رواية يكفيني منك عقابا الفصل الرابع 4 بقلم عبير سليم
رواية يكفيني منك عقابا الجزء الرابع
رواية يكفيني منك عقابا البارت الرابع
رواية يكفيني منك عقابا الحلقة الرابعة
خبر ينتشر في القريه سريعا و يدوى صوته في المكان مما يجعل أهل القريه جميعهم يجرون ليشاهدوا ذاك الحدث و لكن الشرطه تمنع الجميع من الاقتراب حتى تأتي الإسعاف
الجميع يتحدث و يهمهم و الكل يقول ما سمعه من أفواه بعضهم البعض
يقول أحدهم : هو مين اللي انجتل ديه يا شعبان
شعبان : دول اتنين مش واحد يا محمود
محمود : اتنين مرة واحده لا حول ولا قوة الا بالله العلي العظيم و مين دول على أجده
شعبان : عامر و مصعب ولاد الحاج نعمان العشري
محمود : عامر و مصعب بس دول لساتهم شباب صغار و يا ترى مين اللي عمل فيهم العمله السوده ديه
شعبان : أكيد طبعا أهل الطحاويه مفيش بين الحاج نعمان العشري و بين حد عداوة غيرهم و اكيد هما اللي عملوها مفيش غيرهم
ادي آخرة التار اللي بياخد الصغير و الكبير مش حرام يروح فيها شباب زي الورد عملوا ايه هما عشان يحصللهم اجده دول ادب و اخلاج مفيش بعد اجده ربنا يستر
وسعوا بعدوا
الجميع يبعدون أنفسهم حتى يتسنى لهم اختراق الجميع و الوصول إلى مكان الحادث
رجل الشرطي : استنوا عنديكم انتوا مين
نعمان : اني ابوهم ولادي عايشين صوح جول انهم عايشين الله يخليك
الشرطي : ايوة لساتهم عايشين لحد دلوك اطمنوا و الإسعاف على وصول
يهرول عليهم ليجدهم مغمى عليهم من آثار النزيف الذي انهك دماءهم
يبكي كما يبكي الصغار و لما لا و هم فلذة اكباده و حصاده من تلك الدنيا
عامر مصعب ردوا علية يا ولاد اوعوا تروحوا و تسيبوا أبوكم اللي ملوش غيركم في الدنيا
يرفع يده للسماء : يا رب يا ب نجيهم يا رب
تصل الإسعاف سريعا لنقلهم إلى المستشفى و الجميع معهم و سرعان ما علم كل من بالقريه بما حدث و الجميع ليس له حديث سوى مصرع اولاد نعمان العشري
😢😢😢😢😢😢😢😢
في إحدى الأماكن المهجورة
يصل إليه فيجده يجلس و يدندن فيتحدث إليه : انت يا اللي اسمك متولي انت يا غبي
متولي : تعالى يا زكريا بيه خد لك نفس معاي
زكريا : خدك ربنا يا شيخ و ريحني منيك
متولي : يريحك مني بعد ما ريحتك صحيح آخرة المعروف الضرب عالكفوف بجي بتدعي عليا بعد ما نفذتلك اللي طلبته مني و زياده كمان
زكريا : ضربه فجلبك ان شاء الله انت يا غبي انت مبتفهمش
متولي : و ليه بس الشتيمه ديه يا زكريا بيه
زكريا : هو اني جلتلك تجتل واحد و اللا تروح تجتلي العيله كلها
متولي : أعمل إيه حظهم اجده فجريين
اني كنت ناوي اضرب واحد فيهم و اهرب بس المكان كان ضلمه و هما الاتنين ماشيين جمب بعض و اول ما ضربت على واحد التاني وجف جدامه فالضربه التانيه جت فيه هو
زكريا : يعني انت ضربت كل واحد رصاصه
متولي : لا اني ضربت تلت رصاصات واحد فيهم خد طلجه و التاني طلجتين
زكريا : يعني هما دلوك ماتوا و اللا لساتهم عايشين
متولي : معرفش انت كت عايزني اروح اكشف عليهم إياك و اعرف مين مات و مين ما ماتش عشان اتمسك
زكريا : مسكك عزرائيل ان شاء الله المهم حد فيهم يكون مات عشان نرتاح من الهم ديه عاد
متولي : و الله اني مش مغسل و ضامن جنه اني عملت اللي علية و مليش صالح باللي حيوحصل
زكريا : جنه و هو انت اللي زيك حيورد على جنه ديه انت داخل جهنم من أوسع أبوابها
متولي : بجولك ايه يا زكريا بيه اني عايز دلوك بجية حجي
زكريا : اتفضل خد و مشوفش وشك نهائي و يا ريت لو تستخبى في اي مكان و تكن اجده لحد ما نشوف اللي حيوحصل
