رواية احببتها في وقت خاطئ الفصل الثاني 2 بقلم ندى سامي
رواية احببتها في وقت خاطئ البارت الثاني
رواية احببتها في وقت خاطئ الجزء الثاني
رواية احببتها في وقت خاطئ الحلقة الثانية
رنيم بنعاس : انت رايح فين !؟
بدر ببرود : رايح الشغل و خارج مع صحابى بعدها متستنينيش
رنيم بغيظ : وانت مين قالك انى هستناك اصلا و بعدين ما تحترم أننا لسه متجوزين امبارح رايح تخرج مع صحابك و تروح الشغل!
بدر باستفزار : اظن ملكيش فيه و ياريت تفتكرى أن محدش فينا طايق التانى و مش متجوزين عن حب حتى
قال كده و خرج و هى بصت مكانه بعصبية و كانت عايزه تروح تجيبه من شعره بس هدت نفسها و دخلت تاخد دش و خلصت و نزلت تحت لقت المساعدين مجهزين الفطار على السفره فراحت تقعد عشان تاكل
( صحيح نسيت اقولكو بدر كان عايش مع باباه فى فيلا و كان ليه فيلا تانيه اصغر شويه و دى الى هما قاعدين فيها دلوقتى )
_______________________
فى الشركه
دخل بدر المكتب بتاعو و ونس لمحو فراح وراه باستغراب
ونس : انت ايه إلى جابك يبنى
بدر : يعنى ايه ايه إلى جابك
ونس : انت مش امبارح كان كتب كتابك و المفروض تقعد مع مراتك
بدر : هى بقت مراتى خلاص
ونس : انت اهبل يا بدر
بدر : فى ايه ونس صوتك احنا فى الشركه
ونس : اوطى صوتى ايه انت سايب مراتك تانى يوم كتب الكتاب و جاى الشركه !! انت حتى مهتمتش للناس إلى هتقعد تتكلم عليها قبل عليك
بدر : ميهمنيش فعلا هى متخصنيش فى حاجه عشان تخاف عليها من كلام الناس
ونس بغضب مكتوم : انت حر يا بدر بس متجيش تندم فى الاخر على طريقتك دى
خرج و رزع الباب وراه و بدر بص بحزن و فى نفس الوقت عصبيه من رنيم إلى ظهرت فجأه و خلت صاحبو يتعامل معاه كده بسببها و بعد شويه هدى و رجع يركز فى الشغل لحد ما عدى ساعات و خلص و كلم صحابو إلى طبعا من ضمنهم بنات عشان يخرجو
_______________________
فى الفيلا
رنيم : يارب الساعه 8 و لحد الان مفيش حاجه تتاكل حتى هما المساعدين إلى هنا جايين يعملو فطار بس
سكتت شويه و هى بتفكر و بعدين قامت دخلت المطبخ ملقتش حد فطلعت حاجات كتير و عملت صنيه مكرونه و دخلتها الفرن و راحت تقعد لحد ما تتحمر
_______________________
عند بدر
دخل بدر كافيه و كان فى شله كبيره قاعده على تربيزه فراح ناحيتهم و هو بيسلم و قعد جمب نيلى
بدر : ايه يا شباب عاملين ايه
الكل : الحمدلله
بدر : ازيك يا نيلى
مردتش عليه فقال : نيلى !!
