رواية أحفاد البارون الفصل التاسع والعشرون 29 بقلم إيمان جمال
رواية أحفاد البارون الجزء التاسع والعشرون
رواية أحفاد البارون البارت التاسع والعشرون
رواية أحفاد البارون الحلقة التاسعة والعشرون
ادهم ساب آيه وطلع فوق وشريف كان سامع كل كلامهم من فوق ونزل لأخته يتكلم معاها
شريف: ممكن أعرف إيه اللي حصل يا آيه عشان يحصل الكلام اللي أنا سمعته من شوية دا؟
آيه بإنهيار: انا اخدت حبوب منع الحمل من اول يوم جواز ومعرفتش أدهم بدا عشان ماكنتش عاوزة حاجة تشغلني عن دراستي وتعليمي وإن أكون دكتورة
شريف انصدم لما سمع كلامها واتكلم بهدوء: وبعدين انتي مش عارفة أن اخد الحبوب دي من غير استشارة اي طبيب تضرك يادكتورة؟
آيه: أيوا انا عارفة بس ساعتها ماكنتش هقدر اقول لأدهم لأنه كان هيرفض دا جداً وأنا كنت عاوزة أعمل كدا
شريف اتكلم بغضب: انتي كدا اللي أنانية يا آيه مش هو، انتي اللي اخدتي القرار بنفسك ومفكرتيش حتى في نفسية أدهم هيكون عامل ازاي بعد مايعرف حاجة ذي دي للأسف انا كنت فاكر إنه غلطان في حقك بس انتي اللي طلعتي غلطانة في حقه
شريف سابها ومشي على شغله وهي فضلت تعيط جامد لحد ما أغمى عليها وماكس فضل يهوهو بصوت عالي وأدهم اتخض بسبب الصوت ونزل بسرعة شاف آيه مغمى عليها وجري عليها بسرعة وشالها دخلها جوا وبيحاولوا يفوقوها وبدأت تفوق بس رجعت تتوه تاني وشريف كشف عليها بس ضغطها واطي
شريف لأدهم: اكيد هي ما أكلتش حاجة بقالها فترة عشان كدا حصلها هبوط
آيه ماسكة في إيدين أدهم مش عاوزة تسيبه وشريف والكل سابهم لوحدهم شوية
ادهم بهدوء: إبعدي
آيه بترجي: عشان خاطري كفاية اني عارفة إني غلطانة
أدهم بعد إيديها عنه بعنف: مايهمنيش إنتي غلطانة ولا لأ
آيه بإنهيار: أنا بجد آسفة والله هصلح اللي أنا عملته بس عشان خاطري ماتبعدش عني مش هقدر استحمل دا والله يا أدهم
أدهم مش عاوز يضعف ادامها لأنه بيحبها بس هي فعلاً غلطت ولسة هيخرج ويسيبها بس هي اغمى عليها تاني وادهم اتخض عليها أوي وبيفوقها بس المرادي مش بتفوق واخدوها في العربية ونزلوا عالمشتشفى واول ماوصلوا الدكاترة اخدوا آيه على أوضة الكشف والدكتورة عندها والكل مستنيها بارة وبعد ربع ساعة الدكتورة خرجت
الدكتورة: مين فيكم جوزها؟
أدهم: انا
الدكتورة ابتسمت: هي باقت كويسة بس هي ضعيفة شوية ودا طبعاً مش كويس عشان البيبي
شريف بإستغراب: بيبي؟!
الدكتورة: أيوا
أدهم مش مستوعب اللي بيسمعه: هو حضرتك متأكدة باللي بتقوليه دا؟
الدكتورة: أيوا طبعاً هو ليه حضرتك مستغرب؟
أدهم: عشان هي كانت بتاخد حبوب منع الحمل
الدكتورة: طب سؤال حضرتك اللي طلبت منها كدا؟
شريف اللي اتكلم: لا طبعاً دا موضوع طويل يادكتورة
الدكتورة: تمام، كل الحكاية ان مفعول الحبوب مجابش نتيجة معاها وعشان كدا حصل حمل
ادهم كان فرحان اوي من قلبه بس كان خايف وقلقان ان آيه ماتكونش حبة دا وإنها تكره الحمل وعشان كدا سأل الدكتورة: حضرتك بلغتيها بالخبر دا؟
الدكتورة: أكيد وهي فرحانة أوي وطلبت مني إني أدخلك ليها
شريف بص لأدهم وابتسم: ادخلها يا أدهم وبلاش تزعل منها عشان اللي حصل دا هيغير كل حاجة
أدهم: حاضر ياشريف ارجع انت القصر وطمنهم وانا هدخلها وشوية وهجيبها
أدهم دخل لآيه وهي كانت عاوزة تقوم بس في إيديها المحلول وأدهم قعد جمبها
آيه: الدكتورة قالتلك؟
ادهم بهدوء: أيوا
آيه: مش فرحان؟
أدهم بصلها: انا اللي عاوز اسألك السؤال ده يا آيه انتي فرحانة بخبر الحمل دا ولا لأ؟
آيه بدموع: والله يا أدهم فرحانة أنا عاوزة اخلف منك بس والله أنا لما فكرت في القرار دا كان بسبب الكلية والله مش عشان حاجة تانية
أدهم مسحلها دموعها: بلاش دموع أنا خلاص مش زعلان
آيه: بجد مش زعلان؟
أدهم إبتسم: تؤتؤ مش زعلان
آيه ابتسمت: بحبك
ادهم باسها برقة وبشوق وحب وهي حضنته أوي وكأنه هيهرب منها
نرجع للقصر بقى فهد وليل لسة نايمين😂 يعني معرفوش أي حاجة عن اللي حصل وليل صحيت قبل فهد ودخلت تاخد دش بس هي حاسة بدوخة واخدت الدش بالعافية وطلعت بتسند على الحيطة وقربت من فهد تصحيه وهو قام مفزوع لما حس انها تعبانة
فهد بقلق: في إيه؟
ليل بتعب: دايخة أوي
فهد سندها وقعدها على السرير: طب نامي وانا هخلي شريف يجي يقيسلك ضغطك عشان ننزل نروح للدكتورة
فهد لبس التي شيرت بتاعه وخرج لشريف بس مكانش لسة وصل القصر
فريدة: في ايه ياحبيبي؟
فهد: ليل تعبانة وعاوز شريف يقيس ضغظها
فريدة: شريف راح المستشفى مع ادهم وآيه
فهد بإستغراب: ليه؟!
ملك: آيه اغمى عليها وراحوا المستشفى
وهما واقفين بيتكلموا شريف دخل وشافهم واقفين
شريف: في ايه؟
فهد: آيه عاملة ايه؟
شريف ضحك: آيه حامل
فهد بإستغراب: ايه دا ازاي طب والحبوب اللي كانت بتاخدها
فريدة وملك انصدموا: حبوب إيه؟!