متولي : انا رايح المولد اللي في البلد اللي جمبينا ابسط نفسي شويه
زكريا : روح مكان ما تروح الهي تروح ما ترجع يا بعيد المهم مشوفش وشك نهائي يا للا غور
يرجع زكريا البيت و هو مش عارف ايه اللي حيحصلله لما ابوه يعرف باللي عمله
يلاقي ابوه في انتظاره : ايه اطمنت على عملتك السوده اللي عملتها
زكريا : اني و اني عملت ايه يا بوي
محمد : عملك اسود و مهبب هو اني مش حذرتك يا زكريا و جلتلك متمشيش ورا خالتك و انك لو نفذتلها اللي فدماغها متلوميش غير نفسك
تأتي اليهم من خلفها : ديه بدل ما تشكره انه جاب تار عمه اللي انت معرفتش تجيبه يا بن عمي
محمد : صفيه انتي تسكتي خالص و معوزش اسمع صوتك
صفيه : ليه ان شاء الله بتكلم كلام غلط لا سمح الله مش هي دي الحجيحه
شاطر يا جوز بتي اني اجده عرفت اجوز صحيح
بس فرحتي محتكملش غير لما اشوف نعشهم و هو معدي من جدامي و افضل ازغرد ازغرد و املى الدنيا زغاريد
و ابرد ناري و جوزي يرتاح في رجدته
محمد : اه و بعدين تصوتي تاني على جوز بتك لما يحصلهم و معاه يحي هو كمان
زكريا : لا بعد الشر عني اني مليش صالح
محمد : ملكش ايه يا فالح و هما حيسيبوا تارهم إياك و زي ما اذيتوهم في اتنين حيردولنا الاذيه هيا نفسيها
منكم لله حسبي الله ونعم الوكيل فيكم
صفيه : انت بتحسبن فينا يا محمد انت ايه يا اخي اني مستغربه منك جوي يا بن عمي ديه بدل ما تفرح اننا خدنا بتار اخوك اللي انت معرفتش تاخده كمان ليك عين تزعل منينا و تحسبن علينا
محمد : انتوا مفهمينش حاجه واصل انتوا اللي عملتوه ديه مش حياجي من وراه غير الخراب
صفيه : و من ميته الحج لما بيرجع لصحابه بيجيب الخراب كنك اتجنيت عاد يا جوز اختي
محمد : جن لما يركبك تصدجي انتي لو مش ست جدامي كنت لطشتك جلمين على وشك يفوجوكي لكن انتي حسابك معايا حيكون عسير عاللي عملتيه ديه
اني حذرتك جبل سابج و انتي مسمعتيش النصيحه استحملي بجى اللي حيوحصل و اللي يجرب من عش الدبابير يستحمل اذاه يا صفيه
و انت يا شورتها اصبر على رزجك
بس اما ارجعلك حيبجى لية معاك حساب عسير
زكريا : طب انت رايح فين يا بوي
محمد : انت ملكش صالح بية نهائي انت فاهم غور من وشي
زكريا : الحجي يا خالتي اني معرفش ابوي حيعمل ايه
محمد : سيبك منيه و لا حيجدر يعمل حاجه اهو حيبعبع له بكلمتين و خلاص
المهم دلوك اني عايزاك تشوفلي ولاد نعمان دول لساتهم فيهم الروح و اللا ماتوا و ارتحنا منيهم عايزة الليلادي ابات و اني فرحانه و الفرحه ماليه جلبي
زكريا : لا بجولك ايه أني لحد اهنيه و دوري انتهى خلاص يعيشوا يموتوا مليش فيه
صفيه : بجي اجده يا زكريا
زكريا : خالتي الله يخليكي اني اصلا مرعوب و حاسس انهم حياجو دلوك يجبضوا علية
صفيه : لا اطمن خالص محدش حيجبض عليك
و لا حد حيجيب سيرتك و لا سيرتنا واصل
زكريا : و انتي ليه متوكده اجده يا خالتي
صفيه : احنا عوايدنا اجده منجوليش عاللي عملها و همت محيجولوش عشان ياخدوا هما تارهم بيدهم
زكريا : امال ازاي جبل سابج انتوا جلتوا على نعمان ديه لما جتل عمي
صفيه : احنا مجلناش حاجه يا غبي الناس اللي حججوا معاهم في الجضيه هما اللي جالوا انه مالوش اعداء غير نعمان العشري و بس عشان اجده هما اللي جبضوا عليه
زكريا : يا لهوي يا مصيبتي يعني اني ححصلهم
صفيه : انت حتولول زي الحريم و اللا ايه
زكريا : امال عايزاني اعمل ايه يعني تجوليلي انهم حياخدوا بتارهم و عايزاني افرح و اللا اجوم اتحزم و ارجص
فرحانه يا خالتي فرحانه يا اختي يا مصيبتك السوده يا زكريا كان عجلي فين لما مشيت وراكي اديني حروح فطيس اهوه
