رواية أبي بواب وأمك خادمة الفصل الحادي عشر 11 بقلم رانيا عمارة
رواية أبي بواب وأمك خادمة الجزء الحادي عشر
رواية أبي بواب وأمك خادمة البارت الحادي عشر
رواية أبي بواب وأمك خادمة الحلقة الحادية عشر
{بعد ما الظابط دخل و غسان شافه..قرب الظابط من غسان وكان بيبصوا لبعض نظرات غريبة}
الظابط:بطاقتك
غسان:انا ممعايش بطاقة
الظابط(بصوت حاد) :يعني ايه ممعكش بطاقة؟
غسان:نسيتها في البيت
الظابط:انت اسمك اية؟
غسان:غسان
الظابط:غسان اية؟؟
غسان:غسان رفعت مجدي الأباصيري
الظابط:اية المشكلة اللي حصلت يا دكتور؟
المدير:سوء تفاهم يا فندم..اخت الأستاذ ده خرجت من المستشفى وسجلت اسمها مغادرة، وهو هنا جاي يتهمنا بالإهمال وانها هربت بسببنا احنا لكن الحمدلله ان الحقيقة بانت!
الظابط:وانت اسمك اية؟
كمال(بتردد) :كمال أحمد شبانة
الظابط:امشوا
{خرج غسان ووراه كمال، والظابط مركز معاهم أوي}
المدير:في حاجة يافندم؟
{قعد الظابط، وخرج سيجارة يشربها بلامبالاة}
الظابط:لا مفيش
=================================
{عند حاتم ومهرة في الشغل..كانت مهره واقفة مع الزباين بتحاول تتعامل معاهم}
مهرة: Speak English (أتحدث الانجليزي)
_We also (احنا كمان)
مهرة:What you want؟..هنا يعني!
_We want three bread, three waffles, and two croissants. (نريد ثلاثة خبز، وثلاثة وافل، واثنين كرواسون)
{كانت مهره بتحاول تفهم، وكانوا بيتعاملوا مع بعض بلغة الإشاره..لحد ما خلصت طلبهم، وخدت الحساب ومشوا..راح حاتم مسقفلها}
حاتم(بيضحك) :براڨو عليكي..انتي طلعتي خارج التوقعات..انا كنت متخيل انك مش هتعرفي تتصرفي!
مهره(بغرور) :لا يا حبيبي شكلك متعرفنيش كويس..انا أعرف أتعامل في أي حتة ومع أي حد!
حاتم:ياسلام واية الغرور اللي حط عليكي فجأة ده؟
مهره(بتضحك) :ههههه مغروره اوي صح؟
حاتم(بيضحك) :اوي اوي بصراحة…عارفة يا مهره
{قرب حاتم من مهرة، وهي كانت مركزة في اللي هيقوله}
حاتم:بتحلوي أوي لما بتضحكي!
مهره(بإحراج) :بجد؟
حاتم:طبعا بجد…بتبقي زي القمر…انا بصراحة ببقى خايف عليكي من جمالك لا حد يحسدك!..خدتي الجمال كله ليكي لواحدك حتى خفة الدم والروح الحلوه!
{فرحت مهرة بالكلام الحلو اللي بيقوله حاتم، وضحكت، وكانت منتظرة حاتم يعترفلها ويقولها الكلمة اللي هي مستنياها منه من زمان}
مهرة:انا واخداهم منك..وكل اللي بتقوله عني ده..موجود فيك انت كمان بس يمكن انت اللي مش حاسس!
حاتم:انا مبسوط ان ربنا بعتلي أخت حلوة زيك كده!
{سكتت مهرة واتدايقت من حاتم واتقفلت منه}
==============================
{في بيت صاحبة بيري (عُلا)..جات علا بالعصير وقعدت مع بيري وعلى وشها إبتسامة صفرا}
علا:اهلاً بيكي يا بيري..مش كنتي تعرفيني قبل ما تيجي عشان أعمل حسابي ونطلب أكل؟
بيري:لية ياحبيبتي هو انا غريبة لكل ده؟..احنا اخوات قبل مانكون صحاب..مش كده ولا ايه؟
علا:اه طبعاً وأكتر من الأخوات كمان..اتفضلي!
{مدت بيري ايديها وخدت العصير، وفضلت ساكتة}
علا(بإستغراب) :مالك يا بيري في حاجة ولا اية؟
بيري(بحزن) :طبعاً في…كل حاجة و ليها سببها..انا بس مش عارفة أقول ايه!
علا:اتكلمي يا بيري وقولي اللي في قلبك!!
