رواية أبي بواب وأمك خادمة الفصل السادس والعشرون 26 بقلم رانيا عمارة
رواية أبي بواب وأمك خادمة الجزء السادس والعشرون
رواية أبي بواب وأمك خادمة البارت السادس والعشرون
رواية أبي بواب وأمك خادمة الحلقة السادسة والعشرون
{ارتبكت علا ارتباك شديد اول ما شافت بيري قصادها، طلعت تجري، ولكن البودي جارد كانوا بيجروا وراها، لحد ما مسكوها وهي بتصرخ…قربت منها بيري بكل برود، وسحبت شنطتها، وفتحتها وطلعت كل الورق اللي فيها، وبعد ما خلصت رميت شنطتها في الزبالة}
بيري:اللي يجي عليا مبيكسبش يا علا…ودوها مكانها اللي تستحقه
علا(بصويت) :انا معملتش حاجة!!!…هيودوني فين؟؟… انا مش هروح في حته!
{ولكن بيري مردتش عليها، ودخلت المطعم، والبودي جاردات خدوها ومشوا…دخلت بيري مكتبها وقعدت على المكتب وبصيت حواليها، وخرجت اللابتوب و رجعت الكاميرات تشوف اية اللي حصل..وبعد ما شافت كل حاجة مسحت الفيديو!…وبعد ما البودي جاردات خدوا علا.. رموها في أوضة ضلمة وقفلوا عليها…قامت علا في الضلمة وهي بتلف حوالين نفسها}
علا(بصويت) :حرام عليكم…منكم لله!!
=============================
{وبعد ما حاتم نام في الكهف والنهار طلع..لقى واحد بيصحيه، وبيديله ماسك وكاب}
حاتم(بإستغراب) :انت مين؟
_نويري بيقولك البس دول وتعالى معايا..بس خد بالك انت هناك أخرس مبتتكلمش!
حاتم:لية بقي ان شاء الله؟
_عشان المهمة تتم، ده لو انت عايز كده!
حاتم:من الواضح ان أستاذ نويري سيحلي وسطكم!
_متخافش انا تبعه
{قام حاتم ولبس الماسك والكاب}
_ورايا
{مشي حاتم ورا الشخص اللي من طرف نويري، وركب معاه العربية لحد ما وصلوا للجبل..وهناك دخل وسط ناس كتير لابسين ماسكات، ونويري وقف قصادهم ووراه غسان}
نويري:صباح الخير عليكم يا شباب
كلهم:صباح النور
نويري:النهاردة أول يوم شغل..وانا من نظرتي للواحد اعرف هو عملي ولا أي كلام…وانا أحب الناس اللي بتشوف شغلها، زي عينيا…هتشتغل بضمير هتاخد مرتبك كامل، هتشتغل أي كلام هتاخد مبلغ صغير على قد المجهود اللي بذلته!..انا هنا مبظلمش حد…احنا عندنا ٣ طلعات..وكل طلعه في مكان شكل…هنقسمكم تلاتات..انتوا عددكم كام الأول؟
{وابتدا يعد هو وغسان}
غسان: ١٦ واحد
نويري:تمام، كل مجموعه هتتكون من ٥ أفراد، وآخر مجموعة هتبقي ٦…يلا جمعولي نفسكم
{قرب غسان وابتدا ينظمهم مجموعات وبعد ما خلص}
نويري:يلا بينا يا شباب
{ومشي قدام وكلهم وراه، لحد ما ركبوا ٣ عربيات…غسان ركب مع مجموعة ومشي، والشخص اللي جه لـ حاتم…ركب مع مجموعة ومشي…ونويري خد حاتم واللي معاه وركبوا ومشوا وصلوا مكان بعيد في وسط الصحراء فيه جبال…نزلوا من العربية بالأدوات اللي معاهم ومن ضمنهم حاتم…ونويري قصادهم}
نويري:انا عايزكم تحفروا الحته دي بعمق ٢٠ متر
_بس عشرين متر كتير اوي!
نويري:ولا كتير ولا حاجة…قدامكم لحد بالليل تكونوا وصلتوا للعمق اللي انا عايزوا..عايزين الأمانة تطلع سليمة، اتفقنا؟
=اتفقنا
نويري:اتكلوا على الله
{رجع نويري للعربية وجاب كرسي وقعد يتفرج عليهم، وكان بيبص لـ حاتم وهو مبتسم..وابتدا حاتم واللي معاه يحفروا}
===============================
{عند زهرة كانت بتجهز عشان تروح الشغل مع وجيدة، لقيت الباب بيخبط، لسة وجيدة هتروح تفتح، قامت زهرة…وبعد ما فتحت لقيته كمال وعلى وشه حزن الدنيا كله!}
كمال:وحشتيني اوي يا زهرة!