شريف بهدوء: بعدين هحكيلكم المهم دلوقتي هي حامل وشوية وهتيجي هي وأدهم
فهد: طب اتفضل معايا عشان ليل تعبانة وضغطها شكله واطي
شريف طلع مع فهد وفعلا ليل كان ضغطها واطي
شريف: فهد لازم تعمل تحاليل أنيميا عشان هي ضعيفة
فهد: حاضر ياشريف خلي بس حد من الحرس يخرجلي عربيتي ويجهز عشان هيجي يوصلنا للمستشفى
شريف: تمام وانا هكلمهم هناك هخليهم يكونوا معاكم وساعتين وهاجي على ما اطلع اطمن على أمل عشان تعبانة باردوا
فهد: ماشي
شريف خرج وفهد سند ليل وغيرلها هدومها ونزل بيها للمستشفى اللي كانت نفس المستشفى اللي فيها ادهم وآيه، الدكاترة كشفوا على ليل وحللت وبعد ساعة طلع نتيجة التحليل وللأسف عندها أنيميا حادة ومحتاجة نقل دم وفهد قلق عليها جداً
الدكتورة: ماتقلقش يامستر فهد دي حاجة طبيعية وخصوصا لما بتكون الست حامل دا بيحصل ليها ضعف عشان الجنين بيتغذي معاها
فهد: طب وهي هتبقى كويسة؟
الدكتورة: ان شاء الله احنا هننقل ليها الدم وهتكون كويسة بإذن الله
فهد قاعد جمب ليل والدكاترة بدأوا يحهزوا فصيلة الدم وكان الفصيلة قليلة في المستشفى بس فهد طلب شريف وقاله انه يروح هو واكمل وجاسر يتبرعوا لبنك الدم ويبادولها بالفصيلة اللي ذي فصيلة ليل، ليل كانت بتتوجع بسبب المحاليل اللي في إيديها وفهد زعلان عشانها
فهد: معلش ياقلبي شوية وهتكوني كويسة
ليل بدموع: تعبانة اوي
فهد باس دماغها: سلامتك من التعب ياقلبي
تليفون فهد رن وكان حماه (أبو ليل): دا باباكي
ليل: ماتعرفهوش أي حاجة يافهد
فهد: حاضر ياحبيبتي
فهد رد عليه: صباح الخير ياعمي
علي: صباح النور ياحبيبي عاملين إيه؟
فهد: الحمدلله والله
علي: يارب دايما يارب، فين ليل برن على تليفونها بس مش بترد
فهد بص على ليل جمبه: هي بس نايمة ياعمي حضرتك عارف بقى مقضياها نوم
علي ضحك: الله يكون في عونك
فهد ابتسم: أنا هخليها تكلمكم لما تصحى
علي: ماشي ياحبيبي
فهد قفل مع علي وفضل قاعد جمب ليل
هاجر كانت نايمة وصحيت على صوت رنة تليفونها وكان عماد وردت وهي نايمة
هاجر بنوم: الو
عماد: اول مرة اعرف ان اللي صاحي من النوم صوته بيكون حلو كدا
هاجر فاقت من النوم: نعم بقى
عماد ضحك: في إيه بس
هاجر بغضب: لا انت تقفل لحد ما افوق عشان كدا غلط
عماد ضحك اوي وهي قفلت السكة في وشه
ملك غيرت هدومها وقررت تروح لبيت سارة عشان تبلغ أكمل بحملها ونزلت اخدت عربية بسواق وراحت لهناك، واكمل كان لسة نايم واللي فتحلها ناجي
ناجي ابتسم: اخت الفهد بنفسها هنا
ملك ضحكت ودخلت: صباحو
سارة خرجت من الاوضة: صباحو فل
ناجي واقف وبيبصلهم: هو انتوا متأكدين انكم بنات؟
ملك بصت لسارة: سكتي جوزك بدل ما اخنقهولك
سارة ضحكت: بس ياناجي ياحبيبي البت دي مجنونة
ملك ضحكت وبصتلهم: هو فين؟
سارة شاورت ليها على أوضة: نايم جوا في الأوضة دي
ملك دخلت الأوضة وفتحت الستاير واكمل فتح عنيه وشافها ورجع اخد المخدة وحطها على وشه: اقفليهم تاني
ملك قعدت جمبه: كدا تسيب مراتك حبيبتك
اكمل شال المخدة وقعد: انتي عارفة اني ماسبتكيش وعارفة سبب إن مشيت ليه
ملك: عارفة ياحبيبي بس على فكرة ماينفعش تسيبني وانا في الحالة دي
اكمل بقلق: حالة إيه إنتي كويسة؟
ملك إبتسمت: أيوا ياحبيبي كويسة بس قوم يلا صحصح كدا وفوق عشان عاوزة أقولك على حاجة
أكمل: لا قولي في إيه عشان أنا بدأت أقلق
ملك حطت إيديها على بطنها وبصتله وإبتسمتله: أنا حامل يا اكمل
اكمل مش مستوعب اللي بيسمعه: إنتي قولتي إيه كدا سمعيني تاني
ملك ضحكت: في إيه كل دا عشان قولت إني حامل
أكمل قام حضنها وشالها لف بيها وفرحان جدا, نزلها وبيبص في عنيها: انتي بتتكلمي بجد ولا عاملة مقلب؟
ملك ابتسمت: والله ياحبيبي بجد وعشان كدا انا جيت النهاردة أبلغك بالخبر دا
أكمل قرب منها وباسها بحب: مبروك ياروح قلبي وأنا متأكد إنك هتكوني أعظم أم
ملك بحب: وانت ياحبيبي هتكون أحن أب
سارة دخلتلهم وبتبصلهم بإستغراب: في إيه ؟
أكمل حاوط ملك بإيديه وقالها: ملك حامل
سارة فرحت أوي: الله دا إيه الخبر الحلو دا مبروك ياقلبي يعني احنا كدا هنكون امهات سوا
شوية وخرجوا لناجي بارة وعرف بالخبر: مبروك يا أكمل مبروك ياملك ربنا يقومك بالسلامة يارب
ملك: الله يبارك فيكي ياناجي يارب ويقوم سارة هي كمان بالسلامة يارب
ملك عاوزة تتكلم في موضوع جواز عمتها بس خايفة تفتح الموضوع بس اتشجعت واتكلمت: ممكن بقى تقوم ترجع معايا وتصالح مامتك
أكمل بهدوء: لا ياملك أنا مش هرجع دلوقتي ولا عاوز اتكلم مع أي حد وخصوصا في الموضوع دا
ملك: ياحبيبي دي مامتك وحتى لو انت رافض الموضوع دا لازم تتكلم معاها لان نفسيتها وحشة أوي
ناجي: بص يا أكمل انا ماكنتش عاوز اتكلم في الموضوع دا تاني بس المهم من اي حاجة اصلا امك يا اكمل لازم تراضيها يا اكمل
اكمل بهدوء: انا مش هقدر اقبل بالوضع دا
ملك: بص يا اكمل حاول تفكر في الموضوع دا تاني عشان خاطرها لان هي عاوزة دا وكمان جدك موافق
