رواية أخذني بذنب أبي الفصل الثالث عشر 13 بقلم هدير مصطفى
رواية أخذني بذنب أبي الجزء الثالث عشر
رواية أخذني بذنب أبي البارت الثالث عشر
رواية أخذني بذنب أبي الحلقة الثالثة عشر
عبدالعزيز :مايهمنيش في شي … ده جراري الاخير … يا يتجوزوا الاربعه يابلاها جواز خالص
(تنهدت هند بأستياء ثم تنفست الصعداء لتحدث والدها بهدوء تام قائله …)
هند :اسمعني بهدوء يابابا … انت مش شايف ان نفس الموقف ده بيتكرر … من 30 سنه فاتوا وفي نفس الاوضه دي انت بلغتني بقرارك اني اتجوز حسين الراوي ولما حاولت اتناقش معاك صرخت في وشي ان ده قرارك الاخير … اكيد يا بابا انت لسه فاكر نتيجة القرار ده كانت ايه .. اني هربت وبعدت عن كل حاجه
(نظر لها عبدالعزيز متسائلآ ليقول لها بهدوء تام….)
عبدالعزيز :عايزه توصلي لايه يا هند
هند :هيبقي شكلكم ايه لما الحادثه دي تتكرر مره تانيه في نفس العيله والعروسه تهرب او العريس يقف وسط الناس يقول انه مش عايز الجوازه دي
عبدالعزيز :والحل ايه يا بتي … انا بعمل كل اللي اجدر عليه عشان اللي حوسل زمان مايتكررش مره تانيه
هند :يابابا طول مافي جوازات بتتقرر بالشكل ده وبتحصل غصب البنات هتفكر في الهرب والرجاله كمان هيفكروا انهم يرفضوا
عبدالعزيز :الجوازه دي لو التغت التار هتجوم بين اخواتك ياهند … وبالذات عبدالسميع لأنه طمعان في العموديه بعد ما شهاب يخلف
هند :ومين ضامن ان شهاب يخلف الولد قبل مجدي …. وبعدين يابابا المهم انت شايف ايه هو الصح وهو فين … وياتري الصح انك تضحي بأتنين عشان مصلحة واحد بس ولا انك تطفى نار وطمع وحقد واحد عشان تنقذ الباقيين كلهم
(هدأ غضب عبدالعزيز وبدأ يفكر بعقلانيه في كلام هند فجلس علي كرسيه ليقول بهدوء تام …)
عبدالعزيز :وحديت الناس
هند :في 60 داهيه كلام الناس قصاد راحة بنت من بناتنا
(امتدت المشاورات بين الاب وابنته طويلآ وهنا حضرت هاجر وهي تحمل صينيه عليها اكواب من العصير لتضعها علي المنضده وتجلس بجانب الفتايات فتلاحظ انهما قد التزما الصمت عند حضورها فتقول …)
هاجر :انتوا كنتوا بتتكلموا في سر ولا ايه
هدير :لا ابدآ … كنا بنتكلم علي الحب وعمايله
هاجر :اها … قولتيلي
رحمه :قوليلنا بقي ايه اخر الحب وعمايله فيكي
هاجر :الحب ده عامل كده زي ….
رحمه/هدير: هااااااا
هاجر :زي…
رحمه/هدير(بنفاذ صبر) :هاااااااا
(مدت هاجر يدها الي احدي اكواب العصير لتتناولها بيدها وتقول …)
هاجر :زي كوباية عصير ساقعه فريش لقيتيها وانتي ماشيه في وسط صحرا وفي عز الحر .. انتي ماتعرفيش هي بتاعة مين بس هتموتي من العطش وقدامك حل من الاتنيين … يا تلحقي نفسك وتشربيها يا تسيبيها لحد غيرك هيجي هو ويشربها … انا بقي لحقت نفسي وشربتها واستمتعت بيها كمان
(ثم ارتشفت كوب العصير خاصتها باستمتاع لتنظر هدير ورحمه بعضهما الي البعض فتقول هدير ..)
