رواية أسود الداخلية الفصل الأول 1 بقلم أسماء عبدالهادي
رواية أسود الداخلية الجزء الأول
رواية أسود الداخلية البارت الأول
رواية أسود الداخلية الحلقة الأولى
كان فيه مواجهه شرسه بين أسود الداخليه وبين عصابه من المهربين وأصوات الطلقات الناريه والقنابل ماليه المكان
وبعد مناورات ومواجهات شرسه انتصر فريق أسود الداخليه على العصابه وتمت المهمه بنجاح
في مكتب اللواء محمود إسماعيل
_برافو يا فرقة أسود الداخليه برافو تمت المهمه بنجاح وبدون أي خسائر ودا المتوقع منكم دايماً أحسنتم
أدهم
_شكراً يا فندم يا رب نكون عند حسن ثقتك دائماً
_ أنا دائماً واثق فيكم ومتأكد إنكم قدها دا أنا اللي مختاركم بنفسي واللي مدربكم الوحش بنفسه وحقيقي فخور بيكم
عدي
_متشكرين جداً لحضرتك يا فندم
مازن
_طب بالمناسبه الحلوه دي يا فندم ما تسمح لنا بأجازه بقى من زمان ما رجعناش لبيوتنا وأهلنا
اللواء
_حقكم فعلاً بس الأول تاخدوا رأي الوحش بتاعنا ولو اداكم التمام أنا ماعنديش مشكله ما فيش أي مهمات دلوقتي لكن طبعاً معرضين إنكم تقطعوا الأجازة و ترجعوا الشغل في أي وقت لو حصل أي جديد
أدهم
أيوه طبعاً يا فندم إحنا عارفين إن شغلتنا دي مافيهاش إجازات أصلاً ومقدرين ده بس علشان خاطر أهلنا اللي بيكونوا قلقانين علينا عايزين ننزل نطمنهم علينا
اللواء
_ تمام يا أدهم كلم الوحش وخد منه الإذن وتعالى قولي بالتوفيق ياأسود
أدهم
_ تمام يا فندم
❈-❈-❈
خرجوا كلهم من مكتب اللواء
فمازن قال بضيق
_اه دا بيرفض بشياكة طالما نفض إيده من موضوع الأجازة وسلمنا للوحش بنفسه
عدي
_ لا ياأدهم بجد إنت لازم تقنع الوحش إحنا فعلاً محتاجين أجازة محتاجين نغير جو يا أخي هو إيه كله سلخ سلخ كده على طول إحنا مش بني آدمين ومن حقنا نرتاح ؟؟
أدهم
_ أحمد ربنا إن الوحش مسمعش كلامك كان زمانه دلوقتي فرغ رصاصتين في دماغك .
عدي
ربنا يجعل كلامنا خفيف عليه
مازن بإنزعاج
لا أنا عايز أجازة البنت بتاعتي وحشتني قوي عايز أشوفها ياناس حسوا بيا عايز أخطب ياناس واتجوز
عدي
يخرب بيت شيطانك إنت عارف اللي إنت بتتكلم عنها دي تبقى مين وتقرب إيه للوحش
مازن
عارف ياأخويا بس أعمل إيه قلبي اللي اتنيل وحبها وحشتني قوي
عدي
طب اسكت لأن الوحش عيونه في كل مكان ولو سمع الكلام اللي بتقوله ده قول على نفسك يارحمن يا رحيم
مازن بلع ريقي وابتدى يتلفت حواليه وبعدها بص لأدهم وقال
_ أدهم إنت هتكلم الوحش وتقوله إن اللواء أدانا أسبوع أجازه تمام وإنك مش بتاخذ إذنه إنت بس بتديله خبر علشان مايكونش عنده أي فرصه للرفض ولو حسيت إنه هيرفض بالله عليك إقنعه أنا عارف إن إنت الوحيد اللي بتقدر تتكلم معاه
أدهم
_تمام ماشي هكلمه
دخل أدهم مكتبه وكلم الوحش ورجع قال لهم
_خلاص يا شباب الوحش اداكم إفراج أخيراً
مازن رفع ايده وقال
_ الله عليك يا هندسة هو ده الكلام هات رأسك أبوسها
عدي
_ أخيراً لقد هرمنا من أجل تلك اللحظه.. الحمد لله أخيراً اعتقنا لوجه الله وهنشم نفسنا شويه
أدهم
في إيه يازفت منك ليه دا إنتوا تحمدوا ربنا إن الوحش مش معاكم في الفتره الأخيره وإنكم واخذين راحتكم على الآخر
عدي
_ لا اسكت حرام عليك دا إحنا اتنفخنا في التدريبات نفخ إحنا بقالنا شهرين متمرمطين في التدريبات اللي تهد الحيل إيه مش عايزنا نفرح بالأجازه ولا إيه
