رواية أم البنات الفصل السادس 6 بقلم ريهام علي
رواية أم البنات الجزء السادس
رواية أم البنات البارت السادس
رواية أم البنات الحلقة السادسة
في المشغل عند فاطمه
فاطمه / وقفت وقالت انا هستاذن انا يا ام عامر عشان اروح للبنات المستشفي
ام عامر / طب تفتكري المشرفه هتوافق دي متحنطه منك اوي كمنك من يوم عملية مليكه وانتي بتستاذني وتمشي بدري
فاطمه / بغيظ متتحنط ولا تتنيل علي دماغها هو كان مشغل ابوها وبعدين انا هستاذن من المدير وهيه توافق متوافقش ميخصنيش
ام عامر / يافاطمه اتكلمي بهدوء معاها ياختي عشان متزنش عليكي عند الاستاذ صلاح
فاطمه / وانتي مفكراني انا كدا هخاف يعني لا عادي انا مدام مبعملش حاجه غلط وماشيه بما يرضي الله مبخفش من حد ..
ام عامر / اتنهدت وقالت وانا هعرف اقنعك يا فاطمه روحي ربنا يهديهولك وتمشي
وراحت فاطمه علي مكتب المدير واستاذنت ودخلت
فاطمه / بعد اذنك يا استاذ صلاح انت هستاذن عشان اروح لبناتي لانهم في المستشفي
صلاح / طبعا طبعا يافاطمه مفيش مشكله بس طمنيني بنتك عملت ايه
فاطمه / كويسه الحمد لله
صلاح / فاطمه مش محتاجه اي فلوس انا تحت امرك والله واعتبريهم سلف لحد ما ترجعيهم براحتك
فاطمه / تسلم يااستاذ صلاح الحمد لله ربنا ساترنا ومعانا اللي يكفينا وزياده
صلاح / قام وقف وراح عندها وقال ط.طب فكرتي في موضوعنا تاني
فاطمه/ بتصنع النسيان .. موضوع! موضوع ايه دا
صلاح / احم م.موضوع الارتباط
فاطمه / اتنهدت وقالت يا استاذ صلاح انا….
صلاح / قطع كلامها وقال قوليلي صلاح .. صلاح بس يافاطمه انا ممكن اكون مدير علي اي حد الا انتي .. انتي متعرفيش انتي بالنسبالي ايه فاطمه انا….
فاطمه / قطعت كلامه وقالت الزم حدودك ياصلاح بيه معايا في الكلام والا هتسمع مني كلام مش هيعجبك .. اللي عندي وقولتهولك وانا مضحكتش عليك انا لبناتي وبس
صلاح / بناتك في عنيا قبل منك يافاطمه ووالله عمرهم ماهيندموا ولا انتي هتندمي علي موافقتك ليا دي
فاطمه / بصتله بقلة حيله وقالت عن اذنك يا استاذ صلاح انا ماشيه رايحه لبناتي وسابته ومشيت
صلاح / راح قعد علي مكتبه واتنهد وقال يارب يحنن قلبك عليا بقا يافاطمه
____________________________
في المستشفي
كانت عاليه وعلي واقفين علي السلم بيتكلموا
اتصدمت عاليه لما عرفت ان علي هو اللي دفع الفلوس لعملية مليكه وخصوصا انه قالها بكبرياء ودا جرح عاليه اكتر
عاليه / لاول مره دموعها تنزل قدامه وقالت تعرف انا لو كان لسه في قلبي ليك ذرة اعجاب يا على انت بكلمتك دي محيتها وخرجت نفسك من حياتى خلاص واوعدك فلوسك كلها هتتردلك في اقرب وقت وسابته ومشيت وهيه بتعيط
علي / خبط على الحيط بغيظ وقال اااااه غبي .. غبي ليه قولتلها كده ليه جرحتها بالشكل ده ومسح وشه وشعره بغيظ ونزل
_____________
مرت الايام و بقت مليكه تتحسن ورجعت البيت
ورجعت سلمى لجامعتها من تاني
