رواية يكفيني منك عقابا الفصل الثاني 2 بقلم عبير سليم
رواية يكفيني منك عقابا الجزء الثاني
رواية يكفيني منك عقابا البارت الثاني
رواية يكفيني منك عقابا الحلقة الثانية
تجرها من يدها إلى داخل المطبخ و أخذت تضرب على رأسها بيديها : يا مرارك يا نسمه يا مرارك
أعمل فيكي جوليلي أعمل فيكي إيه انتي ايه اللي بتعمليه ديه
نورة : اني و الله ما عملتش حاجه و ربنا ما عملت حاجه
نسمه : اخرسي مش عايزة اسمع حسك و كمان بتحلفي كدب امال لو مكنتش شفتكم بعينيه ايه عايزاني اكدب عينيه و اصدجك
نورة : ايوة و الله هي الخلجات وجعت مني و هو كان بيلمها معاي
نسمه : جبر يلمك يا شيخه
نورة : و اهون عليكي يا خيتي حتفرحي لما الجبر يلمني
نسمه : لا محفرحش طبعا و حعيش بنارك ديه لو جدرت اعيش من غيرك اصلا لكن حنعمل ايه جوليلي لو حد اطلع عليكم غيري دلوك حنعمل ايه عارفه لو الحاج و اللا الحاجه شافوكم و ربنا ما حنبات فيها الليلادي
نورة : طب خلاص متزعليش مني بجى و اني و الله
نسمه : متحلفيش مش عايزة اسمع حسك انتي مش حتحرمي غير لما نطرد من اهنيه و فضيحتنا تبجى بجلاجل ووجتها هو نفسيه ما حيبصش في وشك ولايعبرك
يدخل عليهم المطبخ بعد ما سمع حديثهم مع بعض
نسمه مش اجده اني و نورة مبنعملش حاجه غلط
نسمه : و هو فيه ايه غلط اكتر من اللي شفته بعنيه ديه يامصعب بيه يا بن الاكابر
سي مصعب الله يخليك أحب على يدك و رجليك بعد عن نورة و سيبها في حالها و في لجمة عيشها
مصعب : حالها هو حالي يا نسمه و اني بحبها و مش حسيبها واصل
نسمه : و النبي الله يخليك بلاش كلام الأفلام ديه عاد احنا معيزينش فضايح
ياتيهم صوت من الخارج ينادي عليهم : نسمه
ثم تدخل عليهم المطبخ : خير يا مصعب واجف عندك اهنيه بتعمل ايه
مصعب : ايه لا يا عمتي مفيش حاجه ديه اني كنت بشرب
حفصه : طيب اطلع لابوك اوضته عشان عايزك و انتم يا بنات يا للا اتجدعنوا خلينا نخلص اللي ورانا
نورة : حاضر يا حاجه
تخرج حفصه من المطبخ و نورة توجه كلامها لنسمه : سمعتي جال ايه عشان تعرفي اني لا كنت بحلم و لا بيتهيجلي لما جلتلك انه بيحبني
نسمه : يا مثبت العجل يا رب يا غبيه افهمي هو حتى لو بيحبك زي ما بيجول هو ديه يعني اللي حيخليه ميسيبكيش من ميته و كل اللي بيحب واحده بيتجوزها العين مبتعلاش عالحاجب يا خيتي
نورة وربنا المعبود لو ما محطيطي عجلك في راسك و شفتي لجمة عيشك لحكون واخداكي و ماشيين من اهنيه
نورة : تاخديني و نمشي من اهنيه كيف و انتي بنفسك جلتي اننا ملناش مكان تاني يتاوينا غير اهنيه و اننا حنتبهدل لو خرجنا من اهنيه
نسمه : البهدله اللي حنتبهدلها لو خرجنا من اهنيه بكرامتنا حتكون اهون بكتير من البهدله اللي حنتبهدلها من اهنيه لو حد شم خبر باللي بيناتكم وجتها حيطفشونا من اهنيه بفضيحه
نورة : فضيحه للدرجه دي
