رواية أم البنات الفصل الثاني والعشرون 22 بقلم ريهام علي
رواية أم البنات البارت الثاني والعشرون
رواية أم البنات الجزء الثاني والعشرون
رواية أم البنات الحلقة الثانية والعشرون
في القاهره
في مكان هادي كانت قاعده رنا مع كارم بيتكلموا مع بعض
كارم / بحب رنا انا مش مصدق نفسي انك قاعده معايا
رنا / اتنهدت وقالت كارم على فكره انا مبحبش الكلام ده لو سمحت ما تخلينيش اندم اني وافقت اقابلك
كارم / بزعل رنا انا عايزك تثقي فيا شويه عن كده و تحاولي تسيبي مشاعرك ليا انا بجد نفسي نتعرف على بعض اكتر
رنا / كارم انا مش معنى اني وافقت اقابلك ده هيبقي خطوه ان ده يحصل علطول لا انت ما تعرفنيش انا ماليش في السكه دي خاالص ولا ليا في المرقعه ولا الكلام ده خاااالص
كارم / انا كلامي كان واضح معاكي من البدايه لما قولتلك اني عايز اتقدملك مش نتصاحب انتي بجد ليه شيفاني كده
رنا / اتنهدت وقالت سوري يا كارم خلاص عايز نتكلم في ايه
كارم / ابتسم وقال نفسي اعرف عنك كل حاجه بصراحه
رنا / اتنهدت وقالت حاضر… انا يا سيدي اسمي رنا عبد الله العايدي ليا اخ واحد اسمه على ولسه مخلصه ثانويه عامه ومستنيه النتيجه قريب يعني بس كدا
كارم / طب ملكيش اصدقاء او حاجه
رنا / لا مليش غير علي صديقي واخويا
كارم / ابتسم وقال لا طبعا هيبقى فيه حد تاني بس مش هيبقى صديق بس تؤ تؤ هيبقى صديق وحبيب الروح كمان (منحنح اوي😁)
رنا / احممم مش يلا عشان ما نتاخرش
كارم / اهربي بس هانت خلاص هاجي اتقدملك رسمي
رنا / ان شاء اطمن على النتيجه بس واتفق معاك على معاد
كارم / يارب هون
رنا / بابتسامه ان شاء الله
________________________________
في الصعيد … في السجن
كان عرفان مصدوم لما عرف ان ابن اخوه لسه عايش وقال ايه ….
رافت / ايوه يا عمي انا ابن اخوك اللي رميته في الشارع عشان خاطر فلوس وورث تقدر تقولي احساسك ايه دلوقتي لما رجعتلك
عرفان / دموعه نزلت وقعد على الكرسي بتعب وقال بتنهيده ياااااابووووووي
انت تريد وانا اريد والله يفعل ما يريد
واتنهد وبص لرافت بدموع وقال جبل اي حاجه يا ولد اخوي تعالي في حضن عمك
رافت / وياترى حضنك المره دي هيبقى في خنجر يقتلني عشان تتاكد اني مت بصحيح
عرفان / دموعه نزلت وقال والله ما خنجر الا كلامك ده يا ولد اخوي كلامك زي السكين اللي بيطعن في جلبي ويجطعوا تجطيع
فاطمه / فاكر اخر مره شوفت امين اخوك امتى يا عرفي ويومها لما أمين قالك اني حامل للمره الرابعه وفي ولد فاكر السواد اللي نزل على وشك وكنت عامل ازاي
فلاااااااش بااااااااك
في بيت امين شكري
كانت فاطمه بتخيط ملابس على مكنه الخياطه
امين / جه عليها وقالت كفايه كده يا بطتي انتي كل يوم تقعدي عليها كتير اوي ريحي نفسك شويه كفايه عليكي شغل البيت والبنات والاستاذ الرابع اللي في بطنك ده
فاطمه / هههههههه انت قولتها اهو خلفنا اربعه ولسه بتقولي يا بطتي عمرك ما هتتغير يا امين ابدا لسه بتدلع فيا على ايه بس يا راجل انا بقيت بواقي ست
امين / شدها من ايدها وقفها وقال مين دي اللي بواقي ست دا انتي اجمل ست في الدنيا وايوه بدلعك و هفضل عمري كله ادلع فيكي وملس على خدها بحنيه وقال لانك ما تستهليش غير كده يا روحي والله
فاطمه / اه منك يا ابن شكري مدوبنى فيك بكلامك دوب كده
امين / وحياتك عندي مش كلام يا فاطمه وغمزلها وقالت تعالى جوه معايا وانا اثبتلك انه مش كلام بس
فاطمه / بس يا راجل عيب سلمى ومليكه صاحيين
امين / مش مشكله المهم اللي القرده الصغيره نايمه ولسه بيشدها جرس الباب رن..
