رواية إسمي حياة الفصل الحادي والأربعون 41 بقلم آلاء اسماعيل
رواية إسمي حياة الجزء الحادي والأربعون
رواية إسمي حياة البارت الحادي والأربعون
رواية إسمي حياة الحلقة الحادية والأربعون
بارت 41 🔥
– مش هأقدر اشرحلك اكثر .. المهم من هنا و رايح هتخفي اهتمام بيها و هتهتمي اكثر بنفسك … اتفقنا؟؟
– ماشي حبيبي 🥰
– طب انتي معادك بكرة الساعة كام
– عشرة الصبح ليه؟؟
-بعدها عندي ليكي مفاجأة …
– مفاجأة ايه
– بكرة هتعرفي 🥰
– يووووه بقى يا حسام ..اومال بتقولي النهاردة ليه ؟
– مش هيبقى اسمها مفاجأة لو قلتلك …
زمت شفايفها بزعل
– طب عشان فضولك بس … عندنا موعد تاني بعد الكشف في كافتريا الحب 🥰
ضحكت حياة: قصدك كفيتيريا الفضايح ؟؟؟ 🙄😂 ..خير ايه المناسبة !؟؟
– بكرة هتعرفي 🥰
-لا انا زعلت منك
– خلاص هقولك و امري لله يا قموصة
حط ايده على السلسلة اللي لابساها و هو بيهمس بحب
انتي عارفة ان الH دي مكنتش قاصد بيها حياة … كنت قاصد اسمي انا ؟؟
ردت بحب و هي بتحط ايدها على ايده اللي لامس بيها الحرف – عارفة .. اومال انا كنت رافضة اشيلها ليه ؟! مش عشان يفضل اسمك جنب قلبي على طول ؟؟
باسها من جبينها بحب : انا ما عشقتكيش من فراغ يعني !
– طب ايه علاقة ده بالمفاجأة
– مش انا حسام و انتي حياة ؟؟يعني HH
– ايوة .
– انا عايزة ولادي اسمائهم كمان كدة HH
– فكرة حلوة و عبقرية طب ايه علاقتها بالمفاجاة برضو ؟
– دي المفاجأة …مش احنا اتفقنا تشيليش السلسلة دي ابدا ؟؟
– ايوة
– انا هآخذ منك الحرف ده و اعدله هيبقى عندك أربعة H بدل واحد
– الله فكرة حلوة اوي ! 😍 طب هات اقترح هنسموهم ايه مثلا
-بصي .. لو ولدين تسميهم انتي …و لو بنتين اسميهم انا
حياة – طب لو ولد و بنت !
حسام – انتي تختاري اسم بنت من الاثنين اللي انا قلتلهم و انا اختار اسم ولد من اللي انتي قلتيهم…ايه رأيك ؟؟! 🥰
حياة – فكرة اوريجينال اوي
حسام بحماس : ماشي ابتدي انا لو بنتين : حنين و حلا ☺️
– الله يا حسام !!! حنين و حلا ؟! حلويين اوووي 🥰
حسام -دلوقت دورك
فكرت شوية بعدين قالت له – لو ولدين هييقوا : الحسن و الحسين احفاد الرسول الكريم عليه الصلاة و السلام
– عليه افضل الصلاة و السلام ….حلو بس اوعي تسمعك شهيرة هتمو’تهم في بطنك 😂
– ايشمعنى هههه
– هتقولك انا اسمي حفيدي حسين ؟؟؟ ده بلدي اوووي 🙄😂
– ههههه لا و على ايه ؟ محدش هيجيب لها سيرة دلوقت 😂
حسام – طب لو ولد و بنت؟!
حياة بحب : انا هأختار اسم حنين🥰
– و انا هأختار هيثم 🥰
– هيثم ايه يا غشاش قلنا واحد من الاثنين مش واحد ثالث !
– ماهوما الإثنين مرتبطين مع بعض ما ينفعش واحد لوحده
عشان كدة عجبني هيثم اكثر !
– بس هيثم مش بالحاء
– بيتكتب ازاي بالإنجليزي ؟؟
مسكت ايده و كتبت بصباعها: HAITHAM
– يبقى ده ايه ؟؟ ايتش ولا مش ايتش ؟؟ يا متعلمة يا بتاعة الإنجليزي ؟؟
– ااااه منك يا نصاب !!! ماشي ..لو ولد و بنت يبقوا
” هيثم و حنين ” 🥰
سعاد – ست هانم معاد الدوا بتاعك
– هي حياة ما رجعتش من بيتهم لحد دلوقت ؟؟
– لا يا ست هانم رجعت من بدري و من ساعتها و هي في اوضتها
– اوضتها ؟؟! غريبة !!!
– هو ايه الغريب يا ست هانم؟
– انتي مالك ؟! حطي الدوا و امشي انتي .