مازن
_ الله هنزل أعيش حياتي بقى وياسلام لو أخش دنيا
أدهم شمر إيده وبص لأخوه بتوعد
_لا أنا بقول إن في ناس هنا عايزه تتظبط أحسن حالها مش عاجبني
مازن بخوف
_خلاص خلاص ياأخي اتكتم أهو عليك نظرة أومال لو ما كنتش أخويا كنت هتعمل فيا إيه
_ أخوك ده في البيت يا بابا مش هنا في الشغل
_لا إحنا خلاص أخذنا الأجازة وأنا ماعرفكش من دلوقتي بقولك إيه أقطع علاقتك بيا تماماً
ضحك عدي
ما فيش فايده فيكم هتفضلوا إنتم الإثنين ناقر ونقير طول الوقت
أدهم
_ قوله يا عم عامل زي الأطفال مش عارف دا بقا واحد من أسود الداخلية إزاي …المهم سيبك إنت جاي معانا طبعاً ها
اتنهد عدي بحزن وقال
_ ده شيء أكيد أومال هرجع البيت أقعد لوحدي أعمل إيه
_ تنور بيتك التاني يا صاحبي ولا إيه
_ أيوه طبعاً هكون مبسوط وأنا معاكم بحس إني وسط عيلتي اللي محروم منها
❈-❈-❈
بعد كده كل واحد دخل يجهز شنطته واستغل مازن الفتره دي وكلم البنت اللي بيحبها وعايز يتجوزها
وبعد كده ركبوا العربيات وانطلقوا في طريقهم لبيوتهم فعدي قال
_ أنا بفكر نستغل الأجازة وناخذ لنا يومين في أي مكان حلو كده الغردقه أو شرم عايزين نغير جو إيه رأيك ياأدهم
_والله أنا ما عنديش مانع فكره مش بطالة بس يا ترى الوحش هيوافق؟؟
مازن كشر وكان هيعيط
_هيوافق إيه ده مش بعيد يقطع علينا الأجازة ويخليها يومين بس بدل أسبوع حسرة علينا وعلى حظنا الهباب
عدي وأدهم ضحكوا على هيئه مازن بعدها عدي قال
_ أنا هحاول أقنعه إن شاءالله
مازن
_يا رب ياخويا يسمع من بقك ربنا
الطريق كان طويل كانوا بيتبادلوا سواقه كل واحد مره والباقي ينام
❈-❈-❈
تاني يوم الصبح
كانت منه قاعده بتغني وهي واقفه في المطبخ
_يا صباح الخير يا اللي معانا ياصباح الخير ياللي معانا .. يا حلو صبح يا حلو طل يا حلو صبح نهارنا فل
جت سمر تجري وتكتم بقها وتقول _أشش اسكتي
أخوكي لو سمعك هيطين عشتك
حطت منه إيديها على بقها وقالت بخوف
_يا نهار أسود هو قصي هنا مانزلش الشغل
_ لسه
_يالهوي وقعتك سوده يا قرمط شكلي هتعلق النهاردة
_اه ياختي لسه هنا في أوضته مانزلش.. بس قولي لي صاحيه بدري ومزاجك رايق وعماله بتغني لا وبتعملي الفطار كمان
_مزاجي مايروقش ليه ده أنا النهارده أسعد أيام حياتي
_ممكن أعرف ليه بقى في حاجه حصلت أنا ماعرفهاش
_مازن كلمني وقالي إنه جاي النهارده خلاص أخيراً هينزلوا أجازه
_نهارك إسوح إنتي بتتكلمي مع مازن في الموبايل
_ لا و ربنا ما حصل بس إمبارح لقيته بيكلمني وبيقول إنه نازل أجازه بس و…
_و إيه إيه يابنتي قري و اعترفي
_ بايه ماهو دا اللي حصل بس
_ وربنا لو ما قلتي اللي قاله كله هروح أقول لقصي إنك بتكلمي مازن
_ لا لا تعالي والله ما بكلمه هو بس إمبارح وقال لي إنه هيطلب إيدي من قصي خلال الأجازة دي إن شاءالله
_ اه علشان كده قايمه نشيطه ورايقه وبتغني
_خلاص بقى يا سمر متكسفنيش الله
_طيب أحب أقولك بقى يا حلوه علشان تكوني عارفه وماتتصدميش وقتها إن قصي أخوكي مش هيوافق
_نعم ليه بقى إن شاءالله
_ علشان ببساطه إنتي لسه بتدرسي
_ فيها إيه أنا ما بقاليش غير سنه وأخلص إيه المشكله لما نتخطب السنه دي وأول ما أخلص نتجوز