زهرة(مصدومة) :انت بتعرف مكاني ازاي؟؟
كمال(بحزن) :قلبي بيحس بيكي يا زهرة!..متنسيش ان يوم ما غسان جه يقـ.ـتل اخو صاحبتك، كنت معاه!…وعارف ان ده بيت مهرة وعارف انك ملكيش غيرها ومعاها في أي مكان تروحه!
زهرة(بخوف) :انت عايز مني اية؟…وبتلف ورايا في كل مكان أروحه ليه؟…احنا اللي بينا شوية معلومات وبمجرد ما الحكومة تلاقي غسان، هيتقطع الحبل اللي بينا!
كمال:انا نفسي تسامحيني يا زهرة، وتقتنعي ان كل اللي حصل ده مكنش بمزاجي…أخوكي مبهدلني ومش مديني فرصة اتصرف من دماغي!
زهرة:وانت عايز اية برضة مفهمتش!
كمال:انا جيت أشوفك وأقولك ان انا اتغيرت…انا كنت زمان بخاف من غسان…بس من ساعة ما حبيتك والخوف اتشال من قلبي، انا بقيت واحد تاني…انا مستعد اساعدكم نخلص من غسان بس في النهاية تسامحيني وتوافقي اننا نتجوز!
زهرة:نتجوز مرة واحده؟
كمال:واية اللي يمنع يا زهرة؟..اية لسة مبتثقيش فيا؟
زهرة:هثق فيك ازاي بعد ما خونت ثقتي فيك؟
كمال:وانا مستعد اصلح اللي اتكسر، وأرجع اخليكي تثقي فيا من أول وجديد، اديني فرصة يا زهرة…ده كلنا بنغلط ومحدش معصوم من الغلط!
زهرة(بتردد) :ماشي يا كمال…ياريت تاخد بالك لا غسان يشم خبر…ساعتها انت أول واحد هيخلص منك
كمال: هاخد بالي كويس…انتي ممعاكيش تليفون لحد دلوقتي؟
زهرة:تليفوني سيبته في اليونان، وممعايش أجيب غيره
{راح كمال مطلع فلوس من جيبه واداها لـ زهرة}
كمال:خدي دول يا زهرة واشتريلك تليفون جديد، عشان اعرف اكلمك
{وطلع ورقه وقلم من جيبه وكتب رقمه}
كمال:انا عارف ان رقمي مع ست وجيدة على تليفونها، بس خلي ده معاكي زيادة أمان
زهرة(بتردد) :طيب
كمال:سلام يا زهرة
زهرة:سلام
{دخلت زهرة وقفلت الباب، وخرجت وجيدة من الحمام ودخلت تبص على مهرة}
وجيدة:احنا هنروح الشغل بقى يا مهرة، صينية الأكل جنبك، كلي ومتطنشيش، وبعد ما تاكلي خدي الدوا
مهرة:حاضر
وجيدة:مين اللي كان على الباب يا زهرة؟
زهرة(بتردد) :ده كان واحد بيسأل على حد من سكان البيت، وطلعت الشقة غلط
وجيدة:طيب، يلا عشان ست چيهان مستنيانا
زهرة:حاضر، خدي بالك من نفسك يا مهرة
مهرة:حاضر وانتي كمان
{مشيت وجيدة و زهرة وراحوا شغل العمارة..وبعد ما نزلوا بـ ٥ دقايق..الباب خبط تاني..قامت مهرة وبصيت من العين السحرية لقيت ضحى ونسمة وجوزها..استغربت جداً من زيارتهم، وعدلت الطرحة وفتحت الباب}
نسمة:السلام عليكم
مهرة:وعليكم السلام ورحمة الله وبركاته
{قربت نسمة وحضنت مهرة، ودخلت…وقربت ضحى تحضن مهرة..وعبدالله سلم على مهرة..ودخلوا كلهم قعدوا}
نسمة:عاملة ايه يا مهرة؟
مهرة:الحمدلله بخير
ضحى:نسمة أول مره تيجي من بعد جوازكم
مهرة:اه مانا مستغربه شوية
نسمة:لا متستغربيش…انا من ساعة ما عرفت وكنت عايزه آجي أشوفكم واباركلكم على خبر الحمل..مبروك ياحبيبتي ربنا يكملهالك على خير وتقومي بالسلامة يارب
مهرة:الله يبارك فيكي يا نسمة، كلك واجب
ضحى:احنا كنا هنروح هناك على الشقة اللي في البلد، بس قولنا نكلم بابا الأول يمكن تطلعوا مش هناك ولا حاجة!
