رواية أولاد الجبالي الجزء الثاني الفصل الحادي والثلاثون 31 بقلم شيماء سعيد
رواية أولاد الجبالي الجزء الثاني الجزء الحادي والثلاثون
رواية أولاد الجبالي الجزء الثاني البارت الحادي والثلاثون
رواية أولاد الجبالي الجزء الثاني الحلقة الحادية والثلاثون
بسم الله والصلاة والسلام على رسول الله 🌺
أن الله إذا أحب عبداً ابتلاه بالكثير من الهموم، وما على العبد إلا تحمل هذه الهموم والصبر، فسوف يأتي لك فرج كبير وفك للكرب الذي تحمله أنت الأن، لا عليك إلا قول لا اله إلا أنت سبحانك انى كنت من الظالمين
………..
دفع عصام مرام سريعا حتى لا تستفيق زاد وتراها أمامها فتتعرف عليها .
مرام بإنفعال ..انت بتشدنى ليه كده يا بابى ؟
عصام …عشان مش عايزها تتعرف عليكى دلوقتى ولا تعرف سبب الخطف .
مرام بإستفهام ….وليه ما تعرف، هتعمل ايه يعنى ؟
وهى خلاص وقعت تحت أيدينا وانت عارف يا بابى اللى بيوقع تحت أيدينا خلاص كده يقول على نفسه يا رحمن يا رحيم ومفيش رجعة .
عصام بحنق ….أعقلى شوية يا مرام ، انا مش عارف ايه حصلك ؟
ده مكنش فيه حد بدماغك وأنتِ اللى كنت مماشية الشغل ده ، وأنتِ برده السبب فى الخير ده كله .
فدمعت عين مرام بقهر مرددة …ايوه لما اتجوزت وانا لسه عيلة تاجر مخدرات أكبر منك فى السن يا بابى ولما مات ، بقيت انا مكانه .
عصام ..ودى أحلى حاجة حصلت فى حياتنا .
لكن للأسف بسبب حبك الأعمى لبراء هتضيعى كل حاجة عملناها وتعبنا فيها .
فوضعت مرام يدها على وجهها مرددة بقهر …مهو كله بسبب الإنسانة اللى جوه دى .
بس أول ما تطلع روحها هرتاح يا بابى
وبراء يكون ليه لوحدى وينساها خالص. .
عصام …مهو ياريت براء ده كان إنسان عادى ، كان الأمر هيكون سهل لكن ده يا بنتى شرطة يعنى دماغه مش سهلة زى ما أنتِ متصورة ومش من السهل برده ترويضه وممكن تتوقعى منه الغدر اى لحظة .
عشان كده لازم نكون بعيد عن البنت دى دلوقتى ، تحسبا لأى حركة غير متوقعة ممكن تضيع فيها رقبتنا .
ففهمتى ليه مش عايزها تشوفك .
فدمعت عين مرام ..تمام يا بابا ،وسامحنى غصب عنى .
انا كمان مش عارفه انا بعمل ليه كده ، الأمر كان فى الأول مجرد لعبة عشان نستغله مكانته فى الشغل ، فجأة لقيت نفسى بحبه وبغير عليه أوى ومش متحملة أن فيه حد غيرى فى حياته .
وعارفة أن اللى بعمله ده غلط وخطر كمان بس غصب عنى وخايفة يروح منى بعد ما لقيت فعلا إنسان يستاهل أحبه .
انسان نضيف من جوه ، أتجوزنى عشان حس بغلطة هو برىء منها ، مش زى أى حد اعرفه عايزنى كده مجرد نزوة او عشان فلوسى .
عصام بعتاب …وبعدين هنقلبها دراما ليه كده !
يلا بينا نخرج من الجو الكئيب ده وهنسيب الرجالة يتعاملوا مع زاد لغاية ما نشوف هنعمل ايه معاها ، لغاية ما تعدى عملية الأدوية المضروبة بسلام .
وياريت لما يرجع براء تحاولى تكونى رقيقة شوية يا مرام عشان تساعديه يحبك هو كمان ، مش تتعصبى عليه .
ده صعيدى يا بنتى والصعايدة ميحبوش الست اللى ترفع صوتها قدام جوزها .
