رواية أسود الداخلية الفصل الثالث عشر 13 بقلم أسماء عبدالهادي
رواية أسود الداخلية الجزء الثالث عشر
رواية أسود الداخلية البارت الثالث عشر
رواية أسود الداخلية الحلقة الثالثة عشر
سمعوا الباب بيخبط حنان دخلت
_ سمر يابنتي إنتي كويسة مازن إبن عمك قالي إنك تعبانة مالك يابنتي
مرام
_ لا ياطنط هي كويسة بس داخت شوية في الجامعة
_ ياحبيبتي يابنتي ألف سلامة عليكي هروح أعملك كوباية عصير علشان تفوقي وهعملك إنتي كمان يانور يابنتي ..
مرام
_ مرسي ياطنط متحرمش من حضرتك
سمر
_ نور من فضلك كلميه دلوقتي قبل مايقول لأبيه قصي أي حاجة أبيه قصي لو عرف ممكن يموتي
مرام
_ طب فهميني الأول علشان أقدر أفهمه
سمر
_ دا شاب غلس بيطاردني في الرايحة والجاية عايز يتقدم لي وأنا مش طيقاه ورفضته أكتر من مرة وهو بردوا مصر ولما لاقاني مصره على موقفي بقى يستخدم أسلوب التهديد ويبعتلي صور متفبركة ليا معاه و يهددني إنه هيبعت الصور دي لأهلى وينشرها على السوشيال ميديا وبصراحة أنا خوفت يعمل دا ويبوظ سمعتي ومكنتش عارفه أتصرف إزاي وفي نفس الوقت خايفة من رد فعل قصي وأدهم واديكي شوفتي أدهم عمل إيه لمجرد سوء تفاهم أومال هيعمل إيه لو شاف الصور الفظيعة اللي المتخلف دا فبركها
مرام
_ اه بس إحنا أول ما جينا كان ماسك إيدك
ردت سمر بغضب
_ الحيوان الغبي والله مش عارفه إزاي اتجرأ وعملها وكنت لسه هبهدله على تصرفه دا لكن اتسمرت في مكاني أول ما شوفت أدهم ومعرفتش أتصرف بسرعة
مرام
_ اها فهمت طيب ماشي سيبي الموضوع دا عليا
❈-❈-❈
أدهم مكانش طايق نفسه وحاسس إن جواه بركان ثائر نفسه يفجره في أي حاجة فخرج من البيت كله قبل مايعمل أي مصيبة في البيت ويندم عليها بعدين
في الليل ولما رجع أدهم
مرام راحت له
_ أدهم ممكن أتكلم معاك
أدهم
_ عارف هتقولي إيه فوفري كلامك يانور كلامك ملوش أي لازمة
_ لا ياأدهم إنت لازم تسمعني
زعق أدهم
_ أسمع إيه يانور ها أسمع إيه أظن إنك الوحيدة اللي شافت اللي حصل فمن فضلك أنا ماسك نفسي بالعافية علشان كدا بقولك اقفلي على الموضوع دا ..
مرام بخبث
_ لا ياأدهم مش عايزاك تزعل أكيد غلطة ومش هتتكرر أي حد ممكن يغلط إنت نفسك ممكن تغلط مهواش حوار يعني
هنا لون عينين أدهم اتحولت للون الدم
_ نعم غلطة!! وسمر!! إنتي بتقولي إيه… أنا ممكن أغفر لأي حد إنه يغلط إلا سمر إنتي فاهمة وقسماً برب العزة لهوريها شغلها كويس
مرام إبتسمت بمكر
_ لا ياأدهم أنا آسفة أنا مش بقولك كدا علشان تزعل منها أكتر وتقلب بالشكل دا من فضلك اهدى
أدهم كور قبضة ايده وقال
_ إسمعي يانور مش عايز أي حد يعرف بالموضوع دا وخصوصاً قصي إنتي فاهمة..لو لقيت قصي عارف يبقى إنتي اللي قولتيله وساعتها مش هرحمك إنتي كمان سمعاني
هزت مرام راسها
_ ماشي ياأدهم اللي تقول عليه .. بس سمر ..
