رواية أحفاد الطوبجي الفصل الحادي والعشرون 21 بقلم أميرة أسامة
رواية أحفاد الطوبجي الجزء الحادي والعشرون
رواية أحفاد الطوبجي البارت الحادي والعشرون
رواية أحفاد الطوبجي الحلقة الحادية والعشرون
ديماً في مسيره حياتنا بيبقى في لحظه حلوه لازم تمر لحظه بتتحفر جوانا عمرنا ما بننساها مهما طال العمر بنفضل نفتكرها ونبتسم تفاصيلها بتتطبع جوانا لا يمكن تتمحي حتى لو بقت ماضي بتفضل ذكرى جميله كل ما سكينه الحياه بتسرقنا بيرجع طيفها يمر قدام عينينا ونتمنى لو يرجع الزمن ويفضل واقف عند اللحظه دي♥️
بالظبط هو ده كان شعور منذر في الليله دي اتمنى لو الزمن يفضل واقف عند اللحظه دي فرحته كانت كبيره جداً على قلبه متخيلش ابداً انها تيجي بالشكل ده♥️
بعد المشاعر الحلوه اللي مرت على الجميع قعدوا من تاني لكن المرادي قعد منذر وهو مرتاح و متطمن
كاريمان…..طيب يا جماعه بالمناسبه الحلوه دي و جمعتنا مع بعض عايزه اقول كلمتين ممكن
روح….طبعاً ممكن اقعدوا يا ولاد
كاريمان…انا طبعاً مش قادره اعبر عن فرحه قلبي بمنذر وفيروز ولا قادره اعبر عن فرحتي بالمشاعر الصادقه الجميله اللي شيفاها في عيون الكل بس كل اللي اقدر اقوله الحمد لله منذر ده فرحه عمري اول ما عيني شافته أتمنيت كتير افرح بيه واطمن عليه والحمد لله ربنا حققلي امنيتي دي
يمكن الكلام اللي هقوله مش وقته وصدقوني مش عايزه انكد عليكم بس انا لازم اقوله عشان في قلبين ♥️♥️
هنا لازم يطمنوا و يرتاحوا قلب روح وقلب راجح باشا.
يمكن من فتره علاقتي بيكم مكانتش احسن حاجه وعلاقتي بفيروز بالاخص كانت مش حلوه خالص يمكن غلطت في حقها و غلطت في حقكم كمان بس مش عيب اني اقول اني غلطت الغلط اني افضل مستمره و أكابر حقيقي من قلبي بقولها انا كان في ايدي كنز مكنتش حاسه بقيمته اوقات مبنحسش بقيمه الناس اللي في حياتنا غير بعد ما ربنا يحطنا في اختبار قوي ويمكن الاختبار اللي اتحطيت فيه ده كان ابني
واظن اصعب اختبار تمر بيه اي ام لما تتوجـ ـع على ابنها وقتها انا مريت بظروف كتير صعبه واكيد كلكم على علم بيها وجودي في مستشفى الامراض النفسيه بعد صدمتي في مـ ـوت حسام
كان بالنسبالي زي لحظه الإفاقه بعد العمليه اللي هو بتحاول تفهم ايه اللي حصل وانت لسه مش واعي ولا عندك إدراكك كامل بكل حاجه حواليك يمكن انا وقتها الموضوع كان مختلف معايا كنت مصدومه ومش مصدقه ولسه عندي حاله رفض لكل اللي حصل بس كنت حاسه بكل حاجه بتحصل حواليا حتى لما كانوا بيدوني مهدئات عشان انام كنت حاسه كنت بشوف كل موقف حصل في حياتي سواء حلو او وحش وانا نايمه و مع كل وجـ ـع اتوجعه وانا شايفه ابني ميت في حضني كنت بشوف صوره فيروز💔 كأن ربنا قاصد يربط صوره فيروز بوجعي وبيقولي ده ذنبها وقتها قررت اني لاول مره اقف قدام نفسي واقول بعلو حسي اني كنت غلط اني ظلمت و أستقويت كتير وعرفت وقتها ان لا ظـ ـلم بيدوم ولا حتى القوه بتدوم ووقتها فوقت لنفسي لما منذر دخلي في يوم وعيط في حضني وانا تايهه ومش معاه بس كنت سمعاه قاللي انه محتاجني وانه لسه عايش ولو حسام راح فا هو لسه موجود وقتها قررت اني ارجعله واخده في حضني بس كان لازم قبل ما ارجعله ارجع لنفسي وطلبت منه اعمل عمره وطلبت منه كمان قبل ما اعملها اجيلكم واطلب منكم تسامحوني في الحقيقه كنت شاكه انكم ممكن متقبلوش ولو قبلتوا عشان خاطر منذر كنت متوقعه الاقي غضبكم مني باين عليكم
بس اللي لاقيته كان غير كده خالص لقيت حب وتعاطف شوفت كميه سماح مشوفتهاش في حياتي عرفت وقتها اني فعلاً ضيعت من ايدي نعمه كبيره بس خدت عهد على نفسي وشهدت ربنا عليه اني ارجع النعمه دي من تاني ومفرطش فيها ابداً وفعلاً قدرت اعمل كده مـ ـوت حسام على قد ما هو كان كسره وقطمه ظهر ليا على قد ما كان وراه حكمه كبيره من ربنا اوقات ربنا بياخد مننا حاجه وبنزعل عليها وممكن نعترض بس بنكتشف بعد كده ان ربنا مش بيعمل حاجه وحشه
مـ ـوت حسام كان فوقه ليا من الغيامه اللي كانت على عيني و الغشاوه اللي كانت على قلبي كان كشف لوشوش ناس من دمي مكنتش اعرف انهم بالبشاعه دي ربنا خد مني حسام واختي وبنت اختي ورجعلي نفسي اللي كانت تايهه في ظلمه الدنيا قوى علاقتي بمنذر والاهم من كل ده انه رزقني بعيله بقت بجد عيلتي وسندي وضهر لابني يمكن كنتوا موجودين في حياتي وقت ما حسام كان عايش بس مكنتش حاسه بقيمتكم عوضني بالبنت اللي طول عمري بحلم بيها واللي مكنتش عارفه انها جمبي ومش شيفاها فيروز♥️
ابتسمت فيروز بتأثر 🥺
كاريمان….خد مني حسام وعوضني بزيد واخواته اللي ربنا عالم بحبهم ازاي قد منذر ♥️ خد مني كاميليا و عوضني باخت قلبها مش موجود في زمننا ده روح♥️
صدقوني كل حاجه ربنا خدها مني رجعهالي اضعاف ومش بس كده عوضني بالصبر والرضا ♥️
وبقيت حاسه اني صعب اعيش من غيركم وبقيتوا جزء مهم جداً في حياتي انا واثقه انكم عارفين اني اتغيرت كتير بس لازم اطمنكم اكتر عشان ده حقكم يمكن كنت قلقانه انكم ترفضوا منذر عشاني بس حتى دي فاجئتوني بيها وقبلتوا نسبي لتاني مره ودي كبيره اوي عندي عشان كده انا كمان لازم اطمنكم على بنتكم لانه حقكم في حاجه مهمه لازم اقولها ومن فضلكم محدش يقاطعني
اولاً فيروز هعتبرها بتتجوز لاول مره وكل طلباتكم هتتنفذ واكتر من اللي هتطلبوا لان فيروز تستاهل الدنيا كلها
ثانياً وده الاهم انا ليا طلب اتمنى توافقوا عليه وصدقوني لو الطلب ده اترفض منكم او من فيروز انا هحترمه ومش هزعل لانه حقكم.
