور شطرنج سوا
بصي بقى يا قلب بابا احنا حندخل ننام شويه عشان بالليل حنخرج سوى
نجلا : حنخرج فين يا بابا
صلاح : خطوبه سما بنت ابن عمك محمد
نجلا : بجد سما اتخطبت
صلاح : ايوة و خطوبتها الليلادي و طبعا لازم نروح كلنا و لو انت يا فهد مش عاوز تيجي مش مهم خليك انت هنا و اللا اقولك سافر احسن متضيعش وقتك عشان الشغل
نجلاء : و هو انا لازم اروح الخطوبه دي يا بابا
صلاح : طبعا يا حبيبتي دي العيله كلها حتبقى موجوده مينفعش متروحيش يا حبيبتي
فهد يكح جامد و الأكل يقف في زوره
و فاديه تديله ميه يشرب : اشرب يا حبيبي اسم الله عليك
فهد : الحقيتي جوزك حيجلطني
فاديه : صلاح يا حبيبي البنت لسه جايه من سفر كده مش كويس عليها و اللا انت عاوز صلاح يتعب
فهد : صلاح مين
فاديه : اسكت انت بقى دلوقتي
انت عاوز صلاح يتعب و اللا بعيد عن البيت و صحابه يروح مننا
صلاح : بتقولي ايه فال الله ولا فالك
فاديه : بس يبقى خلاص احنا نروح نعمل الواجب و هي تفضل هنا يا حبيبي ومحدش يعرف انها هنا من أساسه
صلاح : خلاص يبقى مش رايح انا كمان
فهد : يا لهوي جت الحزينه تفرح ملقيتلهاش مطرح
فاديه : ازاي يعني بس يا صلاح انت عاوزهم يزعلوا مننا دول عمرهم ما سابونا فحاجه
احنا مش حنتاخر حنعمل الواجب و نيجي
فهد و هو بيزق نجلاء في رجلها : أيوة اعملوا الواجب عقبال مانا كمان أعمل الواجب
صلاح : نجلا خللي بالك من نفسك يا حبيبتي
فهد : ده على اساس اني مش معاها يعني و اللا ايه
صلاح : مانا بقوبها كده عشان انت معاها
اه صحيح بقولك يا نوجه متبقيش تقعدي في البلكونه في ساكن جديد جه في العماره اللي جنبنا و بلكونته لزقه في بلكونتنا بس راجل الله يهديه عاوز ابلغ عنه وربنا
نجلاء : ليه بس كده عملك ايه يا بابا . صلاح : عمايله منيله كل يوم اسمع صوت الكركرة لما قرفني فعيشتي يجيب الشيشه بتاعته و يفضل طول النهار و الليل قاعد بيها في البلكونه لما مبقتش اطيق ادخلها من ريحة القرف اللي بيشربه انا مش عارف الناس المعفنة اللي بتشرب الحاجات دي بتشربها ازاي جتهم القرف ده الواحد يقرف ياكل معاهم في طبق واحد
فهد بيمد ايده ياخد واحدة كابوريا شال ايده بسرعه و هو نجلاء بصوا لبعض و قعدوا يضحكوا
فهد : يااه هو في ناس بتعمل كده لحد دلوقتي
صلاح : اه و الله يا بني ناس عديمة الربايه
فهد : فعلا يا بابا و الله معاك حق عالم بيئه أوي شيشه قال
شايفه يا نوجتي العالم اللي مش محترمه دي شيشه هي حصلت
نجلا : انت حتقوللي يا حبيبي طب ده فهد يا بابا
يزقها فهد فرجلها : آآه
صلاح : مالك يا نوجه
نجلاء : آآآه مفيش يا حبيبي كنت عاوزة اقولك ان فهد مبيطيقش ريحتها لو بس عدينا من ادام كافيه فيه حد بيشرب شيشه يودي وشه الناحيه التانيه ويجيله ضيق تنفس
صلاح : راجل يا فهد كل يوم بتثبتلي اني اخترت لبنتي الراجل الصح
فهد : هههههههه ده انا صح الصح يا بابا اللا قوللي متعرفش نوع المعسل اللي بيستخدمه
نجلاء تخب.. طه فرجله : آآآه
فاديه : فاكر يا صلاح لما كنا في العمره السنه اللي فاتت فاكر الراجل اللي كان معانا في الفندق