أكمل بعصبية: انا قولت اللي عندي ومش محتاج افكر وياريت محدش يتكلم في الموضوع دا تاني عشان والله هتصرف تصرف ذي الزفت
أكمل سابهم ودخل الاوضة تاني وهما قاعدين محتارين يعملوا ايه
نرجع للقصر أدهم وآيه رجعوا من المستشفى والكل اطمن عليها وفهد وليل كانوا لسة في المستشفى
شريف: انا هروح اشوف فهد وليل
أمل: طب أجي معاك
شريف: لا ياقلبي ارتاحي انتي وانا هكلمكم وانا هناك اطمنكم
أدهم: هما لسة ادامهم شوية
شريف: ايوا أكيد نقل الدم بيحتاج وقت ربنا يقومها بألف سلامة يارب
فريدة: طب اجي معاك انا عشان اكون جمبها لانها اكيد محتاجة حد مننا
آيه: انتي عندك حق ياعمتو
شريف: ماشي بس يلا بسرعة عشان مش نتأخر عليهم
فريدة طلعت تلبس وشريف كان مستنيها وشوية ونزلت ولبست ومشيوا للمستشفى وأول ماوصلوا كانت ليل نايمة
شريف: هي نايمة ليه؟
فهد بحزن: كانت بتتوجع من المحاليل بس انا طلبت انهم يعطوا ليها مهدئ عشان تنام شوية
فريدة: ان شاء الله ياحبيبي هتكون كويسة والله
فهد بدعاء: اللهم امين يارب
اكمل قاعد في اوضته عند سارة وبيفكر وبيكلم نفسه: وفيها ايه لما توافق يا أكمل هي مش دي امك ومن حقها تعيش اللي باقي من حياتها سعيدة مع الانسان اللي بتحبه من سنين، لالالالالا مستحيل دا يحصل انا استحال اقبل ان دا يحصل ابد
اكمل خرج من عند سارة وسارة وناجي مايعرفوش هو نزل راح فين وعشان كدا ناجي كلم فهد في التليفون بس للأسف عرف انه في المستشفى فمحبش انه يقوله اي حاجة كفاية اللي هو فيه
شوية وليل فاقت وفريدة جمبها هي وفهد وكمان شريف
فهد ماسك ايديها وبيكلمها: حبيبتي انتي بقيتي كويسة؟
ليل بتعب: بقيت كويسة شوية ياحبيبي بس محتاجة اشرب عشان عطشانة
فهد: عيوني ياقلبي حالا يكون عندك الماية
فهد طلب الماية لليل وشرّبها وفضل قاعد جمبها عشان يطمن عليها وفريدة فضلت معاها لحد مارجعوا القصر وأخيراً ليل نامت بعد يوم طويل ومتعب جداً وفهد سابها تنام ونزل تحت ليهم
مراد: هي عاملة إيه دلوقتي ؟
فهد بتنهيدة تعب: اهي نامت انا قلقان عليها أوي شكلها تعبان اوي
عبدالعزيز: ماتقلقش يافهد هي هتكون كويسة هو الحمل بيكون متعب بس وبعد كدا هنشوف أحلى ولاد
فهد إبتسم: إن شاء الله
ادهم بيحاول يروق فهد شوية: بس إياك ماتجيش تقولي أنا مصدع من شقاوتهم
فهد ضحك: لا والله عمري هما بس يجوا وأنا هعملهم اللي ماعملتوش لأي حد
ملك: ياعم ياعم بس بص بقى من دلوقتي انا لو خلفت بنوتة تحجزها لحد منهم
فهد بصلها كدا بتفاخر وحط رجل على رجل: اممم أفكر
جاسر ضحك: إبتدينا بقى
البارون إبتسم: فكرتم تسموهم إيه؟
فهد: لسة هو احنا لحقنا ياجدو إحنا اتلبخنا بتعبها بس ان شاء الله لما هي بس تفوق كدا هنتفق سوا
البارون: إن شاء الله هتكون كويسة ياحبيبي
جاسر: بقولك يا فهد عمي كان بيكلمنا وسألنا عن ليل وقولناله انها نايمة
فهد: كويس اوي لأنه كلمني باردوا لأنه رن عليها وهي ماردتش عليه وقولتله انها نايمة
جاسر: ايوا كويس انه كلمني انا عشان لو كان كلم نور الأول كانت قالت
فريدة: هي ان شاء الله أكيد هتكون كويسة محدش يقلقهم
(طبعا أنا مجبتش أي سيرة عن إسلام و آسر لأنهم مشيوا وطبعاً أول أجازة بتكون بعد 45 يوم)
مصطفى قاعد في الڨيلا بيقرأ ورق تبع الشركة طبعاً هو دلوقتي بيتابع الشغل بعد أخوه وتليفونه رن وكان واحد من الحرس اللي واقفين على البوابة
مصطفى: ايوا
الحارس: أكمل البارون عاوز حضرتك
مصطفى إتفاجئ باللي سمعه ومكانش مصدق: انت بتقول مين؟
الحارس: أكمل البارون
مصطفى: دخله بسرعة
مصطفى قفل المكالمة وطلع يستقبله بنفسه
نيجي لآسر وإسلام شوية, طبعاً هو مش متعودين على الحياة دي
أيوا فهد كان متحكم فيهم بس مش بشكل تحكمات الجيش طبعاً
آسر: هو إحنا هننزل أجازة إمتى؟
إسلام: إتنيل هو إحنا لحقنا أصلاً
آسر: إسلام بجد أنا مش قادر أتخيل إننا هنقعد هنا سنة كاملة
كان فيه ولد معاهم في العنبر إسمه مازن وسمع كلامهم وكان جاي قبلهم من فترة بسيطة بس أخد على الوضع
مازن: أنا آسف إني هدخل في كلامكم بس أنا عاوز أقولكم إني كنت ذيكم كدا بس دلوقتي كل دا إتغير خلاص
إسلام: هو إنت هنا من إمتى؟
مازن: من خمس شهور
آسر: هو انت حياتك بارة عاملة إزاي مش يمكن ماتكونش ذينا
مازن إبتسم: أنا من عيلة غنية جداً وواخد إني أخرج مع أصحابي وكنت رافض إن آجي هنا لأن كل دا هيتغير بس خلاص أنا حاولت إني أتقبل الوضع وأهو بقيت أحسن صدقوني حياتنا قبل مانيجي هنا بتكون فيها شوية تصرفات وطباع بنحتاج إن إحنا نغيرها عشان حياتنا تكون أحسن
إسلام: هو إيه يعني اللي في حياتنا محتاجين نغيره؟
مازن كان لسة هيرد بس سمعوا صفارة إنهم يتجمعوا خارج العنبر
مصطفى واقف ادام أكمل اللي لسة قاعد في عربيته ومانزلش كأنه عاوز يرجع من غير مايتكلم مع مصطفى
مصطفى: إيه بتفكر ترجع؟
أكمل نزل من العربية وبيكلمه: تعرف إن فضلت كتير أفكر في إني ما أجيش هنا
مصطفى: وإيه غير رأيك؟
أكمل: أنا عاوز أعرف إنت عاوز إيه ؟