انا مبقاش ليا حد غير منذر هو اللي فاضلي نفسي اكمل باقي عمري وانا معاه ونفسي افضل عايشه معاه هو وفيروز وفيروز الصغيره🥺♥️
بس لو طلبي ده مستحيل هتقبل رفضكم لاني مقدره خوفكم على فيروز
ولو وافقتوا صدقوني فيروز هتكون في عيني وهتملي عليا حياتي♥️
منذر….بوجـ ـع بتقولي ايه يا امي؟
كاريمان….استنى يا منذر من فضلك
راجح….لحظه بس يا منذر بص لكاريمان انتي ايه اللي بتقوليه ده مين بس اللي هيبعدك عن منذر وفيروز وليه متخيله اني ممكن ارفض وجودك معاهم
كاريمان…..لانه حقك وحق روح وحق فيروز لاني مكانش ليا ذكرى حلوه معاها زمان
راجح….وزمان راح لحاله خلاص منذر ابنك ولايمكن حد يبعده عنك وفيروز كمان بنتك واظن انا مش هقبل كل واحد فيكم يعيش في مكان ومش هينفع تعيشي لوحدك من غيرهم الموضوع ده مفيهوش نقاش يا كاريمان انتي لسه قايله بنفسك احنا بقينا عيله واحده اللي حصل زمان خلص وراح لحاله ومحدش فينا معصوم من الخطأ المهم زي ما قولتي اننا نتعلم من غلطنا ده وانا لو شاكك واحد في الميه ان بنتي مش هتكون مبسوطه مكنتش وافقت لما زيد فاتحني في الموضوع
بس احنا ولاد انهارده وخليني اقولها بصراحه احنا مش هنعيش لولادنا قد ما عيشنا ومبقاش في وقت نعادي بعض
كلنا بنتشعلق في لحظه حلوه مع ولادنا في لمه كلها حب ودفا وراحه وانا واحد من الناس بقدر قيمه الوقت اللي ولادي بيكونوا فيه حواليا وعارف كويس اوي قيمه ان الاب او الام ولادهم يكونوا جمبهم عشان كده مستحيل اطلب منك طلب زي ده
كاريمان….بس انا محتاجه اطمنكم عليها ده حقكم و لازم تضمنوا وانا مستعده لاي ضمان يريح قلبكم على فيروز
راجح…..الضامن هو ربنا يا كريمان وضماني الوحيد شوفته في عين منذر وفي كلامك وفرحتك ودول عندي بالدنيا ولو على حقوق فيروز اللي اتكلمتي عنها صدقيني انا مش عايز اي حاجه فيروز مش محتاجه اي حاجه انتي عارفه ان الدنيا كلها انا اجيبها لحد عندها انا مش عايز اي حاجه غير اني افضل شايف الراحه والامان جوه عينها
وانا واثق ان منذر هيوفرلها طلباتي
كاريمان……طبعاً فيروز هتبقى في عيني وعينه ♥️
راجح….بس انا ليا طلب واحد بس عارف انه ممكن يضايقك بس صدقيني هيكون احسن للكل.
كاريمان…..طبعاً قول كل اللي انت عايزه
راجح…..انا عارف ان المكان اللي بنعيش فيه بيكون لينا فيه ذكريات كتير منقدرش ننساها ولا نقدر نبعد عن المكان بسهوله وبيبقى صعب علينا نسيب المكان اللي عيشنا فيه وووو
قاطعته كاريمان بإبتسامه هاديه
كاريمان…..قبل ما تكمل انا فهمتك وموافقه واول ما نرجع منذر ياخد فيروز وتختار المكان بنفسها واللي هتشاور عليه هنجيبه
راجح….بابتسامه هز راسه برضا سامحيني يا كاريمان عارف ان البيت اكيد ليكي ذكريات فيه وصعب تسيبيه بسهوله بس كمان صدقيني عمر الذكريات الحلوه والذكريات الوحشه ما هيتجمعوا مع بعض هيفضل ديماً اللي حصل قدام عينكم انتوا التلاته
انتي هتتعبي وهتفضلي تايهه بين الذكريات الحلوه والوحشه
منذر مش هيقدر يخلق حياه جديده وهو فاكر اللي حصل قدام عينه
حتى فيروز هيكون صعب عليها ترجع البيت من تاني بعد ما عاشت فيه اخر ايام في ذكرى صعبه
لو على جوزك وحسام هيفضلوا في قلبك مش محتاجه مكان يفكرك بيهم
لكن عشان نبدأ حياه جديده لازم نغير المكان اللي عيشنا فيه ايام صعبه وكل شويه غصب عننا هنفتكرها
كاريمان…..معاك حق وانا موافقه يمكن انا اكتر حد محتاج التغيير ده لان لحد يومنا ده كل حاجة حصلت بشوفها في كل ركن في البيت🥺
راجح…..عارف وزي ما قولتلك التغيير ده مش هيكون بس في صالح بنتي لا هيكون في صالحكم انتوا التلاته بيت
جديد يعني حياه جديده وذكريات جديده هتتولد فيه ♥️ ولا ايه يا منذر
منذر….معاك حق يا عمي وانا عن نفسي موافق والمكان اللي فيروز هتشاور عليه هيتكتب عقده في نفس اليوم♥️
روح….طيب بما انكم وافقتوا على طلب راجح فا ياريت البيت ده يكون قريب مننا زي ما كاريمان قالت احنا بقينا عيله واحده والافضل نكون قريبين من بعض
منذر….وانا كنت هعمل كده يا روح من غير ما تقولي عشان فيروز تكون قريبه منكم وعشان امي انا عارف انها الفتره دي اتعلقت بيكي انتي شخصياً ولما هتكونوا جمب بعض انا هكون متطمن
مراد…..طيب الحمد لله كده اتفقنا على كل حاجه ناقص اهم حاجه يا بطل هنفرح بيكم امته بقى😉😂😂
راجح….انا عن نفسي مليش دعوه بتحديد المعاد دي بتاعت منذر وفيروز
زيد….بضحك لو على منذر انا واثق انه عايز يفرح الوقت😂😂😂
منذر….بضحك بلاش انت 🤨😂😂😂 بصوا طبعاً دي هنحددها انا وفيروز وقت ما هي تكون جاهزه بس الاول خلينا نشوف البيت ويجهز بالطريقه اللي ترضيها وبعد كده نحدد
روح….بالظبط كده جهزوا كل حاجه واول ما تخلصوا كل حاجه حددوا الوقت المناسب ليكم♥️
كاريمان…..ايوه بس منطولش بردوا احنا عايزين نفرح بيكم اول ما نرجع تبدأوا تشوفوا البيت
ياسين….ودي سيبوها عليا😉 انا هجهزلكم كام ڤيلا تكون قريبه مننا وانتوا اختاروا
زيد…..اهو ابو لهب حلها😉
منذر…..😂😂خلاص يبقى ياسين يسهل علينا ويدور معانا
ياسين….ثق فيا بقى انا لو عليا كنت عايز اشوفلكم حتت ارض و نصممها على مزاجنا عشان عيب في حقنا بردوا مهندسين قد الدنيا ونروح ندور على ڤيلا جاهزه بس منذر شكله مستعجل😉😂😂😂😂
منذر …بضحك هتفوق عليا الوقت😂
ياسين…انا نطقت😂😂 مش دي الحقيقه😉
