رواية إسمي حياة الفصل الثاني والستون 62 بقلم آلاء اسماعيل
رواية إسمي حياة الجزء الثاني والستون
رواية إسمي حياة البارت الثاني والستون
رواية إسمي حياة الحلقة الثانية والستون
حسام دموعه نزلت تلقائيا : مفيش خطر عليها يا دكتور !!
– ما تخافش …بإذن الله هيطلعوا بخير اتفضل معاي .
وصلت الهام مخضوضة هي و حنان و سند
كان رشدي واقفين بعيد هو و نور و حسام واقف جنب اوضة العمليات و دموعه بتنزل تلقائي
إلهام : حياة مالها يا نور !!
سند : طمنونا ايه الحكاية يا رشدي بيه ؟؟!
حكالهم رشدي اللي حصل بإختصار
إلهام بخوف – ربنا يستر !! طب امك ازيها دلوقت !!
نور بتذكر : يااااه ده انا نسيتها !! انا هروح اطمنها
إلهام : طب انا جاية معاكي
حنان : و انا كمان يا ماما
سند : انا هشوف حسام يا عمي
رشدي – اتفضل يا سند يا ابني و خليك معاه
راحت إلهام و البنات لاوضة شهيرة
إلهام بإبتسامة : الحمد لله على سلامتك يا شهيرة هانم
– الله يسلمك …
حنان : ألف سلامة يا طنط
شهيرة : تسلمي …
بصت لنور بقلق : طمنيني على مرات اخوكي ! الدكتور قال ايه
– بتولد قيصري يا ماما …الدكتور بيقول إن الحبل السري ملفوف حوالين رقبة البنت
إلهام بخوف : يا ساتر …ربنا يقومها لنا بالسلامة
شهيرة بصدق : ياااا رب !! يسمع منك ربنا يا ست الهام !
فضلت إلهام تبص بدهشة لحنان و نور
شهيرة بفرحة حقيقية و دموع فرح : يعني هيبقى عندي بنت غيرك يا نور ؟
نور بأمل : قولي يا رب يا ماما 🥰
شهيرة بحب : ربنا يرزقها على حسب نيتها الطيبة
ترددت إلهام قليلا ثم قالت : انا عرفت اللي حصل يا شهيرة هانم… يعلم ربنا اني معتبراها بنتي زيها زي سند بالضبط و مش عارفة اشكرك ازاي لإنك انقذتي حياتها هي و ولادها
شهيرة بإبتسامة : من النهاردة بقت بنتي انا كمان … و اي حاجة تضرها هي او حد من ولادها تضرني قبلها … انا غلطت في حقها كثير و لو فضلت اخدمها عمري اللي فاضل كله مش هاوفي طيبتها و كرمها معاي …ده كفاية انها رجعت لي ابني
إلهام بفرحة – ربنا يخليكم لبعض …طب نسيبك ترتاحي دلوقت
يالا يا حنان هنستنى برة
نور : و انا جاية معاكم يا طنط
شهيرة : بلغيني اول ما تطلع يا نور
– حاضر يا ماما
اول ما طلعوا همست حنان لإلهام : سبحان مغير الاحوال !
همست لها إلهام و هي بتلكزها: هسسس لتسمعك بنتها هتفضحينا !
حسام واقف قدام الباب متوتر و حاطط ايديه على دماغه
– يا رب ما تفجعنيش فيها ….يا رب تحفظهملي هوما الثلاثة
وصل سند عنده و ربت على كتافه : ان شاء الله هتقوم بالسلامة يا حسام ما تقلقش … حياة قوية و ما بينخافش عليها …
حسام بإنهيار – يا رب يا سند …يااااا رب !! 😓
أخيرا طلع الدكتور من اوضة العمليات و من وراه الممرضة وقفهم حسام اللي مكانش قادر يتمالك اعصابه و واقف بالعافية و سند ماسكه
و جيه من وراه رشدي و الهام و نور و حنان
حسام – خير يا دكتور طمنني على مراتي !!
الدكتور بإبتسامة : الحمد لله مراتك بخير اول ما تفوق من البنج هتتحول على اوضة عادية و ساعتها هتقدر تشوفها
حسام : طب و الولاد ؟
– ألف مبروك ولد و بنت زي القمر و هوما دلوقت فالحضانة
مشي الدكتور و الممرضة و سجد حسام شكر لله
– ألف حمد و شكر ليك يا رب …ألف حمد و شكر 😍
رشدي بفرحة : ألف مبرووووك يا ابني☺️
إلهام : يا ما انت كريم يا رب ! 🥰
بكت من الفرحة هي و حنان و حضنوا بعض و جريت نور و رشدي على حسام يهنوه و يحضنوه.
نور بفرحة : انا رايحة ابشر ماما بالخبر الحلو ده تلاقيها قاعدة على اعصابها هي كمان ☺️
رن تلفون سند
– ايوة يا بابا …معلش نسيت أعدي عليك زي ما وعدتك
آسف و الله اتلخمت مع حياة في المستشفى
مراد بقلق – ليه مالها حياة ؟
سند بفرحة : ولدت يا بابا …و جابت ولد و بنت ☺️
مراد بفرحة : و الله !! ألف مبروك …الحمد لله ربنا عوضها
طب انتو في أي مستشفى ؟!
– ماما …عايزة الحلاوة .. بقى عندك حفيدين ولد و بنت و بيقولوا زي القمر 🥰
شهيرة بفرحة : الحمد لله … ألف مبرووووك علينا
نور : الولاد دول شكلهم وش السعد و هوما اللي هيجمعوا العيلة تاني يا ماما .. ايه رأيك انتي ؟؟
شهيرة بحسرة : لو تقصدي شملنا انا و حياة و حسام ممكن …بس لو قصدك على ابوكي ما اعتقدش يا بنتي
نور: ليه بس يا ماما …ده بابا كان بيحبك اوي
شهيرة بحزن : اديكي قلتيها بنفسك يا بنتي.. كاااان …و ما اعتقدش هيرجع لي بعد كل الاذى اللي اتسببتله فيه
انا متأكدة اني خسرته للأبد 😓
– خليها على الله يا ماما
– و نعم بالله يا بنتي…
طلعت الممرضة حياة لاوضة عادية و دخل وراها حسام
اول ما طلعت الممرضة قرب منها و راسها من جبينها
– ألف سلامة يا قلبي و نور عيني و كل دنيتي..