فحولى تراضيه وأنتِ فاهمة طبعا انا قصدى ايه .
مرام ..فاهمة يا بابى ، بس خايفة من رد فعله لما يكتشف أن الزفتة مراته أتخطفت .
فعلا هيحاول ينساها مع الوقت وينشغل بيه انا .
ولا هيفضل يبكى عليها ويعيش على ذكراها .
بس لو عمل كده ،انا هخليه يحصلها بجد .
فضحك عصام ..ايوه كده رجعتى مرام بنتى ، اللى ميهماش حاجة إلا راحة بالها وبس .
ثم سمعت مرام رنين هاتفها فوجدته من براء ، فتبدل غضبها بإبتسامة وقالت بلهفة …ده براء يا بابى .
فتعجب عصام من تبدل حالها مردفا …كل الفرحة دى عشان خاطره ، طيب ردى يا بنتى .
ففتحت مرام الخط مردفة بلهفة …براء ، فينك يا حبيبى ؟
براء بجمود ..چى فى الطريق جدامى ساعة زمن .
مرام بفرحة …هكون فى انتظارك يا حبيبى ، متصورش قد ايه انت وحشتنى اوى اوى .
فحدث نفسه براء …جبر يلمك عشان أخلص منيكى .
جال وحشتك جال ، يا ستير يارب منك .
براء بابتسامة صفراء …وأنتِ كمان .
يلا سلام دلوك .
مرام …يلا يا بابى بينا بسرعة عشان نلحق نوصل قبل ما يجى عشان أستعد .
عصام ابتسم بمكر ….بقا كده ، ماشى يا ستى يلا .
ثم رن هاتفها مرة أخرى من جوليا .
مرام …دى چوليا ، أكيد عندها خبر جديد .
عصام بلهفة …طيب ردى بسرعة وبشرينى .
مرام ..اوووك .
هالوووو جوليا .
جوليا ..هالووو حياتى ،كيفك ؟
مرام …بخير.
جوليا ..تمام ، موعدنا القادم الأربعاء هتوصل الشحنة ، فكونوا على أستعداد .
مرام ..تمام .
فتنهد عصام …حلو أوى ، وكده هنبتدى الشغل اللى على أصوله .
وبكده الكل هيركع قدام عصام الدمنهوري ، وهكون انا نمبر ون .
ويلا بقا يا مرامى يا وش السعد نلحق سيادة المقدم .
وعايزك النهاردة تبسطيه على الاخر وترقصيله كمان عايزه يدوب كده عشان يستلم الشحنة وهو مش شايف قصاده من كتر الهنا اللى هو فيه .
فضحكت مرام بدلال …بس كده عيونى يا بابى .
يلا بينا .
وأخذت تندندن ..
على عش الحب وطير ياحمام على عش الحب الحب
قول للأحلام انا جاية أوام على عش الحب الحب .
أما براء فشرد أثناء طريقه فيما حدث مع محمود عندما حدثه قائدهم بمهمته مع مرام .
محمود …تمام يا باشا من الليلة أروح أسهر هناك وأشوف الدنيا هتمشى إزاى .
القائد …تمام بس ياريت متحولش تلفت نظرها عشان متشكش انك جى المكان وقاصدها هى بالذات ، فخليك بقدر الإمكان طبيعى .
محمود ..تمام يا فندم .
لينتهى اللقاء ويغادر القائد ، بيضحك براء مردفا بسخرية …يلا يا حضرة المقدم هتروق نفسك وتعيش حياتك .
فنكزه محمود مردفا …وحضرتك مبسوط كده ليه أوى ، عشان فلت منها صح ، بس ماشى دورك جى يا حبيبى وحاسس أنه هيكون أشد من مجرد سهرة يا حبيب والديك .
براء بعبوس . …تف من خشمك ، هو انا ناجص بلاوى .
كفاية اللى حوصل جبل أكده ، دى لو زاد شمت خبر أن فيه عملية وفيها موزة زى دى ، مش بعيد تربطنى بحبل وترچعنى الصعيد تانى .
فضحك محمود …حقها ،تعبت معاك كتير زاد يا براء .