بيري(بحزن) :ماهو أصل ده كلام محرج اوي ومينفعش يتقال..بس انتي صاحبتي وبعتبرك أختي اللي بحكيلها كل حاجة..بس يعني..انا في مصيبة سوده يا علا ومش عارفة اتصرف ازاي!!
علا(بإستغراب) :مصيبة؟…مصيبة ايه دي؟
بيري(بحزن) :تخيلي إن انا اكتشفت ان علاء جوزي…امممم عنده…عنده…مش قادره أقول!!
علا(بخوف) :عنده ايه؟…ماتتكلمي!
بيري(بحزن) :علاء طلع عنده مرض الإيدز..والمصيبة انه اتنقلي..انا بجد مش عارفة اعمل ايه بس، انا مش عايزه أموت يا علا…انا عايزة أعيش وأربي بنتي!!
{وفي لحظة اتغيرت ملامح علا للصدمة، ارتبكت وملامحها اتغيرت..كانت بتحاول تداري!}
علا(بتردد) :طب انتي عرفتي منين الكلام ده؟..يمكن مش صح!
بيري(بحزن) :كان نفسي يكون مش صح..لكن للأسف انا روحت للدكتور واتأكدت..أصل علاء متعدد العلاقات..خاين يعني…كل يوم مع واحدة شكل..طب انا ذنبي ايه اتأذي معاه؟…وعشان ايه؟
علا(مصدومه) :امممم…الكلام ده من قد اية؟
بيري:من سنين وانا مكنتش أعرف!!..الموضوع بدأ يتدهور يا علا..وانا بضيع مش عارفة أروح فين ولا آجي منين بس يارب!!
{سكتت علا من صدمتها، وبيري طلعت المنديل ومسحت دموعها}
بيري:انا مش صعبان عليا غير الستات اللي زمانه نقلهم المرض..هما أه الاتنين زبالة..بس علاء أزبل منهم!.. بقى بعد كل السنين دي وبعد كل اللي استحملته..وكمان ينقلي أمراضه؟؟
علا(بخوف) :طيب اهدي يا بيري أكيد ليها حل!!
بيري:كل حاجة وليها حل إلا المرض ده..نهايته بتكون الموت…منك لله يا علاء مش مسامحاك!
==============================
{في بيت غسان..كان كمال قاعد.. لقى غسان داخل بـ جثة..قام وهو مصدوم من اللي شايفه..وقرب من غسان اللي كان بيمسح الدم من على وشه}
كمال(بزعيق) :ايه ده يا غسان؟؟..جثة؟؟…انت كل يوم هتدخل عليا بواحدة شكل؟
{زقه غسان من طريقه، وسحب الجثة ودخل بيها الأوضة..وقعد على الكنبة وهو بيمسح الدم من على وشه..قرب كمال منه وشده من هدومه}
غسان(بعصبية) :عايز اية يا كمال؟؟
كمال:انت اتجننت ولا اية؟..مش كفاية ملحد والبيت مفيهوش سنتي واحد خالي من كتب الإلحاد وسب العقيدة والأديان، كمان اتحولت لـ قتال قتلة؟…يابني انت مش خايف من الحكومة؟
غسان:خلصت كلامك؟
{كمال في صمت}
غسان(بزعيق) :انا مبخافش من حد…انا بخاف من نفسي!…وقولتلك وهفضل أقولك..انا اللي بيتعدى حدوده معايا مبيكسبش..وبتكون نهايته زي مانت شايف قدامك دلوقتي!
كمال:ايه يعني شتمك؟…تقوم تقتله زي ما عملت في
حمزة؟…ما كفاية شر وأذية بقى يا غسان؟
{قام غسان ومسك كمال من لياقته..ومكنش في وعيه}
غسان:انت اتعملك غسيل مخ من حد وانا معرفش؟..خلي بالك هتكون تحت طوعي..هتكون فوق دماغي..إنما هتكون خارج رغبتي، هتكون برا حياتي..انا مش عايز أأذيك يا كمال،خلي الفال طيب!