– الله يسلمك حبيبي … عايزة اتطمن على ولادي
-اتطمني يا روحي ولادك بخير… حطوهم في الحضانة و لما تقدري تقومي هتبقي تشوفيهم .
في اللحظة دي دخلت إلهام و سند و حنان سلموا عليها
– الف مبرووووك يتربوا في عزكم يا رب
– الله يبارك فيكي يا ماما
– الف مبروك يا حبيبتي جوز قمرات ربنا يحفظهم
– انتو لحقتو و شفتوهم ؟؟ ده حتى انا ما شفتهمش لسة !
سند بمزاح : خلاهم بقى و كدة معقولة اسيب حد يسبقني !!
دخلت نور على كلامه : لا بقى …كدة عمتهم تزعل
ضحكت حياة : لا كله الا زعل عمتهم بقى !!
ضحكت نور : هو انا اقدر ازعل من حياتي ؟ الف مبروك يا روحي يتربوا في عزكم …و انت كمان يا حبيبي
سلمت على حياة و حسام .
حسام : عقبالكم يا رب … هو بابا راح فين ؟
نور : قال عنده مشوار مهم اول ما اتطمن عليهم طلع على طول …. هااا يا بابا حسام …مقلتش ناويين تسموهم ايه ؟؟
بص حسام لحياة اللي قالت بحب : حنين و هيثم 🥰
إلهام : هيثم و حنين !! حلوين اوي…ربنا يجعلهم ذرية صالحة
نور : حنين حلو بس هيثم مش داخل دماغي اوي
حسام : بس عاحبنا احنا يا لمظة… و لما تولدي انتي ابقي سمي اللي يعجبك
نور بزعل مصطنع : بقى كدة !! طيب …حيث كدة انا هاجيب هدية لحنين بس هااا …و انا رايحة عند ماما .
ضحك حسام على زعلها الطفولي و قالت حياة بتذكر :
اااه نسيت هي طنط ازيها ؟؟
نور : بخير الحمد لله … قلقت اوي عليكي و فرحت جدا لما قلتلها بقى عندك حفيدين ولد و بنت تخيلي قالت لي ايه ؟؟
حياة بحب : ايه ؟؟؟
نور : قالتلي بقى عندي بنت تانية غيرك يا نور .
حسام بتأكيد- طبعا …مش بنت ابنها ؟
نور بحب : بس ماما مكانتش تقصد بنتك يا حسام 🥰
هي كانت تقصد حياة
ابتسمت حياة لحسام و همست في نفسها : الحمد لله 🥰
طلع حسام و نور من الاوضة
و بصت إلهام في الساعة بعدين قامت
– طب هنسيبك احنا دلوقت عشان ترتاحي …يالا يا سند مراتك تعبانة
حياة : معلش يا ماما انا عايزة سند في موضوع كدة
سند : طب انزلي انتي و هي عالعربية انا لاحقكم
إلهام : ماشي … يالا يا حنان.
طلعت نور و حسام من اوضة حياة و هو بيتصل بحد
نور بتساؤل : هو انت مش هتجي معاي عند ماما يا حسام ؟؟
– لا يا نور روحي انتي شوفي الدكتور هيكتبلها على خروج امتى انا عندي شغل مستعجل اخلصه و اروحلها
– حاضر… بس ما تنساش تعدي عليها عايزة تباركلك بنفسها
– طيب يا نور مش ناسي
راحت نور و كلم اللي أتصل عليه
– كل حاجة جاهزة زي ما وصيتكم ؟
الطرف الاخر : ………….
– طب تمام استعجلوا شوية مفيش وقت .
سند – خير يا حياة ؟؟ كنتي عايزاني ف ايه
حياة – كنت عايزة بخصوص موضوع بابا و الولاد
– و الله انا كمان كنت ناوي أكلمك على الموضوع بس لما حصل اللي حصل قلت استنى لما تطلعي بالسلامة …. أصل بابا مش حاسس نفسه مرتاح في بيتك … بيقول كل ما بيجي حسام البيت بيبقى ف نص هدومه …ده غير ان البيت بعيد و كدة .
حياة – يبقى احسن حل اننا نشتريله شقة يا سند ..
سند :بصي انا دورتله على شقة قريبة من شغله و مدرسة يوسف بس لقيت الاسعار نار و انا معنديش سيولة كافية انتي عارفة اني حاطط كل فلوسي في الشحنة اللي جاية من الصين
عشان كدة ممكن نشوف له دلوقت اي حاجة صغيرة على قده و يبقى ربنا يفرجها بعدين
– بص يا سند انا لقيت له حل .. هنشتري له بيت جدي و ما تشيلش هم الفلوس انا هأتصرف
سند بتساؤل : ازاي ؟؟
– هندفع لعماتك حصصهم في البيت و يتكتب بإسمه ، و بعدها نبتدي فورا تجديد الشقة و فرشها
– الفكرة كويسة اوي و ما اعتقدش أنه هيرفض بس هتفضل مشكلة واحدة ؟ هيقعدوا فين لحد ما تتشطب ؟؟
– يا سيدي ان كان عالولاد فكلها شهر و تبتدي الإجازة و هيفضلوا عندي أو عندك …و بابا يقدر يفضل في الشقة مش هيحتاج غير فرشة و ملاية .