نسمه : للدرجه دي و اكتر كمان امال انتي مفكرة إيه اصلهم حيسموا علينا لما يلاجوا ابنهم زينة الشباب و اللي كبرات البلد تتمناه بيحب الخدامه ديه مش بعيد يطفشونا بالخلجات اللي علينا
نورة : لا هما بيحبونا ميعملوش فينا أجده منهونش عليهم
نسمه : ما ني جلتلك الحب حاجه و الجواز حاجه تانيه خالص انتي معايزاش تفهمي ليه
دول مش بس حنهون عليهم دول حيرمونا و محنسواش عنديهم نكله
نورة ديه اخر مرة أحذرك فيها تبعدي عن اللي انتي فيه ديه و إلا
نورة : طيب خلاص خلاص و الله اني محعملش حاجه بس منمشيش من اهنيه
نسمه و هي بتزقها من ضهرها : طب جدامي انجري خلينا نشوف اللي ورانا
استرها علينا يا رب يا رب احنا غلابه و ملناش غيرك كملها معانا بالستر يا رب
❤️❤️❤️❤️❤️❤️
دعونا نترك هذا المنزل قليلا لعلنا نتعرف سويا على بقية أبطالنا فنتجول بتلك القريه الجميله فما أجمل بلادنا المصريه. بها من عبق التاريخ ما يجعلها مميزة دائما عما سواها من البلاد و ها نحن قد اخذتنا اقدامنا إلى أحد المنازل الفخمه بنفس القريه و التي يعيش بها عائله من أكبر عائلات الصعيد
و لكن ما هذا السور العالي المنيع الذي يحيط ذاك المنزل مما يجعل اقتحامه صعبا و لكن لن يمنعنا عن معرفة ما بداخله شئ
ما هذا انني اسمع صوت بكاء عالي فمن الذي يبكي و يا ترى ما سبب ذاك البكاء
ارى فضولي يدفعني ان أحاول جاهدة تخطي ذاك السور لمعرفة ما يدور وراءه
كفاياكي بكى يا اما بجالك سنين بتبكي مشبعتيش بكى
_ لاء مشبعتش بكى يا بتي و مش حشبع واصل و لا دمعتي حتنشف غير لما اجتله او أحرج جلبه على حد من ضناه زي ما حرج جلبي على ابوكي يمكن وجتها ناري تبرد و عيني تنشف فيها الدموع
_بس الحكومه حججت و جالت ان مش هو اللي جتل ابوي الله يرحمه
_يا سلام و انتي عايزاني اصدج مش أجده مفيش حد كان بيكره ابوكي جده و لا حد جتله غيره و اني ما حرتاحش غير لما انتجمله و اخد بتاره عايزة جوزي يرتاح في جبره يا ناس
انا حاسه بيه يا زينه حاسه بيه أبوكي تعبان و مش مرتاح في نومته واصل
بيجيلي في المنام دايما و شكله تعبان و مهموم
صورته و هو داخل علية البيت مش مفارجاني وحشتني هلته و طلته علية
اني تعبانه تعبانه جوي يا زينه ومحدش حاسس بية و لا بالنار اللي بتنهش في جلبي و صدري
زينه: طب اهدي يا اما اهدي الله يخليكي مين جالك بس ان محدش حاسس بيكي ديه ابويا و ناره حارجه جلبي زي ما حارجه جلبك و اكتر كمان
و بعدين ما نتي حاولتي جتله جبل اجده و بعتي اللي يجتله جبل سابج و الضربه جت في واحد من اللي شغالين عنديه بدل ما تاجي فيه هو
_ بس المرة دي حتاجي فيه و الضربه حتكون في صدره هو و محدش حياخدلي بتاري منيه المرة دي غير جوزك
زينه : جوزي يا اما
_ايوة جوزك مالم مستغربه ليه مش اللي انجتل ديه يبجى عمه و كان حماه و اللا ايه هو اولى واحد يريح عمه في نومته