_والله الكلام دا بقى تروحي تقوليه لقصي أخوكي مش ليا
_ يووه يا سمر ما إنتي عارفه إني مابقدرش أتكلم مع قصي في حاجه دا كفايه بصته اللي ترعب
لوحدها
_ والله بقى إنتي وحظك لو ماوافقش اصبري لما تخلصي ماجتش على السنه الأخيره دي ما إنتي بتتنيلي بتحبي مازن من زمان وهو كمان بيحبك
_ إيه ده هو إحنا مقفوشين قوي كده وباين علينا
_يوووه الكل عارف وإحتمال كمان قصي يكون عارف
_ إيه قصي أخويا عارف ياربي أوري وشي منه فين دلوقتي
ضحكت سمر
_يا بنتي متأكدة إنه عارف ومكبر دماغه كمان وده لأنه متأكد إنه مافيش أي تجاوزات بينكم لولا كدا ما كانش سكت لحد دلوقتي
_ لا طبعاً تجاوزات إيه هو أنا أقدر ده أنا حتى أصلاً مش بعرف أرفع عيني في وش مازن اتكسف قوي وكمان حرام أنا بس ببقى مبسوطه لما بسمع صوته ببقى فرحانه وهو نازل أجازه وبكون مطمنه عليه
_ يا سيدي يا سيدي أيوه يا عم مازن من قدك إوعدنا يارب
❈-❈-❈
صحي قصي من النوم وسحب الكرسي المتحرك وقعد عليه ولسه جاي يخرج من الأوضه لقى مامته في وشه
قالت
_قصي حبيبي إنت صحيت صباح الخير ياحبيبي
_ صباح الخير يا أمي عامله إيه ياست الكل
_ أنا بخير يا حبيبي طول ما إنت بخير
_أول مره تتأخر في النوم كدا
فقلت أجي أطمن عليك
_ لا أنا صاحي من بدري بس كان في إيدي شويه حاجات كده بخلصها
_ تمام يا حبيبي إخواتك جهزوا الفطار هتيجي تفطر معانا
_لا يا ماما أنا هستنى فرقه الأسود نفطر سوا كلنا
_إيه ده بجد أولاد عمك أخذوا أجازه أخيراً
_ اه يا أمي وزمانهم على وصول
_حمد لله على سلامتهم
_ الله يسلمك يا حبيبتي
_ طيب أنا هروح أجهز لهم الفطار ولا هيفطروا في شقتهم فوق
_ما اتفقتش معاهم لسه بس جهزوه لما يوصلوا وهبلغهم نفطر كلنا سوا
_ ماشي يا حبيبي هروح أجهزه حالاً…
❈-❈-❈
منة سمعت صوت كلاكس العربية
فبصت بسرعه من البلكونه علشان تشوف مازن وتطمن عليه
مازن أول ما نزل من العربية بص بعينه لفوق يارب تكون واقفه في البلكونه دي وحشتني قوي ياحلو نور ياحلو طل
منه كانت واقفه ورا الستاره علشان كده مازن ما شافهاش وخاب أمله إنه يشوفها واقفه
_اه ياني مكتوب عليك العذاب يامازن تبقى بنت عمك ومش عارف تشوفها أو تلمحها حتى أخوه مسكه من هدومه
_ إتلم يا مازن إنت ترضاها لأختك لينا يالا
_ يا عم سيبني هو أنا عملت إيه كانت نظرة خاطفة أطمن عليها بس ، بعدين أنا مش بتسلى ياناس أنا عايز أتجوزها قصي يوافق بس وربنا اتجوزها من بكرة … طلي بقا يا قمر حياتي علشان أرتاح
عدي همسله
_ أحسنلك تنزل راسك وتبص قدامك وتمشي على طول من غير ما تتلفت
مازن بلع ريقه
_ يالهوي قصي واقف في البلكونة!!
عدي
_ ويببص علينا يا حلو
_ ياختااي روحت فطيس يامازن مكانش يومك يا مازن
وبعدها رفع إيده وبص ناحية قصي اللي قاعد في البلكونة
_ منور الدنيا كلها يابن عمي.. وحشتنا يابن عمي.
هزله قصى راسه بمعنى إنه يطلع
فمازن أخذها جري على فوق على شقته لتفادي غضب إبن عمه
وصلوا على الشقة
أدهم قال
_ إتفضل يا عدي البيت بيتك نسلم على أهل الدار ونرتاح من المشوار المنيل دا وبعدها ننزل لقصي
ولسه بيلف وشه لقى أخته لينا جريت عليهم وحضنت مازن وهي بتقول بفرحة
_ميزو حبيبي حمدالله على السلامة ياااه أخيراً جيت وحشتني أوي ..