سعاد بضيق : حاضر 😤
– يعني ما عدتش عليا ولا شافت ناقصني ايه ؟؟دي اول مرة تعملها !! تكونش زعلت بجد ؟! طب تزعل ليه يعني ماهي عندها بدل الأم اثنين ..اما الحق اخذ الدوا …سعاد ؟؟ يا سعااااد ….هي حاطاه بعيد ليه !! بنت الورمة قاصدة تبعده عني عارفة اني مش هاقدر اطوووله ااااه يا ظهري ..😰
كانت سعاد داخلة المطبخ لما دخل رشدي الفيلا
– سعاد تعالي هنا
– ايوة يا بيه
– هو حسام رجع البيت ولا لسة ؟!
– لا ده رجع من بدري يا بيه
– و حياة معاه ولا كان لوحده ؟
– لا يا بيه معاه و من ساعتها و هوما في اوضتهم
– هي ستك اخذت الدوا ؟
– طلبت مني احطهولها و اطلع
– طب روحي حضري السفرة و صحي حسام و حياة عشان نتعشى كلنا سوف و انا رايح اشوف الهانم .
– حاضر يا بيه
– خالة بهية خاااالة بهية : الحقي حطيلي اكل للهانم قبل ما تسود عيشتنا كلنا
– طب خمس دقايق بس يكون جاهز
– فيه حاجة غريبة بتحصل يا خالة
– حاجة ايه يا بنت ما تخلينا في اكل عيشنا
– على رأيك ..
– كويس انك جيت يا رشدي ….شوف البنت الناقصة حطتلي الدوا فين …معاده عدى و ما شربتش لسة.
مسك الدوا و قربه منها و اداها الكوباية .
– هي مرات ابنك ما جاتش هنا ؟؟
– سعاد بتقول انها هنا من بدري و مع كدة ما جاتش ولا عبرتني
تخيل !!
– بصراحة معاها حق ..ده أقل تصرف ممكن تتصرفه بعد الفصل البايخ بتاع المستشفى
– يووه بقى يا رشدي !! هو احنا هنفضل نعيد في الحكاية دي كثير !
– على رأيك …قال يعني هيجيب نتيجة لما نعيد!
– رايح فين ؟؟
– اصلي و اتعشى …ليه ؟؟
– هتسسبني انت كمان ؟ انا لوحدي طول اليوم 😓
– ليه ان شاء الله هو انا متعود اقعد معاكي ؟؟
– لا …بس حياة مكانتش بتسيبني أبدا
– يا ستي …اتعودي تبقي لوحدك ده حتى بنتك هتتجوز
طلع و سابها بتفكر بحزن على حالها : صح ! بكرة نور هتجي من هنا و تتجوز و تروح على بيتها من هنا …هأبقى انا و حياة بس !
– طب و بعدين بقى يا حسام ؟! مش هتسيبني اطلع بقى ؟و الله مش حلوة اوي غيابنا كل ده؟؟
– هتطلعي تعملي ايه يعني ؟!
– نتعشى مثلا ؟؟
– بس انا ما لحقتش اشبع منك 🥰
قالها و هو دافن وشه في رقبتها و بيشم في ريحتها بعشق
– جرالك ايه يا حسام ؟؟ و بعدين امك. …
– احنا قلنا ايه ؟؟؟؟ مفيش أمي من دلوقت و انا اول ما أشوف بابا هأكلمه ..مش عايزك تشيلي همها بعد اللحظة دي خالص
سمعوا خبط علباب
حياة – عجبك كدة ؟! 😥
حسام : مييييين ؟؟؟
سعاد من برة : العشاء هيكون جاهز بعد ربع ساعة يا بيه …رشدي بيه مستنيكم
حضنها بحب و هو بيقول بصوت عالي – طب جايين
همسلها بحب : انا هاغير بسرعة و اطلع دلوقت …على ما اتكلم مع بابا تكوني انتي غيرتي هدومك
– حاضر يا روحي 🥰
– بقولك ايه يا سند
– ايوة يا ماما
– هي حياة ما قالتلكش حاجة و انتو جايين ؟؟
– حاجة زي ايه يا ماما
– مش عارفة …حاسة ان مجيتها كان وراها سبب …ده حتى. جوزها مكانش عارف انها جاية ؟
– مش عارف يا ماما …هي كل اللي قالته انها خربت بيت نمل و زعلت اوي و اتخنقت و عشان كدة اتصلت بيا .
-و انت صدقتها ؟؟؟ لا يا سند …مادامت رجعت معاك و سابت الجماعة يبقى أكيد العقربة حماتها قالتلها كلمة ضايقتها
– معقول يا ماما ؟؟
– مش معقول ليه …حياة مش بتشتكي أبدا مهما اتأذت منها بس دلوقت مع هرمونات الحمل و كدة أكيد بقت حساسة اكثر
-ما تقلقيش عليها … اللي انا متأكد منه ان حسام مش هيسمح لها تتجاوز حدودها معاها …الشاب ده جدع و امين و مش هيتخاف على اختي من حد طول ما هو جنبها
– يا رب يا ابني .
