روايات

رواية غموض الحب الفصل الحادي والأربعون 41 بقلم لولا

رواية غموض الحب الفصل الحادي والأربعون 41 بقلم لولا

رواية غموض الحب البارت الحادي والأربعون

رواية غموض الحب الجزء الحادي والأربعون

غموض الحب
غموض الحب

رواية غموض الحب الحلقة الحادية والأربعون

في مكان تاني كان حسام ماشي بعربيته ووقف مستغرب عند مكان وشاف امنيه نازله من التاكسي ودخلت عماره فنزل وبص للعماره لقى مكتوب عياده الدكتوره منال سعيد النفسيه فهمس لنفسه بستغراب : امنيه بتتعالج نفسيا من ايه وازاي بتخبي عليا ومسك فونه واتصل بيها
عند امنيه في العياده قاعده مستنيه دورها وفونها رن فمسكته لقيت انه حسام فقامت وقفت بعيد شويه وردت
حسام ايه يا امنيه
امنيه ايه يحبيبي معاك
حسام بتنهيده فينك
امنيه بتوتر انا لسه في الاتيليه
حسام بتنهيده اه ده انهي اتيليه بقى ??
امنيه خدت نفسها بتوتر وتابعت هيكون انهي يعني يا حسام مالك في ايه
حسام امنيه انا كلمت الاتيليه وانتي مش هناك وسهر قالتلي انك مجيتيش انهارده
امنيه بتوتر لا طبعا روحت بس لسه ماشيه من شويه يعني
حسام لا والله اومال ليه قولتي لسه في الاتيليه ??
امنيه بتوتر ده علشان انا قُرب منه يعني فاقصد كده لسه مروحتش
حسام والله ??
امنيه بتوتر اه صدقني يا حسام
حسام بتنهيده طب تمام خليني معاكي للاخر بما انك قُرب منه بقى انا اصلا هناك اقفي وقوليلي فينك وهاجي اوصلك
امنيه بتوتر لالالا انا اصلا بركب تاكسي خلاص
حسام تماام .. تمام يا امنيه اقفلي
امنيه بتوتر باي وهروح اكلمك
وقفلت وتنهدت بارتياح
السكرتيره طلعت من الاوضه بتاعت العياده وتابعت : امنيه محمد
امنيه ايوه انا جايه حاضر
وبلفعل دخلت للدكتوره
منال بابتسامه اخبارك ايه طمنيني عنك
امنيه نامت على الشازلونج وتنهدت وتابعت حاسه اني مش كويسه بس بضحك على نفسي وعارفه اعيش عادي
منال طب ايه احكيلي حصل حاجه جديده ??
امنيه بصتلها بحزن وتابعت لا محصلش بس طول الوقت حاسه نفسي وحشه اوي يا دكتوره انا حقيقي تايهه ومش عارفه انا عايزه ايه
منال ايه احساسك وفرحك خلاص قرب على حسام ??
امنيه بتنهيده مش عارفه هو مزيج من الخوف والقلق والفرح مش عارفه احدد هقدر على الخطوه دي واكون قد مسئوليتها ولالا
منال طب ليه مفكرتيش تطلبي منه وقت اكتر من كده
امنيه بحزن طلبت بس هو بردو غصب عنه ربنا يقويه شغله صعب اوي ومش هيبقى فاضي بعدين
منال بتاخدي الادويه بانتظام ?