ابتسمت فيروز بإحراج 😍🙈
جلال….طيب انا معلش هقاطع كلامكم الشيق ده وعندي سؤال مهم🥴
منذر….😂😂😂أسأل
جلال….انتوا خلصتوا كلامكم صح
سالم….يبقى زهقت و عايز تخرج😂
جلال….حبيبي اللي بيفهمني ما كفايه رغي يا جدعان ويلا نخرج بقى حرام والله نبقى في الساحل بقالنا يومين ومقضينها في البحر والبيت😭
منذر….😂😂طيب خلاص انت هتعيط يلا يا سيدي عشان نخرج و هسهرك سهره تحلف بيها
جلال….هو ده الكلام احبك وانت رايق😍😍😍😍
روح….طيب مش كان احسن لو خرجت انت وفيروز يعني عشان لو حابين تتكلموا ولا ايه يا حبيبي🙄
راجح….والله براحتهم انا مش معترض
منذر….طيب معلش خلينا انهارده كلنا مع بعض بما ان الكل مبسوط وبكره ابقى اخرج انا وفيروز تمام
راجح…..تمام زي ما تحب بس انا عن نفسي مش خارج انا مليش في السهر اخرجوا انتوا
روح…..وانا كمان وبعدين من رأيي اتكلوا انتوا على الله شباب مع بعض وانا وكاريمان ورباب و داده زينب هنسهر هنا مع بعض براحتنا
كاريمان….وانا موافقه
رباب….رغم ان كلمه شباب مع بعض دي فيها إهانه ليا بس انا كمان موافقه😂
روح….لا مقصدتش احنا بردوا شباب بس خلينا هنا نحكي ونتكلم براحتنا😂😂♥️
رباب….لو كده يبقى موافقه يلا اتفضلوا روحوا انتوا اخرجوا وسيبونا بقى 😂
الشباب كلهم قاموا عشان يخرجوا وقبل ما يخرجوا باركوا تاني لمنذر وفيروز
زهره حالتها النفسيه مكانتش مظبوطه يمكن بتتعامل وبتضحك معاهم وبتفرح معاهم متفاعله مع الكل لكن كان جواها خايف و موجوع عارفه انها غلطت لكن خايفه من المواجهه وعامله حسابها انها هتكون مواجهه قويه هربت منها عشرين سنه لكن خلاص قلبها عارف ان ساعه الصفر بتقرب عينها ديماً على قاسم بتراقب ملامحه لكن بمجرد ما عينه تيجي في عينها بسرعه بتهرب كلامهم بقى قليل جداً يكاد يكون معدوم قلبها كان واجعها اوي💔
بصلها قاسم لقاها قاعده وسرحانه
قاسم …زهره زهره
زهره….هااا نعم
قاسم …يلا قاعده ليه؟
زهره….ااا لا مفيش بس اخرجوا انتوا انا مش عايزه
قاسم…..مش عايزه ايه يلا كلهم مستنين وبعدين عشان منضيعش فرحه منذر وفيروز
زهره…بقلة حيله مفيش مفر من الهروب حاضر.
خرج الشباب كلهم مع بعض ركبوا عربياتهم وعملوا حفله على الطريق لعب بالعربيات السماعات على اخرها مبسوطين لاكبر حد♥️
منذر قاعد جمب فيروز بس كل واحد فيهم باصص جمبه حاسين بالتوتر لسه الوضع بالنسبالهم غريب المفجأه كانت كبيره على منذر مصدوم وكل الكلام ضاع منه وسط المشاعر الجميله اللي حاسس بيها♥️
وصلوا على مكان قدام البحر فيه اغاني ورقص قعدوا كلهم وبدأوا سهرتهم
فضلوا يتكلموا ويهزروا اتجننوا شويه مع الاغاني
قام زيد عشان يشرب السيجار بتاعه وقف على جنب سند ضهره على سور البحر وراه وهما قدامه على البيست عاملين قلبان ومش سايبين منذر
قدر منذر بصعوبه يبعد عنهم لمح زيد من بعيد واقف وعلى وشه ابتسامه هاديه وجميله كلها حب
ابتسم منذر وراح عليه
منذر….واقف بعيد ليه
زيد….بتفرج عليك😉
منذر….بإبتسامه بتتفرج عليا🤨
زيد….اه اول مره اشوفك مبسوط كده
منذر….بحب البركه فيك يا صاحبي
زيد….بحب انا معملتش حاجه يا منذر
منذر….كل ده ومعملتش يا صاحبي انا لو فضلت عمري كله اردلك في الدين ده مش هيوفيك حقك
زيد….دين ايه يا عبيط احنا في بينا الكلام ده
منذر…..بتنهيده طويله بصله عارف انك كنت بتهزر واكيد مش زعلان عشان خبيت عليك بس حتى لو كنت بتتكلم بجد عابزك تسامحني يا زيد صدقني مكنتش اقصد اخبي انت عارف انا عمري ما خبيت عنك اي حاجه
زيد….اولا انا فعلا كنت بهزر و انت صح انت عمرك ما خبيت عني حاجه حتى لما كنت بتسكت كنت ببقى عارف اللي جواك قلوبنا المفتوحه لبعض من واحنا صغيرين يا منذر متفتحتش بالكلام والسمع احنا طول عمرنا لينا لغه وطريقه بنقدر نوصل بيها لبعض
منذر….عارف يا زيد بس اللي مش عارفه انت امته حسيت بيا
زيد…..يااااااه طول عمري بحس بيك يا منذر يمكن انت قدرت تخبي حبك لفيروز عن الكل بس كان صعب تخبيه عليا العيون فضاحه يا صاحبي حتى الكلام اللي مش مفهوم اللي كنت بتفضفض بيه معايا وانت موجوع كنت بقدر افهمه اللي كان جواك كان جوايا عشان كده قدرت احس بيك بسهوله كمان عايز اقولك مكانش ينفع اسمعها منك يا صاحبي بالعكس انا مبسوط انك فضلت مخبي كفايه عليا اني كنت فاهم لان كان هيبقى صعب تيجي تقولي انك بتحب فيروز انا واثق وكمان يمكن وقتها انا مكنتش هبقى مبسوط مش عشان اي حاجه بس اي رد فعل ليا كان ممكن تفهمه غلط كان ممكن تفهم اني خايف على فيروز منك كان ممكن تفكر اني مضايق انك بتحبها وهي متجوزه
اخوك صدقني الموضوع ده كان صعب اسمعه منك انت كمان مكنتش هتبقى مرتاح وطول الوقت كنت هتفضل محرص في كل تصرفاتك وضاغط نفسك وبتحاول طول الوقت تبررلي تصرفاتك وانت عارف اني اكتر حاجه مش بحبها العلاقات اللي بتتبني طول الوقت على تبرير وده مكانش ينفع يكون بينا ابداً
منذر….بحب فعلاً اوقات كتير كنت ببقى نفسي احكيلك واول ما اقعد مع نفسي افكر في كل اللي انت قولته ده واحس اني مش هقدر اتعامل معاك بطبيعيتي لو انت عرفت مكنتش عايز ثقتك فيا تتهز بس صدقني كان غصب عني يا صاحبي مقدرتش اتحكم في قلبي
زيد….من غير ما تقول عارف و انا الوحيد اللي هحس بيك لاني كنت زيك بالظبط في حجات مينفعش تتقال يا منذر مهما كان اللي قدامك ده غالي عليك.
