رواية أنين القلب الفصل الرابع 4 بقلم ليلة عادل
رواية أنين القلب الجزء الرابع
رواية أنين القلب البارت الرابع
رواية أنين القلب الحلقة الرابعة
الشارع
تركب وردة التاكسى وتذهب ينظر كامل بأسف وضيق ثم يعدى الطريق للجهة الأخرى. ويسير على الكورنيش وثم يقف أمام البحر. ينظر حوله يرى شاب يجلس مع حبيبته ويتحدثان يبتسم كامل. ثم ينظر بعينيه. يجد رجل وزوجته وابنه يلعبون سوا ينظر بضيق ويتنهد ثم يتحدث بصوت داخلي
أنت لسه تعبان ، لسه بتخاف أنت مستحيل توصل إنك تبقى طبيعي زي الراجل ده ويبقى ليك بيت وزوجة وأولاد ,أنت مش عادي ياكامل، ولا أنت كامل زى اسمك حرام تظلم معاك وردة , بقالك سنة كل اللي قدرت تعمله ولا حاجة , تمسك ايدها .. تسلم على الناس اللي بتثق فيها من غير جوانتي , هتفضل ركنها جنبك لحد امتى ولامتى هتتحمل أكيد هتزهق وتسبني أنا حسبتها غلط ولازم أصلح غلطتي…
♥️___بقلمى ليلةعادل___♥️
شقة كامل ١٠م
يفتح كامل باب الشقة ويدخل كان يبدو على ملامح وجهه الضيق والحزن يضع المفتاح بيأس على الجزامة كانت الأم تجلس على الكنبه تشاهد أحد المسلسلات العربيه القديمة. تلتفت له.
الأم : كامل تعال.
يقترب كامل منها ويجلس بجانبها
الأم : هاعملت إيه بعيد الميلاد
كامل : تمام… كله تمام أنا هدخل أنام تعبان شوية
الأم : مش هتتعشى ولا اتعشيت مع وردة
كامل : لا ماتعشتش بس مش جعان تصبحي على خير يا ماما
الأم : وأنت بخير يا حبيبي
كامل : متنسيش تاخدي دوا الضغط
الأم : حاضر غطي نفسك كويس الجو برد النهارده
كامل : حاضر
غرفة كامل
يدخل كامل الغرفة كان يبدو على ملامح وجهه الحزن الشديد وفقدان الأمل ، فالفرح الذى كان على وجهه منذ اقترابه من وردة ، قد اختفى ، فارجع كامل لنفس التكشيره ، نفس الحزن ،نفس اليأس، ثم جلس على السرير و تمدد وارجع رأسه للخلف ، ثم سند رأسه على مؤخرة السرير ، وأخذ يفكر ويتذكر كل شئ حدث معه ، خلال السنة التى مضت ، منذه لقائه بوردة ، وخروجهم سويا وتحدثهم سويا، أخذ يتذكر كل شئ ، ثم بدأت الدموع تتغلغل بعينيه ، ثم مسح دموعه ،ثم قام بخلع دبلته، ونظر لها بيأس تنهد بضيق بعد ثوانى رن هاتفه المتصل وردة نظره للهاتف بتردد. ثم قام بقلب هاتفه للناحية الأخرى
خلال اسبوع
لم يذهب كامل الى الجامعة ولم يذهب للجلسات لم يخرج من غرفته لا يجيب على الاتصالات وردة وعندما كانت تتصل بوالدته يطلب منها أن تقولها انه نائم فهو منعزل عن العالم لايريد رؤية أحد فرجع لحالته السابقة يأس محبط ومتخبط
ثم قامت وردة بزيارته
♥️___بقلمى ليلةعادل___♥️
شقة كامل ٢م
تطرق وردة الباب تفتح لها أخته إيناس
وردة : هو فين
إيناس : جوه
وردة : أنا هدخله
واثناء دخولها تلتقى بوالدته
والدته : ايه اللي حصل يا وردة
وردة : والله يا ماما اللي حكتهولك بالتليفون بس
والدته : مستحيل عشان شوية ورق وقع عليه يتنكس كدا ، ده رجع زي ما كان قبل ميعرفك وقبل كمان. والدكتور ده يقول سبوه
وردة : أكيد هو هيفهم أكتر مننا
والدته : ادخليله. هو بيحبك وتغير عشانك
وردة : ماتخفيش يا ماما ادعيلوا
تدخل وردة الغرفة
ايناس : ما تخفيش يا ماما ما انتي عارفة كامل كل فترة بيحصلوا كدا وبيرجع تاني
الأم : بس بقاله سنة كويس كنت قولت خلاص الصعب عدا
إيناس: متخفيش ان شاء الله هيبقى كويس