امين / ده مين الغتت ده وراح يفتح الباب اول ما شاف عرفان ابتسامته راحت وقال عرفان
عرفان / ايوه يا اخوي اني ايه مش هتدخلني بيتك ولا ايه
امين / لا طبعا ازاي اخويا أتفضل
ودخل عرفان وبص لفاطمه وقال كيفك يا ام البنات
فاطمه / بصتله بتوتر وقالت ا.ا.الحمد لله
امين / خير يا عرفان ايه سبب الزياره دي
عرفان / ايه يا اخويا خلاص ما بقتش طايجنا للدرجه دي امشي عشان ترتاح
امين / خير يا عرفان في حاجه
عرفان / ايوه فيه ابوك باعتني ليك وبيجولك لسه الدوار مفتوحلك لو حابب ترجع تاني من غير مرتك
امين / المكان اللي مراتي اتهانت فيه مش هرجعله مهما يحصل يا ابن ابويا وفهم ابوك كده
عرفان / فكر زين يا ولد ابوي وأحسبها صح
امين / بابتسامه المساله محسوبه بالنسبالي انا مش هسيب مراتي وبناتي لوحدهم مهما يحصل خلاص
عرفان / انت جولتها اهو بناتك يعني بجيت ابو البنات الا حتى ما فيه ولد يشيل اسمك
امين / والبنات مالهم ما هما شايلين اسمي هما كمان
عرفان / لا البنات طول عمرهم مبيشلوش الا العار وبس لاهاليهم اسمع كلامي يا اخوي سيبك من العار ده وخلفته وتعالي معايا ومسك ايده
امين / شد أيده وقال ابعد عني يا عرفان وأياك تقول على بناتي عار انت فاهم وبالنسبه بقى للراجل اللي هيشيل اسمي فاطمن هو جاي كلها كام شهر ويشرفني
عرفان / بصدمه و.واه انت بتجول ايه
امين / ايوه متتصدمش فاطمه حامل في الشهر السادس وحامل في ولد كمان
عرفان / ح.حامل كيف أ.انت لسه مخلف مكملتش سنه
امين / ضحك بسخريه وقال ما شاء الله انتو مراقبني بقا عموما ماشي ايوه مخلف بنتي الاخيره عاليه وخبط على راسه وقال اخ نسيت صحيح اعرفك ببنات اخوك الكبيره سلمى والتانيه مليكه والصغيره عاليه انما اللي جاي هسميه احمد ان شاء الله عشان احمد ربنا عليهم وعلي نعمته عليا بأنه اكرمني بيهم
عرفان / اتحول وشه لميت لون وقال م.مبروك يا اخوي وحاول يداري ويضحك وقال د.ده ابوي هيفرح جوي اكيد لما يعرف انك هتجيب واد انا ه.ه.هبلغه الخبر الحلو ديه
امين / مبقاش يفرق معايا تبليغه ولا لا خلاص وانا بقولكم مش عايز منكم حاجه واللي يطعن في شرف مراتي ميستحقش اننا أسامحه يا اخويا
عرفان / بصلهم بسكوت ومشي من غير كلام
بااااااااااااااااااك
فاطمه / ساكت ليه يا عرفان
عرفان / كان ساند راسه بأيده ودموعه بتنزل منه وقال اسمعيني زين يا مرات اخوي اني عارف اني غلطان وغلطت غلط كبير جوي قمان ومينفعش يتصلح بسهوله كده بس صدجوني جبل ما تلموني على كرهي لاخويا كنتوا لوموا ابوي الاول على التفرجه اللي كان بيفرجهالنا …… وأتنهد وقال ابويا عمره ما ميزني بحاجه زي امين اخوي كان اخوي هو اللي دايما اللي فايز عني في كل حاجه بشكله وحديته الحلو وادبه وتعليمه …. وأتنهد بوجع وقال وبقلبه