باسها مازن
_القمر بتاعنا ياناس.. عاملة إيه يادلوعة العيلة إنتي
إبتسمت وقالت
_بقيت أحسن لما شوفتكم أكيد
_يااه يا ناس وحشني الوجه الحسن دا قوي
عدي بهدوء
_إزيك يا آنسة لينا
_الحمدلله ياحضرة الظابط ازي حضرتك وحمدالله على سلامتكم
أدهم بص لأخته بغيظ
وحط ايده على شعرها وقال وهو كاتم غيظه
_اهلااااان إزيك يا لينا وبعدها شاور لمازن إنه يدخل مع عدى على أوضتهم
وبعدها بص للينا بغضب وإيده لسه على شعرها
_إيه اللي عملتيه دا ياغبية أنا مش قلت ممنوع تخرجي من أوضتك وعدي معانا إنتي بتفهمي ولا فهمك تقيل
بلعت لينا ريقها بخوف وقالت بحزن
_فاهمة يا أبيه بس إنتوا وحشتوني أوي فمقدرتش أمسك نفسي من إني أستقبلكم على الباب وأسلم عليكم
_لااا الكلام دا لما كنتي لسه عيلة إنما دلوقتي كبرتي وأنا حرجت عليكي تعملي دا حصل ولا لا
وطت راسها في الأرض وقالت بحزن
_حصل يا أبيه أنا آسفة مش هتتكرر تاني وجت تمشي
فنادى عليها خذي تعالي هنا
_نعم يا أبيه
_مش هتسلمي على أدهم حبيبك أنا موحشتكيش ولا إيه قالها وهو بيحضنها
_وحشتيني يا دلوعتنا ووحشني عصبيتي عليكي وزعيقي ليكي كل شوية
ضحكت وقالتيا سلام هو دا بس
باس راسها وقال
_إزاي دا .. دا إنتي أختي حبيبتي ونور عيني اللي جايبلها الهدية اللي نفسها فيها من زمان
نطت من الفرحة واو بجد يا أبيه
_طبعاً هو أنا عندي أعز منك.. هجيبهالك بس أرتاح من المشوار وأروق كدا
_ماشي منتظرة
_اه إسمعي إنزلي اقعدي مع بنات عمك تحت لأن عدي هيقضي الأجازة معانا هنا في الشقة
_ يا سلام يعني إنتوا راجعين علشان تقعدوا مع صاحبكم اللي أصلاً كان معاكم.. وهتسيبوني أنا ماينزل يقعد تحت عند أبيه قصي في شقته اللي قصاد شقة عمو
_ أولاً يا لمضة إنتي عارفة إن قصي مش بيسمح لحد أياً كان هو مين إنه يدخل شقته
ثانياً بقا إحنا هنكون معاكم تحت علطول إنتي ناسية إن معظم وقتنا تحت في بيت عمو
_مم يعني بتطردني بالذوق
_ عليكي نور يلا ياشاطرة من غير مطرود
بصتله لينا بغيظ وفضلت تبرطم
أدهم بصلها وضحك وادعى الصرامة
_مم شايف حد مش عاجبه كلامي
_لا لا هو أنا أقدر أديني نازلة أهو
نزلت وهي بتقول بغيظ
_ يا باي على عدي اللي عاملنا زي فرقع لوز كدا كل أجازة ألاقيه ناطط لنا هو ملوش أهل يسألوا عليه هو إيه أصله دا
أما أدهم فدخل لأمه المطبخ وقال
_ كالعادة ست الكل لازم لما تعرف إننا راجعين نلاقيها ملخومة فالمطبخ بتعملنا أشكال وألوان من أصناف الأكل اللي يرد الروح
_ أدهم حبيبي حمدالله على السلامة يا غالي فين أخوك
_ جوا مع عدي
_ هو عدي جه معاكم طب كويس والله أنا هقوم أسلم عليهم
❈-❈-❈
أما لينا أول ما نزلت تحت لبيت عمها وشافها قصي قال
_ أدهم نزلك علشان عدي معاهم مش كدا
_ اه ياأبيه
_ طب أدخلي البنات جوا ومتشيليش همي إتصرفي ولا كأني موجود
_حاضر يا أبيه
وبعدها رن على أدهم وقال بحدة
_ إنزلي إنت والمعاتيه اللي معاك حالاً
أدهم في نفسه
_ إستر يارب الإجازة كدا انضربت
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية أسود الداخلية)