صفيه : حتروح و انت رجبتك مرفوعه انك اخدت بتار عمك
زكريا : اخدت ايه و نيلت ايه منك لله يا خالتي يا رب استرها معايا يا رب ديه اني غلبان
زينه : هدي نفسك يا حبيبي و ان شاء الله تعدي على خير تعالى معاي فوج و اني حروجك
زكريا : تروجي مين اني حتروج لحالي بعدي عني انتي و امك كفاكم اللي حصللي
زينه : الله و اني مالي يا زكريا انت حتطلع عفاريتك علية و اللا ايه
زكريا : اني اللي غلطان استرها من عنديك يا رب اني عايز افرح بشبابي
عائشه : مكنش ليه لزوم تنشفي دماغك و تعمللي انتي عايزاه يا صفيه اجده محدش حيضر غير ولادي و بس
صفيه : بجولك ايه يا عيشه تعرفي تنجطيني بسكاتك انتي كمان
اني لحد دلوك مش مطمنه و محطمنش غير لما اسمع انهم ماتوا خلاص وجتها اعملوا اللي تعملوه المهم انى حبجى ارتاحت و ريحت جوزي في تربته
😢😢😢😢😢😢😢😢
في المستشفى يقف كل من نعمان و زينب و حفصه و رحمه و عطر و عتاب وحسني أمام غرفة العمليات منتظرين خروج الأطباء لكي يطمئنوا على حالتهم
كانوا جميعهم في حاله لا توصف من الحزن
النساء يبكون من قلوبهم و نعمان يواسيه حسني و بعض المقربين لهم على فلذة كبده
و لكن من الذي بيده ان يخرجه من قلقه غير الله سبحانه وتعالى وحده
يا رب يا رب الطف بينا يا رب اللهم اني لا أسألك رد القضاء و لكن أسألك اللطف فيه
لا يقدر على الجلوس و لا يقوى على الوقوف فلقد كان مثل الجالس على جمرة يقف قليلا و يجلس قليلا يأخذ المكان ذهابا و عوده يأكله القلق و ينهش قلبه الخوف على أبنائه
يأتيهم جمال (زوج حفصه اخته السابق) و هو يهرول عليهم : طمني يا نعمان ايه الأخبار
نعمان : معرفش يا جمال اهم جوة في العمليات ادعيلهم ربنا ينجيهم
اني لو ولادي راحوا مني حروح وراهم اني محجدرش اعيش من غيرهم يا جمال دول نور عيوني دول هما اللي طلعت بيهم من الدنيا دول عكازي اللي بتسند عليه
يعني اني يا ربي ابجى بحلم باليوم اللي اشوفهم فيه عرسان الاجيهم بيروحوا من يدي
جمال : وحد ربنا يا نعمان و متجوليش اجده استبشر خير ان شاء الله حيجوموا بالف سلامه و ان شاء الله ربنا حينجيهم
نعمان : يا رب يا جمال يا رب
يقف جمال معهم فهو برغم انفصاله عن حفصه إلا انهم تربط بينهم روابط دم و نسب و أيضا بينهم بعض الاعمال و لكن جمال لم يدخل بيتهم منذ ما حدث حرصا على مشاعر حفصه فقط يكتفي بمقابلتهم خارج أسوار المنزل
وقف يدعو الله ان ينقذ كلاهما من موت محقق
عينه وقعت عليها و هي تبكي على اولاد أخيها فهما لها بمثابة ابنائها و قد تولت تربيتهما مع امهما و هو مازال رغم انفصالهما منذ سنوات يحبها و لم تستطع زوجته التي انجبت له ابناءه ان تستحوذ على مكانتها بقلبه
أما رحمه فقد كانت تبكي في حضن امها بكاء مريرا فاخوانها الاثنين بين الحياه و الموت من هم سندها في الحياه بينهم و بين الموت خيط رفيع
اه يا حرجة جلبي عليكم يا اخواتي
زينب و هي تبكي هي الأخرى : ان شاء الله ربنا حينجيهم يا بتي اني متوكده ان ربنا حيجف معانا و انه مش حيوجع جلوبنا عليهم اخواتك حيعيشوا يا رحمه حيخرجولنا بالسلامه ادعيلهم يا رحمه ادعي لاخواتك يا حبيبتي
رحمه : يا رب يا رب جوم اخواتي بالسلامه يا رب
اني مليش غيرهم يا رب دول هما سندي في الدنيا
اما عتاب فكانت بتبكي بحرقه و هي في حضن عطر : اه اه يا وجع جلبي عليه اه يا حرجة جلبي عليك يا عامر
عطر و هي بتحضنها: اهدي اهدي يا حبيبتي ان شاء الله ربنا حينجيه يا عتاب ان شاء الله حيجوموا هما الاتنين بالسلامه يا حبيبتي
عتاب : خايفه خايفه عليه يحصلله حاجه يا عطر