صلاح : و هو ده عمره يتنسى تخيلوا الراجل المهبول جاي العمره و هو معاه الشيشه
فهد : اللهم صللي عالنبي
صلاح : آه و ربنا و كان جايبها معاه الفندق و عمل مشكله مع الأمن و قاللهم الا الشيشه
نجلاء : و كان بيروح الحرم بيها يا بابا
صلاح : لاء هو مكنش بيروح بيها الحرم طبعا لكن من وقت ما يدخل الفندق و هي معاه
فهد : عالم مجانين ايه العالم دي محبش ابدا الناس اللي تمشي ورا هواها دي شيشة ايه و كلام فارغ ايه المفروض الناس تحترم نفسها و كمان في العمره واخدها معاه لا حول و لا قوة إلا بالله شايفه يا نجلا الناس اتهبلت ازاي يا حبيبتي ده بدل ما يعملوا حاجه لاخرتهم رايحين يشربوا شيشه و قرف صراحه العالم دي المفروض تتحاكم
نجلاء و هي بتعوج بوءها يمين و شمال : ما بلاش انت يا عم المصلح
يا لهوي لو عرفوا اللي فيها حتروح ورا الشمس يا فهودتي
فهد : اخرسي يا زفته دي حيبقى فيها طلاقك ان شاء الله
بقولك ايه يا نوجتي
نجلاء : إيه يا قلب نوجتك
فهد : لو عاوزه تروحي مع ابوكي الخطوبه انا معنديش مانع يا حبيبتي روحي يا قلبي
نجلاء : و انت حتروح فين يا قلبي ان شاء الله
فهد : حروح العماره اللي جمبكم يا حبيبتي هههههههه
نجلاء : اه انت تروح العماره اللي جمبنا و بابا يوديك العمود ان شاء الله يا حبيبي و نصلي عليك بكرة الضهر جماعه هههههههه هههههههه هههههههه
…………………………………………
في اليوم التالي يطلب فهد من عمرو يروح مع عدي جلسة العلاج الطبيعي عشان لسه جاي في الطريق و مش عاوزه يتأخر على معاد الجلسه و بالفعل عمرو ياخد عدي الجلسه و يحضرها معاه و يشجعه عشان يستحمل و بعد كده يرجعه عالبيت و يطلب من الخادمه تحضرله الغدا و ميمشيش غير بعد ما ياكل اكله كله و يديله العلاج : بالف شفا
عدي : كتر خيرك يا عمرو تعبتك معايا
عمرو : تعبك راحه يا صاحبي انا عاوزك بقى تريح ضهرك زي ما الدكتور قال و طول مانت قاعد تعمل اللي الدكتور قالك عليه
عدي : ان شاء الله
عمرو : عدي لازم تنفذ كل اللي الدكتور أكد عليه عشان تخف اوام
عدي : حاضر و الله
عمرو : مرام جايه النهارده هي و أهلها
عدي : أيوة ان شاء الله
عمرو : انا وصفتلها العنوان بالظبط عشان ميتلغبطوش
عدي : شكرا يا عمرو
عمرو : يا سلام لو تبقى من نصيبك يا عدي
عدي : ليه بس تبليها البلوة دي يا عمرو مرام تستاهل حد احسن مني
عمرو : و انت مالك فيك ايه مانت زي الفل اهوه
عدي : يا سلام على اساس انك مش شايف اللي انا فيه
عمرو : شده و حتزول ان شاء الله و فتره و حتعدي و حتبقى زي الفل و ترجع زي الاول و احسن تفاءلوا الخير تجدوه وثق في ربنا يا عدي
عدي : و نعم بالله
عمرو : طب انا حمشي دلوقتي مش عاوز اي حاجه
عدي : عاوز سلامتك يا عمرو
بعد منتصف النهار تيجي مرام و والدها و والدتها و معاهم حاجات كتير و يقعدوا معاه : ألف حمد الله على السلامة يا بني
عدي : الله يسلمك يا عمي و الله مكنش فيه لزوم تتعبوا نفسكم كده
باباها : تعبك راحه يا عدي و الله متعرفش من وقت ما عرفنا اللي حصل لك و احنا مضايقين عشانك ازاي و بندعيلك في كل صلاه ربنا يشفيك يارب