نيلى : نعم ؟
بدر : مالك
نيلى بتمثيل الزعل : انت مش مطنشنى بقالك فتره و فى الاخر عرفت انك اتجوزت جاى تكلمنى دلوقتى ليه بقى
بدر : يا حبيبتى دى جوازه كده و كده على الورق بس عشان بابا مش اكتر و لو مكنتش اتجوزتها كان هيطردنى من الشركه و يسحب كل فلوس فى البنك
نيلى : يعنى انت مش بتحبها و بتحبنى
بدر بتردد : اه طبعا
نيلى بضحك : ماشى يا حبيبى
ابتسم و سكت و هما كملو كلام و طلبو اكل ياكلو و عدى وقت و بدر قام عشان يمشى و خد نيلى يوصلها
_______________________
فى الفيلا
كانت رنيم قاعده بتتفرج على التليفزيون و لقت فونها بيرن و كان شناوى
رنيم : السلام عليكم
شناوى : و عليكم السلام .. ازيك يا بنتى
رنيم : الحمدلله حضرتك عامل ايه
شناوى : بخير الحمدلله .. قوليلى هو بدر عندك
رنيم بتوتر : بدر اه اه بدر هنا
شناوى : من غير كدب يا رنيم
رنيم : الصراحه كده مش هنا
شناوى : يعنى هيكون راح فين
رنيم : نزل الشغل الصبح و خارج مع صحابو
شناوى : ماشى يا بدر انا هتصرف المهم يا بنتى متقوليش انى كنت بكلمك تمام
رنيم : تمام
فى الوقت ده دخل بدر فقالت : طيب يا بابا سلام
شناوى فهم أن بدر جه فقال : سلام
بدر : ايه الريحه دى
رنيم : ريحه ايه
بدر : فى ريحه شياط أو حريقه
رنيم : لا تلاقى برا أو … نهااار ازرق المكرونه
قالت كده و جريت بسرعه على المطبخ و لقت دخان كتير فراحت للفرن و حاولت تقفلو معرفتش من السخونيه فبدر جه و جاب فوطه و قفل بيها الفرن و فتحو الشباك عشان الدخان يطلع
بدر بعصبيه : انتى ايه يا بنتى انتى معندكيش ريحه المسؤوليه خالص سايبه الاكل على النار و قاعده برا بتتفرجى على التليفزيون و بتتكلمى فى الفون و سايباه يعنى حتى الحاجه الى المفروض تبقى فالحه فيها فاشله افرضى المطبخ كان ولع دلوقتى
رنيم حست بضيق من كلامو هى عارفه انها غلطانه بس مش لدرجه انو يقول كل ده
بدر بزعيق : ما تردى عليا
رنيم : انت بتزعق ليه
بدر : لا ابدا كنتى هتولعى فى البيت بس حاجه بسيطه
رنيم : مكنش قصدى اكيد انا بس نسيت عشان كنت قاعده برا
بدر : مدام بتنسى بتتزفتى تدخلى المطبخ ليه
رنيم : ممكن تبطل تزعق و بعدين دى مش اول مره ادخل المطبخ يعنى انا كنت بطبخ من ساعه ما ماما الله يرحمها اتوفت مجتش على المره إلى نسيت فيها يعنى
بدر بصلها بعصبيه و قله صبر و خرج برا المطبخ و طلع الاوضه وهى فضلت واقفه بتبص للصنيه بحزن
رنيم بدموع : هاكل ايه انا دلوقتى
قالت كده و خرجت برا و عيطت فجأه مش عشان المكرونه اتحرقت لا عشان لقت فرصه تعيط بس من الضغوطات إلى عليها و كمان عشان الثانويه و بعد دقايق نزل بدر إلى اتصدم لما لقاها بتعيط و راح قعد جمبها
بدر باستغراب : انتى بتعيطى ليه
رنيم بشهقات : مش بعيط
بدر : لا بجد امال ايه ده الدنيا بتمطر على وشك يعنى
رنيم : ملكش دعوه
بدر : انتى بتعيطى عشان المكرونه
رنيم بكدب : اه
بدر : ليه يعنى
رنيم : عشان مكلتش من بدرى و كنت جعانه و كمان تعبت فيها
بدر : طب خلاص هطلبلك كنتاكى
رنيم بفرحه طفوليه وهى بتمسح دموعها بكم البيجامه : احلف
بدر بضحك على منظرها : والله
رنيم بابتسامه : ربنا يخليك والله انت رجوله
بدر ضحك عليها و هو مركز على تفصيلها و وشها إلى احمر من العياط و هى خدت بالها فلفت وشها وهو فاق و قام عشان يطلب الاكل و فعلا طلب وبعد وقت كان جه وهى قعدت تاكل و هو طلع ينام
_______________________
تانى يوم
رنيم كانت قاعده فى الاوضه بتذاكر الصبح بدرى قبل ما تنزل الدرس لقت بدر داخل عليها و هو متعصب
بدر بزعيق : انتى بتشتكينى لبابا !!!