الأم : تجلس بتعب وحزن الأم … اااه ياإيناس هو سهل عليا اشوف ابني كدا ، سهل عليا أفضل سنين محرومة اني احضن ابني ، أنتم مش حسين بيا أنا بتقطع من جوايا ، ما بقتش قادر اتحمل اشوفه كدا ، خلاص والله ما قادره اشوف ابني الوحيد بيدبل قصاد عيني كدا ،. وسنين عمره بتروح منه ، شاب يا حبيبي مفرحش ولا بطفولته بشبابه ، وهو شباب بيروح ، مش كفايه حرقة قلبي على كمال. كمان كامل لا اله الا الله مش معترضة على حكمه بس تعبت نفسي ابنى يعيش سعيد ومرتاح ، مش قادره اشوفه بيتقطع كدا وأنا بتفرج
تقترب إيناس منها وتطبطب عليها تقبله من رأسها
ايناس : ادعيلوا هو محتاج دعواتك
♥️___بقلمى ليلةعادل___♥️
غرفة كامل
نرى كامل يتمدد على السرير ويبدو على ملامحه الحزن تقترب وردة وتجلس على السرير بجانبه
وردة : بقالك اسبوع مختفي، قدرت تتحمل اسبوع تبعدعني ها ينظر لها دون اجابة .. دمك تقيل أوي . أنا كنت هتجنن عليك ، كنت مختفي ليه. انشغلت عليك أوي. كنت هموت من القلق عليك… كامل
كامل : انا آسف بس مكنتش عايز حاجة تشتت تفكيرى
وردة : تفكير ايه
كامل : طلعت حسبتها غلط
وردة : هى ايه
كامل : علاقتنا
وردة : نعم
كامل : يقف ويسير قليلا ثم ينظر لها. وردة أنا وأنت مش هينفع نكمل مع بعض علاقتنا ما ينفعش تستمر العلاقة دي من البداية محكوم عليها بالفشل
تقف وردة تقترب منه… كامل مالك ايه اللي حصل أنا زعلتك بحاجة
كامل : لا أنا اللي بزعلك أنا اللي ديما مقصر
وردة : بس أنا مش زعلانة ولا حاسة بأي تقصير منك. أنا مش فهمه ايه اللي حصل
كامل : اللي حصل أني حسبتها غلط. كنت فاكر اني قادر.. أني أحب وأبقى مسؤول على شخص تاني طلعت غلطان أنا حاولت بس فشلت
وردة :بالعكس أنت مافشلتش أنت…
بمقاطعة بنبرة حزن ويأس كامل .. فشلت وهفشل أنا مش هقدر اديكي أكتر من كدا
وردة : أنا مش عايزة أكتر من كدا
كامل: انتي ليه مش فهماني
وردة : عايزني أفهم إيه وأنت عايز تنهي كل شىء بينا بسهولة
كامل : وردة أنا مش هقدر أكون انسان طبيعي ، وردة انتي بتدينى كل حاجة حلوة ، ساعدتيني كتير ، صبرتي أكتر ، وأنا بتقدم بصعوبة ، شوفي فات سنة وكل اللي حصل ولا حاجة
وردة : كل ده ولا حاجة
كامل : ايوه ولا حاجة.. لواحد داخل على مسؤوليه جواز بالنسبه ليا.. اللي اتقدمته ولا حاجة
وردة : الولا حاجة ده ، بالنسبة ليا حاجة كبيرة أوي ، وشىء عظيم ، كامل. بلاش يأس مستحيل كل ده بسبب العيد ميلاد والصواريخ اللي اضربت ، انت أقوى من اللي حصل ، أقوى من أى موقف ، مينفعش تنكسر كدا. ، المواقف دي هتتكرر ، مش معقول كل ماتحصل تزعل وتهرب وتخاف كدا فين قوتك
كامل : أنا مش قوي. انا مش كامل أنا كلي عيوب أنا ضعيف
وردة : لا انت مش ضعيف أنت أقوى انسان قبلته بحياتي ، كامل عشان خاطري الموقف بسيط والله ميستهلش كل ده والا انت مش بقيت بتحبني وعايز تسبني
كامل : انا بحبك لدرجة إني بضحي بيكى عشان تبقى سعيدة حتى لو مع غيري حتى لو هشوفك بعيني مع غيري ، انتي تستاهلي انسان يسعدك ، لاني أنا فشلت اسعدك ، وفشلت اديكى أبسط حقوقك ، انتي كتير عليا يا وردة ، أنا اناني ، افتكرت إني هقدر اتجوز وأعيش حياتي بشكل طبيعى ، طلعت غلطان. وردة من فضلك أنا مش هكمل. يفتح درج كومودينو ويعطيها الدبلة
