رواية أسود الداخلية الفصل التاسع 9 بقلم أسماء عبدالهادي

رواية أسود الداخلية الفصل التاسع 9 بقلم أسماء عبدالهادي

رواية أسود الداخلية الجزء التاسع

رواية أسود الداخلية البارت التاسع

رواية أسود الداخلية الحلقة التاسعة

أدهم اتكلم بإنزعاج
_ في إيه يابني هي ناقصه جنان على الصبح عايزين نفطر مش ناقصاك هي
مازن
_ بص بقى ياقصي وقبل أي حاجه علشان ماتقولش في مهمه جديدة أو يحصل أي حاجه تقاطع كلامي ومن الآخر كده بقى ياقصي ومافيش أي مجال للرفض أنا عايز أخطب أختك منه والنهاردة هنروح نجيب كام خاتم حلوين ونلبسهم على السريع بس على بالليل أكون نمت لأني مفرفر بصراحه وبقالي يومين ما نمتش إلا كام ساعه لما خلاص هتحول زومبي …. معلش بقى يا نور أنا عارف إن دا مش وقته بس أنا بصراحه مش هينفع استنى أكثر من كده استنيت كتير ياناس
منه أول ما سمعت كلامه اتحرجت ودخلت بسرعه على أوضتها ولينا وسمر دخلوا وراها أما مرام ففضلت واقفه تتابع الحوار
قصي رد بإنزعاج
_ خلصت كلامك يامازن
مازن قعد مكانه على الكرسي وقال
_ اه خلصت تقدروا تتفضلوا تفطروا
قصي بضيق قال
_ حد يشيل الواد ده من قدامي لأنه لو فضل قدامي ثانية واحدة كمان مش هيحصل كويس
مازن قام بسرعه واستخبى ورا عدي وقال
_ في إيه بس ياقصي اهدى كده وروق ياباشا
قصي
_هروق اه أنا هروق عليك فعلاً
مازن بمسكنة
_ أنا عملت إيه بس ياناس أختك وبحبها وعايز اتجوزها فيها إيه دي
قصي
_ اه تقوم تقولها كده في وشها يامتخلف ما استنتش لما نكون لوحدنا ليه
_على أساس إن إنت مش عارف ماإنت عارف إني عايز أخطب أختك من زمان وإنت اللي مطنش
_ ولما إنت عارف بتكرر طلبك تاني ليه
_ علشان زهقت من الإنتظار ياقصي أنا مستني إيه ليه ماتكونش كل حاجه في النور هفضل مخبي جوا قلبي لإمتا ولا إيه رأيك ياخالتي
حنان بفرحه
_ وأنا مش هلاقي لمنه بنتي أحسن منك يامازن يابني لكن طبعاً الرأي رأي أخوها ورأي منه كمان
مازن
_ لا سيبك من قصي هو كده كدا هيوافق أما منة فبعون الله هتوافق
يعني مفيش أي مانع…. نبل الشربات ونعلي الجواب بقى ومحدش يسألني يعني إيه
الكل ضحك على مازن وأسلوبه حتى قصي ومرام
مازن بإلحاح
_ ها يابني قلت إيه
قصي
_ اقعد أفطر
مازن
_ وربنا ما حد قاعد يفطر إلا لما ترد عليا
قصي بضيق
_ خلاص يازفت موافق اتنيل أقعد بقا وقفل على الحوار دلوقتي
قعد مازن وهو منكشح
_ هو دا الكلام وأخيراً هخطب البت بتاعتي ياناس
مكملش كلمته ولقى بونيه فى وشه وقعته على الأرض من قصي
أدهم وهو بيبص لأخوه بإنزعاج
_ مفيش فايدة فيك مش هترتاح إلا لما يطير رقبتك
مازن قام وقف وقال
_ اه يانا ياوشي يانا بقولك إيه ياقصي واحدة كمان الجنب التاني علشان المنظر العام بس واللي يسألني دا إيه أقوله خرجت من مهمة بدون خربوشة واحدة… لكن معرفتش أخرج من بيتنا سليم
قصي بحدة
_ لو سمعت صوتك هزعلك
مازن قعد مكانه وبدأ يأكل بهدوء
