رواية أم البنات الفصل التاسع 9 بقلم ريهام علي
رواية أم البنات الجزء التاسع
رواية أم البنات البارت التاسع
رواية أم البنات الحلقة التاسعة
مرت الايام وجه معاد سفر سلمى للغردقه ووصلت هي واصحابها عند الاتوبيس وركبوا فيه
وكان موجود معاهم سليم
بس المرادي كان لابس كاجوال وده كان زايد من وسامته اكتر وكان مخلي البنات تتجنن عليه اكتر
دخلو الاتوبيس وبعد شويه كان الجو صامت ومسك سليم مايك الاتوبيس
سليم / صباح الخير يا شباب انا شايف ان الجو صامت كده وابتسم وقال انتم عايزين تفهموني ان لو دي رحله عاديه كان ده هيبقى حالكم
الكل / ضحك وهز راسه بمعنى لا
سليم / خلاص بقى نفكها شويه مع بعض واندمجوا كانكم في طريقكم لرحله
وبالفعل بدا الشباب يندمج مع بعض وشغلو اغاني المهرجانات ويرقصوا عليها واندمج البنات معاهم
سليم / عينه منزلتش من علي سلمى اللي كانت عامله نفسها من بنها طبعا وبتبص للشباك.. اتنهد وطلع سي دي واداها للسواق وقال شغلنا دي يا عم مدحت
شغل السواق اغنيه وكانت لعمرو دياب (مقدرش انا على اللي عيني شايفاه)
مقدرش أنا ع اللي عيني شايفاه
وما جاش في بالي
الرقه دي آه يا سحر عينيه
حاجه فوق خيالي
دا اللي حلمت يكون عشاني
مش عايز حد ثاني
إتعلقت في ثواني
دا حبيبي ياما صادفني قلوب كثيره
ولا جرب قلبي حيره
سلمت في يوم وليله، لحبيبي
أعمل فيه إيه غيرتي وخوفي عليه، دايما يزيدو
أمال بقى لو صارحت عينيه، ولمست إيدو
سليم / كان بيبص على سلمى ومبتسم
ساره /زغدت سلمى وقالت يا بنتي حرام عليك بصيله بقى عيونه هتقلع من كتر البص عليكي
سلمي / كانت حاطه وشها في الارض وقالت اعمل ايه بس يا بنتي هموت من الكسوف والله
ساره / بت يا سلمي الحقي دا جاي علينا
سليم / راح عندهم وقال ايه يا بنات مش شايفكم يعني مندمجين مع الطلبه وقاعدين لوحدكم وبص لسلمى وقال ولا حتى مندمجين مع الاغنيه اللي شغلتها ولا مش عاجباكم هااا
سلمى / ابتسمت وبصت للشباك
ساره / احم اصلها مبتحبش الا اغاني حماقي يا دكتور
سلمي / بصتلها باستغراب وقالت اغاني مين ياختي
ساره / كتمت ضحكتها وسكتت
سليم / ابتسم وقال اممم حماقي طب هشغلك اغنيه ليه على ذوقي
وراح عند السواق وطلع تليفونه وشغله بوصلة كاسيت الاتوبيس وشغل حماقي اغنيه ( ياستار ) وبص لسلمى وابتسم
يا ستار
قلبي ولع نار
دا أنا عيني منك
مستحيل استغني عنك
نظرة ترضيني
بالترتيب
سيبلي نفسك سيب
واهدالي واسمع
دا انت سحر عنيك يطمع
بان أوي في عيني
خدت بالي وانت قدامي
بنسى روحي واسمي وكلامي
هي دي بالظبط أحلامي
مش هدور وأحتار
والنهاردة كلامنا سكتي
بكرة تبقى في حضني وفي بيتي
ده اللي هيحدده بقى تثبيتي
والقمر يختار
في الوقت ده يا سلمى بصتله وابتسمت وسليم كان بيغمزلها بعيونه 1
وسط الناس
الجمال يتقاس
لو جابوا سيرتك
ولا بقى لو شافوا صورتك
يبقى ده كفاية
مش تهريج
حن بالتدريج
فيك سحر فرقك
بس انا اللي كشفت ورقك
فكها معايا
وسط الناس
الجمال يتقاس
لو جابوا سيرتك
ولا بقى لو شافوا صورتك
يبقى ده…
وفضلو طول الطريق يشغل اغاني لحماقي والكل اندمج معاه اكتر
________________________________
في الجامعه عند عاليه
كانت واقفه بره الجامعه مستنيه على لقيته جاي عليها بالعربيه بس كان قاعد جنب واحده وبيضحكوا مع بعض
عاليه بصتلهم بغيظ وقفت
علي / نزل من العربيه وراحلها وقال هاي يا عاليه واقفه ليه كده
عاليه / بغيظ وهي بتبص على البنت اللي معاه واقفه مستنيه اصحابي
علي / اوكي انا داخل الجامعه بقى ولسه هيروح يركب عاليه شدته وقالت استني هنا مين دي