وياريت تحافظ عليها دى نعمة من ربنا واديك شايف ستات دلوقتى عاملة إزاى .
فشعر براء بالغيرة فحدثها …ما خلاص يا عمنا ، ولو مسكتش هصورك صورتين إنما ايه فى النايت مع الموزة وأبعتهم لنهلة .
فرفع يده محمود وحركها بقوله …لااااا لاااا .
مش ناقص ترجع تقولى … إحنا مننفعش لبعض يا بيه .
فضحك براء…بيه مرة واحدة .
محمود ..انت بتتريق .
دى هتجننى يا براء ، تعرف لما اقولها بحبك تقولى ايه .
براء ..ايه ؟
محمود ..حبتك العافية يا بيه .
فقهقه براء …لا دى مشكلة ربنا يصبرك يا صاحبى .
ده كده زاد أهون .
محمود ..يلا هسيبك بقا عشان أروح وألبس طقم روش كده وأستعد للهلس .
فضرب براء على كتفه مردفا بداعبة …توكل على الله يا شيخنا.
فضحك محمود وبالفعل عاد إلى منزله وأختار طقم كاجول يتناسب مع طبيعة المكان .
وخرج فشاهدته والدته فاندهشت مرددة …ايه اللى انت لابسه ده يا محمود .
فنظر محمود إلى نفسه مردفا ..فيه ايه يا ماما ؟.
والدة محمود …يعنى يا ابنى دى مش طريقة لبسك انت دلوقتى مكانتك كبيرة وده لبس شباب لسه .
محمود …طيب منا شباب ، أنتِ عايزة تكبرينى ولا ايه ؟
والدة محمود …مش قصدى يعنى….
محمود ..يوه سبينى يا ست الكل أعيش حياتى حبتين ، ثم أخذ يدندن اغنية محمد رمضان
مافيا مافيا مافيا .
فجحظت عين والدته مردفة …يا خيبتى هو فينا من كده يا محمود ، لا الولد ده لازم أجوزه يعنى لازم أجوزه ، قبل ما دماغه تلسع أكتر .
اتجه محمود إلى النادى الليل بالفعل وعندما وصل ودلف إليه ، وضع يده على أذنه سريعا بسبب تلك الموسيقى الصاخبة .
محمود ..ايه الصوت المزعج ده ، ودنى هتتخرم .
ثم نظر حوله ووجد أصناف غريبة من الناس ، منهم فتيات شبه عاريات يتراقصن مع شباب ويتمازحن بكثير من الكلمات الخارجة ، بجانب أخريات يقدمن الخمور ، وغير ذلك من رائحة الدخان المنبعثة بالحشيش .
محمود بنفور …يخربيت كده ، ايه الأرف ده ، وإزاى الناس دى كده ، ثم وضع يده على وجهه مستغفرا .
أعمل ايه بس لازم استحمل أكل العيش بقا .
ثم اتجه إلى المنضدة ، فجاءه النادل .
_اهلا بيك يا فندم ، تحب تشرب ايه ؟
_كابتشينو لو سمحت .
فضحك النادل …كابتشينو ايه يا فندم ،انت عايز تركز ولا تنسى الدنيا هنا .
انا هعملك كاس دوبل .
محمود …متشكر ، طيب ممكن مانجو فريش ، دى بتخلينى أنسى انا أسمى ايه أصلا .
فوجد محمود صوت ضحكة رنانة انثوى ، فالتفت فوجدها تلك الفتاة التى رأى صورتها مع القائد .
وعندما نظرت إليه مرام ، أيقنت أنه هو فعلا الضابط الذى أدلى بأوصافه ذلك العين التى لهم فى قسم البوليس .
فحدثت نفسها …عامل نفسك ذكى وايه كمان جى بنفسك لحد هنا .
بس صراحة شكلك جانتيه خالص وماشى نلعب بيك شوية يا اسمك ايه .
ومش بس انت ، ده كمان صاحبك عشان من مواصفاته عجبنى كتير .
مرام بدلال ..دمك خفيف أوى يا أسمك ايه انت ؟
محمود بإبتسامة ..محسوبك محمود .
مرام …نورتنا محمود .
بس دى أول مرة أشوفك هنا .