وردة : بأي حق بتنهى علاقتك بيا ، مش بمزاجك على فكرة، مش بمزاجك تيجى تقتحم حياتي وتقولي بحبك وتوعدني وتخليني أحلم واتمنى، واستنى اليوم اللي هحققك كل احلامي معاك ، وفجأه تاخدها مني وتهرب ، مش بمزاجك يا كامل، مش بمزاجك تيجى تسرق احلامي وتهدها عليا ، لو أنت مش متسمك بيا وبعلاقتنا انا بقى هتمسك بيك، هتمسك بعلاقتنا وهدافع عنها بكل ما فيا ، مش هتخلى زيك بالسهولة دى عن حبي ، عن الإنسان اللي خلاني اشوف الحياة بشكل تاني ، أنا بحبك ياكامل، مستحيل اسيبك حتى لو أنت عايز تسبني ، أنا مش هسيبك ، والدبله دي مش هي اللي ربطانى بيك ، اللي رابطنا ببعض أكبر بكتير منها ، مش بدبله يا كامل مش بدبله ، أنا هامشي دلوقت لكن هارجع تاني تقترب منه تضع ايدها على خده خد بالك من نفسك
كان كامل يسمع كلام وردة و قلبه يغلي وعيونه مليئة بالدموع والحزن ثم تخرج وردة والدموع تسكن عيونها.. يمسح كامل دموعه ويجلس على السرير ينظر للكومودينه يأخذ كتابه ويفتحه ويخرج صور وردة وينظر لها بحب
♥️___بقلمى ليلةعادل___♥️
العيادة ٦م
يجلس كامل على الكرسي الأمامي لمكتب الدكتور وهو ساكت لا يتحدث
وافي. : كامل بقالك نص ساعة ساكت
كامل : السكوت أفضل إختيار فى الأوقات اللي شبه دي
وافي : وايه هى الأوقات دي
كامل : حاسس ان جوايا بركان نار محبوسه لو تكلمت هتحرق كل اللي حوليها
وافي : فاضحيت بنفسك وسبت النار تحرقك
كامل : بيتهيألى أفضل انها تحرقني أحسن ماتحرق أعزّ الناس ليا
وافي : ليه شايف ان قربك من وردة نار
كامل : ايوه نار ، بيأس أنا بظلمها معايا ، وردة تستاهل انسان طبيعي ، مكنش لازم اخوض الخطوة دي دلوقت ، ولا حتى بعدين ، حرام عليا اظلم بنات الناس معايا ، أنا رضيت بحياتي كدا ، وكويس أوي اللي وصلت ليه ، بلاش أحلم باللي أكبر مني
وافي : كامل لازم تفهم ان احنا تجاوزنا كل ده
كامل : لا ماتجاوزناش
وافي : يقف ويقترب منه ويجلس على الكرسي الذي أمامه وبحنان وابتسامة … أنت قادر تتجوز وتخلف وتعيش حياتك بشكل طبيعي جدا ، أنت فيك مميزات عن غيرك ، أنت مميز ما بتكذبش وفي بوعودك ، بتحترم المواعيد جدا
كامل : أنت بتحاول تقنعني بأيه
وافي : أنا مش بقنعك ، دي حياتك قراراتك اختياراتك ، أنا يدوب بوجهك للطريق الصح ، أنت عايز تسيب وردة سبها ، مش هقولك خليك معها لأنك محتجلها ، أنت مش محتاج وردة ، أنت محتاج تصدق إنك طبيعي من تاني ياكامل ، تصدق ان كامل ، اوعى تكون فاكر تضحيتك بحبك دي قوة ، ده منتهى الضعف ، القوة إنك تحارب وهي معاك لحد متوصل وتفوز بالحرب
كامل : يقف وبنفعال خفيف .. كفايه كلام ده ، كفايه سنين وأنا بحارب وبضحك على نفسي إني أكسب المعركة ، لاني أنا فشلت ، أنا خسرت ، خسرت يا دكتور لازم تقتنع بكدا
وافي : مش أنت مقتنع
كامل : اه
وافي : خلاص ده المهم
كامل : بضيق .. متتعملش معايا كأني مريض وبتاخده على قد عقله
وافي : وأنت مش مريض
كامل : لا مش مريض
وافى : وآمال يعنى أنت انسان طبيعي المفروض نتعامل معاك بشكل طبيعي مش زى المرضى
كامل : قولتلك ايوه
وافي : ايوه ايه
كامل : بقوة وانفعال … ايوة مش مريض ايوه طبيعي مش هو ده اللي عايز تسمعه
وافى : هو ده اللي عايزك أنت تسمعه
ينظر كامل لوافي بصمت ويبتلع ريقه… ينظر وافي له بابتسامه.