اني لو عامر حصلله حاجه محجدرش اعيش من بعديه ديه حبيبي و روحي و كل دنيتي
دنيتي اللي اني بحلم اعيشها معاه
و مصعب كمان و الله خايفه عليه جوي ديه اخويا اللي بيخاف علية من الهوا
بس اني جلبي واجعني جوي جوي يا عطر
عطر : بعد الشر عنيه هو و مصعب يا عتاب ان شاء الله ربنا حينجيهم
ان شاء الله حيجوموا منيها بألف سلامه بس احنا نجول يا رب
عتاب : يا رب بحج حبيبك النبي الغالي تجومهم بالسلامه يا رب
عارفه يا عتاب اني خلاص معوزاش حاجه غير انه يجوم منيها و بس حتى لو جال انه محيحبنيش و حتى لو عرفت انه رايد حد غيري بردك حبجى راضيه و مسامحه بس اهم حاجه انه يجوم و اشوفه بعنيه و هو بيتنفس و بعد اجده يوحصل اللي يوحصل
عطر : ايه الحديت الاهبل ديه هو مين ديه اللي حيجول معايزكيش و عايز غيرك هي مين اصلا غيرك تستحجه و اللا مين ديه اللي ممكن يحبها غيرك شكل زعلك عليه خلاكي تخرفي ادعيله انتي بس يا حبيبتي و بعد اجده ان شاء الله حيحس بيكي و بحبك ليه و محتونكيش لغيره و لا هو حيكون لغيرك
عتاب : أني اهم حاجه عندي دلوك يجوم بالسلامه و بعد اجده يوحصل اللي يوحصل جومه بالسلامه يا رب
😢😢😢😢😢😢😢
اما في بيت نعمان
نورة و هي تبكي بكاءا شديدا و تضع الحجاب على رأسها و تتجه ناحية الباب لتفتحه : اني لزمن اروحله المستشفى اني محجدرش اجعد اهنيه و معرفاش فيه ايه و لا حالته كيف
نسمه : مينفعش يا نورة مينفعش تروحي و انتي في الحاله دي انتي اجده بتفضحي نفسك و بتعرفيهم اللي انت فيه انتي موعياش لنفسك حالتك كيف
نورة : يوحصل اللي يوحصل ان شا لله حتى يطفشوني بعديها المهم اطمن عليه و اطمن انه بخير اني مجدراش مجدراش اجعد اهنيه و اني مش عارفه هو فيه ايه و لا الضربه جاتله فين يا حبيبي يا مصعب يا ريتني كنت اني و انت لاء يا حبيبي
نسمه : اهدي يا نورة مينفعش اجده نورة و هي تقبل يد اختها : احب على يدك يا خيتي سيبيني سيبيني اروحله اطمن عليه اشوفه من بعيد و بصي بعد اجده حعملك اللي يريحك حتى لو عايزانا نمشي من اهنيه نمشي بس اطمن عليه اطمن انه حسه في الدنيا
و الله ما حتكلم و لا حفتح خاشمي بكلمه بس اطمن انه عايش
عشان خاطري عشان خاطر خيتك
يا نسمه اني حموت لو ما اطمنتش عليه
ترق تسمه لحال اختها فتقرر ان تاخذها للذهاب الي المستشفى و تدعو الله الا ينكشف أمرها و خاصة و هي في تلك الحاله
😭😭يصل محمد الطحاوي إلى المستشفى و يتجه ناحية نعمان الذي ما أن وقعت عينه عليه و كأن حية قد قامت بلدغه و قبل أن يفتح محمد فاه بكلمه سارعه نعمان بالتحدث : انت جاي اهنيه تعمل ايه يا محمد و ليك عين تاجي
و اللا انتوا تجتلوا الجتيل و تمشوا في جنازته يا جبروتك يا محمد يا طحاوي
محمد : نعمان انا جاي اطمن على ولادك و اطمن انهم بخير
نعمان : لا و الله فيك الخير يا محمد يعني تجتلوا و تاجي تطمن
طب حدد جاي تطمن على ايه بالظبط تطمن انهم ماتوا خلاص و ارتحتوا و ناركم بردت و اللا جاي و خايف يكونوا لساتهم عايشين فتبعتلهم اللي يخلص عليهم خالص
كنك متفج مع الفرجه تطبل اول ما تاجي و تسمع خبر موته
لكن لاء ان شاء الله ربنا حيرد كيدكم و بإذن الله ربنا حيجف معانا و محيصيبهمش مكروه واصل و حيجوموا منيها بالف سلامه
محمد : نعمان اني مجدر الحاله اللي انت فيها و خوفك على ولادك لكن احلفلك بالله العظيم تلاته اني مليش صالح باللي حوصل ديه واصل