{سكت كمال ومقدرش يرد}
غسان(بصوت حاد) :روح هات مَساحة و زق الدم ده لحد الحمام!!…يلااا
{مشى كمال وراح الحمام…يعمل زي ما غسان قاله}
==============================
{فـي بـيـت فاتن..كانت حفيدتها في الأوضة..وفاتن في الصالة على الكنبة..والتلفزيون شغال، وبتتكلم في التليفون مع بنتها غادة}
فاتن:ودفعتوله حاجة بعد ده كلة؟
غادة:ولا رضى ياخد مليم…بس من الواضح يا ماما إنه ناوي نية سودة لـ علاء..ده من يوم اللي جرا وهو مستحلفله}
{من ١٤ سنة..كان نويري بيحب بيري وعايز يتجوزها، َفجأةً أعز أصدقاءه علاء..خطفها منه..ويوم جوازهم كان واقف قصاد القاعة بيبص عليهم وهما بيرقصوا بعيد وبيبصلهم بكل غل}
نويري:بقى انا يا علاء تعمل معايا العاملة السواد دي وتاخد مني أعز ما أملك وفاكر انها هتعدي بالساهل؟..لا ياحبيبي، وعد مني مهما عدت السنين هفضل فاكر، ويوم ماتيجي الفرصة همسك فيها بإيدي واسناني!
{وفي فترة خطوبة بيري وعلاء..بالتحديد في أوضة بيري..كانت غادة قاعدة معاها على السرير}
غادة:ياحبيبتي فكري صح وحَكمي عقلك شوية!!..نويري مالوش أي ذنب في اللي حصل ده!!..ده بيحبك وشاريكي وانا متأكدة من ده كويس اوي!
بيري(بتضحك) :حب اية وكلام فارغ اية يابنتي؟…الحب مبيأكلش عيش في الزمن ده!!…هو الحب اللي هيكسيني هدوم؟..ولا اللي هيأكلني كل
ما لذ وطاب؟..اركني الحب ده على جنب وخلينا في الفلوس!!
غادة:انتي بيعتيه عشان الفلوس يا بيري، ودي حاجة في حد ذاتها تتحط في بند الخيانة والغدر!!…انا مش فاهمة انتي ازاي كده؟…ده بابا محرمناش من أي حاجة لا حب ومشاعر ولا حنية!!
بيري:بس حرمنا من الفلوس!!…خلْتْ اللي يسوا وميسواش يتعامل معانا من مُنطلق الأعلى والأقل!!..لو انتي عاجباكي عيشة الذل اللي عيشناها في البيت ده، فاانا لا…انا مش عاجبني وهسعى بكل جهدي إني أخرج من الدايرة السودة اللي حطيتونا فيها بالغصب!!
غادة(مصدومة) :انا مش قادرة أصدق انك أختي!!…بجد انتي أبشع انسانة شوفتها في حياتي!!
بيري(بزعيق) :اطلعي برا…اطلعي
{خرجت غادة برا الأوضة وهى مندهشة من معاملة أختها ليها..وبيري ردت على علاء في الموبايل}
بيري:الو ياحبيبي، عامل اية؟
=========نهاية الفلاش باك=========
فاتن:ذنب ناس بتخلصه ناس..وانا الصراحة شوفت كتير اوي اوي من علاء
غادة:ماهو ياحبيبتي يوم ما ينتقم…مش هينتقم من علاء بس…لا!!…من علاء وبيري ولا انتي نسيتي اللي حصل زمان؟
فاتن:واختك اية دخلها في مشاكلهم؟
غادة:ازاي بس ياماما؟…اذا كان بيري هي سبب المشاكل كلها..وهي اللي اتسببت في كل اللي حصل ده!
فاتن:انا اللي يقرب من بنتي، ولا يفكر بس يإذيها..آكله بإيدي واسناني…يعمل اللي يعمله في علاء..لكن بيري لأ…وبعدين كل شئ قسمة ونصيب..روحنا كده…جينا كده…مش هيحصل غير اللي ربنا كاتبه!!
غادة:كنتي فين يا ست الشيخة زمان؟
فاتن(بزعيق) :بنت!!…احترمي نفسك..ومتنسيش ان انا والدتك!!
==============================
{بالليل عند حاتم ومهره في الماركت..بعد ما خلصوا شغل جالهم أركون…الرجل اليوناني صاحب الماركت}
أركون :Well, it looks like it’s been a great day for you.(جيد، يبدو انه كان يوم رائع بالنسبه لكم)
حاتم:nice day (يوم حلو)
{طلع الفلوس، واداها لكل واحد فيهم}
حاتم:Thank you
{وخد مهرة وخرجوا برا…كانت الأجواء تحفة بالليل}
حاتم:ايه رأيك نتمشى شوية؟
مهره:يلا بينا…حلوه اوي اليونان!..انا في الأول كنت مدايقة وكان نفسي أرجع مصر اوي..بس بعد ما جيت هنا..نظرتي وإحساسي اتغيروا!
