روايات سيلا والنمر الفصل الثاني والعشرون 22 بقلم منار مصطفى
روايات سيلا والنمر البارت الثاني والعشرون
روايات سيلا والنمر الجزء الثاني والعشرون
روايات سيلا والنمر الحلقة الثانية والعشرون
اثناء ما بدر بيتكلم مع عامر اتصلت بيه سيلا
بدر استني دي سيلا..اكيد راحت لروكا ماهي كمان مبتردش من امبارح
بدر.. ايوه ياسيلا..احنا عند عامر اهو هو كويس معلش نسيت اكلمك طمنيني علي روكا…
سيلا بدر. روكا مش فالبيت. انا فتحت بمفتاح كان معايا البيت كله متكسر.. وفي اثار دم.. عامر عمل ايه في روكا!
بدر. ايه.. انتي بتقولي ايه
عامر.. بخوف في ايه
بدر.. سيلا بتقول.. ان روكا مش فالبيت. وكل حاجه متكسره وفي اثار دم
عامر.. انت بتقول ايه. انا سايبها كويسه
بدر… سيلا.. اقفلي انا جايلك حالا…
عامر.. انا هلبس بسرعه واجي معاكم….
عدي وقت مش طويل اوي… وكان بدر.. والشباب.. وصلو بيت روكا…
وكانت سما كمان جت بعد ما راحت مع والدتها عند الدكتور..واول ما خلصت معاها وعرفت من سيلا . اللي حصل.. سابتهم يروحو و راحت لسيلا وريم عشان تطمن..
علي روكا…
بدر… ايه ياسيلا.. في اخبار..
سيلا.. لا يابدر.. وبكلمها ومش بترد..
عامر.. كان ركن.. وقرب منهم..
مساء. الخير ياجماعه..
سيلا.. بعصبيه..عملت ايه في روكا ياعامر. هه قولتلها ايه خلاها توصل للحاله دي..
عامر… اهدي..ياسيلا .
سيلا.. اهدي ايه وزفت ايه.. عملت ايه فيها بقولك..
بدر… بصوت عالي شويه… سيلا.. خلاص مش وقته
سيلا. لا وقته هو اصلا ميستاهلهاش…اصلا
سما.. بس ياسيلا..
بدر… سيلااااا قولتلك خلاص
عامر…..سيبها يابدر…. انا مقدر اللي هي فيه وخوفها علي روكا…..بس صدقيني والله العظيم انا ماشي وهي كويسه او بمعني اصح التكسير ده كله لو كان حصل وانا معاها مكنتش سبتها اصلا. وبعدين علي فكره هي اللي طردتني كمان..
سيلا.. بصاله والدموع في عنيها..
عامر…صدقيني.انا مش بكدب..
سيلا… طيب حصل ايه بينكم..
عامر… اتكلمنا اتعصبت عليها هي اتعصبت والله محصلش اكتر من كده..المهم الوقت.. نعرف هي فين. .
سيلا…. هي مراحتش الشركه انهرده..ومش عارفه تمون راحت فين..
عامر.. طيب يمكن فالشركه وهي قيلالهم كده…
سيلا… مظنش هي اكيد.. مش هيبقي ليها دماغ للشركه والموظفين…
يوسف… طيب يمكن راحت اي فندق تريح فيه دماغها…
ريم… ممكن فعلا..
سيلا… مش عارفه انا مش قادره افكر..
بدر… طيب هي عندها مكان تلنب غير الڤيلا..
سما… عندها شاليه فالسخنه بس مش بتروح كتير..او غير واحنا معاها..
مهاب… طيب ما يمكن تكون راحت هناك…
عامر… انا بقول.. انها رجعت اسكندريه لالهلها..
بدر…صح ممكن جداااا.
سيلا… لا مظنش هما مقاطعنها وي ما هي قالت كل فتره بس بتكلمهم ولا بتحس بصد منهم بتقفل علي طول… هي مامتها اللي اهدي شويه معاها عن باباها.. بس.. بردو ميتهيأليش..
بدر… ياستي انتي بتعقديها ليه يمكن تكون راحت..
سيلا… انا مش بعقدها..بس انا عارفه ان روكا مش هتروحلهم…
عامر… ماهي لا راحت الشركه وقالتلهم يقولو كده يا راحت في اي فندق ياراحت الشاليه بتاعها فالسخنه.. يا اما مفيش غير اهلها…
ريم.. طيب ايه الدم ده انا خايفه يكون جرالها حاجه..
يوسف.. ياستي بعد الشر خير ان شاء الله هي اكيد ايدها اتجرحت مش اكتر..
عامر.. سابهم.. وخرج..
بدر… استني رايح فين..
عامر… انا هروح الشركه.. الاول وبعد كده مش هسيب مكان غير لما ادور عليها فيه…اكيد هلاقيها..