في اللحظة دي دخل مراد
مراد بحب: الف مبروك يا حياة ..يتربوا في عزكم يا بنتي
– الله يبارك فيك يا بابا و يخليك لينا 🥰
سند : لسة كنا بنجيب في سيرتك
مراد : خير يا سند ؟ لتكون لقيتلي فكرة زي ما قلتلك ؟
سند – ايوة يا بابا .. بص لحياة و كمل : حياة هتقولك عليها و ان شاء الله تعجبك
كانت نور هتدخل اوضة شهيرة لما لقت الدكتور طالع من عندها
– الحمد لله اني لقيتك هنا يا دكتور …هي ماما هتقدر تطلع امتى ؟
– من النهاردة..بس بلاش ترهق نفسها كثير لحد ما يخف الألم و تكمل المسكن الموضعي اللي اديتهولها كل ما تلاقي فيه وجع
– طيب يا دكتور متشكرة … بقولك ايه هو انا ممكن الاقي هنا كرسي بعجل عشانها ؟
– ايوة طبعا .. اسألي الممرضة اللي هناك .
دخلت لشهيرة : انا جيت يا ماما و جايبالك اخبار حلوة
شهيرة : خير يا بنتي
– الدكتور قال تقدري تطلعي النهاردة
– طيب الحمد لله
– بصي جبتلك ايه ؟؟ يالا بينا عشان تروحي عند حياة
كانت الممرضة مع حياة بتاخذ منها رضعة الولاد لما دخلت نور
نور بمرح : عندك زيارة يا حياة هانم… شوفي مين جاي عندك
دخلت شهيرة بالكرسي و صاحت حياة
: ايه المفاجأة الحلوة دي ! ألف سلامة عليك يا طنط
– الله يسلمك ..ألف مبروك ..يتربو في عزكم
– يا رب يا طنط ☺️…
رن تلفون نور: ايه ؟ طيب يا أيمن انا جاية حالا .
بصت لحياة : طيب انا مضطرة اروح دلوقت يا حبيبتي
أيمن بيقول ابوه و امه مسافرين امريكا و لازم نطلع دلوقت عالمطار و لما نرجع هيبقى يرجع يباركلك بنفسه .
حياة : ماشي يا روحي… سلمي عليه .
طلعت نور بسرعة و فضلت شهيرة
شهيرة بحب : سميتوهم ايه ؟؟
حياة : حنين و هيثم 🥰
شهيرة: حنين و هيثم ..يا روحي … حلوين
حياة كانت مترددة للحظات بعدين قالت بتساؤل
حياة – ممكن اعرف ليه عملتي كدة ؟؟
– مش هنقعد نتكلم بالموضوع المهم الحمد لله جات سليمة
– ايوة بس انتي كان ممكن تتأذي اكثر من كدة !!
– المهم انها ماجاتش فيك و الحمد لله ان احفادي بخير ☺️
فضلت حياة بتبصلها بدهشة بس ما علقتش بحاجة
في تلك اللحظة دخل حسام و نظر لأمه بدهشة
– الله انتي هنا و انا بأدور عليكي !
شهيرة : جيت ابارك لحياة
حياة : أنا هاطلع امتى يا حسام ؟؟
– انتي هتطلعي بعد يومين بس الولاد هيفضلوا في الحضانة لحد ما يتموا التسع شهور .
– هسيبلهم ولادي و امشي ؟! مستحيل اطلع من هنا من غير ولادي ! 😭😓
حسام – يا مجنونة هتقعدي تعمليىهم ايه ؟ هوما هيطلبوا منك حليب كل يوم …. هابقى اجيبلهم انا في الاول لحد ما تخفي انتي و بعدين هتبقي تجي ترضعيهم بنفسك …
حياة بزعل : و ما جيش انا كل يوم ليه ؟؟ 😥
– ايه اللي ما تجيش انتي ليه ؟انتي ناسية انك والدة قيصري؟؟
شهيرة : جوزك معاه حق … لازم تخفي الاول عشان تقدري تشيلي مسؤولية اثنين … هوما صغيرين محتاجين يفضلوا في الحضانة مش هيحتاجولك دلوقت .
حياة بحزن : أمري لله
بصت شهيرة لحسام : نور قالت ان انا هأقدر أطلع النهاردة
حسام : ايوة يا ماما الدكتور هيكتبلك على خروج النهاردة
حطت شهيرة عينيها بحزن : طيب
نظرت حياة لحسام نظرة فهم معناها
– على فكرة نور قالتلي انك هتروحي معاها فيلتها اليومين دول عشان علاجك
شهيرة : لا فيها الخير ..
بص حسام لحياة اللي كانت متضايقة من الموقف و حاول يغير. الموضوع او بالاصح يقفل الموضوع خالص
– طب يالا أوصلك على أوضتك انتي تعبانة و لازم ترتاحي
ما اتكلمتش شهيرة بس عينيها كان فيها حزن كبير
وصلها و رجع لحياة
– ايه اللي انت عملته ده يا حسام ؟؟
– عملت ايه ؟؟
– معقولة تسيب امك تروح عند جوز بنتها و انت موجود ؟؟؟
– عايزاني اعمل ايه يعني ؟ انا مش هاعرف اهتم بيها لإني ملخوم معاكي هنا و لسة بعد ما تطلعي هافضل مقضيها مشاوير من المستشفى للبيت خليها مع بنتها تهتم بيها اكثر
– طب و بعد ما تخف ؟؟
– هنتكلم في الموضوع ده بعدين يا حياة .. نامي لك شوية عشان ترتاحي …اه طنط الهام بتقول انها راجعة بعد شوية جايبالك الحاجات اللي انتي طلبتيها منها
طلع من اوضتها و همس لنفسه : معلش يا حبيبتي بكرة او بعده هتعرفي كل حاجة
بعد يومين
حسام كان مع الدكتور بيتمم اجراءات الخروج و تكاليف المستشفى و إلهام بتساعد حياة في توظيب شنطتها في اللحظة دي دخلت نور و معاها شهيرة
نور بمرح – الحمد لله اننا لحقناكم …أكيد مش هنسيبك تروحي لوحدك؟
حياة : نور ؟ طنط ؟ أهلا نورتو المستشفى !