_ خلاص اتنيلت انكتمت ياباي على اللي يزعلك يا شيخ
ضحكت مرام من قلبها ولأول مرة
_ ههه إنتوا إيه دا إنتوا كدا على طول
مازن
_ بعيد عنك إيده زي المرزبة هو وأخينا اللي جنبه دا وشاور على أدهم أخوه
مازن
_ طب قوليلي يا آنسة نور أنا قلت حاجة غلط
ضحكت نور وهزت راسها
_ لا مقولتش حاجة غلط
زعق قصي
_ مازن هنتكتم ولا لا
مازن
_ طيب خلاص هنكتم
قصي زعق تاني لمرام
_ وإنتي واقفة هنا بتعملي إيه لسه على الأوضة مع البنات إخلصي
رفعت مرام حاجبها وبصتله بإنزعاج
فزعق تاني
_ إنتي لسه متحركتيش
عدي
_ براحة عليها ياقصي هي لسه مش عارفة نظامك
قصي
_ يبقى تعرفه من دلوقتي مفيش عندي بنات تقعد في مكان فيه شباب إتفضلي يلا
❈-❈-❈
أما جوا عند البنات منه كانت طايره من الفرحه أول ما سمعت كلام مازن وإن خلاص خطوبتهم النهارده بالليل والبنات بدأوا يهنوها هما كمان وفرحانين ليها لأنهم عارفين إن منه ومازن بيحبوا بعض
لينا حضنت منه وقالت
_ حبيبتي يا منه ألف مبروك مازن أخويا بيحبك قوي وبصراحه إنتم الإتنين لايقين على بعض جداً وهتكملوا بعض ربنا يسعدكم ويهنيكم
أما سمر بتحاول تنسى خوفها واللي شاغل بالها وقالت بسعاده
_ أيوه بقى يا منه وأخيراً لقد هرمنا من أجل هذه اللحظه يابنتي
منه بسعادة
_ تسلمولي يا بنات متحرمش منكم بس أنا خايفه من أبيه قصي ممكن ميوافقش
لينا
_ لا إن شاءالله هيوافق إنتي عارفه علاقته بفرقه الأسود بتاعته عامله إزاي وبيحبهم قد إيه
منه
– ربنا يسمع منك يارب والموضوع ده بقى يتم
وهنا دخلت مرام وهي مكشره بتقول
_ماله ده بيزعق ليا كدا ليه
فضحكت منه وقالت
_ أكيد تقصدي قصي مش كده
مرام
_ اه واقفه في أمان الله معاهم لقيته بيزعق لي واحرجني قدام الشباب وقال لي أدخلي واقفة ليه كدا
ضحكت سمر وقالت
_ معلش ده طبع أبيه قصي بيغير علينا جداً ومش بيحبنا نقف مع الشباب حتى لو كانوا شباب العيله
مرام بإستغراب
_طب إزاي ومنه ومازن بيحبوا بعض
منه ردت بإستغراب
_ يعني إيه مش فاهمه
مرام
_ يعني حبيتوا بعض إزاي وكنتوا بتتقابلوا فين وقصي مانع عنكم الميه والنور والهوا كده
البنات كلها ضحكت في نفس واحد ولينا قالت
_ حيلك حيلك إنتي فهمتي غلط منه ومازن عمرهم ما اتكلموا مع بعض ولا اتقابلوا مع بعض في أي مكان
رفعت مرام حاجبها
_ يا سلام أومال حبوا بعض إزاي وإزاي كل واحد عبر للتاني عن حبه
منه
_ لا ما فيش عندنا إحنا الكلام ده كل الحكايه إني أنا ارتحت لمازن إبن عمي وهو كمان معجب بيا وبس هي دي الحكايه لا أكثر ولا أقل
مرام
_ إنتي بتتكلمي بجد
منة
_ إيه يابنتي مالك مستغربه ليه
مرام
_ فين المقابلات فين الكلام الحلو فين الهدايا
منه
_ إنتي بتقولي إيه لا طبعاً الكلام ده كله ما ينفعش ولا حتى بعد الخطوبه
مرام
_ لا إنتوا الوضع عندكم غريب قوي
لينا
_ كل اللي بتقولي عليه ده بيحصل بعد كتب الكتاب وقتها هتشوفي بقى الرومانسيه كلها على أصولها
مرام