بدر…اهدي بس كده اكيد هنلاقيها طبعا… تليفونها مفتوح نعرف نوصلها بسهوله ورقم عربيتها المرور هيخدموني في ثانيه بس انا بقول نستني مندربكش الدنيا يمكن تكون.. لما اتعورت راحت اي مستشفي.. وشويه وترجع..
سما… بدر بيتكلم صح علي فكره..
مهاب.. انا حاسس والله اننا شويه وهنلاقيها ..
عامر… وانا مش هفضل اعد.. مستني تدخل عليا..
سيلا… ولا انا كمان..
بدر.. طيب .. انا هروح انا وعامر . وسيلا نشوفها فالشركه…
وانتو روحو مع مهاب… هو هيعرف يتصرف اسألو عليها فالفنادق…
يوسف.. طيب اشطا وانا اعرف حد هيعرف يخدمني فالحته دي…
بدر… طيب تمام جدا…..وبردو هنرجع تاني نتقابل هنا يمكن تكون رجعت..
سيلا… يلا طيب..
كل واحد ركب عربيته.. واتفرقو كل واحد…راح مكان يشوفها فيه…
عدي وقت طويل…
ورجعو تاني عند بيت روكا..يعد ما محاولاتهم كلهم باءت يالفشل.. وروكا.. كأنها فص ملح وداب..
عامر… دي ملهاش اثر.. ولا حتي رجعت…
سيلا… كده في حاجه غلط…
بدر… سيلا بلاش توتر… اهدي كده.. بقولك ايه..
سيلا.. نعم
بدر.. انتي معاكي رقم اهلها..
سيلا… ايوه معايا..
بدر… طيب نكلمهم..
سيلا.. لا طبعا.. مينفعش اولا هنقلقهم خصوصا لو هي مراحتش…وبعدين معرفش رد فعلهم بصراحه..
يوسف…. طب ايه هنفضل كده مش عارفين نتصرف…
بدر… مفيش كده ادامنا غير الحل اللي قولت عليه..
سيلا… حل ايه..
بدر… نعمل تتبع لرقمها… او نشوف فالمرور نعمل كشف علي نمرت عربيتها ..
سيلا.. وده ينفع..
بدر.. ايوه طبعا.. روكا عربيتها حديثه وهعرف بسهوله اوصل.. لمكانها عن طريق ال gbs
ريم.. طيب اعمل كده مستني ايه….
عمل… بدر.. كام مكالمه …وفضلو اعدين شويه… منتظريين الرد….
…………………………………………………..
بعد.. ما عامر مشي روكا… كسرت وصرخت وعيطت.واتوجعت ومحستش بنفسها غير وهي رجلها وخداها..لعربيتها… ساقت…عربيتها وسط اللييل ووجع قلبها..واحساسها بالضياع.. فاللحظه دي كانت محتاجه حضن… طبطبه ….سند…ومحستش بنفسها غير وهي راحه.. لاهلها….راحت اسكندريه….فاللحظه اللي اتوجعت فيها اوي…محستش انها محتاجه غير حضن مامتها وبباها…محدش جه في بالها غيرهم.. حست انها طفله ومحتاجه حضن..وحشها حضن امها.. كان نفسها تسوق بأقصي سرعه عشان تترمي في حضنها..وحضن ابوها اللي هو كان اقرب حد ليها…….كانت سايقه ودموعها مبتوقفش..
وبعد كام ساعه..من السواقه…اخيرا وصلت…لموطنها الاصلي. ولاول مره. من يوم ماسابت اسكندريه سابتها عندها 18سنه ورجعت 25…. ياااااااااااه لما تروح علي مكان…كل ذكرياتك الحلوه كانت فيه…
احساس بالحنين…بالدفا.. بالحب… بالوجع بالندم..
ركنت روكا.. عربيتها عالكورنيش ووقفت تبص علي منظر البحر والموج عالي وبيخبط..في الصخور ريحه البحر.. اللي افتقدتها…حست انها محتاجه ترمي حمولها كلها عالبحر…افتقدت كل حاجه في حياتها من يوم ماسابت اهلها…احساس الندم عمره مافارقها…ركبت.. وراحت.. علي ڤيلت والدها….كانت الساعه عشره صباحآ
ركنت عربيتها ادام الڤيلا.. ونزلت وقفت ادام البيت…
يااااااااه… البيت.. وحشها اوي…ريحه كل طوبه فيه..البيت زي ماهو….من سبع سنين…
دخلت.. الڤيلا…وهي رجليها بتقدم خطوه وتأخر خطوه خايفه من رد فعلهم بس بردو مش قادره ترجع.. في اكتر وقت هي محتجاهم فيه…..