عدي : يارب
مامتها : ان شاء الله حتبقى كويس بس متستسلمش للتعب خللي عندك اراده و اتشجع كده و حتبقى زي الفل ان شاء الله
عدي : غصب عني و الله يا طنط منى
منى : مفيش حاجه اسمها غصب عني لازم تقاوم التعب تقف ادامه تتحداه تقولله مش حخليك تتنتصر علية و الرقده دي مفيش منها داعي تقوم تقعد برة في وسط شقتك خللي بالك العلاج الطبيعي اللي بتعمله في العياده مينفعش لوحده لازم انت كمان يكونلك دور
عدي : أيوة انا عارف
يقعدوا معاه فترة و يتكلموا معاه و هو يرتاح ليهم اوي و والد مرام يوعده انه حيجيله تاني يطمن عليه يسلموا عليه و يمشوا
يارب منكنش تقلنا عليك
عدي : يا خبر ده انتوا نورتوني و الله و بعدين زي ما انتوا شايفين انا لوحدي معييش حد ياريت و الله لو تيجوا تاني
والدها : حنيجي و الله يا عدي و ان شاء الله انا اللي حروح معاك الجلسه الجايه
عدي : ربنا يخليك يا عمي محمود مفيش داعي تتعب نفسك و الله انا صحابي بيودوني
محمود : مفيش تعب و لا حاجه انا عالمعاش و فاضي و مورييش حاجه و العربيه معايا يبقى فين التعب ان شاء الله يا حبيبي في معاد الجلسه الجايه حتلاقيني بخبط عليك عشان نروح سوا
عدي : ان شاء الله يا عمي نردهالكم ان شاء الله يوم ما تفرحوا بمرام
منى : ربنا يفرحنا بيكم يا حبيبي يارب
……………………………….
دخل محل من محلات المجوهرات و اشترى خاتم الماظ شيك اوي و ركب عربيته لقاها بتتصل عليه : ازيك يا ذكرى عامله ايه
ذكرى : الحمد لله ايه فينك متصلتش علية طول اليوم
اشرف : معلش و الله طول اليوم كان عندي شغل
ذكرى : و دلوقتي
اشرف : دلوقتي يا ستي رايح حفله
ذكرى : حفله
اشرف : ايوة بنت عمتي اتخرجت و عاملينلها حفله و لو مرحتش حيزعلوا
ذكرى : ماشي يا اشرف تروح و ترجع بالسلامه انا قلت اطمن عليك لما لقيتك متصلتش طول اليوم بية و دي مش عادتك قلقت عليك
اشرف : ربنا يخليكي يا ذكرى لا و الله زي ما قلتلك كده
ذكرى : خلاص تمام ابقى كلمني لما ترجع انت عارفني ببقى سهرانه
اشرف : ماشي سلام
يوصل الفيلا عند عمته و يلاقي أصوات الاغاني و البلالين و الانوار في كل مكان في الفيلا
يدخل و يلاقي العيله و الأصدقاء كلهم موجودين يسلم على الكل و يسلم على عمته عايده و يسالها عن ريم : امال فين عروستنا الحلوة
عايده : ريم يا ريم
تلتفت ريم ليه فياخده جمالها لحته تانيه خالص يلاقي نفسه بيتسم عليها و على هيئتها اللي انبهر بيها اول ما شافها و فكره بنفس هيئة همسه : معقوله دي ريم
عايده : شفتها جميله ازاي بالحجاب
اشرف : بسم الله ماشاء الله زي القمر هي اتحجبت امتى
عايده : من حوالي شهر تقريبا راحت دار تحفيظ قرآن و لبست الحجاب و سبحان الله اول ما لبسته ربنا كرمها احلى كرم و جابت درجات عمرها ما جابتها قبل كده و نجحت بتفوق
اشرف : ربنا يثبتها يا رب
تقبل عليه ريم بابتسامه هاديه صافيه : ازيك يا اشرف
اشرف : ألف مبروك يا ريم
ريم : الله يبارك فيك يا اشرف
يخرج من جيب جاكته علبه جميله و يقدمهالها : يارب يعجبك ذوقي