حاتم:مانا كنت كده برضة…بس بيني وبينك يا مهرة انا شايف ان دي فرصة متتعوضش..اهو على الأقل يوم مانرجع مصر…نرجع واحنا محوشين شوية فلوس!
مهره:طب قولي بقى…ناوي تعمل ايه بالفلوس بعد مانرجع؟
حاتم(بتفكير) :ياه حاجات كتير اوي اوي…افتح مشروع وأكبره لحد ما يجيبلي مبلغ محترم كل شهر…واتجوز وأجيب عربية و….
مهره(بتقاطعه) :تتجوز؟
حاتم:انتي سيبتي كل ده ومسكتي في تتجوز؟
مهره:انت ناوي تتجوز يا حاتم؟
{سكت حاتم شوية وبعدين رد }
حاتم: أه اتجوز…أكيد مش هعيش طول حياتي عازب..مانا برضة لازم اتجوز وأكون أسرة وانتي كمان تعملي كده!
مهره(بحزن) :لا انا مش هتجوز..انا هبقى أرجع بلد أهلي وأكمل حياتي هناك..بس ياريت يا حاتم متبقاش تنسى تعزمني على فرحك..متحرمنيش من حاجة زي دي!
حاتم:طب خليكي هنا ثواني يا مهرة
{دخل حاتم محل اكسسوارات، ولما خرج ملقاش مهرة}
حاتم(بإستغراب) :مهره!!!…هي راحت فين؟؟
{وقرب من ناس واقفة كان بيسألهم بالانجليزي}
حاتم: You See Girl Wearing Tall Clothes And Hijab؟
_Τι λες? (بتقول اية؟)
{مشي حاتم وهو حاسس باليأس..لحد ما رجع المركب عند القبطان..كان القبطان والمساعد و زهرة وأنيسة قاعدين مع بعض بيتكلموا…ولما القبطان شاف الحزن على وشة قام}
القبطان:مالك يا حاتم؟
حاتم:انا مش لاقي مهره!!..دخلت أجيب حاجة من محل..ويادوب خرجت ملقيتهاش!!
{ضحك القبطان وطبطب على كتف حاتم}
القبطان:مهره جوا متقلقش عليها دي قردة!
حاتم(بإستغراب) :جوا؟..وهي وصلت هنا ازاي؟
{راح القبطان رافع ايديه الاتنين ناحية السما وعمل حركة بمعنى (بقدرة ربنا)…دخل حاتم جوا كان باب الأوضة مقفول..خبط عليه كام مره ومحدش رد}
حاتم(متعصب) :مهره!!!…انتي ازاي تمشي لواحدك وانا قايلك تفضلي في مكانك متتحركيش!!…انتي ليه مبتسمعيش الكلام؟…مخوفتيش تتوهي أو يحصلك حاجة؟
{خرجت مهره من الأوضة ويبدو عليها إنها كانت معيطة، كانت باصة ناحية الحيطة ومربعة ايديها الاتنين كأن الكلام مش عاجبها}
حاتم:انتي لية مصممة تعصبيني وخلاص؟…مسمعتيش كلامي ليه ومشيتي؟؟
{جات زهرة بسرعة على زعيق حاتم}
زهرة:في اية؟…بتتخانقوا ليه؟
{وفجأة مهره اترميت في حضن زهرة وفضلت تعيط، وحاتم واقف مستغرب رد فعلها}
زهرة:مالك بس يا مهره؟؟
{َوخدت مهرة ودخلوا الأوضة وقفلوا الباب، وحاتم لسة واقف يمكن يسمع سبب عياطها!}
زهرة:مالك يا مهرة فيكي اية؟
{ولكن مهره مكنتش بتعمل أي حاجة غير انها تعيط وبس…وحاتم واقف برا سامع كلامهم}
زهرة:براحة طيب، اهدي وقوليلي مالك يا مهره؟..بتتخانقوا مع بعض لية؟
مهرة(بعياط) :انا تعبت يا زهرة..بقيت أحس في كل كلامة انه عايز يوصلي رسالة معينة وهي انها انا مبحبكيش..مش عايزك…مش معني ان القدر جمعنا مع بعض في نفس الظروف إني أحبك!!…طول الوقت بيلمحلي ان انا زي أخته…واننا اخوات وملناش غير بعض في الغربة وانه لازم يرجعني سليمة لأهلي عشان انا أمانة في رقبته!