لمحت والدتها ووالدها.. في الجنينه..بيفطرو…
يااااااه.. ملامحهم وحشتها اوي…
الشعر الابيض.. اللي فوسط شعرهم هو الحاجه الوحيده اللي اتغيرت…ملامح الحزن اللي علي وشهم…
روكا…كانت الدلوعه بتاعتهم.. كانت اقرب حد لوالدها…روكا.. عندها اختين اكبر منها واحده متجوزه ومسافره والتانيه متجوزه واعده في اسكندريه بس في بيت جوزها اتجوزت بعد ما روكا مشيت ولا حضرت فرحها ولا شافت ولادها…حجات كتير اتحرمت منها في بعدها عنهم .
فضلت تقرب وهي دموعها نازله
والدها.. كان بيقرأ الجرنال ومامتها اعده جمبه…
قربت روكا. لحد ماوصلت للتربيزه…
حست والدتها.. بخيال… رفعت عينها براحه…ونزل والدها الجرنان…
واخيرا اتلاقت العيون ببعض…
الصمت كان هو الحديث ولغه العيون كانت هي اللغه الموجوده وقتها.. وقفت مامتهت.. وبخوف من منظر بنتها لاول مره تشوف دموعها لاول مره تحس ان في كسره في بنتها.. لاول مره تحس ان بنتها محتاجها.. وعشان قلب الام مفيش اكبر منه.. قربت من غير كلام وشدتها لحضنها.. وفاللحظه دي… انهارت.. روكا…
صفيه..والدتها… روكا.. مالك يابنتي فيكي ايه…
كل ده وابوها.. باصص عليها من غير ولا كلمه.. ولسه زي ماهو .. محتفظ بجموده.. …لكن اللي كان جواه كان وجع والم وحب اب لبنت عمره اللي كسرته لبنت عمره اللي كانت اقرب ليه من النفس اللي بيتنفسه ..كان نفسه ياخدها في حضنه.. بس مقدرش..زعله منها كان علي اد حبه ليها…
صفيه.. انتي كويسه..
روكا… اخيرا نطقت.. انا محتجالكم اوي….
صفيه.. قوليلي مالك.. متوجعيش قلبي اكتر ماهو موجوع..
روكا… مفيش بس جيت اشوفكم
صفيه.. لا انتي فيكي حاجه..
روكا…. انا عارفه اني وجعتكم واني غلطت.. بس انا محتجالكم اوي.. محتاجه لحضنكم..
هاشم..خير ياروقيه… ناقصك فلوس… شغلك في مشكله…عايزه تغيري البيت… كان ممكن تتصلي وانا ابعتلك الانتي عيزاه…
روكا.. بوجع… انا محتجاكم انتو.
هاشم… ليه مش قدرتي تستغني قبل كده.. هتحتاجينا في ايه الوقت.. لو محتاجه مساعده ماديه في اي حاجه.. انتي مهما كان روقيه هاشم النجار..
روكا… بس انا مش ناقصني اي حاجه من كل ده انا كنت محتاجه احضنكم وبس…محتاجه اشوفكم.. محتاجه.. احس ان ليا اهل لما اتوجع.. اجري عليهمم.
بس. مش مهم.. انا كفايه عندي اني شوفتكم في اكتر وقت كنت محتجاكم فب وكفايه عندي ان لما اتوجعت جيتلكم عشان انا مليش غيركم…اسفه لو ضايقتك .. واسفه لو ازعجتكم… انا همشي…
صفيه.. بدموع… روكا.. خليكي .. انا محتجالك..
روكا.. حضنتها اوي.. مش اكتر مني…
سلام…
لفت ضهرها ومشيت…
هاشم… استني…
وقفت روكا..ولفت ضهرها ليه..
هاشم… تقدري تأعدي انهرده.. لو حابه..
ابتسمت روكا…شكرا…
هاشم.. بجمود… صفيه.. بعد ماتوصليها اوضتها.. تعاليلي عالاوضه.. عشان اجهز. للشغل ..
صفيه.. بفرحه… حاضر..
مسكت روكا من ايدها.. وخدتها وطلعو عالاوضه بتاعت روكا..
روكا…. الاوضه زي ماهي.. وحشتني اوي..
صفيه… اوضتك زي ماهي من يوم ماسبتيها.. مفيش فيها حاجه اتغيرت ويادوب بنضفها انا والشغاليين ونقفلها تاني…
روكا… سامحيني يا مامي..
صفيه.. بدموع… مسمحاكي من اول ماشوفتك ياروكا.. مسمحماكي وعمري ماغضبت عليكي.. اه زعلت واتوجعت وحرمتيني منك سبع سنين بس مقدرش مسامحكيش..
مسكت روما ايدها باستها وحضنتها وهي بتعيط..
انا اسفه.. والله مكنتش اقصد اوجعكم واوجع نفسي..
صفيه… غيري هدومك ونامي شويه لحد ما احضرلك الاكل اللي بتحبيه واصحيكي
روكا… انا مجبتش هدوم..