هدير :طب افرضى ان الكوبايه دي مش من نصييك
رحمه :صح … انتي كده تبقي اتطفلتي علي حقوق غيرك وخدتيها ليكي بدون اي حق
هاجر :لو مكنتش من نصيبي ماكنتش وصلتلي … وبعدين هي دي الدنيا .. تبقي في ايدك وتقسم لغيرك
رحمه :منطقك غريب اوي … شوفي احنا متربين مع بعض وطول عمرنا سوا اهو بس دي اول مره اسمع منك الكلام ده
هاجر : من يوم ما اتولدنا واحنا سوا يارحمه بس الشاطره فينا اللي اتعلمت من اخطاء التانيه
رحمه :تقصدي ايه
هاجر :بصي يا بنت عمي … مفيش حد غريب مابينا … هدير مننا وعلينا… هتسمحيلي اتكلم
رحمه:اتكلمي بكل صراحه
هاجر:انا وانتي متشابهين جدآ لبعض … حتي في ادق تفاصيل حياتنا … حتي في حبنا … لما رهف بتدخل حياة ابيه هشام كانت زينه بتدخل في حياة مجدي … من هنا بدأ يظهر بيني وبينك اختلاف … انتي استسلمتي وبعدتي عن حياة هشام اكتر ما كنتي بعيده و انا قربت من مجدي ودخلته حياتي اكتر …. انتي فضلتي دراستك وخليتي ابيه هشام اخر اهتماماتك او الاصح بينتي ليه ان هو اخر اهتماماتك وانا بينت لمجدي انه اهم من كل اهتماماتي … انتي كان لما هشام يتصل بيكي ازيك وعامل ايه ولحد هنا وخلص الكلام … انا بقيت احكي لمجدي ادق تفاصيل يومي لدرجة انه كان بيحفظها وكأنه عايش جواها …. والنتيجه قدامك اهي …..
(وهنا ظهروا الشباب الاربع ودلفوا الي حيث تجلس الفتايات بعد الاستئذان و …)
الشباب :السلام عليكم ورحمة الله
الفتايات :وعليكم السلام ورحمة الله وبركاته
(جلسوا الشباب و …)
شهاب :ده محمود صديقي من مصر
البنات :اهلا وسهلا
محمود :اهلا بيكم
شهاب :ودول بنات اخوالي يا محمود
محمود :اتشؤقت بمعرفتكم
(نظر مجدي علي المنضده فتلألأت عيناه عند رؤية اكواب العصير فمد يده قائلآ…)
مجدي :يااااه ومجهزين العصير كمان .. دا الجو حر وانا هموت من العطش
(ثم ارتشقها لتنظر هاجر الي رحمه وهدير وتقول هامسه..)
هاجر :اديكي اتجاهلتي كوباية العصير لحد ما جهه حد غيرك وخطفها من قدام عينيكي
(فقال شهاب لمجدي ..)
شهاب :ايه يا بني قلة الذوق دي مش يمكن الكوبايه الي شربتها دي بتاعة واحده من البنات
مجدي :كانت بتاعة بنت منهم بس خلاص انا جيت وشربتها بقت بتاعتي يعنى
هشام :لو ماكنتش من نصيبه مكنتش فضلت لحد ما جهه وشربها هو
(كانت رحمه تستمع لهم وتفكر بينها وبين نفسها تري ايآ منهم هو الاصح … هي ام هم .. ايهما احق فنظرت لها هدير وابتسمت لها هامسه وهي ترتب علي يديها …)
هدير :انتي الصح صدقيني
(ابتسمت لها رحمه شكرآ علي انها انتشلتها من حيرتها لتهب واقفه وقائله …)
رحمه :عندكوا حق … يمكن نصيبي انا واخويا واحد عشان كده شرب كوبايتي بس مايمنعش ان كل واحد فينا له نصيبه الخاص بيه … انا هدخل اعمل لكم عصير
(توجهت رحمه الي المطبخ تحت انظار هشام الذي كان يراقبها وهنا دق رنين هاتف محمود فقال …)
محمود :طيب بعد اذنكم هروح الجنينه ارد علي المكالمه دي
الجميع :اتفضل خد رحتك
(خرج محمود فنظر مجدي الي هدير مبتسمآ وقال …)
مجدي :طيب … بما ان كل واحد فينا خد نصيبه … ماتيجي نخرج برا شويه
(نظرت هاجر الي هشام متسائله …)
هاجر :ايه رأيك يا ابيه … موافق اخرج مع مجدي
هشام :ماشي بس ما تتأخروش
مجدي :بس كده من عونيا
(اخذ مجدي رحمه وخرجا من المنزل ليظل هشام جالسآ مع هدير وشهاب ليلاحظ الصمت الذي يسيطر عليهم منذ ان اجتمعا فأتقن مراقبتهما ليلاحظ تبادل النظرات بينهم فتنحنح قايلآ …)
هشام :طب انا هسيبكم واروح اساعد رحمه في المطبخ
(لم يجد ردآ منهم فحمل نفسه وتوجه الي المطبخ ليجد رحمه تقطع الفاكهه لتحضير العصير فنظر لها متسائلآ ..)