زينه : و اني متأكده ان زكريا محيمانعش في حاجه زي دي بس اني خايفه ان عمي هو اللي ميرضاش
_كيف عمك ميرضاش هو اللي انجتل ديه مكنش اخوه الصغير اللي كانت روحه فيه مجالش بعضمة لسانه انه محيرتاحش غير لما ياخد بتار اخوه و بعد ما سلطت عليه اللي يجتله و نجا منيها وعدني و لساته لحد دلوك مماطل فية و كل شويه يهديني بكلمتين و يجوللي اطمني محسيبش تار اخويا و جال ايه مستني الوجت المناسب لكن اني خلاص تعبت و جبت اخري و لزمن اخد تار ابوكي شكل عمك كنه نسى إياك أخوه و الدنيا لهته
بس اني اللي حجفله المرة دي و ربنا لولعها نار لو ما اخد هو و ولاده بتار ابوكي اللي هو عمهم لحكون كاشفه راسي و اجول ان رجالة العيله خلصوا و اخد سلاحي في يدي و اروح اجتل نعمان في بيته و وسط ولاده اللي بيتباهى بيهم في البلد
و اللا اخلص على واحد منيهم يمكن النار اللي جواي تبرد
زينه: لو على زكريا مجدور عليه يا اما لكن يحي تربية البندر ديه حيعرف ياخد تار حد ديه ملوش غير في الصرمحه و الجري وراه بنتتة مصر دي البلد مبينزلهاش غير كل فين و فين و الله اعلم بيعمل ايه دلوك و اللا بيعمل ايه مع بنتتة مصر
🌿🌿🌿🌿🌿🌿🌿
🌿انا هنا اهوه اتفضلي قولي عاوزة ايه و خلصيني
_انت هنا يا استاذ ماشي بس اقول ايه هو انا اللي حقول و اللا انت اللي قلت انت عاوز تسيبني عاوز تتخللى عني بعد كل اللي حصل بيننا
_ و الله انا مضربتكيش على ايدك كل اللي حصل بيننا كان بمزاجك
_كان بمزاجي عشان حبيتك و وثقت فيك
_ بس انا عمري ما حثق فيكي ابدا
_ و متثقش فية ليه
_ عشان اللي تعمل كده مع واحد ممكن تعمل كده مع اي حد تاني
_ انت مجنون انت بتقول ايه انت فاكرني ايه
_ انا مش فاكرك حاجه لأنك اصلا و لا حاجه
_ لاء ربنا يخليك متقولش كده انا عملت كده عشان انا حبيتك انت
لكن انا عمري ما حكون لحد غيرك عمر ما في غيرك ممكن يدخل حياتي
_الكلام ده ممكن تضحكي بيه على حد غيري لكن انا لاء
_ انا حامل عارف يعني ايه حامل
_حامل بجد طب كويس الف مبروك
_انت مش حتسيبني صح قول انك بتحبني و مش حتسيبني
_لاء حسيبك
_ حتسيبني يعني حتسيبهم يقتلوني لو اهلي عرفوا اني عملت حاجه غلط حيقتلوني
_و لما انتي عارفه انها غلط بتعمليها ليه
_عشان حبيتك و انت كمان بتحبني انا عارفه اني مش حهون عليك
_ لا حتهوني علية زي ما هان عليكي اهلك و خنتيهم معايا و زي ما خنتيهم بكره تخونيني
_ لاءمتقلش كده انا عمري ما حخونك انا اللي عملته معاك ده عشان انا حبيبتك
_ و انا محبتكيش افهمي بقى متبقيش غبيه انتي كنتي مجرد واحده زيك زي غيرك قضيتلك يومين و خلصوا خلاص بح
و بقولك ايه يا للا بقى وريني عرض قفاكي و اللا انا اللي حتصرف معاكي بشكل تاني يا للا بره و اياكي رجلك تعتب هنا تاني
_ انت بتطردني لكن لاء مش انا اللي ينضحك عليها و ديني لو مجتش طلبتني من اهلى و صلحت غلطتك معايا و اعترفت باللي فبطني لكون قاتلاك و اللي يحصل يحصل