منذر…..بس بعيداً عن كل ده بجد انت فاجئتني لدرجه اني لحد اللحظه دي حاسس ان الكلام تايهه مني ومش عارف انطق وكمل بضحك يا اخي ده انا حاسس اني العروسه مش العريس ومش قادر أبص لأختك😂🙈
زيد….بضحك اه ما انا شايفك ملخوم و متلغبط والكلام رايح منك بص انا لو عليا كنت افضل انت اللي تفتح الموضوع عشان تكون مرتاح اكتر بس انا عارفك يا صاحبي وعارف انك مكنتش هتقدر تفتح الموضوع هتفضل تقول استنى شويه لسه مفيش فرصه
عارف انك طول الفتره اللي فاتت بتفكر ازاي تفتح الموضوع اصلاً خايف ان فيروز ترفض خايف ان محدش يتقبل الموضوع خصوصاً امك صدقني كل الحجات دي انا مريت بيها وفكرت فيها
انا عارف يا منذر ان فتح الموضوع ده كان تقيل وصعب عشان كده مقدرتش أخليك في دوامه تفكيرك دي كتير ولا قدرت اطول عليك وتفضل بعيد عن فيروز اختصرت عليك الطريق عشان العمر بيعدي يا صاحبي وكفايه اوي اللي ضاع
يمكن انا كمان كنت تايهه زيك والموضوع اتفتح من عند ربنا من غير اي تدخل مني وقت ما الباشا فتح الموضوع وحصل اللي حصل لولا اللي حصل ده كان زماني واقف مش عارف ازاي افتح الموضوع
صدقني يا منذر طول السنين اللي كنت مخبي فيها حبي لصبا كانت اهون عليا من بعد ما أيمن اتوفى يمكن يبان الموضوع بقى اسهل والطريق بقى مفتوح بس لأ ده كان أصعب بكتير
طول الوقت كنت بفكر ازاي افتح الموضوع اصلا كنت حامل هم روح لما تعرف طلبي و حامل هم اخواتي وكنت خايف من نظرتهم ليا كنت خايف صبا ترفض وقتها كان قلبي مش هيتحمل وهتبقى الضربه القاضيه ليا الموضوع كان تقيل اوي ومـ ـوت ايمن صدقني مكانش سهل خالص
عشان كده يا صاحبي قولت اختصر عليك اللي انا مريت بيه ♥️
منذر…..ربنا ما يحرمني من وجودك في حياتي يا زيد
زيد….ولا يحرمني منك يا عشره عمري وافضل شايفك مبسوط واه مش عايز تزعل من كلام الباشا بخصوص تغيير البيت صدقني كده احسن ليك خطوه كويسه انا كان نفسي اعملها لاسباب كتير بس الموضوع ده بالنسبالي صعب انت عارف روح طبعاً بس صدقني مش سهل عليك تعدي من قدام اوضه اخوك اللي كانت بتجمعه بمراته اللي هي حبيبتك مش سهل تبقى قاعد وتلمحه في كل مكان كان فيه صعبه يا منذر
منذر….عارف والله يا زيد وعلى فكره من غير ما تقول ولا حتى الباشا يطلب ده انا كنت ناوي لو الموضوع اتفتح اعمل كده خصوصاً ان اخر مره فيروز جات لما امي كانت تعبانه كانت واقفه مرعوبه وباصه على المكان تحت بخـ ـوف
زيد….بإبتسامه لا ودي جبانه خد بالك بتخاف من خيالها😂 صدقني كده احسن للكل
منذر….إن شاء الله هتبقى اول خطوه اعملها بعد ما نرجع
زيد….إن شاء الله يا حبيبي بس ياريت يكون بسرعه بقى عايز افرح بيك
منذر….بحب هفرحك يا صاحبي اطمن♥️
…………..
عند الشباب
جنه…بضحك على فكره انا كنت فاكره لما ادخل معهد التمثيل طول الوقت اللي هدرسه هيكون تمثيل ومشاهد بس طلع في حجات غريبه بتحصل😂🙈
فرح….بضحك جنه بتحكيلي على تدريب معين كده بيعملوا والله وهي بتوصفه موتتني من الضحك😂
جنه….😂😂😂 اه عندنا في حاجه كده بتبقى زي اختبارات تعملها مع نفسك في البيت تقف قدام المرايا تفتح بوئك بطرق معينه تعمل اصوات عبيطه😂😂😂 مره دخلت عليا وانا بحاول اتدرب عليها وقعت من كتر الضحك
هشام….😂😂😂طيب وبتجيب نتيجيه دي
جنه….والله ما عارفه يا هشام ايه لزمتها بس لازم اعملها😂😂😂
امير…انتي عارفه يا جنه ان هشام درس بردوا في معهد التمثيل بس هو قسم ديكور
جنه…بابتسامه وسعاده ايه ده بجد 😳
هشام…..انتي متعرفيش😂
جنه…لا والله ما اعرف
هشام….لا درست وحالياً عندي حاجه خاصه بيا انا وتيم صغير كده عملنا ديكورات كتير لمسارح الفنون الشعبيه وعملت ديكور في المسرح القومي ولحفلات كتير
جنه…انا فاكره انك بتشتغل مع بباك
هشام….وبشتغل كمان مع بابا لاني لازم اساعده بس كمان مقدرتش اتخلى عن الحاجه اللي بحبها وعلى فكره انا عندي واسطه وليا معارف كتير في المجال يعني لو تحبي اتوسطلك🤨 على الاقل ارحمك من الاختبارات العبيطه دي😂
جنه….ياريت😂😂😂😂
فرح….ميار مالك ساكته ليه
ميار….خالص بسمعكم 😍
جلال….بضحك تلاقيها جاعت😂😂
ميار…بضحكه بسيطه انا لا والله وبعدين احنا لحقنا نجوع ولا انت اللي جعان يا طفس وبتلزقها فيا😂
جلال….صراحه انا جوعت😂😂 بس عايز اكل حاجه حلوه😍
فرح….انا نفسي في التشيز كيك😍
امير….بصوت واطي اجيبلك يا قلبي
جلال….وجـ ـع في قلبك ياض احترمني انا اخوها😏
ضحكت فرح بإحراج
امير…..اتنيل وبعدين انت رامي ودنك ليه🤨
جلال….انت اللي قاعد جنبي المهم ايه ناكل تشيز كيك كلنا يلا انا عازمكم عشان خاطر عيون منذر وفيروز😉
جنه….طيب يلا بسرعه بقى عشان انا كمان عايزه😂😂 هروح اشوف مامي وبابي وارخم عليهم شويه تكون طلبت
جلال…اشطا
قامت جنه وراحت عند قاسم وزهره
قعدت جمب قاسم ورفعت ايده وحطتها على كتفها
جنه….العصافير قاعدين ساكتين ليه😉
قاسم….بابتسامه حب اه انتي جايه ترخمي علينا بقى على فكره انا ممكن ارخم انا كمان😉
جنه….ياسلام انت تعمل اللي انت عايزه بس هترخم عليا ليه انا مش قاعده ساكته رغايه كالعاده😂