امنيه اه باخدها والله بس لسه حاسه نفسي في نفس الدوامه
منال الكوابيس دي مقلتش خالص
امنيه بتنهيده لا خالص بتزيد ومن اسبوعين بردو شوفت كابوس بشع اوي وصاحيه قلبي واجعني جدا
منال بصي يا امنيه انتي خلاص اهو هتتجوزي وهتبدائي حياه جديده انا رايي استني مش هنحكم على حالتك نهائيا دلوقتي لان بعد الجواز حاجات كتير بتتغير وحسام هيكون جمبك وهتشوفيه اكتر وكمان العلاقه بينك وبينه هتبقى احسن لان علاقه الجواز بتقرب وبتخلي الراجل يتعلق جدا بلست انتي فهماني طبعا
امنيه بحزن فهماكي وانا بحب حسام جدا والله بس انا مش عارفه اخد الخطوه حاسه طول الوقت في حاجه مسكاني وبترجعني الف خطوه لورا
منال اسمعي كلامي احساسك ده لانك بعيده عن خطيبك فحاسه طول الوقت انك لوحدك بس علاقتكم هتقوى بعد الجواز وهيفضل جمبك ورايي انك متتاخريش في ده وتمموا جوازكم وعيشوا طبيعي مجرد ماتتجوزوا يعني متقوليش محتاجه وقت
امنيه بتنهيده مش هظلمه بلشكل ده يا دكتوره ?
منال لا طبعا مش هتظلميه بلعكس انتي اللي هتنسي كل اللي في دماغك ده وحالتك هتتحسن كتير جدا لما تبقوا قريبين من بعض علشان انتي اللي بيخليكي تفكري كتير وبتتعبي انه هو كمان بعيد عنك فسايب مساحه لدماغك توجعك انما لو حسام مالي يومك حتى لو كام ساعه مش هتركزي غير في حياتك وهتعملي اكل ايه انهارده
امنيه بتنهيده كلامك صح بس ده لو انا بقعد مع دماغي بنتوهم انما انا واثقه اني بشوف حقايق
مناال تؤ هي اوهام فعلا ومش هشرحلك دلوقتي بس هشرحلك بعد جوازك لما حالتك توصل زي منا متاكده ساعتها هقولك وهتفهميني ده مرض نفسي بس مش عيب ومفيش داعي تتكسفي منه وبيجي بسبب اهمال واسباب تانيه كتير في طفولتك
امنيه بحزن يعني انتي شايفه ان علاج وضعي اني اتجوز حسام مش كده ?
منال بتنهيده اه شايفه كده جداا ومستنياكي بعد اول شهر جواز
وفضلت تتكلم معاها وشويه وقامت امنيه وسلمت عليها وتابعت بابتسامه خلاص تمام هعمل كده يلا باي
منال بابتسامه باي يحبيبتي
ونزلت ورايحه تمشي اتفاجئت ان حسام واقف وساند ضهره على عربيته فوقفت مكانها بصدمه وتوتر شديد
حسام ايه اتشليتي ??
امنيه بتوتر ودموع حسام !!
حسام راح مسك دراعها وتابع بحده انتي بتعملي ايه هنا يا امنيه هو ده الاتيليه ???
امنيه بخوف ودموع حسام انا .. انا جيت مع واحده صاحبتي وصلتها واديني نازله وهي مش حابه تعرف حد فمقولتلكش
حسام بعصبيه انتي لسه بتكدبي يعني شايفك بعيني ولسه بتكدبي انتي ايه ملتك
امنيه بدموع وخوف صدقني مش بكدب عليك يلا نمشي وهفهمك كل حاجه
حسام بعصبيه وهو بيمشي بيها لجوه تابع تعالي وريني صاحبتك دي يلا
امنيه بخوف ودموع لالا ارجوك ووقفته وتابعت لالا ارجوك خلاص خلاص هقولك الحقيقه ايوه انا اللي جيت هنا
حسام بعصبيه منا عارف هو انا عبيط اتفضلي قولي جيتي هنا تعملي ايه في ايه في حياتك تاعبك خلاكي تيجي هنا
امنيه بدموع ارجوك متغصبش عليا انا مش هقدر اتكلم
حسام مسك دراعاتها الاتنين وتابع بحده ليه مش هتقدري تتكلمي انتي كلها شهر وتبقي مراتي ازاي بتخبي عليااا اصلا
امنيه غمضت عينيها بخوف وتابعت بدموع وحياتك عندي مش هقدر افتح بوقي ب ولا كلمه دلوقتي ارجوك افهمني وقدر مشاعري انا مش بسهوله خدت الخطوه دي وجيت هنا انا تعبانه يا حسام .. تعبانه اوي والله فمش بسهوله هفهمك كل حاجه
حسام بصدمه وانتي ازاي يوصل بيكي الوضع لكده ومتفكريش تحكيلي مش قادر استوعب بجد ???