سلمت عليهم هي و إلهام و بصت لشهيرة بتمعن
حياة : قومتي ليه بس انتي لحقتي تخفي ؟
شهيرة – انا بخير و الوجع إختفى تقريبا
نزلت عينها بإنكسار و قالت : أكيد مش هأفضل عند نور و جوزها طول عمري …إلا ما ارجع بيتي 😣
حطت إلهام الشنطة و قالت لحياة : طب انا رايحة اشوف حسام اتأخر ليه
نور – ايه الكلام ده يا ماما اخصة عليكي !! ده احنا نشيلك في عينينا انا و أيمن
– ايوة بس انتو لسة عرسان و محتاجين تاخذو راحتكم في بيتكم 😔
نور بممازحة : اسمعو اسمعو !! قال يعني حياة و حسام ماكانوش عرسان لما طلبتي منهم يعيشوا معاكي!! اهي عاشت معاكم و مع كدة كانت واخذة راحتها اوي و جابت لكم بدل العيل اثنين 🙄😂
همست لها حياة بكسوف : اخرسي يا بنت المجنونة !!
شهيرة بحزن : معاكي حق يا نور …انا كنت انانية اوي مع حياة مع اني زمان رفضت أعيش مع جدتك ..بس حرمت حياة من حقها الطبيعي انها تكون حرة في بيتها و مع كدة ما رفضتش و سابت بيتها و جات تعيش معانا ..و بكل رضا 😔
حياة بتغيير للموضوع: هو احنا هنقعد نتكلم في الماضي !! ما بلاش حزن بقى ..انا النهاردة هشوف ولادي مش عايزة حاجة تنكد عليا ☺️
خلصت معاملات المستشفى و رغم ان حياة كانت بتحاول تبين انها سعيدة إلا أنها كانت متضايقة ..و مستنية فرصة عشان تكلم حسام على انفراد و أخيرا دخل الاوضة يشيل الشنطة و كانت لوحدها
– احنا رايحين فين يا حسام ؟؟
– ايه السؤال الغريب ده يا حياتي !! رايحين بيتك طبعا .. و عاملك مفاجأة هيطير عقلك لما تشوفيها
حياة ببرود : مفاجأة ايه دي
حسام بإرتباك – اوضة الاولاد
حياة بحدة: طب و امك يا حسام ؟؟
حسام بلا مبالاة : مالها ؟؟!
– هنسيها في الشقة لوحدها ؟؟
– اومال عايزة تقضي اللي فاضل لك من عمرك في الشقة دي؟؟ انتي نسيتي ان بقالنا ولدين دلوقت ؟؟ هتحطيهم فين؟؟ و الشقة كلها اوضتين !!
– يعني خلاص هنسيبها !!!
حسام : حياة من فضلك بلاش تسبقي الأحداث … خلينا نطلع دلوقت نتطمن على الولاد و بعدها هنبقى نشوف هنعمل ايه مع ماما
– لا يا حسام … انا مش هسيبها .. انت ما شفتهاش مقهورة على حالها ازاي !!!
حسام بضيق: ارجوكي يا حياة تعدي اليوم ده على خير و خلينا نطلع على بيتنا و هنبقى نتكلم في كل حاجة بعدين
كانت سامعاهم من قدام الباب و بتمسح دموعها بقهر
اول ما شافت إلهام جاية من بعيد اخفت دموعها و ابتسمت لها
إلهام : ايه ده ؟؟ معقولة !! انا وديت الحليب للممرضة و رجعت و حياة لسة ما خلصتش لبس ؟؟
شهيرة : بتلبس براحتها انتي عارفة انها لسة تعبانة
طلعوا حياة و حسام في اللحظة دي و قالت شهيرة بإبتسامة مصطنعة : اهوم طلعوا …و نور كمان مستنيانا في العربية
إلهام : سند قال عنده شغل مستعجل هيخلصه و يجيب حنان و يلحقنا على البيت
حسام : طب يالا بينا يا حياة … هأخذك تشوفي ولادك و نطلع كلنا عالبيت
ركبت شهيرة مع نور و أيمن و ركبت إلهام مع حياة و حسام
شهيرة : بس انا مش فاهمة احنا رايحين على بيت حياة ليه ؟؟ ما كنتو وصلتوني على الشقة على طول و سيبناها ترتاح
نور : معقولة نسيبها ترجع لوحدها و هي في الحالة دي ؟؟
شهيرة بضيق : و ليه الزحمة دي ! اهي عيلتها معاها ! 😓
نور بمزاح : و احنا ايه يا ست ماما ؟؟ مش عيلتها برضو ؟؟
شهيرة : مش عارفة …حاسة شكلي بايخ اوي
– ليه بتقولي كدة ؟؟
بصت شهيرة لأيمن اللي كان بيسوق و مش عايز يدخل في الحوار و قالت بإنزعاج
– ولا حاجة … ما تشغليش بالك يا نور .
قضت العيلة وقت حلو مع بعض و اتعشوا و طول الوقت حياة متضايقة و هي ملاحظة نظرات شهيرة المنكسرة ..
بصت إلهام للساعة
إلهام : طب يا حسام نستأذن احنا حياة محتاجة ترتاح
يالا يا سند مراتك كمان تعبت
سند : طيب يالا بينا ..شكرا على العشاء و السهرة اللطيفة دي يا حسام .
حسام : العفو انتو تشرفونا في أي وقت يا ابو نسب ☺️
طلعت إلهام و حنان و سند
أيمن بص لنور : مش يالا احنا كمان يا نور الوقت إتأخر !
نور : ايوة معاك حق يالا يا جماعة تصبحوا على خير 🥰
كانت شهيرة هتقوم معاهم
مسكت فيها حياة : رايحة فين يا طنط ؟؟
شهيرة: رايحة بيتي… هتوصلني نور في طريقها
حياة : تروحي فين ..هو انتي قاعدة عند ناس اغراب ؟؟ ما تقول حاجة يا حسام !!! 😤
قالتها و هي باصة لحسام بحدة
حسام بهدوء ؛ انتي هتقعدي معانا و مش هتروحي لأي مكان
بصت نور لشهيرة و ابتسمت و بصت لحياة اللي كانت مستغربة الموقف و اومأت لها بالإيجاب
حسام – من النهاردة انتي في بيتك يا ماما.