_ مش مقتنعه أبداً باللي بتقولوه ده بس عامة ألف مبروك يامنه مازن إنسان شهم وكويس وكمان دمه خفيف مش كشري زي أخوكي
منة ضحكت
_ تسلمي يانور متحرمش منك عقبالك ياقمر
❈-❈-❈
على الأكل قصي قال
_ أدهم خلص أكلك وتعلالي على الشقة التانية عايزك
أدهم والأكل في بوءه
_ لا ياقصي بالله عليك مش وقته أنا مش قادره أفتح عيني خالص
قصي
_ إنت سمعت أنا قلت إيه
أدهم بإنزعاج
_ ماشي ياقصي حاضر اللي تشوفه
قصي
_اللي محتاجك فيه مش هياخد خمس دقائق وتروح تنام زي ماإنت عايز
أدهم تمام
بعد كده قصي بص الشباب وقال
_ إسمع يامازن إنت شقتكم فوق مسموح ليكم تدخلوها في أي وقت طول النهار إنما بالليل محظور عليكم الشقه حظر تام هتطلعوا بالليل فوق مع عدي
مازن إشمعنا
قصي
_ علشان طبعاً منة هتكون بالليل بايتة مع لينا أختك أما نور هتكون تحت هنا مع سمر .. علشان كدا مش مسموح ليكم دخول الشقة بالليل لأي سبب من الأسباب
مازن بهيام
_ الله منة هتكون نايمة في البيت عندنا يا سلام دا أحلى خبر سمعته في حياتي
قصي لون عنيه اتحول للأحمر
_ إنت ناوي على قطم رقبتك النهاردة
مازن
_ خلاص ياعم مش داخل الشقة بالليل سمعت والله بس دا ميمنعش إني فرحان وفرحان أوي كمان قالها وقام وقف يطلع على أوضته فوق والبسمة مزينة وشه
أدهم بضحك
_معتوه
عدي
_ ما تسيبوا الواد ياخذ فرصته ولا إنتوا علشان مطبيتوش زيه مش حاسين بيه ومش مقدرين اللي هو فيه
أدهم
_ على أساس إن إنت اللي طبيت ياعمهم
عدي
_ لسه بس إن شاءالله النية موجودة
أدهم قال
_ أما أنا فلا … ليه أرتبط بواحدة وأفضل أوجع قلبها في كل مهمة أطلعها وتفضل حاطة إيديها على قلبها زي ماما وخالتي حنان كدا لا وكمان ممكن تترمل بدري بدري وتتبهدل هي والعيال من بعدي
عدي
_ حيلك حيلك ياعم إيه النظرة التشائمية دي يا أخي فين روح التفاؤل والإقدام
أدهم
_ دي الحقيقه ياعدي إحنا شغلتنا مش مضمونة في أي لحظة ممكن نروح فليه أظلم بنات الناس معايا وبعد ما اتجوزها أسيبها لوحدها
قصي
_ ومين يضمن لأي حد عمره مهما كان شغله مش شغلتنا بس.. هل لوكنت بتشتغل حاجة تانية …محاسب على مكتب مثلاً هل إنت كدا هتكون ضامن عمرك وإنك متسيبهاش ومتترملش من بعدك؟؟
عيش حياتك والأعمار بيد الله… ماخلقنا في الأرض دي إلا علشان نعمرها وكل اللي بيحصل لينا لقدر وحكمة وربنا مبينساش حد
عدي وأدهم
_ ونعمه بالله
عدي هنا وقف
_ أنا خلاص فصلت شحن أنا طالع أنام سلام
أدهم جه يقوم وراه مسكه قصي من هدومه
_ على فين قدامي ياخويا على المكتب
ولما دخلوا أوضة المكتب
أدهم قال
_ ها في جديد لقيت أي طرف خيط
قصي بضيق
_ للأسف لسه كل لما أحاول أوصل لأي نقطة فجأة تتلاشى ….في حاجة غلط في الموضوع أو في حاجة غريبة مش مفهومة وغايبة عننا
أدهم بجدية
_ سيبها بظروفها ومع الوقت هنكتشفها إنت بتعمل اللي عليك ياقصي
اتنهد قصي وسكت
أدهم قال
_ حاسس إن في حاجة تانية عايز تقولها
_نور .