رنيم : انت بتقول ايه
بدر : زى ما سمعتى بتكلمى بابا تشتكيله منى ليييه انتى مين اصلا عشان تشتكينى
رنيم : اشتكيك ايه مش فاهمه حاجه انا هشتكيك ليه اصلا
بدر : يمكن عشان سيبتك امبارح و نزلت
رنيم : انا مشتكتش هو سألنى وانا قولت إلى حصل بس
بدر : لا والله لا حاجه بسيطه فعلا ظلمتك
رنيم : ممكن تخرج عايزه اذاكر قبل الدرس
بدر : درس ايه
رنيم : عندى درس تاريخ
بدر : اه صح انا نسيت انك لسه فى ثانوى
رنيم بصتله شويه فقال : متمشيش لوحدك ابقى قولى للسواق يوصلك و يرجعك
رنيم : لا انا عايزه اروح لوحدى مش عايزه العيال بتوع الدرس يفضلو يتكلمو
بدر : ما يتكلمو هما مالهم .. اعملى إلى قولتو سامعه
قال كده و خرج و هى بصت مكانه بغيظ و رجعت كملت مذاكره بس مكانتش عارفه تركز كويس لحد ما خلصت و قامت تلبس عشان الدرس و فعلا لبست و خرجت من الفيلا لقت السواق واقف مستنيها فركبت معاه و راحت الدرس و هو فضل واقف برا
_______________________
فى الشركه
كان بدر وصل و داخل الشركه فمحمد شافو و راحلو
محمد : بدر يا ابنى ازيك
بدر : الحمدلله ازى حضرتك
محمد : الحمدلله هى رنيم عامله ايه
بدر : كويسه
محمد : ونبى يا ابنى خلى بالك منها دى هبله اصلا و اقف جنبها الايام دى عشان الثانويه
بدر : حاضر يا عمى متقلقش
محمد : ربنا يخليك يا ابنى هسيبك انا
مشى و بدر دخل المكتب و قعد يشتغل شويه و بعد وقت دخل عليه ونس
ونس : بدر يلا عشان الاجتماع
بدر : حاضر
ونس كان لسه هيمشى وقفو بدر : ونس انت فعلا مضايق منى عشان رنيم !؟
ونس : انا قولتلك قبل كده يا بدر حتى لو انت مش طايقها اعمل حساب أنها مراتك و كمان لكلام الناس لما تلاقيك سايبها بعد الجواز كده على طول
بدر : يعنى افضل حابس نفسى فى البيت ما انت عارف انى مش بحب اقعد فى البيت
ونس بغمز : مع الوقت هتحبو متقلقلش
بدر بفهم : لا يا بابا انسى الى فى دماغك ده مستحيل اصلا
ونس : هنشوف المهم يلا عشان الاجتماع
قام معاه و هو مبسوط انو رجع يهزر معاه تانى و دخلو الاجتماع
_______________________
عند رنيم
نور : ماشاء الله جايبينلك سواق
رنيم : يا بنتى ده مرار بجد بقولو هروح لوحدى يقولى لا و اجبرنى اروح مع السواق
نور : يا ستى مش احسن ما تتمرمطى فى المواصلات
رنيم بضحك : عندك حق .. يلا تعالى اوصلك
نور : لا يا ستى انا هروح انا كده كده قريبه من هنا
رنيم : بدل ما تتمشى يلا
خدتها و ركبو و قالت للسواق على بيتها و وصلتها و مشيو
( نور 18 سنه ببشره متوسطه و عندها غمازات و قمر اوى و طيبه و بتحب تهزر .. صاحبه رنيم من و وهما فى اعدادى و بيحبو بعض اوى و على طول مع بعض )
_______________________
فى الشركه
خلصو الاجتماع و ونس راح مع بدر المكتب
ونس : انت هتروح ولا هتعمل ايه
بدر : هخلص كام حاجه هنا كده و همشى يعنى قول ساعه ساعتين
ونس : ايوه هتمشى هتروح فين هتقابل نيلى !؟
بدر : ايه المشكله ما انت عارف انى بحبها
ونس : انت كداب يا بدر يعنى بذمتك انت بتحب نيلى يعنى هتسيب كل البنات المحترمه الى فى الدنيا و هتحب نيلى !!