وافي : اقعد يا كامل بقيت بتنفعل زيادة عن اللازم
كامل : يجلس.. أنا بحبها .. بدموع .. أنا خايف تسيبني
وافي : فاقولت تسيبها قبل ماتسيبك
كامل: بحسم… لا… بتوتر ..مش كدا ..يصمت قليلا وبنبرة حزن ويأس .. كنت بتمشى بعد العيد ميلاد كنت متضايق ومتعصب من اللي حصل ، قولت اتمشى وافكر بأي شىء تاني. يهديني ، من غير مساعدتها او مساعدة أي حد ، كنت عايز اعتمد على نفسي واهدي نفسي بنفسي ، وقتها شفت أسر قاعدين على البحر بيضحكوا ويلعبوا ويجرو ورا بعضهم منظرهم كان جميل لوحة فنية لازم تترسم… سعادة من القلب بحاجات بسيطة ، ناس طبيعية عايشين حياتهم بشكل طبيعي ، تخيلت نفسي مكانهم لقتنى. عشان أوصل للمرحلة دي ، قصادي سنين ، وأنا مستحيل أفضل موقفلها حياتها سنين يا دكتور ، أنا أنا مش أناني أنا بحبها ، بحبها يا دكتور
وافي : ردي كدكتور ، إنك اتسرعت لأنك بتتقدم يجلب تاب خاص بيه. يفتحه ويطلعه وعليه بص الرسم البيانى لحالتك ، انت اتقدم قد ايه من أربع سنين شايف بقى فى سنة حصلك ايه بعد دخول وردة حياتك ، لكن انت حر باختيارك بس أحب اقولك النتيجة هتكون سلبية وسيئة جدا ،.. أما بالنسبة لردي كا أب ، الانانية فى الحب مش عيب طلما في صالح حبيبك
كامل : صالح ليها إني أخليها مع راجل مش قادر يديها أبسط حقوقها ، أنه يشاركها بس في حفلاتها خروجتها أكلتها المفضلة يقعد معها فى مكان عام على بحر ويلعب مع أولاده براحة وسعادة
وافي : أنت مش هتكون كدا كمان سنة هتبقى زي الناس اللي شفتها
كامل : مستحيل أنا اللي عملته صح
وافي : تعال نعكس لو وردة تعبانة هتعمل ايه
كامل : هفضل معها بس الوضع هنا مختلف
وافى: مش مختلف ولا حاجة ، كامل أنت بتختار غلط ، فكر كويس ، مش هقولك في عواقب ، أنا هقولك فكر في وردة واللي ممكن يحصلها بعد ما وعدتها وبنيتو في أحلامكم سوا وأنت بقيت جزء من حلمها
كامل : أنا بحميها
وافى : انت بضيعها ، وهتخليها صورة منك ، انسانة حزينة يائسة ، كارهة الحب ، فاقدة الثقة ، بعدين أنت كمان مش هتكون قد وعدك معها هتكون اخليت بوعدك لأول مرة. يصمت قليلا….بعد المناقشة الطويلة لسه عند رأيك
كامل : يبتلع ريقه وبحيرة ودموع .. أنا مش عارف أنا صح ولا غلط ، ولا مرتاح… ليه بس حاسس أني هظلمها لو كملت، وبردو هظلمها لومشيت ، أعمل ايه قولي أعمل ايه ، متسبنيش كدا، .. بضيق .. متسبنيش أنا اللي اتكلم.. وتفضل تسألني وبس قول حاجة أديني حل
وافى :مش هاقولك يا كامل لأنك عارف الاجابة
كامل : مش عايز تريحني ليه
وافى : أنت اللي مش عايز تريح نفسك
كامل : أنا مش هاجي هنا تاني
يقف وينظر له وبضيق ثم يذهب عند الباب وقبل أن يفتحه يتحدث وافي
وافي : الهروب أسهل طريق يختاره أي انسان ضعيف
كامل : وأنا مش ضعيف وأنا هثبتلك