امنيه بدموع انا تعبانه من قبل ما احبك ونتخطب فاتعودت ان الموضوع ده مش بحكيه لحد بس مع الوقت هقولك بس ارجوك بلاش تغصب عليا حقيقي مش هقدر اتكلم دلوقتي
حسام وانتي شايفه انه صح انك تكدبي علياا وتيجي من ورايا وكمان بتخبي ومش عايزاني افهم ??
امنيه بدموع لا مش صح وغلطانه بس منا مكنتش عايزاك تعرف اني بتعالج نفسيا وانت اصلا عرفت منين اني هنا
حسام بسخريه لا ولا حاجه مش براقبك يعني كل الحكايه روحت بيتك لقيتك ركبتي تاكسي فمشيت وراكي ظنا مني انك رايحه الاتيليه زي ماقولتيلي فكنت جاي وراكي اعملهالك مفاجاه اني خدت اذن من الشغل وهشوف الفستان معاكي بس اتضحلي العكس
امنيه بدموع انا اسفه بجد يا حسام وحقيقي موضوع العلاج النفسي ده بس الحاجه الوحيده اللي مخبياها عليك وكنت بعملها من غير علمك
حسام بسخريه لا واسفه على ايه هو حسام يعرف حاجه اصلا ولا فاهم انتي عايزه ايه يلا يلا علشان اروحك الكلام مالوش لازمه وخرج وراح ركب عربيته وولع سيجاره وهي راحت بحزن وركبت جمبه وتابعت وهي بتحط ايديها على كتفه انا اسفه بجد
حسام بتنهيده لا عادي ولا يهمك سلامتك يا امنيه على التعب اللي انا معرفهوش
امنيه تنهدت بوجع وتابعت هقولك والله العظيم بس مش دلوقتي
حسام بتنهيده لا عادي خدي وقتك زي ما انتي كل حاجه عايزة ليها وقت
امنيه بتنهيده قصدك ايه يا حسام
حسام بحده قصدي انتي اتغيرتي ومبقتيش زي الاول وكل حاجه بقيتي بارده فيها ومش عايزاها تحصل
امنيه بحزن ده اسمه خوف
حسام بعصبيه خوف من ايه هو انا وجودي جمبك هيأذيكي ويخوفك ??? انتي ليه عايزة تجننيني
امنيه بدموع لا مش وجودك جمبي الخوف من المسئوليات ومن الحاجات الجديده اللي بدخلها
حسام وهو بيسوق تابع اه على اساس ان انتي الوحيده اللي هتتجوزي ومش كل البني ادمين اللي خلقها ربنا كده ما تشوفي ياسمين اهي متجوزه على ضره وبتعشق جوزها وراضيه تعيش هتشوفي ايه انتي من اللي هي بتشوفه
امنيه بضيق حسام لو سمحت متقارنيش بحد لكل واحد حياته وانا مقبلش بللي ياسمين قبلته فكل واحد حر
حسام بتنهيده لا ريحي دماغك يحبيبتي مش هيحصل كده كده هو انا قادر على واحده بلا ستين نيله ده مازن ده الله يكون في عونه
امنيه ضحكت من بين دموعها ونامت على كتفه وتابعت طب خلاص بجد حقك عليا
حسام بتنهيده خلاص يا امنيه محصلش حاجه
امنيه قامت بصتله وتابعت بحزن هقولك والله من نفسي بس لما اكون مهيئه لكده
حسام تنهد بعمق وتابع تمام
امنيه بحب متبقاش رخم بقى ويلا فوت على الاتيليه اقيس الفستان واوريهولك انا اصلا عملاه من غير چيبونه سيباه طبقات دانيلا كتير كده ومن فوق رقيق خالص فبص خفيف جداا هتشلني وتلف بيا اليوم كله
حسام ضحك وتابع ده انتي على كده عايزه الواحد يفطر جمبري بقى
امنيه بضحك افطر اللي تفطره المهم انا هتشال كتير اليوم ده
حسام بابتسامه وغمز ده من عيوني
امنيه بضحك طب بتغمز وتوترني منك ليه طيب
حسام بضحك لالا خلاص انتي هتتلككي من دلوقتي انا هسكت خالص اهو
امنيه بضحك ايوه كده ونامت على كتفه تاني وراحو في طريقهم للاتيليه
———
في بيت الرفاعي مازن جيه وكان طالع فتابعت صافيه بضحك واد يا مازن