بدر بتشتت : اه عادى
ونس : راجع نفسك يا بدر عشان انت مش بتحبها انت بس بتسلى وقتك معاها … انا راجع المكتب
ونس مشى و بدر قعد بفكر كتير هو فعلا مش بيحب نيلى هو بس بيضيع وقتو معاها و بيسلى وقتو معاها زى ما قال و بعد تفكير كتير سكت و قرر يرجع يكمل شغل
_______________________
فى الفيلا
رنيم رجعت و غيرت و قبل ما تقعد تذاكر قالت تكلم محمد و فعلا رنت عليه فيديو كول و بعد دقايق رد
رنيم : حووووده واحشنى يا راجل بقى كل ده متكلمنيش
محمد بضحك : وحشتينى اكتر يا مصيبه و بعدين قولت اسيبك يومين كده و كمان سألت بدر عليكى قال انك كويسه
رنيم بحزن مصتنع : يعنى بتكلم بدر و مش بتكلم بنتك يا حج يرضيك
محمد بضحك : يا هبله ما بدر مدير فى الشركه
رنيم : مش مهم مش هتفرق
محمد : المهم عامله ايه فى المذاكره
رنيم : طبعا يا حج انت عارف ان كل حاجه قسمه و نصيب و أن النتيجه دى مش بأيدنا و أن الست مكانها بيت جوزها الى هو انا فيه حاليا فمش لازم نسأل على المذاكره اوى
محمد : وربنا هبله يا بت مفيش حاجه هتنفعك غير المذاكره دى
رنيم : معاك حق يا حجوج بس الواحد مش قادر يستمر
محمد : انتى قدها يا حبيبتى انا واثق فيكى
رنيم : ادعى كتير ونبى
محمد : بدعيلك والله .. المهم روحتى درس انهارده
رنيم : اه روحت و البت نور اتفاجئت من السواق إلى ودانى
محمد باستغراب : سواق ايه
رنيم : ما يا حوده طبيعى ناس زيهم صحاب شركات اكيد عندهم سواقين بس الى شاغلنى بقى أن المساعدين إلى هنا بيبقو موجودين الصبح بس عشان الفطار
محمد : يمكن ليهم مواعيد
رنيم : لا ما هو انا مش هذاكر و اطبخ انا روح يا ناس مش كده
محمد بضحك : قوليلو يا اختى لو عرفتى .. هقفل انا دلوقتى عشان الشغل
رنيم بضحك : ماشى يا حبيبى سلام
قفلت معاه و هى بتضحك و مبسوطه و قعدت تذاكر و بعد ساعات كان بدر رجع
بدر : انتى رجعتى امتى
رنيم : من ساعتين كده
بدر : كلتى !؟
رنيم : لا .. صحيح هما المساعدين مش بيجو غير الصبح ليه
بدر : عشان المفروض هما بيجو ينضفو اصلا بس قولتلهم يعملو فطار بالمره كل يوم هما اتنين بس اصلا
رنيم : طب ابقى هات حد للغدا كمان ونبى عشان انا معنديش وقت اقف اعمل اكل
بدر : لولا انى عارف معاناه الثانويه كنت قولتلك وانتى لازمتك ايه
رنيم بغيظ : والله انت عارف انت متجوز واحده قد ايه و فى سنه كام فاستحمل بقى
بدر بصلها بعصبيه و دخل الحمام يلبس و بعد شويه خرج و كلم حد طلب اكل بيتى جاهز لحد ما يشوف مساعده و بعد ساعه كان الاكل جه
بدر : الاكل جه لو ناويه تاكلى
رنيم قامت بتعب و نزلت و قعدو ياكلو و خلصو و رجعت تانى فوق عشان تذاكر و بعد ساعه طلع بدر عشان ينام لقى رنيم نايمه على الكتب و باين عليها الإرهاق