_ اشش متجبيش سيرتها و إتفضلي يلا من قدامي إنتي كمان
خرجت مرام وهي بتضحك بتسلية
_ حلو أوي خليني أبوظ علاقاتكم ببعض أكتر وأكتر بس والله سمر صعبانة عليا بنت طيبة وهبلة ومتستاهلش اللي يجرالها دا بس يلا حظها جه كدا والمرة دي أنا مدخلتش دي المشاكل هي اللي جتلها برجليها
هنا شافتها منة
_ نور إيه مالك واقفة تكلمي نفسك ليه
_ ها لا أبداً يامنة عادي
_ طب سمر صحيت كنت عايزة أطمن عليها
_ سمر ياعيني وقعت في مشكلة كبيرة ومش عارفين إزاي نخرجها منها
جت لينا انضمت لهم وقالت بقلق
_ مشكلة إيه يانور
مرام بخبث
_ تعالوا هحكيلكم في الأوضة جوا بس أمانة ماتقولوش لحد لأن أدهم لو عرف هيبهدلني
لينا حطت ايدبها على بوءها وقالت بخوف
_ نهار أبيض هي فيها أدهم يبقى الموضوع كبير أوي
مرام
_ أكبر مما تتوقعي وللأسف سمر هتكون الضحية
بدأت مرام تحكيلهم اللي حصل
منة ولينا بخوف
_ هييىء يانهار مش فايت
لينا
_ علشان كدا أدهم كان شكله يخوف و مكانش طايق نفسه … أنا فكرتوا نازل مهمة علشان كدا اتحول طب والحل سمر مظلومة وأدهم هيبهدلها هنعمل إيه
منة
_ ياحبيبتي ياسمر
مرام بمكر
_ أنا شايفة الحل إننا نقول لقصي هو كبير العيلة
البنات
_ نعم تقولي لمين دا قصي لوعرف هيبهدلها أكتر من أدهم
منة
_ قصي أخويا بيغير علينا جداً .. إنتي شايفة بيعمل إيه مع مازن رغم إنه صاحبه وإبن عمه ما بالك بالغريب دا مش بعيد يقتلها
هنا سمر عيطت
_ عااا علشان كدا مقولتش لحد .. الحيوان دا من زمان وهو بيطاردني و بيضايقني بس أنا خفت أقول لأبيه قصي لأني عارفه إنه مش هيتحمل اللي بيسمعه… لحد ما اتدبست وحصل اللي حصل… بنات أنا بنهار ومش عارفه أعمل إيه
البنات فضلوا قاعدين وحاطين ايديهم على خدهم ومش عارفين يتصرفوا إزاي … نسيبهم ونروح لأدهم تاني
❈-❈-❈
قصي رفع حاجبه
_ نعم إيه اللي إنت بتقولوا دا
_ زي ماسمعت ياقصي أنا عايز أكتب كتابي على أختك الليلة دي أنا هكلم المأذون حالاً
_ حيلك حيلك يابني إنت بتقول إيه هي سايبة تعالى أقعد كدا وقولي في إيه وإيه اللي حصل منها مخليك مش على بعضك وعلشان كدا أخدت القرار المتسرع دا
_ القرار دا مش متسرع ياقصي وأنا عارف أنا بعمل إيه كويس أوي
_ أدهم أظن إنك عارفني كويس مش أنا اللي ينضحك عليه بكلمتين فلخص وقولي إيه اللي حصل إنجز قبل ماقوم أجيب سمر وأعرف منها وساعتها إنت مش هتفلت من إيدي
عرف أدهم إنه مش هيقدر يخلص من قصي ودماغه فقال
_ الحقيقة بقى ياقصي أنا بحب أختك سمر من زمان بس كنت بعاند
_ لا ياشيخ عليا أنا الكلام دا … أومال كلامك لمازن وعدي دا إيه أنا مش هتجوز أبداً اتجوز وأرجع اسيبها تترمل وتكون لوحدها وكلامك الفاضي اللي كنت بتقوله دا
_ أهو زي ماسمعت كان كلام فاضي ياقصي
قصي سكت وبعدين اتكلم بحدة
_ أدهم قلتلك اتكلم أنا مش فايق و دماغي فيها مليون حاجة .. أنا مش هجوزك أختي لأي سبب تافه إنت فاهم .. مهما كان ومهما حصل أختي مش لعبة… إنما لوفي سبب تاني فأنا هقدر أحله بنفسي
اتنهد أدهم وقال بجدية
_ افهمني ياقصي دي الحقيقة أنا بحب سمر بجد… بس كنت بعاند مع نفسي للسبب اللي قولتهولكم … مكنتش عايز أعترف بحبي دا قدام نفسي حتى وبخبيه علشان خايف بعد ما أعشمها بيا أسيبها وامشي وتبقى وحيدة ومن بعدي هي مش هتحمل دا وأنا مش هتحمل إنها تواجه العالم لوحدها فهمت ليه ياقصي… فمتتعبش قلبك وقلبي ووافق
_ مم هحاول أقنع نفسي بكلامك وأعمل إني مصدق
_ لازم تصدقني
_ طيب ممكن أعرف سمر عملت إيه علشان تتخذ قرارك دا والنهاردة بالذات
_ ممكن إنت تثق فيا ولو في أي حاجة أنا هعرف أتصرف فيها!!
