رواية أحفاد البارون الفصل الثاني عشر 12 بقلم إيمان جمال
رواية أحفاد البارون الجزء الثاني عشر
رواية أحفاد البارون البارت الثاني عشر
رواية أحفاد البارون الحلقة الثانية عشر
فهد دخل لليل وهي كانت في الحمام بتاخد دش وقعد يستناها تخرج، ليل كانت عارفة إن فهد تحت وعشان كدا ما أخدتش هدومها كلها وهي داخلة، ليل لبست برنص وكان لحد ركبتها ونشفت شعرها بالفوطة ولفتها عليه وخرجت واتفاجأت بفهد قاعد
ليل إتكسفت أوي وفهد قاعد مكانه مصدوم من جمالها اللي هو مانع نفسه عنه، ليل ماسكة البرنص بإحكام وقاعدة تبص حواليها بتوتر، فهد قام وقف وقرب منها وهي عاوزة تهرب من ادامه
ليل بصوت واطي طالع بالعافية: انت طلعت امتى
فهد بيقرب منها من غير كلام وكأنه أصلا مش سامعها، فهد بعد خصلات شعرها اللي جايا على عنيها وبيقرب أكتر بس الباب خبط
فهد: مين؟
فريدة: انا يافهد فين ليل
فهد بعد عن ليل وبصلها: خدي لبس والبسي جوا
ليل جريت عالدولاب واخدت الهدوم ودخلت الحمام وفهد فتح لعمته: تعالي ياعمتو
فريدة دخلت: ليل فين؟
فهد: في الحمام
فريدة: طب ياحبيبي اصلها اتأخرت وابن عمها مستنيها تحت
فهد بهدوء: ماشي هي هتخرج وهننزل
فريدة: ماشي ياحبيبي انا هروح اصحي البنات
فريدة خرجت وفهد قعد عالسرير وليل لبست هدومها وخرجت، ليل كانت لابسة بيچامة لونها اسود وعليها ورد أبيض
فهد بصلها: انتي هتنزلي كدا؟
ليل بتبص للبسها: وانا مالي كدا؟
فهد: انتي مش شايفة ان دا لبس بيتي
ليل: لا شايفة وبعدين انا مش بارة البيت يعني وعماد على طول متعود انه يشوفني كدا
فهد اتعصب من كلامها ووقف ادامها: ايه مش قادر على بعدك فجاي وراكي
ليل بإستغراب: انت بتقول ايه؟
فهد بغضب: ايه انتي فاكراني مش عارف لا دا انا عارف كل حاجة
ليل بتوتر: عارف ايه؟
فهد بعصبية وغضب: عارف انه بيحبك وانتي كمان بتحبيه
ليل لسة هتتكلم بس فريدة خبطت تاني عشان تستعجلهم وفهد سابها ونزل وليل نزلت بعد ماظبطت شعرها وعماد وقف اول ماشافها
عماد: حبيبتي عاملة ايه؟
ليل بصت لفهد اللي قاعد على اخره وبصت لعماد: الحمدلله انت عامل ايه؟
عماد: الحمدلله تمام
أدهم صحي ونزل وشاف عماد تحت وبص على فهد شافه مولع، ادهم قعد جمب فهد وبيدعي ربنا انه يسترها، ليل قاعدة تتكلم مع عماد وبيتكلموا وفهد هيموت ويقوم يخنقه، البنات صحيوا وطبعا هاجر اول ماعرفت ان عماد تحت نزلت جري وقعدت جمب أدهم
أدهم بيتكلم معاها: عملتي ايه في الامتحان؟
هاجر بثقة: كله تمام ماتقلقش
عماد اخد باله ان هاجر قاعدة: عاملة ايه ياهاجر؟
هاجر بهدوء: الحمدلله عامل ايه انت
عماد: الحمدلله تمام
فريدة خرجت من المطبخ: يلا الأكل جاهز
عماد وقف: لا انا همشي انا
البارون: تمشي ازاي انت كدا عاوز تزعلني
مراد ضحك: بلاش تزعل البارون ياعمدة
عماد ضحك: لا خلاص
كلهم اتحركوا للسفرة وليل قعدت جمب عماد وفهد بيغلي وأدهم هيموت ويضحك وأكمل وجاسر ملاحظين دا
فهد قام وبص لأدهم: انت نسيت الاجتماع يلا
ادهم: انا جعان اصبر
مراد: ماهو هتتعشوا هناك
فهد بغضب: يلا حصلني
فهد طلع وفريدة بصت لليل عشان تطلع وراه وفعلا طلعت وراه
فهد بعصبية: انتي ايه اللي طلعك
ليل: عشان اجهزلك هدومك
فهد بغضب: انا ماطلبتش منك حاجة واتفضلي انزلي للباشا اللي تحت عشان ماتتأخريش عليه
ليل بغضب: انت ازاي كدا انا بجد مابقتش عارفة ارضيك بإيه شوية الاقيك كويس وشوية الاقيك وحش انت عاوز ايه
فهد قرب منها ومسك دراعها بعنف: عاوزك تكوني بعيدة عني ياليل تعرفي؟
ليل دموعها نزلت وبصتله: حاضر يافهد
ليل سابته ونزلت تاني بس مارحتش عند السفرة راحت تقعد عند ماكس وبتعيط جامد وماكس مبيحبش حد يعيط وقاعد يهوهو بصوت مرعب وفهد سمع الصوت دا وهو عارف انه سبب ان في حد بيعيط بس مكانش يعرف ان ليل عنده، فهد لبس هدومه ونزل وبيبص حواليه على ليل مش لاقيها