_ مالها
_ حاسس إن وراها حاجة
_ حاجة إزاي يعني إحنا اتأكدنا إن فعلاً أهلها كلهم ماتوا
_ بس متأكدناش إنها فعلاً نور ولا لا للأسف مفيش أي صورة أو أثر أو أي معلومات عن نور دي تماماً وكأنها مكانش ليها أي أثر ولما عملت تحرياتي عنها ملقتش غير شهادة تخرجها من سياحة وفنادق
_ والشهادة دي فيها إيه
_هي نفسها نور بس الوضع دا مش مريحني في حاجة مريبة
_ طالما حاسس بكدا يبقى هو كدا فعلاً أنا بثق فيك وعامة هنحط نور تحت عنينا أربعة وعشرين ساعة بس عندي سؤال
_ قول
_ لما إنت شاكك فيها كدا ليه دخلتها بيتنا ليه سمحتلها إنها تشارك البنات مكان واحد مش خايف عليهم منها مثلاً
_ لالا طول ما هي وسطنا وقدام عنينا فإحنا كدا بنأمن شرها
_ دا في حالة لوكانت هي فعلاً مصدر شك
_لسه هتأكد من دا ولو طلعت جاسوسة لأيهم يا وليها مني وربنا ما هرحمها
_بمناسبة أيهم النيلة دا اتأكدت إنه ورا اللي حصل لأهل نور ولا لا ؟
_ لسه التحريات شغالة يا أدهم بس إحتمال كبير إنه هو .. ولو هو يبقى كدا مليون في المية نور دي تبعه وبكدا فتحوا النار في وشهم وهنمسكهم هنمسكهم
_ الموضوع كبير أوي ياقصي وأيهم دا شكله مش بيهزر ومسنود جامد
_ دا شيء أكيد وهنعرف كل اللي وراه ورئيس العصابة كمان إنت بس قول يارب.. ما هو لكل ظالم نهاية وأيهم متأكد إن نهايته قربت
_ إن شاءالله
_ أطلع يلا إنت نام علشان خروجت بالليل اللي مكانتش على البال دي
ضحك أدهم
_ معلش ياقصي .. خلي الواد يفرح
قصي
_ يفرح و أموت أنا من الغيظ
_ ليه بس
_ ليه إيه دي أختي يابني
_ وإيه المشكلة
_ أدهم غور من وشي
اتحرك أدهم من مكانه وهو مش فاهم حاجة ومش مدرك قد إيه قصي بيحب اخواته البنات وبيغير عليهم لدرجة إنه غيران عليها من إنها تتخطب وكان هيرفض لولا الفرحة اللي شافها في وش أخته فمرضاش يكسر بخاطرها ولا بفرحتها
❈-❈-❈
بالليل الكل جهز علشان يروحوا يجيبوا شبكة منة
مازن كان بيتجهز وهو في قمة حماسته
دخل عدي
_ أيوا بقى ياعم إيه الشياكة دي كلها
إبتسم مازن
_ عريس بقى
أدهم
_الليلة ليلتك ياعريس ألف مبروك
_الله يبارك فيكم ياه متتصوروش أنا مبسوط قد إيه الليلة دي
عدي
_ ياعم دي مجرد خطوبة يعني لا هتقدر تقعد معاها براحتك ولا تتكلم براحتك
مازن
_ عارف ياعم الفصيل بس دا ميمنعش إني فرحان أوي
عدي
_ ربنا يسعدكم
مازن
_ ياخوفي بس تيجي مهمة الليلة تبقى حكاية رخمة أوي
ضحك عدي
_ ههه ساعتها بقى تقدر تقول المنحوس منحوس
مازن
_ لا بالله عليك متقولش كدا سيبني بفرحتي .. يلا أنا جهزت جهزتوا ولا لسه ..