على / دي رنا صحبتي
عاليه / صحبتك ازاي يعني وازاي تركبها معاك كده وايه الضحك اللي انتو كنتم بتضحكوه ده
علي / بصلها وسكت ومردش عليها
عاليه / بصوت عالي ما ترد ولا بلعت لسانك
على / ببرود ارد على اي سؤال اصلك سالتني كام سؤال مع بعض
عاليه / داست علي اسنانها بغيظ وقالت على متجننيش اخلص رد
في الوقت ده رنا نزلت وقالت ايه يا بيبي في ايه هنفضل واقفين كده
عاليه / ابتسمتلها باستهزاء وقالت بيبي وبصت لعلي وقالت بقا الطول والشحط ده كله يبقى بيبي
رنا / قلعت نظارتها وبصتلها وقالت انتي مين يا قطه عشان تكلميني كده
على / دي عاليه يا رنا اللي حكيتلك عنها
رنا / انتي بقى عاليه وبصتلها باستهزاء ولبست نظارتها وركبت العربيه تاني
عاليه / اتغاظت منها وقالت ودي مين دي كمان عشان تكلمني كده
علي / كان بيحاول يكتم ضحكته قال مقولتلك يا عاليه صحبتي
عاليه / صحبتك ازاي يعني
علي / اتنهد وقال يعني ممكن نتخطب يا عاليه بعد ما حكايتنا تخلص
عاليه / بصدمه ايه !! ازاي يا على تخطبها ازاي
على / بصلها باستغراب وقال هو ايه اللي ازاي
عاليه / اتوترت وقالت ا.أنت مش قولتلي ان عمي مراقبنا أ.ازاي تركبها معاك يعني هو ده قصدي
على / حط ايده في جيوبه وقال اممم اوكي خلاص مش هركبها معايا تاني واتنهد وقال لحد ما نخلص بقى
رنا / من العربيه مش يلا بقى يا لولو ولا ايه
عاليه / رفعت حاجبها وقالت لولو وبصت لعلي وقالت اركب يا لولو اركب ولسه هتمشي
على / على فين يا عاليه مش هتستنى اصحابك
عاليه / يا مردتش عليه ومشيت دخلت الجامعه
على / راح العربيه وركبها وهو بيضحك
رنا / عيب عليك مش قولتلك هخليك تتاكد بنفسك ودي عينه بسيطه النهارده
علي / يخرب عقلك يا رنا كنت خايف تكشفنا واتنهد وقال بس خايف تزغل منى وتركب دماغها لما تعرف الحقيقه
رنا / عيب عليك سيبها عليا انا زي ما قولتلك
علي / بص لرنا بحب وقالت ربنا يخليكي ليا يا اجمل اخت في الدنيا وبصلها وقال بس تصدقي لبس المدرسه مخبي انوثه جامده
رنا / اتنهدت وقالت هاااانت السنه الجايه هدخل الجامعه بقى واظهر كل متفجرات انوثتي للشباب
على / ضحك وقال ربنا يسترها وعاليه متفرقعش متفجرات انوثتك دي في وشنا
رنا / بقلق تعملها والله دي عليها بصه تخلي الواحد يعمل بيبي على نفسه
على ضحك وكمل سواقته ومشي
_______________________________
في الجامعه عند مليكه
خلصت يومها الدراسي واقفه مع جيلان بس تليفونها رن وكان مالك وفتحت الخط
مليكه / الووووو
مالك / حبيبتي انا مستنيكي بره يلا علشان نتغدا مع بعض
مليكه / ابتسمت وقالت اوكيه هانزلك حالا سلام وبصت للبنات وقالت انا هنزل بقى عشان مالك مستنيني تحت
جيلان / ايوه يا عم الله يسهله
مياده / اللي عطاك يعطينا يا رب
مليكه / ضحكت وقالت يلا سلام وسابتهم ونزلت
بس قابلت شهاب ووقفها
شهاب / مليكه ممكن اسالك عن حاجه
مليكه / بزهق اوووف مش هنخلص بقى يا شهاب ولا ايه
شهاب / اتنهد وقال مين اللي ركبتي معاه المره اللي فاتت ده
مليكه / وانت يخصك في ايه انت مالك بيا
شهاب / ابتسم بحزن وقال اعتبريني اخوكي بس وحابب اطمن عليكي
مليكه / لا أطمن يا سيدي ده خطيبي
شهاب / بصدمه قال خطيبك ! خطيبك ازاي طب وانا
مليكه / بعصبيه انت ايه ما تسيبني في حالي بقى وزقته وسابته ومشيت
اما شهاب وقف مصدوم مكانه ودموعه نزلت
راندا / جت عليه واتنهدت وقالت اهي اتخطبت يا شهاب وعاشت حياتها ياريتك انت كمان تعمل زيها وتعيش حياتك
شهاب / بدموع انا حياتي ملهاش لازمه من غير مليكه