مهرة:اه مانا قاعدة مع ماما لحد ما أولد ان شاء الله
نسمة:على خير بإذن الله ياحبيبتي…أمال حاتم فين؟
مهرة(بتردد) :حاتم؟….حاتم سافر في شغل
عبدالله(بإستغراب) :سافر ومقالش لحد فينا؟… ده هويدا هتعمل موال لو عرفت انه سافر من غير ما يقولها!
مهرة(بتردد) :هي طنط هويدا تعرف حاجة عن جوازي انا وحاتم؟
نسمة:يالهوي تعرف اية بس..متوجعليش بطني يا مهرة…اهو انا شايله هم لو عرفت هتعمل اية!
ضحى:خلاص بقى يا نسمة متخوفيهاش…يمكن متعملش اللي انتي متوقعاه في دماغك ده…ويمكن الموضوع يعدي من غير مشاكل ولا حاجة!
نسمة:مش قصدي أخوفها والله، ده انا اللي خايفه..على العموم ربنا يسترها وتعدي على خير
مهرة:لا خير ان شاء الله متقلقوش، حاتم برضة له تأثير على تفكيرها..ممكن يلين دماغها بكلمتين حلوين
{وقامت مهرة من مكانها}
نسمة:لا ماانتي متعرفيهاش كويس، ماما مفيش حد يقدر عليها وعلى دماغها حتى ولو كان الجن الأزرق
مهرة:ربنا يحلها يا نسمة، سيبيها على الله…انا هدخل المطبخ ادوني ١٠ دقايق بالكتير
نسمة:لا والله مانتي عاملة حاجة..اقعدي
{وقامت لـ مهرة}
مهرة:عيب يانسمة مينفعش انتوا في بيتنا ولازم تاخدوا واجبكم!
ضحى:اقعدي بس يا مهرة احنا مش جايين نتعبك
مهرة:ياجماعة مينفعش الكلام ده والله ميصحش!
نسمة:طب اقعدي انتي، وانا هدخل اعمل بدالك
مهرة:ماشي يا نسمة اللي تشوفيه
{قعدت مهرة..ودخلت نسمة المطبخ، ولما فتحت التلاجة ملقتش فيها أكل خالص ولا حتى عصير..ضربت ايديها علي قلبها وهي مصدومة}
نسمة:يانهار اسود ده البيت مفيهوش لقمة واحدة توحد ربنا!..ده شكل الحالة ضنك…امال بتتابع عند الدكتور ازاي بس وبتجيب فلوس منين؟..لا حول ولا قوة الا بالله العلي العظيم
{وفتحت الخزنه لقيت فيها باكو شاي وعلبة سكر..راحت واخدة البراد مليته ماية..وحطيته على البوتجاز}
===============================
{عند غادة وفاتن في الأوضة كانوا قاعدين مع بعض بعد ما نبيل راح شغله، والباب مقفول عشان التكييف..كانت غادة في حالة صعبه وخايفه من رد فعل جوزها لو عرف انها كانت تعرف!}
فاتن:مالك يا غادة مش مظبوطة لية من امبارح؟
غادة(بخوف) :خايفة أوي يا ماما…خايفة نبيل يعرف إني كنت عارفة حوار خيانة علا لـ عادل ومخبيه..انا والله خبيت عشان المشاكل…و برضة لو كنت اتكلمت مكنتش ضامنة انه هيصدقني والموضوع هيعدي بسلام!…ساعات بقول لنفسي كنت قوليله واللي يحصل يحصل، احسن ما كان عادل يكمل معاها على عماه!
فاتن:احنا ملناش دعوة باللي حصل ده…ومش هنشيل غلطة غيرنا…هي اللي غلطت وهي برضة اللي تتحاسب!
غادة:بنتك غلطانه…والمشكلة انها فاكره انها كده صح، ومش قابله أي نصايح مننا…خدي بالك بيري مش هترتاح غير لما تودي نفسها في داهيه!
فاتن:هي عارفة ان انا أعرف الموضوع ده؟
غادة:لا طبعا متعرفش
فاتن:انا هيبقي ليا كلام تاني مع أختك
{وفجأة نبيل دخل الأوضة…قامت غادة وفاتن وهما مصدومين انه سمع كل كلامهم..بلعت غادة ريقها بصعوبة، وضربات قلبها زادت…قرب منهم نبيل وهو مصدوم من اللي سمعه}
غادة(بخوف شديد) :هو انت مروحتش الشغل؟
نبيل(بصوت حاد) :كنتي عارفة ومخبيه يا غادة؟…سايبه أخويا مكمل في الجوازه اللي انتي وطنط عارفين انها مش هتكمل؟
غادة(بخوف+دموع) :لا يا نبيل الموضوع مش كده..انا خبيت عشان خوفت انك متصدقنيش ويحصل مشاكل مابينا بسببهم!