صفيه.. هدومك القديمه زي ماهي في دولابك..وانتي زي مانتي يعني هتيجي مقاسك..
روكا.. بابتسامه.. حتي هدومي زي ماهي..
صفيه.. مقدرتش وديها لحدد.. وميغركيش ابوكي… كان بيصحي من جنبي في عز الليل.. ولما ادور عليه الاقيه اعد في اوضتك وفاتح دولابك.. وماسك هدومك…
روكا.. بدموع… حضنه وحشتي اوي…
صفيه… انا عارفه ان انتي وحشتيه اكتر .المهم يلا خدي غيار وخدي شاور ونامي شويه وانا هروح اشوفه ..ولما اخلص الغدا هصحيكي..
روكا.. بابتسامه وهي بتمسح دموعها حاضر…
خرجت.. صفيه…وراحت لهاشم في اوضتهم..
كان اعد ادام الشباك شارد..ومعالم الحزن والوجع علي وشه .
دخلت صفيه.. ووقفت جمبه…
مكنتش اعرف ان قلبك جامد كده…
هاشم… البركه فيها..
صفيه… هتفضل كده لحد امته يا هاشم. انا خلاص مش قادره.. انت قادر انت حر بس دي بنتي انا مش عارفه انت ازاي تقدر تبعد عنها كل ده.. اللي بيعاقب حد يعاقبه اسابيع شهور.. بالكتير سنه مش سبعه ياهاشم.. ازاي منسألش عليها ازاي منشوفهاش ازاي نسبها تواجهه اي حاجه لوحدها . روكا تبان قويه. وتعرف تمشي نفسها بس بنتك اضعف كتير من المنظر اللي بتبان بيه انت مشوفتش منظرها.. بنت جايه موجوعه من حاجه انا معرفهاش.. بس هي جايه.. مكسوره. كل اللي كانت عيزاه تحس بحضننا انت حتي ممدتش ايدك تسلم عليها…
هاشم.. والدموع في عينه…
مين قالك انها موحشتنيش اكتر ماحنا وحشناها..
مين قالك ان قلبي جامد انا ادامها اضعف بكتر من ماممكن تتخيلي…مين.. قالك اني معرفش اخبارها…
صفيه.. انت كنت تعرف عنها حاجه.. وانت حالف علينا كلنا انني منشوفهاش..
هاشم… عشان مكنش ينفع. كان لازم تحس بغلطتها..
ومع كل ده.. انا قلبي مكنش جامد زي ما بتقولي..
انا روكا.. عمرها ما نزلت من تحت عيني.. اخبارها كلها عندي اول بأول..وفي حد انا مخليه زي ضلها طول السبع سنين…
بيجبلي اخبارها بيطمني عليها.. لما كانت بتقع في مشكله في شغلها كنت بعمل اتصالات احلهلها من غير ماتعرف..
كنت كل اسبوع.. لما اقولك مسافر لشغل.. كنت بسافر.. واروح اشوفها من بعيد… مكنتش قادر علي بعدها . وجعتني اوي حرمتني منها …وفضلت انها تتجوز راجل هي اختارته .. وتبيعنا تبيع ابوها اللي كانت اقرب حد ليها ابوها اللي هي كانت عارفه انها النفس اللي بيتنفسه..
صفيه.. بدموع. يعني انت كنت بتشوفها وحارمني منها يا هاشم..
هاشم.. كان لازم تحس ببعدنا..عنها مان لازم تعرف قيمتنا في حياتها..كان لازم تفوق من السكينه اللي سرقتها…
ولو انتي واخواتها كنتو اتواصلتو معاها. كانت هتحس ان الموضوع عادي..
انا كنت مستني اليوم اللي تيجي فيه كنت بدعي من ربنا ان اليوم ده يجي قبل ما اموت… انا كنت عارف انها جايه انهرده.. عشان كده منزلتش بدري..
صفيه.. بزهول كنت عارف ازاي..
هاشم..والدموع في عينه اللي ممشيه وراها هو اللي قاللي..انها طلعت بعربيتها. وهي حالتها وحشه…دعيت ربنا بحق الوجع اللي هي فيه.. مايجيش في بالها مكان تاني غير مكانها.. غير بيتها الاصلي.. غير ابوها وامها…وربنا حقق دعوتي..وخليت الشاب اللي بيراقبها.. يمشي وراها عشان ميحصلهاش حاجه وهي في حالتها دي.. واول ما قاللي انها واخده طريق اسكندريه.. قلبي مان بيرقص اني هشوفها كنت هتكسر اكتر لو راحت مكان تاني غير هنا.و.مقدرتش اشوفها ماشيه قلبي مطاوعنيش عشان كده قولتلها تاعد.. عشان املي عيني منها عشان احس بنفسها وسطنا من تاني…عشان احس ان البيت رجعتله روحه من تاني…
صفيه.. وهي منهاره من كلام هاشم.. ومن وجعه اللي مان مخبيه في قلبه..طيب بما انك عارف كل حاجه عنها.. وعارف انها جايه..انهرده…تقدر تقولي بنتي فيها ايه..