عمري ما حسيت من ابوي انه مكبرني ابدا عمره ما جالي وخد رايي في شغلانه المفروض يعملها لا دايما مجدم امين عليا في كل حاجه .. انا غصب عني بجا جوايا حاجز من ناحيته لاني كان نفسي اكون زيه لكن ابوي مدانيش الفرصه دي ويوم ماجاتلي الفرصه اني اخد مكانه اخدتها بس بانتجام
.. ولما امين سابنا ومشي كنت بشوف ابوي يقعد يبكي كيف العيل الصغير وهو ماسك صورته ومتوحشه كانت الغيره بتزيد في جلبي اكتر واكتر …… وكمل كلامه بتنهيده وقال وحتى يوم ما ربنا كرمني وأتجوزت ملجيتش مراتي تجولي انسي واللي فات مات لاه بالعكس كانت ماشيه معايا خطوه بخطوه في كل حاجه عملتها معاكم زودت الكره والحجد اللي جوايا اكتر واكتر من ناحيه اخوي
وبصلهم وقال كل واحد بيطلع حسب ما أتربي يا احمد يا ولدي وانت اكيد متعلم وفاهم وعارف ان التفرجه دي ممكن تدمر البنادم اكتر من المخدرات وحط وشه فى الارض وعيط
رافت وفاطمه اشفقوا عليه وعلي حالته وشافوا فعلا الندم في عيونه
*وفعلا بدايه طريق الكره ما بين الاخوات هي التفرقه في المعامله لازم على الاقل الحب بالتساوي قدام بعض ما ينفعش نقلل من حد قدام حد لان ده بيعمل شرخ كبير اوي ما بين الاخوات و مش بسهوله الشرخ ده يتصلح ونتايجه فعلا بتبقى مدمره اكتر من المخدرات
رافت / نزل على ركبته وقعد قصاد عمه ومسك ايده وقال متعيطش يا عمي ارجوك
عرفان / بصوت كله بكاء ودموع ووجع وندم سامحني يا ولدي سامحني اني عارف اني مهما طلبت السماح منكم مستهلوش بس حاولوا تسامحوني وانا هعوضكم عن اي حاجه حصلت مني والله
فاطمه / مسحت دموعها وبصتله وابتسمت وقالت خلاص يا ابو طه ربنا عوضنا برجوع احمد لحضني من تاني مش هلاقي عوض احسن من ده
عرفان / بص لفاطمه بندم وقال سامحيني يا مرات الغالي اني جيت عليكي كتير جوي و أتبليت عليكي ياما بس عشمان في اصلك تسامحيني
فاطمه / مسحت دموعها وطبطبت على كتفه وقالت مسمحاك يا عرفان
عرفان / مسح دموعه وقال ممكن تاجي في حضني يا ولد الغالي
رافت بص لفاطمه وفاطمه هزت راسها بمعنى ماشي
رافت اترمي في حضن عمه وعرفان كمان كان حاسس باحساس غريب وقال آااااااه يا ولد الغالي وباس راسه وقال سامحني يا ولدي
رافت / مسامحك يا عمي
عرفان / بمزاح جلبك ابيض زي امك مش زي ابوك كان جلبه اسود جوي
الكل / ههههههههه
دخل العسكري وقال الزياره انتهت
فاطمه / طب يلا يا احمد يا ابني
رافت / يلا يا ماما وسلموا على عرفان وخرجوا
طه / سلم علي ابوه وقال مش محتاج حاجه اجيبهالك معايا المره الجايه يا بوي
عرفان / لا يا ولدي انا بس عايزك تعمل حاجه تانيه
طه / حاجه ايه يا ابوي خير
عرفان / …………..