ولما بص على عدي قال
_ إيه دا عدي إنت لسه مجهزنتش ليه
عدي
_ أوامر قصي ياسيدي طلب مني أفضل معاه هنا
_ ليه هو كمان مش جاي معانا
أدهم
_ دا الأفضل ليك إن قصي ميجيش هيخنفك
مازن
_ على رأيك فعلاً بس كنت عايز عدي معايا
عدي
_ الظاهر في حاجة قصي ناوي يعملها
❈-❈-❈
مرام كانت في أوضة سمر مع البنات اللي بيجهزوا علشان الخروجة فحست بحاجة غريبة زي الإشارة اللي متفقة عليها مع الرجالة اللي تبعها اتسحبت من غير ما حد يحس وخرجت البلكونة فلقت واحد متخفي على العمارة اللي قصادهم وبينور لها ففهمت
_ في حاجة بتحصل وأنا لازم أروح أشوف في إيه
ومن غير ما حد يشوفها
خرجت موبايل الطوارئ اللي مخبياه في هدومها واتكلمت بهمس
جهز لي العربية حالاً أنا جاية
واحد من رجالتها
_ هنا ولا فين
_لا هنا إيه هعطيك الإشارة وتجيلي عندها
_ تمام
وخرجت للبنات
_ بنات أنا قررت أجي معاكم
لينا
_ الله مش قلتي مش جاية
مرام
_ غيرت رأيي قلت ليه أفضل هنا في البيت لوحدي
سمر
أبيه قصي هيفضل هنا هو كمان مش جاي معايا
مرام
بصراحة يا سمر أنا كنت عايزة أجي معاكم بس اتكسفت علشان ماعنديش هدوم وكدا
منة
يا خبر يا نور .. يا حبيبتي إحنا قلنالك إن الدولاب كله باللي فيه بتاعك سواءً لبسي أو لبس سمر أو حتى لينا .. وكمان ممكن بكرة نستأذن من أبيه قصي وننزل نختارك كام طقم جديد
مرام بمكر
_ اه يامنة ياريت.. أنا معايا مبلغ كدا .. ممكن أجي معاكم وإنتوا بتختاروا الشبكة واسيبكم هناك وأروح أشتري هدوم ليا .. بس ياريت متقوليش للشباب علشان مش هيوافقوا إني أشتري بفلوسي وأكيد هيعرضوا عليا يتكفلوا هما بدا.. ودا اللي أنا مش عايزاه وهكون محرجة منه كفاية إنكم آويتوني في بيتكم والله مش عارفة أقولكم إيه أو أردلكم معروفكم دا إزاي
لينا
_ يابنتي إنتي زي أختنا وبقيتي فرد من العيلة خلاص
مرام بمسكنة
تسلمولي ربنا يخليكم ليا يابنات إنتم عوض ربنا بعد أهلي
وبعدين قالت في نفسها
دا أنسب حل علشان أعرف أزوغ منهم

يتبع…..

لقراءة الفصل التالي : اضغط هنا

لقراءة الرواية كاملة اضغط على : (رواية أسود الداخلية)