محمد : مالكش صالح بايه و اللا بايه يا محمد يا طحاوي ملكش صالح بمحاولة جتلي زمان و اللي راح فيها الراجل الغلبان و ساب بناته يتيتموا و هما لساتهم صغار و اللا ملكش صالح باللي حوصل دلوك لولادي بس اذا كنت اني سكت عاللي حوصل زمان فإني محسكتش على اللي حوصل النهارده إلا ولادي يا محمد
وكل واحد من ولادي جصاده عشرة من عنديكم و لو حد فيهم حصلله حاجه عيلتكم كلها محتكفانيش و حيبجى الدم للركب و حجتلكم نفر نفر محخليش في عيلة الطحاوي راجل لا كبير و لا صغير و حاخد العاطل عالباطل يا محمد
محمد : اني محلومش عليك في الكلام اللي بتجوله ديه اني مجدر اللي انت فيه
اني كل اللي يهمني دلوك اني اطمن ان ولادك بخير و سالمين و بعد اجده حيكون لينا كلام تاني يا نعمان
نعمان : احنا مفيش بيناتنا كلام يا محمد الكلام اللي بيننا خلص من زمان
محمد : لا يا نعمان نطمن الأول على الولاد و بعد أجده لزمن نتكلم
في موضوع الكلام فيه اتأجل كتير و كتير جوي بس الظاهر انه جه الأوان خلاص
نعمان : جولتلك مفيش بيناتنا كلام و محيكونش فيه يا محمد يا طحاوي و الاسلم ليك و لعيلتك انك تدعي ربنا ان ولادي ميحصلهمش حاجه و يجوموا منيها بالسلامه وجتها بس حتعرف ان ربنا بيحبك لأن لو ولادي حصلهم حاجه حخليك تندم عاليوم اللي فكرت فيه انك تؤذيهم
محمد : جلتلك معملتهاش و مليش يد في اللي حوصل ديه ليه معايزش تصدجني
نعمان : اصدجك كيف يا محمد انت بتجول حاجه متتعجلش انت لو سألت اي عيل صغير حيجول انكم انتوا اللي عملتوها محدش ليه يد فحاجه زي دي غيركم محدش بيننا و بينهم عداوة غيركم انتوا
عايزين مني ايه يا محمد اني و ولادي عايزبن مننا ايه اني و اخوك كنا اصحاب الروح بالروح لولا ولاد الحرام اللي فرجوا بيننا و لما انجتل حلفتلكم عالمصحف اني مجتلتهوش و الحكومه برئتني لكن انتوا مصممين عاللي في دماغكم و مصممين تاخدوا بتاركم من واحد برئ
محمد : و اني عارف يا محمد و متوكد انك محتعملهاش واصل
نعمان : عارف اه عارف و عشان أجده جتلت ولادي
محمد : مجتلتهمش احلفلك بايه اني مجتلتهمش
هنا يتفتح باب اوضة العمليات و يخرج الدكتور و كلهم يجروا عليه طمنا يا دكتور ناصر الله يخليك عيالنا عايشين
الدكتور ناصر و هو ينزع الماسك من على وجهه : هما الحمد لله لساتهم عايشين لكن حالتهم خطرة جوي بين الحيا و الموت
يعلو البكاء و النحيب بين النساء و القلق و التوتر على وجوه الرجال
نعمان : طب الله يخليك يا دكتور فهمني جولي وضعهم بالظبط
الدكتور ناصر : عامر الرصاصه جاتله جنب جلبه بالظبط و ديه رحمه من ربنا احنا خرجنا الرصاصه الحمد لله لكن حالته خطرة و نزف جامد جوي و احنا بنحاول نسيطر على النزيف و ربنا يستر
جمال : و مصعب يا دكتور ناصر
الدكتور : مصعب حالته خطرة جوي جت فيه رصاصتين و ربنا يستر
تخرج الممرضه من جوة وهي بتجري : الحجنا يا دكتور الحجنا جلب واحد فيهم وجف
دخل الدكتور يجري على جوة تاني و هما برة عياطهم و صريخهم بقى بشكل هيستيري
وقتها وصلت نورة و شافت الوضع و مش فاهمه حاجه قلبها كان حيقف و هي مش عارفه ايه اللي حصل جريت على رحمه : طمنيني يا رحمه جوليلي انهم بخير و انهم عايشين
رحمه : اخواتي حيروحوا مننا يا رحمه اخواتي حيسيبونا يا رحمه
نورة ببكاء شديد : لا لا متجوليش اجده ان شاء الله حيخرجوا بالسلامه ان شاء الله حيبجوا كويسين
رحمه : عامر الرصاصه عند جلبه يا نورة و مصعب اتصاب برصاصتين يا نورة لو فلت من واحده مش حينجي من التانيه اه اه يا حبايبي يا اخواتي
و بيجولوا حد فيهم جلبه وجف جلبه وجف يا نورة يعني خلاص ماااات اخويا مااات يا نورة