مازن وقف وتابع بحب ايه يا صفصف
صافيه بضحك انت لحقت تيجي هو الماتش خلص بسرعه كده
مازن بضحك لا مخلصش بس هطلع اكمله مع ياسمين فوق
نور بابتسامه وده من امتى ده ما انت علطول بتسمعه مع صحابك ايه الجديد هاا وغمزت
مازن بضحك شوف البت الصغيره وقله ادبها اهو مره من نفسي ياختي اسمعه مع مراتي
عايده بضحك طب اجري ياخويا روح لمراتك علشان تلحق تكمله
مازن بضحك انا ليه حاسسكم كلكم نيتكم مش سالكه
نرمين بضحك لا اتاكد متحسش
مازن بضحك ومالو مش عيب مراتي وحلالي هو انا طالع لوحده غريبه فكروا اللي تفكروه
عايده بضحك يا بجحتك يا ابن ايمن
مازن فضل يضحك وتابع مراتي يا ست الكل مرااتي اكتبهالكم على جبيني ولا ايه
نور بضحك لا مصدقينك مش للدرجه دي
مازن بضحك طب يلا هطلع انا مش فاضي للرغي الماتش هيخلص .. و اه صحيح شهد تحت في البرنده عايزه كوبايه قهوه حد يعملها
نور بحب حاضر انا هعملها
مازن بضحك واه صحيح تاني يا نور قدام قاسم ياسمين وقعت ورجليها زرقت فاانا جيت هاا
كلهم فضلوا يضحكوا فتابعت نور بضحك انت عايزني اكدب على جوزي !!! لا طبعا مش هو ده اللي امرني بيه ربنا مستحيل اعمل كده
مازن طلع محفظته وتابع بضحك وغمز طب امسكي ال 200 جنيه دي وهاتي بيها اللي انتي عايزاه واسكتي هاا
نور بضحك انت عايزني اكدب على جوزي ب 200 جنيه لا طبعاا مستحيل اعمل كده ولا حاجه تخليني اكدب عليه الا لو زودت 200 كمان
كلهم فضلوا يضحكوا فتابعت عايده بضحك شوف البت اللي مشافتش ربايه
مازن بضحك اه يا بنت الكلب يا جزمه بتستغليني يعني ماشي يا نور وفتح محفظته وطلع 200 جنيه كمان وتابع بضحك امسكي يخش يطمر
نور خدتهم منه وتابعت بفرح والله انت حبيبي وحضنته
مازن حضنها وباس راسها وتابع بضحك حبيبك علشان الفلوس اخص
نور بضحك لا طبعا انت عارف غلاوتك عندي قد ايه ينورعيني بس انا بصراحه كنت عايزه اشتري دريس عجبني جديد لفرح حسام وهو ب 400 جنيه فاستغليت الفرصه
مازن باس جبينها وتابع وهو حاطط ايديه الاتنين على خدها من غير ماتستغلي الفرصه ولا اي حاجه انتي تطلبي وانا انفذ هو من امتى يانور يعني كبرتي وبطلتي تطلبي مني منا طول عمري ابوكي قبل ما اكون اخوكي وبجبلك كل اللي تحتاجيه
نور بحب بجد ربنا يديمك ليا بحبك اوي
مازن بحب وانا بموت فيكي واي حاجه تعوزيها قوليلي وملكيش دعوه وجهازك انا هنزل ياسمين معاكي كل شهر ولا شهرين وهاتي كل اللي محتاجاه بعيدا عن اللي بابا هيجيبه انا ماليش دعوه انتي بنتي فهجيبلك وكده كده لسه بدري عليكي فهنخلص براحتنا
نور ابتسمت بفرح وتابعت يحبيبي بجد تعباك اوي معايا
مازن بحب بس يعبيطه ده تعبي ليكم راحه
عايده بحب ربنا يديمك ليهم سند يحبيبي ويفرحنا بعوضك قريب قادر يا كريم
الجميع بحب اللهم امين يارب
فتابعت جودي بابتسامه: اهو قرب اول حفيد يا ماما
مازن ابتسم وتابع يارب يجي بالف خير المهم هطلع انا ها ورايح يطلع مسكته جودي وتابعت بلهفه لالا استنى كنت عايزه اطلب منك طلب
مازن بتنهيده في ايه خير
جودي بخبث ينفع تيجي توصلني اجيب الادويه بتاعتي من الصيدليه
مازن انهي البعيده دي ??