مصطفى: طب إحنا هنفضل نتكلم على الباب كدا تعالى ندخل نشرب قهوة ونتكلم
أكمل: انا مش جاي عشان أشرب قهوة ولا أقعد
مصطفى: تعالى يا أكمل نقعد في الجنينة وأنا هقولك عاوز إيه
أكمل مشي مع مصطفى للجنينة وقعدوا قصاد بعض وأكمل مستني مصطفى يتكلم
مصطفى: بص يا أكمل أنا عارف إن إنت واخد مني موقف عشان خاطر أخويا بس اللي أنا عاوزة أقوله ليك إني مش ذيه خالص ولو كنت ذيه يا أكمل مكانش البارون هيوافق على طلبي دا لأن رفضه زمان بسبب أخويا بس دلوقتي أهو إتسجن وهياخد جزاته
أكمل: وإنت ليه لحد دلوقتي عاوزها؟
مصطفى: عشان بحبها يا أكمل عشان دي مش أي حب ودا كان أكبر سبب إني مقدرش أكون مع حد غيرها
أكمل بعصبية: لا حظ إنك بتتكلم عن امي
مصطفى: اكمل إنت قولتلي عاوز تعرف أنا عاوز إيه وأنا هقولك كل حاجة فأستحملني لحد الآخر, انا أقسم بالله ماحاولت أكلمها لما كان أبوك عايش وإحترمت إنها في عصمة راجل غيري
أكمل: يعني حاولت تكلمها بعد ماهو مات؟
مصطفى بتوتر: أيوا بس والله العظيم ماردت عليا أنا كنت بحاول أتكلم معاها قبل ما أخد أي خطوة
أكمل: طب بما إنك عرفت إن جدي وافق يبقى أكيد عرفت إن انا وأختي مش موافقين
مصطفى: عرفت يا أكمل بس ممكن أعرف سبب رفضك إيه؟
أكمل بغضب: هو إنت جاي تاخد مكان أبويا وتقولي رافض ليه
مصطفى: بص يا أكمل مافيش حد هياخد مكان أبوك ولا انا أصلاً هقدر أخد مكانه في حياتكم
أكمل: بس هتقدر تاخد مكانه في حياة أمي مش كدا؟
مصطفى: امك عمرها ماهتنسآ أبوك ولا أنا أصلاً هحب كدا يا أكمل بس أنا عاوز أسألك سؤال هو إنت غيران عليها مني ؟
اكمل إتوتر ووقف: غييرة إيه وكلام فاضي إيه
مصطفى وقف وإتكلم: بص يا اكمل كل اللي هقوله ليك إني شاريها بقالي سنين كتير أوي وهي بالنسبالي حلم ونفسي أحققه بس صدقني لو فضلت رافض إنت وأختك فأنا مش هقبل إني أخليها تخسركم عشاني
أكمل خلص كلام مع مصطفى ورجع القصر والكل إتفاجئ برجوعه بس فريدة كانت في أوضتها
ملك جريت عليه: حبيبي نزلت وسبتنا ورحت فين؟
اكمل بهدوء: مافيش كان عندي مشوار مهم كنت لازم اعمله
فهد بهدوء: رحتله؟
أكمل: هو لحق يقولك؟
فهد: لا يا أكمل أنا اللي حسيت من كلامك إنك كنت عنده وأنا كنت متأكد إن دا هيحصل عشان لازم تتكلموا مع بعض
أكمل: ماما فين؟
ادهم: في اوضتها فوق
أكمل: ماشي
أكمل طلع وسابهم بس متردد انه يتكلم مع أمه بس خبط على بابها وهي فتحت واتفاجأت بيه
أكمل دخل من غير أي كلام وقعد على السرير وبصلها: بتحبيه؟
فريدة إتوترت ومعرفتش ترد عليه
أكمل: لو سمحتي يا أمي ردي عليا بتحبيه ولا لأ؟
فريدة بتوتر: ايوا يا أكمل بحبه بس ربنا يعلم ان طول ما أبوك عايش مافكرت في راجل غيره ولا حاولت اكلم مصطفى حتى بعد ماهو مات
أكمل: بس هو حاول يكلمك
فريدة استغربت إنه عارف: هو إنت عرفت منين؟
أكمل: انا لسة جاي من عنده دلوقتي وقالي إنه حاول يكلمك بس بعد ما أبويا إتوفى وانتي ماكنتيش بتردي عليه
فريدة: اتكلمتوا في إيه تاني؟
أكمل وقف ومشي خطوتين وبصلها: بصي يا أمي انا موافق على جوازكم
فريدة بفرحة: بجد؟
أكمل استغرب فرحتها اوي وبصلها بإستغراب وهي اتكسفت وبصت في الأرض وهو سابها وخرج من الأوضة ودخل اوضته وملك راحتله
ملك: قولتلها إيه؟
أكمل: قولتلها إني موافق على الجواز يا ملك
ملك: انت فعلاً موافق ولا عملت كدا عشان هي عاوزة كدا؟
أكمل بحزن: مش هتفرق ياملك صدقيني
ملك: لا ياحبيبي هتفرق عشان عمتو لو عرفت إن انت باردوا مش موافق وبتعمل كدا عشانها هي مش هتوافق
اكمل: وانا ليه اضغط عليها وتعمل عكس اللي هي عاوزاه انا فعلاً مش حابب الموضوع دا بس هعمل إيه انا كل اللي عاوزه إنها تعيش حياتها كويسة مع إنسان يسعدها الباقي من عمرها وأنا عادي هاخد على الوضع
ملك: طب وسارة؟
أكمل: لسة هتكلم معاها وهي لما تعرف إني موافق هتوافق
ملك: طب ياحبيبي ممكن تدخل تاخد دش عشان تغير هدومك وتنام شوية
اكمل: إني فعلاً عاوز أنام لأني مانمتش كويس من كتر التفكير
ملك بحب: ماشي ياحبيبي يلا ادخل وانا هجهزلك هدومك
أكمل دخل ياخد دش، فاتح الدش وواقف تحته وبيفكر في كل حاجة مصطفى قالها واكتر جملة مأثرة فيه (إنت غيران على أمك مني؟) اكمل فعلاً غيران على أمه من مصطفى ومش قابل فكرة ان هيكون في راجل تاني في حياتها
تحت فهد قاعد وتليفونه رن وكان عماد
فهد: الو
عماد: اذيك يافهد
فهد: الحمدلله اذيك انت
عماد: الحمدلله تمام بقولك أنا كنت عاوزك تقول لأدهم عشان عاوز أجي اتقدم لهاجر
فهد إبتسم: اعتبره حصل ياعماد انا هتكلم معاه دلوقتي وهرجع أكلمك بس مش المفروض ابوها يعرف قبل أخوها
عماد ضحك: عمو مراد دا راجل عسل لكن الخوف كله من الادهم ياعم
فهد ضحك: حاضر انا هتكلم معاه وهكلمك
عماد: متشكر اوي يافهد
فهد قفل مع عماد ورن على أدهم لانه طلع فوق وقاله ينزل وبعد خمس دقايق نزل
ادهم قعد: في إيه؟
فهد: في عريس متقدم لهاجر
أدهم: ودا مين دا إن شاء الله
فهد ضحك: عماد إبن عم ليل
أدهم بإستغراب: بتقول مين؟!
