رواية ابتلائي الفصل السادس 6 بقلم حبيبة شداد

للمرة اللي معرفش عددها اتقدمت بس اللي حصل خلاني مستغرب برغم سعادتي

^الو السلام عليكم ورحمة الله وبركاته ازيك ي بني

=وعليكم السلام ورحمة الله وبركاته ازي حضرتك ياعمي

^ الحمد لله يابني. كنت عاوزك تنورنا بكره الساعة ٩ان شاء الله عاوز أقعد معاك

= حاضر ياعمي جزاكم الله خيرا كثيرا

^ وجزاكم يابني سلام عليكم

= وعليكم السلام ورحمة الله وبركاته

قفلت معاه وانا طاير من الفرحة بس قلقان وخايف يحصل حاجة تزعلني وتخليني أبطل محاولة قلقان مش أبعد عنها يارب يسر لي أمري

فات اليوم وتاني يوم رحت شغلي وأنا لساني مستمر بالذكر عسى ربنا يقضي حاجاتي خلصت وصليت العشاء واستعديت عشان أكون هناك في المعاد

= السلام عليكم ورحمة الله وبركاته ازي حضرتك ياعمي

^ وعليكم السلام ورحمة الله وبركاته ازيك ي بني . اتفضل

= الله يكرمك يارب

^ والله يابني خلينا ندخل في الموضوع على طول أنا شوفت منك إلحاح في الزواج من بنتي أنت تعرفها؟ أو بمعنى أصح ليه الإلحاح الغريب ده؟

= والله ياعمي عشان أكون صريح مع حضرتك أنا معرفهاش أنا بس شوفتها مرة من ٧ سنين كنت أنا لسه في ٣ ثانوي بس معرفش عنها اي حاجة.

^ هو ده السبب اللي خليك ملح عليها للدرجة دي؟

= ايوه ياعمي لأني ملقيتش حد فيه المواصفات اللي بتمناها غيرها

^ ماشي يابني ربنا يقدم اللي فيه الخير ان شاء الله بس بيني وبينك أنت أصغر منها وده ممكن يعرضك لعدم التوافق الفكري

= العمر ماهو إلا رقم ياعمي زي ماقولت لحضرتك وأنا الحمد لله اتعاملت مع الناس واعتمدت على نفسي من صغري ف فاهم الدنيا وان شاء الله ربنا مايجعل بينا عدم توافق

^ ربنا يقدم اللي فيه الخير ان شاء الله يابني .

= يارب ياعمي

^ لحظة واحده وجايلك

= اتفضل ياعمي

فات كام دقيقة ولقيت حد.بيلقي السلام رفعت رأسي واتفاجأت

_ السلام عليكم ورحمة الله وبركاته

= وعليكم السلام ورحمة الله وبركاته

قعدت وأنا نبض قلبي بقى مش منتظم حاسس اني بطلع نار من وشي المفروض هي اللي تبقى حرانه ووشها أحمر وهي كده فعلاً بس أنا مالي ده انا العريس يعني أكون انا الجرئ والثابت . ثابت اي بس ده انا قلبي هيتخلع من كتر النبض . أتكلم والدها وكسر الصمت اللي احتلنا

^ حبيبة يادكتور أويس

= أهلا بك ياآنسة حبيبة

_ أهلاً بحضرتك

= أنا اسمي أويس عندي ٢٥ سنة أنا دكتور صيدلي شغال في شركة…… للأدوية وبفضل الله عندي صيدلية خاصة الحمد لله منتظم في الصلاة وحافظ القرآن

_ اللهم بارك . تشرفت بحضرتك

= شرف الله وجهك وعظم أجرك يارب

عُدنا للصمت من جديد بعد ماعرفت عن نفسي لحد ماوالدها قال

^ حابة تسألي دكتور أويس حاجة ياحبيبة؟

_ ده بعد إذنك طبعاً ياوالدي وإذن الدكتور

^ اتفضلي .

= أكيد طبعاً اتفضلي

_ أنا بفضل الله مُعلمة قرآن وبسعى في طلب العلم فهل لو ربنا قدر وحصل نصيب هيكون فيه اعتراض من حضرتك؟ أو إني أوقف شغلي ك معلمة

= لا طبعا. طلب العلم جِهاد في سبيل الله والمعرفة عن الله واجبه وان ربنا قدر لنا ف أكون لك عونا بأمر الله أما بالنسبة للشغل ف دي حاجة ترجعلك بس طبعاً الأولى تربية الأطفال ورعاية الزوج إن كان باستطاعتك الموافقة بينهم ف أكيد مفيش مانع أهم حاجة عندي أولاد صالحين بأمر الله