_______________________________
بعد مرور اسبوع
يوم نتيجه رافت كان قاعد قلقان ومستني اتصال من رامي صاحبه ورايح جاي في البيت
في الوقت ده رن جرس وراح يفتح وكانت رنا
رافت / رنا أتفضلي
رنا / احم هو حضرتك احمد
رافت / ابتسم وقال ايوه انا احمد ورافت برضه الاثنين يمشوا أتفضلي
فاطمه /جت عليها وحضنتها وقالت يا حبيبتي تعالى أتفضلي
رنا / انا اسفه اني جيت من غير ميعاد بس بصراحه قلقانه على نتيجتي اوي وطبعا كالعاده محدش فاكر انها النهارده فقولت اجيلك انتي تطمنيني
رافت / انتي في ثانويه عامه معايا
رنا / ايوه
فاطمه / ادخلي يا حبيبتى ربنا يوفقكم يا رب وينجحكم
في الوقت ده جه لرافت اتصال من زميله رامي
رافت / رد بلهفه وقال أ.ا.ايوه يا رامي ها ط.طمني عملت ايه
رامي / الف مبروك يا دكتور 99%
رافت / بفرحه هييييييييييييه انا نجحت انا نجحت يا ماما جبت 99%
فاطمه / من فرحتها زغرطت والبنات خرجوا من أوضهم على زغاريط فاطمه
رنا / ط.طب وانا وانا عملت ايه
رافت / ورنا يا رامي جابت كام
رامي / باستغراب رنا مين دي
رافت / خبط راسه وقال هاتي رقم جلوسك بسرعه
رنا / رقمي (……..)
رافت / بلغ رامي برقم جلوسها وقال ها يا رامي انجز
رامي / ما تصبر يا عم النت زي الزفت والموقع تقيل
رنا / مسكت قلبها بقلق ودموعها نزلت وقالت يارب
فاطمه / هتنجحي يا حبيبتي انا واثقه
رنا / يارب يا طنط يا رب
رامي / الف مبروك يا سيدي جايبه 99% هي كمان
رافت / بفرحه 99% يا رنا
رنا / بفرحه عاااااااااا وفضلت تتنطط وتسقف من الفرحه
فاطمه / بدموع فرحه حضنتهم وقالت مبروك يا اولاد الف الف مبروك
عاليه طبلت وغنوا هي والبنات اغنيه وحياه قلبي وافراحه وكانوا كلهم بيرقصوا عليها بسعاده وفرحه مع رافت ورنا
وحياة قلبي وافراحه وهناه في مساه وصباحو ملاقيش فرحان في الدنيا زي الفرحاان بنجاحه
هيييييييييييييه
بعد شويه رنا مسحت دموعها وقعدت وقالت لنفسها كنت منتظره نفس الفرحه دي منهم بس للاسف مش فاكرين حتى اني نتيجتي النهارده يا خساره ومسحت دموعها
رافت / قعد جنبها وقالت حد يعيط النهارده برضه
رنا / مسحت دموعها وقالت دي دموع فرحه
رافت / شهق وقال هااااا يا كذابه انتي بتكذبي وانتي هتبقى دكتوره كذابه كذب الابل
رنا / ههههههه قولي انت هتدخل طب
رافت / طبعا ده حلم حياتي وانتي
رنا / طب طبعا ده حلم حياتي
رافت / ياااا بت
رنا / يا رااااااجل
رنا ورافت / هههههههه
وباركوا البنات ليهم والكل كان فرحان بنتيجتهم وقضوا كلهم يوم سعيد بفرحة نجاح رأفت ورنا ولكن الفرحه الاكبر كانت لرنا باحساس الفرحه والحب مابينهم
_____________________________
في عبد الله العايدي
رجعت رنا وهي فرحانه باليوم اللي قضيته مع اهل عاليه و بنتيجتها لقيت مامتها وقالت
جيهان / بنت كنتي فين
رنا / كنت عند عاليه
جيهان / ليه روحتيلها اللوكال دي
رنا / بصتلها بلوم وقالت كنت خايفه من نتيجتي ورحت اطمن معاها لحد ما ظهرت
جيهان / باحراج احممم ن.ن.نتيجتك هي ظهرت
رن / ايوه
جيهان / طب وعملتي ايه
رنا / جبت99%
جيهان / راحت عشان تحضنها وقالت بابتسامه م.مبروك يا روحي الف مبروك
رنا / ما بدلتهاش نفس الحضن وخرجت من حضنها وقالت بعد اذنك يا ماما انا طالعه اوضتي وطلعت لاوضتها