عماد بيسأله: هي ليل فين عاوز اسلم عليها قبل ما امشي
فهد بهدوء: هي نزلت ليكم تاني
فريدة: ماشفنهاش
فهد افتكر صوت ماكس وهنا اتأكد ان ليل هناك وراح عندها وفعلا كانت قاعدة عنده
فهد بغضب: انتي قاعدة هنا وهما بيدوروا عليكي
ليل قامت ومسحت دموعها: حاضر هروح ليهم اهو
ليل ماشية من ادام فهد ومسك ايديها وقفها: امسحي دموعك دي قبل ماتدخلي
ليل بصتله وبعدت ايديه ومشيت من ادامه وعماد ودعها ومشي وهي طلعت اوضتها وفهد لسة ماخرجش مع ادهم
ادهم لفهد: يعني قومتني من عالأكل ولبست وانت واقف
فهد بصله: يلا
فهد خرج هو وأدهم في طريقهم لمكان الإجتماع وطول الطريق ساكت
ادهم بهدوء: مش هتقولي مالك؟
فهد اتكلم: عاوزها تفضل بعيد عني يا ادهم
أدهم: حبيتها؟
فهد: معرفش يا ادهم معرفش كل اللي انا عاوزه تفضل بعيد وبس
أدهم: طب طلاما عاوز كدا ليه اتجوزتها وليه حكمت عليها تكون معاك وهي مش عاوزة وليه منعتها من شغلها
فهد معرفش يرد على أدهم لأن معندوش إجابة وادهم سكت عشان مايعصبش فهد بكلامه، بعد شوية ادهم وفهد وصلوا والكل اول ماشافهم وقف ليهم ماعدا سالم الصياد، وطبعا دول الفهد والأدهم يعني مش حاجة بسيطة
فهد وأدهم قعدوا بكل ثقة وعنيهم في عنين سالم
ماجد(مدير شركة من شركات المناقصة): طبعاً دا شرف ليا إن أكون قاعد مع اكبر شركتين في مصر بس دا مايمنعش إني بنافسكم ولازم اكسب
فهد بهدوء: والله المنافسة حق للجميع بس الشاطر هو اللي يكسب في الآخر
سالم بتحدي: فعلاً الشاطر هو اللي يكسب في الآخر
أدهم بثقة: بس أعتقد ان شركات البارون هي اكبر الشركات ومافيش ليها منافس
سالم بيتكلم بهدوء: كل واحد بيحب يشوف شركته هي الكبيرة بس هنشوف في الآخر
فهد بيسمع ومش بيتكلم ذي مابيقولوا اللي بيعمل مابيتكلمش عن اللي هيعمله، الإجتماع خلص وفهد وادهم مشيوا
ادهم: ناوي على إيه؟
فهد: بكرة هتروح لمكان المخازن التاني اللي محدش يعرفه غيري انا وانت وناجي
أدهم: تمام وبعد كدا؟
فهد: هتظبط كل حاجة وبعد كدا تتفق مع المهندسين وتشوفوا هتقدموا إيه
أدهم: ليه انت مش هتروح الشركة بكرة؟
فهد: لا
ادهم ضحك: دا منظر واحد عاوز مراته تفضل بعيدة عنه
فهد بصله وسكت وادهم ضحك عليه، بعد شوية وصلوا القصر وفهد كأنه مش عاوز ينزل من العربية
أدهم: ايه يا ابني يلا
فهد: ادخل انت وانا هاجي وراك
أدهم دخل وبعد شوية فهد نزل من العربية ودخل وطلع فوق بس ليل مكانتش في الاوضة كانت سهرانة مع البنات وفهد غير هدومه وقعد عالسرير سرحان
ليل قاعدة مع البنات وبيضحكوا وأدهم شافهم قاعدين
هاجر: ايه دا انتوا جيتوا امتى؟
أدهم: دلوقتي
ملك: فين فهد؟
أدهم: طلع أوضته
ليل ماتكلمتش ولا اتحركت من مكانها وأدهم عاوزها تقوم تروح لفهد بس مش عاوز يقولها عشان مايغصبهاش على حاجة، بعد ثواني صباح طلعت تبلغهم ان في حد تحت
صباح: انسة ملك بنت خالة حضرتك تحت
ملك بفرحة: فاطمة؟
صباح: أيوا
ملك نزلت جري والبنات قعدوا يضحكوا عليها
هاجر: عرف فهد يا أدهم
أدهم بص لليل: مراته هتعرفه
ليل بصتله وساكتة
أدهم: روحي ياليل عرفيه
ليل قامت تعرف فهد ودخلت الأوضة وهو كان قاعد بيتفرج عالشاشة
ليل: بنت خالتك تحت
فهد: مين؟
ليل: فاطمة
فهد قام بفرحة: بجد؟
ليل بإستغراب: أه
فهد نزل عشان يشوفها
(فاطمة بنت خالة فهد وملك بيحبوها جداً، هي اصغر من فهد تلات سنين وعلاقتها بفهد قريبة جداً)
فهد بيسلم عليها: أخيرا جيتي
فاطمة ضحكت: معلش انتوا عارفين ماما بقى
ملك: هتقعدي معانا أد إيه
فاطمة: أسبوع
فهد: انتي جيتي بمزاجك بس هتمشي بمزاجي أنا