نبيل(بصوت حاد) :دي كلها مبررات عبيطة ملهاش أي معنى…مفيش أي مبرر يديكي الحق انك تكوني عارفة الحقيقه وساكته..ده حتى يعني الساكت عن الحق شيطان أخرس…ولا كنتي مستنيه انه يتجوزها ويلبس فيها عشان تحني علينا وتتكلمي؟
فاتن:اية اللي انت بتقوله يا نبيل؟…انت كمان بتتصنت علينا؟…هي دي الاخلاق والمبادئ اللي أهلك ربوك عليها؟
نبيل(بصوت حاد) :انا لا كنت بتصنت ولا زفت…انا رجعت من برا عشان أجيب الورق اللي نسيته…وانتوا اللي صوتكم كان عالي…ياريت بعد كده تتكلموا بصوت واطي عشان ميجيش واحد غريب زي ويسمع الأسرار اللي مابينكم!!
غادة(بتضحك بحزن) :غريب؟…مين قال انك غريب؟…اية الكلام اللي بتقوله ده يا نبيل؟
نبيل(بصوت حاد) :دي الحقيقه مادام داريتوا عليا يبقى انا وسطكم واحد غريب…معتقدش ان انا لو منكم وعليكم كنتوا هتداروا عليا حاجة زي دي!
فاتن:انت فاهم غلط، وعمال تتكلم وخلاص، ممكن تقعد عشان نفهمك الصح؟
نبيل(بصوت حاد) :الحقيقه بانت خلاص، ومالوش لازمة الكلام..عن اذنكم!
{وخرج من الشقة وهو مدايق…قعدت غادة على الأنترية وهي بتعيط وفاتن جنبها بتطبطب عليها}
==============================
{عند بيري في شقتها..لقيت الباب بيخبط..قربت تبص لقيته البواب}
بيري(بصوت عالي) :عايز اية؟
البواب:بلم الزبالة يا ست بيري
بيري:زبالة؟… طيب ثواني
{دخلت بيري تجيب الزبالة من الباسكت وخرجت تفتح الباب، لقيت علاء في وشها بالمسدس، صرخت ورميت الزبالة ودخلت تجري ودخل وراها بعد ما رزع الباب…لحد ما دخلت الاوضة وقفلت على نفسها وهي بتصوت}
بيري(بصويت) :انت عرفت مكاني ازااااااي!!!!!
علاء(بزعيق) :أقسم بالله لأحـ.ـرق قلب أمك عليكي
{ورفع المسدس وشد أجزاء..وضرب نار على باب الأوضة..وقعت بيري ووطت على الأرض وهي مازالت بتصرخ…وعلاء نازل ضرب بالنار في الباب..خرجت بيري في البلاكونه وهي بتصوت بأعلى صوتها}
بيري(بصويت) :الحقوووني من المجرم ده…الحقوني هيـ.ـموتني!!!..الحقوني انا بموت…الحقووني
{اتلم سكان العمارة وكسروا الباب..وحاصروا علاء من كل ناحية، مكنش قدامه غير انه ينط من الشباك، لحد ما نط ونزل على المواسير وهرب…جريت ستات العمارة على بيري وهي مرميه على الأرض ومنهارة وبتلطم!}
بيري(بصويت) :كان هيموتني….كنت هموت…اااااه
_اطلبوا الشرطة بسرعة!!!
{وبالفعل اتصلوا بالشرطة…وفي قسم الشرطة، كانت بيري أعصابها سايبة من اللي حصل، والكحل سايح على وشها ومتبهدلة!}
الظابط:اية اللي حصل يا مدام بيري؟
==============================
{عند مهرة…بعد ما خرجت نسمة بالشاي وقعدت}
مهرة:بس خدي بالك المرة الجاية انا اللي هعمل، متاخديش على كده!
نسمة:المرة الجاية بإذن الله نجيلك بالشربات وانتي معاكي حبيب عمته
مهرة:ان شاء الله..أما صحيح عم متولي مجاش معاكم لية؟
نسمة:عنده شغل في العمارة وهو يقدر يسيبها ثانية؟…الناس هنا مبترحمش والله يا مهرة
مهرة:ربنا يديله الصحة
نسمة:يارب
{رن حاتم على مهرة، فقامت مهرة}
مهرة:ده حاتم، ثواني هخرج أرد عليه
ضحى:خدي وقتك
{خرجت مهرة البلاكونة و ردت على حاتم وهي قلبها بيتنطط من الفرحة أول ما شافت اسمه}
مهرة(بفرحه) :عامل ايه يا حبيبي، كويس؟
{كان حاتم واقف ورا الجبل في حته مفيهاش حد}
حاتم(بإبتسامه) :وحشتيني اوي اوي يا مهورتي!