ريم : ميرسي اوي يا اشرف
تفتح العلبه و تنبهر بجمال الخاتم : الله ده حلو اوي يا اشرف ميرسي اوي
عايده : اشرف طول عمره ذوقه حلو بس مكنش فيه داعي تتعب نفسك كده و الله يا حبيبي ده كفايه مجيتك يا اشرف
أشرف : هو فين التعب ده بس يا عمتو و بعدين انا لو كنت اعرف بموضوع الحجاب ده كنت جبت هديتين مش هديه ربنا يثبتك يارب
ريم : اللهم امين
يبص لها بنظرات تخجلها و تفرح قلب عمته اوي : عمتو
عايده : نعم يا حبيب عمتو
اشرف : هو احنا ممكن نخللي الفرحه فرحتين
عايده : محدش يقول للفرح لاء يا حبيبي
اشرف : طب انا بستئذنك اجي بكرة اقعد مع ريم شويه لوحدينا
عايده : يا خبر ده انت تنورنا يا حبيبي
اشرف : ريم انا محتاج اقعد معاكي في كلام كتير اوي عاوز اتكلم معاكي فيه و يارب تفهميني
ريم : ان شاء الله يا اشرف
يقضي السهره معاهم بين الأهل و الأقارب و الأصدقاء لكن طول الوقت عيونه على ريم مش قادر يبعد عينه عنها لدرجة انه طول الطريق و هو راجع تفكيره كله فيها و نسى يكلم ذكرى زي ما وعدها و هي قاعده مستنياه يكلمها و لما لقته اتأخر عليها طلبته هي : انت فين يا اشرف متصلتش بية انت نسيتني يا اشرف
اشرف : حقك علية يا ذكرى بس السهره اخدتني و جيت تعبان و عاوز انام
ذكرى : انا اخدت جلسه النهارده و تعبت اوي
اشرف : معلش يا ذكرى أكيد لازم تتعبي دي حاجه جديده على جسمك و حتاخدي وقت على ما تتعودي عليها ربنا ميطولهاش عليكي يارب اهم حاجه يكون عندك اراده قويه عشان تعدي المحنه دي على خير
ذكرى : و انت معايا يا اشرف حعديها و انت جمبي مش انت حتفضل معايا يا اشرف
اشرف : مش مهم اكون انا معاكي المهم انتي تكوني مع ربنا و تستغفريه محدش حيقدر ينجيكي غيره يا ذكرى افتكر ان جه الوقت اللي لازم تلجئي فيه لربنا و تستغفري عن كل اللي عملتيه صدقيني يا ذكرى هو ده الملجأ الوحيد ليكي
يتكلم معاها شويه و بعد كده يقفل معاها الخط و يقوم يتوضأ و يصللي لربنا و يدعيه ربنا يغفر له و يفتحله باب توبه و يجعل ريم من نصيبه
و بالفعل ييجي اليوم التالي و اشرف يخلص شغله و يروح عند عمته يتغدى معاهم الأول و بعد كده عمته و جوزها يسيبوه يقعد معاها على جمب لوحديهم و بعد ما يتكلم معاها كلام عادي يدخل في الموضوع
ريم انا محتاج اتكلم معاكي في حاجه تخصني قبل أي شيء و بعد كده حتكون ليكي حرية الاختيار و انا ححترم قرارك ايا كان
ريم: اتكلم يا اشرف
اشرف : أنا عايش لوحدي زي مانتي عارفه و ده بحكم اني مرتحتش مع بابا و مراته بعد وفاة ماما الله يرحمها و عيشتي لوحدي خلت مفيش علية قيود بعمل اللي انا عاوزه محدش بيقوللي ده عيب و ده مينفعش انا عارف طبعا الحلال و الحر.. ام لكن اوقات التوجيهات بتبقى مهمه جدا “” فذكر ان الذكرى تنفع المؤمنين”” لكن انا للاسف ملقتش حد يذكرني
كل اصحابي تقريبا ليهم علاقات مفتوحه و حسيت معاهم ان ده شئ عادي مفيهوش حاجه برغم اني اوقات كتير بصللي و ربنا يعلم انا بعمل ايه مع أي حد محتاج و مع الناس اللي عندي في الشركه لكن انا عارف ان ده ميغفرليش اي حاجه انا عملتها