فاطمة ضحكت: يبقى مش همشي
البنات نزلوا وليل كمان عاوزة تعرف مين فاطمة دي وأول ماليل نزلت فاطمة استغربتها
فاطمة لفهد: مين دي؟
فهد بص لليل ومسك ايديها وقربها من فاطمة: دي ليل مراتي
فاطمة بصتله بغضب: انت عملتها من ورايا
فهد ضحك: يابنتي اعقلي بقى وبلاش جنان
فاطمة بصت لليل ورجعت بصت لفهد: بس انا اول مرة اعرف ان الفهد ذوقه حلو اوي كدا
فهد بثقة: طول عمري يابنتي
فاطمة ضحكت وسلمت على ليل: انا فاطمة بنت خالتهم
ليل سلمت عليها: اهلا بيكي
البنات سلموا على فاطمة وقعدوا سوا وفهد قعد ليل جمبه ومحاوطها بدراعه وأدهم والشباب نزلوا
فهد لإسلام: أخيرا شفتكم
إسلام ضحك: هانت والامتحانات تخلص وتشوفنا على طول
أدهم بيبص لفهد ومبتسم عشان شايف حب فهد باين في عنيه، شوية وليل استأذنت وطلعت وفهد استغرب انها طلعت وعاوز يطلع وراها
فهد لملك: خليهم يحضروا اوضة فاطمة
ملك: حاضر
فهد طلع فوق وليل كانت في البلكونة
فهد: طلعتي ليه؟
ليل بصتله: عشان انت قولتلي اخليني بعيد عنك أحسن فمحبتش تكون مقعدني جمبك غصب عنك عشان بس الرسميات
فهد مكانش بيفكر كدا هو قعدها جمبه عشان هو عاوز كدا بس هي فهمت غلط ذي ماهو باردوا بيفهم غلط
فهد ببرود: طب كويس إنك بتفهمي
ليل بصتله وسكتت وهو دخل وسابها ومتعصب أوي وبيكلم نفسه من غير صوت: والله انا غلطان اني طلعت أصلا
بعد شوية ليل دخلت عشان خلاص هتنام ودي كانت أول ليلة فهد هينام فيها هنا وليل مش عارفة أصلا هتنام جمبه ازاي، فهد كان مخنوق فخرج البلكونة وهي كانت محتاجة تنام فنامت على طول وفهد قعد شوية في البلكونة ودخل ينام وشافها نايمة ذي الملاك ونام جمبها
تاني يوم الصبح كل القصر صحي على صوت صفارة الجيش😂 بسبب فاطمة وليل قامت مفزوعة وفهد كمان وكانت ليل في حضن فهد
ليل: هو في ايه؟
فهد ماسك دماغه من الصداع وبيهز دماغه بيأس: المجنونة بنت خالتي
فهد قام من السرير وطلع البلكونة وبص عالجنينة وشافها واقفة في نص الجنينة وماسكة الصفارة وبتبصله وتضحك
فهد بصلها بغضب ودخل تاني قعد عالسرير وماسك دماغه
ليل بقلق: هو انت كويس؟
فهد: مصدع أوي
ليل قامت: طب اعملك قهوتك
فهد بصلها: ياريت
ليل لسة هتخرج وفهد وقفها
فهد: ليل
ليل بصتله: نعم
فهد: ممكن تلبسي حاجة غير البيچامة
ليل بصتله من غير اي رد بس فتحت الدولاب واخدت منه عبايا بيتي جميلة أوي لونها أسود وعليها نجوم دهبي (ليل بتكون جميلة أوي في اللون دا عشان بشرتها بيضا) ليل لبست العبايا وظبطت شعرها ونزلت تعمل القهوة والكل قاعد تحت بس صاحيين غصب عنهم
أدهم: فهد صحي؟
ليل ضحكت وبصت لفاطمة: اكيد بسبب فاطمة
فاطمة قربت منها واتكلمت بثقة: بصي ياليل ياقلبي طول ما انا هنا هوريكم النجوم في عز الضهر
ليل ضحكت أوي: طب اسيبكم واروح اعمل القهوة لفهد
أدهم ابتسم وطلع لفهد وخبط ودخله
أدهم: طب طلاما صحيت مانزلتش ليه؟
فهد: مصدع والبت دي لو شفتها هخنقها
ادهم برخامة: اممم عشان كدا ليل راحت تعملك قهوة
فهد بصله بغضب: لو هترخم يا ادهم يبقى تنزل احسن
ادهم طلع قعد جمبه عالسرير: يا ابني دا انا بحبك أوي والله
وهما قاعدين سمعوا خربشة عالباب
فهد ضحك: ماكس بقاله شهور ماطلعش فوق
ادهم: قوم افتحله بدل مايهوهو وجدك يفضحنا
فهد قام فتح وماكس دخل 😂 ونام عالأرض
أدهم: فهد هو ماله؟
فهد: مش عارف بس اعتقد انه خايف
أدهم: اممم بس من امتى وهو بيخاف
فهد: مش عارف
فهد قرب من ماكس بس هو فضل نايم
ادهم بقلق: تفتكر تعبان؟
فهد: انا لسة عامله الفحوصات وكويس الحمدلله
ليل دخلت بالقهوة واول ما ماكس شافها جري عليها وهي قعدت تضحك
ادهم قام من عالسرير وبص لفهد: اعتقد انه كان بيدور على ليل
ليل بإستغراب: عليا؟!