جودي هزت راسها ب اه وتابعت اه هي
مازن بتنهيده وعلى ايه ما الرقم مكتوب على الشنطه هاتيه اكلمهولك وهطلبهم دلوقتي ولما يجوا نحاسب عادي بلتوصيل
جودي اضايقت جدا وتابعت بضيق يعني هيحصل ايه لو روحنا جبناهم انت مش عايز تعمل مشوار حتى لابنك
مازن بحده لا والله انا مقصدش كده وانتي عارفه كويس اني بيهمني راحه اللي في بطنك اكتر منك انتي شخصيا بس طلما في حل ليه نروح ونتمرمط يعني
جودي بضيق خلاص يا مازن خلاص وراحت تلبس الكوتش
فتابع مازن بحده اتنيلي استني اكلمهوملك انا واشوف بكام واديكي الفلوس
جودي بحده لا خلاص شكرا انا هجيبهم ورايحه تمشي فمازن مسكها وتابع بحده هو انا مش بكلمك ?? اقسم بالله العظيم…. تاني مره يا جودي اكون بتكلم وتتجاهلي كلامي وتكوني هتمشي بلاسلوب ده ولا تعلي صوتك هتشوفي مني وش مش هيعجبك
جودي بضيق تمام يا مازن اي اوامر تانيه
مازن بحده لا اتفضلي امشي وابعتي الرقم والادويه اللي عايزاها واتساب انا هكلمهم متكلميش انتي حد علشان منكدش عليكي
جودي بضيق حاضر
مازن بحده وصحيح نسيت اسالك صاحبتك مين دي اللي روحتلها امبارح ??
جودي بتوتر هاا
مازن بحده ايه اطرشتي ??
جودي بلعت ريقها بتوتر وتابعت لا سمعتك بس مستغربه اصل انت متعرفهاش
مازن اممم مين دي يعني وساكنه فين في القوصيه .. بنت مين مثلا منا عارف اهل القوصيه كلهم
جودي اتوترت اوي وتابعت لا انا قولتلك رايحه لصاحبتي بس مقصدش بيتها انا كنت رايحه اقابلها عادي وهي يارا من البداري مش من هنا وجاتلي علشان تشوفني وتسلم عليا لانها لسه راجعه من السفر ومشيت
مازن برفعه حاجب والله ??