نورة اول ما سمعت جملة جلبه وجف الدنيا كانت بتلف بيها و اختها نسمه جعدتها على الكرسي : كانت تهمس لها أختها : اهدي يا نورة اهدي الله يخليكي احنا منعرفش حاجه لسه
نوره : خلاص يا نسمه شكله حيروح يا نسمه ما سمعتيش بيجولك مصعب اتصاب برصاصتين و فوج أجده حد فيهم جلبه وجف جلبي بيجوللي انه هو هو يا نسمه
نسمه : ان شاء الله خير ان شاء الله حيجوم منيها ان شاء الله
يخرج الدكتور و يكون نعمان في حاله لا يرثى لها : جول يا دكتور جول مين فيهم اللي مات
الدكتور : مفيش حد مات يا حاج الحمد لله يا حاج جدرنا ننشط الجلب تاني بس دلوك هما عنديهم نزيف جامد جوي و محتاجين منيكم تتبرعوا بدمكم لأن للأسف فصيلتهم نادرة و مش موجوده في المستشفى
طبعا الكل كان عاوز يتبرع بس المشكله مين فصيلته نفس الفصيله و للأسف اللي طلعوا نفس الفصيله من كل اللي واقفين تلاته بس عتاب و جمال و محمد الطحاوي
و طبعا كانوا رافضين ان عتاب تتبرع لكن هي أصرت اصرار شديد و فضلت تعيط عشان يرضوا يخلوها تتبرع لحد ما وافقوا و فعلا دخلت مع الممرضه عشان ياخدوا منها دم لعامر
و جمال بدءوا يسحبوا منه دم عشان مصعب اللي حالته كانت أصعب بكتير من حالة عامر و كان محتاج دم كتير اوي
اما عتاب فبدات تتعب و الدكتور أصر ان حد غيرها يتبرع و مكنش فيه أدامهم غير محمد
نعمان : لاء محمد محيتبرعش بدمه لولدي ابدا و محيجريش دمه في عروج ولدي
الدكتور : حاج نعمان الله يخليك مفيش وجت للكلام ديه دلوك حساباتكم ديه تصفوها بعدين لكن احنا لزمن ننقذ ابنك
ابنك بيموت يا نعمان ابنك بيموت مفيش وجت كل ثانيه بتمر فيها خطر على حياته
يجلس نعمان على الكرسي و يضع راسه على عصاه و يستند براسه على عصاه و يبكي بشده فيجلس محمد بجواره : صدجنى صدجنى يا نعمان اني معملتهاش سيبني اتبرع بالدم لولدك و بعد أجده اعمل اللي انت عايزه
الدكتور : تعالى يا حاج محمد اتفضل جوة مفيش وجت
احدى الممرضات : يا دكتور بس ده راجل كبير حيستحمل ناخد منه دم
الدكتور: حيستحمل ان شاء الله و احنا محناخدش منيه دم كتير متجلجيش هو كبير لكن شديد و جوي ديه صحته احسن مني
تيجي الممرضه تضحك و تتكسف و تاخد الحاج محمد عشان يتبرع بدمه
تجلس عطر بجوار عتاب و هي تمسح على وجهها و تحاول ان تجعلها تشرب عصير و لكن عتاب ترفض : لا اني مجدراش يا عطر لما اطمن عليه الأول و جلبي يطمن عليه
ياخذها نعمان في حضنه فتبكي بشده : ان شاء الله حيخف يا بتي ولاد نعمان محيستسلموش للموت نهائي و حيجوموا منيها ان شاء الله
عتاب : يا رب يا عمي يا رب
نعمان :عاشجاه جوي اجده يا عتاب
ترفع له عيناها متعجبه و مندهشه من كلامه : عمي حضرتك بتجول ايه
نعمان : إيه فاكراني مش حاسس بيكي و لا عارف اللي جواكي يا جلب عمك ديه اني اللي مربيكي من و انتي لساكي في اللفه و حاسس بكل اللي انتي حاسه بيه
عتاب : يعني انت يا عمي عارف إني
نعمان : انتي بتدوري وشك بعيد عني ليه يا بتي كنك مستحيه مني
لا يا حبيبة جلبي ما تستحيش ديه اني مش عمك لا اني ابوكي اللي رباكي و شالك على كفوفه و ياما شلتك على كتفي ديه و خابر بكل اللي جواتك ناحيته
و كل منايا في الدنيا اسعدك انتي و اختك عطر و يطمن جلبي من ناحيتكم
يجوم هو بس بالسلامه و اوعدك انه محيكونيش لحد غيرك
عتاب : مش مهم يا عمي يكون لية او حتى يكون لغيري المهم عندي انه يجوم بالسلامه و بس
نعمان :و يهون عليكي تفرطي فيه بسهوله اجده طب حتجدري تعيشي من غيره
انتي عارفه يا عتاب انتي بتفكريني بابوكي الله يرحمه كان زيك اجده العشج كان مالي جلبه
خليكي جويه يا عتاب و اتمسكي بحبك و متفرطيش فيه