رندا / بدموع ط.طب وانا يا شهاب
شهاب / بعصبيه مسك ايدها وقال انتي ايه انتي فاكره عشان هي اتخطبت بقى قلبي ليكي تقدري تاخديه بكل سهوله لا يا راندا فهماني لا انا قلبي كان لمليكه وهيفضل ليها دايما ولو مكنش ليها عمره ما هيكون ملك لاي حد وياريت تطلعيني من دماغك بقى وزقها ومشي
راندا / حست ان كرامتها اتهانت منه اوي ومشيت وهي مش عارفه بتفكر في ايه ولا هتعمل ايه
نزلت مليكه لمالك وقعدت معاه في العربيه
مليكه / بابتسامه مساء الخير
مالك / بحب مساء الجمال على عمري كله
مليكه / ضحكت وقالت ايه الدلع ده
مالك / وانا عندي مين غيرك ادلعه يا عمري وسكت شويه وقال أتاخرتي ليه كده
مليكه / اتنهدت وقالت هحكيلك طبعا بس لما نقعد في مكان الاول يلا بقى عشان انا هموت من الجوع
مالك / بحب بعد الشر عنك يا روحي انا عايزك تموتي في حبي انا وبس
مليكه / ابتسمت وحطت وشها في الارض
مالك / اتنهد وقال يا مسهل بقى سلمي تنزل عشان نتخطب و تقدري تتكلمي معايا براحتك وضحك ومشي بعربيته راحوا لمكان هادئ
______________________________
في الغردقه
كان الاتوبيس وصل والكل نزل وبداو بحجز الاوض
وحجز سليم اوضه سلمى وساره في الاوضه اللي جنبه وبعد ما الكل اخد مفاتيح اوضته طلعوا كلهم عشان يرتاحو من المشوار
بس سلمى كانت واقفه في البلكونه بتتفرج على البحر وطلع سليم بالصدفه لقاها واقفه وسرحانه في البحر
سليم / لا انا كده هغير من البحر
سلمي / اتخضت من صوته وقالت دكتور سليم
سليم / ابتسم وقال ايوه دكتور سليم اللي مطلعه عينه بقالك كام يوم
وسند على الحيط وربع ايده وقال ما منمتيش ليه
سلمى / كانت متوتره وقالت ا.آه م.ما انا داخله انام اهو يلا تصبح على خير
سليم / استني استني تصبح علي خير اللي هو ازاي يعني هتنامي بدري كدا عشان خاطري خليكي معايا شويه انتي وحشتيني اوي
سلمي / اتوترت اكتر وابتسمت سابته وجريت دخلت الاوضه
سليم / ضحك عليها واتنهد وقال ماشي يا سلمى ودخل اوضته هو كمان عشان يرتاح شويه
____________________________
في مكان هادي
كان شهاب ومليكه بيتغدوا مع بعض ومليكه كانت حكيت ليه على اللي حصل من شهاب
مالك / كان ملامح وشه اتغيرت للغضب وسكت
مليكه / مالك متخلينيش اندم اني حكيتلك انا مش عايزه اخبي حاجه عنك احنا علاقتنا كانت واضحه من البدايه وانا مش حابه اني اعمل اي حاجه من وراك مهما كانت بسيطه
مالك / اتنهد وقال طب هفضل ساكت كده
مليكه / سيبك منه وهو شويه وهيزهق لوحده
مالك / مش باين يا مليكه انه هيزهق وعشان كده انا اللي لازم اتصرف معاه واوقفه عند حده
مليكه / باستغراب يعني عايز تعمل ايه يا مالك
مالك / …………
__________________________________
في بيت امين شكري
كانت فاطمه لسه واصله من شغلها وبتجهز في الاكل وتليفونها رن وكانت سلمي
فاطمه / ابتسمت وفتحت الخط وقالت ها ياحببتي طمنيني وصلتوا بالسلامه
سلمي / اه ياحببتي وصلنا من شويه وقولت اطمنك عليا
فاطمه / الحمد لله يابنتي حمد لله على السلامة
سلمي / ربنا يخليكي ياماما انا هستاذنك بقا هقفل عشان انام لاني تعبانه جدا
فاطمه / ماشي يا حبيبتي ربنا معاكي
سلمي / ابقي سلميلي علي مليكه وعاليه
فاطمه / الله يسلمك ياحببتي خلي بالك من نفسك يابنتي
سلمي / حاضر يا ماما يالا لا اله الا الله
فاطمه / محمد رسول الله
وقفلت فاطمه معاها وهي بتدعيلها بالنجاح
وبعد شويه جرس الباب رن وراحت فاطمه تفتح الباب واتصدمت
فاطمه / ………..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أم البنات)
