رواية امي لبستني لبس ولاد الفصل الثاني 2 بقلم رحاب القاضي

رواية امي لبستني لبس ولاد الجزء الثاني

رواية امي لبستني لبس ولاد البارت الثاني

رواية امي لبستني لبس ولاد الحلقة الثانية

#امي_لبستني_لبس_اولاد_والسبب؟
_الحلقه التانيه
ــــــــــــــــــــــــــــــــــــــــــــــ
طلعت ام هنا وقالت بحده _
انتي بتكلميها كده ليه يا فايزه هي شغاله عندك يا اختي ولا شغاله عندك؟..
اتعصبت فايزه وقالت بحده _
هي كلمه وما لهاش تاني، بنتك مش هتاخد ابني..
اتملت عيون هنا دموع و قالت ام هنا بحده _
يا اختي هو انتي فاكره اننا واقعين علي ابنك وعلي الجوازه دي ليه بنتي بايره ولا بايره…
فايزه بحده _
انتي تقصدي ايه يا وليه انتي بكلامك ده؟..
ردت عليها ناديه وقالت _
لا اقصد. ولا ما اقصدش امشي من هنا يا فايزه واكسري الشر احسن…
فايزه بحده وصوت عالي قالت _
الشر ده هيحصل لو بتك دي دخلت بيتي، فاهمه يا ناديه…
اتعصبت ناديه وقالت _
ده انا اكسر ليها رجلها قبل ما تدخل بيتك يا فايزه، وبعدين ما حدش ضربكم علي ايدكم عشان تيجو تخطبوها….
فايزه _
انتو هتصدقو نفسكم، ده الشيخ صلاح بس قال يكسب فيكم ثواب…
ضحكت ناديه بسخريه وقالت _
ههههه ليه يكسب فينا ثواب هو انا بنتي عدت التلاتين وقاعده جنبي لا يا حبيبتي دي الحته كلها بتحكي وتتحاكي علي جمالها…
فايزه بحده _
جمال ايه دي الناس بتبقي فاكراها ولد من اللبس بتاعها..
ناديه بحده قالت ليها _
ملبساها كده عشان خايفه عليها من جمالها لتتحسد وبرضو العرسان نازله ترف علينا، مش ملبساها المحزق والملزق وبرضو ما حدش معبرها…
هنا بحزن قالت لمامتها _
خلاص بقي يا ماما العماره كلها بتتفرج علينا…
فايزه بحده _
خليها تتفرج وخلي الناس كلها تعرف ان انا وابني مش عايزينك يا هنا…
_دخلت ناديه ودخلت هنا وقفلت الباب في وش فايزه، وقعدت ناديه متعصبه وقالت..
ناديه _
هنااا كلمي ابوكي خليه يجي يشووف مرات اخوه عملت ايه يلاااا…
هنا بضيق _
خلاص يا ماما لما يجي ابقي قولي ليه اللي انتي عايزااه…
زعقت فيها ناديه وقالت _
اسمعي اللي بقولك عليه، والله الجوازه دي ما هتم واللي يحصل يحصل…
_كلمت هنا ابوها اللي جه وكان قلقان جدا لتكون معاهم حاجه في البيت وقال بقلق..
عبد الرحيم _
في ايه يا ناديه انتي وهنا كويسين؟..
قامت ناديه ووقفت قدامه وقالت _
احنا يا اخويا كويسين، بس اللي مش كويسه مرات اخوك…
عبد الرحيم _
مالها مرات اخويا بس انتي جيباني من الشغل عشان تحكي في موضوع مرات اخويا تاني..
ناديه بعصبيه _
لااا هي اللي جات وحكت وقالت كلام ما يتقالش وخلت اللي ما يشتري يتفرج عليا وعلي بتك..
ادايق عبد الرحيم وقال _
فايزه عملت كده بجد يا هنا؟…
زعقت فيه ناديه وقالت _
جرا ايه يا راجل انت مش مصدقني؟..
زعق عبد الرحيم في هنا وقال _
انطقي يا هنا مرات عمك عملت كده زي ما بتقول امك ولا لا؟…
ردت عليه هنا بحزن وقالت _
ايوه يا بابا عملت كده…
عبد الرحيم بضيق _
خلاص انسو الموضوع ده خالص وانا هكلم عبد الرحيم وافهمه اللي حصل وبلاش منه الموضوع من الاول خالص..