زهرة(مصدومة) :هو انتي بتحبيه يا مهرة؟
{هزت مهره راسها وهي بتعيط}
زهرة:بس انتي تتحبي!!..وبصراحة انا حاسة انه بيحبك بس يمكن بيكابر..أو ده مش وقته المناسب لتبادل الحب والغراميات مابينكم!..انتي بعد اللي حكيتيهولي فا لأ يا مهرة انتوا في ظروف صعبة ولازم تعدوا منها الأول وبعدين تشوفوا موضوع الحب ده!
مهره(بعياط) :ماهو مفيش حب من البداية أصلاً عشان احس بيه سواء دلوقتي ولا بعدين…انا محطوطة في خانة الاخت الطيبة الحنينة اللي بيشكر ربنا على وجودها في حياته طول الوقت!…انا من ساعة ما شوفتة وانا حاسة بحاجات كتير حلوه اتجاهه، لكن هو بيأكدلي كل يوم انه مش حاسس بأي حاجة حلوه ناحيتي!
زهرة:هو اية اللي حصل؟
{خرج حاتم وقعد برا مع القبطان وأنيسة}
القبطان(بإبتسامه) :كنت بتزعق ليه يا استاذ حاتم؟
حاتم(بتردد) :خوفت عليها فااتعصبت شوية..المفروض مكنتش تمشي وتستنى لحد مااخرج!
القبطان:ومخدتهاش معاك لية؟…و لية سيبتها برا؟
حاتم(بتردد) :كنت بجيبلها حاجة، بس هى استعجلت ومكملتش!
أنيسة:انا هدخل انام تصبحوا على خير
كلهم:وانتي من أهله
المساعد:انا هعمل شاي، حد عايز؟
القبطان:اعمل لينا احنا الاتنين
المساعد:ماشي
{دخلت أنيسة الأوضة…والمساعد دخل يعمل الشاي}
القبطان:انا من أول يوم شوفتكم فيه وحسيت ان في حاجة مش عادية!!
حاتم(بإستغراب) :حاجة مش عادية ازاي؟
القبطان:كأن ربنا جمعكم سوا…عشان انتوا تشبهوا لبعض كتير…ولما أقول تشبهوا لبعض..أكيد مش قصدي الشكل!
حاتم:أمال قصدك اية؟
القبطان:حاسس في مشاعر قوية مابينكم، وانتوا الاتنين مدارينها!
حاتم:يا قبطان، لا ده وقته ولا أوانه!…بص بقى انا مش هنكر عشان انا حبيتك وقلبي ارتاحلك
القبطان:وانا كمان حبيتكم وقلبي ارتاحلكم!
حاتم:أه في مشاعر، وكل يوم بتزيد..انا مش عايز أعلقها بيا، مش يمكن تتعلق بيا وفي الآخر أموت واسيبها؟…مش بذمتك هبقى كده دمرتها؟
القبطان:وانت لية بتقول كده؟
حاتم:احنا حياتنا كلها تحديات يا قبطان، وبقينا بنتحارب من مليون جهة..ومش عارفين الظروف هترسى بينا علي فين!..بس انا كل اللي أقدر أقولهولك إن انا فعلاً خايف عليها ومش عايز أكسرها!!
القبطان:وانت تكسرها لية؟…منطقك خاطئ بنسبة 100٪..اولاً الأعمار بيد الله مش بإيدينا احنا…ومحدش عارف هيعيش قد اية وهيموت امتى!!..ولو كل الناس مشيت بمنطقك ده، لا هيبقى في أحباب..ولا في أزواج وكل واحد هيقول اتجوز ليه مش يمكن أموت واسيبها؟…ثانياً السرعة مطلوبة، لو بتحبها عرفها، خليكم ايد واحدة وفي صف بعض ضد أي طرف بيحاربكم!..لو بتحبها وهي بتحبك هتنتصروا…الحب الحقيقي بيقوي يابني مش بيضعف!
حاتم(بتردد) :عندك حق في كل كلمة قولتها..ياقبطان انا مبكونش مبسوط وهي بتتعذب بسببي في كل مره بتستنى أقولها ومبقولهاش!..انا كل الحكاية ان انا خايف!
القبطان:متخافش.. و جرب انت خسران اية؟
حاتم:انت شايف كدة؟
القبطان:انا مش شايف إلا كده!
حاتم:ماشي اللي تشوفه، أمرنا لله
==============================
{تـاني يوم عند متولي في العمارة..كان في أوضته..وخرج برا..لقى حسن صاحب العمارة قدامه}
متولي:صباح الخير يااستاذ حسن
حسن:صباح النور ياعم متولي
متولي:عامل ايه واية الأخبار؟
حسن:بخير…ممعاكش رقم بيري التاني..أصل بتصل بيها على الرقم الأولاني مابتردش!