شهيرة بدهشة : انا ..انا مش فاهمة … بس … هدومي و كل حاجتي في شقتي !!
حسام بإبتسامة : حاجتك كلها هنا …اوعي تكوني فاكرة اني هسيبك تقعدي لوحدك؟و كمان مستحيل نقعد كلنا في شقة !
حياة : انا مش فاهمة …ازاي ؟؟ 🤨
فلاش
– بقولك ايه يا نور …ماما هتطلع النهاردة من المستشفى يا ريت تاخذيها معاكي للفيلا
– خير يا حسام ناوي على ايه ؟؟
– انتي عارفة ان حياة رافضة تسيبها …و طبعا مش هنقدر نرجع للشقة بعد ما حياة ولدت ….
نور بتساؤل : هاااا …و بعدين ؟؟
– انا طلب نقل حاجتها كلها للفيلا عندي و عايزها مفاجأة ليهم هي و حياة …هااا …هتساعديني؟؟
– طبعا يا حبيبي …دي ماما هتطير من الفرحة 🥰
باااك
حسام بحب : يعني حاجتك كلها في الجناح بتاعك فوق يا ماما
انا جبت كل حاجة في اليومين اللي انتي قعدتيهم عند نور
حياة بفرحة : بجد يا حسام !!!
حسام بحب – طبعا يا روحي …
– طب ما قلتليش ليه من الاول !!
– مش انا كنت قلتلك عندي ليكي مفاجأة !! انتي اللي مكنتيش عايزة تستني لحد ما نوصل عالبيت
شهيرة الفرحة عقدت لسانها مسكت حياة ايدها و طلعت معاها و هي بتقول بفرحة: طب يالا مستنية ايه !! خلينا نشوف ابنك محضر لنا ايه مفاجآت !! يالااااااا
طلعوا على الجناح الخاص بشهيرة اللي كان فيه اوضتين في قلب بعض و حمام كبير و مرتب بطريقة حلوة و كمان بيطل على البسين و الجنينة و فيه بلكونة واسعة .
حياة بحب : عجبتك المفاجأة يا طنط !!
شهيرة – ماما
بصتلها حياة بدهشة و كملت شهيرة بتأكيد : انا من النهاردة مامتك و انتي زيك زي حسام و نور يا حبيبتي 😭
ابتدت تعيط بحسرة
حضنتها حياة و هي بتمازحها : طب و بتعيطي ليه دلوقت !!
– ندم و فرحة و حاجات كثير …مش عارفة اقولك ايه .. انا لولاكي كنت خسرت كل حاجة .. انتي اللي رجعتيلي ابني
انتي جوهرة يا حياة …انا ندمانة اني اني رفضتك اول مرة و ضيعت لكم من حياتكم 3 سنين بحالهم
– خلاص اللي فات مات يا طن…. شافتها بصتلها و برقت
– قلت ايه !؟!
حياة : ماما .. حاضر …الحمد لله ربنا عوضني بدل الأم ثلاثة 🥰
جيه حسام من وراهم و حضنهم هوما الإثنين
– ربنا يخليكم ليا انتو الإثنين
شهيرة بحب : و يخليكم ليا انتو كمان 😭
بعدت حياة عن حضنها و قالت بحماس : طب ايه رأيك نشوف المفاجأة التانية اللي محضرها لنا ابنك؟؟؟
شهيرة و هي بتمسح دموعها : مفاجأة ايه ؟؟
حسام بفرحة – اوضة الاولاد طبعا ! 🥰
تسريع االأحداث
بعد شهرين و نص
حياة كلمت إلهام بخصوص موضوع رشدي و رفضت رفض قاطع .. بسبب شهيرة طبعا ..لإن الكل كان عنده أمل ان رشدي يرجع يسامح شهيرة و يرجعها خصوصا ان معاملتها اتغيرت تماما مع حياة و حسام .
مراد وافق على فكرة حياة و طول الشهرين اللي فاتوا كان مراد قاعد فيها و الولاد قاعدين عند الهام و صافيناز شافتهم في المدة دي ثلاث مرات بس لانها وحشتهم و هوما اللي طلبوا يشوفوها …
ااتشطبت الشقة و انتقلوا عليها هوما الثلاثة .
اخيرا جات اللحظة الحاسمة و وافق الدكتور ان التوأم يطلعوا من الحضانة و الكل بيستعد عشان يعملولهم سبوع كبير
تحضيرات و فرحة و حماس كبير عند الكل
رفض رشدي يحضر عشان شهيرة طبعا. …
راحت حياة لأمها ليلى عشان تستعطفها تاني يمكن ترضى على الأقل تشوف احفادها و تتعرف عليهم .. بعد جهد كبير وافقت ان حياة هي اللي تجيبهم عندها بس رفضت تحضر السبوع بسبب إلهام .
حياة – مش مصدقة يا ماما ….ولادي النهاردة هيباتوا في حضني ! 🥰
شهيرة : ان شاء الله يتربو في عزكم يا بنتي
– مش شايفة ان حسام أتأخر ؟؟
– اتأخر ايه بس !! لسة فاضل ساعتين على معاد الدوام !
حياة كانت بتبص للتلفون بقلة صبر : طب نور اتأخرت ليه ؟! مش اتفقنا نروح كلنا سوا عالمستشفى ؟؟
شهيرة بضحك: لاااا انتي الظاهر خلصتي صبرك كله قبل ما يجو الولاد …و خلاص مبقالكيش صبر خالص ؟؟؟ 😂
حياة بضيق : اعمل ايه بس !!! الوقت مش راضي يعدي 😓
– اهدي يا بنتي … لسة على معاد الجماعة … كمان ساعتين و نطلع و تلاقي ولادك في حضنك
حياة بصتلها بإستغراب : طب انتي مش متحمسة. خالص يعني !!
– طبعا متحمسة …بس مش زيك أكيد …
– يووووووه بقى !!! مش عارفة اعمل ايه في الساعتين دول
يا رب تصبرني !!