_ مم ماشي ياأدهم هعملك اللي إنت عايزه بس هتكون خطوبة بس زي أخوك غير كدا لا
_ لا إنت بتهرج ياقصي أنا عايز أكتب كتابي عليها
_ لا مفيش كتب كتاب إلا يوم الفرح ودا آخر كلام عندي
بصله أدهم بغيظ
_ تصدق إنت غتت
ضحك قصي : عارف
_ أنا ماشي من قدامك قبل ماأزعلك
غمزله قصي
_ فكر بس تعملها
كور أدهم ايده وضربها في الحيط وزعق بغضب
إبتسم قصي أكتر ورجع كمل شغله على اللاب ولا كأن حاجة حصلت
وبعد شوية دخل عند قصي مازن وعدي
مازن
_ ماله أخينا دا خارج بزعابيبه كدا ليه
عدي
_ إنتوا اتخانقتوا
قصي
_ ولو اتخانقنا هيخرج من عندي سليم كدا
عدي
_ اه فعلاً عندك حق أنا ناسي إن وقت الخناق واحد فيكم لازم يخرج على نقالة
قصي
_ طيب كويس إنك عارف أهو
مازن
_ طب في إيه بقى
قصي
_ عايز يتنيل يتجوز ياسيدي
مازن
_ لاااا أدهم أخويا؟؟
قصي : شوفت بقى
مازن
_ لا لا أنا أصدق أي حاجة إلا دي…
عدي إنت ممكن مثلاً لكن أدهم بعيدة دي
عدي
_ ومين تعيسة الحظ اللي أمها داعية عليها دي
قصي
_ إتلم ياعدي
مازن رفع إيده على راسه
_ الله… دي سمر يخربيت كدا البنت كدا هتضيع ياعيني ..
أدهم فين والجواز فين دا مايعرفش حاجة عن الرومانسيه ولا يعرف يقول كلمتين حلوين على بعض
قصي
_ وقال إيه عايز كتب كتاب الليلة
عدي
_ ماله الواد هو بحالات ولا إيه
قصي
_ سيبكم منه وقولوا لي جاهزين للمهمة ؟؟
هزوا راسهم بأنهم مستعدين
قصي
_ طيب اتفضلوا على أوضة التمرينات اتدربوا لحد مايجي الوقت
مازن
_ لا أنا عايز أحضر خطوبة أدهم
قصي
_ هنأجل الخطوبة ليوم تاني الدنيا مش هتطير يلا
هنا جه أدهم وقال
_ لا ياقصي مفيش حاجة هتتأجل أنا خلاص نزلت اشتريت الدبل والخطوبة دلوقتي من فضلك بلغ البنات تستعد يلا وأنا رايح أقول لماما وطنط
وسابهم ومشي قبل ما يردوا أو يقولوا أي حاجة
مازن وعدي فاتحين بوءهم
أما قصي فضرب كف بكف
_ لا حول ولا قوة إلا بالله أدهم جراله إيه
عدي
_ يقطع الحب وسنينه
مازن ضحك
_ تفتكر ياعدي أخويا فعلاً وقع ولا حدش سمى عليه .. الله ياجدع دا هيبقى حديث الموسم
لسه مازن مخلصش كلامه سمع أمه بتزغرد
مازن
_ الله دا لحق يقولهم وأمي كمان مكدبتش خبر
عدي ضحك
_ ههه الأمهات ما بتصدق ياعم
❈-❈-❈
نادية حضنت إبنها وقالت بفرحة
_ فرحتنا والله يابني هي دي الأخبار الحلوة اللي كنت مستنياها ربنا يباركلكم ياحبيبي
أدهم لحنان
_ خالتي حنان معلش من فضلك ممكن تطلبي من سمر تقابلني في أوضة الضيوف عايز أقولها حاجة ضروري
حنان
_ ماشي يابني هروح أقولها
لينا
_ بناات سامعين صوت الزغاريد يبقى فعلاً أدهم هينفذ كلامه
سمر برعب
_ لينا أنا خايفة
لينا
_ مش عارفه أقولك إيه ياسمر… بس حاولي تكلميه بالراحة وهو إن شاءالله ربنا ح يهديه ويوافق يسمعك.