متولي:لا والله يااستاذ حسن، ولا حتي بقيت أشوفها، لا هى ولا استاذ علاء
حسن:محدش بيشوفهم حتى انا كمان بقالي فتره معرفش عنهم حاجة…ومش عارف أأجر الشقة بسببهم، بتصل على ده ميردش..واتصل على ده ميردش برضة!
متولي:يمكن المشاكل زادت مابينهم من آخر مره ست بيري جات وخدت عفش الشقة ومشيت
حسن(بإستغراب) :خدت عفش الشقة امتى؟
متولي:من مدة…والله العظيم لولايا ما كانت عرفت تدخلها خصوصاً بعد ما غير كالون الشقة..ده غير مساعدتي ليهم في نقل العفش..وبعد ده كلة لا اتقالي حمد ولا شُكرانيه!!
حسن(مصدوم) :لية كده ياعم متولي تجيب المشاكل لنفسك لية طيب؟…ده علاء لو عرف مش هيعتقك!
متولي:وهو انا يعني اللي كنت قولتلها لمي العفش وامشي؟..هما هيدخلوني في مشاكلهم لية؟
حسن:ماشي ياعم متولي، عايز حاجة؟
متولي:سلامتك…مع ألف سلامة
{خرج حسن من العمارة…ومتولي دخل الأوضة يشغل الراديو}
===============================
{في بيت غسان..كان قاعد على الكنبة في الريسيبشن بيقرأ كتاب من كتب الإلحاد، جه كمال وقعد جنبه}
كمال:صباح الخير
غسان:صباح نور الشمس
كمال(بإستغراب) :صباح نور الشمس؟
غسان:اسمع يا سيدي..النور والشمس من…..
كمال:انا مش عايز اسمع حاجة!!
غسان(مصدوم) :انت قولت اية؟؟
كمال:اللي سمعته، مش عايز أسمع حاجة!!
{قام غسان وقرب من كمال وهو متعصب}
غسان(بزعيق) :اية يا كمال مالك؟..مالك بجد؟…انت الفترة دي مابقتش عاجبني…متخلنيش أقلب عليك!
كمال:انا بقالي كتير عايز اتكلم معاك في الموضوع دة وانت مش مديني أي فرصة!!
غسان:موضوع اية؟
كمال:الأديان..انا بنصحك عشان خايف عليك من عقاب ربنا…انت مش عارف اية اللي ممكن يحصلك في حياتك بسبب اللي بتعمله ده!!
غسان(بزعيق) :وانت بقى اللي هتعرفني؟؟…وانا اللي كنت فاكرك بتفهم…طلعت حمار زيك زيهم متختلفش عنهم في حاجة!!..اطلع برا…اطلع برا بقولك!!
{وضرب كمال، وشده بعنف و زقه برا وبصق عليه}
غسان(بزعيق قوي) :مش فاهم مالكم!!…كلكم اتقلبتوا ضدي فجأة لية؟؟…زهرة تهرب و كمال يغير فِكره…في ايييه؟؟؟
{وكسر الأنتيكات اللي جنبه..وفتح باب البيت بكل غل ومشى راح المستشفى عند أنيسة و ليلى}
=============================
{عـنـد حاتم ومهرة في تاني يوم شغل..كانت مهره ساكتة ومبتتكلمش مع حاتم..وكان حاتم بيبيع لـ زباين وبعد ما خدوا حاجتهم}
_Ευχαριστώ (شكراً)
حاتم:bye (سلام)
{وبعد ما عِدل الكراتين وخلص..بص لـ مهرة لقاها زي الصنم مبتتحركش..وباصة في الحيطة مبتحركش عينيها…قرب منها وهو مبتسم..وطلع سلسلة من جيبة ولبسهالها وهي لسة مصدومه}
حاتم:انا أسف يا مهره
مهره:على اية؟
حاتم:على إن انا اتكلمت معاكي بإسلوب وحش وكنت متعصب امبارح…انتي أصلك متعرفيش انا بخاف عليكي قد اية؟
{سكتت مهرة ومردتش}
حاتم:انا بخاف عليكي أكتر من نفسي، ومش هقدر أشوف فيكي حاجة وحشة…انا أستحملها لنفسي لكن مستحملهاش عليكي يا مهره!
مهره(بحزن) :محصلش حاجة يا حاتم…انا مقدرش أزعل منك، ده انت اخويا الغالي!