– طب اقعدي هنتكلم شوية
قعدت حياة و هي بتبص للتلفون : هنتكلم في ايه يا ماما
– بخصوص عمك رشدي
حياة بإرتباك : عمي ؟ م مااااله ؟؟
شهيرة ببرود- انا سمعتكم مرة انتي و إلهام و انتو بتكلمو مع بعض و عرفت اللي حصل …
حياة بتوتر : عرفتي ايه يا ماما ؟؟
– عرفت أن رشدي عايز يطلب ايد إلهام
حياة : ماما انتي سمعتي غلط ..الموضوع ان ..
شهيرة بهدوء : عمك رشدي طيب اوي يا بنتي…و من حقه يحب و يتحب … انا ظلمته كثير اوي معاي ..و كنت عايزة اقولك حاجة … يا ريت تقولي لإلهام اني مش هاتضايق منها لو وافقت لأنه يستاهل يعيش السعادة اللي بيدور عليها.
حياة بإرتباك : انتي بتقولي ايه يا ماما ؟؟ مستحيل ماما الهام تعمل كدة ..ده حتى هي بنفسها. …
شهيرة بمقاطعة : انا سمعتها يا بنتي …هي فاكرة انها لما ترفض يمكن يكون لينا انا و هو فرصة نرجع لبعض و فاهمة انها هي السبب في أنه بعد عني …بس الموضوع مش كدة خالص يا حياة …. الموضوع أكبر من كدة بكثير ..😓
الحقيقة اني اذيت عمك رشدي كثير و حملته فوق طاقته و اللي وصلنا ليه انا السبب فيه مش أي حد تاني …
حطت دماغها على ايدها و انهارت بالبكاء
حضنتها حياة : ما تقوليش كدة يا ماما !!
شهيرة ببكاء : دي الحقيقة يا بنتي … انا عمري ما حبيت عمك ولا عرفت أحبه … لاني عرفته و ارتبطت بيه في أصعب فترة في حياتي … فترة كنت مسحت فيها من قاموس حياتي حاجة اسمها حب … فترة. قلبي فيها كان اقسى من الحجر و كل اللي بيحركني كان الانتقام و بس.
حياة بإرتباك : انا …انا مش فاهمة حاجة …انتقام من مين؟
شهيرة بحزن : انا هأحكيلك من البداية عشان تفهمي
كانت بتبص للأرض و كإنها بتسترجع ذكريات
– انا ما اتولدتش في عيلة راقية ولا في بوقي معلقة من ذهب زي ما بيقولوا …و لا كنت زي ما عرفتيني كدة
-يا ماما انتي…
قاطعتها شهيرة : ارجوكي سيبيني اكمل للآخر
سكتت حياة و فضلت مستنياها تكمل
– انا اتولدت في عيلة بسيطة زي عيلتك كدة … ابوي كان مكوجي الحارة… و أمي ست طيبة .. مش متعلمة و كافية خيرها شرها
من لما دخلت اعدادي و انا مش راضية بالفقر اللي كنا فيه و عايزة اكون زي البنات اللي معاي في المدرسة …بنات الذوات اللي بيوصلوهم بالعربية و بيلبسوا شيك و كدة …. حاولت اصاحب بنات ناس اغنياء بس كل اللي كنت بحاول اقرب منهم كانوا بيتنمروا علي بسبب لبسي و شعري و كدة …و حتى اهاليهم كانوا بيمنعوهم يكلمو بنت المكوجي … مكانش عندي غير صديقة وحدة : وفاء
ابتلعت غصة قبل ما تكمل و ضحكت بمرارة : اللي مكانتش اسم على مسمى خالص .. صحيح هوما كانوا جيراننا في الحارة و اتربينا سوا بس ابوها استلم شغل بواب عمارة ناس اكابر اللي ابوها دكتور و اللي محامي و اللي امها ممثلة المهم هي كمان كانت زيي منبوذة و محدش راضي يسيب بنته تصاحبها عشان كدة كنا من و احنا صغيرين ملناش غير بعض . .. بنروح سوا و نجي سوا و محدش بيكلمنا ولا بيجي ناحيتنا و على فكرة وفاء كانت شاطرة اوي في الدراسة .
وصلنا الثانوية العامة و نجحنا سوا… بس وفاء طلعت من الاوائل في الجمهورية و زي ما يكون اتشهرت بعدها بنت البواب و قربت منها بنات الاكابر و اتلموا حواليها في الجامعة و بقت دحيحة الدفعة و كونت لنفسها شلة جديدة
ابتدت تصاحب بنات الناس الاغنياء و شوية شوية بعدت عني و نسيت عشرتي و تقريبا بقت تستعر مني … بمعنى اني في اول سنة ليا جامعة لقيت نفسي وحيدة و منبوذة من طرف الكل حتى وفاء
بعد شوية اتعرفت بشاب هو كمان بسيط و على قده : صلاح
شوية شوية اتطورت علاقة الصداقة اللي بيننا و اتحولت لحب
بصتلها حياة بدهشة
كملت شهيرة بمرارة : ما تبصيليش كدة …انا كمان انسانة زيك المفروض أحب و اتحب 😓
– ايه اللي حصل ؟؟
– فضلنا سنتين مع بعض كبر فيها حبنا لحد ما بقى حب جنوني … او على الأقل كان من ناحيتي كدة .. المهم اني حبيته في السنتين دول بكل جوارحي لحد ما …
اخفضت عيناها التي امتلأت بالدموع
– حصل ايه يا ماما ؟؟ 🤨
– لفت عليه اللي كانت صاحبتي. … وفاء
شهقت حياة بدهشة
– ما تستغربيش اوي كدة … يعني انتي فاكرة الشلة اللي ملمومين حواليها كان عشان جمال عيونها السود ! واضح انهم كانوا مستغلينها في البحوث و الامتحانات و غيرها بس في الاخر هوما ولاد اكابر .. حتى لو هي دحيحة الدفعة بس محدش هيفكر يرتبط بوحدة زيها …قصدي جمالها كان على قدها يعني
بسبب تفوقها الجامعة ادتها منحة دراسية مجانية لامريكا و اهلها رفضوا انها تسافر لوحدها … عملت ايه صحبتي المحترمة ؟؟ لفت على صلاح ..لإنها ما لقتش حد غيره تقدر تطمعه و تغريه
و رغم ان الفرق ما بينا كان واضح …. انا كنت أحلى منها بكثير .. بس طبعا هو طمع بالاقامة و الفلوس و اتغر شوية شوية لحد ما وافق…باعني عشان بعثة و فلوس 😭
المشكلة أنه كان اجبن من أنه يواجهني .. كل حاجة تمت بسرعة و حضروا الاوراق و المعاملات بشكل سري و عملوا كتب كتاب عالضيق …و طول الوقت كان بيمثل عليا و واعدني يكلم ايوي و علاقتنا تبقى رسمية
صحيت الصبح عادي عشان اروح الجامعة زي كل يوم لقيت الناس بتتكلم ان وفاء و صلاح اتجوزوا و سافروا امريكا .