هاشم… بنتك حبت ياصفيه..
صفيه… حبت..
هاشم.. اه.. اتعلقت بشاب وحبته وهو حبها… بس هي معرفتوش انها كانت متجوزه.. وهو طبيعي اي كا اي راجل ميعرفش ان اللي حبها كانت متجوزه يكون ده ده رد فعله.. وهي حست انها تايههه مش عارفه اذا كان هو صح ورد فعله ده طبيعي ولا اذا كان هو مش عايزها في حياته خلاص..
صفيه.. انت عرفت ده كله ازاي..
هاشم… زي ما قولتلك روكا ماغبتش عني من سبع سنين.. يا صفيه.. والولد اللي كان وراها سمع خناقتها هي وهو.. وده اللي سمعه وفهمه من كلامهم..
صفيه.. طيب الشاب ده .
قاطعها هاشم… متقلقيش هو كمان كل حاجه عنه عرفتها…مش هو بس هو واي حد بيتعامل معاه.. المرادي كان لازم أئمن بنتي..
ومتقلقيش.. هو شاب كويس. وحبها فعلا.. بس هيبان بردو لو فعلا حبها اوي ولا متفرقش معاه.. هيبان هيلف وراها ولا هيتعب من اول موقف.. هيبان لسه متمسك بيها ولا لا..
صفيه… بس هي شكلها موجوعه اوي..
هاشم… بنتك لابسه وش القوه والجرأه بس هي اضعف كتير قلبها ديما تاعبها..
صفيه.. كل ده كنت شايله لوحدك طب كنت شاركني معاك او كنت فهمني وخدتني معاك اشوفها.. انت مكنتش شايف انا عامله ازاي عشانها..
هاشم.. غصب عني.. صدقيني كنت عارف انك مش هتقدري تشوفيها من بعيد ومتجريش عليها. تخديها في حضنك..
صفيه.. وانت.. قدرت ياهاشم… انت حتي مخدتهاش في حضنك لما شوفتها ادامك ولما جتلك برجلها. وهي محتجاك…
هاشم… هتصدقيني لو قولتلك ان حضن قلبي وعيني ليها لما شوفتها كان اقوي من حضن ايدي…
صفيه… هصدقك ياهاشم.. عشان عارفه روكا عندك ايه…
هاشم… مسح دموعه.. انا هقوم اغير هدومي واروح الشغل..
صفيه.. خليك انهرده..
هاشم.. مش هينفع…في شغل متأخر.. ولازم يتسلم..
بس هرجع تاني مش هتأخر.. وياريت مفيش حرف من اللي قولته ده تقوليه لروكا..
صفيه.. حاضر.. انا هروح اشوفها.. وبعد كده اعمل الغظا..
هاشم… اعمليلها كل حاجه حلوه اعمليلها كل حاجه كانت بتحبها…اكيد وحشها اكلك..مكنتش بتاكل غير من الشارع..
صفيه.. ودموعها منشفتش.. هعملها كل حاجه حلوه.. متتأخرش.
هاشم.. مش هتأخر..
خرجت صفيه.. ودخل هاشم بكل الوجع والالم والحب والفرح والمشاعر المتلغبطه عشان ياخد شاور و يغير هدومه ويروح علي شغله….
خبطت صفيه بالراحه علي اوضتها..ولما ملقتش رد فتحت براحه…لقت روكا. نايمه.. وحاضنه عروسه كبيره بتاعتها كان والدها جايبهلها في عيد ميلادها…كانت راحه في سابع نومه.. وكأنها منامتش طول السبع سنين.. نوم. تعب ووجع وحنين واشتياق. وراحه. واطمئنان…
خرجت صفيه.. وسابتها نايمه…
وراحت تعمل الغدا وكان جواها فرحه متتوصفش…
بعد شويه.. خرج هاشم…لقي صفيه في وشه..
صفيه.. خلاص ماشي..
هاشم.. كان عينه علي اوضت روكا..
صفيه… نامت ..كأنها منامتش من سنين..
هاشم. عايز يقول حاجه ومتردد..
صفيه… عايز تشوفها صح..
هز هاشم دماغه..
صفيه.. ادخل شوفها وانا راحه اعمل الغدا..
صفيه.. سابته عشان كانت عارفه انه محتاج يعمل كده..
فتح.. هاشم.. الباب براحه.. ودخل وقفل وراه…
وشافها وهي نايمه… فضل ساكت كتير وهو بيشوفها.