جودي بتوتر اه والله هو انا هكدب عليك ليه يحبيبي
مازن اممم مثلا صحيح هتكدبي ليه ?? طب اتفضلي كلمي يارا كده
جودي بصدمه انت بتقول ايه يا مازن
مازن بعصبيه زي ما سمعتي يلا
جودي اتخضت وتابعت بتوتر حاضر حاضر هكلمها
عايده بصدمه انت بتقول ايه يا ابني هي
مازن بمقاطعه وبحده هشش لو سمحتي ياما مع احترامي ليكي متدخليش انتي دي هتبقى مراتي وانا حر اتعامل معاها ازاي
جودي اتوترت جدا وجابت رقم صاحبتها يارا فتابع مازن بحده ماتخلصي وترني ايه هنقعد سنه
جودي بخوف حاضر والله اهو وداست ترن وهي قلبها بيدق بعنف وخوف شديد وماسكه دموعها بلعافيه وثواني ولقيت الفون مغلق او غير متاح فتنهدت بارتياح فبصلها مازن ومسك دراعها جامد وتابع بتحذير: اقسم بالله العظيم يا جودي قفله فونها دي هي اللي انقذتك مني لان لو البنت دي كانت قالت حاجه غير اللي انتي قولتيها كنت هدفنك مكانك بلحيا ومش هيفرقلي
جودي بخوف ودموع وانا مش .. مش بكدب عليك يا مازن انا بحبك وبنت ناس وماليش ذمب فكل اللي حصلي ده ارجوك ثق فيا
مازن بابتسامه وماله منا مصدقك طبعا وعارف انتي مين وبنت مين انا بحذرك بس يحبيبتي لان انتي عمرك ماعرفتي غير مازن جارك اللي مالوش علاقه بيكي نهائي انما دلوقتي الوضع اختلف تماما وخبط بواحده من ايديه على خدها بخفه وتابع واظن انتي عارفه هتتجوزي مين وممكن يعمل ايه ومش مازن الرفاعي اللي واحده ست تستغفله
جودي بخوف وانا عمري ما افكر اعمل حاجه من وراك اصلا انا عارفه انت مين كويس وتقدر تعمل ايه ومدركه اوي يعني ايه هشيل اسم وشرف مازن الرفاعي فارجوك متخافش مني وبلاش تظلمني
مازن حد الله بيني وبين الظلم انا مش هظلم حد بس بلاش تظلمي انتي نفسك لان بجد ساعتها هبقى حد وحش اوي عمرك ماشوفتيه
جودي هزت راسها ب ماشي كتير بتوتر وتابعت حاضر والله حاضر يلا همشي انا
مازن مع السلامه ونزلت فتابعت عايده بتنهيده بعيدا عن شكك فيها لان ده عيب وميصحش يا ابني بس شد عليها شويه من ناحيه موضوع ياسمين البت دي حاطه مراتك في دماغها ومصممه تنكد عليكم كل ما تلاقيكم رايقين
صافيه بتنهيده غيره نسوان يا عايده طبيعي دي يابنتي الله يعينه عليهم
مازن بتنهيده هي غيرانه فعلا وانا واخد بالي بس بلنسبه للكلام اللي قولتوا فمتخادوش في بالكم انا عارف بعمل ايه كويس يلا هطلع انا
عايده بحب روح يا ابني ربنا يسعدكم قادر يا كريم
مازن بحب اللهم امين يارب وطلع على شقته
فتابعت نرمين بتنهيده شوفيلي يونس يا نور لو وصل القاهره يطمني على الواد
نور بحب حاضر هكلمهولك اشوفه وصل فين دلوقتي
عايده متوتريش نفسك تلاقيه فعلا شغل
نرمين بوجع شغل ايه بس يا عايده ده هما 3 ايام بدل مايجي يطمني عليه يفضل بعيد عني كده لا الواد شكله مصاب ولا فيه حاجه انا قولت ليونس روح وقولي
صافيه بتنهيده حزينه خير باذن الله يارب يطمنا عليه يحبيبتي اهدي وهنعرف والله
نرمين بحزن يارب ياما بجد
عند مازن فوق فتح باب شقته ودخل الدنيا كانت هدوء فحط المفاتيح على الترابيزه ودخل اوضتهم شافها واقفه قدام الدولاب بترص حاجات ولابسه ومتظبطه فعلا فحضنها من ضهرها وتابع بحب ايه الحلاوه والقمر ده