أدهم: ايوا والدليل على كدا انه طلع هنا وهو بقاله شهور ماطلعش فوق وأول ماشافك جري عليكي، يلا انا رايح البس عشان اروح الشركة
أدهم خرج وفهد أخد القهوة من ليل وقعد يشربها
ليل: فهد
فهد بصلها من غير كلام
ليل: أنا عاوزة انزل الشغل
فهد: لا
ليل: والنبي يافهد
فهد: أنا قولت لا
ليل زعلت وقعدت ساكتة وفهد بيشرب قهوته وخرج البلكونة وهي قاعدة مخنوقة ونزلت للبنات تقعد معاهم تاني واتجمعوا عالفطار بس المرادي فاطرين عالأرض وفهد نزل شاف المنظر
فهد ضحك: بطلي جنان بقى
فاطمة: انت تسكت خالص انت واختك بقى هي تتخطب وانت تتجوز وانا آخر من يعلم
ملك ضحكت: والله يابنتي كل حاجة جات بسرعة وبعدين فهد مكانش عامل فرح
فهد بص على ليل اللي قاعدة زعلانة ودا باين عليها وراح قعد جمبها عالأرض
فهد لفاطمة: ابقي احضري فرح ملك بقى
آيه: فرحي انا وملك ان شاء الله
ادهم كان نازل وسمع كلام آيه: أيوا اللي هو فرحي انا كمان
اكمل ضحك: طبعاً مش العريس
البارون نزل مع مراد وشافهم قاعدين عالأرض بيفطروا هو مش بيحب التصرفات دي بس معديها طلاما ملك وفهد راضيين، جاسر كان فوق في اوضته وبيرن على نور اخت ليل وهي ماتعرفش مين صاحب الرقم
نور: مين؟
جاسر: واحد معجب
نور: طب مع السلامة
نور قفلت السكة في وشه وهو قعد يضحك وجه يرن عليها تاني لاقاها عملتله بلوك😂
جاسر: اه يامجنونة
جاسر كمل لبسه ونزل تحت وشافهم قاعدين باردوا عالأرض وضحك: باردوا مافيش فايدة فيكي
فاطمة: يا ابني انا هفضل كدا
جاسر لفهد: انت مش ناوي تروح الشركة ولا إيه؟
فهد: لا انتوا هتكونوا مكاني
أكمل غمزله😉: ودا من امتى
فهد بغضب: اتلم عالصبح
أكمل ضحك: ماشي حاضر
اكمل بص لملك: الهوانم اللي عندهم امتحانات
ملك ضحكت: الامتحان بعد بكرة
اكمل: باردوا تقومي تذاكري
فهد: يلا ياحبيبي على الشركة ملكش دعوة
اكمل بص لملك واتكلم: مش هعيد كلامي تاني
فهد بغضب: هو انا مش قولتلك عالشركة
أكمل: ماشي يافهد
اكمل خرج وجاسر خرج وراه وباردوا قاعد يرن على نور بس عاملة البلوك باردوا
اكمل: في ايه مالك؟
جاسر: نور عملتلي بلوك
أكمل ضحك: ليه؟
جاسر حكاله اللي حصل واكمل بيضحك: يخربيتك جنانك ياجاسر ماهي عندها حق باردوا انها تعملك بلوك
جاسر: يا ابني عارف بس انا كنت حابب ارخم الاول
اكمل: اهي عملتلك البلوك يلا نمشي وبعدين ابقى كلمها تاني من الرقم التاني
اكمل وجاسر مشيوا وشريف نزل وشافهم متجمعين
شريف لعمته فريدة: أمل هتيجي معايا عالغدا
فريدة ابتسمت: تنور ياحبيبي
ليل قربت من شريف: ماتقلقش هنظبط كل حاجة
شريف ابتسم: عارف
ملك اتكلمت: ومش هنخليها تكون مكسوفة خالص
شريف ضحك: اهي دي الحاجة اللي واثق منها
فهد بهدوء: واخيرا هنفرح فيك
شريف: أيوا أخيرا
شريف خلص كلام معاهم ومشي وليل طلعت تتمشى في الجنينة وشافت حاجة غريبة أوي وطلعت لسارة، ليل خبطت ودخلت وسارة كانت بتتكلم في التليفون وقفلت لما ليل دخلت
ليل بهدوء: عاوزة اتكلم معاكي شوية ممكن؟
سارة: أيوا طبعاً
ليل قعدت ادامها: كنتي بتكلمي مين؟
سارة بتوتر: بكلم مين يعني إيه أكيد صاحبتي
ليل: سارة انا مش صغيرة انا عارفة انتي كنتي بتكلمي مين
سارة بخوف: مين؟
ليل ابتسمت: انتي ليه خايفة؟ على فكرة انا ليل مش الفهد ولا الادهم عشان تخافي بالشكل دا
سارة: لو عرفوا هيعملوا مصيبة
ليل: ليه؟
سارة: يعني انتي مش عارفة
ليل بهدوء: ما اظنش انهم هيرفضوا
سارة بدموع: لا هيرفضوا
ليل قعدت جمبها واخدتها في حضنها: طب تسبيني اتصرف؟
سارة: هتعملي ايه؟
ليل: هقولك بس مش دلوقتي بس خليكي متأكدة اني مش هتصرف غلط
سارة بصتلها: أنا بحبك ياليل والله
ليل ابتسمت: وانا كمان ويلا ذاكري وبطلي كلام
سارة ضحكت: حاضر
ليل خرجت من عند سارة ودخلت أوضتها وفهد كان نايم لأنه طبعاً فاطمة صحتهم كلهم بدري وماكس كان في الأوضة لسة وطبعا قعد مع ليل في البلكونة وليل قعدت تتكلم معاه بصوت: هو صاحبك ليه مش ذيك؟ ليه مش حنين كدا ليه مابيعرفش يحب اللي حواليه
ماكس قاعد بيهز في ودانه وهي ضحكت: دا على أساس إنك فاهمني
فهد من وراها: وليه لأ
ليل وقفت مخضوضة: في حد يخض حد كدا
فهد قعد: معلش
ليل كانت هتدخل جوا بس هو وقفها: راحة فين؟
ليل: بسمع الكلام واكون بعيدة
فهد بعصبية: وبعدين معاكي
ليل بعصبية اكبر: لا وبعدين معاك انت انا بجد مابقتش فاهمة انت شوية تقولي ابعدي وشوية الاقي تصرفاتك عكس كدا انت عاوز ايه يافهد ماكفاية بقى، حبيت تنتقم مني واتجوزتني وخلتني سجينتك وذودتها بإنك حرمتني من شغلي