هاشم.. وهو بيكلم نفسه يااااااه ياروكا وحشتيني يابنتي وحشني شكلك ونفسك.. وحشني ضحكك اللي كان ماللي البيت.. صوتك اللي كان ماللي حياتي.. علي اد ما كنت باجي واشوفك.. وملامحك مراحتش من عيني بس وحشني شكلك.. يابنت روحي..عارف انك كنتي تعبانه زيي وانك كنتي محتجاني زي ما انا كنت محتاجلك..بس كان لازم اعمل كده.. كسرتيني يا روكا.. ووجعتيني انتي كنتي معوضاني عن حجات كتير ضحكتي راحت معاكي خدتي قلبي ومشيتي .. كسرتي فرحتي بأني اشوفك عروسه يابنتي…مسمعتيش كلامي واللي بعتينا عشانه هو اللي دبحك بأيده..
شافها وهي حاضنه العروسه.. ابتسم.. وافتكر..
فلاش.. باك…
هاشم.. الجميل مكشر ليه..
روكا… وهي لسه لابسه فستان عيد ميلادها..مش بكلمك.
هاشم ليه بس. بقي انا اعملك حفله تتحاكي عليها اسكندريه عشان عيد ميلادك.. وانتي تزعلي كده..
روكا…ايوه مش بكلمك يعني تعملي الحفله دي كلها… ومتجبليش هديتي انا مخصماك..
هاشم.. طب انا قولت الحفله تخلص والناس تمشي واطلع للقمر بتاعي عشان اديكي هديه وتبقي اخر هديه جاتلك..
روكا..بفرحه… بجد جبتلي ايه..
هاشم… روحي افتحي دولابك كده..
جريت روكا.. علي دولابها.. لقت عروسه كبيره طولها..
روكا.. وهي بتتنطتت الله جميله اوي وكبيره اوي..
هاشم.. بقي انا بردو انسي القمر بتاعي..
روكا.. بس اشمعني عروسه يعني انت لسه شايفني صغيره ولا ايه.. انا عندي 17سنه..
هاشم.. حتي لو كبرتي وبقي عندك ميت سنه هتفضلي في عيني بنتي الصغيره…وعمري ماهشوف سنك ده ابدا..
روكا.. وهي بتحضنه.. علي فكره بقي انا بحبك اوي وعلي فكره انا مكنتش زعلانه منك ولا حاجه ..
هاشم.. عارف.. وعارف انك متقدرؤش تزعلي مني..
ويارب يطول في عمري لحد ما اشوفك عروسه اينعم عريسك هيندم انه اتجوزك.. من اللي هعمله فيه بس يستحمل بقي مش هو اللي هياخد قلبي مني..
روكا.. اطمن يا هاشومي .. انا اعده علي قلبك.. ومش هسيبك ويوم يعني ما افكر اتجوز هتجوز واحد شبهك بالمللي ولو مجاش كده مش هتجوز..
هاشم.. يبقي مش هتتجوزي ابوكي مفيش زيه يابت..
روكا.. ياعم عالثقه..صراحه عندك حق انت مفيش حد زيك……
باااااااك…
تعبتيني ياروكا.اوي..وقرب منها عشان يشوف ملامحها بوضوح اكتر..ووطي عليها يبوسها من اورتها.. ويشم ريحتها اللي وحشته…وخانته دموعه وقبل ماتنزل علي وشها مسحها وخرج من الاوضه بسرعه….
مشي هاشم…وفضلت صفيه تعمل كل اللكل كأنها عندها وليمه وكلمت اختها…ساره.. اللي متجوزه في اسكندريه عشان تيجي…
وفات وقت كبير وفضلت روكا نايمه لحد بعد المغرب…
ورجع هاشم مقدرش يأعد اكتر من كده في الشغل روكا وحشته وحاسس من سلعت ماشافها انه مش علي بعضه..
هاشم.. لصفيه.. هي فين..
صفيه.. لسه نايمه كأنها منامتش من مده كبيره..
هاشم.. مصحيتيهاش عالغظا ليه…
صفيه.. مرضيتش..وقالت انها محتاجه تنام. .فقولت اسيبها تكون رجعت وناكل سوا. وساره كمان جت.. ولسه مشافتهاش
هاشم.. فين ساره..
صفيه.. كانت بتغير لتمارا…وسولي..
هاشم.. ماشي هطلع اغير.. وحضري الغدا وصحيها..
صفيه.. ماشي…
خرج. هاشم.. وشاف ساره…سلم عليها..
سولي.. جدووووو
هاشم.. حبيب جدوو.وحشتني..
هاشم.. لساره.. فين تمارا…
ساره.. غيرتلها.. ورضعتها ونامت..
هاشم… ماشي انا هطلع اغير وانزل..
ساره.. بابي ..
هاشم… نعم..
ساره… روكا وحشتني يابابي عشان خاطري.. المرادي ارضي عنها كفايانا بعد بقي..