قاسم….ماهي دي المشكله انك مش قاعده ساكته وكمان ملاحظ حاجه كده🤨
جنه….رفعت وشها وبصتله بحب حاجه ايه دي بقى يا سي بابي🤨
قاسم…..بابتسامه خبيثه بص على هاشم يعني حاسس كده انك انتي وسي هاشم كلامكم كتير🤨
ارتبكت جنه وابتسمت بإحراج
جنه…ااا انا لا خالص عادي يعني وبعدين كلنا صحاب ثم انت تعرف عني كده يا قاسم يا طوبجي🤨🙄
قاسم….يابنت قاااسم😉
ضحكت جنه بحب وحضنت قاسم
ابتسمت زهره ليهم بحب
زهره….ينفع كده اديك كسفتها♥️
قاسم….هي عارفه اني مقدرش وبعدين احنا صحاب صح يا جنه
جنه….صح يا بابي بس على فكره مش اللي في بالك يعني كل الحكايه اني اول مره اعرف انه درس في معهد التمثيل هو كمان قسم ديكور فا كنا بنتكلم
قاسم…..ايوه بس ميمنعش ان وسط الكلام اللي مكنتش سامعه ده شايف قلوب في عيون بنتي اول مره اشوفها
ضحكت جنه وسكتت♥️🙈
قاسم بحب حضنها وباسها من راسها وضمها ليه وهو ساند دقنه على راسها
فضلت جنه في حضنه شويه وبعدين خرجت بسرعه
جنه….صحيح كنت هتنسييني انا جايه ليه؟
قاسم….ايه جايه ليه ؟
بصتلهم وسكتت ثواني جنه كانت حاسه ان في حاجه بينهم لاول مره تشوفهم ديما ساكتين عيونهم فيها حزن غريب مش متعوده تشوفهم كده حتى وهي قاعده مع الشباب عينها كانت عليهم من بعيد الاتنين قاعدين ساكتين
قاسم…ايه سكتي ليه ولا نسيتي😉
ابتسمت جنه وبعدين اتكلمت
جنه….لا منستش بس بصراحه مش عارفه ينفع اسألكم السؤال اللي في بالي ده ولا لأ؟
قاسم….سؤال ايه وبعدين من امته بتسألي ايه اللي ينفع وايه اللي مينفعش اللي في قلبك قوليه يا جنه
جنه….بصراحه انا حاسه ان فيكم حاجه لأول مره اشوفكم ساكتين مش بتتكلموا في حاجه غريبه حتى عيونكم فيها حزن مش فهماه يمكن مش من حقي أسأل بس لو في بينكم زعل لأي سبب
انا مش عندي فضول اعرف لان دي حاجه خاصه بيكم ومينفعش اعرفها بس كمان انا مش بحب اشوفكم كده طول عمري بشوفكم مبسوطين وحبكم باين في عينكم حتى لو مش بتتكلموا
بلمح عيونكم فيها نظره حلوه بشوفك انت ومامي ديماً قريبين من بعض بس بقالي فتره شيفاكم فيكم حاجه غريبه
كلامها كان صدمه على قاسم وزهره الاتنين سكتوا شويه محدش فيهم عارف يقول ايه💔
جنه….انا اسفه اني بدخل بينكم والله بس مش هاين عليا اشوفكم كده وبيتهيألي ده حقي انتوا عودتوني من صغري ان علاقتي بيكم تكون فيها صراحه وطول عمري بحس اننا صحاب عشان كده صعب اشوف في تغيير واسكت
قاسم…بإبتسامه حزينه حاول على قد ما يقدر يخفيها طبعاً يا جنه وانا مش مضايق انك بتدخلي بس لازم تعرفي ان كل اللي انتي حاسه بيه ده مش صح انا ومامي زي الفل مفيش بينا اي حاجه كل الحكايه اننا مش بنحب الدوشه وانتي عارفه ولو على مامي انتي عارفه ان عُدي تاعبها
زهره….بحب بابي معاه حق يا جنه احنا كويسين جداً وبالعكس مبسوطين بقالنا كتير مسافرناش مع بعض بسبب ظروف الشغل بس انا فعلاً مرهقه من السفر والخروج والبحر بس مفيش حاجه تاني
جنه….بحب طيب الحمد لله ودي اهم حاجه عندي ومحدش يزعل اني اتدخلت بس انا بحب اشوفكم ديماً مع بعض وحتى التعب والارهاق اللي مخليني شايفه انكم بعيد عن بعض مش حابه ابداً اشوفه مفرق بينكم عشان انا بكون مطمنه وانا شيفاكم ديماً ماسكين في ايد بعض ومبسوطين
الاتنين بصولها بابتسامه وجـ ـع💔🥺 ومن غير ما تقصد جنه داست على الجرح
ابتسم قاسم وبص لزهره بوجـ ـع ومن غير تردد مد ايده لزهره
بصتله زهره ومسكت ايده واتفاجئت بقاسم بيشدها لحضنه وبعدين بص لجنه بحب وشدها هي كمان لحضنه
قاسم…مبسوطه كده يا قلب ابوكي كبرتي يا جنه اوي♥️
حضنته جنه بحب وحطت ايدها على ايد زهره بسعاده♥️
وفضل قاسم و زهره في دوامه تفكير ملهاش حدود💔
قام جلال هو ورهف يشوفوا التشيز كيك ويختاروا وبعدين فضلوا يتمشوا مع بعض.
رهف….تعرف اني كنت مضايقه عشانك انهارده اينعم اترعبت عليك لما اختفيت ومكنتش طيقاك لما لاقيتك ظهرت وبتضحك بس بردوا اضايقت لما مشيت وانت متعصب♥️
جلال…لا يا شيخه ده بأماره ايه ما انا رجعت لقيتك بتاكلي ولا سأله فيا😒
رهف…بضحك والله ابداً انا كنت باكل خـ ـوف من آنكل راجح عشان قال للكل يقعد ومحدش يروحلك😂😂
جلال….عنيف اوي الباشا😂😂
رهف…لا والله ده طيب وجميل وكان خايف عليك وصراحه حقه انت مش بتبطل مقالب
جلال….طب والله المرادي انا مظلوم حقيقي مكنتش بعمل مقلب انا الموج فضل يشقلب فيا وببص للقيت نفسي بعيد عنكم كام متر خرجت من المايه وقولت أرجعلكم اتفاجئت بقاسم بينادي وروح كمان فا حبيت أهزر عشان ميخافوش بس جات فوق دماغي وفكروني بعمل مقلب😂😂
رهف….احسن ماهو من كتر المقالب اللي بتعملها مبقاش حد يصدقك😂
جلال….بس سيبك انتي بجد خوفتي عليا🤨
رهف…اه والله العظيم خوفت عليك اوي فضلت واقفه متنحه وايدي على قلبي ولما شوفتك بتضحك كان نفسي احدفك بالرمل بس معرفتش😂
جلال…طيب سؤال لو كان جرالي حاجه كنــ
حطت رهف ايدها على بوئه بسرعه
رهف….لا متكملش بالله عليك بلاش السيره دي الحمد لله ربنا سترها🥺
ابتسم جلال بص بطرف عينه على ايدها اللي علي بوئه ولمح في عينها لمعه دموع.