ونزلت عاليه الجامعه لكن مليكه لا وكانت مياده وجيلان دايما بيزوروها في البيت بعد الجامعه ويبلغوها بالمحاضرات
___________________________
في بيت سليم
كان قاعد زهقان وقرر يطلع لنونه يقعد معاها شويه وراحلها وضرب الجرس واستنى شويه وفتحتله سلمى
سليم / بفرحه سلمى انتي رجعتي امتى
سلمى / وهي مبتسمه رجعت النهارده بس ما ملحقتش الجامعه
سليم / عموما حمد لله على السلامه
سلمى / الله يسلمك اتفضل ودخل سليم وراح لنونا الاوضه
نونا / ابتسمت له وقالت ده ايه الوش الجميل اللي منور ده
سليم / ضحك وقال بكاشه انتي اوي يا نونه
نونه / بزعل مصطنع ابدا والله انت ظالمني كده
سليم وسلمى بصول لبعض وضحكوا
نونه / هستاذنكم عايزه اريح شويه وانت يا سليم مش غريب طبعا
سليم / طبعا يا نونه براحتك
وخرجت سليم وسلمى وسابو نونا ترتاح
( بس هما مش عارفين انها قاصده تعمل كده عشان تسيبهم يتكلموا شويه لوحدهم يمكن تحصل المعجزه وحد يقع بلسانه بس ده سر محدش يعرفهم 😉)😂
____________________________
في مكان في الصعيد
كان قاعد راجل بيشرب شيشه وجه عليه واحد
الراجل / ها ياض يا مغاوري عملت ايه
مغاوري / كله تمام يا معلم عرفان البت عملت العمليه وكمان رجعوا البيت
عرفان / وقف وقالت حلو جوي كديه مدام خلصوا الضيجه اللي كانوا فيها نبدا بجا نظهرلهم ونشوف هندخل عليهم باي حجه
مغاوري / طب مظهرتش ليه من بدري يا معلمي او كنت خطت من الاول عشان تظهر وانت عامل حسابك على الخطه
عرفان / وقف وقال لا يا حمار انا هروحلهم الاول كاني كنت بدور عليهم وافضل اسال الناس في الشارع عنيهم لحد ما اخلي حد هو اللي يوصلني ليهم قمان عشان ما يشكوش في حاجه
مغاوري / ضحك بشر وقال وانت برضك حد يجدر يشك فيك يا معلمي انت مش فاكر اخر عمليه عملناها ولا حد حس بيها ولا الهوا
عرفان / يااابوووووي فكرتني انا دلوجتي باحمد ربنا اننا كنت نفذتها والا كان زمان حاجات كتيره جوي هتروح مني أيدي بسببهم
مغاوري / طول عمرك دماغك سم يا معلمي
عرفان / عارف بأف
وضحكوا بصوت عالي
مغاوري / طب لما تروحلهم يا معلمي هتقولهم ايه
عرفان / هقولك…………..
______________________________
في بيت نونا
كان سليم وسلمي قاعدين مع بعض بيتكلموا
سليم / احم طمنيني مليكه بقت كويسه
سلمي / آ.اه الحمد … متشكره اوي علي سؤالك عني وعن نونه
سليم / ابتسم وقال مفيش شكر ولا حاجه انتي متعرفيش انتي بقيتي ايه بالنسبالي
سلمي / قلبها دق بسرعه وسكتت واتوترت
سليم / اخد باله من كلمته وقال .. احم بس تعرفي اصحابك ياعيني زي مايكون ضايع منهم حاجه من غيرك وخصوصا ساره
سلمي / ابتسمت وقالت احنا كلنا متعلقين ببعض اوي وخصوصا انا وساره علي الرغم ان شخصيتنا مش شبه بعض هيه تشبه كتير لاختي الصغيره عاليه جريئه زيها
سليم / سبحان الله يعني ليكي اخت جريئه وضحك
سلمي / باستغراب بتضحك على ايه
سليم / لا ابدا بس طبعا غريبه ان اختك جريئه وانتي تبقي كدا خجوله لانك اوقات بتبقي جريئه برضو
سلمي / باستغراب انااا !!