مهرة(بفرحه) :وانت اكتر يا حبيب قلبي وروحي، مش مصدقة انك كلمتني…قولي بقي عملت اية، طمن قلبي!
حاتم:الحمدلله بخير يا مهرة…لقيت الكلب غسان، والحمدلله لقيت اللي يساعدني بس يارب يصدق بس
مهرة:لقيته فين؟
حاتم:مستخبي في الجبل مع ناس، انا عايزوا يديلي الأمان عشان امسكه مسكة معلمين وأحدفه لحضن الحكومة وابقى كده خلصت مهمتي وارتاحت وأرجعلك بقى!
مهرة:ياريت يا حاتم ترجع..انا مش موافقة على اللي بتعمله ده، بس هعمل اية ما باليد حيلة!
حاتم:بكرا تعرفي اني بعمل كل ده لمصلحتنا..انا عايزنا نعيش في المستوى اللي بنحلم بيه من زمان، كفاية بقى الدنيا حطيت علينا بما فيه الكفاية لحد، آن الآوان نحصد اللي زرعناه الفتره اللي فاتت!
مهرة:صدقني يا حاتم، كنوز الدنيا كلها ولا تعوض شعره منك…ده انت الخير والبركة…انت مش غالي عليا انا بس…لا غالي على عم متولي واخواتك، غالي علينا كلنا والله…واه بالمناسبة نسمة وضحى وعبدالله هنا جم يباركولي
حاتم(بفرحه) :بجد يا مهرة؟
مهرة:اه والله، طب استنى كده
{دخلت مهرة الصالة واديت الموبايل لـ نسمة}
مهرة:خدي حاتم معاكي على التليفون
نسمة:الو يا حاتم..إخص عليك، كده تسافر ومتعرفش حد فينا؟…مانت خلاص شكلك اتعودت تداري ونسيت اننا أهلك!!
حاتم(بيضحك) :ازيك يا نسمة، وإزي عبدالله، عاملين اية؟
نسمة:الحمدلله، بس برضة متغيرش الموضوع…طب هويدا وقولنا ماشي عشان المشاكل ووجع الدماغ، لكن احنا كمان، لأ كده كتير!
حاتم:كل الفكره ان مجاتش مناسبة أقولكم، لكن انا لا بداري ولا حاجة…ده انتوا اخواتي وأقرب الناس ليا!
نسمة:ماشي ياسيدي سماح المرة دي، المهم طمني عليك عامل ايه في الغربة، مرتاح؟
حاتم:الحمدلله، الواحد بيستحمل أي حاجة عشان القرش
نسمة:ربنا يقويك يا حاتم، ويردك وسطنا بألف سلامة
حاتم:يارب
نسمة:قولي بقي سافرت فين؟
حاتم:ليبيا
نسمة(مصدومة) :ليبيا؟..يخربيتك اية اللي وداك هناك؟
===============================
{بالليل بعد ما خلصوا حفر ووصلوا أخيراً للأثار…قرب نويري وبص وهو مبتسم وكله فخر}
نويري:عفارم عليكم يا رجالة…عايز اتنين منكم ينزلوا يربطوه عشان الونش جاي يرفعه
{نزل اتنين وربطوا التمثال ، وبعد ما الونش جه ربطوهم في بعض وابتدوا يطلعوه…وبعد ما وصل ونزلوه على الأرض..قعد نويري على الأرض بالقرب من التمثال وهو فرحان}
نويري:يلا حطوه على العربية بس براحة لا يتخدش!