محمود بداعبة …ومش آخر مرة يا قمر أنتِ.
مرام …أسمى مرام .
محمود ..اسم جميل أوى ، اتفضلى أعزمك على يانسون .
فضحكت مرام بصوت عالى .
محمود بمكر …لا كده مش هقدر أستحمل .
ليتسامروا لبعض الوقت بعد ذلك على أمل فى تجدد اللقاء
وبالفعل تقابل معها محمود كثيرا ولكن لم يستطع أن يأخذ منها اى معلومة تفيده فى القضية .
لذا أمر القائد براء بالتحرك ، وأعلمه بمواعيد ترددها على المول التجارى ليقابلها ولكن ليكن كأنه صدفة وليس مرتب حتى لا تشك بالأمر .
أبتلع براء لعابه بخوف وحدث نفسه …ربنا يستر .
ليخرج بعدها وعلى وجهه الجمود ، فابتسم محمود ومازحه بقوله …ايه يا عمنا مالك كأنك شايل فوق راسك طاسة الخضة.
براء ..قلقان يا محمود وحاسس أن الموضوع ده ، مش هيعدى على خير .
محمود …عشان زاد يعنى ، بس ده مأمورية شغل مش حقيقى ، وحتى لو حسن بحاجة ، انت ممكن بعدين تفهمها وهى اكيد هتعزرك
تنهد براء ..مش خابر ، ووجلبى مش مطمن بس زى ما جولت عاد ، ده واجب ولازم يتنفذ مهما حصل .
ليقابلها براء بالفعل كما ذكرنا فى المول صدفة ولكن كانت الأخرى فى نفس الوقت تتعمد المقابلة ، ظنا منها أنها تستطيع إغوائه بجمالها لتسيطر عليه وتستخدم رتبته دون علمه فى تيسير عملياتهم المشبوهة فى تهريب المخدرات.
ولكن لم يدرك براء أن الأمر سيتحول بتلك السرعة الغريبة ويجد نفسه زوجا لها فى أيام معدودة .
بعد أن وضعت له مرام مخدر يجعله فى حالة لا يدرك ما يفعله وذهبت به إلى شقته ، لتتفاجىء زاد أنه يدخل عليها وفى يده مرام .
فصرخت …مين دى يا براء ؟
لتضع مرام يدها على خصرها مرددة ..انا حبيبته يا أسمك ايه ؟
ويلا وسعى من طريقنا عشان عايزين نستريح وننام شوية .
فوقفت زاد أمامهم تدفعهم باكية …لا يستحيل .
أطلعوا انتم الأتنين برا ، يستحيل الأرف ده يحصل فى شقتى .
براء ..عايزة تطلعى أنتِ أطلعى ، لكن أنا داخل ومش عايزة دوشة .
فصفعته زاد على وجهه مردفة بنحيب وقهر …بتطردنى فى نص الليل يا براء عشان واحدة زبالة زى دى .
انت للدرجاتى بعت نفسك الشيطان وانا اللى كنت بقول لا مش ممكن تعمل كده ، لكن للأسف طلعت خاين ودون ولا يمكن اسامحك ابدا .
استمع براء لها بجمود ولم يظهر عليه اى تأثر لعتابها لإنه بالفعل لا يشعر بما يفعل ووجد مرام تدفعه للداخل وتبحث عن غرفة نومه .
فاستوفتهم زاد مرددة .. إستنى هلم هدومى الأول عشان أمشى وبعدين اشبعى بيه براحتك ، انا خلاص مش عايزاه .
حركت مرام شفتيها بإزدراء مرددة ..يكون أحسن بعض .
انا مش عارفة إزاى أتجوز وحدة زيك لا شكل ولا منظر .
زاد …اه مهو فعلا بيعجبه القشور هو متعود على كده ، بس صدقينى بيرميهم بعد كده ويدور على الأصل وسئليه لما يفوق لنفسه .
فصكت مرام على أسنانها بغيظ مردفة …يلا امشى أطلعى بره .
زاد بقهر ..همشى وسيبهالكم تعيشوا وتتمرمغوا فى الطين .
ثم أسرعت بوضع ما تحتاجه من أغراض أساسية فى حقيبة صغيرة .
