رواية أرض الشيخ الفصل الحادي والعشرون 21 بقلم لينا بسيوني
رواية أرض الشيخ الجزء الحادي والعشرون
رواية أرض الشيخ البارت الحادي والعشرون
مدونة كامو
رواية أرض الشيخ الحلقة الحادية والعشرون
عقد فودو ” أرض الشيخ 3″
الحلقة الخامسة والاخيرة بعنوان ” النباش المجهول”
قطب ظهر فجأة قدامنا ، شاور بأيده على أيدينا ورجلنا فظهرت عليهم كلابشات سلسلتنا فى مكاننا.
قطب مد أيده فى جيبه وطلع الخنجر ، قال وهو مبتسم :
منور يا ماجد ليك وحشه .. وكمان جايبلى الزفر معاك !! يما تصدق خوفت !! وايه حبة السحرة التعبانيين اللى جايبهم دول !! كلهم سحرة نص لبه .. يلا خدوا الشر وراحوا…
اتحرك ناحية الزفر مسك رأسه وحط الخنجر عليها.
الزفر قاله :
أنت مجنون يا قطب!!! أنت مش عارف أنا مين وأقدر أعمل فيك أيه !!!
قطب ضرب الزفر على رأسه بظهر الخنجر وقاله :
طظ !!!
ضحكت وقهقهت من الضحك.
قطب بصلى بأستغراب وقالى بعصبية :
بتضحك على أيه!!! .. بتضحك على خيبتك!!! .. على زلقم اللى ضحك عليك تانى!!!
قولتله :
لا بضحك على خيبتك أنت عشان فكرت إنى هأمن لزلقم تانى … السحر اللى على حق والسحرة التقال…
بصيت على السقف وكملت كلامى وقولت :
فوقك بالضبط ..
قطب بص فوقيه وهو مقلق مالقاش حاجة !! فقال بسخرية :
فوقيا فين لامواخذة ؟!!
قولتله :
فوق السجن بالضبط , محسن صاحبى واقف ومعاه باقة من ألمع السحرة …
قطع كلامى وقالى بتشكك :
أنت كداب , ومش قادر تقتنع أنك خسرت , فبتقولى بص العصفورة و مفيش حد ف…
قطعت كلامه وقولتله :
تعرف مين اللى بيقود السحرة اللى فوق ؟ .. يلا حذر فذر ياقطب ؟!!
بصلى بأستغراب … فقولتله :
هبسطهالك … أستاذك ومعلمك..
بصلى بأندهاش أكتر … فضحكت وقولتله :
طيب هحكيلك قصة صغيرة عن ساحر عجوز من الوادى الجديد ,خبط على بابه شاب فى العشرين , الشاب طلب من العجوز يساعده ويخليه يسيطر على الجن اللى سخره بالغلط وكان السبب فى موت عيلته فى مقابل 50 ألف جنيه ياخدهم العجوز من الشاب نظير دروسه فى السحر .
العجوز علم الشاب السحر وعرفه أزاى يسيطر على الجن اللى معاه وكمان مارضاش ياخد ال50 ألف جنية نظير دروسه و أوهم الشاب أنه علمه السحر ببلاش , الشاب فرح ومشى لكنه يعينى ميعرفش أن العجوز أخد منه حاجة مهمة فى وسط ماهو بيعلمه السحر ….
قطب قرب عليا , شدنى من شعرى , حط السكينة على رقبتى وقال :
خد منى أيه ؟!! وعرفت الساحر ده منين ؟!! أنطق يابن ال…
قطب قطع كلامه لما سمع خروشة فوقيه بالضبط وصوت رجلين بتدب على الأرض.
بص فوقه فلاقى تراب بيقع من السقف على وشه ..
مسح التراب اللى وقع على وشه و بان عليه التوتر لما غمض عينه وفتحها لاقى نفسه فى مكانه وماتنقلش.
قولتله :
يعينى تلاقيك دلوقتى بتحاول تهرب ومش عارف .. أخخ تقريبا كده استاذك العجوز بدأ الشغل و عزلك عن الخدمة بتاعتك … مبروك ياقطب أنت بقيت لوحدك ….
سمعنا صوت رجلين بتدب فى السراديب وبتقرب علينا.
سمعت قطب وهو بيبلع ريقه من الخوف , مكنش عارف يعمل أيه !!
شدنى و جرجرجنى وراه بعيد عن الزفر وهو بيقول :
مش أنت اللى تكسبنى يا ماجد!!! ..