جلال….طيب ليه الدموع اللي في عينك دي 🤨 لا بقولك ايه انا مش متعود عليكي نكديه
رهف…بإبتسامه مسحت بايدها بسرعه دموعها لا والله انت عارف اني مش نكديه بس الفكره دي وحشه اوي مش بحب اتخيلها على اي حد بحبه
جلال….بس مفيش حد بيهرب من المـ ـوت صح وبعدين متقلقيش عمر الشقي بقي😉
رهف….اكيد محدش بيهرب من المـ ـوت بس فكرة المـ ـوت نفسها صعبه يا جلال يمكن انا الحمد لله مجربتهاش في اي حد من اهلي او اي حد قريب مني اوي بس لما بتخيلها سعات بحس ان قلبي بيوجعني
جلال….اوباااا على كده بقى انا من الناس القريبه😉
ابتسمت رهف بإحراج وبعدت عينها عنه
جلال….انتي يابت بصيلي🤨 وردي عليا
رهف…بإبتسامه بسيطه اسكت بقى متبقاش رخم ويلا نروح نشوف التشيز كيك راح ولا لسه🙄🙈
ضحك جلال ومسكها من كفها قبل ما تمشي
جلال…استني يا هبله هنا تشيز كيك ايه اللي راح هو ليه رجلين😂😂
رهف…بتوتر انا عارفه بقى يلا و خلاص😂🙈
جلال…والله ابداً ده الموضوع كبير ولازم اعرفه🤨🔪
رهف…تعرف ايه يا مجنون انت وبعدين ايه اللي قولته غريب انت اول مره تعرف انك من الناس القريبه مني
جلال….لا مش اول مره بس يمكن اول مره اشوفك متلغبطه وبتحمري زي البنات😉 وشايف دموع مع قلوب ايه صح اللي انا حسيته ده ولا ايه🤨😉
ابتسمت رهف ووشها احمر اكتر حاولت تتلم على نفسها
رهف….على فكره بقى انت فايق وعايز تفوق عليا وانا هسيبك وامشي
سابته رهف وهي قلبها بيدق جامد ومشيت كام خطوه جري وراها جلال وهو بيضحك وبسرعه وقف قدامها
جلال…اقفي هنا انا بكلمك
رهف….نعم🥺
جلال…في كلام وحجات شايفها في عينك وعايز اعرفها
رهف…..ااا انا معنديش حاجه يا جلال
جلال….طيب عيني في عينك كده🤨
رهف….بإبتسامه بس بقى بلاش رخامه وبعدين طريقتك دي بتوترني على فكره محسسني اني عامله عامله هو انا لو اتحطيت في نفس الموقف ده مش هتخاف عليا وتقلق عادي يعني احنا اكيد قريبين من بعض اللي بينا مش يوم ولا اتنين ليه مستغرب اني اخاف عليك واني احس انك مني
جلال…امممم يعني هو كده بس🤨
بصتله رهف ثواني و هي بتحاول تسيطر على دقات قلبها وهزت راسها
جلال…..🤨 طيب ولو قولتلك اني بحبك زي ما انتي بتحبيني وبتخبي هتقولي ايه🤨🤨😉
بصتله رهف بصدمه 😳🥺 سكتت ودموعها بسرعه اتجمعت في عينها ابتسامه جميله اترسمت على شفايفها
جلال…بإبتسامه شقيه 😉 ايه القطه كلت لسانك
رهف….بدموع 🥺 انت قولت ايه؟
جلال…بحب مسك ايدها وبصلها قولت اني بحبك يا رهف وعارف انك بتحبيني صح♥️
ابتسمت رهف وفضلت دموعها تنزل بسعاده♥️🥺
مد جلال ايده مسح دموعها وباس ايدها بحب
جلال…..بلاش الدموع دي عشان خاطري♥️ واوعي تفكري اني عشان بهزر وبضحك و واخد حياتي كلها تهريج فا انا مش بحس خالص والله يا رهف انا بحب الحياه البسيطه اللي مفيهاش تعقيد بحب اعيش اليوم بيومه بتعب لو عيشت في مود النكد ده حتى لو اضايقت بسرعه بخرج نفسي من الحاله دي يمكن اللي حصل الصبح ضايقني فجأه الكل اتقلب عليا عارف ان ده من حبهم وخوفهم عليا بس اضايقت لاني عمري ما هفكر اعمل فيهم مقلب يخوفهم ويوجعهم يعني صدقيني انا عندي مشاعر بردوا وكنت حاسس بيكي يا رهف عارف انك بتحبيني وعارف انك حاسه بحبي ليكي عارفه لما شوفتك يوم فرح نادر ومريم وفضلت ساكت انا كنت مصدوم لان قبلها كنت بكلمك ومقولتيش اتصدمت وفرحت وقلبي كان متلغبط مكنتش عارف اقول حاجه تعبر عن فرحتي واول ما اتلميت على نفسي مسكتك في ايدي وفضلت معاكي طول الفرح كتير اوي يا رهف لما كنا بنفضل نتكلم ونرغي بالساعات وانتي مسافره كنت ببقى عايز اقولك بس مرضتش كنت مستني اشوفك وترجعي عشان اقولها وانتي قدامي واللي شجعني اقولها اكتر اني عرفت انك خلاص مش مسافره تاني
رهف…يعني لو كنت مسافره تاني مكنتش قولتها🥺♥️
جلال…لا مش كده بس قولت ان ده شجعني اكتر اكيد كنت هقولها بس كنت خايف مقدرش اتحمل انك بعدتي عني بعد ما اعترفتلك بحبي لكن الوقت انتي معايا وحتى بعد ما عرفتي اني بحبك هتفضلي جنبي يا رهف
رهف….انا كمان كنت عارفه انك بتحبني بس كنت خايفه استنى كتير لحد ما تقولها عشان طول عمري عارفه انك ملكش في الارتباط
جلال….يمكن ده حقيقي بس معاكي لا يا رهف انا بس كنت مستني الفرصه المناسبه واظن هي جات خلاص ومش هسمحلك تبعدي عني تاني ابداً
رهف…بدموع بحبك يا جلال🥺
جلال….بابتسامه حب وانا كمان بحبك يا قلب جلال😉♥️
…………….
جات مكالمه لمراد من صاحبه اللي في امريكا رد بسرعه عليه.