كما دونت له ورقة تطلب بها الطلاق ولصقتها على المرآة .
وخرجت تجر أذيال الخيبة ودموعها لا تتوقف وعندما وقفت على الباب التفتت لتنظر بآسى إلى شفتها مرددة …يا خسارة يا براء .
ثم غادرت سريعا الى محطة القطار ، تنتظر القطار المتوجه نحو الصعيد .
ليتفاجىء هو بالنهار ما حدث وكان بين نارين ، نار حبه لزاد وبعدها عنه ظنا أنه بالفعل قد خانها ولكن ليس بيده ونار زواجه من تلك الحية مرام التى ببغضها وما كان يدرك أن الأمر سيصل به إلى تلك الدرجة .
ولكن ما باليد حيلة ، عليه أن يستكمل مهمته حتى تعود بالنفع لمصلحة الوطن .
ثم خرج براء من شروده مردفا بحنق ….واتجوزتك يا مرام ، منك لله يا شيخة ، ميتى بس تچيبوا اللى فى عبكوا وتحددوا معاد العملية الچاية عشان أخلص منيكم وأعود لمرتى وام ولدى .
………
منذ أن قضى باسم تلك الليلة مع عزة لم يكررها لبضعة أيام أخرى ، حتى أشتد الشوق بعزة مبلغه حتى أنها كانت تنتفض عندما تسمع صوت أقدام قريبة من الباب مردفة …باسم ، أكيد باسم .
ولكن عندما ينخفض الصوت وتبتعد تلك الأقدام يصيبها الفتور وتدمع عينيها مردفة …أتوحشتك جوى يا نور العين ، ميتى بس أتكحل بشوفتك جدام عينى .
ولولا الملامة كنت روحت چيبتك من عنديها غصب ,بس بيكفى النار اللى جواها من ناحيتى مش عايزة أولعها اكتر .
بس ياريت حتى لو ليلة فى الأسبوع يراضى قلبى فيها .
ثم تنهدت بلوعة مردفة ،،،
اه من لهفتى على جلبك
اه من جلبى اللى عيتحرق عشان طلة من عيونك
اه واه من بعدك ، ميتى الشوق يناديك .
وأثناء ذلك كان باسم فى فراشه وبجانبه ملك ويحاوطها بذراعيه .
فهمست ملك ..وبعدين يا باسم ، انت كل ليلة هنا ، وناسى مرتك عزة ،مينفعش أكده .
روح يلا بيت معاها الليلة .
أطلق باسم زفيرا حارا ، فهو لا ينكر أنه شعر بالراحة مع عزة تلك المرة ولكن حبه لملك جعله يبتعد عنها خوفا من عليها .
ملك …ايه مش بترد عليه ليه ؟
باسم …وبعدين معاكى ، ايه كل شوية روح ، روح .
مبجتيش تحبى وجودى جمبك ولا ايه عاد ؟
فتنهدت ملك بلوعة وامسكت بيده ورفعتها لفمها وقبلته مرددة …ياااه يا باسم ، كيف تجول أكده ، ده ياريت أقدر أفتح جلبى وأحطك جواه كمان .
انت حبيبى وجوزى وابنى كمان ومعرفش أعيش من غيرك ولا من وجودك جمبى .
بس الجصد أن فيه وحدة أكيد جلبها عيتجطع بسببى وعتحبك وخايفة أتحمل ذنبها .
فروحلها راضيها يا باسم ، عشان ربنا يراضيك منها بالولد الصالح .
باسم بنفور ….تانى يا ملك جولت مش عايز حاچة وكفاية عليه أنتِ .
ملك …انت مش عايز ، لكن انا عايزة حتة منيك ، أشوفها جدام عينى بتكبر حتى لو مكنتش انا أمه .
فقبل باسم رأسها مردفا …أنتِ أحن وحدة فى الكون كله .
ملك ..طيب يلا روح عشان خاطرى .
باسم …حاضر يا ملك ، عشان أراضيكى بس.
فقام باسم بالفعل ، لتحبس ملك دموعها حتى خرج ، ثم أطلقتها مردفة …اااااه يا جلبى ، بس أعمل ايه ده حقه .