ياسمين شهقت بخضه وصوتت فتابع مازن بضحك بس بس ايه ده انا يخربيت اهلك .. الناس تقول ايه وطي صوتك ده
ياسمين حطت ايديها على صدرها وتابعت بخوف وهي صدرها بيعلو ويهبط يا شيخ حرام عليك طب كح اعمل اي حاجه خضتني جامد بجد
مازن فضل يضحك وتابع مالك يابت نجمك خفيف كده ليه هيكون مين يعني اللي هيدخل اوضتك ويحضنك انتي عبيطه ولا ايه
ياسمين بخوف يا مازن انا عارفه انه انت بس متوقعتش وجودك فاتخضيت بجد قطعت خلفي
مازن شد وسطها ليه وتابع بضحك لا لسه عايزين زين ونخاويه قطعت خلفك ايه بس .. سلامتك من الخضه يعيون وروح مازن انتي وباسها بحب
ياسمين بضحك ايه ايه ابعد بس كده شويه ايه التحرش ده
مازن بضحك ابعد مين اومال انتي جيباني من القاعده على القهوه ليه
ياسمين بحب يعني بذمتك قاعدتك مع صحابك على القهوه ولا قاعدتك معايا انا
مازن بحب وهي دي فيها كلام معاكي انتي طبعا وبصلها بتفحص وتابع باعجاب قمر يخربيت اهلك انتي بتحلي الحاجه اللي بتلبسيها كده ازاي
ياسمين ضحكت وتابعت بفرح طيب الحمدلله عجبتك علشان تعرف اني كنت بوصفلك صح بس
مازن بحب انتي علطول عجباني والله يابت يا سمسم ايه الجديد يعني
ياسمين بحب وضحك: يا قلب سمسم والله مش خساره فيك اني قيست البتاع المهزق ده تعالى بس وقعدت على السرير واتغطت
مازن اه وبعدين ??
ياسمين طبطبت على السرير جمبها وتابعت ايه مش قولتلي قاعدتي معاكي انتي طبعاا تعالى اقعد
مازن بضحك لااا انتي فاهمه غلط خالص انا اقصد قاعدتى معاكي اه بس مش اللي هي بلمعنى الحرفي دي لا المفروض انك بتحبي العربي فافهمي بقى دي كنايه عن اني هفضل معاكي اه انما مش اقعد جمبك وخلاص انتي عبيطه ولا ايه هو انا جاي اقعد جمبك ليه القاعده جمبك بحري ولا ايه
ياسمين بضحك واستعباط: اهي كلها قاعدات يحبيبي مش هتفرق تعالى افضل معايا متقعدش جمبي
مازن بضحك ياسمين متستعبطيش انتي فاهمه قصدي انا مقصدش القاعدات دي ده انا عايز اقعد بس اقعد اندب حظي بجددد
ياسمين بضحك اومال تقصد انهي قاعده طيب فهمني
مازن قلع جاكته وحطه على جمب وقعد جمبها وتابع بضحك وهو بيقلع التيشرت اقصد قاعده من اللي بتبقى انا وانتي والشيطان تالتنا دي وغمز
ياسمين فضلت تضحك بشده وتابعت والله انت متربتش
مازن بضحك مش بتعملي فيها بتستعبطي جبتهالك دوغري اهو وبعدين ما انتي متصله بيا علشان كده وبتقوليلي واحشتني احنا هنمثل على بعض
ياسمين بضحك نعم نعم ياخويااا مين دي اللي اتصلت علشان كده لا مسمحلكش انا بنت ناس وشريفه
مازن بضحك ماالك يحبيبتي ?? بنت ناس وشريفه ??!!! انتي ليه محسساني اني ابن كلاب ومأجرك ساعتين مش فاهم
ياسمين فضلت تضحك وتابعت لالا طبعا مراتك منقدرش ننكر بس انا قولت كده طُعم يحبيبي وانت كالته
مازن برفعه حاجب يعني ايه يا ياسمين علشان اقسم باالله لو اللي في دماغي صح انا
ياسمين قاطعته لما قربت باسته بحب وهو شدها ليه اكتر بعدين بعدت واكملت بضحك من قبل ما تقسم ولا تشغل دماغك خالص خليها مستريحه بهزر يعمري عيب عليك
مازن بضحك لا ثبتيني يا بنت الجزمه