________________________________
بعد مرور اسبوع
في بيت امين شكري…
صحي رافت من نومه لقي عاليه وسلمي
رافت / بصلهم وقال صباح الخير
سلمي / صباح النور يا روفي
عاليه / ايه روفي دا ياختي دوا كحه دا
رافت وسلمي / هههههههههههه
رافت / لا يا لمضه دا دلع اسم رأفت
عاليه / بصتلهم باستغراب وقالت رأفت مين لا مؤاخذه
رافت / مسح وشه وقال جرا ايه يا عاليه مين فينا اللي لسه صاحي من النوم انا ولا انتي
عاليه / لا والله بجد مين رأفت دا
رافت / انا يا حببتي انا كان بابا سامح الله يرحمه مسميني رأفت
عاليه / آااااااه وبصت لسلمي وقالت طب انتي بتقوليله رافت ليه يا اختي قوليله احمد
سلمي / بصراحه انا متعوده علي رافت
رافت / انا كمان عايز استاذن ماما في كدا انها تناديني بإسم رأفت علي الاقل يفكرني ببابا سامح
عاليه / ط.طب وماما ممكن تزعل
رافت / منا خايف اقولها برضو
سلمي / ولا هتزعل ولا حاجه لما تيجي انا هفهمها
رافت / ياريت يا ميمي
وفي الوقت دا رن جرس الباب وقام رافت يفتح
لقي اتنين رجاله جسمهم كبير وعريض واحد منهم شد رافت ودخل التاني عند البنات وقال مين فيكم سلمي
سلمي / بخوف أ.أ.انا
شدها وكتفوها واخدوها هيه ورافت ،،،،،
_________________________________
بعد مرور وقت……
في الاسكندريه
في مكان مهجور بدأت سلمي تفتح عيونها لقيت رأفت جنبها وواحده كمان بصت عليها لقيتها خلود
قامت وفضلت تزحف بجسمها عشان توصل لرافت تفوقه وبعد شويه فاق وقامو راحو لخلود وحاولو يفوقوها هيه كمان وبعد شويه فاقت
خلود / كانت ماسكه دماغها بتعب وقالت احنا هنا ليه وايه اللي جابكم اسكندريه
رافت / احنا اتخطفنا من البيت اصلا مش عارفين حاجه
سلمي / كانت ماسكه دماغها بتعب وقالت ممكن يكون اللي عملوا كدا ولاد نونه يارأفت
رأفت / تصدقي ممكن انا مجاش في بالي خالص هما
خلود / واولاد نونه يخطفونا ليه يعني احنا عملنا فيهم ايه
سلمي / انتي مش عارفه حاجه يا خلود …. واتنهدت وقالت نونه الله يرحمها كتبتلنا ورثنا كله انا وانتي ورافت ووصت بالربع الرابع يتبني بيه دار مسنين ودار ايتام
خلود / خبطت علي صدرها وقالت ياسنه اسود من الكلب الاجرب في ليله سودا
رافت وسلمي / ههههههههههههههه
خلود / انتو بتضحكوا علي ايه دول هيقتلونا
رافت / بمزاح مش للدرجادي ياشيخه هما هيضربونا علقه محترمه ونتعلق بس
خلود / لااااا من اول قلم هعترف انا مش حمل اقلام وربنا ولا بتاعة اكشن اصلا
سلمي / وهيه بتضحك اهدي بس ربنا يسترها هيدخلو دلوقتي ونشوفهم هيقولو ايه
خلود / دول مش هيتكلموا باللسان ياسلمي ما انتي عرفاهم وشوفتي جحودهم علي امهم هيبقوا حنينين معانا اوي يعني
سلمي / عندك حق وعارفه والله بس هنعمل ايه
خلود / ولما انتي عارفه مصيبه زي دي مكلمتنيش ليه يابنتي كنت هروحلهم واتنازل عن حقي ليهم والله مش عايزه حاجه بس يسيبوني في حالي
سلمي / بصتلها ورفعت حاجبها وقالت يا جبانه
خلود / جبانه جبانه ياختي بس مترزعش قلم علي خدودي الحلوه دي يتورموا
رأفت / فيكي حيل تهزري
خلود / نفكها شويه دلوقتي هتقلب وتبقي سواد
وفي الوقت دا الباب اتفتح عليهم ودخل منه شادي وأيمن
هما طبعا كانو متوقعين اولاد نونه لكن صدمتهم في شادي
سلمي ورافت / بصوت واحد شادي !!!!!