ممكن تتخيلي شعوري يومها كان ايه !!! ازاي كنت هأقدر اثق في أي حد بعدها !!!! من يومها و انا قلبي اتحول لحجر
مبقاش فيه ذرة حب او رحمة او احساس .. مبقاش غير حتى لحمة بتنبض عشان تضخ دم و خلاص
اضطريت اغير الجامعة خالص لاني مبقتش طايقة ولا حاجة في جامعتي القديمة كل حاجة كانت بتفكرني بصلاح الخا’نن و وفاء الوا’طية… كل مكان اروح عليه الاقي الناس بتبص عليا و بيهمسوا بسخرية …الع’بيطة اهي …اللي كانت المية تجري من تحت رجليها و هي ولا على بالها ..
قررت ابعد عن مصر خالص … و واجهت ابوي بإني هاسافر اكمل دراستي في مكان تاني …طبعا رفض … بس انا اخذت شوية فلوس كان محوشها و رحت من غير موافقته و خلصت كل معاملاتي و حولت لجامعة إسكندرية و قعدت في سكن للطالبات و قررت اكمل السنتين اللي فاضلين لي فيها
اتنهدت بعمق …هناك اتعرفت برشدي … اعجب بيا و تقدري تقولي كان حب من اول نظرة … بس انا مقدرتش ابادله بأي حاجة … كان قلبي مات … في الاول مرضيتش اديه اي اهتمام ..بس لما لقيته بيركض وراي ف كل حتة و عرفت هو مين و ابن مين قررت اجرب حظي يمكن الدنيا تبتسملي
و فعلا زي ما فكرت حصل …اول حاجة ساعدني الاقي شغل في صديلية و بقيت اصرف على نفسي لحد ما خلصت جامعة
و اول ما ناقشت المذكرة عرض عليا يجي يطلب ايدي من اهلي …العرض بتاعه جيه في وقته لاني مكنتش عارفة أروح فين بعد ما خلصت و ابوي كان مخاصمني و رافض اني ارجع لهم و متبري مني …بعد محاولات كثير من ماما أخيرا قلبه حن و وافق اني ارجع البيت بعد ما عرف اني هاتجوز بعدها على طول ..
تقدري تقولي اني اتجوزت رشدي بس عشان ابقى غنية و انتقم لكرامتي و أرضي غروري … خصوصا لما عرفت أن الحق’يرة اول ما خلصت منحتها و مبقتش محتاجاه ..طلبت الخلع منه …حسب ما سمعت ..هي عرفت أنه بيخو’نها مع وحدة امريكية … بس الحقيقة انها كانت عارفة من الاول أنه بيخو’نها ..اضطرت تستنى لحد ما تخلص دراسة هناك و فعلا اتطلقوا و رجعوا هوما الإثنين …
بعدها رجعت هي تاني بعد ما اخذت الإقامة بشكل دايم و اترفض ملفه هو .. عشان كدة دور عليا لحد ما لقاني .. وقتها كنت بأفكر اوافق على رشدي او لا …بس اول ما عرفت منه الحكاية كلها قررت اوافق على رشدي عشان اعمل معاه اللي عمله معاي … و احرق قلبه زي ما حرق قلبي … عشمته بإني لسة بحبه و موافقة نرجع لبعض
و فضلنا كدة لحد ما سمع بخبر جوازي … ساعتها بس حسيت ان نار قلبي هديت شوية …و اتجوزت بس عشان انتقم من صلاح…
بعدها حاولت أحب رشدي …حاولت كثير بس ما قدرتش …ببساطة قلبي كان نسي معنى كلمة حب و وفاء
كنت مقتنعة طول السنين دي ان الحب مجرد كذبة كبيرة ملهاش وجود …
مسحت دموعها و كملت : عشان كدة لما حسام كلمني عنك كنت شايفاكي نسخة مني … كنت فاكراكي بتمثلي عليه عشان توصلي لفوق على حساب قلبه …زي ما عملت انا في يوم
سامحيني يا بنتي …و ادعي ربنا يسامحني ..انتي طيبة و قلبك ابيض و أكيد ربنا هيسمع منك .