– طب ما تقوم تشوف مراتك قاعد بترغي معاي و سايبها لوحدها و هي عروسة ؟
– ماهي كمان بترغي مع امها ايشمعنى انا لأ؟
– طب يالا الوقت انا هشوف نادية تحط السفرة انده لها تتعشى
– حاضر يا ست الكل
– مساء الخير يا بابا
– مساء النور …خير يا ابني عملت ايه مع مراتك ؟ كله تمام
– ما تقلقش يا بابا راضيتها خلاص. ..
– مراتك بنت حلال .. لو واحدة غيرها و الله ما كانت فضلت معاها دقيقة وحدة بعد الكلام اللي سمعته في المستشفى
– و حياة كمان صعبت عليها نفسها اوي .. المهم اني صلحت الموقف …. بس مش عايز اللي حصل النهاردة يتكرر تاني يا بابا
– ازاي با ابني
– انا عايز اكلمك في موضوع قبل ما حياة تجي .
– اتفضل يا ابني خير ؟؟
– بخصوص منيرة اللي انت كنت هتتفق معاها تجي تهتم بيها
– ايوة يا ابني مالها ؟؟
– انا بقول لو أتصل عليها من الصبح عشان تجي تراعي ماما .. حياة دخلت في الخامس و مبقتش تقدر تراعي نفسها حتى و كانت بتجي على نفسها عشان خاطر ماما .. بس بعد اللي حصل مش هاسمح لها تجي على نفسها عشان خاطر وحدة مش شايفاها بنتها .
– معاك حق يا ابني حقك … حاضر انا هأكلمها بعد شوية و نتفق على المرتب و هأخليها تجي من الصبح .
كانت سعاد بتحط في السفرة و شهقت شهقة مكتومة لما سمعتهم : يقطعك يا بعيييييدة !! يعني انتي السبب انها ما رجعتش البيت بعد الغدا؟؟؟
في اللحظة دي دخلت حياة
– مساء الخير يا عمي ☺️
– أهلا يا بنتي ازيك ؟!
حياة بأدب – الحمد لله .. هي طنط اخبارها ايه اخذت الدوا ؟
– ايوة يا بنتي .
سعاد : السفرة جاهزة يا بيه اتفضلوا .
قامت حياة – طب انا رايحة اشوفها اتعشت ولا …
مسك حسام ايدها ؛ هو انتي مش قلتي انك جعانة ؟؟ 🤨
امشي قدامي هنتعشى احنا و ماما هتبقى سعاد تأخذ لها اكل و تساعدها ..مش كدة يا سعاد؟
سعاد : ايوة يا بيه اصلا صينية الأكل بتاعها جاهزة جيت ابلغكم و رايحة لها على طول .
حسام : سمعتي ؟ يالا يا ستي .
قعدوا على السفرة و جابت بهية صحن كوارع حطته قدام حياة : ست هانم انا عملت الكوارع عشانك زي ما وصيتيني بس انتي ما اتغدتيش هنا قلت اجيبهالك عالعشا ☺️
رشدي بدهشة : كوارع في بيتنا ؟! من امتى !! دي شهيرة لو عرفت هتتطربق البيت فوقاني تحتاني عليكم 🙄😂
حطت بهية الصحن : لا ماهي وافقت اطبخها لست حياة … بصتلها حياة بإبتسامة هادية
: شكرا يا خالة ما اتحرمش منك .. تعبتك أكيد بس انا مش عايزاه .. يا ريت تشيليه تاني ..و ابقي خذيه معاكي للولاد و انتي مروحة
بهية بدهشة : ازاي يا ست هانم ؟؟ ده انتي كان طاير عقلك بيه لما الست ..
قاطعتها حياة بإبتسامة : معلش يا خالة بس مليش نفس للأكل الثقيل …عايزة اكل زبادي و سلطة و أنام خفيفة ميرسي اوي
بصلها حسام بشك و ما علقش .
بهية بحزن : حاضر يا ست حياة …زي ما تحبي .
– انتي جاية لوحدك ؟؟ اومال فين حياة !!؟؟
– ست حياة بتتعشى برة مع رشدي بيه و حسام بيه
– بتتعشى برة ؟؟ بس هي متعودة تتعشى معاي
سعاد – حسام بيه طلب منها تتعشى معاه يا ست هانم … اسمحيلي اعدلك المخدة عشان تاكلي
– لا مش عايزة روحي انتي
– بس يا ست هانم الدوا …
– قلتلك امشي من قدامي و اندهيلي بهية !