وافى : وانا مش عايزك تثبتلي ، اثبت لنفسك أهم يا كامل اثبت لنفسك إنك كامل يا كامل
ينظر كامل له بضيق ويخرج يفتح الدكتور الأوراق ويضع صح امام خانة الاستسلام والهروب
♥️___بقلمى ليلةعادل___♥️
شاطئ البحر
نرى كامل يسير على شاطئ البحر وهو مشمر بنطلونه قليلا ويفكر ويتحدث مع نفسه. ياترى أنا فعلا حسبتها غلط اني أقرب من وردة ولا كان اختيار صح ياترى كلام الدكتور وماما صح ولا غلط أنا بحبها حاسس بفراغ كبير. وهي بعيدة عني حاسس اني تعبان يقف وينظر. للبحر مع ملامسة الموج لقدميه يتنهد يتذكر كل شيء حدث معه خلال السنين الماضية خوفه من مواجهة الجلسات جلوسه بمفرده فى الجامعة ثم يتذكر عندما اقترب من وردة ومدى تغير حالته وتقدمها وانه قريب للاستشفاء وفراقه عنها سيكلفه الكثير يتذاكر كل شئ شريط حياته مر فى لحظة أمام عينيه ثم تنهد وابتسم وأخرج هاتفه من جيبه وقام بالاتصال
♥️___بقلمى ليلةعادل___♥️
أحد الكافيهات ٥م
نرى ترابيزه مزينة بالورد وبالونات تحاوطها ثم نرى كامل يقف وهو يبتسم ويمسك بايده بوكيه ورد ثم تقترب وردة
وردة : باستغراب ايه اللي جابك هنا
كامل : عندي معاد مع ملاكي
وردة : اممم أول مره تكذب
كامل : أنا مكذبتش أنا طلبت من أسماء تنزلك ومتقولكيش إني هنا
وردة : وعايز إيه بقى
كامل : حولت أهرب مقدرتش ، أنا مش ضعيف ولا مستسلم…. أنا بحبك.. وحبك هو نقطة ضعفي هو خوفي. خايف عليكي مني ، أنا شفت كل حاجة بتعمليها معايا ، وقد إيه وقفتي جنبي. لما قارنت حسيت اني قليل..
بمقاطعة وردة تضع ايدها على شفايفه هششش أنت كبير وكتير أوي يا كامل ، أنا بحبك ولما قربنا من بعض حبيتك أكتر ،وعرفت قد ايه انت انسان نضيف وصادق انا عايزة أكمل حياتي معاك ،عايزاك أنت اللي تكون جوزى أبو أولادي ، أكبر معاك واكرمش معاك أنت مش حد غيرك ، ..تضع أيدها على خده لو حولت تهرب تاني وثالث هفضل متمسكة بيك حتى لو جبتلي اسطول يقولى امشي مش همشى ، يضع يده على خدها وينظر بعينيه لها..
كامل : أنت دوايا يا وردة
يقبلها من ايدها بابتسامة ينظران لبعضهما بحب وعشق
♥️___بقلمى ليلةعادل___♥️
بعد مرور عشر سنوات
فى أحد القاعات
نرى كامل يقف على الاستيدج ويمسك مكروفون ولا يرتدي فى يده قفاز ويجلس الجميع على الترابيزات
كان من بينهم والدته اخواته والدكتور و وردة وأسرتها وطفلين
أنا كامل مريض وسواس قهري من سنين من وأنا عندى عشر سنين وأنا كدا
كل ما بكبر سنة بيكبر معايا خوفي من الأشياء
حتى أمي، وبعد سنين من العلاج ومعاناة
الشئ الوحيد اللي قدرت أوصله أني احط راسي على رجل أمي لكن لازم أحط قماشة عازله..
بعد دخولي الجامعة كانت معاناة تانيه كبيرة
كنت بشوف الطلاب جراثيم متحركة.. هلع هلع وخوف كان بيقتلنى.. محدش بالجامعة كان بيحب يقرب مني وكانوا بيقولولى كامل ابو منديل ..
