رواية مدير الشركة الفصل الثاني 2 بقلم اسماعيل موسى

رواية مدير الشركة الجزء الثاني

رواية مدير الشركة البارت الثاني

رواية مدير الشركة الحلقة الثانية

قعدت على كرسى مدير الشركه المريح ،مكتبى إلى هقضى فيه بقية حياتى ،وصل مدير الشركه وراه شله من الموظفين المنافقين إلى ماسك ملف والى بيسمع ملاحظه وبيهز رأسه، الموظفين نفسهم إلى هينافقونى لما ابقا المدير، النوع المحبب بالنسبه ليه ،تأملت المدير لأخر مره مكنش عندى نيه اغير رأى لكنى تعلمت خلال مشوار حياتى التعيس انى املى عينى من كل لحظه تمر بيا لأنها استحاله تتكرر ،كافحت دمعة كانت هتنزل ،ان تقضى على حياة انسان مش امر سهل، انا كمان عندى قلب والمدير عطس وانا اخدت جسمه.
اطلعو بره، طردت الموظفين المندهشين بره المكتب، كنت محتاج وقت اتأقلم مع جسدى الجديد، شعرى الناعم ووجهى الوسيم وبدلتى الأنيقه ،تليفونى الحديث والسجاير الفاخره
“#،انا مدير الشركه
ضغطت الجرس وطلبت قهوه ،بعد شويه وصل النادل بيجرى
خبط على الباب
ادخل يا بنى وسيب القهوه على الترابيزه ،كنت مديه ضهرى
وبعدها تذكرت انى لازم اكون أكثر حذر ومستخدمش قوايا الغريبه ،لازم اقول مين وبعد ما اعرف اسم الشخص اسمح ليه بالدخول، لكن النادل نفذ الأمر كأنه متعود على تكبر ونرجسية المدير، كأنه محصلش تغير، ثم بكل ضعف همس النادل ،تؤمر بأى حاجه تانيه يا باشا؟
هعوذ ايه منك يعنى ؟ مقدرتش اكتم غضبى تسارعت كلمات السخريه المحبوسه جوايا من خمسين سنه
هقلك اقعد اتنيل شاركنى فنجان القهوه ونقعد ناخد وندى مع بعض ؟ اطلع بره يا حامد ومش عايز اشوف وشك غير لما اطلبك
استنى صرخت على النادل قبل ما يخرج من المكتب
ابعتلى على المكتب أجمل موظفه فى الشركه
اديت النادل المحتار ضهرى وواصلت تدخين سيجارتى الفاخره.
اختفى النادل وبعد ربع ساعه خبط على الباب
فيه ايه يا ابنى؟
الاستاذه شروق وصلت ذى ما حضرتك طلبت، حامد انت من كام سنه بتشتغل هنا ؟
من أربع سنين يا ماهر بيه
وخلال الأربع سنين دول متعملتش حاجه اسمها سلم وظيفى ؟
تسمر الحارس وعلى وشه علامات الغباء
انا مش عايز اكون قاسى معاك يا حامد، لكن انت عارف ان فيه سكرتاريه وكل موظف هيدخل المكتب بيمر على السكرتاريه بعدها السكرتيره بتدخل تبلغنى وانا ارفض او اقبل صح ولا؟
صح يا ماهر باشا صح
اصل انا لو سبتها سداح مداح كل موظف بلا قيمه زيك هيخبط على المكتب ويدخل وانا ورايا شغل مهم جدا
االشغل إلى بيجيب لحضرتك المرتب
حاضر يا باشا هرجع على السكرتاريه ويدو حضرتك خبر الأول
مش وقته يا حامد، احنا كده هنضيع وقتنا فى امور تافهه ،دخل الاستاذه شروق
دخلت الاستاذه شروق، طلبت منها تقعد ،وبنظره واحده أدركت انها لا جميله ولا حاجه اللهم على مقياس النادل حامد إلى اكيد اختار من كل موظفات الشركه الست إلى بيحلم بيها تكون ملكه او لأنى شفت نساء جن جميلات كتير اكتر من البشر لحد عقلى ما اتبرمج تلقائيآ على كده
شكرا يا استاذه شروق تقدرى ترجعى مكتبك وانا هأمر قسم الحسابات يدوكى شهر مكفأه
الساعه تلاته العصر السكرتاريه بلغتنى ان السواق منتظرنى عشان يوصلنى الفيلا ودا أمر كان غير متوقع انا فعلآ لازم اعتاد حياة البشر التافهه
ركبت العربيه فى المقعد الخلفى والسواق اتحرك بالعربيه
بعد خمس دقايق من تحركنا سألنى على فين يا باشا؟
سؤال غريب من إنسان حقير، حتى السواقين هيتدخلو فى شؤنى ،روح يا ابنى ذى ما بتروح كل يوم
السواق ابتسم وقال حاضر يا باشا ،بعد نص ساعه كمان من السواقة توقفت العربيه والسواق نزل فتح الباب، اتفضل يا باشا..
نزلت من العربيه، هى دى الفيلا يا ابنى ؟
السواق بصلى بارتباك إلى هو اتكلم ولا لا؟
قلتله اخلص انطق
دى شقة المزاج يا باشا …
اها للحظه نسيت انى عفريت وتخليت عن قواى يجى السواق ياخدنى على شقه قذره مشبوهه
وانا المفروض اعمل ايه هنا يا… هو انت اسمك ايه؟
أسمى سرور يا باشا كاتم اسرارك انا شغال معاك من سنين طويله وعمرى ما فتحت بقى
كاتم أسرارى ؟ كلامه اجبرنى اضحك ،اول مره اشوف لعفريت كاتم أسرار