ليل بتتكلم وهي منهارة من العياط: حياتي بعد ماكانت حياة عادية اتقلبت لحياة مالهاش معنى انت كدا مبسوط؟ كدا رضيت غرورك وكبريائك؟
فهد بهدوء: جوازي منك سجن ليكي؟
ليل بصتله وسكتت وهو كان عاوزها ترد بأي حاجة بس سكتت ودا زعله أوي، فهد قام من مكانه وبصلها: اعتبري سجنك دا ست شهور وبعدها هطلقك ياليل
فهد سابها وخرج من الأوضة وهي زعلت أوي من كلامه وانهارت أوي وبتكلم نفسها من غير صوت: ليه زعلانة؟ هو انتي مش زعلانة عشان هو اتجوزك؟ يبقى ليه زعلانة ولا انتي حبتيه؟
ليل فضلت تعيط كتير وماكس بيهوهو بصوت عالي بسبب عياطها وفهد سامعه وعرف ان ليل بتعيط، آخر اليوم شريف وصل ومعاه أمل والكل اتعرف عليها بس ليل كانت لسة فوق
شريف لفهد: فين ليل يافهد؟
فهد: فوق
شريف: طب اطلع هاتها او حد يطلع يعرفها اننا جينا
فهد بص لملك: اطلعي عرفيها ياملك
ملك طلعت لليل بس كانت نايمة وباين عليها انها تعبانة أوي تقريباً كدا فضلت تعيط لحد مانامت وملك شافت ماكس ونزل اول ما الباب اتفتح، وملك نزلت تاني ليهم
شريف: ها فين؟
ملك: طلعت لاقيتها نايمة
شريف: لا اتصرفوا
فهد قام: هطلع اشوفها ياشريف
فهد طلع بهدوء وشافها نايمة بس الدموع على وشها فهد مسح دموعها وبيحاول يصحيها وهي صحيت
فهد: شريف تحت هو وأمل
ليل قامت بس هي كانت تعبانة اوي بسبب عياطها ودراعها في حاجات زرقا
فهد: ايه دا؟
ليل بصت على دراعها وبصتله: أبدا مافيش
فهد: هو إيه اللي مافيش
ليل بهدوء: انا لما بزعل بيحصل كدا
ليل قامت واخدت هدوم من دولابها ودخلت تاخد دش عشان تنزل ليهم تحت وفهد فضل مستنيها وهي لبست هدومها في الحمام وخرجت ووقفت ادام المرايا تظبط شعرها بس هي دايخة وتعبانة وكانت هتقع بس فهد سندها
فهد بقلق: في ايه مالك؟
ليل بتعب: دايخة أوي
فهد خرج تليفونه من جيبه ورن على شريف وقاله يطلع فوق حالا وشريف طلع بسرعة
فهد شال ليل وقعدها عالسرير وشريف خبط ودخل
شريف: في ايه؟
فهد: معرفش ليل دايخة اوي
شريف: طب هروح اجيب جهاز الضغط
شريف راح جاب الجهاز وجه وقاس ليها ضغطها وقال ان ضغطها واطي جداً ولازم تاكل أي حاجة ترفعلها ضغطها، فهد قاعد ساند دماغ ليل على صدره
شريف: فهد انا هخليهم يطلعوا ليها اكل
فهد: ماشي
ليل بتتكلم بتعب: انا هنزل اشوف امل
شريف ابتسم: يابنتي ارتاحي انتي الأول وبعدين شوفيها
ليل: لا
فهد بعصبية: هو إيه اللي لا ماخلاص بقى اهدي
شريف: فهد عنده حق ياليل اهدي بس عشان انتي تعبانة
ليل سكتت وبعد شوية الاكل طلع ليها وأمل طلعت تطمن عليها هي والبنات وفهد باردوا جمبها
في الاوضة عند البارون كان قاعد على سريره وجاتله رسالة على تليفونه وقرأها
(ابعد حفيدك عن المناقصة عشان وربي اخليه يحصل أبوه)
البارون قلبه وجعه وقلق أوي على فهد ومش عارف يتصرف ازاي، البارون بيكلم نفسه من غير صوت: فاكر إني السبب في موتهم يافهد وهما أصلا ماتوا بفعل فاعل، كان نفسي اقولك الحقيقة بس خايف عليك يا ابني انا شايف فيك أبوك انت واخواتك مش هقدر اشوف حد فيكم بيتأذي
البنات قاعدين بيأكلوا ليل وفهد قاعد جمبها بس هي حاسة انها عاوزة تنام وفهد حس بكدا
فهد للبنات: معلش يابنات سيبوها تنام شوية
أمل لليل: ان شآء الله أشوفك مرة تانية
ليل ابتسمت: أكيد لانك هتكوني معانا
أمل كانت فرحانة ان عيلة شريف حباها ونزلت مع البنات، ليل حبت تقوم تغسل ايديها ووشها بعد الاكل بس هي دايخة وفهد سندها
فهد: عاوزة تروحي فين؟
ليل: عاوزة اغسل ايدي
فهد سندها: ماشي تعالي
فهد دخلها لحد الحوض جوا وهي غسلت وهو سندها وخرجها تاني لحد السرير
ليل: شكراً
فهد: على إيه؟
ليل: إنك بتساعدني رغم ان السجين مالوش الحق في اي حاجة
فهد اضايق من كلامها بس ما اتعصبش عشان هي ماتتعبش: ماشي ياليل اتفضلي نامي
ليل نامت وفهد قعد في البلكونة لوحده ومضايق من اللي بيحصل وقرر حاجة وقال هيقولها لليل الصبح، شوية وفهد دخل نام جمبها
تاني يوم الصبح فهد صحي وليل كانت في الحمام وخرجت شافته صاحي عالسرير بس ما اتكلمتش معاه
فهد: ليل
ليل بصتله: نعم؟
فهد: انزلي شغلك
ليل فرحت أوي: بجد؟
فهد: أيوا عشان ذي ماقولتلك كلها ست شهور وترجعي لحياتك الطبيعية
ليل رغم انها كانت فرحانة بإنها هترجع شغلها بس زعلت أوي إن فهد قال نفس الكلام تاني
ليل بصتله بهدوء: شكراً
فهد بإستغراب: مش فرحانة؟!