_______________________________
في بيت امين شكري
رجعت مليكه وفاطمه وعرفوا باللي حصل وبلغوا سليم والكل كان قلقان علي رأفت وسلمي
سليم / كان شكلهم ايه الرجاله دي ياعاليه
عاليه / حيطان ياسليم ياخويا بعيد عنك.. تيران هربانين من حلبة مصارعه .. شوفت التور الهايج اللي كان في عنبر 7 هما دول تيران هايجين في شوارع القاهره الضيقه
فاطمه / انتي بتهزري ياعاليه واخواتك مخطوفين
مليكه / معندكيش دم والله بارده
عاليه / وهي بتحاول تكتم ضحكتها قالت اصل ربنا دا بيعدل أوي
فاطمه / باستغراب يعني ايه
عاليه / بتحاول تكتم ضحكتها وقالت هقولكو بعدين لما اخواتي يرجعو بالسلامه
فاطمه / استرها يارب .. يارب طمني عليهم واحفظهملي يارب .. يارب متوجعش قلبي علي حد فيهم انا مش حمل ان اي حد فيهم ضافره يتاذي والله
عاليه ومليكه / قامو حضنوها
عاليه / اكيد ربنا مش هيفرقنا تاني ياماما صدقيني بعد ما جمعنا
فاطمه / بدموع يارب يابنتي يارب
وفي الوقت دا خبط الباب وفتح سليم ولقي ظابط
سليم / بخوف خ.خير ياحضرة الظابط
الظابط / طب مش هدخل الاول ولا مش هتكرموني شكلكم كدا مش كرماء
سليم / ل.لا طبعا ازاي اتفضل
فاطمه ومليكه وعاليه وقفوا بخوف
الظابط / اهدوا خالص واطمنوا انا جيلكم في موضوع يهديكم مش يقلقكم
الكل / موضوع ايه
الظابط / …………..
__________________________________
في المخزن بالاسكندريه
اتصدم سلمي ورافت. لما شافو شادي لكن خلود متعرفوش هو مين
سلمي / باستغراب شادي !!! انت بتعمل ايه هنا وازاي اتجمعت معاه
شادي / ههههههههه المصالح بتجمع كل حاجه والله يا آنسه سلمي
رأفت / يعني ايه يا شادي المصالح دي انت مشترك معاهم في خطفنا
شادي / اذا كان انا اللي اقترحت فكرة خطفكم دي
سلمي ورافت / ايه…..