_ بتعملي ايه يا مجنونه سيبي السكينه دي من ايدك
_ حقتلك و اضيعك زي ما ضيعتني
_اه لاءءءه
كات برافو
يعلو التصفيق في المكان
و يسلمان على بعضهما
برافو عليك يا يحي انت فعلا ممثل موهوب
يحي : و انتي كمان يا نيللي موهوبه بجد تصدقي اني صدقتك في كل كلمه قلتيها كأنها بجد مش تمثيل
المخرج : برافو عليكم يا شباب بجد انا فخور بيكم جدا
يحي : بجد عجبت حضرتك
المخرج : طبعا يا يحي دي حاجه مفيهاش كلام انت عندك موهبه و اتنبالك بمستقبل هايل
نيللي : طب و انا يا استاذ عز رأي حضرتك فية ايه بصراحه
عز : طبعا ممتازة يا نيللي و انتي و يحي الكاريزما بينكم عاليه اوي و لو اشتركتم في عمل واحد حتكسروا الدنيا
يحي : يا رب يا استاذ عز
ياخد يحي نيللي و يبعدوا شويه عن مكان التصوير عشان يتكلموا
نيللي : تفتكر حنقدر ناخد فرصتنا يا يحي
يحي : أكيد طبعا يا نيللي طول ما الاستاذ عزالدين معانا اطمني بس مش هي دي المشكله
نيللي : امال إيه المشكله يا يحي
يحي : المشكله في اهلي يا نيللي و تحديدا بابا استحاله حيوافق اني اشتغل ممثل ده ممكن يقتلني
نيللي : يقتلك انت أكيد بتهزر يحي انت راجل عارف يعني ايه يعني تعمل اللي انت عاوزه
يحي : مش عندنا يا نيللي و تحديدا في بلدنا و عيلتنا متنسيش اني صعيدي و كلمة الكبير عندنا بتبقى نافذه
نيللي : و الله لا باين على شكلك و لا طريقة كلامك انك صعيدي بزمتك ده شكل واحد صعيدي ده انت واقع من مسلسل تركي يا بني
يحي : هههههه ليكي حق تقولي كده اصلك مشفتنيش و لا سمعتيني و انا بتكلم صعيدي
نيللي : طب حاول تتكلم معاه بهدوء يمكن يقدر يفهمك و يوافق
يحي : ححاول يا نيللي
نيللي : طب و لو افترضنا لاصعب الظروف انه موافقش حتعمل ايه
حسيب البيت و امشي
محمد و هو بيضرب بعصاه على الأرض بقوة : كنك اتجنيت يا يحي بجي انت عايز تسيب البيت و تخرج عن طوعي عشان معاوزاكش تشتغل مشخصاتي
هو انت كل مرة تروح مصر و تغيب غيبتك و بعد أجده تجيلي بجرفك
يحي : يا ابوي افهمني اني طول عمري نفسي اشتغل ممثل و كلكم عارفين ان دي هوايتي من وجت ما كنت صغير
محمد بعصبيه شديده : اديك جلت اهوه كنت صغير يعني لعب عيال لكن دلوك انت كبرت و بجيت راجل يعني بدل ما تشوف مصالحنا و أرضنا اللي في ايد الشغيله عايز تشتغللي ممثل كيف ما بتجول طب كنت بتتعلم ليه و كنت بصرف عليك الالوفات دي كلها في تعليمك ليه مش عشان تتحمل معايا المسئوليه عايز تسيب حالنا و مالنا و تروح تشتغلي ممثل يا اما تسيبنا و تمشي كيف ما بتجول
يحي : يا بوي الله يخليك افهمني
محمد : معوزش افهم حاجه و جوم غور من جدامي
بلا كلام فارغ ادي مصر و اللي جالنا من وراها
تيجي تجري على حسهم : في ايه عاد حسكم عالي جوي
محمد و هو بيشاور بايده يمين و شمال : تعالي شوفي خلفتك السوده