{ونقلوا التمثال وخدوه ومشوا ورجعوا مكانهم في الجبل، كانوا كلهم واقفين مع بعض..ونويري مطلع رزمة فلوس وبيوزع عليهم..وبعد ما خلص}
نويري:كل واحد يرجع على مكانه، وبكرا تكونوا عندي من النجمة
_ربنا يباركلك يا ريس
نويري:يلا اتفضلوا
{وبعد ما مشوا كلهم…رجع حاتم الكهف اللي كان قاعد فيه..واترمى على الأرض من التعب}
==============================
{وبعد مرور 4 شهور كانت مهرة في الشهر الخامس، وكانت كل حاجة زي ماهي…وحاتم كان مقرر انه يشتغل شوية قبل ما يسلم غسان للحكومة وده لانه كان نفسه يخرج من دايرة الفقر اللي عاش فيها سنين!..وبيري كانت حابسة علا في أوضة لحد ما خسيت وبقيت شبه الموميا لدرجة انها بقيت تكلم نفسها وابتدت تتجنن!..دخلت عليها بيري وهي مبتسمة، لحد ما قعدت على كرسي قصادها}
بيري:قوليلي بقى..مبسوطة بالحال اللي بقيتي فيه ده؟…بقيتي شبه الموميا…بصراحة انا شخصياً بقيت أخاف منك…كان لازمتها اية تحطي راسك بـ راسي من الأول؟…مانا حذرتك وقولتلك بلاش، وبرضة مسمعتيش كلامي!…بس عارفة…انا دلوقتي بقيت مرتاحة قولي بنسبة ٩٠٪…والـ ١٠٪ الباقيين لما علاء يتسجن…عايزة أقولك انا دلوقتي بقى معايا ٣ مليون جنية، وكمان كام شهر هكملهم ٤ ان شاء الله…أصل المطعم بيجيب فلوس حلوة أوي أوي أكتر من البيوتي سنتر بكتير!
{مكنتش علا بترد، كل اللي كانت بتعمله بتبص وهي مبرقة لـ بيري!}
بيري:لالا متبصليش كده، لعلمك انا بخاف!…اية جو الأفلام الرعب اللي بقينا فيه ده؟
{وقامت من مكانها ولفيت حوالين علا وهي بتضحك ضحكة طويلة! وصوت الكعب اللي لابساه بيرن في ودان علا…و اديتها ضهرها وكملت كلام}
بيري(بسخرية) :اية رأيك في الأوضة دي؟…بفكر أفتحها عنبر للمجانين…وتكوني انتي أول مجنونة مشرفه معانا هنا هاهاهاها…مش قادرة
{وفجأة برقت بيري، وظهرت علا من وراها وهى بتغرز حديده حامية في ضهرها}
علا(بـ شر) :اضحكي كويس…وقفتي لية؟
بيري(بصويت) :اااااه
علا(بـ شر+صويت ) :مش هسيبك يا بيري…نهايتك النهاردة هتكون على ايدي…دمرتيلي حياتي وقهرتيني وموتيني بالحياه…انا هعمل فيكي زي ما عملتي فيا وزيادة يا زبالة!!
{دخل البودي جاردات على صويت بيري وعلا…وكتفوا علا…وواحد منهم شد الحديدة من ضهر بيري وهي بتصرخ وضهرها غرقان دم!..لحد ما خدوها المستشفى!}
===============================
{عند زهرة كانت علاقتها بكمال رجعت كويسة وابتدت ترجع تثق فيه، واليوم ده كانت متفقه انها هتخرج معاه ولكن بالنقاب عشان محدش يشوفها!..ولكن حاتم كان بيكلم مهرة في الموبايل ومصمم انه يكلمها فيديو من موبايل زهرة خصوصاً ان مهرة موبايلها قديم ومفيهوش الاوبشن ده!…كانت مهرة قاعدة على الكنبة وجنبها زهرة وقصادها وجيدة}
مهرة:مانا قولتلك ان تليفوني مفيهوش النظام ده!
حاتم:مليش دعوه يا مهرة اتصرفي، انا عايز أكلم ريان لو سمحتي!
مهرة(بتضحك) :وهتكلمه ازاي بقى ان شاء الله؟
حاتم:لا دي طريقتي مش هقولك عليها
زهرة:طب خلاص يا مهرة…خدي موبايلي كلميه من عليه فيديو…موبايلي أحدث من موبايلك
مهرة:طب ماشي استنى هتصل عليك من تليفون زهرة
حاتم:ماشي وانا مستني اهو
مهرة:سلام دلوقتي
{وقفلت مع حاتم وخدت موبايل زهرة تجرب من عليه، وقصادهم وجيدة قاعدة مبتسمة..وبعد ما مهرة رنيت على حاتم وفتح، مكنتش مصدقه وفضلوا يضحكوا}
مهرة(بتضحك) :ده نفع بجد، انا مكنتش متخيله كده خالص!
حاتم(بيضحك) :يعني انا سايبك قمر، أرجع الأقيكي قمرين؟
مهرة(بتضحك) :بقى بتجاملني؟
{دخلت زهرة معاهم في كادر الكاميرا، ومسكت مناخير مهرة وضحكت}
زهرة(بتضحك) :دي حتى مناخيرها فرشت
مهرة(بتضحك) :ماشي ياستي، شكراً
حاتم(بإبتسامه) :لا والله زي القمر يا مهرة..وكل يوم بتحلوي زيادة
مهرة(بـ حب) :بس القمر مش مبسوط من غيرك!