سليم / اومال انا مش فاكره يوم القطر دا انتي كان لسانك مبرد ياشيخه كل دا علشان خبطتك
سلمي / ههههههه والله كنت فاكره حضرتك من الشباب اللي بيعملو كدا عشان يبدأو بالتعارف والمعاكسه فحبيت اصدك من البدايه بس عشان متحاولش وحظك بقا جه كدا معايا
سليم / هههههه يانهارك مش فايت انتي بتاخدي العاطل في الباطل صوابع ايدك مش زي بعضها
سلمي / عارفه طبعا بس احنا ماما ربتنا بطريقه مختلفه شويه يعني احنا بنات اه لكن وقت حاجه زي دي لازم نكون ارجل من الراجل نفسه طبعا عاليه اختي مش محتاجه تتعلم لان دي طبيعتها بس من جواها حنونه اوي ومليكه اختي دي اللي استحاله تتخانق لو حد زعقلها بتعيط وعاليه اللي بتجيبلها حقها
سليم / بصلها بحب وقال طب وانتي
سلمي / رجعت شعرها لورا ودانها بكسوف وقالت ا.انا زي ما حضرتك شوفتني
سليم / انتي رقيقه اوي ياسلمي
سلمي / اتوترت وقامت وقفت وقالت ط.طب انا هعمل ح.حاجه نشربها تحب تشرب ايه
سليم / ضحك علي توترها الواضح وقام وقف وقال لا مفيش داعي انا هستاذن عشان عندي محاضرات بكره بدري
سلمي / م.ماشي
وخرج سليم وقعدت سلمي مكانه وحطت ايدها علي قلبها من كتر الكسوف وقالت لنفسها آااااه ياسليم يا تري ايه اخرت حكايتي معاك
______________________________
كل يوم بتمر الايام كانت
بتزيد من تعلق سلمي وسليم لبعض
وحب مليكه ومالك يكبر اكتر واكتر
ويأس علاقه عاليه وعلى مع بعض
______________________________
في بيت امين شكري
رن جرس الباب وفتحت فاطمه وكان على فاطمه / بصتله بهدوء وقالت أتفضل ياابني
علي / بصلها باستغراب وقال هو حضرتك عرفاني
فاطمه / ابتسمت وقالت ايوه عرفاك يا علي
* في الوقت ده كانت خارجه عاليه من اوضتها بالبيجامه وعامله شعرها قطتين وكانت بتبص في التليفون ومش واخده بالها من وجود علي
علي / بص عليها وابتسم لان شكلها كان شبه البيبهات اوي
فاطمه / اتفضل يا ابني اقعد
عاليه / انتبهت لصوت امها وبصت لقيت على راحتله وهي متغاظه وقالت انت جاي هنا ليه
فاطمه / عيب يا بنتي كده ده مهما كان ضيف عندنا
عاليه / لا يا ماما ابن الاكابر اللي زيه ملوش قعده مع ناس عطف عليهم بفلوسه وربعت أيدها وقالت ولا ايه يا ابن الاكابر
على / سكت حط وشه فى الارض
فاطمه / بصوت عالي انا قولت ايه يا عاليه يا تقعدي مع الضيف باحترام يا تتفضلي على اوضتك ومتخرجيش منها
عاليه / بصت لفاطمه وقالت بعد اللي كان هيعملوا فيا يا ماما بتعتبريه ضيف …. ضيف ازاي وهو لولا ستر ربنا كان زماني مقتوله بايده
فاطمه / اتنهدت وقالت انتي قولتي اهو لولا ستر ربنا وربنا برضه أمرنا باكرام الضيف يا عاليه وبصت لعلى وقالت تحب تشرب ايه يا ابني
علي كان ساكت ومش مستوعب طريقة فاطمه والهدوء اللي كانت فيه رغم انها عارفه انه كان عايز ……
على / مفيش لزوم انا جاي اطمن على مليكه بس
عاليه / تطمن على مليكه ولا تطمن على فلوسك
فاطمه / بصت لعاليه بتحذير وبصت لعلي وقالت تحب تشرب قهوه
علي / لو ممكن يبقى قهوه مظبوط
فاطمه / بصت لعاليه وقالت اتفضلي اعملي فنجانين قهوه مظبوط
عاليه / حاضر يا ماما ودخلت المطبخ
وقعدت على مع فاطمه
على / بص لفاطمه وحط وشه فى الارض وقال انا اسف
فاطمه / أتنهدت وقالت انت شايف ان اللي حصل دا يستاهل عليه الاسف بس
على / بصلها وقال تحت امرك في اللي تطلبيه
فاطمه / تصلح غلطتك
علي / غلطه ايه انا محصلش مني حاجه والله
فاطمه / لا غلطت .. غلطت يوم ما فكرت تنوي لبنتي على الشر وانا اللي يرش بناتي بالميه ارشه بالدم ….. وسكتت شويه وقالت انا اي واحده مكاني دلوقتي تطردك بره بيتها لكن انا عارفه في الواجب والاصول وعمري مقفل بابي في وش ضيفي
على / حط وشه فى الارض وقال عارف اني غلطت بس والله …. وسكت لما شاف عاليه جت عليهم بالقهوه
عاليه / جت بالقهوه وسابتها قدامهم وبصت لفاطمه وقالت ماما بعد اذنك انا داخله اوضتي
فاطمه / ماشي يا عاليه براحتك
عاليه / بصت لعلي بلوم ومشيت
فاطمه / مد ايدك يا ابني واشرب احنا اه ناس على قد حالنا لكن نضاف جدا
على / ابتسم لها ومد ايده اخد الفنجان يشرب القهوه وكانت عجباه جدا ودا خلاه يستغرب اكتر عاليه رغم عندها الظاهر ليه الا انها احترمت كلمت امها وقدمت احلى ما عندها لضيفها
وبعد وقت حط على الفنجان وقال تسلم أيدها
فاطمه / ابتسمت وقالت بالف هنا
وفي الوقت ده الباب خبط عندهم وقامت فتحت
فاطمه / باستغراب عرفان !!!!!!