ريم انا كان لية علاقه بواحده علاقتي بيها كانت زي العلاقه بين أي اتنين متجوزين لكن من غير جواز و للأسف انا لسه على علاقه بيها لحد دلوقتي لكن و الله العظيم دلوقتي علاقتي بيها مش اكتر من مجرد اني واقف جمبها لأنها مريضه وعلاجها نسبه كبيره منه في الشفا بتعتمد على النفسيه وانا وعدتها اني حفضل جمبها لحد ما تخف
و بعد كده حقطع علاقتي بيها نهائيا و ده اللي كنت ناوي عليه و الله من فتره لكن من امبارح وانا منمتش و لا لحظه و احساسي اني عاوز اكمل معاكي حياتي مسيطر على كل كياني لكن في نفس الوقت مكنش ينفع ابدا اني اطلب منك اي حاجه جاديه تحصل بيني و بينك قبل ما اعترفلك بكل حاجه لازم اكون صريح معاكي لازم تعرفي مني مش تعرفي من حد تاني لازم اكون امين معاكي و مخبيش عنك اي حاجه
ريم تقدري تسامحيني و تغفريلي كل اللي عملته و تبدئي معايا من جديد و تبقي مراتي حبيبتي ام ولادي
ريم :…………
اشرف : ريم ارجوكي ردي علية اي كلام حتقوليه و الله انا حتقبله بس ردي علية
ريم : أشرف أنا منكرش إن طول عمري و أنا معجبه بيك و بشخصيتك صحيح مكنتش بشوفك كتير لكن ربنا يعلم ان كانت ليك غلاوة جوايا
احنا بشر و كلنا بنغلط و محدش معصوم من الخطأ
و النبي صلى الله عليه وسلم قال : والذي نفسي بيده لو لم تذنبوا لذهب الله بكم، وجاء بقوم يذنبون، فيستغفرون الله -تعالى، فيغفر لهم
و ربنا سبحانه و تعالى بيقول في كتابه الكريم ” الا من تاب و أمن و عمل عملا صالحا أولئك يبدل الله سيئاتهم حسنات و كان الله غفورا رحيما” صدق الله العظيم
ربنا باب توبته مفتوح للعبد يا اشرف و مبيقفلش بابه فوش حد
لكن لازم الصدق و الإخلاص في التوبه مينفعش تسيب الباب موارب مع ربنا و متزعلش مني يا اشرف اللي انا حسيته من كلامك هو انك مش صادق في توبتك مع ربنا لأن من شروط التوبه هو الندم عارف يعني ايه يعني تصر على عدم الرجوع للمعصيه و انت ما زلت فيها مسبتهاش و بتتحجج بانك واقف جمبها و بتساعدها عشان وعدتها طب مين احق يا اشرف وعدك ليها و اللا وعدك لربنا بأنك تتوب ليه
كده انت مقفلتش بابك في وش الشي.. طان يا اشرف كده انت ما زلت فاتحه و ممكن يرجع يتفتح تاني واقوى من الأول كمان انت لو تبت بجد يبقى لازم تقطع العلاقه دي بشكل نهائي و هي ربنا يعفب عنها و يشفيها و يهديها لطريق الحق
اشرف انا اسفه انا مش حقدر ارتبط بيك و لا حقدر اوافق على وجودك فحياتي و انت في حاجه جواك لواحده تانيه سواء كان اعجاب حب شفقه عطف ايا كان المسمى مش حقدر اتقبل بحاجه زي دي غصب عني مش حقدر و اكيد انت مترضاليش بوضع زي ده يا اشرف
انا طبعا بحترم فيك جدا مصارحتك لية بحاجه انا كنت ممكن معرفهاش و ده يثبتلي انك فعلا عاوز تبدأ علاقتنا بنقاء و شفافيه و عشان نبداها صح يبقى خد وقتك يا اشرف و لما تكون صادق مع ربنا و مع نفشك وقتها حقولك إني موافقه اني اكون مراتك