هشام :تحبي اساعدك في حاجه
رحمه :لا ابدآ … شكرآ ليك
هشام :علي فكره انا بعرف اعمل عصير حلو اوي
رحمه :لو احتجت مساعدتك هقولك
(تغيرت نبرة صوته ليسألها مستفسرآ ..)
هشام :انتي بتتعاملي معايا كده
(تركت رحمه ما بيدها ونظرت لها باستغراب …)
رحمه :كده اللي هو ازاي يعني
هشام :كده اللي هو كده … احنا ممكن نبقي اصدقاء كويسين جدآ علي فكره
رحمه :بس انت عارف ان انا مابكونش صداقات مع شباب
هشام :هو انا بقولك نتصاحب … انا بقولك اصدقاء واخوات
رحمه :اسفه … مهما يكن انت شاب وانا بنت وعلاقتنا ولاد عم وبس
هشام :بس …؟… طب و …..
(قاطعته رحمه قائله …)
رحمه :وحبي ليك … صح … لكل شئ في حياتنا فرصه حتي الحب بيجي في شكل فرصه يا بنستغلها يا بنرميها ورا ضهرنا … وحبي ليك اللي انت عاوز تحوله لصداقه ده كان فرصه وانت رميتها ورا ضهرك …. مش مره واحده لا دا مراااات كتير اوي … فرصه وضاعت عليك
(في هذه الاحيان كانت هدير ماذالت تجلس مقابلة ل شهاب الذي تنحنح قائلآ …)
شهاب :انتي هتفضلي ساكته كده
هدير :معتش فيه كلام يتقال
شهاب :تقدري تيجي معايا نخرج نتمشى سوا شويه
هدير :هتروحني خلاص
(ظن شهاب ان الدقائق ترمي عليها بثقلها فهي تتمني ان تخرج من هذا المنزل بلا عوده فأغمض عيناه بألم قائلآ …)
شهاب :يعني مش عاوزه تخرجي نتمشي وترجع هنا تاني
هدير :وليه لا بس ليه
شهاب :مش يمكن عايز اتكلم معاكي شويه
هدير :وانا موافقه
(خرجت رحمه من المطبخ وهي تحمل الصينيه وعليها اكواب العصير ويتبعها هشام ليتجها الي حيث يجلسون ولكنها لم تجد سوى شهاب وهدير و …)
رحمه :ايه ده .. فين الباقي
شهاب :خرجوا
رحمه :طب والعصير
شهاب:المره الجايه بقي
رحمه :خلاص اشربوا انتوا
شهاب :ما احنا كمان هنخرج دلوقتي … اما نيجي بقي … يلا بينا يا هدير
(نهضت هدير من مجلسها لتسير معه بصعوبه فهي بالكاد تستطيع ان تسير علي قدماها فجلست رحمه لتزفر في ضيق علي تعبها في اعداد العصير الذي قد ذهي هباء … نظر اليها هشام وهي يتسائل في نفسه عن شخصيتها المحيره تلك فلاحظت نظراته لها و …)
رحمه :بتبوصلي كده ليه
هشام :محتار
رحمه :في ايه
هشام :اتغيرتي اوي
رحمه :قصدك عقلت … انت كنت فكرني هقعد في اوضتي مع كام هلبة مناديل وكام اغنيه حزينه ويجيلي اكتئاب بقي واقعد اعيط واندب حظي …لا يا ابن عمي …عيطت كتير لحد مافهمت حكمة ربنا
هشام :حكمة ربنا في ايه
رحمه :في عسى ان تكرهوا شيئآ وهو خيرآ لكم وعسى ان تحبوا شيئآ وهو شرآ لكم
هشام :وانا شر ليكي
رحمه :طبعآ والا ربنا كان يسر طريقنا لبعض
هشام :طب وبعد ما طريقنا لبعض اتعسر
رحمه :اكيد هيتفتح لكل واحد فينا طريق جديد