_______________________
في الجامعه عند سلمى
كانت مش فاهمه جزئيه في محاضره سليم
سلمي / ساره تعالي معايا مكتب دكتور سليم
ساره / ليه في حاجه مش فهماها
سلمى / ايوه يلا وشدتها وراحوا على مكتب سليم
سلمي خبطت على الباب ودخلوا
سليم / ابتسم وقال اتفضلوا
سلمى / وهي واقفه على الباب دكتور سليم بعد اذنك في جزئيه مفهمتهاش اثناء المحاضره ممكن تفهمهالي
سليم / ابتسم وقال طبعا يا سلمى أتفضلي
ساره / طب انا هستناكي بره يا سلمى
سلمى / بصيتلها بتوتر وقالت لا خليكي معايا
ساره / ابتسمت وقالت انا بره الاوضه هنا ومش هبعد وخرجت
سلمى أتوترت وبصت لسليم
سليم / شاور بأيده وقال اتفضلي يا سلمى
ورجع بضهره لورا وقال ها مش فاهمه ايه
سلمي /خرجت كتابها وقالت الجزء ده وشاورتله على الجزء الغير مفهوم
سليم / لابسيطه بصي يا ستي….. وبدا يشرحلها الجزء اللي هي عايزاه
سلمى / طب الرسمه دي
سليم / تعالي اقفي جنبي عشان اوضحلك اكتر
سلمي / وقفت وراحت وقفت جنبه وقالت وقال بصي وبدا يشرحلها الرسمه بتفاصيلها
سلمى / بزهق الرسمه دي فيها منحنيات كتير اوي
سليم / هي فيها اه منحنيات لكن سهل رسمتها اتفضلي حاولي ترسيمها تاني
سلمي مسكت القلم وبدات ترسم الرسمه وسليم كم مركز معاها وكانت هتغلط مسك ايدها بعفويه وقال لا مش كده وكمل الرسم وهو ماسك أيدها لحد ما خلصتها
سلمي / بحيره هسهر عليها لحد ما اعملها صح لانها واضح انها مهمه
سليم / تحبي نرسمها تاني مع بعض
سلمى / ياريت يا دكتور بس متزهقش مني
سليم / ابتسم وقال يالا وبص على أيده وكانت لسه ماسكه ايد سلمي بالقلم من الوقت الرسمه
سلمى وسليم بصوا لبعض
( تخيلوا معايا اللحظه ياجماعه تخيلوا واتقهروا ) 😂
سليم / اخد القلم من ايد سلمي ومسك أيدها بايده الاتنين وقربها لبوقه وباسها برقه
سلمي / جسمها أتنفض من لمسته وبعدت عنه وجريت
ساره / كانت واقفه بره وشافتها بتجري بسرعه بصت الاوضه ولسه هتجري هي كمان وقفت وقالت هو انا ملبوسه ولا ايه لما ادخل اشوف سي روميو ده كمان عمل ايه خلي البت تجري كده
ودخلت لقيت سليم قاعد على الكرسي ومبتسم وعمال يهز يمين وشمال
ساره / باستغراب ماله ده كمان وهو ملبوس ولا ايه ده الاوضه دي فيها حاجه غلط واحده تخرج منها تجري والتاني قاعد مسهم ومبتسم وخبطت على الباب وقالت دكتور سليم
سليم / انتبه لنفسه وقال ايوه يا ساره اتفضلي
ساره / هي سلمى خرجت تجري ليه
سليم / ابتسم وسكت وقال دي حاجتها اتفضلي اديهالها
ساره / ضحكت ولمت حاجة سلمي وخرجت
__________________________
في بيت امين شكري
كان عارف ان واقف على الباب ومعاه حد
فاطمه / عرفان !!