اشرف : انتي مقامك عالي عندي اوي يا ريم و عمري ما حرضالك بأقل من اللي تستحقيه اوعدك يا ريم ان من اللحظه دي مش حيكون في واحده فحياتي غيرك انتي و بس و اول حاجه حعملها دلوقتي و قبل حتى ما اعرف ردك علية اني حقدم عالحج السنه دي ان شاء الله و لعل ربنا يغفر لي بيه ذنوبي
ريم : الحج المبرور ليس له جزاء الا الجنه
بس استنى عندك هو انت عاوز تطلع حج لوحدك و اللا إيه
اشرف : مش فاهم قصدك ايه
ريم : قصدي مش يمكن يعني نطلع الحج سوى
اشرف بفرحه : بجد بجد يا ريم
ريم : لو صدقت النيه حيبقى بجد ان شاء الله و قول يارب
اشرف : يارب
………………………………
بعد مرور عدة أيام
تدق الأفراح أبوابها و تعلن سعادتها بتلك الليله الجميله التي تجمع الاهل و المقربون فقط انه حفل بسيط لإعلان خطبة أدهم و بيسان و مراد و جيلان
أدهم : مبروك يا عروستي
بيسان : الله يبارك فيك يا ادهومتي
أدهم : يا لهوي يا لهوي لاء بقولك ايه انا أعصابي بتبوظ بسرعه يعني بالراحه كده علية بدل ما اشيلك و اجري بيكي على بيتنا
بيسان : هههههههه تحفه و ربنا
أدهم : بحبك يا بسبوسه
بيسان : بسبوسه
أدهم : بسبوسه بالسمن البلدي و القشطه و المكسرات يا لهوي ده انا بصي حخليكي زي البطه اللي بزغطها بايدي
بيسان : انت بتقول ايه انا مش فاهمه حاجه
أدهم : مش مهم تفهمي انا عاوزك كده بهبلك و عبطك ده
بيسان : هههههههه
أدهم : أيوة هو ده انا عاوزك تضحكي و بس مش طالبه معايا حاجه تانيه الصراحه
بيسان : أنا مش فاهمه ادهم بليز وضح كلامك
أدهم : يليز انتي ابوس ايدك متبصليش كده بعنيكي يخرببيت فقرك حروح في ايدك و ربنا و انا ماسك نفسي بالعافيه اساسا
بيسان : انا قلت حاجه ضايقتك يا أدهم
أدهم : يا لهوي على أدهم و اللي خلفوا أدهم لاء و ربنا الخطوبه دي ما حتنفع انا عاوز اعرف مين اللي قال خطوبه انا مش عاوز خطوبه انا عاوز اتجوز يا ناس جوزوني الله يخليكم : هادي يا هادي
هادي : عاوز ايه اتهد بقى
أدهم : عاوز اتجوز
هادي : تتجوز ازاي يعني
أدهم : زي الناس هاتوا المأذون و اكتبوا كتابي عالبت دي حالا
هادي : ادهم روح اقعد يا حبيبي جنب عروستك و خللي ليلتك الحلوة دي تعدي على خير بدل ما تقلب على دماغنا كلنا
أدهم : لاء انا مليش دعوة مانا مش بعد ما قعدت جمبها القعده دي و لبستها دبلتي و شبكتي تاخدوها مني و انا ارجع قفايا يقمر عيش
هادي : يقمر عيش بزمتك دي الفاظ دكتور بيطري اد الدنيا على رأي مراد عشرتك للبهايم عبطتك
أدهم : بقولك ايه بلا دكتور بلا سباك انا عاوز اكتب كتابي يا ناس عاوز اتجوز يا هوه
هادي : طب اهدى حبيبي اهدى يا جميل بص يا ادهم بص مراد ما شاء الله عليه قاعد هو وجيلان بيتكلموا مع بعض في هدوء ازاي و حتى بيضحكوا من غير صوت يا دوب ابتسامة مش اكتر اتعلم منهم يا ادهم
ادهم و هو بيرفع شفه من شفايفه لأعلى : اتعلم من مين يا حبيبي من ده و هو ده ايه فهمه في الحب من أساسه ده تساله في الارض السنه دي حتتزرع ايه تساله عن الفرق بين الري بالرشاش و الري بالتنقيط لكن الحب ده تسيبهولي انا
هادي : تنقيط و الله ما حد حينقطني غيرك يا بني ارحمني بقى بص حقولك هو انت اخويا معندكش لسان ابوها عندك اهوه روح قولله بس انا مش مسئول عن الي حيعمله و لو مسك الشبكه رماها فوشك متجيش تعيطلي الله يخليك