ليل: أكيد فرحانة
فهد قام من السرير ووقف ادامها: بصيلي
ليل رفعت عنيها وبصتله: نعم
فهد: ليه زعلانة؟
ليل: مش زعلانة انا فرحانة
فهد قرب منها أكتر: بس دا مش باين في عنيكي
ليل بصت بعيد عنه واتكلمت: ليه انت عاوز تفهمني انك بتفهم في لغة العيون
فهد بعد ماكان بيقرب منها وقف: وايه اللي يمنع؟
ليل: اللي يمنع انك اصلا مش بتحس باللي حواليك
فهد زعل أوي من كلامها وان كل مابيحاول يقرب هي بتبعده بكلامها: يعني انتي شايفة كدا؟
ليل: أيوا شايفة كدا
فهد خلاص كان هيخرج من الأوضة بس هي وقفته
ليل: فهد
فهد بصلها: نعم
ليل: ممكن ترجع تنام في جناحك ذي الأول
فهد بصلها بنظرات حزن كبيرة وما اتكلمش وسابها وخرج وهي دموعها نزلت غصب عنها وهي أصلا مش راضية عن كل التصرفات دي، فهد نزل قعد في الجنينة لوحده ومش عاوز يتكلم مع أي حد
في الشركة أدهم قاعد في المكتب وجاسر دخله
جاسر: انا خلاص خلصت ورق الصفقة
ادهم: تمام كدا
جاسر: هو أنا ممكن امشي؟
ادهم بصله: رايح فين؟
جاسر: رايح مشوار
أدهم: ايوا يعني رايح فين؟
جاسر: رايح اتغدى
ادهم ضحك: انت عاوز تزوغ
جاسر: بصراحة أه
ادهم: انسى ويلا على شغلك
جاسر: والنبي يادوما
أدهم بغضب: على مكتبك
جاسر لسة هيخرج بس أكمل دخل
أكمل: بقولك ايه يا ادهم انا عاوز امشي
ادهم: نعم انت كمان؟
أكمل: عاوز اخد ملك ونتغدى بارة
جاسر ضحك: مش لوحدي اللي عاوز ازوغ
ادهم بغضب: يلا على مكاتبكم بدل ما اكلم الفهد
اكمل وجاسر بصوا لأدهم بغضب وخرجوا
في المساء، كلهم قاعدين عالعشا ماعدا فهد
أدهم بإستغراب: فهد فين؟
فريدة: في اوضة الرياضة
جاسر: طب مانزلش ليه؟
شريف: قال مالوش نفس ياكل
أدهم بص على ليل بس هي أصلا مش بتبص غير في الطبق اللي ادامها، ادهم قام طلع لفهد وشافه بيتمرن بعنف
ادهم: مانزلتش للعشا ليه؟
فهد وقف تمرين وبصله: ماليش نفس
ادهم: حصل ايه؟
فهد: محصلش حاجة يا أدهم
أدهم: طب يلا ننزل نتعشا سوا
فهد بينشف عرقه بعد التمرين: لا يا ادهم انا رايح الجناح
ادهم بإستغراب: الجناح؟!