بدر : رنيم رنيم اصحى
رنيم بنوم : اممم
بدر : قومى نامى على السرير
رنيم قامت براحه و راحت رمت نفسها على السرير و نامت بتعب و بدر بصلها شويه و نام هو كمان
_______________________
بعد شهر ونص
عدى فتره و رنيم كانت خلصت امتحانات و كانت مبسوطه جدا لدرجه انها قضت اغلب وقتها نايمه بس بدر كان مخليها تعمل حاجات كتير فى البيت بما انها خلصت امتحانات و هى كانت بتعمل حاجه اه و حاجه لا و طبعا كانو بتخانقو كتير و بدر كان بيقلل خروج مع نيلى و بقى يقعد فى البيت عشان بقى يحب اى فرصه تيجى و يتخانق مع رنيم
_______________________
فى فيلا الشناوى
شناوى : بدر
بدر : نعم يا بابا
شناوى : فى حفله كبيره تبع الشركه هتبقى كمان اسبوع و فى رجال أعمال كتير وانا للاسف مش هعرف اروح فروح انت و خد معاك رنيم
بدر : طب يعنى اروح انا ماشى بس اخد رنيم معايا ليه
شناوى : يعنى ايه ليه هى مش رنيم دى مراتك ولا انا بيتهيقلى
بدر : وانا لما اروح ماسك فى ايدى عيله و اقولهم مراتى الناس إلى هناك هتقول ايه ما طبيعى تتريق
شناوى : إلى قولتو يحصل يا بدر و لو حد اتكلم انت سهل تقف قصاده و صحيح تبعت تجيبلها احسن فستان للحفله
قال كده و خرج من المكتب لقى رنيم قاعده برا و بتتكلم مع كبيره الخدم عند شناوى و بتهزر معاها فراح ناحيتهم
شناوى : طلعتى عشريه
_ عن اذنك يا فندم هروح انا
شناوى : لا يا سميره خليكى مش بقول كده عشان تمشى
رنيم : بجد هى عسل اوى و حبيتها حسيتها زى ماما الله يرحمها
سميره : يا حبيبتى انتى الى قمر والله ربنا يخليكى يا ست هانم
رنيم بزعل : ست هانم تانى انا قولت لحضرتك اسمى رنيم بس انا مش ست هانم انا ده انا قد بنتك
سميره بابتسامه : ماشى يا رنيم
رنيم : حبيبتى والله خدى بوسه
كل ده كان بدر واقف و بيتفرج من بعيد و هو مبتسم و كان عاجبو تعاملها مع سميره و شناوى خد بالو انو واقف بيتفرج و مبتسم فابتسم هو كمان بخبث و بدر خد بالو فكشر فجأه وراح ناحيتهم
بدر : يلا يا رنيم عشان نمشى
رنيم : خلينا شويه ونبى ببقى زهقانه فى البيت مصدقت أخرج
بدر : رنيييم يلا
شناوى : متزعقلهاش
رنيم : طب ينفع نروح لبابا !
بدر بقله حيله : تمام يلا
قامو و مشيو من عند شناوى و راحو لمحمد إلى اول ما شافهم فرح و حضن رنيم و قعدو مع بعض حبه و هما بيضحكو و يهزرو و مشيو
_______________________
بعد اسبوع
بدر : يلا يا رنيم هنتأخر مش كفايه جايبك معايا
قعد بملل و هو بيستناها و فجأه …
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية احببتها في وقت خاطئ)