فضل يجرجر فيا جوه السراديب ودخلنى فى زنزانة معينة وقفل عليا من جوه …
حط السكينة على رقبتى وفضل واقف مستنى السحرة يوصلوا …
شوية وسمعنا صوت رجلين بتدب على الأرض وبتقرب ناحيتنا.
ظهر محسن قدام الزنزانة وهو ماسك الموبايل وبيتعقب الجى بى أس اللى فى الجاكيت بتاعى وجنبه الزفر اللى فكوه ومعاهم الساحر العجوز وبقيت السحرة …
العجوز قرب من الزنزانة وقال :
أزيك ياد ياقطب؟ أيه القلق اللى أنت عامله ده ؟!! نزل السكينة من على رقبة البيه وليك الأمان لما تنفذ طلبات البهوات .
قطب قاله :
هأأو ..ولو منزلتش هتعملوا أيه ؟ !!!أنتوا اللى تسمعوا الكلام لو عايزين رقبة البيه , أول حاجة تؤمر كل اللى معاك دول يرجعوا لورا ويخرجوا بره السراديب …
العجوز قطع كلام قطب وقال :
أنت هتتشرط ياروح أمك !! أنت اللى فى موقف ضعيف !!
قطب قاله :
هأوو .. طيب شوف دى ..
قطب عدى بالسكينة على رقبتى وجرحها جرح سطحى …
صرخت من الألم فمحسن قال :
بس بس بس … شيل السكينه من على رقبته.؟ هنرجع ورا .
العجوز قال لمحسن :
سيبه يابيه .. ميقدرش يعملها لأنه لو عملها مش هيبقى معاه حاجه يساوم بيها …
محسن قال للعجوز بعصبية :
وأنا لسه هستنا لما يموته .. ده عدى على رقبته بالسكينة !!
قطب قال للعجوز :
أسمع كلام البيه وأرجعوا كلكم .. بس أستنى أنت يا أستاذى … علشان لينا حساب هنخلصه .. حساب تلميذ مع أستاذه .
العجوز بص لمحسن وقاله :
أتفضل أنت يابيه وخد الناس معاك وأستنونا بره على ما أخلص وأجيلك
محسن بص عليا وكان هيقول حاجة , الساحر العجوز قطعه وقال :
أتفضل أنت يابيه وسيبلى أنا الحوار ده … ماتقلقش على ماجد بيه فى رقبتى.
محسن رجع هو والسحره و أتبقى بره القفص الساحر العجوز واللى قال لقطب :
ها مش هنخلص من لعب العيال ده ياقطب ولا أيه ؟!! أنا فكرتك أكبر من كده !!
قطب قاله :
خدت منى أيه لما كنت بتعلمنى السحر ؟!
الساحر بص لقطب بأستغراب , بعدها بصلى وانا تحت سكينته وقال :
ليه كده ياماجد بيه ؟ يعنى تفشى سرى كمان !!! أنا قولتلك ده أخر كارت تقوم تحرقه كده !! طيب هفاجأه أزاى أنا كده ؟!!
قطب بص للساحر بغضب وقاله :
يعنى كلامه طلع صح وخدت منى حاجة ؟!! وأنا اللى فكرتك مرضتش تاخد الفلوس علشان حبتنى !!
العجوز ضحك بسخرية وقال :
حبيتك !!! ليه ؟!! هو أنا أعرفك أصلا .. يابنى حتى لو فيه حد بيحب حد هيسيبله 50 الف جنيه !! ملهاش علاقة .. أنا بس خدت منك كتير فمرضتش أخدهم منك , حسيتها هتبقى طمع .
قطب الفضول جننه وقال بعصبية :
خدت منى أيه يابن الكلب ؟!! أنطق.
قاله :
مخدش حاجة .. كل الحكاية أنى مضيتك على عقد بمحض أرادتك عشان تسيطر على الجن اللى معاك.. بيعتك فيه روحك , زى أى حد جه أتعلم منى السحر ومخدتش منه فلوس ..
عندى دوسيه عقود لارواح كتير من السحرة اللى زيك , بستعملهم فى عقد الصفقات مع الجن القوى أو الشياطين اللى بيطلبوا أرواح بشر فى مقابل الخدمات ومن ناحية تانية بأمن نفسى خاصة أنى علمت واحد أبن حرام زيك قبل كده ورجع علشان يقتلنى !!
المهم أن العقد بينص كمان على أن اى قوى سحر جمعتها و بتمتلكها , سواء بقى جن أو عفاريت وخلافه , تكون تحت طوعى وتصرفى !!
ببساطة أى جن معاك يعتبر معايا وتحت طوعى قبل طوعك.