يارب هونها عليه ..
أما باسم فخطى خطواته نحو غرفة عزة وكأنه طفل صغير يتعلم المشى ، يخطو خطوة ثم يتراجع فحدث نفسه …مالك ما تثبت ، قلقان كده ليه ؟
_مش عارف حاسس انى متلغبط كده ومحرج حبتين .
انا منكرش إنى كنت مبسوط ومرتاح معاها بس برده بحس زى ما اكون أول مرة بشوفها ومش واخد عليها رغم أننا مع بعض بقالنا فترة .
_ بس هى مراتك وبتحبك أوى زى ملك ويمكن زيادة .
_عارف وده تعبنى أكتر ، لانى مش قادر أبدلها نفس الشعور وأسعدها وأديها حقها .
وظل هكذا باسم بمشاعر مضطربة حتى وصل بالفعل أمام غرفتها وعندما هم أن يطرق الباب ، وجدها هى تفتحه فتفاجىء .
وأخذت تنظر إليها عزة للحظات كأنها غير مصدقة أنه أمامها ، ثم ألقت بنفسها على صدره .
عزة بلهفة …باااااسم أخيرا چيت .
فدفعها باسم قليلا للداخل وأغلق الباب خلفه مردفا …چيت يا عزة .
بس كيف فتحتى الباب قبل ما أخبط .
عزة …انا روحى فيك يا باسم ، عشان أكده حسيت بيك وفتحت .
متصورش جد ايه انا الايام اللى فاتت كنت عتعذب من بعدك وأفكر فيك ، والشوق كان هيموتنى بس مش قادرة أجول ولا أچيلك عشان خاطر ملك .
ابتسم باسم …مش خابر أجول ايه ، انتوا التنين حاسس مفيش زيكوا واصل .
عتخافوا على شعور بعض كيف ده ، أول مرة اشوف ضراير أكده ، انتوا بچد ولا تمثيل !!
فضحكت عزة …لا بچد ، انا عجولك انا كنت عغير منيها جوى قبل ما انت تچيلى النوبة اللى فاتت .
لأنها هتتنعم بجلبك وقربك وحديها ، لكن لما لجتها هى عتچيبك لعندى متصورش فرحتى كانت كيف وحبتها جوى وهفضل طول عمرى شايلة جميلها ده فوق راسى .
باسم بمكر …لا على أكده ، روحى بجا بيتى چمب حبيبتك وانا أطلع منيها ، بدال الليلة دى هتعدى على كلامك و حبك لملك .
فابتسمت عزة واقتربت منها مردفة بدلال …لا الليلة دى عتعلمك عزة كيف عتحب باسم جوى جوى جوى .
لتأخذه بعد ذلك عزة إلى عالمهم الخاص فى ليلة جميلة ، إرتوت بها عزة من بحر باسم .
وتلك الليلة سينتج عنها نبتة صغيرة فى أحشائها .
…….
فتحت زاد عيونها وشعرت بألام تسرى فى جسدها ، فضمت يديها على صدرها ثم تذكرت براء وما حدث له فصرخت …براااااااء ، براااااء .
فزفر الرجل بضيق الذى يحرسها …شكلها فاقت وهتصدعنا بصريخها .
ومش هتستريح غير لما أديها وحدة على دماغها ، تروح تتخمد تانى وتريحنى ، هو انا ناقص وش .
أخذت زاد تنظر حولها بدهشة مرددة …انا فين وايه اللى جبنى هنا ؟
وفين براء ؟
انت فين يا براء
يا عينى عليكى يا زاد .
يا ترى هيحصلك ايه ؟
وللحكاية بقية اتمنى انها تعجبكم
نختم بدعاء جميل ❤️
اللهم يا فاطر السماوات والأرض ويا عالم الغيب والشهاده، أسألك اللهم أن تشرح صدري وتغفر ذنبي، اللهم إني أسألك بأنك أنت الله مالك الملك وأنك على كل شيء قدير، أن تفرج الهموم والكروب، وأن تنشر السعادة في قلوبنا يا أرحم الراحمين”
شيماء سعيد 🤍 ام فاطمة
.
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية أولاد الجبالي الجزء الثاني)