_ بأمر الله .حضرتك عندك سؤال؟

= لا ان شاء الله

^ ربنا يقدر اللي فيه الخير يابني

= يارب ياعمي . بستأذنك ياعمي وشكرا على الاستقبال الكريم ده

^ الشكر لله يابني ربنا يقدر الخير . ان شاء الله يوصلك الرد في أقرب وقت

= بأمر الله ياعمي. السلام عليكم ورحمة الله وبركاته

^ وعليكم السلام ورحمة الله وبركاته

——————-

^ ها ياحبوبة اي رأيك

_ اللي تشوفه ياوالدي

^ أنا شايف ان الشاب كويس وسألنا عليه وطلع إمام مسجد ومحفظ قرآن بالقراءات وهو ماأخبرناش ب ده وده ان دل على شئ ف يدل على إخلاصه في عمله مش رياء وان زي ماقال العمر مجرد رقم أهم حاجة العقلية وده هتعرفيه وتحدديه في فترة الخطوبة

_ ان شاء الله ياأبي . ع خير ان شاء الله

^ خلاص انا مستني منك تصلي استخارة وتعرفيني

_ حاضر ان شاء الله

________________________

مشيت وأنا مش مصدق نفسي هو بجد شوفتها بجد القمر ده هيكون نصيبي ده يابختي بجد يارب تبقى نصيبي يارب . وصلت البيت وألقيت السلام علي أهلي وبلغتهم باللي حصل و ب رد والد حبيبة ودعولي . دخلت اوضتي وفات دقايق ولقيت عائشة بتستأذن تدخل

& السلام عليكم

= وعليكم السلام ورحمة الله وبركاته ازيك ياعائشتي . وحشتيني الشوية دول

& بخير طول ماأنت بخير يا حبيبي . وأنت كمان وحشتني الشوية دول

قولي عملت اي في الرؤية

= اممم يابت نفسي مرة تدخلي عليا كده تقولي أخويا حبيبي فاقد الشغف كده وداخله اونسه ب مج شاي بلبن مع شوكلاتايه وطبق سناكس كده

نفسي متدخليش عليا عشان مصلحة

& أنا ياأوسو اخس عليك ياأخي اما أنت أخ مش جدع بصحيح

= ماشي شوفي بقى مين هيحكيلك

& عادي يا حبيبي هروح ل معلمتي تحكيلي

= ايوه شاطرة يلا بقى شدي الباب في ايدك

وقفت ل ثواني

& ايي ما. ما . ما

= اي يعائشة ياحبيبتي اتقلبتي معزة وبتماءماءي ليه

& ما عايزة أسمع منك أنت

= تدفعي كام

& قلبي . أدفعلك قلبي

= بتثبتيني ياعائشة . ماشي ياأختي اقعدي اما احكيلك

باستني من خدي وقالتلي

& حبيب قلبي يعيش أوسو يعييش

= حكيتلها كل اللي حصل بالتفصيل و

يااه ياعائشة تعرفي القرآن بيخلي الإنسان حلو اوي أحلى من القمر بدون مبالغة القرب من ربنا بينور اوي ياعائشة

& أصلاً معلمتي قمورة اللهم بارك

= دي عيونك اللي قمر ياقمري

& حبيبي .

= قومي يابه اي اللي حبيبيييي قاعد مع واحد صاحبي أنا

& استنى بس يكون في علمك معلمتي غيورة وهتغير من علاقتنا دي وبقولك اي أمك ولا رحاب ياطه

= ده كلام ياأمي رحاب طبعاً

& مكانش العشم يااخويا

= حبيبي ده أقل واجب

& بس تصدق بالله أنا فرحانه انها هتكون زوجتك بجد بجد أنت تستحقها وهي تستحقك والله وأنا بحبكو أنتو الاتنين

= وأنا بحبك ياعائش

& الله يحبك ياحبيبي . هقوم أنام أنا بقى

= تصبحي على سعادة يا حبيبي

& وأنت من أهلها وهنا أقصد أهل حبيبة

= يارب يارب

& مشيت وأنا بقول ادعي بذمة ياواد

فات يوم واتنين ولقيت الفون بينور باسم والدها

=السلام عليكم ورحمة الله وبركاته .التليفون نور والله ياعمي

^ وعليكم السلام ورحمة الله وبركاته ازيك ي بني ده نورك والله الله يحفظك

= يارب وإياك ياعمي

^ ان شاء الله تنورنا انت وأهلك يوم الجمعه بعد صلاة العشاء

= ان شاء الله ياعمي ربنا يكتبلنا اللي فيه الخير يارب.

^يارب يابني . عاوز حاجة

= تسلم ياعمي الله يباركلك

^ يارب واياك ي بني. سلام عليكم

= وعليكم السلام ورحمة الله وبركاته

___________

قفلت الفون وأنا قلبي بيرقص من الفرحة ياااه دعوة ٧ سنين بقت قدامي ياجدعان لولولولولولولي ده لو مش عيب كنت زغرطت وربنا.

=بت ياعاااائش

& ياعيوني

= زغرطيلي

& اوعا بقى اوعا هو ده الكلام

خرجت ماما على صوتنا العالي

*اي ي ولاد فيه اي

= حضنت ماماومسكت ايديها الاتنين وأنا بلف بيها وأدوخها وبقولها ابنك هيودع العزوبية يابطوط

*طب اقف بس دوختني ياواد.