وهنا جت حنان
_ سمورة حبيبتي ألف مبروك يابنتي على خطوبتك من أدهم… ماكنتي تقوليلي يابنتي بدل ما اتفاجئ كدا .. ملاحظتش عليكي ابداً إنما منة أختك كانت مكشوفة أوي أي حد ماشي في الشارع هيعرف
منة ولينا ومرام انفجروا في الضحك
منة بحرج
_ ما خلاص يا ماما الله
حنان ضحكت
_ هه ربنا يسعدكم يابنتي وعقبال عدي هو كمان ما يتلحلح ويخطبك يالينا
لينا برقت وقالت
_ مين عدي ؟؟؟
حنان
_ إيه طيب عايزه قصي!!! عامة كلهم ولادي وحبايبي ربنا يسعدك مع أي واحد منهم يابنتي
لينا
_ لااا ياخالتي وأنا إيه اللي يدبسني التدبيسة السودة دي مش كفاية عليا أخواتي ظباط هيكون جوزي كمان… أنا نفسي أتجوز حد مختلف بيشتغل أي حاجة غير الداخلية وجو الأكشن والإثارة دا
ضحكت حنان
_ ههه كلكم بتقولوا كدا يابنتي ووقت الجد بتطبوا على وشكم
المهم ياسمر يابنتي البسي إسدالك وتعالي كلمي أدهم مستنكي في أوضة الضيوف يلا
بلعت سمر ريقها وبصت للبنات
فحنان قالت
_ إيه ياسمر مكسوفة ولا إيه دا أدهم إبن عمك اللي مش بتبطلي تعندي معاه هو حد غريب يعني وإنتوا يابنات البسوا واستعدوا لحد ماسمر ترجعلكم وتستعد هي كمان
خرجت سمر مع أمها وهي ماسكة في ايدها وكانت بتأخر رجل وتقدم رجل
حنان قالت
_ معلش ياأدهم سمر أصلها مكسوفه منك … ماخلاص بقى هتكون خطيبها ما إنت عارف البنات بقى بتتكسف
هسيبك تقولها اللي إنت عايز تبلغه ليها على ما أجهز العصير والجاتوه اللي جبته
سمر كانت واقفة بتترعش
فأدهم قال بسخرية
_ اه واضح فعلاً إنك بتتكسفي بأمارة ما إنتي كنتي واقفة في نص الجامعة ووسط الطلبة وهو ماسك ايديكي ها … خلاص كشفتي برقع الحيا ومبقتيش خايفة من حد أي واحدة غيرك بتقابل حبيبها في مكان محدش يشوفهم فيه إنما إنتي قلبك خلاص مات
سمر اتنرفزت من كلامه واتهامه ليها بالباطل فاتعصبت وقالت بحدة
_ أدهم إنت إيه اللي بتقوله دا أنا مش هسمحلك أبداً إنت فاهم
_ إيه جالك عين تتكلمي بعد اللي عملتيه أو حتى ترفعي عينك في عيني … اه ياما كان نفسي قصي يوافق على كتب كتابنا كنت ساعتها قدرت اربيكي كويس
_ لا عندك أنا متربية كويس أوي ومش هسكتلك على أي إهانة تاني إنت فاهم
_ لا يا شيخة ومش خايفة ؟؟
_ ااا أنا معملتش حاجة أخاف منها
_ طب عيني في عينك كدا
_ أدهم أرجوك بس بقى أنا مش قادرة أتحمل كلامك دا
_ قاسي مش كدا
_ أدهم أنا بكرهك
_ إنتي لسه شوفتي حاجة
عيطت سمر وقالت
_ اسمع أنا مش هسمحلك توجعني أكتر من كدا
هنا اتحول أدهم من السخرية للجدية وقال
_ وليه سمحتيله إنه يوجعك ويبتزك بالشكل دا
برقت سمر بعينيها ….
❈-❈-❈
خلصت البنت صلاتها وفضلت قاعدة على سجادة الصلاة تقرأ قرآن وتستغفر وتدعي ربنا إنه ينجيها من اللي هي فيه حست بالجوع قامت من مكانها وفتحت التلاجة وبدأت تطلع أي حاجة قدامها وتاكل
وبعد ما أكلت افتكرت كلام سليم
_ إيه دا … هو قال إنه شغال مع اللي خاطفني معنى كدا إنه زيه بالظبط مجرم .. يعني فلوسهم كلها حرام في حرام.. والأكل اللي أكلته دا كله حرام .. لا مش ممكن يارب سامحني يارب … لا أنا إستحالة أكل من مال حرام
ياربي أنا إيه اللي عملته في نفسي دا
بس بس كنت هعمل إيه ما أنا لازم أكل وإلا هموت من الجوع… لا لا أنا مش هينفع أفضل هنا لحظة واحدة أنا همشي من هنا… أيوة هو دا الحل المناسب أنا لازم أمشي من هنا بسرعة
وقفت في نص الأوضة وعيطت
_ يارب الراجل دا ورجالته ميمسكونيش يارب إحميني منهم يارب إنت العالم بحالي يارب
وقفت شوية وبعدين بصت للدولاب وقالت
_ أنا جتلي فكرة
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية أسود الداخلية)