خرجت سعاد و هي بتهمهم ما بين سنانها
– ان شاء الله عنك ما اكلتي يا بعيدة الهي تنكسر رقبتك المرة دي زي ما كسرتي بخاطر البنت ..
دخلت المطبخ و هي بتتمتم
– مالك يا بنت بتكلم نفسك ليه ؟!
– ولا حاجة يا خالة بهية.. بقولك ايه ! الست شهيرة عايزاكي انتي روحيلها
بهية : حاضر …اقعدي اتعشي انتي
– ست هانم سعاد قالتلي انك طلبتيني
– ايوة يا بهية تعالي ساعديني آكل .. انتي عارفة اني مش بأطيق البت سعاد دي
– حاضر يا هانم…
اكلت شوية بعدين انتبهت شهيرة على تعابير وشها
– و مالك مبوزة كدة ؟؟ في ايه؟؟
– و لا حاجة يا هانم … انا بس اتضايقت لما الست حياة ما اكلتش من الكوارع اللي كانت هتموت عليها .. بعد كل التعب اللي تعبته فيها ببساطة طلبت مني اخذهم معاي للولاد 😥
يا رب بس ما يطلع في الولد وحمة كوارع 😓
سكتت شهيرة و ما اتكلمتش ولا كلمة
-كفاية انا شبعت …
كانت بهية هتطلع لما وقفتها شهيرة
– طب نادي لحياة لو خلصت عشاء عايزاها
– اي خدمة اساعدك فيها انا ؟
– لا محتاجاها هي عايزة ادخل الحمام
– حاضر يا هانم
طلعت بهية و راحت تساعد سعاد في السفرة
– ست حياة .. ست هانم عايزاكي معاها عشان ..
حسام بمقاطعة : حياة تعبانة و رايحين ننام ..يالا يا حياة
حياة بإحراج : بس ..
حسام : يالااااا بينااا
بصت بهية لسعاد بتعجب و حطت حياة راسها و طلعت معاه
– طب تصبحوا على خير
رشدي : و انتو من اهل الخير يا بنتي .
بص على بهية و سعاد : خلصوا سفرة و روحوا ساعدوها انتو
انا كمان طالع أنام .
بهية : هي ايه العبارة يا بت؟؟
– اما حسام بيه طلع جدع بصحيح … شفالي غليلي من أمه
– ليه هو كان حصل ايه يا بنت انتي ؟؟
– لا مفيش يا خالة
– اومال ايه الحكاية ؟! الست حياة عمرها ما غابت عن الست الكبيرة كل ده ؟!
سعاد – ربنا يسترها معاها …أميرة و بنت أصول و الله ما تستاهل حماة زي شهيرة .
– طب امشي قدامي نشوف طلباتها ايه ربنا يستر و يعدي الليلة دي على خير احسن كل ما تتقابلو سوا تعملوا زي ناقر و نقير.
تاني يوم الصبح
شهيرة بتبص للساعة و كل شوية بتبص عالباب
– و بعدين بقى !!! هي للدرجة دي زعلت يعني ؟؟!
لا لا مش حياة اللي تزعل مني … هي بس كانت تعبانة من الحمل و محتاجة ترتاح مش اكثر …أكيد هتجي بعد شوية و تجيبلي الفطار و الدوا
سمعت خبط عالباب ابتسمت بفرحة بعدين خبت فرحتها و هي بتتصنع الجدية : ادخلي يا حياة
– لا انا مش حياة …
– رشدي !؟ هو انت ما رحتش الشغل ولا ايه ؟!
– لا انا رجعت عشانك … عندي ليكي مفاجأة
– مفاجأة ايه دي ؟؟
– دلوقت هتعرفي 🥰
فتح الباب و كانت مستنية مين هيدخل منه و فاكراها حياة
– مين دي ؟؟
– دي منيرة …ممرضة متخصصة من اشطر ممرضي الخدمة في البيوت ..عينتها لك مخصوص عشان تساعدك و تأخذ بالها منك لحد ما تخفي.
منيرة بإحترام : متشرفين يا شهيرة هانم و ألف سلامة عليكي
شهيرة بحدة و هي بتبص لها و بتبص لرشدي
– بس انا مش محتاجة حد يخدمني …حياة معاي و مش هتخ ..
رشدي – يا شهيرة حياة حامل في الشهر الخامس …يعني بعد كدة هتشيل نفسها بالعافية ..
منيرة : يا هانم انتي مريضة و وضعك محتاج ممرض مؤهل مش وحدة حامل !
شهيرة بزعل: هي اللي قالت لك انها مش عايزة تخدمني؟
– لا هي ما قالتش ولا هتقول …انا اللي منعتها تخدمك
شهيرة بصدمة : حسام !!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية إسمي حياة)