عتاب : عمي أني
نعمان : انتي إيه يا نور عين عمك انتي بتي حبيبتي اللي ربتها و كبرتها و ان شاء الله حتكوني مرت ابني
عتاب : و اني بحبك جوي جوي يا عمي
نعمان : و اني بحبكم جوي يا ولاد الغالي يا رب اشفيهم و خرجهم بالسلامه يارب يا رب متوجعش جلبي على حد منيهم يا رب
بعد ما اتبرعوا لهم بالدم يخرجوا من جوة و الدكتور يطمنهم و يقوللهم انهم حينتقلوا للعنايه المركزة
نعمان : متشكر جوي يا جمال طول عمرك راجل
جمال : انت بتشكرني على ايه يا نعمان ديه احنا أهل المهم دلوك نطمن عليهم
يقضون وقتا طويلا يمر عليهم كالدهر ينتظرون كلمة تطمئن قلوبهم و ان الخطر قد زال عنهم
يوما كاملا و لم يتحرك أحد من مكانه الجميع رافضين ان يتحركوا قبل الاطمئنان عليهم و ان الخطر قد زال
و لكن نعمان أصر على محمد انه يمشي خصوصا بعد ما تعب و داخ فرجع البيت و دخل فلقى صفيه و عائشه قاعدين
صفيه : هي الناس تدخل أجده و اللا تجول السلام عليكم
محمد : بجولك ايه اني معايزش اسمع صوتك نهائي و حسابك لسه مجاش
صفيه : حساب ايه اللي انت عايز تحاسبهولي ديه اني اللي لازمن احاسبك مش انت اللي تحاسبني
عائشه : خبرك ايه يا صفيه ما تعدلي كلامك و اتادبي و انتي بتتكلمي مع ابن عمك
صفيه : ابن عمي مين يا عيشه اللي اتادب معاه اني حسه اني معرفوش و لا داريه هو مين اني بجيت شاكه ان هو و جوزي مكنوش اخوات من أساسه
اصل اللي بيجري في عروجه ديه مش دم لا دي مية و مية معكرة
اني عايزة افهم انت ليه زعلان جوي أجده و كأن اللي انصابوا دول ولادك انت مش ولاد عدونا
عدونا اللي جتل اخوك اخوك فاكره يا محمد و اللا الدنيا لهتك عنه خلاص
يعني مكفكش انك معرفتش تاخد بتاره و لا جه على بالك اصلا تنتجمله تجوم كمان تزعل لما ولدك ياخده بدل منيك ديه بدل ما تفرح انه رفع راسنا وسط الخلايج
لا اني حاسه ان في حاجه في الموضوع ديه و الله اني لولا اني متأكده انك كنت بتحب اخوك كنت جلت ان ليك يد في جتله و انك بتتستر على اللي جتل
محمد : عارفه يا صفيه اني دلوك اللي مستعد اجتلك و لا يبجى ليكي عندي ديه
انتي مخك ديه ايه انتي عايزة ايه عايزة النار تولع في الكل و خلاص
صفيه : تولع و اللا حتى تجيد نار محيهمنيش اني اللي يهمني اني اخدت تار جوزي و بس و دلوك اني منتظره خبر موتهم اللي لسه مسمعتهوش
محمد : و محتسمعيهوش ان شاء الله يا صفيه و ربنا حيرد كيدك و حيجوموا بالسلامه
صفيه : ايه الكلام الفارغ ديه لا هما لازمن يموتوا لكن يعيشوا لاء لاء و الله لو ما حد فيهم مات لاروحلهم بنفسي و اخلص عليهم بيدي
محمد : يا للا روحي اني عايزك تروحي يا صفيه و البوليس يجبض عليكي و نرتاح منك يا للا غوري مستنيه ايه
يشعر بالدوار الشديد فيصعد لغرفته بينما هي تأكلها النيران بعدما علمت بانهم مازالوا على قيد الحياه : لا لا مستحيل يكونوا لساتهم عايشين اكيد حد فيهم على الاجل مات و هو اكيد بيجوللي اجده عشان يفرسني و بس
انتي يا زينه فين زكريا راح فين
زينه : معرفش يا اما اهو خد في وشه و خرج و بجولك ايه كفاكي لحد اجده سيبيلي الراجل فحاله
هو عملك اللي طلبتيه منيه و زياده كمان بعدي عنيه و كفاكي اجده
صفيه : انتي اتجننتي و اللا ايه يا زينه
زينه : اني خايفه عليه يا اما خايفه على جوزي اني معنديش غيره و هو عملك اللي انتي عايزاه منيه في ايه تاني
صفيه : عمك بيجول ان العيال دول لساتهم عايشين و اني لازمن اتاكد
زينه : يا خبر بفلوس بكرة يبجى ببلاش
صفيه : و اني لسه حستنى لبكرة هاتيلي جوزك اني عايزاه دلوك