ايمن / وهو بيضحك علي منظرهم قال ايه اتصدمتو ليه كدا
خلود / بالنسبالي يا باشا مفيش اي اندهاش ولا صدمه لاني مش فاهمه اصلا مين الجدع اللي معاك دا ودوره ايه في أم الليله السودا دي
شادي / ههههههه وحط شنطته علي الارض وخرج منها ورق وخرج قلم وراح وقف قدام خلود وقال امضي ياحلوه
خلود / ايه دا عقد عرفي
شادي / لا دا رسمي
خلود / بكسوف مش تيجي تطلبني الاول من امي كدا واتباهي بيك قدام الحاره
شادي / هنعمل كل دا ان شاء الله بس اخلصي امضي
خلود / امضي كدا علطول طب نقرا فاتحه الاول طاه
شادي / بنفاذ صبر استغفر الله العظيم يارب هنقراها علي روحك ان شاء الله لو مش مضيتي حالا وبشده قال أممممضي
خلود / ح.ح.حاضر ومضت علي الورق
شادي / شطووووره وسابها وراح لسلمي وقال امضي
سلمي / بقرف علي ايه
خلود / علي عقد جوازي ياميمي وبصت لشادي وقال صحيح يا اللي اسمك جوزي مش هو مينفعش ست تشهد علي عقد جواز
ايمن / بصلها بغضب وقال افصلي شويه
خلود / بصت لشادي وقالت انت سايبه يزعق لمراتك كدا عادي
شادي / لااا دي تيجي بس همضيهم بس وهفضاله وهروقهولك
خلود / بهيام هتضربه عشاني
شادي / لا هضرب نفسي انا بالجزمه اني فكرت اخطفك اتكتمي بقا وبص لسلمي وقال امضي
سلمي / مش همضي الا لما اعرف همضي علي ايه
شادي / هتمضي عن التنازل عن ورث نونه وترجعيه لاصحابه اللي هما اولادها
سلمي / مش هيحصل ومش همضي
أيمن / لا يا حلوه هتمضي بمزاجك او بغصب عنك هتمضي مهو مش تاخدي تعبنا علي الجاهز كدا
سلمي / انا مش بتهدد ومش خايفه منك
أيمن / اتعصب من ردها عليه وخرج مسدس من جيبه وشد اجزاءه وراح عند رأفت ووجهه علي دماغه وقال يبقي هقتلك اخوكي
سلمي / بخوف م.م.متقدرش
أيمن / ضرب رصاصه فعلا بس كانت في الهوا وبص لسلمي وقال ها لسه متأكدة اني مقدرش اخلصي امضي الرصاصه التانيه مش هتكون في الهوا هتكون في دماغه
شادي / اخلصي وامضي مفيش مفر انقذي نفسك وانقذي اخوكي كمان ومد ايده بالقلم
سلمي / مسكت القلم بدموع وهي بتعيط وقالت هيه دي أمانة نونه يا شادي
شادي / نونه ربنا رحمها خلاص يا آنسه سلمي والحي ابقي من الميت
سلمي / ياخساره انها وثقت فيك
شادي / اخد الورق وراح عند رافت وقال امضي عن حقك في ورث نونه وعن حقك في ورث سامح بيه
رأفت / بص لسلمي بدموع
سلمي / هزت راسها وقالت امضي يا رافت خلاص انا معنديش استعداد نخسرك . امضي عشان خاطر ماما
رأفت / مضي علي الورق وبص لشادي وقال ارتحت كدا
شادي / اتنهد بابتسامه وقال براحه جدااااا متتخيلش ارتحت قد ايه وقام وقف وقال ولسه هرتاح اكتر لما اخد 5 مليون جنيه حقي
ايمن / جابله الشنطه بابتسامة وقال تستاهلهم يا شادي اتفضل حقك اهو
شادي / اخد الشنطه وفتحها اطمن علي الفلوس وابتسم وقال تمام يا ايمن بيه
سلمي / المال الحرام عمره ما بيدوم يا شادي
أيمن / شششش خلصنا بقا وبص لشادي وقال كدا تمام الورق كله سليم
شادي / طبعا يا أيمن بيه عيب عليك دا انا شادي الشديد
أيمن / بابتسامه عفارم عليك ياشديد يعني كدا ثروة سامح السعيد ملكي انا
شادي / اتنهد وقال لأ طبعا كدا ثروة سامح السعيد بقت ملك لرافت بيع وشراء وانت واخواتك ملكمش فيها مليم
أيمن / بضحك شادي بلاش هزارك التقيل دا
شادي / وهو بيضحك انا مبهزرش يا أيمن بيه انا بقولك علي اللي عملته
ايمن / باستغراب يعني إيه
شادي / يعني مش انا اللي اخون امانة ميت ولا اخون قسم مهنتي يا ايمن بيه ومش بس رأفت استلم ورثه لااا انا مضيت خلود وسلمي ورافت علي استلامهم حقهم في ورث مدام نواره السعيد (نونه) امك يا أيمن بيه …………
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أم البنات)