كانت حياة بتعيط على حال. شهيرة : حكايتك صعبة اوي .. مريتي انتي كمان بخيا’نة زي ما حصل معاي …
شهيرة : انا مش هقول كنت ضحية …انا اللي اخترت كدة بمحض ارادتي … اخترت الطريق ده و انا عارفاه شر لان الحب خلاني ضعيفة و مكسورة و مخذولة. … بس رشدي هو اللي خسر اكثر في الطريق ده … لانه حاول طول السنين دي يصلح فيا حاجة اتكسرت و كان مستحيل ترجع زي ما كانت
كان بيحاول يوريني ان لسة الدنيا بخير و فيها حب و فيها اخلاص و فيها وفاء …بس انا اللي مكنتش عايزة اسمعه ولا أشوف بعينيه . … بعد ما اتجوزته بسنتين كدة ما انكرش اني ندمت…. لاني كنت شايفاه بيعاملني ازاي و انا مش قادرة ابادله الشعور و لا اديه حاجة …حاولت كثير اخليه يجيب اخره معاي عشان يطلقني و تبقى جات منه …صدقيني كنت قاسية معاه في مواقف كثير اوي …بس رغم كل ده كان حبه أكبر من كل ده و كان بيتحملني و بيصبر عليا و يعديها و يجي على نفسه …يمكن ده اللي خلاني استقويت عليه اكثر و اتجبرت اكثر و اكثر …لاني كنت عارفة اني مهما عملت مستحيل يسيبني
عشان كدة يا حياة انا بقولك …لو هو عايز يتجوز إلهام انا معنديش مانع و مش هألومه أبدا …من حقه يعيش مع وحدة بتحبه …و فهمي إلهام ان الحكاية ما بينا مستحيل ترجع ولا تضبط و لو عايزة توافق براحتها لأني مش هازعل ..كفاية اني معاكم انتي و حسام و احفادي هيتربوا قدام عيني …دي لوحدها أعظم هدية من ربنا ليا
حياة : لا يا ماما … الموضوع ده صعب اوي على ماما إلهام
شهيرة : انتي بس فهميها موقفي بالراحة … يمكن تفهمك
حياة بإرتباك : مش عارفة اقولك ايه
شهيرة : على فكرة …. الموضوع ده محدش يعرف عنه حاجة أبدا … ولا أي مخلوق .. انا حكيتلك انتي بس عشان تعذريني و تعرفي انا عشت ايه عشان توصل للقسوة اللي وصلتلها .
حياة بحب : عاذراكي من غير ما تقولي حاجة يا ماما ..
دخل حسام
– موضوع ايه ده ؟؟؟
التفتت حياة ليه و لفت شهيرة للناحية التانية و هي بتمسح دموعها
حياة : مش تسلم حتى
حسام – سلام عليكم ..
– و عليكم السلام …انا و مامتك كنا بندردش بس مفيش موضوع ولا حاجة
حسام بشك : متأكدة ؟؟ اومال ماما مالها
– مفيش … و يالا تغير هدومك عشان نروح المستشفى
– جاهزين عشان نروح نجيب الولاد !؟؟
حياة و هي بتزقه بمزاح
– جاهزين من بدري يااالا انت بسرررعة عشان تجهز….يالاااا
حسام بضحك : حاضر حاضر ما تزقيش …😂
تسريع احداث تاني …بعد ثلاث اشهر
اول حاجة عملتها صافيناز بعد عدتها انها كتبت كتابها هي و هاني و اخذها على الفيلا و طبعا وافقت على طول و قفلت البيت و انتقلت معاه
مراد بقى طول الوقت ندمان جدا و هو حاسس انه خسر جوهرة زي إلهام عشان لعبة من اخته خصوصا بعد ما اكتشف كره نفيسة ليه لانها طلبت مبلغ خيالي و عملت المستحيل بس عشان هو ما يقدرش ياخذ البيت بس حياة دفعت لهم المبلغ اللي طلبوه كله مقابل ان ذكرى جدتها تفضل عندهم هي و ابوها …. كان عايز يتجوزها و حاول يفاتحها في الموضوع مرات كثير بس كل مرة كانت بتفهم هو عايز ايه و بتتهرب منه
بعدها كلمت سند في الموضوع و طلبت منه يفهم ابوه يشيل الموضوع ده نهائي من دماغه لانها من يتبع المستحيلات توافق
علاقة شهيرة بحسام و حياة بقت اقوى في وجود التوأم ..شهيرة بقت روحها فيهم حرفيا
نيرة عرفت بالخبر … و مع ان صافيناز طول المدة دي كانت بتطلب منها تبعثلها فلوس بس عمرها ما جابت سيرة باللي حصل بينها و بين مراد لحد ما عيلة فؤاد سمعوا بالخبر و عرفت من امه و تقريبا انهارت خصوصا انها كانت في اول حملها .
عشان كدة صممت حياة انها تبعث لها ابوها تشوفه و نتطمن عليه بنفسها و يقعد عندها هناك شهر يغير جو .
كانت صافيناز قاعدة في الجنينة بتحط مانيكير و بتفكر
– انت فين بس يا هاني ؟؟ مسافر شغل طيب فهمنا ! بس مفيش تلفون حتى تطمنني عليك !! اوووف قلبي بيتحرق ثلاث ايام لا حس و لا خبر
في اللحظة دي جيه واحد بيسأل عن هاني
– خير حضرتك عايز جوزي ف ايه ؟؟
– جوزك هاني مرزوق ؟؟
– ايوة هو
– هو فين دلوقت ؟؟
– جوزي مسافر خير ؟؟ حضرتك تبقى مين و عايزه ف ايه ؟
– انا صاحب الفيلا و عايز ايجار الشهر ده يا اما تطلعوا من الفيلا
صافيناز بإرتباك : لا أكيد فيه غلطان …الفيلا دي بتاعتي هاني كتبها ب اسمي
الرجل بضحك – لا و الله !!! عموما أبقي بلغيه لو ايجار الفيلا مكانش عندي من هنا ليوم الجمعة هاجيب البوليس و ارميكم برة بشنطة هدومكم
اول ما الراجل راح جريت صافيناز على التلفون بتتصل مرة و اثنين و ثلاثة و مش بيرد : يوووه يا هاني !! رحت فين كل ده !! و ايه حكاية الإيجار دي !!
بعد 3 ايام جيه البوليس و طلعها بعد ما اتأكدت ان كل الاوراق اللي مع الراجل سليمة و ان الفيلا باللي فيها ملكه
– كدة يا هاني !! كدة تعمل فيا عملة زي دي !! و انا اللي سبت حياتي كلها عشانك ؟؟ تفهمني انك كتبت الفيلا في اسمي و انا مأجرها ؟؟! الحمد لله لسة عندي بيتي ..
مسحت دموعها و طلبت تاكسي و راحت للبيت
بتحاول تفتح المفتاح مش راضي يفتحلها
وقفت تبص بدهشة لما لقت راجل فتح الباب و بيبصلها بدهشة
– بتعملي ايه يا ست انتي ؟؟!
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية إسمي حياة)