هاشم.. وهو بيطبطب علي كتفها… اللي فيه الخير يقدمه ربنا..
ساره.. وهي بتمسح دموعها.. هروح اساعد مامي…
هاشم… ماشي.. يابنتي…
مر.. وقت بسيط.. كانو حضرو الغظا.. طلعت صفيه.. تصحي روكا.. لقتها صاحيه واعده عالسرير سرحانه وفدنيا تانيه ومحستش حتي بدخول والدتها… كانت اعده ضامه رجلها.. علي صدرها.. وباين علي وشها الحزن…
صفيه.. روكا.. روكا..
روكا… مامي..اسفه مخدتش بالي..
صفيه.. انا بنادي عليكي وانتي مش هنا..
روكا.. معلش ياحبيبتي كنت سرحانه..
صفيه.. طب يلا الغدا خلص احنا جعانين وانتي مش راضيه تصحي من بدري . وسيباكي ترتاحي..
روكا.. معلش جوعتكم بس كنت محتاجه انام واوضتي والسرير بتاعي ساعدوني اني انام جدا..
صفيه. طب يلا.. قومي.. بابي كمان رجع ..
روكا.. وشها اتغير…طيب بلاش انا هو مش هيعرف يامل وانا معاه علي سفره واحده..
صفيه.. قومي يلا علي فكره بقي هو قاللي هغير وصحيها .
روكا.. بجد..
صفيه.. اه بجد..وعلي فكره .. انا عملالك مفجأه..
روكا.. ايه..
صفيه.. ساره.. هنا.. هي وولادها.. جت اول ما قولتلها انك جيتي..
روكا.. بفرحه.. بجد ساره هنا..
صفيه. اه والله..
روكا.. طيب انا هقوم اغير بسرعه وانزل..
صفيه.. ماشي..
هنستناكي…
خرجت صفيه.. وقامت روكا تغير هدومها بسرعه…
نزل هاشم والكل كان تحت..
ثواني.. وابتدت روكا تخرج كام قلبها بيدق جامدد حاسه بغربه وحاسه انها تايهه ومحرجه منهم ومش قادره تحط عينها في عينهم .
لحظات.. ونزلت روكا..
صفيه.. تعالي ياروكا…
بصت روكا. لساره.. وساره بصتلها.. فضلو كده شويه.. ودموعهم خانتهم.. وثواني وجريو علي بعض.. والاتنين انهارو بمعني الكلمه.. دموع صفيه كانت مع دموعهم.. دموع قلب هاشم كانت تفوق دموعهم..
ساره.. وحشتيني اوي..ورفعت وش روكا.. ومسحت دموعها..وحشتيني اوي.. متمشيش تاني والنبي ياروكا.. انا من غيرك تعبانه اوي…
روكا.. انا اللي من غيركم تعبانه بجد.. سامحيني مقدرتش امون معاكي في فرحك مقدرتش امون معاكي واشاركك فرحتك بأول بيبي..
ساره.. بابتسامه وسط دموعها مش مهم المهم انك رجعتي وفوسطنا.. وخدتها من ايدها.. تعالي تعالي.. اعرفك علي اول فرحتي ياستي.. ده سولي… عنده 3سنين.. وفي تمارا كمان.. عندها 8شهور.. شكلك خالص..
روما. وطت علي سولي..
انا اسمي روكا.. انت اسمك ايه..
سولي.. سولي…
روما… ياروحي.. وحضنته جامد.. انت عارف ان انا اخت مامي..
سولي… انتي كنتي فين..
روكا.. مش عارفه تردد.
وطت.. ساره.. روكا.. كانت مسافره ياسولي..
سولي.. جميله اوي.
روما.. انت اللي تجنن ياروحي..
صفيه.. يلا تعالو الغدا هيبرد …
قامت ساره وقومت روكا…
راحو عالسفره.. وراح هاشم من غير ولا كلمه…
ابتدو ياكلو..
ساره وصفيه.. من فرحتهم مكانوش عارفين يسكتو.. فضلو يتكلمو ويحكو ويهزرو ..
روكا.. كانت بتسرق نظرات لهاشم.. واول ما تحس ان عينه جت في عينها.. تبعدها بسرعه..
حتي هاشم كان بيعمل كده.. كان مركز معاها وحشتو ووحشتو اعدته معاها علي السفره كان طاير من جواه.. بس كان لسه في حاجز ..وروكا من الاحراج كانت خاسه ان السبع سنين خلوها غريبه مش عارفه تتعامل بطبيعتها شقاوتها وضحكها كانت ساكته
ساره… هتأعدي معانا علي طول صح..
روكا.. بصت لهاشن ثواتي وبعدت عينها…
مش هينفع ياساره..
ساره… هتسافري
روكا… لا مش الوقت.. انا محتاجه افصل . هفضل هنا شويه في اسكندريه.. ولما احس اني ارتحت هرجع عشان الشغل ..كده او كده انا شغلي هناك.. ومقدرش اسيب الشركه..