حاتم:انا نازل مصر الأسبوع ده، هسيبلك مبلغ كويس وهرجع تاني
مهرة(بحزن) :كده يا حاتم تفرحني وبعدين تزعلني؟
حاتم:غصب عني يا مهرة، وصدقيني مش هطول، سفرية المره الجايه هرجع بـ غسان، انا بس عجبني الحوار هناك وبناخد فلوس كويسة، ده غير المبلغ اللي هاخده من ورا المهمة دي
مهرة(بحزن) :طيب
حاتم(بإبتسامه) :قربي الموبايل من ريان زي مااتفقنا، ولا هتخلي بالاتفاق؟
مهرة:حاضر
{قربت مهرة الموبايل من بطنها}
حاتم:ازيك يا ريان عامل ايه؟…اتمنى اسمك يكون عاجبك،ولو مش عاجبك اديني أي اشاره عشان افهم!…ياترى مرتاح جوا ولا مستني اليوم اللي هنتقابل فيه؟…بس انا واثق انه هيكون أحلي يوم في حياتي يوم ما هقابلك وهلمسك!
{كانوا كلهم مبتسمين وهما سامعين كلام حاتم}
حاتم:ولو انتي بنت فانا سايب حرية الاختيار لـ مهرة انها هي اللي تختارلك اسمك..بس عايز أقولك اني بحبك من قبل ما اشوفك..ومستني انك تيجي للدنيا وأشيلك وتكبري قصاد عنينا لحد ما أوصلك لـ عريسك بـ ايدي!
وجيدة:ارجع بقى يا حاتم كفاية كده، اية يا أخي مزهقتش من بلاد برا؟
{راحت زهرة خدت الموبايل واديته لـ وجيدة}
حاتم:هرجع والله بس كل حاجة في وقتها…المهم انتوا خدوا بالكم من نفسكم ومن مهرة لحد مانا أرجع
وجيدة:بس عرفنا من قبلها عشان يوم رجوعك مش هيكون أي يوم…لالالا ده هيكون يوم الهنا والفرح، لازم نعملك عزومة تليق بيك يا غالي
حاتم:وهو انا غريب يا حماتي؟…ده انا ابنك التاني!
وجيدة:اه والله ربنا العالم يا حاتم…بس برضة عرفني
حاتم:حاضر، خدوا بالكم من نفسكم
وجيدة:وانت كمان يابني
حاتم:مع السلامة
وجيدة:في سلامة الله
{خدت زهرة موبايلها، وسندت مهرة تقوم}
وجيدة:يلا كل واحد يروح مشاويره، بس أمانة عليكي يا زهرة لتاخدي بالك من نفسك
زهرة:حاضر متقلقيش عليا
{نزلت زهرة، ومهرة لبست نقاب عشان محدش يعرفها ونزلت مع وجيدة وراحوا المستشفى عشان تكشف}
===============================
{عند علاء بعد ما رجع ليبيا…كان قاعد في أوضة النوم وهو متعصب، ونويري بيحاول يهديه}
علاء(بزعيق) :انا غبي…انا انسان حقير!!
نويري:اهدي بس يا علاء، مانت كنت كويس اية اللي جرالك بس؟؟
علاء(بصريخ) :انا لية عايش لحد دلوقتي؟..عايش بهبب اية في أم الدنيا دي؟…ده انا كل خططي بتفشل!!…نزلت مصر مخصوص عشان أخلص على بيري ومعرفتش!…روحت أبيع أم التمثال اللي هيغير أم حياتي…وفي الآخر يتنصب عليا في فلوس مزوره…انا غبي…غبي
{وزق الكرسي من قدامه بكل عصبية..لحد ما نويري خرج يجيبله كوباية عصير و رجع}
نويري:اهدى بس يا أخي..اشرب وهدي أعصابك…انت عارف اية اللي بيحصلك دلوقتي؟….الشيطان واقف قدامك…وشغال زن زن زن…خد اشرب بس
علاء(بزعيق) :ماهو مش كده!…اللي بيحصل ده مش معقول…هو العيب فيا ولا فيهم؟
نويري:فيهم هما طبعاً…ياكش يتحرق دمهم…انا متعودتش اشوفك متعصب للدرجادي يا علاء!…روق دمك مفيش حاجه مستاهله..امسك بس… امسك
{واداله العصير شربه وقعد على السرير يرتاح}
نويري:فداك مليون تمثال…أهم حاجة عندي انك تكون بخير
علاء:انا تعبت أوي يا نويري
نويري:لا ياسيدي، تعب اية وزفت اية، هو احنا برضة بتوع تعب؟…بكرا نكسب مليارات بس اصبر
علاء:بس متفكرش ان الحوار كده طلع من دماغي!