فهد: عماد في إيه؟
أدهم: مش شايفها غريبة شوية
فهد: غريبة في إيه؟
أدهم: يعني هاجر هتعرف تعيش هناك
فهد: وفيها إيه يا أدهم أولاً هما مش عايشين في بلد ارياف دي بلد عادية ثانيا مستوى عماد المادي كويس جداً وهي هتقدر تعيش فيه
ادهم: انت عارف يافهد إن عمري مافكرت في الماديات والكلام الفاضي دا أنا بس عاوزها تكون مرتاحة
فهد: هتكون مرتاحة يا ادهم لانه بيحبها وهي كمان بتحبه
أدهم بصدمة: نعم يا اخويا مين دي اللي بتحب مين؟
فهد ضحك: وربنا عماد كان عنده حق لما قال ان الخوف كله منك مش من عمو مراد
ادهم غصب عنه ضحك: طبعاً ياحبيبي دي روح الأدهم
فهد: ماشي ياعم اتكلم معاها بقى وعرف عمي وانا هطلع اشوف ليل
فهد سابه وطلع عشان يشوف ليل صحيت ولا لسة بس هو دخل الجناح وشافها بتصحى وقعد جمبها
فهد: صح النوم
ليل ابتسمت: انت كنت فين
فهد: تحت ياقلبي
ليل بتحاول تقوم وفهد بينيمها عشان تفضل مرتاحة: خليكي نايمة
ليل: أنا زهقت من السرير عاوزة اقوم اخد دش
فهد برخامة: طب اساعدك؟
ليل ضربته في كتفه: قليل الأدب
فهد ضحك بصوته كله وحضنها: بحبك
ليل: وانا بحبك اوي
ليل اخدت هدوم ليها ودخلت تاخد دش عشان تفوق شوية وفهد طلب ليها بيتزا من بارة عشان هي بتحبها بس اتفاجئ من ردة فعل ليل😂
ليل خرجت من الحمام وبعد ربع ساعة وصلت البيتزا وفهد نزل ياخدها وطلع لليل تاني وهي أول ماشمت ريحتها جريت على الحمام مش طايقة ريحتها وفهد دخل وراها
فهد: في ايه؟
ليل: مش طايقة ريحتها
فهد بإستغراب: دا انتي بتحبيها
ليل بعصبية: بقولك مش طايقة ريحتها
فهد: طب خلاص خلاص هنزلها تحت
فهد نزل بالبيتزا تاني
أدهم: نزلت بيها ليه؟
فهد بغضب: مش طايقة ريحتها وانا قولت هي هتفرح بيها
ادهم ضحك: قابل يامعلم
فهد بصله بغضب: دلوقتي نشوف آيه هتعمل فيك إيه
فهد سابله البيتزا وطلع لليل تاني اللي قاعدة على السرير
فهد: طب تحبي تاكلي إيه ياست ليل
ليل بتفكير: اقولك وماتزعلش؟
فهد بصلها بنص عين: استر يارب قولي ياختي
ليل: عاوزة رنجة
فهد بصدمة: نعم ياختي بتقولي عاوزة إيه
ليل ببرائة: عاوزة رنجة الله فيها إيه دي
فهد: دا على جثتي البتاعة دي تدخل القصر
ليل بدموع: كدا مش عاوز تجيب لمراتك اللي هي عاوزاه
فهد: اطلبي اي حاجة غير البتاعة دي
ليل بعياط: لا أنا عاوزة دي
فهد بصلها بغضب وسابها ونزل وهي قعدت تضحك
ادهم باردوا قاعد وشافه نازل: نزلت تاني ليه
فهد قعد جمبه وبصله: الهانم عاوزة رنجة
ادهم غصب عنه ضحك: يخربيت كدا طب وهتعمل إيه
فهد: على جثتي البتاعة دي تخش القصر او الجناح بتاعي
فريدة كانت خارجة من المطبخ وسمعته: ماينفعش يافهد لانها كدا بتتحوم
فهد: هي يعني مافيش غير البتاعة دي تتوحم عليها
فريدة ضحكت: الوحم مش بمزاجنا يافهد اتفضل روح اشتري ليها رنجة
فهد: لا مستحيل اروح انا اشتريها
ادهم بيضحك اوي: طب ابعت أي حد من الحرس
فهد بصله بغضب: انت لو مابطلتش ضحك هقوم اطلع غيظي فيك انا بقولك أهو
وهما قاعدين ناجي دخل ومعاه سارة وبص لفريدة: خدي بنتك ياطنط والنبي
فريدة: في ايه؟
ناجي: الهانم بتتوحم على مانجا اجيبلها مانجا منين دلوقتي واحنا في بداية الشتا
سارة بدموع: الله وانا مالي هو بمزاجي
ادهم مش قادر يتكلم من كتر الضحك وناجي مستغرب
ناجي: في ايه؟
ادهم بص لفهد: يا ابني احمد ربنا انها اتوحمت على مانجا مش احسن ماتتوحم على رنجة
ناجي: طب والله ياريت
فهد بصله: طب انت بقى اللي هتروح تشتريها للهانم اللي فوق عشان انا استحالة اروح اشتريها
ناجي ضحك: عنيا
فهد بغضب: شامم ريحة شماتة
ناجي: عيب عليك أنا اشمت فيك دا انا بس فرحان فيك
فهد بصله بغضب وبص لأدهم اللي وشه احمر من كتر الضحك: اختفوا من ادامي لاحسن وربنا اموتكم
ادهم وناجي جريوا على بارة وليل نزلت لفهد وقعدت جمبه وبتعيط
ليل: قوم اشتريها
فهد بعصبية: وربنا أبداً انا طلبت من ناجي يروح يشتريها
ليل بفرحة: يعني هاكلها
فهد بصلها بغضب وسابها وقام وهي قاعدة تضحك هي وسارة وفريدة وشوية ونزلت ليهم أمل وملك وآيه وكمان نور، ونور باين عليها إنها زعلانة وليل اخدت بالها من كدا عشان كدا خرجوا يتكلموا في الجنينة
ليل: مالك؟
نور: مافيش
ليل: جاسر مزعلك؟
نور: أبداً والله
ليل: أمال في إيه؟
نور: كنت بعمل إختبار حمل امبارح بس لاقيته سلبي
ليل: طب وفيها إيه
نور: انا خايفة
ليل: نور ياحبيبتي انتوا مالحقتوش وبعدين ماتبصيش للبنات لان دي بتختلف من واحدة للتانية وبعدين انتي مستعجلة على ايه افرحي انتي وجاسر شوية بنفسكم
نور: يعني انتي وفهد مش فرحانين بنفسكم؟
ليل ضحكت: يابنتي يعني عاجبك ان كل شوية تعبانة وفي المستشفى ولا الجديد بقى بتوحم على رنجة وفهد شوية وهيهرب
نور ضحكت اوي: يالهوي عليكي
ليل: شفتي بقى، فبلاش تفكري في حاجة من دي دلوقتي
نور بإقتناع: حاضر
أدهم طلع لهاجر عشان يتكلم معاها بخصوص عماد وخبط علي باب اوضتها وهي كانت بتكلم عماد وادهم دخل وهي اتخضت
ادهم بصلها وبص للتليفون: خليه يقفل بدل والله ارجع في كلامي
هاجر: انت موافق بجد؟
ادهم اخد منها التليفون واتكلم: اقفل بدل ما اجيلك
عماد ضحك: حبيبي والله
ادهم ابتسم: ماشي ياعمدة
عماد: هسيبكم تتكلموا
عماد قفل وادهم قعد وهاجر قعدت ادامه
ادهم: محكتليش ليه ذي زمان؟
هاجر: انت مابقتش فاضيلي على فكرة خلاص اتجوزت وانشغلت في شغل الشركة أكتر من الأول
أدهم: مافيش اي حاجة تقدر تمنعني إن اقعد معاكي واعرف كل حاجة
هاجر: انا اسفة إني محكتش ليك بس انا كنت اكيد هقولك بس عماد سبقني وطلب من فهد انه يتكلم معاك