لكن فجأة شفت وردة بنت جميلة بضحكتها وبراءتها. خطفت قلبي، ثلاث سنين وأنا بعاني ، نفسي أكلمها ، نفسي اقولها اللي بحسه ناحيتها، بس كنت بخاف
كنت باستمرار بروح مكتبة الجامعة عشان أشوف وردة ، وأفضل أبصلها من تحت الكتاب، لحد في يوم ماجت وكلمتني كانت بتسألني على كتاب
كان وقتها قلبي بيرفرف من السعادة أني أخيرا كلمتها ، وبعدها اتجرأت ورشحتلها كتاب ، عن معاناة عاشق ، لما شفتها بعدها بكام يوم واتناقشنا فيه ، كنت مبسوط ، وأنا بسمع صوتها ، أخيرا بنتكلم مع بعض ، بس فجأة حطت ايدها على كتفي وطلبت مني نشرب حاجة ، خفت موت ،جريت جريت وأنا مرعوب مش مصدق وفضلت أسبوع ماروحش الجامعة
لكنها وحشتني. روحت لقتها مستنياني قعدت جنبها وقررت أقولها إني مريض وسواس قهري وبحبها
بصتلى وضحكت وقالتي بحبك .. وهنا وبدأت علاقتنا ، كنا بنخرج ونشوف أماكن جديدة ، خلتني أشوف الدنيا بعين جديدة ، لأول مرة أكون مرتاح ماكانتش بتضايق لما بمسح الحاجة عشر مرات قبل ممسكها ،ولا من تكراري للكلام ، ولا الجنون فى تنظيم الحاجات ، حتى لما كانت بتجبلي هدية وغسلها مازعلتش ، أنا مش قرفان بس أنا تعبان ، محبش حد يلمسني ، لحد ما صارعت نفسي ، ومسكت ايدها ، كنت بتقطع من جوايا سكاكين، مش بايدي مرضي السبب….و بعد سنة قدرت امسك ايدها من غير خوف ولا صراع ولا جوانتي ، وبعد سنة حياتى اختلفت ، وردة قدرت تخلي لحياتي معنى ، حتى لما بيوم حسيت إنها كتير عليا ، وقررت إني لازم امشي ، هي تمسكت بيا ، رفضت تسيب ايدي لما سبت ايدها ، قوتني وقت ضعفي ، حبها كبر وبيكبر فى قلبي كل يوم بعد سنة ونص اتجوزنا وخلفنا ولد و بنت
ومرت سنين وأنا أهو واقف قصادكم .أخيرا تخلصت من الصراعات النفسية ، والهواجس والافكار اللي سرقت مني سنين عمرى ، تخلصت من الأفكار الملحة اللاإرادية اللي مابقدرش أمسك نفسي عنها ، انا خفيت وبقيت طبيعي
يمكن لسه في باقي من أعراض المرض مصحباني، زي إني مازالت بغسل كل حاجة قبل ماآكلها مرتين محبش أكل الشارع ، بحبش حد ياكل من طبقي ولا معلقتي ، بس لازم أقول كلمة بحق مرضي، إنه مرضي علمني حاجة جميلة أوي ، إني أوفي بوعدي ، إني ما كذبش، و أحترم مواعيدي جداً
أنا بحكي حكايتي عشان أقول لكل مريض ماتيأسش ، خليك قوي ، خلي عندك إيمان بنفسك ، وثق فيها وبقدراتك ، هتحقق كل شى ،
ولكل اسره خليكم دائما سند وعون لأولادكم ، لانهم مش هيقدرو يحاربو مرضهم لوحدهم ، دائما حسسوهم انهم ملوك العالم
اما الناس اللى كانت بتتنمر عليا شكراً
لانكم قوتوني وخلتوني أثق فى نفسي وأحب مرضي
شكراً لأهلي اللي دائما كانو سند ليا محسسونيش أبداً إني مريض
شكراً لدكتوري اللي كان مؤمن بيا
شكراً لحمايا اللي وثق فيا وداني فرصة
وأخيرا وردة انتي أجمل وردة
شكراً لأنك فى دنيتي شكراً لأنك اديتيني فرصة…
شكراً لأنك مسبتنيش لما يأست وضعفت كنتي دائماً عون. ودرع ليا عشان أحارب بيها مرضي كنتي ليا الفرحة اللي مخبياها ليا الدنيا…
ديما كنت بعينيك كامل مش مجرد اسم
شكراً
يصفق الجميع
حكاية مريض وسواس قهري
النهاية
لقراءة الرواية كاملة اضغط على : (رواية أنين القلب)