عائشه و هي قاعده و بتطبطب على كتف يحي : خلفتي السوده ليه اسم الله عليه حارسه و صاينه ما هو راجل جد الدنيا اهوه
محمد : وهو الراجل ديه مش المفروض بردك يشوف مصالح اهله و مالهم
تأتي إليهم بجفونها المقرحه و اعينها المحمرة من شدة البكاء فهي منذ الحديث مع ابنتها زينه منذ يومين و هي لا تكف عن البكاء و ها هي الفرصه قد اتتها بمجئ يحي للصعيد للتحدث مع ابيه في أمره : لاء و انت الصادج يا واد عمي يا جوز اختي و راجلنا الراجل الصح هو اللي ميجيلوش نوم و عدوه رايح جاي عادي أجده هو اللي ميجدرش يمشي بين الناس و لا يجدر يرفع راسه بين الخلايج و هو عليه تار و ماخدهوش
محمد : لا حول ولا جوة الا بالله هو انتي متشبعيش من الحديت ديه نهائي انتي عايزة ايه يا صفيه
صفيه : عايزة جوزي اللي هو اخوك يرتاح في نومته
محمد : و هو اني موعدتكيش
صفيه : كلام مباخدش منيك غير كلام و بس لكن فعل مفيش
محمد : جلتلك لسه مجاش الاوان
صفيه : و ميته حياجي الاوان ديه بعد كام سنه انت محتعملش حاجه يا خسارة الدم اللي بيناتكم
و انت يا يحي هو اللي انجتل ديه مكنش عمك بردك ميجيش في بالك انك تاخد بتاره
يحي : اني يا خالتي صفيه
صفيه : أيوة انت ايه مش راجل إياك
عائشه : عيب أجده يا صفيه ولدي راجل و سيدي الرجاله لكن بعديه عن مشوار التار ديه
صفيه : بجي اجده يا عيشه مكنش العشم يا خيتي طبعا ما هو اللي راح مكنش راجلك ديه حيله جوز اختك و ابن عمك
ما ني لو كان ربنا كرمني و جبت ولد مكنش حد خد تار ابوه غيره لكن حعمل ايه اني ربنا مرزجنيش غير بزينه
لكن لاء اذا كان هو معندوش رجاله و رجالة العيله نسيوه فإني محنساش تار جوزي ابدا و اني اللي حاخد تاره بيدي
محمد : طب حلو جوي الكلام ديه و بالمرة احلجي راسك و اكشفيها ما خلاص العيله مبجاش فيها رجاله و اللا اجولك ابجي اعمليها زي ما عملتيها جبل سابج و راح فيها واحد غلبان ملوش ذمب فحاجه عشان اجيب خبرك يا صفيه ان شاء الله
اصل خلاص محدش بجي مالي عينك
اسمعي يا صفيه اللي مات ديه كان اخوي جبل ما يكون جوزك و ناره جايده فجلبي لكن اني اللي حجول ميته النار دي حتهدى
و معايزش اسمع كلام في الموضوع ديه واصل و الا وربنا المعبود ليكون لية معاكي تصرف تاني
صفيه : و اني كلامك ديه محيخوفنيش و محيلدش علية و مفيش جوة حتمنعني من اني اخد تار جوزي من نعمان و ولاده
محمد : استغفر الله العظيم واتوب اليه يا رب زينه عجلي امك
زينه : ريحها انت يا عمي الله يخليك و برد نارها و نارنا
محمد : حاضر اني حريحكم و ابرد ناركم حاضر يا للا غوروا كلكم من جدامي و هملوني لحالي
و انت يا يحي جوم غور انت كمان من جدامي مطايجش اشوف حد واصل دلوك
عائشه : تعالي يا صفيه يا اختي تعالي ربنا يهديكي
يضع محمد راسه على عصاه : يا رب دبرها من عنديك يا صاحب التدبير
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية يكفيني منك عقابا)