{مسك حاتم ايد مهره وقالها}
حاتم:بس انا مش أخوكي..وعمرنا ما هنكون إخوات مهما يحصل!
{اتحرجت مهره ومقدرتش تتكلم}
حاتم(بصوت حنين) :بحبك
{وفجأة مهره بصيت له بصدمة وهي بتحاول تستوعب الكلمة اللي قالها، كانت بتبص يمين وشمال يمكن بتحلم!}
حاتم:ايوه بحبك متستغربيش..وانتي كمان بتحبيني وكنتي مستنية اليوم ده من بدري وانا اللي كنت بأجله!!..انا كنت بأجلة لسبب واحد، وهو إني مش عايز أكسرك لو مت أو حصلي حاجة!!
{وفي ساعتها مهره حطت ايديها على بؤ حاتم}
مهره:لا ياحاتم متكملش بلاش عشان خاطري، لية الفال الوحش ده لما ممكن نتفائل خير؟…انا مش هقدر أفكر في حاجة زي دي، ولا هقدر استحملها!!..ده انت أماني وسندي بعد ابويا الله يرحمه…انا بحس معاك بحاجات عمري ما حسيتها مع أقرب الناس ليا!!
حاتم:وانا هفضل سندك وضهرك يا مهرة لحد آخر يوم في عمري!!…صدقيني انا بحبك اوي فوق ما تتخيلي..ومستعد أحارب الدنيا كلها عشان أوصلك!!
{نزلت دموع مهره، ومكنتش مصدقة}
مهره:يعني انت مش هتتجوز حد تاني يا حاتم؟
حاتم:انا لما قولت إني هتجوز فكان قصدي اتجوزك انتي!!..مش أتجوز حد تاني زي مانتي فهمتي!..انا كنت دايماً في حيره مابين أقولك ولالا…مكنتش عارف ايه ممكن يحصل بعد ما أقولك…هتفرحي ولا….
مهره:هفرح…مانا فرحت اهو!!…فرحانة ومش مصدقة…دي احلى صدفة في الدنيا كلها اللي جمعتني بيك!!
حاتم:اوعدك يا مهرة أول مانرجع مصر هنتجوز!
مهره:طب ازاي يا حاتم؟..واحنا مش عارفين ماما واخواتي وعم متولي عايشين ولالا!!…مش نعرف حصل اية الأول؟
حاتم:اياً كان اللي حصل..هنتجوز..وانا خلاص يا مهره بقى هدفي الأول اننا نتجوز ونبقى تحت سقف واحد!…لا انا ينفع أعيش من غيرك ولا انتي ينفع تعيشي من غيري!..احنا خلاص لقينا بعض!!
{ضحكت مهره وكانت بتتنطط على الأرض من فرحتها}
=============================
{عـند بيري..ركبت عربيتها وراحت تحت بيت صاحبتها علا..كانت متدارية بعيد شوية وبتراقبها..لحد ما أخيراً علا نزلت وركبت عربيتها ومشيت، ووراها بيري بعربيتها…لحد ما وصلت عند معمل تحاليل، وطلعت}
علا:صباح الخير
_صباح النور
علا: عايزة أعمل تحليل إتش آي ڨي (HIV)
_اسم حضرتك والسن هنا
علا:تمام
{وبعد ما علا كتبت اسمها وسنها}
_اتفضلي لحد ما يجي دورك
علا:حاضر
{قعدت علا تستنى دورها، وتحت كانت بيري بتبص على بانر الدكتور..وجالها مكالمة تليفونية}
بيري:الو يا فيروز؟
فيروز:انتي فين يا ماما؟
بيري:انا في مشوار برا، عايزة اية؟
فيروز:ممكن تجيبيلي كتاب الـMath…يا ماما انا مابقتش أروح المدرسة ولا أحضر الدروس البرايڨت مع صحابي، والامتحانات قربت انا كده هسقط!!
بيري:حاضر يا فيروز ابعتيلي اللي انتي عايزاه على الواتساب وانا هجيبة
فيروز:اوكي ياماما، باي
بيري:باي
{وفوق جة دور علا، فدخلت تعمل التحليل..وبعد ما خرجت}
علا:قد اية ويظهر؟
_نص ساعة، وتقدري تجيبية من على الموقع
علا:تمام، ميرسي
_العفو
{نزلت علا وركبت عربيتها، وبعد ما بيري اتأكدت انها مشيت، طلعت فوق تسأل}
بيري:صباح الخير
_صباح النور
بيري:ممكن أعرف واحدة جات هنا بإسم علا مجدي محمد كانت بتعمل تحليل اية؟
_حضرتك مين؟
بيري:انا بنت خالتها والحقيقة قلقانة عليها جداً وكنت عايزة اتطمن!