(وهنا هبطت هند عن الدرج لتتوجهه لهم قائله …)
هند :هديتوا من ناحية بعض ولا لسه
رحمه :ياعمتوا يا حبيبتي انا وهشام ولاد عم ومفيش بينا اي عداوه ولا حاجه بالعكس احنا متفهمين جدآ وفي كل حاجه ماعدا موضوع الجواز
هند :مش عارفه اقولكم ايه بصراحه … الناس كلها بتستني خبر جوازهم بفارغ الصبر وانتوا مستنين خبر انكم تنهوا الجوازه
هشام :ان شاء الله خير يا عمتي
(تنهدت هند بأسى قائله…)
هند :انا اتكلمت مع جدكم ووافق علي فسخ خطوبتكم
هشام :طب و هاجر ومجدي
هند :جوازهم مش هيتأثر بأي شكل من الاشكال بالنسبه لجدكم اما بالنسبه لاباهاتكم فده شئ في ايديكم انتم
(احتضنت هند عمتها وهي مبتسمه وكأن جبلآ قد أزيل عن قلبها فقالت .. )
رحمه :تسلميلي يا عمتي يا عسل … كنت عارقه ان انتي اللي هتعرفي تنفذي الموضوع ده
هشام :للدرجة دي انا كنت هم علي قلبك
رحمه :ارجوك يا هشام مالوش لزوم الكلام ده بقي … من دلوقتي انت هشام ابن عمى وبس .. واي كلام في الماضي ده… ياريت ننساه عشان نقدر نكمل حياتنا زي اس اتنين ولاد عم طبيعين
(احرج هشام من صد رحمه له فتنحنح قائلآ …)
هشام :طب اسيبكم انا بقي …. بعد اذنكم
هند :اذنك معاك يا حبيبي
(انصرف هشام لتنظر هند لرحمه بعتاب ولوم قائله …)
هند :ليه كده يا رحمه …. بالراحه شويه
رحمه :دا احسن حل يا عمتي … اني ادخل في الصدمات كلها ورا بعضها عشان افوق بسرعه … معتش عندي طاقه اتصدم كل شويه واتعذب
هند :عندك حق يابنتي … المهم قوليلي ناويه علي ايه
رحمه :بعد ما القنبله تنفجر واهلنا يعرفوا ان الجوازه اتفركشت وفرح هاجر ومجدي يعدي علي خير … ان شاء الله هحاول اقنع بابا اني اسافر برا مصر عشان اكمل دراستي
هند :ربنا معاكي يا حبيبتي … ان شاء الله جمال هيوافق … هو عقليته منفتحه ومش هيقف قصاد مستقبلك
رحمه :ان شاء الله خير
(البت هند نظرها حولها لتقول مستفسره …)
هند :اومال فين الشباب … وهدير …. هدير راحت فين
رحمه :هدير خرجت مع ابيه شهاب يتمشوا شويه …وهاجر ومجدي طبعآ كذلك …
هند :يارب خير
رحمه :بعد اذنك بقي يا عمتي انا هروح البيت عشان استعد للمناهده مع العيله لما يعرفوا بخبر فركشه الجوازه
هند :ماشي يا حبيبتي .. عايزاكي تكوني قويه وقد قرارك … مش عيزاكي تندمي
رحمه :انتي ليه ماتعرفنيش ياعمتي … بأذن الله هكون اقوى من اي أزمه
(قبلت رحمه رأس عمتها وتركتها وخرجت من المنزل لتذهب في طريقها الي منزلها … اما هنا وقد وصل شهاب مع هدير الي كافيه علي الطريق ليجلسا معآ طويلآ في صمت تام ليكسر شهاب ذلك الصمت قائلآ …)
شهاب :اللي يسمع كلمه الصعيد مايفكرش انه مكان متحضر كده … مطاعم وكافيهات وفنادق كمان
(نظرت له هدير قائله ..)