أدهم : لا و على ايه الطيب احسن انا رايح اقعد جمب خطيبتي و اشبع منها شويه قبل ما تاخدوها مني يا جبابره
أدهم يمشي و هو بيضحك و يروح عند مامته جميله و مرزوقه و يبوس ايدهم و يقعد معاهم : أنا اسعد واحد في الدنيا كلها كل واحد عنده ام و انا عندي احلى امين في الدنيا كلها
جميله : يا حبيبي يا بني ربنا يسعد قلبك و يقوملك مراتك بالف سلامه يارب
هادي : يارب يا ماما يارب مراتي و نجلاء و خديجه ربنا يقومهم بالف سلامه يا رب
عند مراد و جيلان
مراد : مبسوطه يا جيجي
جيلان : ايوه الحمد لله
مراد : ربنا يقدرني يارب و اسعدك يا جيجي
جيلان : ربنا يخليك لية يا مارو
مراد بحزن : مارو
جيلان : مالك يا مراد في حاجه
مراد : لا يا حبيبتي بس افتكرت سليم الله يرحمه مكنش بيقوللي غير مارو
جيلان : ربنا يرحمه يارب
مراد : يارب يا جيلان تعرفي يا جيلان انا نفسي في ايه
جيلان : نفسك في ايه يا مراد
مراد : نفسي ربنا يكرمنا لما نتجوز و نجيب سليم
جيلان : ان شاء الله يا حبيبي
مراد : حبيبك
جيلان تبص في الأرض و تتكسف
مراد : أحلى حاجة بحبها فيكي كسوفك ده ربنا يباركلي فيكي يا رب يا جيجي
يروح فهد ناحية فاروق يلاقيه قاعد و هو بيمسح عيونه : عمي فاروق حضرتك بتعيط يا عمي
فاروق و هو بيمسح عيونه : غصب عني يا فهد يا بني افتكرت سليم طول عمره كان مستني اليوم ده كان يقوللي انا يوم ما افرح بادهم و مراد حرقص رقص كان بيعتبرهم ولاده مش اخواته راح يا حبيبي خد ابنه و راحوا هما ارتاحوا و سابولي انا الوجع و القهره على فراقهم
فهد : ربنا يرحمهم يا رب يا عمي ادعيلهم هما دلوقتي فمكان احسن من هنا بكتير
فاروق : ربنا يرحمهم يارب. اخبار القضيه ايه يا بني انا قلبي مش حيرتاح غير لما هادي اسمه يرجعله بقى و حقه ياخده و اشوف اسماعيل و هو بياخد جزاؤه اللي يستحقه
فهد : اطمن يا عمي انا و الله ماشي في القضيه و قريب اوي ان شاء الحق حيرجع لصحابه
بقولك ايه يا نجلا انتي و جنه بكرة حاخدكم و ننزل سوى نشتري حاجات للبيبيهات
نجلاء : حبيبتي يا لولو ماشي يا قمري
جنه : و الله العظيم اللي يشوفكم و انتوا بتتكلموا مع بعض مش ممكن يقول انكم مرات ابن و حماتها ابدا ده انتم و لا اتنين صحاب
الهام : مراة ابن ده ايه دي نجلا دي بنوتي القمر و حبيبة قلبي
و انتي كمان حبيبتي يا جنه ربنا بكملكم على خير يا حبايبي يارب
………………………………………
انتي لابسه دلوقتي و رايحه فين يا ذكرى
ذكرى : عندي مشوار مهم لازم اروحه يا همسه
همسه : و انتي تعبانه كده يا ذكرى.
ذكرى : انا كويسه متقلقيش علية بس لازم انزل دلوقتي و مش حتاخر
همسه : طب اجي معاكي
ذكرى : لاء مينفعش انا حروح لوحدي
متقلقيش يا حبيبتي مش حتاخر صدقيني بس لازم اعمل المشوار ده دلوقتي
تنزل ذكرى و تسأل عن العنوان و تقف بالعربيه ادام المكان اللي وصلتله
تخبط عالباب تلاقي واحده بتفتحلها : أيوة مين حضرتك
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية احتواء قلب)