😭😭😭😭😭😭😭
في المستشفى
يخرج إليهم الدكتور ليطمئنهم
الدكتور : تجدروا تدخلوا تطمنوا عليهم بس واحد واحد و محدش حيجعد اكتر من دجيجه واحده
نعمان : يعني هما فاجوا يا دكتور
الدكتور : تجريبا يا حاج نعمان بس اطمنوا حيحسوا بوجودكم
يبدءوا يدخلوا و اول واحده دخلت طبعا زينب و بعديها نعمان و بعدهم رحمه و حفصه و حسني كمان دخللهم ما هما متربيين سوا
نورة : نسمه الله يخليكي اني عايزة اشوف مصعب
نسمه : نورة اني طاوعتك و جينا و بجول يا رب استرها معانا و تعدي على خير و محدش يوعى لحالتك دي و يفهم اللي فيها و ادينا اهوه اطمنا عليه انه الحمد لله لساته عايش و حيجوم بالف سلامه يبجى يا للا بينا يا خيتي معاوزينش فضايح اكتر من اجده
نورة : لا محجدرش امشي من اهنيه جبل ما اشوفه بعيني
نسمه : يا رب اعمل ايه بس يا ربي و حنجولهم ايه عاد حنجولهم نورة عايزة تتطلع على سيدها ما هما اهله دخلوا و جالوا الحمد لله
نورة : لا مشفتيش كيف لما الحاجه زينب دخلت و خرجت عيطت كيف لا احب على يدك يا خيتي اشوفه دجيجه واحده بس
تنادي عليها حفصه نورة تعالي يا نورة تعالي يا نسمه تعالوا يا حبايبي اطمنوا عليهم دول اخواتكم و متربيين معاكم تعالوا ادخلوا شوفوهم
تتجه نسمه ناحية عامر و تراه و هو ووجهه شاحب مثل الموتى و المحاليل و اكياس الدماء معلقه بيده
اما نورة فتتجه نحو مصعب و عيناها لا تكف عن البكاء و تجلس على الأرض و تقبل يده كان لا يشعر بوجودها تماما بل كان غائبا عن الوعي الأسلاك موضوعه على كل انحاء جسمه و يداه بهما المحاليل و اكياس الدماء و على أنفه جهاز الاكسجين ليساعده على التنفس كان عاري الصدر و جسده ملفوف بالشاش ظلت تقبل يده و تدعو له الله ان ينجيه
حمد الله عالسلامه يا غالي ربنا ما يوجع جلبي عليك يا رب ربنا ما يوجع جلبي عليك يا حبيبي يا سيد الناس كلها
يا ريت كنت اني و انت لاء يا حبيبي جلبي
تأتي الممرضه من خلفها يا للا يا حبيبتي
تخرج نورا و نسمه و تحاول نسمه ان تداري على اختها كي لا ينكشف امرها امامهم
و الآن يأتي الدور على عطر و عتاب
و يدخلان اليهما
تتجه عطر ناحية مصعب و تدعو له الله ان يشفيه و عينيها على اختها التي جلست أرضا و ظلت تحدثه و هو لا يعي لوجودها
عامر انت كويس و ان شاء الله حتخرج بالف سلامه : يا ريتني كنت اني مكانك يا حبيب عمري يا ريتني كنت اني اللي اخدت الرصاصه فجلبي مش انت اني عمري كله فداك يا حبيبي
حتخف يا عامر حتخف و حتبجى زين ان شاء الله انت جوي و حتجوم منيها ان شاء الله يا جلبي
عارف يا عامر اني مبسوطه جوي عارف ليه لأن دمي بجي بيجري في عروجك
اني بحبك جوي يا عامر بحبك جوي
عاد عامر للواقع قليلا و أخذ يهمهم ببعض الكلمات بصوت منخفض فتفرح عتاب فرحا شديدا
عامر انت فوجت عامر اني اهنيه انت حاسس بية و بوجودي يا عامر
و لكنها تنتبه لما يتفوه به : عطر
عطر
عتاب : حمد الله على سلامتك يا عامر اني عتاب اهنيه جارك يا عامر
و لكن عامر ظل ينادي باسم عطر فقط
نعم انه ينادي على اختها عطر
تفرح عتاب بأنه قد فاق و استرد وعيه : عطر عامر فاج يا عطر و بينادي عليكي
تلتفت عطر ناحيته : عامر حمد الله على السلامة يا ابن عمي الف حمد وشكر ليك يا رب
كانت عتاب تجلس من ناحيه و عطر في الناحيه المقابله لها
بينما كان عامر مغمض العينين فلم يسمعا منه غير : عطر عطر
عطر : احنا اهنيه يا عامر احنا جارك يا اخويا اني و عتاب
عامر : عطر أني أني…………………
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية يكفيني منك عقابا)