ادهم بهدوء: بتحبيه؟
هاجر اتكسفت وبصت في الارض وماردتش
ادهم: ماهو لو ماردتيش مش هوافق
هاجر اتكلمت بسرعة: لا موافقة والله
ادهم ضحك: يابختك ياواد ياعماد البت طلعت بتحبك
هاجر ابتسمت: بس مش اكتر ما انا بحبك
ادهم حضنها🫂: ربنا يخليكي ليا يارب انا هتكلم مع بابا وبعد كدا هقول لعماد يجي
هاجر: بابا هيوافق؟
أدهم: إن شاء الله ياحبيبتي
الوقت خلاص في المساء وناجي اشترى الرنجة ورجع القصر وليل اخدتها وطلعت الجناح😂 وفهد كان في اوضة المكتب وخرج شاف ناجي
فهد: ماجبتش ولا إيه؟
ناجي: لا جبت بس ليل اخدتها وطلعت
فهد بصدمة: طلعت فين؟
ناجي ماسك نفسه من الضحك: الجناح
فهد بغضب: نعم يا اخويا بتقول طلعت فين
ناجي مشي من ادامه بسرعة وفهد طلع ومش عاوز يدخل عشان بيكره ريحتها وادهم خرج من عند هاجر وشايف فهد واقف عند باب الجناح
ادهم: واقف كدا ليه؟
فهد بغضب: ليل بتاكلها جوا
ادهم ضحك وفهد بصله بغضب وسابه ونزل
جوا عند ليل قاعدة بتاكلها كأنها ما أكلتش بقالها سنة كويس ان فهد مادخلش😂، فهد فضل طول اليوم تحت بسبب ريحة الرنجة اللي بوظت الجناح وقاعد في الجنينة وفريدة شافته وطلعتله
فريدة: قاعد هنا ليه الجو بدأ يبرد
فهد بغيظ: والله ماهطلع الجناح طول ماريحته مؤرفة كدا
فريدة ضحكت: خلاص روح نام في الجناح بتاعك إنت وأدهم
فهد قام: أنا بقول كدا باردوا
ادهم وفهد اتكلموا مع مراد ووافق على جواز هاجر وعماد وكلها يومين وعماد يجي هو واهله، عدت الايام وعماد اتقدم لهاجر واتفقوا ان الجواز هيكون بعد خمس شهور وليل كانت خايفة لتولد قبلها وماتعرفش تحضر
عدا شهر ونص وكل اللي في القصر مفتقدين آسر وإسلام جداً واتفاجئوا بيهم لما نزلوا اول اجازة
فريدة قاعدة بينهم وحضناهم: قولولي عملتوا ايه
البارون ضحك: سبيهم ياخدوا نفسهم شوية
فريدة: لا انا عاوزة أعرف كل حاجة حصلت معاهم في الفترة دي
آسر ضحك: محصلش حاجة ياعمتو عادي اتعودنا هو أي نعم روتين جديد وغريب بس خلاص اخدنا عليه
فهد نزل وشافهم: حمدلله على السلامة
آسر وإسلام سلموا على فهد وهو حضنهم وقعد معاهم يطمن عليهم ويعرف أخبارهم
ليل فوق في الجناح واقفة أدام المراية وبتبص لبطنها اللي بدأت تكبر واخيرا بطنها كبرت😂 وقاعدة بتكلم في روحها: أكيد فهد مش هيحبني بالبطيخة دي 😂
وخلصت لبس ونزلت، معلومة بسيطة ليل لسة مالبستش الحجاب ذي مافهد كان حابب بس فاجئتهم ونزلت بالحجاب وذي ما إحنا عارفين إن ليل بشرتها بيضا وكانت لابسه دريس لونه أبيض ولبست طرحة سودا وطبعا اللون الأسود على البشرة البيضاء له جمال خاص جداً، ليل نازلة على السلم والكل قاعد تحت مع آسر وإسلام وفهد بيرفع دماغه عشان يبص يشوف مين نازل وشاف ليل اللي كل شوية بتخطف قلبه مش بس عينه وفرح جداً بلبسها للحجاب وقرب عليها ومسك إيديها وإبتسم: إيه الجمال دا
ليل: بجد شكلي حلو؟
فهد إبتسم: ذي القمر ياقلبي
ليل سلمت على إسلام وآسر والكل فرحان بالحجاب وهي قاعدة جمب فهد وكل كلمة بتقولها فهد يبصلها بفرحة وفرحان بيها وهي كل شوية تتكسف وتبص في الارض عشان نظراته
ملك: لا إحنا كدا كلنا نقلد ليل ونلبس الحجاب
اكمل اتكلم: ياريت دا انا اجيبلها هدية شكر على الخطوة دي
فهد بغضب: لا يا أخويا جيب لمراتك مالكش دعوة بمراتي
آسر وإسلام طلعوا يرتاحوا شوية والباقي لسة قاعدين وطبعا لحد دلوقتي مافيش اي خطوة حصلت في موضوع فريدة ومصطفى
فهد بص لأكمل: مش آن الآوان بقى يا أكمل؟
أكمل بهدوء: وهو أنا يعني اللي مأخركم؟
فهد بص لعمته: أيوا يا أكمل عشان مافيش حد فينا موافق ياخد اي خطوة خالص غير لما نكون متأكدين إنك موافق يا أكمل
اكمل قام وبص لأمه: انا قولت إني موافق انتوا اللي مش راضيين تصدقوا إن موافق
فريدة بهدوء: بس أنا إحساسي عمره ماكدب عليا يا أكمل
أكمل بيحاول يبان عادي وابتسم: لا ياماما المرادي هيكون غلط تقدروا تحددوا معاد
أكمل سابهم وخرج الجنينة وليل خرجت وراه عشان تتكلم معاه وفهد خرج هو كمان بس فضل واقف بعيد
ليل: خرجت ليه؟
أكمل: أبداً مافيش
ليل: انت مش موافق صح؟
اكمل: عاوزة إيه ياليل
ليل: فرح مامتك يا أكمل
اكمل بعصبية: وأنا مين يفرحني ياليل ليه كلكم مصممين تضغطوا عليا
ليل بهدوء: بس يا أكمل دي أمك
اكمل بحزن: ماهي عشان أمي أنا مش قادر اقتنع بفكرة جوازها
ليل: أنا عارفة يا أكمل انك مش قابل راجل تاني في حياة مامتك بس صدقني هي هتكون مبسوطة وانت كمان لان والله عمو مصطفى إنسان محترم
اكمل ساكت ومش عارف يرد يقولها إيه
ليل: ها يا أكمل؟
اكمل بصلها: خليه يجي ياليل
اكمل سابها ودخل بس طبعاً قابل فهد واقف
فهد وقفه واتكلم: صدقني مش هتندم
اكمل بصله ودخل وفهد راح لليل
فهد إبتسم: الله عليكي
ليل بثقة: يا إبني دا أنا مرات الفهد
فهد قربها منه بحب: طب إنتي وحشتي الفهد
ليل إتكسفت وبصت في الأرض: وهو كمان وحشني
فهد رفع وشها وبيقرب عشان يبوسها هي صرخت وفهد اتخض
فهد بقلق: في إيه؟
ليل: بيتحركوا يافهد
فهد: هما مين؟
ليل مسكت ايدين فهد وحطتها علي بطنها: ولادنا
فهد رغم انه طاير من الفرحة بس متغاظ منها عشان خضته😂
ليل: أنا بجد مستنية أشوفهم أوي
فهد إبتسم: وأنا كمان
فهد كلم مصطفى وقاله إنه يجي الليلادي وفعلا مصطفى كان عندهم في المعاد وكلهم قاعدين في أوضة الصالون مستنيين أكمل وبعد ربع ساعة من وصول مصطفى أكمل نزل بس دخل من غير سلام ولا كلام وقعد جمب فهد، مصطفى أصلا عارف إنه رافض وعشان كدا سايبه براحته