هدير :عندك ايه عايز تقوله وعشانه جبتني هنا
(أبتسم شهاب لها لاول مره قائلآ …)
شهاب :بخلق لحظات مناسبه بينا عشان نفتكر بعض بيها بعدين
(نظرت له هدير بتعجب من تصرفاته الغريبه التي تشوش عقلها وقالت باستفسار …)
هدير :هو فيه ايه ياشهاب
شهاب :ايه رأيك نخلي القعده الأخيره دي تكون قاعدة صراحه وكل واحد فينا يحكى اللي في قلبه للتاني حتي لو كان كره
هدير :وليه نزود الجرح في قلوب بعض …انا عارفه و متأكده انك بتحبني … وانت عارف ومتأكد اني …
(صمتت هدير قبل ان تنطق بها خجلآ منه ولكن نظرات حبه لها جعلتها تثق بنفسها ولينطق بها هو و …)
شهاب :انك بتحبيني
(ازداد خجلها لتخفض رأسها للأسفل ليردف قائلآ بهدوء بعد ان تنهد بألم…)
شهاب :احنا الاتنين بنحب بعض وده حاجه معروفه بس السؤال هنا احنا لو كملنا حياتنا سوا هنقدر نحافظ علي بعض …
هدير :تقصد ايه
شهاب :هدير …ركزي معايا … انا بحبك … ويمكن اكتر من ما تتوقعي بس الحب ده محكوم عليه انه يموت من لحظة ما اتولد … حاولت كتير اسامح وانسى عشانك بس ما قدرتش .. وفي نفس الوقت خايف من اجتماعنا سوا … لاني مش هستحمل اني اجرحك في يوم ولو عن طريق الصدفه .. مهما كان انا انسان ومفيش انسان معصوم من الغلط وانا وانتي مش حمل اني اغلط في حقك واجرحك
(ترددت هدير كثيرآ قبل ان تكشف عما يدور في عقلها واخيرآ تحدثت قائله …)
هدير :وانت شايف ان الفراق اللي انت اخترته ده مش هيجرحني
شهاب :مش هيجرحك انتي بس … الفراق ده هيجرحني انا كمان … ويمكن اكتر منك كمان بس جرح واحد افضل من الف جرح يتكرر في كل يوم وكل دقيقه وكل لحظه بنقضيها سوا
(ابتلعت هدير ريقها واغمضت عيناها لتأثر فيهما دموعها ثم اردفت قائله بضعف …)
هدير :انت صح … عندك حق … لما يكون جرح واحد ووجع واحد احسن من جراح كتير بتتكرر
شهاب :بس ده مايمنعش اننا ممكن نفتكر بعض بالخير ولو احتجتي لاي حاجه في اي وقت ماتتردديش للحظه انك تكلميني … واوعدك اني هكون واقف جمبك وفي ضهرك في لمح البصر
(ابتسمت هدير بسخريه قائله …)
هدير :وانا اوعدك اني لو احتجت لاي شئ انت هتكون آخر واحد في الدنيا دي ممكن اني الجأ ليه
(هنا كانت هند تجلس في انتظار هدير وشهاب وهي تتسائل تري ماذا يدور بينهم الان والي اي مدى امتد الحديث بينهم دلف اليها محمود وجلس بجانبها قائلآ …)
محمود :مالك يا امي زعلانه ليه
هند :شهاب وهدير خرجوا مع بعض
محمود :طب وايه المشكله يعني
هند :خايفه حد فيهم يوجع التاني بكلامه او تصرفاته
محمود :مش يمكن العكس يحصل ويرجعوا وكل واحد فيهم معترف باللي في قلبه للتاني
هند :ياريت يا محمود … انا قلبي وجعني معاهم … المشكله ان كل واحد فيهم بيكابر علي قلبه