فرحت ناديه وقالت _
عين العقل واهو يا عبد الرحيم جات منهم عشان متقولش انتي السبب ولا انتي اللي بوظتي الموضوع…
_دخلت هنا اوضتها وفضلت تبكي مش عشان الجوازه هتبوظ، بكت علي اللي حصل واللي قالته مرات عمها قدام الناس..
ــــــــــــــــــــــــــــــــــــــــــــــ
_بالليل في بيت صلاح كان محمود قاعد مدايق وقال لصلاح باباه..
محمود _
بس انا مش عايز هنا يا بابا انا بحب منال…
زعق فيه صلاح وقال _
منال مين دي اللي بتحبها، اللي كانت مخطوبه يجي خمس مرات وبعد ما ياخدو اللي عايزينه من الخطاب يفسخو، وانا مش حمل ادفع شقايا وتعبي علي ناس زي دي وفي الاخر يقولولك امك في العش ولا طارت..
فايزه بحده _
يعني ناديه وبنتها اللي مش هيعملو كده والنبي ده انت طيب يا شيخ صلاح..
زعق فيها صلاح وقال _
ما تتكمي بقي يا وليه انتي وبعدين هو انتي ليكي عين تتكلمي بعد اللي عملتيه ده انا وشي بقي في الارض من عبد الرحيم اخويا..
محمود بحده _
يا حج بس انا مش عايز هنا هتجوزها ليا بالعافيه يعني…
زعق فيه باباه وقال _
ايوه هتتجوزها وبالعافيه كمان، انا ابوك واكتر حد عارف مصلحتك فين؟..
قام وقف صلاح وكمل كلامه وقال _
انا طالع اتفق مع عبد الرحيم علي معاد الفرح احنا مش اغراب عشان نعمل خطوبه طويله والكلام ده، ومن بكره العمال هيجو يظبطو الشقه بتاعت محمود فوق…
_قال كلامه وطلع ودخل محمود اوضته وهو متعصب ورزع الباب ورااه…
قعدت مياده اخته جنب مامتها وقالت بضيق _
يعني برضو يا ماما هنا هتيجي هنا وهتتجوز قبلي، مش كفايه انها كل العرسان بتجيليها هي وموقفه حالي..
فايزه بحقد ردت عليها وقالت _
ما تزعليش يا مياده ووعد مني اني والله ما هخليها تتهني باخوكي يوم واحد..
ــــــــــــــــــــــــــــــــــــــــــــــ
علي القهوه كان قاعد عبد الرحيم مع صلاح اخوه، وقال بضيق..
عبد الرحيم _
يرضيك انت بقي الكلام ده يا شيخ صلاح؟..
رد عليه صلاح وقال_
لا طبعا ما يرضنيش الكلام ده، وانا والله يا اخويا عاتبتها وهي مش هتعيد الكلام ده تاني، وبعدين معذوره برضو..
عبد الرحيم بضيق رد عليه وقال _
معذوره في ايه بس يا صلاح، وايه العذر اللي يخليها تتكلم كلام زي ده قدام الناس علي بنتي..
صلاح _
مياده يا عبد الرحيم دي عندها دلوقتي فوق الخمسه وتلاتين سنه وما فيش حد متقدملها، وانت عارف هي في الشكل مش حلوه زي هنا..
اتنهد عبد الرحيم بضيق وقال _
خلاص يا صلاح يا اخويا من غير ما تكمل..
صلاح_
ايه بقي نكبر دماغنا من كلام الستات اللي لا بيودي ولا يجيب ده ونقرا الفاتحه ونتفق..
عبد الرحيم _
علي بركة الله يا صلاح يا اخويا نتفق ومالو…
ــــــــــــــــــــــــــــــــــــــــــــــ
_بعد كام يوم كان خطوبة هنا ولبست فستان حلو، وقعدت مامتها جنبيها وقالت..
ناديه بضيق _
معلش يا هنا اقلعي الفستان ده وامسحي المكياج ده..