قطب كان منهار وهو بيسمع كلام العجوز , أتعصب وفضل يشتم ويسب فيه.
العجوز هداه وقاله :
بص ياقطب أنا مش هأذيك , مش بس كده أنا كمان هديك العقد بتاعك بس بشرط ,تسيب البيه وترجعله جنيته اللى أسمها برياس ويادار مادخلك شر .. قولت أيه ؟!!
قطب كان متجمد ومش عارف ياخد قرار , فكر شوية وقال :
أشوف العقد الأول وأتأكد من كلامك ؟
العجوز شاور على عينه وقال :
من عينيا الاتنين ياقطب بيه.
حط أيده فى جيبه وهو بيقول :
أنا كنت عامل حسابى برضه.
العجوز طلع من جلابيته أسطوانة جلد ملفوفة .
قطب شال السكينة من على رقبتى ورفسنى بعيد، قرب من الزنزانة ومد ايده عشان يمسك الاسطوانة من أيد العجوز.
يدوبك مد ايده واتفاجأ فى لمح البصر بأيد العجوز التانية وهى بتلبسه كلابشات حديد.
الكلابشات اتحول لونها للاحمر كأنها بتغلى!!
قطب صرخ بصوت عالى من الألم ووقع على الأرض مغمى عليه.
العجوز مد أيده من ورا القطبان وأخد المفاتيح من جيب قطب , فتح الباب وفك الكلابشات اللى على أيدى ورجلى وحرارنى.
************************************************
“بعد مرور 12 ساعة”
قطب فاق لقى نفسه فى زنزانة ومتكتف بالجنازير , على دراعه الكلابشات اللى مقيده بيها الساحر العجوز.
فتحت باب الزنزانة وأنا بجرجر كرسي ورايا , حطيت الكرسي وقعدت عليه.
قطب بصلى و قالى :
أنت لسه مكسبتش يا ماجد وعمرك ما هتعرف مكان برياس.
قولتله :
مشكلتك يا قطب انك مش قادر تقتنع أنك خلاص خسرت !! البركة فى قرينك اللى عرفنا مكان برياس !!
تليفونى رن ففتحت السبيكر، جالى صوت محسن بيقول :
ايوه يا سطى لقينا الفأر والساحر هيطلع منه برياس.
قولتله :
حبيبى يا محسن هخلص أنا هنا واجيلكم .
قفلت التليفون واخدت نفسى بارتياح وأنا بقول لقطب :
بكرة يوم إعدامك… الحق كفر عن ذنوبك .. تشاو
قومت من على الكرسي، لفيت ظهرى وخرجت من الزنزانة
اترجانى وقال :
أرجوك يا ماجد أنا مش عايز أموت .. أنا همشى.. هختفى خالص ومش هتشوفنى تانى ومستعد أديك أى ضمان تطلبه.
قولتله :
لا يا قطب .. أنت حلال فيك الموت لو سيبتك عايش هبقى بعرض حياة ناس تانيه للخطر .. أنت قنبلة موقوتة .. متقلقش هوصى السحرة اللى هيعدموك .. هوصيهم يوجعوك أوى وأنت بتموت.
قفلت الزنزانة ومشيت ، سمعت صوته وهو بيزعق وبيقول :
هنتقم منك يا ماجد هنتقم منكم كلكم ..
خرجت من عنده وطلعت على مكان برياس.
وصلت هناك لاقيت الساحر العجوز لسه بيحاول يخرجها من الفأر.
قربت من الفأر ( برياس ) وقولتلها :
متقلقيش يا برياس هنخرجك ..وعندى خبر حلو ليكى كمان عشيرتك كلها يعتبر اتحررت و…
الساحر العجوز قاطعنى و قال :
لسه يا بيه متحرروش…موجودين معايا وتحت خدمتى لحد ما تدفع الأول.
قولتله :
متقلقش اللى عايزه هتاخده وزيادة .
قالى :
انا مش قلقان انا بفكرك بس.. وخد بالك حساب الفأر لوحده أديك شايف الموضوع معقد و…
قاطعته وقولتله :
اللى أنت عايزه هتاخده .
قاعدنا فوق ال ١٠ ساعات بنحاول نفك برياس ، فى الأخر الساحر قالى :
مش هينفع لازم اضحية أو جنى تانى يتسكن مكانها .
قولتله :
إذا كان على الأضحية موجودة… قطب… كده كده هنموته أهو يبقى موته بفايدة.
قالى :
لا مش هينفع…. الاضحية لازم تكون مبلغتش الحلم.
فكرت شوية وقولتله:
بقولك أيه .. فى جنى اتنقل فى خدمتك من عند قطب اسمه زلقم؟!