فهد بصله: اه يا ادهم
ادهم: ليه؟
فهد اتكلم بحزن: هي اللي طلبت يا ادهم
فهد ساب ادهم ومشي وادهم حزين عشانه، ادهم نزل تاني ليهم
فاطمة: باردوا مش راضي ينزل؟
ادهم: للأسف رافض
ملك: ليه في ايه؟
ادهم بص لليل اللي باردوا مش بتبص غير للطبق: مش عارف
فاطمة قامت: انا هطلعله
جاسر: انتي نسيتي ان محدش بيدخل الجناح؟
فاطمة ابتسمت: لا فاكرة بس انت اللي نسيت اني انا مسموحلي ادخله وبعدين انا عرفت ان الكل دخله
اكمل ضحك: صح
فاطمة طلعت لفهد وخبطت ودخلتله وهو كان واقف في البلكونة
فاطمة: قاعد لوحدك ليه
فهد بصلها: أبداً مافيش
فاطمة ابتسمت: حبيتها؟
فهد دور وشه: لا
فاطمة: بصلي يافهد
فهد بصلها: انتي عاوزة ايه؟
فاطمة: عاوزة اعرف ايه اللي انت حاسه
فهد بعصبية: ماتسأليش السؤال دا عشان مالوش اجابة عندي
فاطمة: تفتكر؟
فهد بغضب: فاطمة بلاش كدا
فاطمة: هقولك حاجة يافهد وبعدها هسيبك وانزل، انت حبيتها يا ابن خالتي والدليل على كدا حزنك اللي باين في عنيك وانك خايف تقرب من حد تاني
فاطمة نزلت وسابته قاعد يفكر ومضايق من نفسه انه ضعف تاني، ليل خلصت اكلها وطلعت اوضتها بس كانت مضايقة ان فهد مش معاها
ليل لنفسها: انتي عبيطة يابنتي هو مش انتي اللي طلبتي كدا منه عاوزة ايه بقى
شوية والباب خبط وكان نفسها يكون هو بس كانت ملك
ليل: تعالي ياملك
ملك دخلت: فهد عاوز هدوم من الدولاب بتاعه
ليل بإستغراب: هو قالك كدا؟!
ملك: اه طلب مني اجي اخدله ترنج
ليل زعلت أوي: طب انا هختارله الترنج
ليل فتحت الدولاب واختارت الترنج اللي فهد بيحبه وملك اخدته منها
ملك: ليل هو انتوا متخانقين؟
ليل بحزن: هو احنا اصلا ياملك كنا كويسين عشان نتخانق
ملك: ان شاء الله خير ياحبيبتي
ملك سابتها وخرجت وليل قعدت تعيط اوي، فهد اخد الترنج وملك عرفته ان ليل اختارت دا عشان دا اللي هو بيحبه
عدا اسبوع وفهد وليل مش بيتكلموا خالص وتقريبا ليل مش بتشوف فهد أصلا والبنات خلاص النهاردة اخر يوم في امتحاناتهم واسلام وآسر كمان، البنات حابين يسافروا كلهم سوا بس شريف قرر انه هيتجوز امل بعد اسبوع وكلهم بيجهزوا والسفر هيتأجل لبعد الفرح
ملك للبنات: عاوزين ننزل نشتري الفساتين
ليل: امتى؟
ملك: ياريت بكرة
سارة: ايوا ياريت
آيه: طب ومين هيروح معانا؟
هاجر ضحكت: قصدك ادهم واكمل يعني
آيه: ايوا
ملك بصت لليل: وفهد اكيد
ليل: هو فين ياملك؟
ملك: في الجناح جه من شوية
ليل قامت وسابت البنات وعاوزة تعمل اي حاجة عشان هما اصلا مشافوش بعض بقالهم أيام، ليل دخلت اوضتها وحطت روچ لونه احمر هي كانت عاوزة تبان حلوة عشان هو مشفهاش بقاله أيام، ليل دخلت الجناح وفي دخلتها فهد كان خارج من الحمام بعد الدش، وكان لابس الشورت بس وبينشف شعره واتفاجئ بيها ادامه وهي واقفة هتموت وتخرج😂
فهد بهدوء: في ايه؟
ليل بتوتر: كنت عاوزة استأذنك في حاجة
فهد: ايه هي؟
ليل: كنت عاوزة اروح لماما يومين
فهد: وفرح شريف؟
ليل: ماهو أنا هروح واجي قبله
فهد: ولو قولت لا
ليل بصتله بحزن: والنبي بلاش تقول لا انا بجد عاوزة اروح
فهد بيقرب عليها وهي واقفة أصلا مكسوفة بسبب انه واقف من غير تي شيرت
فهد قرب من ودانها وهمس: اللي انتي حطاه دا مايتحطش تاني
ليل عاملة نفسها مش فاهمة: قصدك على إيه
فهد بص على شفايفها: اللون اللي على شفايفك
ليل: عادي هو انا مش بنت ذي بقية البنات
فهد بهدوء: ليل مايتحطش تاني
ليل بعناد: لا هحطه
فهد قرب منها وباسها وشاله بطريقته، فهد بعد عن ليل وهي واقفة مش مستوعبة اللي حصل
فهد قرب منها وهمسلها: اشوفك حطاه تاني بقى
ليل جريت من ادامه بسرعة وهو ابتسم وبيكلم نفسه: ياترى اللي جاي هيكون شكله إيه
ليل دخلت اوضتها ومش مستوعبة اللي حصل خالص ومكسوفة أوي، وفهد لبس هدومه ورحلها وهي اتخضت اول ماشافته خبت وشها وهو ابتسم
فهد: اسف لو كنت ضايقتك اني جيت هنا
ليل بصتله بغضب: وهو دا بس اللي ضايقني
فهد فهم قصدها وقرب منها وهي بتبعد ومسك ايديها: بتهربي ليه
ليل بتوتر: مش بهرب
فهد رفع وشها: ليل انا مش عاوز اضايقك، انتي لما طلبتي اني اروح الجناح وافقت ولما لاقيت وجودك هنا سجن ليكي قولتلك ست شهور وهطلقك، وقولتلك تنزلي الشغل