البارون بص لأكمل: ها نقرأ الفاتحة؟
أكمل بص لجده بهدوء وما اتكلمش
مراد: السكوت علامة الرضا
مصطفى: لا انا عاوز اسمعها منه الاول
أكمل بيبصله واتكلم: دا على أساس إن ردي هيفرق اوي معاكم
فهد بغضب: أكمل
مصطفى: سيبه يافهد أنا عاوزه يتكلم
أكمل بعصبية: عاوزني اتكلم؟ طب حلو اوي انت ليه جيت وانت عارف اني رافض حتى لو قولت انك تيجي
مصطفى: مافيش حد بيعمل حاجة غصب عنه يا أكمل، فاكر يوم ماكنت عندي واتكلمنا سوا افتكر كدا السؤال اللي سألتهولك وقتها وماردتش عليا فيه انا بقى عرفت إجابتك إيه من سكوتك بس صدقني دا شعور عادي وطبيعي إنك تحسه بس والله يا أكمل عمرك ماهتندم إنك وافقت
أكمل ساكت ومش بيتكلم وفهد متعصب بسببه
أدهم: خلاص يا أكمل؟
أكمل بص للفهد اللي قاعد اصلا متعصب: ماشي
خلاص بيقرأوا الفاتحة وفهد خرج يبلغ البنات وفريدة وليل أول ماعرفت زرغدت وفهد بيضحك عليها
ليل بغضب: بتضحك على إيه
فهد ضحك اوي: بتعملي ايه يامجنونة
ليل قربت منه ومسكته من چاكيت البدلة واتكلمت: بلاش جناني يطلع ها
فهد بص لإيديها وبصلها برفع حاجب🤨: انتي أد الماسكة دي
ليل شالت ايديها بسرعة: نعم
فهد ضحك غصب عنه: ناس مش بتيجي غير بالعين الحمرا
ليل بغضب: طب شوف هتنام فين الليلادي بقى
فهد غمزلها: في حضن مراتي طبعاً
ليل بصتله بغضب وقعدت مكانها، بعد شوية آيه باين عليها جعانة وبتدور على أدهم
ليل بصتلها: في إيه؟
آيه: أنا عاوزة فسيخ
ملك بصتلها بصدمة: بتقولي إيه ياختي
نور ضحكت اوي: يانهار اسود عليكي يا آيه😂
أمل ماسكة بطنها من الضحك: انا بقول تهربي أحسن بدل ما أدهم يسمعك
ليل عنيها دمعت من كتر الضحك: اذا كان فهد ساب الجناح عشان الرنجة امال ادهم هيعمل ايه مع الفسيخ
هاجر بتضحك جامد: الله يكون في عونك يا اخويا
سارة وناجي وصلوا وشافوهم قاعدين
سارة بصت للبنات: خلاص قرأوا الفاتحة؟
ليل: ايوا ياسارة
سارة: ماما فين؟
ملك: قاعدة جوا مع عمو مصطفى
ناجي ضحك: لازم تقولي يعني
سارة بغضب: أمال يعني هيخبوا عليا
ناجي بص لليل: فين الفهد؟
ليل: هتلاقوهم فوق قاعدين مع أكمل
ناجي سابهم وطلع وسارة قعدت مع البنات ومتعصبة
جوا عند فريدة ومصطفى
مصطفى: تعرفي إني مبسوط أوي
فريدة بخجل: وأنا كمان
مصطفى بسعادة: ربنا يقدرني وتفضلي دايماً سعيدة معايا
ناجي لما طلع للشباب كانوا كلهم قاعدين وأكمل قاعد في النص وقعد يضحك
ناجي: إيه دا في إيه؟
آسر: تعالى يا ناجي يا اخويا أقعد
اكمل بغضب: هو انت معندكش دم هو انت فرحان كدا ازاي دا امك بتتجوز
آسر: وفيها إيه هي حرة في حياتها وبعدين ماتسيبها تعيش اللي باقي ليها مع انسان بتحبه
اكمل كان قايم يضربه بس فهد مسكه: اقسم بالله لو قربتله أنا اللي هقفلك يا أكمل
اكمل بغضب: انت مش سامعه
ادهم: على فكرة هو مقالش حاجة عيب ولا حرام يا اكمل
وهما قاعدين يتكلموا آيه طلعتلهم وادهم استغرب انها طلعت وسابت البنات
ادهم بقلق: في إيه؟
آيه بتبص للشباب وبصت لأدهم: أنا جعانة
ادهم بيحاول يتمالك أعصابه: طب ماتخلي حد يعملك الاكل
آيه: لا ماهو اللي انا عاوزه أكله مش موجود هنا
فهد فهم ان آيه بتتوحم وبصلها بشك: اوعي تكوني اتوحمتي ذي الهانم بتاعتي
آيه بتوتر: اها بتوحم ها
ادهم: لا وربنا ماتحصل البتاعة دي مش هتدخل القصر تاني
شريف ضحك: اهدى يا أدهم وفيها إيه يعني
آيه اتكلمت: ياريتها جات عليها
ادهم بيبصلها بشك: امال انتي بتتوحمي على إيه يازوجتي العزيزة
آيه: فسيخ
فهد مقدرش يمسك نفسه من الضحك لا هو ولا بقية الشباب حتى أكمل
اكمل بيضحك أوي: يخربيتك عقلك ربنا يستر عليا
أدهم من صدمته مش عارف يتكلم وفهد مش قادر يتكلم من كتر الضحك والبنات كلها طلعوا ليهم فوق ومن منظر أدهم عرفوا انها قالتلهم
هاجر بتضحك: ايه يا ادهم مالك في إيه
ادهم بص لآيه بصدمة: آيه انتي بتهزري صح
آيه غصب عنها ضحكت: والله أبداً دا أنا بتكلم بجد
ادهم بغضب: على جثتي
ليل ضحكت: كان غيرك اشطر
فهد ضحك اوي: ايوا اسمع مني هتفضل تقول لا وفي الآخر هتعمل اللي هي عاوزاه
أدهم: لا ياعم دا الرنجة ارحم وربنا
آيه بزعل: انا عاوزة فسيخ اتصرفوا
ادهم بص لشريف: بقولك ايه خد اختك واعزمها عليه في اي مكان بارة عشان على جثتي يدخل هنا
آيه: يعزمني فين لا ياعم انا عاوزة أكله براحتي وما اكونش شايلة هم الناس بتتفرج عليا
إسلام: البس يامعلم
ناجي مش قادر يتكلم من الضحك: كفاية بقى مش قادر
سارة بصت لناجي وضحكت: عشان تعرف إن المانجا ارحم
ناجي غمزلها: طبعاً المانجا ارحم يامانجايتي
اكمل بص لناجي: بس يابابا انت بتعاكسها أدامي
ناجي: دي مراتي يا أخ
وهما قاعدين يتكلموا دخل البارون وشايفهم قاعدين بيضحكوا وقعد معاهم
البارون: ضحكوني معاكم
فهد حكاله عن اللي حصل وهو بيضحك وفرحان في أدهم
أدهم بص لآيه وإتكلم بغضب: عاجبك كدا
آيه بتضحك جامد: الله وأنا مالي
ادهم قام وسابهم وآيه باردوا مصممة تاكل فسيخ وشريف وناجي راحوا يشتروه😂، أكمل لما نزل تحت كان مصطفى خارج مع فريدة
مصطفى بص لأكمل: بلاش نبقى بعاد عن بعض يا أكمل
أكمل بهدوء: انا طلاما وافقت يبقى قابلك معانا بس أنا مش هقولك إني هقدر اتعايش مع الوضع الحالي بسرعة أكيد هاخد شوية وقت
مصطفى: خد الوقت اللي إنت عاوزه
مصطفى خلاص مشي وبعد نص ساعة شريف وناجي رجعوا وادهم واقفلهم على باب المدخل
ناجي: مش هدخلنا ولا إيه
أدهم : على جثتي البتاع دا يدخل جوا
شريف ضحك: يا ابني الواد هيطلعله فسخاية في وشه
أدهم: باردوا لا
آيه خرجتلهم وبتتكلم بحماس: الله انتوا جيتوا