قالى :
القزم ؟!!!
قولتله:
ايوااا هو القزم …موجود ؟!
قالى:
ايوه يا بيه .
قولتله :
حلو اوى .. لبسه فى الفأر وطلعلى برياس .
قالى:
مستغنى عنه يعنى محرروش مع العشيرة ؟!
قولتله :
نعم تحرره!!! … لا طبعا .. حطهولى فى الفأر وهاته .
قالى :
بس ده له حساب تانى أنا كنت محتاج القزم ده..
قاطعته وقولتله :
قولتلك اللى عايزه هتاخده أعمل اللى بقولك عليه .
شوية والساحر قالى أنه سكن زلقم فى الفأر وخرج برياس .
قولت للساحر :
هى فين برياس ..مش سامعها ..ولا شايفها ؟!!
قالى :
هى اتحررت .. بس التواصل معاك بقى دى حاجة ترجعلها ..انا عملت شغلى و..
قطع كلامه لما لاقينا الفأر (زلقم ) بيهرب من وسطنا ،
حاولنا نمسكه معرفناش .
الساحر قال :
أنا خلصت شغلى مش هقعد أدور على فأر!!
قولت لمحسن :
حاسبه .
الساحر أخد عربية محملة فلوس ومشى .
روحت مع محسن على الفيلا ، كنت شارد وبفكر فى برياس اللى متواصلتش معايا .
عذرتها وسيبتها براحتها، أهم حاجة أنها اتحررت ….
تانى يوم صحيت على خبر وحش فى التليفون..
الخبر كان هروب قطب من السجن بعد ماساب رسالة بيقول فيها …
(ماتدوروش عليا ، علشان مادورش عليكم )…
قفلت التليفون ، مددت على السرير ، فردت جسمى وغطت فى النوم
سمعت صوت برياس وأنا نايم بيقول :
شكرا يا ماجد ..شكرا على كل اللى عملته معايا .
قولتلها :
برياس …انتى كويسة ؟!!
قالتلى :
اها انا كويسة ..
قولتلها :
قطب هرب !!
قالتلى:
عرفت ، ماتقلقلش منه خلاص ، قطب رجع ضعيف تانى ومن مصلحته أنه يبعد.
قولتلها:
يلاه فى ستين داهية ، أدينا عرفنا ديته ، خلينا فيكى أنتى طيب … ها يلا نرجع بقى ونعمل عقد جديد؟!
قالتلى :
لا يا ماجد انا مش عايزاك تبقى تابع تانى .. أنت تستاهل أحسن من كده ..أنت اتبهدلت كتير بسببى ..
قولتلها :
وأنا مش هرتاح غير معاكى ..
سكتت شوية وقالت :
ولا انا هرتاح غير معاك ، انا مش هسيبك لو احتاجتنى هتلاقينى ومن غير عقد او تحكمات ، هكشفلك الكنوز وهلازمك من غير عقود.
قولتلها:
ده احسن خبر ده ولا إيه ِ.. وبما انى خلاص مبقتش ماجد بتاع الكتاكيت .. أنا قررت قرار…
قالتلى :
قرار ؟!!
قولتلها :
بصى ياستى أنا قررت أكمل تعليمى وادرس علم المصريات ، هنكتشف مع بعض الكنوز والقبور بس المرة دى مش هنسرقها… المرة دى هكتشفها كعالم ادرسها و أسلمها للحكومة ….
قالتلى بأستغراب :
عالم ؟! وهتسلمها للحكومة !!!
قولتلها:
اها عالم أحسن بكتير من نباش قبور وحرامى ..
قالتلى :
أنت حر ، أنا فى كل الحالات معاك …..
وبالفعل درست بره وجوه مصر، وساعدتنى برياس انى افهم اكتر .
بدأت الشغل الجديد مع برياس.. كانت بتدلنى على الأماكن وكنت بفتحها، بس المرة دى وأنا فاهم قيمة كل مكان بفتحه وقيمة كل حاجة جواه.
كنت ببلغ الشرطة والأعلام عن الأماكن اللى بكتشفها بعد ما أخلص واخفى أى اثر ليا ..
أحتفظت فقط بالقطع المهمة والخطيرة لنفسي ..
عملت متحف صغير فى فيلتى جمعت فيه كل القطع المهمة .
الآراء فى الصحافة والإعلام اختلفت حواليا و اطلقوا عليا اسم…
” النباش المجهول ”
تمت بحمد الله
لقراءة الرواية كاملة اضغط على : (رواية أرض الشيخ)