محمود :معلش الموقف اللي بينهم صعب
ليهبط عبدالعزيز عن الدرج وينضم اليهم ويجلس بجانب ابنته و …)
هند :خير يا بابا نزلت ليه.. مش حضرتك قولت انك هتنام شويه
عبدالعزيز :انا اتحدت مع جمال وعبدالسميع ومراتتهم وعيالهم وكلياتهم جايين ولدك انتي كمان فين
هند :هو خرج يتمشى شويه وزمانه جاي
عبدالعزيز :كلميه علي التليفون خليه يجي
هند :بعد ازنك يا محمود كلمه و استعجله
محمود :حاضر هكلمه حالآ
(اخذ محمود هاتفه وخرج من المنزل لأجراء المكالمه لتهبط زينه عن السلالم وتتجه لهم و …)
زينه :جدو حبيبي انت عامل ايه
عبدالعزيز :زين والله
زينه :طب الحمدلله انك بخير هروح اعملك بقي احلا غدا من ايديا دي
عبدالعزيز :لاه … ماتعبيش نفسك انا معنديش نفس للوكل … المهم روحي اجعدي في بيت عمك عبد السميع كام يوم اكده
(شعرت زينه ان عهدها قد ولا وام يعد لها مكان بهذا المنزل فتصنعت الحزن وقالت …)
زينه :ليه بس كده يا جدو انا زعلتك في حاجه
عبدالسميع :لاه يابتي .. الحكايه مش اكده .. بس فيه شاب يبجي صاحب شهاب جاي يجعد كام ويوم اهنه ومايصحش تجعدي اهنه وفيه جدع غريب في البيت
زينه :مدام انت شايف كده يا جدي … انا تحت امرك … هطلع احط شوية حاجات ليه في شنطه صغيره اخدها معايا
(ثم صعدت زينه الي غرفتها والغضب يسيطر عليها ويملأ قلبها ….بعد دقائق كان محمود قد انهي مكالمته مع شهاب وكاد ان يعود ادراجه ليجد هشام مع رجل وأمرأه يدلفان الي المنزل فأيقن ان هذه هي عائلته فقال في نفسه ان هءه جلسه عائليه ويجب عليه الا يحضرها ففضل البقاء في الحديقه … دلف هشام وعبدالسميع ورئيفه و …)
عبدالسميع :خير يا بوي طلبتنا نيجي اهنه ليه
عبدالعزيز :اجعد يا ولدي
(نظر عبدالسميع لهند مشيرآ اليها قائلآ …)
عبدالسميع :انا ماهجعدش في جاعه واحده معها
(نظر له والده بنفاذ صبر ليحاول ان يمتص غضبه قائلآ …)
عبدالعزيز :وانا جولتلك اجعد يبجي تجعد وتبطل رط كتير
(جلس عبدالسميع والغضب يملأه لتجلس رئيفه بجانبه وهي تتسائل في نفسها عن سبب هذا الاجتماع الطارق فأكبر مخاوفها الان هي ان يطالبهم عبدالسميع بنصيب هند من الاموال التي وزعت عليهم اما هشام فجلس بصمت تام فهو يعلم جيدآ ما سيحدث بعد دقائق ليدلف اليهم جمال وساميه ورحمه بعد لحظات فيلقون التحيه ويجلسون هم ايضآ في انتظار تفجير القنبله فيتبعهم دخول مجدي وهاجر ومن ثم شهاب وهدير ليعج المنزل بوجودهم ولكن كان الصمت هو سيد الموقف ولكنه كان صمت ظاهريآ فقط فكل منهم كان بداخله صراع من التساؤلات والاستفسارات ليكسر ذلك الصمت عبدالعزيز الذي قال …)
عبدالعزيز : اظن اكده ان الكل اهنه
هند :ايوه يا بابا الكل موجود
عبدالعزيز :خلونا نبدأ حديتنا بالصلاة علي النبى