ساره.. ماشي بس تفضلي رايحه جايه علينا..
روكا.. ربنا يسهل..
ساره.. طيب وبما انك اعده هنا شويه اعدي هنا .. احمد جوزي مسافر. شغل اسبوع خليكي هنا وانا كمان هفضل هنا…معاكي.. ادام كده كده مش هترجعي.. خليكي.
روكا.. بصت لهاشم براحه…صدقيني مش هينفع. عشان تكونو براحتكم. انا كفايه عليا اليوم ده.. كفايه اني شوفتكم واطمنت عليكم..
صفيه.. بتشاور
لهاشم يقول حاجه…عشان تاعد..
صفيه.. خليكي ياروكا.. انتي وحشتيني يابنتي ملحقتش اشبع منك..
روكا.. ولا انا يامامي والله بس صدقيني مش هينفع انا هشوف اي فندق او شقه اي حاجه هعد فيها وهقولك مكاني ولو نفع تجيلي هناك ياريت ..
هاشم…اخيرا نطق تقدري تأعدي الوقت اللي انتي عيزاه مع امك واختك..
روكا… مش عايزه اضايق حضرتك ..
هاشم… بيتهياألي انك تضايقي حضرتي دي فات وقتها خلاص وبيتهيألي بردو ان ده ميفرقش معاكي. سبق وكسرتيني مش ضايقتيني بس…
الحمد الله انا شبعت .ومسح ايده فالمنديل وقام
روكا… الدموع اتجمعت في عينها من تاني… موجوعه من كلامه وموجوعه علي الحاله اللي وصلته ليها ..
ساره… متزعليش ياروكا.. والنبي… بابي بيحبك والله بس هو زعلان انتي عارفه ان مفيش اطيب منه.
صفيه… ابوكي موجوع بس بيحبك واظن ان لو هو بيكرهك مكنش جه علي نفسه وقالك اعدي…
روكا. بدموع عارف.. بس لحد امته هدفع تمن غلطتي هفضل ادفع تمنها طول حياتي..
ساره.. احنا كنا فين وبقينا فين ياروكا.. ده كان رافض اي تواصل معاكي خالص..
روكا… عندك حق..
صفيه.. يلا يابنات كلو بقي…
……كلو مع بعض… وفضلت ساره مع روكا.. وروكا.. نسيت نفسها وسولي وتمارا فصلوها تماما ونسوها وجعها شويه ورجعوها طفله من جديد فضلت تلعب معاهم.. وهاشم من بعيد… مبتسم.. ماهي وحشته بردو.. مبسوط بضحكتها وحركتها وطفولتها والبهجه اللي رجعتها تاني عالبيت ….
………ملحوظه الاحداث اللي حصلت دي كلها من بعد ما روكا سابت بيتها وسافرت لحد ما صحابها راحو يدورو عليها… هما من ناحيه كانو بيدورو عليها وهي كانت في وسط اهلها…….
بعد.. وقت عدي علي صحابها.. اتصل شخص ببدر..
وعرفه ان الرقم بعد تتبعه ظهر ان المكان اللي موجوده فيه هو اسكندريه….حتي صاحبه اللي فالمرور. بعد تتبع gbs عرفهم ان مكانها في اسكندريه..
سيلا… مش معقول انها راحت.
عامر.. انا كنت متوقع..
سيلا.. طيب هي عندهم ولا في اسكندريه في مكان تاني.
بدر.. اكيد عندهم…
سيلا.. طيب باباها وافق كده عادي..
مهاب…. مهما كان هي بنته ياسيلا.. وصدقيني يمكن اللي حصل بينهم ده يكون سبب في انهم يرجعو زي الاول..
سما.. صح يامهاب.. ربنا مبيعملش حاجه وحشه ابدا..واكيد في خير احنا مش شايفينه فاللي حصل ده…
بدر… طب يلا اعدتنا هنا ملهاش لازمه الوقت..
سيلا… طيب انا مش عارفه اروحلها ولا اعمل ايه..
بدر… الاحسن تسيبوها شويه تفصل ولو فعلا راحت لاهلها سبوها تلم معاهم اللي راح…
ريم… عندك حق يابدر….
مشيو كلهم من بيت سيلا….
ومشي عامر…وهو موجوع..عليها.. ومنها..ومطمن انها في وسط اهلها… بس
تفتكرو عامر هيسبها كده… او تفتكرو صحابها هيسيبوها لما ترجع لوحدها….🙄🙄🙄🙄
ياريت تسمعو الاغنيتين عشان تعيشو المود اكتر…
اول واحده تخيلوها وهي روكا ماشيه فالطريق.
تاني واحده موقف هشام والدها وهو بيبص عليها فالاوضه
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية سيلا والنمر)