فضل ساكت و بيسمع ومش بيقول اي حاجه كان مصدوم وبعد صمت دام دقيقتين بدأ يرد عليه بكلام قلق تقى وداوود وليلى اللي كانوا جمبه
قفل مراد المكالمه وكان باين عليه الحزن
تقى….مراد في حاجه؟ مالك؟
داوود….في ايه يا مراد خير المكالمه دي بخصوص فاطيما صح
مراد….بحزن للأسف عرفت الوقت من صاحبي اللي وصيته يفضل مع فاطيما ان والدها ووالدتها اتوفوا لقوهم امبارح
و اتدفنوا كمان💔 قالي ان اخوها مختفي و دوروا عليه كتير مكانش ليه اي اثر بس لسه من ساعه بس جالهم مكالمه بمواصفاته وراحوا شافوا واتعرفوا عليه طلع هو و لسه عايش بس للأسف رجله اتصابت وعمل عمليه من كام يوم حالته وحشه جداً قالي انه مش بيتكلم ومصدوم وغالباً هو شاف والده ووالدته ماتوا قدام عينه💔
داوود….لا إله الا الله ربنا يرحمهم البنت دي حالتها عامله ايه الوقت
ليلى….اكيد متدمره طبعاً مش سهل عليها خالص انا حاسه بيها🥺
تقى….لا حول ولا قوة إلا بالله المشكله انها صغيره عشان تمر بتجربة زي دي خصوصاً انهم اتدفنوا في بلد تانيه هتعمل ايه وازاي هتقدر تخفف عن اخوها وهي محتاجه اللي يخفف عنها🥺
مراد….بحزن مش عارف والله صعبه صعبه اوي بجد ربنا يكون في عونها
داوود….اكيد هتعرف امير وهشام
بص مراد من بعيد على امير لقاه بيضحك هو وفرح وبيخطفوا من بعض التشيز كيك ومبسوطين♥️
مراد….بحزن هعرفه بس مش الوقت لما نرجع مش عايز انكد عليه هو و هشام خليهم مبسوطين حتى لو عرف مش هيعرف يعمل حاجه لفاطيما ولا هي هتقدر تكلمه الوقت لانها ملخومه في اللي بيحصل
ليلى…انا كمان رأيي كده خليهم مبسوطين ولما نرجع ربنا يحلها💔
مراد….إن شاء الله
تقى….بس افضل انت متابع معاها او مع صاحبك يا مراد عشان متحسش انها لوحدها.
مراد…اكيد يا تقى ربنا يعوضهم ويصبر قلبهم يارب💔
…………………
صبا….القمر بتاعي مبسوط ♥️
فيروز….اوي يا صبا فوق ما تتخيلي عارفه مكنتش حاسه اني ممكن اتبسط بالشكل ده بس في سؤال نفسي اسالهولك وخايفه تفهميني غلط
صبا….غلط ايه يا عبيطه اسألي طبعاً
فيروز…..لما اتجوزتي زيد حسيتي انك قدرتي تتخطي حبك لايمن او قدرتي تتخطي بسهوله العشره دي متفهميش سؤالي غلط بس انا مضايقه من نفسي وحاسه بالذنب لاني مبسوطه بجد يا صبا وقلبي مبطلش دق حاسه اني طايره من الفرح كأني اول مره ادخل علاقه انا صح ولا غلط
صبا ..بابتسامه حب لا مش غلط يا فيروز لو مكنتيش حسيتي بحب منذر ليكي الصادق ده مكنتيش هتبقي مبسوطه وقلبك بيدق مكنتيش هتحسي انك قدرتي تحبيه الراجل لما بيكون حنين يا فيروز بيقدر يخطف قلبك اوعي تصدقي ان اللي بيحب مره ميقدرش يحب تاني لا خالص القلب يقدر يحب مره واتنين وتلاته وعشره
طول ما اللي قدامك حبه ظاهر بجد بيجبرك تحبيه اي ست فينا يا فيروز بتضعف قدام الحب والحنيه وقلبها بيقدر يدق تاني فيروز انتي عيشتي تجربه صعبه وخرجتي منها وانتي مشتته وجود منذر في حياتك وخصوصا بعد ما عرفتي انه بيحبك خلاكي تقدري تشوفيه بنظره تانيه غير الاخ والصاحب واخو جوزك قدرتي تشوفي قلبه من جوه عشان كده قدرتي تحبيه بلاش تحسي بالذنب يا فيروز حبي وعيشي واتبسطتي مش يمكن ده عوض ربنا ليكي ازاي تحسي بالذنب وربنا بنفسه اللي عوضك واه انا قدرت احب زيد لدرجه انا عمري ما توقعتها يمكن يا فيروز هقولك حاجه لاول مره في حياتي اقولها كان يبان ان انا وايمن علاقتنا هاديه وطبيعيه بس احنا مكناش كده يا فيروز كان في بينا مشاكل كتير جداً بس مكنتش اقدر اتكلم عشان روح وخالو كنت بخبي انا كمان عيشت تجربه صعبه صدقيني بس ربنا عوضني احلى عوض في الدنيا يمكن في البدايه كنت متلغبطه زيك بس صدقيني مع الوقت قدرت اتخطى كل ده وانا واثقه انك انتي كمان هتتخطي ده لما تبقي مع منذر♥️
فيروز…براحه يارب يا صبا ♥️
………………
في الشاليه.
رباب….صدقوني كان نفسي الحب ده يدوم اوي🥺 بس انا حاولت كتير ومقدرتش يمكن العيب كان فيا وانا معترفه بس في حجات كتير محدش يعرف عنها حاجه اوقات بتتحاسبي على رد فعلك ومحدش بيقدر يحاسب الفعل عادل كان طيب اوي بس للاسف مشاعره كانت بارده كان بيستفزني ويخرج اسوأ ما فيا كان بخيل في مشاعره واللي جنني انه للاسف مش كده مع مراته التانيه اوقات كنت اسأل نفسي مش يمكن عمره ما حبني زي ما حبها وانا اللي كنت عايشه في وهم افتكر مواقفه معايا أتاكد انه لا عادل كان بيحبني وارجع اللوم نفسي واقول انا اللي ضيعته من ايدي بطريقتي الحاده معاه🥺
روح…..انتوا الاتنين كنتوا غلط يا رباب
للاسف لا الشده والعصبيه بتنفع ولا بخل المشاعر والبرود بينفعوا الاتنين دول لو اجتمعوا لازم تعرفي ان العلاقه مش هتكمل.