الجميع :اللهم صل وسلم وبارك علي سيدنا محمد
عبدالعزيز :دلوجت فيه حاجه عايز اجولكوا عليها
جمال :اتكلم يابوي فيه حاجه ولا ايه … تكونش تعبان
عالعزيز :لا يا ولدي انا بخير والحمدلله … الموضع يخص جواز هشام ورحمه … انا جعدت معاهم ولجيتهم مش عايزين يتجزوزا … عشان اكده انا بجول بلاها جواز غصب لجل ما يعذبوش بعض وحياتهم سوا تنتهي بالطلاج
(استمع الجميع الي كلامه لتسيطر عليهم من حالة الصدمه العارمه ليهب عبدالسميع واقفآ ليصرخ قائلآ …)
عبدالسميع :كيف يعني … من ميتى واحنا بناخد برأي العيال … احنا خدنا القرار وماهنرجعش فيه واصل
عبدالعزيز(بغضب شديد) :انت واجف جدامي وبكل بجاحه بتعلي صوتك في وجودي
هند :اهدى يا بابا عبدالسميع اكيد مايقصدش
(نظر لها عبدالسميع بكل حقد قائلآ …)
عبدالسميع :ايوه ايوه … انا اكده فهمت كل حاجه … انتي راجعه بعد 30سنه لجل ما تمغصي علينا حياتنا … وبدأتي بولدي وبوظتي جوازته
(هب شهاب من مجلسه ليصرخ به قائلآ …)
شهاب :انا لحد دلوقتي مراعي انك خالي الكبير
عبدالعزيز :اجعد ياشهاب مالكش صالح انت
شهاب :بس ياجدي ….
عبدالعزيز(مقاطعآ له) :اجعد ياولدي
(انصاع شهاب لأوامر جده وجلس بصمت و…)
عبدالعزيز :وانت كمان اجعد ياعبدالسميع … هند مالهاش صالح بالموضوع ده واصل … انا اللي جعدت مع ولدك هشام ومع رحمه واتحدت معاهم واتوكدت ان حياتهم مع بعض ماهتنفعش … وهما شباب والحياه لسه جدامهم ليه ندفنهم بجوازه ماعيزنهاش
(نظر عبدالسميع الي اخيه جمال متسائلآ …)
عبدالسميع :رأيك ايه في الحديت ده يا اخوي .. هتلغي جواز بتك من ولدي
(تنهد جمال في آسى ورد عليه قائلآ …)
جمال :ولدك عندي زينة الرجال يا عبدالسميع … ولو لفيت الدنيا كلها علي رجلي ماهلاجيش احسن منه … بس هنجول ايه … الجلب ومايريد … وانا ما اديش بتي لواحد جلبه مش ملكه … كيف يعني هتعيش معاه وهو ماهيحسش بيها واصل
عبدالسميع :ايه اللي انت بتجوله ده يا جمال … وايه اللي جد في الموضوع لجل ما تغير رأيك اكده
جمال :ما انغيرش حاجه غير اني جعدت مع بتي واتحدتنا سوا … جالتلي كل حاجه وفهمتني الوضع ايه … لجيتني ماهجبلش لبتي وضع يوجع جلبها
(صمت عبدالسميع لينظر لهم ويفكر في نفسه ان شقيقه جمال يؤيد الغاء زواج ابنته من هشام لهدف واحد فقط الا وهو انه اذا تزوج جمال ابن اخيه قبل ابنه مؤكد انه سينجب اولآ وفي هذه الحاله سيترأس جمال كل شئ وسيمتلك كل زمام الامور وبعد لحظات فجر عبدالسميع قنبلته قائلآ …)
عبدالسميع :لو بتك رحمه ماتجوزتش من ولدي شهاب يبجي ولدك مجدي ماهيتجوزش من بتي هاجر …
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أخذني بذنب أبي)