حماده / الراجل ده بيسال عليكي يا خالتي
فاطمه / شكرا يا حماده روح انت وبصت لعرفان وقالت أتفضل
عرفان / كيف حالك يا ام البنات
فاطمه /بصتله باستغراب وقالت كويسه
عرفان / فين بنات اخويا اتوحشتهم جوي
فاطمه / لسه فاكر ان ليك بنات اخ ولا لسه فاكر اخوك اصلا يا عرفان
عرفان / لا يا ام البنات تفكيرك ما يروحش لبعيد انا سالت عليكم كتير جوي وروحت لعنوان بيتكم الجديم وسالت عنيكم وجالولي انك مع عزلتم من زمان ومحدش كان عارف عنيكم حاجه
فاطمه / اتنهدت وقالت خير يا عرفان عايز ايه تاني
عرفان / دي مجابله برضك يا ام البنات ماشي … عموما انا جيت عشان اشوفكم واسال عنيكم ما هو برضك عمر الدم مايبجى مايه
فاطمه / ومقولتش الكلام ده لنفسك يا عرفان جاي تقول الكلام ده وانت بنقسك اللي قطعت حبل الود
عرفان / خلاص بجى يا ام البنات ننسى اللي فات ونبداو صفحه جديده على ميه بيضا وكل واحد ياخد حجه وانا لفيت عليكم كتير جوي عشان تاخدو حجكم وانا انفذ وصيه ابوي …. وسكت شويه وقال فين بنات اخوي اومال
فاطمه / ندهت على عاليه وقالت تعالى ياعاليه عايزاكي
عرفان / بص لعلي وقال مين ده يا ام البنات
فاطمه / هتعرف حالا مين ده
وخرجت عاليه وكانت لسه بلبسها
عرفان / واه واه واه عيب كديه يا بت اتحشمي عيب كده تجفي جدام راجل غريب باللبس ديه
عاليه / باستغراب دا على اساس انك انت اللي قريب يعني انت مين
فاطمه / دا عمك يا عاليه عمك عرفان
عاليه / عمي وكان فين عمي زمان وليه ظهرت دلوقتي
عرفان / لا دي حكايه كبيره جوي يا عاليه يا بتي المهم تعالي في حضن عمك وفتح دراعه
علي / حضن مين يا راجل انت
عرفان / واه وانت مين عاد عشان تمنعني أحضن بت اخوي
علي / انا ……..
فاطمه / قطعته وقالت ده على العايدي خطيب عاليه يا عرفان
على وعاليه بصوا لبعض وسكتوا
عرفان / خطيبها كيف ده
فاطمه / خطيبها زي الناس
عرفان / وازاي تجوزي بناتك من غير علمنا بنات اخوي ولادي اولى بيهم
فاطمه / ابتسمت وقالت أتاخرت يا عرفان زي كل مره
عرفان / متاخرتش ولا حاجه انتي بتجولي مخطوبه خلاص نفشكل الخطوبه دي
فاطمه / ويرضيك بنت اخوك تبقى مطلقه
عرفان /اتصدم وقال ايه !!!
فاطمه / ايوه علي وعاليه مكتوب كتابهم
علي وعاليه / رافعوا حاجبهم وبرقوا عيونهم
عرفان / بصوت واطي يخرب مطنك يعني ايه
فاطمه / يعني اللي بيني وبينكم حق جوزي بس انما جواز البنات طبعا مينفعش لان اولادك الاتنين اصغر من سلمى ومليكه وحتى عاليه اللي كانت تنفعهم متجوزه فهمت يا عرفان
عرفان / هز راسه وقال فهمت … فهمت يا ام البنات ،،
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أم البنات)