ليل دموعها نزلت وما اتكلمتش وفهد مش فاهم ايه سبب الدموع دي
ليل: انا عاوزة اروح عند ماما ممكن؟
فهد: ممكن بس مش دلوقتي عشان فرح شريف
ليل: هو انت هتيجي معانا واحنا راحين نشتري الفساتين؟
فهد بصلها أوي: انتي عاوزاني اجي؟
ليل بتوتر: عادي ماهو أدهم واكمل هيجوا عشان خاطر ملك وآيه
فهد بيعيد سؤاله تاني: انتي عاوزاني اجي؟
ليل كانت لسة هترد بس الباب خبط
فهد بغضب: مين؟
صباح: اخت مدام ليل تحت
ليل بفرحة: بجد
فهد بصوت عالي: طيب انزلي انتي
صباح نزلت وفهد لسة موقف ليل ادامه
ليل: انا هنزل
فهد: مجاوبتيش على سؤالي
ليل بصت في الأرض: لو عاوز تيجي تعالى
فهد رفع وشها: ليل انا مش هعيد سؤالي تاني
ليل: طب سبني انزل لأختي
فهد: ماشي ياليل انزلي
ليل نزلت بسرعة لأختها وكانت فرحانة بيها أوي
ليل:: انتي تليفونك مقفول ليه
نور بصت على جاسر اللي مركز اوي: اصل في رقم رخم أوي بيرن عليا وقال إيه معجب فقومت قفلت الخط وقولت هجيب واحد تاني
ملك ضحكت: يابنتي مايمكن معجب فعلا
نور: لا ماهو أنا عرفت مين صاحب الرقم
اكمل كان بيشرب وقعد يكح ويبص لجاسر وبيضحك أوي
سارة بشك: هو في ايه؟
اكمل مش قادر يتكلم من كتر الضحك وقام وسابهم
جاسر قام: خدني معاك ابوس ايدك
ملك بإستغراب: هو في ايه؟
نور ضحكت: عشان الاستاذ اللي كان بيرن هو جاسر
ليل زعلت لانها خايفة على أختها تكون عايشه ذيها في تعاسة
ليل: خمس دقايق وراجعة
ليل خرجت لجاسر واكمل اللي واقفين يتكلموا سوا وبيضحكوا
ليل بهدوء: ممكن اتكلم معاك شوية ياجاسر؟
اكمل استأذن وسابهم ومشي وفهد نزل للبنات وسلم على نور وسأل على ليل بس عرف من أكمل انها واقفة مع جاسر بارة وخرجلهم
ليل لجاسر: انت رنيت عليها ليه؟
جاسر بهدوء: صدقيني ياليل مش عارف بس كل اللي انا حاسه اني معجب بيها وعاوز اتكلم معاها
ليل: جاسر انا هطلب منك وعد هتقدر عليه؟
جاسر: وعد إيه؟
ليل: إنك لو فعلاً حبيتها ماتزعلهاش ولا تجرحها وخليها تعيش مبسوطة ماتخليهاش تندم انها قبلت تكون معاك
جاسر شاف فهد واقف وراهم وسمع كل الكلام بس فهد بإشارة واحدة لجاسر انه مايتكلمش ولا يقولها انه واقف
جاسر لليل: اوعدك ياليل
جاسر سابها ودخل وهي قعدت على كرسي ادامها ودموعها نزلت وفهد اضايق ودخل تاني قعد مع البنات وليل دخلت وقعدت معاهم وأدهم كان بارة وجه
أدهم للبنات: هتنزلوا تشتروا الفساتين امتى؟
آيه: بكرة
أدهم: طب تمام عشان انا واكمل هنروح معاكم
ملك بصت لفهد: وانت يافهد أكيد جاي طبعاً
فهد: لا
ليل زعلت أوي انه رفض ودا بان عليها وفهد أخد باله واتكلم: بس لو ليل عاوزاني اروح معاكم هاجي
ليل ساكتة والكل قاعد مستنيها تتكلم
نور: ها ياليل ردي
ليل أصلا مكسوفة تتكلم
فريدة جات من وراها: السكوت علامة الرضا وبلاش تكسفوها ويلا قوموا عشان تاكلوا
ليل بصت لنور: انتي هتقعدي أد ايه؟
نور: يومين
فهد: ويومين بس ليه انتي كدا كدا كنتي هتيجي مع عمي وطنط يوم فرح شريف يبقى خليكي هنا ليوم الفرح
نور: بس انا ماقولتش لبابا
فهد: بسيطة هكلمه انا أقوله
سارة: حلو كدا وشوفي تحبي تنامي فين
ليل: هتنام معايا في اوضتي
فهد فهم من الجملة دي ان ليل باردوا عاوزاه يفضل بعيد وسابهم وقام
فريدة بصتلها بعتاب وهي حست انها فعلاً غلطت وطلعت وراه، كانت مترددة تدخل بس اتشجعت وخبطت عالباب ودخلت وهو كان واقف في البلكونة
ليل: فهد
فهد من غير مايبص ليها: نعم
ليل: طلعت ليه؟
فهد: مافيش
ليل وقفت جمبه: انت زعلت؟
فهد بصلها: وهزعل ليه؟
ليل: عشان قولت إن نور هتكون معايا
فهد بهدوء: وإيه يعني ما انتي كدا كدا في الأوضة لوحدك فعادي يعني
ليل زعلت من رده وكانت هتخرج بس هو مسك ايديها: انتي طلعتي ورايا عشان حسيتي اني زعلت؟
ليل بتوتر: اه
فهد: يعني زعلي فارق معاكي؟
ليل بخجل: أيوا
فهد بيقرب منها الباب خبط😂
فهد بعصبية: مين؟
نور: انا نور
ليل بسرعة خرجت ليها وفهد واقف متعصب وبيكلم نفسه: والله لكهرب الباب دا
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أحفاد البارون)