_طيب ثواني
بيري:اتفضلي
_أه كانت بتعمل تحليل HIV
بيري:ده تحليل اية ده؟
_مرض الإيدز يافندم
بيري(مصدومة) :الإيدز؟؟؟
==============================
{في المستشفى بعد ما غسان راح..وبعد ما دخل الأوضة ملقاش حد، فخرج وسأل الدكتور}
غسان:الحالات اللي كانت في الأوضة هنا..راحوا فين؟
الدكتور:هربوا من المستشفى…انت مين؟
غسان:انا ابن حالة من الحالات اللي كانوا هنا…يعني ايه هربوا؟
الدكتور:يعني هربوا ملهاش معنى تاني!!..وشوفناهم في الكاميرات لو تحب تشوف وهما متنكرين في النقاب مع واحدة مجهولة المصدر
غسان(بإندفاع) :انا عايز أشوف!!!
{دخل الدكتور أوضة المراقبة عند الموظف}
الدكتور:وريلة فيديو الحالات اللي هربت
{وبعد ما الفيديو اشتغل، اتصدم غسان لما شاف زهرة واخدة أنيسة وليلي وبتهرب بيهم من المستشفى}
غسان(بزعيق) :دي زهرة!!!!….زهرة!!!!…خدتهم وهربت…أقسملك بأم الطبيعة ما هسيبك!
{وخرج يجري من المستشفي..والموجودين مستغربين من رد فعله و ليه بيجري كده؟…لحد ما خرج}
=============================
{عـنـد حاتم ومهرة في الشغل، لقوا زهرة جاية..استغربوا جداً لما شافوها!!}
مهره(بإستغراب) :انتي جيتي هنا ازاي؟
زهرة:المسافة مش بعيدة اوي..القبطان شرحلي
مهره(بإبتسامه) :تعالي دوقي
حاتم:يااا…. يا مهره بلاش لا يطب علينا ويكلمها كلمة وحشة!
مهره:ملكش دعوه انت!..دوقي دوقي
زهرة:ده ايه ده؟
مهره:دي حاجة اسمها دوناتس…وده كرواسون كلنا عارفينة، عايزة أقولك الشيفات بيجوا الصبح يخلصوا، وبعدين يمشوا ويسيبونا احنا واقفين هنا
زهرة:طب بذمتك بيعتي كام واحدة؟
مهره(بتضحك) :هههه بصراحة ولا واحدة!
حاتم:ده احنا من ساعة ما وقفنا وهى نازلة أكل فيهم، لحد أما قربت تخلصهم!
مهره:كداب محصلش!
زهرة:الله حلو اوي..لا بيفهموا برضة..الحلويات مخدومة صح مش زي عندنا
{وفجأه أركون دخل ولقاها بتاكل}
أركون(بزعيق) :Τι κάνει αυτή η γυναίκα εδώ; (ماذا تفعل هنا هذة الامرأة؟)
{ارتبكت زهرة لما شافتة..وحاتم حاول يلم الموقف}
حاتم:customer (زبون)
{وكان بيشاور على زهرة وبيقولة انها من الزباين}
أركون(بزعيق) :Φύγε πριν σε χτυπήσω. (اخرجي برا قبل أن أضربك!!)
زهرة:هو بيقول اية؟
مهره:مش عارفة!
حاتم:يلا يا زهرة امشي..خديها يا مهره برا وارجعي
مهره:طيب
{وخدت زهرة وخرجت…كان حاتم بيحاول يعتذرلة بـ لغة الإشاره}
مهره:معلش يا زهرة…ارجعي عند القبطان لحد مااحنا نخلص شغل ونرجعلك!
زهرة:لا انا هروح اسأل على شغل، هو انا هفضل قاعدة كده لحد امتى؟…وبعدين انا حاسة اننا تقلنا اوي على القبطان.
مهره:بالعكس والله ده راجل طيب جداً
{خرج حاتم وشد مهره من ايديها}
حاتم:يلا ياستي ورانا شغل
مهره:طيب خدي بالك من نفسك
زهرة:حاضر
{دخلت مهره مع حاتم في الماركت ووقفت مكانها، وفجأة جه حد وطلب أوردر}
رامز:أعطني ثلاثة كرواسون من فضلك
حاتم ومهره(بصدمة) :رامز؟؟؟؟
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية أبي بواب وأمك خادمة)