ادهم بصلها بغضب: مش هيدخل جوا
آيه بزعل: لا هيدخل بس كدا
فهد جه من جوا شال ادهم وبص لشريف وناجي: ادخلوا بسرعة 😂
شريف وناجي دخلوا جري ووراهم آيه، وقعدوا في المدخل جوا وكلهم قعدوا حتى مراد وعبدالعزيز😂
فهد وادهم دخلوا وبيبصوا لبعض بصدمة
فهد: هو في ايه
مراد: هو في حد مابيحبش الفسيخ
أدهم كاتم مناخيره بإيده: دا ريحته معفنة
عبدالعزيز: لا بص انت تروح تعالج مناخيرك
فهد عنيه دمعت من الضحك وبيبص على ليل: وانتي بتعملي إيه
ليل ماسكة فسخاية في ايديها بتاكلها: باكل فسيخ ياحبيبي
شريف اتكلم وهو بياكل: ماتكتروش منه
آيه بتاكل بشراهة: لا محدش يقولي ماتاكليش
ادهم ضرب كف على كف وبصلها: شوفيلك اوضة تنامي فيها الليلادي
ليل بصت لفهد برفع حاجب: وانا كمان ولا ايه
فهد غمزلها: مقدرش انام بعيد عن حضن ليلتي
آيه بصت لأدهم بغضب: اتعلم
ادهم بغيظ: انسي
عدت الشهور ومصطفى وفريدة اتفقوا إن كتب كتابهم هيكون يوم فرح هاجر وعماد ويكون في القصر رغم ان عماد كان رافض بس عمه علي أقنعه، كل البنات مع هاجر في البيوتي سنتر ماعدا ليل هي اللي في القصر وفريدة كمان والشباب مع أدهم بيجهز بس فهد في حمام الجناح بتاعه هو وليل بياخد دش عشان يلبس وليل واقفة ادام المرايا وبتبص لبطنها وبتكلم نفسها: لا الفستان مش حلو أنا مستحيل انزل بالبطيخة دي
فهد خرج وسمعها وقرب منها وحضنها وبصلها في المرايا: تعرفي إن دي أحلى بطيخة شفتها
ليل دورت وشها وبصتله: يعني الفستان شكله حلو عليا وبطني كدا
فهد إبتسم بحب: أوي لدرجة إن عاوز اخبيكي عن عيون كل الناس تحت
ليل بحب: بحبك
فهد خطف بوسة: طب يلا نجهز عشان ننزل
في البيوتي سنتر خلاص هاجر باقت جاهزة والبنات كمان ومستنيين العريس والشباب، بعد نص ساعة ليل نزلت مع فهد وهو اخد الشباب واتحركوا لمكان البنات
فهد لعماد: يلا ادخل جيب عروستك
عماد دخل واكمل رايح وراه
فهد: رايح فين؟
اكمل: اجيب عروستي انا كمان
فهد ضحك: عروسة ايه دا بطنها ادامها
عماد خرج بهاجر والبنات حواليهم وكل واحد اخد مراته معاه في عربيته بس ادهم اخد آيه ومعاه هاجر وعماد وراحوا مكان تصوير السيشن وكل واحد اتصور مع مراته بس فهد وليل كانوا احسن كابل فيهم، ليل كانت لابسة فستان كاشمير بحجاب أبيض بكوتشي أبيض، اما آيه فكانت لابسة فستان لونه أزرق بحجاب أبيض وكوتشي أبيض، اما ملك ونور وسارة وأمل كانوا لابسين نفس الالوان فستان دهبي بحجاب دهبي بجذمة دهبي بس كل واحدة استايل مختلف، اول ماوصلوا القصر عماد دخل جوا ومراد خرجلهم ومسك إيدين هاجر وادهم مسك ايديها التانية يعني كانت في النص مابينهم ودخلوا يسلموها لعماد ادام كل الناس اللي حاضرة الحفلة وبعد شوية المأذون وصل وكتب كتاب فريدة ومصطفى إتكتب واكمل ماسك ايدين امه مقعدها جمبه
مصطفى: على فكرة هي باقت مراتي يعني انا جوزها
أكمل: وأنا إبنها
فهد راح عند اكمل وقومه: انت سايب مراتك وقاعد ترخم عليهم ليه يارخم يلا روح لملك
اكمل راح لملك ومصطفى قاعد جمب فريدة وفرحانين ببعض، وخلاص كتب كتاب عماد وهاجر تم والكل فرحان بيهم وبيباركلهم، ليل واقفة جمب فهد وحاسة بتعب بس محبتش تقلق فهد، نور عرفت انها حامل في شهرين وكانت فرحانة أوي لانها كانت خايفة وقلقانة لما حملها إتأخر شوية، جه وقت الرقصة الرومانسية وكل واحد اخد مراته ترقص معاه وآسر وإسلام بيرقصوا سوا😂😂
وفجأة وفي وسط الرقص والفرحة ليل صرخت
فهد بقلق: في إيه؟
ليل بتعب: انا شكلي بولد
فهد بصدمة: ودا وقته؟!
ليل بغضب: هو انت لسة هتتكلم بسرعة عالمستشفى
فهد اخد ليل وجري بيها على المستشفى والكل وراهم، ياحظك ياهاجر انتي وعماد😂، بعد ربع ساعة وصلوا المستشفى وليل مش مبطلة صريخ وبتضرب في فهد
ليل بغضب: انت السبب
فهد غصب عنه ضحك: وبعدين بقى
ليل دخلت اوضة العمليات ومصممة ان فهد يدخل معاها وفعلا دخل معاها وكانت خايفة جداً وبعد ربع ساعة ليل تمت ولادتها وولدين ذي القمر واخدين ملامح فهد بلون بشرة ليل ولسة طبعاً العيون مغمضة مش عارفين اللون
فهد لليل: حمدلله على السلامة ياقلبي
ليل بتعب: الله يسلمك ياحبيبي
ليل خلاص خرجت لأوضة عادية والكل حواليها
امال شايلة ولد من الولاد والتاني في ايدين علي
البارون: هتسموهم إيه؟
ليل وفهد بصوا لبعض وابتسموا واتكلموا في نفس واحد: ليث وأكمل
الكل عجبوا الأسماء وبعد ساعات ليل رجعت القصر والكل باردوا حواليها
عدت الشهور وكل بنت ولدت في وقتها
امل ولدت بنوتة ذي القمر واسمها حور
ملك ولدت بنت ذي القمر وواخدة ملامح ملك واسمها چويرية
بالنسبة بقى لسارة جابت توأم بنت وولد وسمتهم معاذ ومرام
آيه بقى ولدت ولد وطالع نسخة من أدهم واسمه أيهم
نور ولدت ولد واسمه أمير
هاجر بقى ولدت بنتين وسمتهم ديما وريما
بالنسبة بقى لآسر وإسلام فكل منهم إتجوز ، آسر مراته إسمها مريم وإسلام مراته إسمها مي
آسر معاه ولد اسمه باسم وإسلام معاه بنوتة إسمها أسيل
عدت الشهور والسنين والولاد كبروا، ملك قاعدة لابسة نظارة نظر وبتقرأ في كتاب وإتفاجأت چويرية بتجري وبتعيط
ملك بقلق: في إيه؟
چويرية بعياط: مافيش
ملك: ازاي مافيش مين مزعلك
چويرية: ليث ياماما
ليث خرج من جناحه وواقف ادامهم وبيبصلهم ومربع إيديه عند صدره وبيتكلم بكل ثقة وفخر: مش مسموح لأي حد يدخل جناح الليث إبن الفهد
(وهنا بقى نقول هذا الشبل من ذاك الأسد)
(هذا الليث من ذاك الفهد)
تمت بحمد الله
لقراءة الرواية كاملة اضغط على : (رواية أحفاد البارون)