كاريمان ..روح معاها حق بس كمان ده مبخلكيش تفضلي تأنبي في نفسك انسي يارباب وعيشي حياتك العمر اللي بيعدي في تعب اعصاب وعدم رضا وراحه مش بيرجع كل حاجه بتروح من عمرنا
رباب….ما انا عايشه وبحاول اه غلطت كتير في حق نفسي بجوازتي دي كلها بس صدقوني عادل عمره ما خرج من قلبي مش قادره احب غيره مش عارفه اعيش من غيره كان هيحصل ايه لو فضلنا في حياه بعض🥺
راجح….بهدوء ده نصيب يا رباب حتى لو كنتوا علاقتكم افضل من كده مكنتوش هتكملوا لان ربنا كاتب ان الطريق بينكم ميكملش بس كمان وسط زحمه الوجـ ـع دي متنسيش ان ربنا رزقك في العلاقه دي بأحلى رزق وهو هشام ربنا يخليهولك شاب زي الفل انسي وعيشي لابنك ولنفسك
رباب…بحاول والله هشام ده احلى حاجه حصلت ليا في الدنيا يمكن تعبته معايا كتير بس هو عارف اني بحبه والله بحاول على قد ما اقدر اخليه ينسى وميزعلش مني
روح….اكيد طبعاً عارف وهو كمان بيحبك ومش زعلان منك وهقولك على سر يفضل بينا انا مش متعوده اخرج سر ابداً بس انا حابه اطمنك هشام اللي طلب مني اكلمك واقرب منك لو مش بيحبك مش هيعمل كده صدقيني
ابتسمت رباب ابتسامه حب ووجـ ـع حبيبي ده والله ربنا ما يحرمني منه ابداً وهو عمل الصح صدقيني ياروح انتي وكاريمان كان ليكم فضل كبير اوي
في التغيير ده كلامكم معايا فوقني وخلاني ارجع للواقع واعرف ان كل اللي كنت بعمله ده مش هيجيب نتيجه وهيتعبني انا وابني بس
روح…بالظبط عشان كده بقولك عيشي حياتك وانسي اتبسطتي وبس عشان انتي تستاهلي تعيشي حياه هاديه ومستقره♥️
رباب…انا بحاول والله بس طالبه منكم طلب متسيبونيش ابداً خلوني ديماً مشغوله بيكم ومعاكم نفسي انسي الوجـ ـع واريح قلبي شويه🥺
روح…مش هنسيبك يا رباب وهنفضل معاكي اكيد وانا واثقه انك هتقدري تتخطي كل ده
كاريمان….اللي قلبها مليان الحب ده كله لازم تكون قويه وانتي قويه يا رباب وهتقدري ♥️ واحنا معاكي مبقاش لينا غير بعض.
رباب…ربنا يخليكم ليا يا حبايبي حقيقي ونعم الاهل والاخوات♥️ وبعدين كملت بإبتسامه يا حرام دي داده زينب نامت
كاريمان….الهواء نيمها صحيها ياروح تروح ترتاح في اوضتها حرام نومتها دي
روح….حاضر ♥️
…………………
خلص يومهم وجه يوم جديد يوم كله نشاط وسعاده خاصتاً على منذر اللي رغم انه سهر ومنامش كويس كان اول واحد يصحى وقرر انه يجهز بنفسه احلى فطار للكل كان عنده طاقه من النشاط غير عاديه وقف يعمل بهدوء
الفطار وهو مبسوط وابتسامته مرسومه على ملامحه جهز لفيروز الفطار اللي هو عارف انها بتحبه كل حاجه جهزت على الرخامه فاضل بس تخرج بره والكل يصحى
وهو واقف مستمتع بالتحضير محسش بروح اللي خرجت من اوضتها ووقفت على باب المطبخ ربعت ايدها وبصتله بحب لف منذر واتفاجئ بيها بصاله بحب♥️
منذر…بإبتسامه جميله و إحراج بسيط معرفتش انام كويس قولت اصحى بقى و اريحكم انهارده من تحضير الفطار
فهمت روح انه متلغبط ابتسمت وفتحت ايدها ليه بحب
ابتسم منذر ومن غير ولا كلمه راح عليها وحضنها♥️♥️
روح….قلة النوم حاجه وحشه اوي بس احلى حاجه لما نومك يطير بسبب انك مبسوط♥️
خرج منذر من حضنها ومسك ايدها بحب واتنهد تنهيده طويله اوي
منذر….اول مره يا روح اكون مبسوط بالشكل ده ديماً كنت بهرب من اي حاجه بالنوم لكن انهارده هربت من النوم اللي كنت ديماً بجري عليه♥️
روح….بحب شاورت عليه بأيدها على قلبه عشان ده هدي و أرتاح و أطمن ووصل للمفتاح بتاعه اقولك على حاجه يا منذر
منذر….قولي ياروح ♥️
روح…..انا فرحانه من قلبي اكتر بكتير ما فرحت بحسام مش عشان بحبك بس طول عمري بحس انك مني ابني بجد يا منذر انا قلبي طاير من الفرحه
منذر….بحب عارف ياروح من غير ما تقولي وانا كمان فرحان بجد كان طريق طويل حاولت احجم نفسي فيه كتير بس متوقعتش ان اخر الطريق اللي كان كله وجـ ـع هيتبدل ويبقى كله فرح لدرجه اني خايف اكون بحلم يا روح
روح….لا مش بتحلم يا منذر ربنا بيحبك واللي ربنا بيحبه لازم يختبره الاول عشان يعرف هو قد مسؤوليه الحب دي ولا لأ وانت كنت قدها انت وزيد عشان كده ربنا عوضكم♥️
منذر….بس سيبك انتي القمر دي اخيراً هتبقى حماتي😉♥️
روح ..بضحكه جميله ياواد يا بكاش😂😂😂♥️
منذر….ربنا يخليكي ليا يا احلى روح في حياتي كلها♥️
روح…ويخليك ليا ويفرح قلبي بيك انت وفيروز♥️
منذر….يلا بقى ساعديني الفطار خلص وعندنا مهمه اكبر اننا نصحيهم
روح…يلا بينا♥️😍
بعد وقت بسيط صحوهم نزلوا كلهم يفطروا الحاله الجميله اللي كان فيها منذر كانت واضحه للكل♥️
فطروا وبعد ما فطروا راحوا على البحر يقضوا يومهم♥️
نزلوا كلهم وفضلت زهره قاعده بره مع الكبار
قاسم كان قاعد جمبها وركز معاها واستغرب.
زهره…..يلا اسمعوا الكلام انا قاعده بيهن انزلوا انتوا اتبسطوا♥️
كلامها كان متوجهه للناني بتاعت عُدي والناني بتاعت فيروز الصغيره
بصت على قاسم لقيته باصصلها
ابتسمت بأرتباك وحاولت تهرب من نظرته
زهره…..حرام من اول ما جينا وهما شايلين الولاد ومريحنا انا كده كده مش نازله المايه والولاد نايمين خليهم ينزلوا يتبسطوا شويه ده حقهم
ابتسم قاسم ليها بهدوء وهز راسه من غير اي تعليق وشرد في البحر وهو بيكلم نفسه
قاسم….ازاي يا زهره القلب اللي مليان حب وحنيه وطيبه يقدر يقسى على اللي منه مش قادر اشوفك حد وحش ولا قادر اعمي عيني عن كل مواقفك الجميله بس كمان موجوع منك اوي 💔🥺
………………
الوقت كان بيعدي الكل مبسوط في المساء خرجوا كلهم لكن المرادي خرج منذر وفيروز لوحدهم ♥️
عدى الوقت بيهم وسهرتهم كانت مميزه محدش فيهم هيقدر ينساها
واخيراً جه وقت الرجوع في صباح اليوم الخامس بدأوا يجمعوا حاجتهم وينزلوها كانت الساعه 11 ركبوا كلهم واتحركوا على القاهره
بص منذر على فيروز كانت واخده في حضنها فيروز الصغيره ابتسم بحب وسرح وافتكر احلى واهم سهره قضاها مع فيروز♥️
فلاش باااااك…..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أحفاد الطوبجي)