نويري:حوار اية؟
علاء:بيري…امال هيكون حوار اية يعني، ماتركز معايا!
نويري:معلش خدني على قد عقلي…انا بس خايف عليك انت، ان كان على بيري فا تولع عادي
علاء:مش هسيبها ولو على رقبتي، هفضل أحاول لحد ما أهزمها
===============================
{عند بيري، رجعت البيت مع غادة وفاتن وهما ساندينها..لحد ما قعدوها على السرير}
فاتن:لا حول ولا قوة الا بالله العلي العظيم
{خرجت فاتن وغادة وقعدوا في الريسيبشن وسابوا بيري ترتاح في الأوضة}
غادة:حوار ان علاء هو اللي عمل كده مش داخل دماغي
فاتن:لية بتقولي كده يا غادة؟
غادة:أصل علاء هربان برا…وبقاله شهور محدش بيشوفه
فاتن:وارد يكون بعت حد بداله عشان ميظهرش في الصورة!
غادة:مش عارفه بقى، انا مابقتش عارفة حاجة
{وقامت بشنطتها}
فاتن(بإستغراب) :رايحة فين يا غادة؟
غادة:انا رايحة مشوار وهبقي اعدي عليكي بالليل
فاتن:هاتي حاجتي معاكي وانتي جاية متنسيش
غادة:حاضر
{خرجت غادة من الشقه، واتجهت لـ مكان نبيل، وهي في نيتها تحاول معاه لآخر مره يمكن يسامحها ويرجع البيت!}
===============================
{عند زهرة بعد ما وصلت عند كمال ورفعت النقاب، ابتسم وفرح لما شافها}
كمال:تعرفي انك حلوه أوي في النقاب؟
زهرة:بجد؟
كمال:أوي…يلا بينا
{وخدها ومشوا…راحوا يقعدوا في كافية قصاد النيل}
زهرة:قولي بقى انت ناوي على اية بالظبط يا كمال، ولية مسافرتش لحد دلوقتي مع غسان؟
كمال:هجاوبك على كل اللي انتي عايزه تعرفيه..بس الأول قوليلي تشربي اية؟
زهرة:أي حاجة
كمال:لو سمحت
{جه الويتر وهو مبتسم}
كمال:ممكن اتنين شاي
الويتر:حاجة اضافية؟
كمال:خلي السكر برا
الويتر:تمام اتنين شاي
{ومشى}
كمال:انا ناوي أخلص على غسان بمساعدة حاتم
زهرة:ازاي؟
كمال:يعني هسافر وهخلص المهمة، وناخد الفلوس بالنص
زهرة:وبعد ماتخلصها ناوي على اية؟
كمال(بإبتسامه) :ناوي ان انا أتجوزك ونكمل حياتنا مع بعض، بس نخلص من الكابوس اللي على قلبنا ده الأول
زهرة(بفرحه) :وانا اية ضمني انك مش بتضحك عليا؟
كمال:برضة يا زهرة لسة مش واثقة فيا؟
زهرة:لا انا نسيت اللي حصل وبدأت معاك صفحة جديدة زي مااتفقنا، بس ازاي يعني هيبقى معاك فلوس وهتختارني انا من وسط كل الناس؟
كمال:وهو انتي حاجة قليلة ولا اية يا زهرة؟..ده انا مشوفتش في أدبك ولا اخلاقك، اللي ياريت كان غسان واخد ربعهم..بس سبحان الله انتي في الشرق وهو في الغرب ولا كأنكم اخوات من الأساس!
زهرة:على رأيك، بس كل واحد فينا طالع من تحت ايد أم شكل..وانا أمي الله يرحمها كانت ست طيبة
كمال:الله يرحمها ويغفرلها
===============================
{عند مهرة بعد ما كشفت بالسونار عند الدكتور، كانت وجيدة مستنياهم عند المكتب..ولما الدكتور قعد}
وجيدة:مهرة أخبارها اية يا دكتور؟
الدكتور(بإبتسامه) :الحمدلله حالتها الصحية زي الفل هي والجنين وكويس انكم ملتزمين بالتعليمات
{جات مهرة وقعدت قصاد وجيدة}
وجيدة:اه الحمدلله، من أول يوم عرفت ان مهرة حامل فيه وانا مبخليهاش تتحرك..أصل مهرة بنتي الوحيدة وبخاف عليها زيادة عن اللزوم
الدكتور:ربنا يباركلك فيها يا حاجة
وجيدة:يارب…طب انت مش تعرفلنا الجنين نوعه اية، دي قربت تدخل في السادس ولسة معرفناش!
الدكتور:مبروك يا حاجة وجيدة…الجنين ولد
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية أبي بواب وأمك خادمة)