اتملت عيون هنا دموع وقالت _
ليه بس يا ماما لتكوني عايزاني البس طقم من عند اخويا كمان احضر بيه خطوبتي…
ناديه _
اعمل ايه في ابوكي بقي هو اللي بيقول تلبسي حاجه عادي وبلاش مكياج عشان نراعي شعور الست مياده اللي مش حلوه ولسه ما اتجوزتش…
وقفت هنا وقالت _
هو انتو لحد امتي هتفضلو تعملو فيا كده، مش كفايه مديني لواحد كنت في الرايحه والجايه بشوفه واقف مع بنات وكان بيتريق عليا علي طول…
اتملت عيون ناديه دموع وقالت _
هو هيجيبه من بره ابن فايزه بس اقولك ايه، انتي كلها شهر وهتروحي عندهم اسمعي اللي يقولك كلمه ترديها عشره واللي يدوس ليكي علي طرف اهرسيه برجلك فاهمه…
هنا ردت علي ناديه بحزن وقالت _
حاضر يا ماما اللي تشوفيه…
_غيرت هنا هدومها ولبست فستان شكله عادي ومسحت المكياج كله وحطت حجابها وطلعت لقيت محمود قاعد مدايق، قعدت جنبيه وكانت مياده اخته فايزه مامته بصين ليها بكره والكل كان مدايق فقالت هي لنفسها بضيق..
هنا _
بقي ده منظر خطوبه ده بس ياربي..
وبعدين قامت فايزه وسلمت علي محمود وقالت_
والله يا ابني ما عارفه اقولك مبروك ولا اقولك معلش علي الجوازه دي…
ادايقت هنا من كلامها بس عملت زي مامتها قالت ليها وردت علي فايزه وقالت..
هنا _
وايه اللي جابرك يا مرات عمي عليها الجوازه دي،خدي ابنك في ايدك والباب مفتوح اهو الحمد لله ما حدش قفله…
قاال محمود. بحده لهنا _
انتي ازاي تكلميها كده اصلا..
هنا بحده _
ما تشوف الاول هي قالت ايه؟..
محمود _
هي بتكلمني انا موجهتش ليكي كلام اصلا…
فايزه وهي بتعمل نفسها زعلانه قالت _
خلاص يا ابني اللي فيهم معروف، يلا منه لله ابوك بقي علي اللي عمله فينا…
_قالت فايزه كلامها وراحت قعدت جنب مياده اللي سالتها وقالت…
مياده _
كانت بتقولك ايه يا ماما البت دي؟..
ردت عليها فايزه وقالت _
اطمني خليته هينكد عليها دلوقتي…
مياده بحقد قالت _
مااشي يا ماما اما نشوف…
ـــــــــــ
محمود بحده _
اول واخر مره تتكلمي مع امي كده، فاهمه ولا لا؟..
ردت عليه هنا وقالت بضيق _
قول ليها هي الاول متقولش حاجه تدايقني، وانا مش هتكلم معاها خالص اصلا…
محمود بسخريه _
انتي شايفه نفسك كده علي ايه يا هنا، انا اصلا مش عايزك خلي عندك كرامه وقولي لابوكي مش موافقه، ليه مكمله وانتي عارفه اني بحب منال؟…
اتملت عيونها دموع وردت عليه وقالت _
لو انت كنت تقدر تقول لا وترفض انا كنت قدرت، وبعدين انا بنت والقرار لبابا وانت عارف تفكير عيلتنا عامل ازاي، انت بقي يا راجل خايف ليه تقوله مش عايزها ولا هيشيل عنك المصروف…
اتغاظ محمود ورد عليها وقال _
مااشي يا هنا ادعي ربك ان الجوازه دي ما تمش عشان ما اخلكيش تندمي علي اليوم اللي اتولدتي فيه..
ــــــــــــــــــــــــــــــــــــــــــــــ
_عدي شهر وكانت هنا ومحمود مش بيتقابلو غير لما بيجي يقعد مع ابراهيم اخوها، واهلهم مش بيروحو لبعض خالص، وجه يوم الفرح وكانت هنا حلوه اووي حتي محمود لما شافها انبهر بجمالها بس العند اللي جواه خلاص يبصلها بضيق، وهي كانت زعلانه لانها عارفه انه مش بيحبها، وبعد الفرح راحو شقتهم وفي بيت صلاح كانت مياده في اوضتها عماله تبكي وقالت..
مياده _
الكل عمال يتجوز وانا قاعده، محدش فيكم حاسس بيا اهي هنا اللي كانت بتلبس لبس ولاد اتجوزت واتعملها فرح وانا قاعده..
فايزه بضيق _
ما تهدي بقي وانا والله هخليها تكره اليوم اللي اتجوزت فيه اخوكي…
مياده بسخريه _
والله ولا هتقدري تعملي حاجه دي مش ساهله وهتشوفي..
فايزه بحقد._
والله انتي اللي هتشوفي يا مياده وما تنسيش اخوكي مش بيحبها وده هيخليني اطفشها بدري بدري، بس اسمعي بكره الصبح تعملي اللي هقولك عليه…
مياده _
اعمل ايه يا ماما..
فايزه _؟؟؟..
ــــــــــــــــــــــــــــــــــــــــــــــ
_تاني يوم الصبح صحيت هنا بدري ولبست فستان شكله حلو وحطت حجابها ومكياج هادي وكانت حلوه اووي، وبعدين صحي محمود وبصلها وهي قالت ليه..
هنا بهدوء _
صباح الخير، تحب اجهزلك الفطار…
بصلها من فوق لتحت بضيق وقال _
صباح الزفت علي دماغك، ده الواحد لو كان يعرف ان الجواز كده ما كانش اتجوز..
كلامه دايقها جدا، بس ردت عليه بقوه وقالت _
والله الماذون مش بعيد ساكن في نفس المنطقه لو راجل كلمه وقوله تعالي طلقها مني….
قام وقف وزعق فيها وقال _
انتي تحترمي نفسك معايا ولسانك ده لو ما اتلمش معايا هقطعه ليكي…
ردت عليه وقالت _
لم انت لسانك معايا الاول، ولو فاكرني يا حرام هسكت ومش هرد يبقي بتحلم انا ربنا خلقني بلساني ده عشان ما اسكتش علي حقي…
_كان لسه هيرد عليها بس الباب خبط، طلعت هي فتحت واتفاجئت لما لقيت مياده ومعاها منال واقفين قدامها، فقالت بضيق..
هنا _
نعم عايزين ايه؟..
ردت عليها مياده بخبث وقالت _
ايه يا هنا دي مقابله تقابلي بيها ناس جايه تبارك ليكي…
اتنهدت هنا بضيق ودخلتهم واول ما شاف محمود منال قال ليها بحزن…
محمود _
ازيك يا منال عامله ايه؟…
منال بحزن _
اكيد مش كويسه يا محمود بعد اللي حصل..
محمود _
ما تقلقيش يا حبيبتي قريب اووي هنخلص من الهم ده….
_المره دي ما اتحملتش هنا اللي قاله محمود، وسابتهم ودخلت اوضتها وقفلت الباب وفضلت تبكي، وبعد شويه مشيو، وطلعت من اوضتها ما لقيتش محمود بره ودخلت المطبخ لقيت الاكل اللي عملته ليها مامتها مش موجود وما فيش اكل خالص، فقعدت جعانه بعد شويه الباب خبط فكرته محمود وراحت فتحت بس كانت حماتها..
هنا _
اتفضلي يا مرات عمي؟..
فايزه بسخريه _
لا اتفضل ولا غيره امسكي دي بواقي الاكل اللي زايد مننا عشان تفطري..
مسكت منها هنا الاكل وقالت ليها بكل برود _
هاخدهم ارميهم للقطط اللي علي السلم اصل انا اهلي معوديني علي اني اكل وارمي البواقي للقطط والكلاب، هو انتو متعودين تاكلوها ولا ايه؟..
_خلصت كلامها ونزلت فايزه بأيدها علي وشها.، اتصدمت هنا من اللي عملته وطلع محمود وقال لامه بضيق..
محمود _
ايه اللي عملتيه ده بس يا امي؟..
فايزه بعصبيه _
البت دي قلت ادبها عليا…
ردت عليها هنا ببكاء وقالت _
حرام عليكي انتي ايه الكدب ده..
محمود بحده _
احترمي نفسك واتكلمي مع امي كويس..
قالت هنا _
انا اهلي عمر ما حد منهم مد ايده عليا، ودلوقتي هما اللي هيردو عليكم..
محمود بقلق _
استني انتي رايحه فين ده النهارده صبحيتك انتي اتجننتي..
فايزه بحده قالت _
سيبها يا محمود خلي الناس تعرف انها مش هتعمر في جواز….
ــــــــــــــــــــــــــــــــــــــــ