ياسمين بضحك عيب عليك جول في الدقيقه تسعين ده
مازن فضل يضحك وتابع فكرتيني ب الماتش اللي خلتيني سيبته ده ..خلى مجيتي ليكي دي وقفت عليا ب 400 جنيه ولا اكني ماجرك صحيح
ياسمين بضحك ايه ده ازاي يعني
مازن بضحك انا طبعا حورت عليهم فقولت انك بعيد الشر عنك وقعتي على رجلك وزرقت ولازم اروحلك فكلهم صدقوا بس قاسم مبلعهاش فبقول لنور تسكت ومتقولوش مرضيتش فادتها رشوه 400 جنيه
ياسمين فضلت تضحك وتابعت لا ‏بجد مش قادره والله ناصحه عرفت تستغل الموقف
مازن بضحك هو في ايه يا بنت الجزمه منك ليها ايه حكايه تستغل دي محسسني اني معفن ليه ‏كده هو انا عمري عوزتها حاجه
ياسمين بضحك لا يعمري طبعا بهزر ده انت مفيش في حنيتك وكرمك بس الموضوع كله مضحكني بجد
مازن بضحك اضحكي ياختي اضحكي ماكله بسببك مانتي عملالي عمل علشان مبزعلكيش وبمشي وراكي كده
ياسمين لفت ايديها حوالين رقبته وتابعت بضحك وغلاوتك عندي ما حصل هو قيام الليل بس
مازن بضحك ما ده كفايه اوي وقرب منها ورايح يبوسها جاله مسدج فبعد عنها وتابع بضيق يادي ام الفصلان فضحكت ياسمين وطلع الفون من جيبه شاف المسدج كانت من جودي فيها الرقم والادويه فبعت الادويه واتساب للرقم واتصل بيه وتابع الو السلام عليكم
-ازي حضرتك يا دكتور
-الحمدلله معلش هتعبك بعتلك ادويه عايزها ضروري وهبعتلك اللوكيشن
-اه اه طبعا عايزهم اسال عليهم وهاتهم اي ان كان سعرهم
-خليه لما يجي يرن على نفس الرقم وانا هنزله
-تمام يلا سلام
وقفل فبصتله ياسمين بستغراب وتابعت ده ادويه لمين دي
مازن في سره اممم بدانا هتلاقي حاجه تنكد بيها اهو وبصلها وابتسم وتابع متشغليش بالك يعمري وساب الفون على الكومود وتابع كنا بنقول ايه بقى ورايح يقرب وقفته ياسمين وتابعت لالا بتكلم جد لمين الادويه دي ??
مازن بتنهيده امي اللي تعبانه يعني ولا مين طيب ممكن يعوز ادويه ??
ياسمين بغيره اممم جودي مش كده ??
مازن بحب اه جودي وكانت عايزاني اروح نجيبهم بلعربيه وانا وحياتك عندي مارديت وطلعلتك وقولت هطلبهم بلفون
ياسمين بغيره اممم لا كتر خيرك يحبيبي
مازن بصدمه لا هو كتر خيري فعلا منا بلفعل معملتش حاجه تضايقك هو انتي هرموناتك دي ايه علشان افهم بس ??
ياسمين بضيق مازن جودي بتدلع وبتتحجج بأي حجه علشان تفضل جمبها وتبعدك عني بحجه الحمل
مازن بتنهيده عارف وواخد باالي بس هعمل ايه طيب منا اهو مبعملهاش اللي هي عايزاه
ياسمين الدموع اتجمعت في عينيها وتابعت مازن انا عايزه بيبي اشمعنا هي حامل
مازن لالا انتي هتعيطي ليه اهدي كده احنا بقالنا اسبوعين بس متجوزين بتهزري ولا ايه
ياسمين بدموع حقيقي غيرانه اوي ونفسي انا كمان اشيل بيبي منك
مازن يحبيبتي هيحصل بس كله بوقته والله دي حاجه بتاعت ربنا وبعدين ده لسه بدري اوي على العياط اللي بتعمليه ده بجد
ياسمين نامت في حضنه وتابعت بحزن انا حقيقي مش بدعي دلوقتي غير ربنا يعجل بحملي علشان هيطبطب عليا بطريقه انت متتخيلهاش
مازن بحب يارب يعمري ده يوم المنى وباس راسها وتابع بضحك بس لعلمك 100 مره اقولك مش بلدعا بس والله
ياسمين بضحك يا ابني اتلم واتربى شويه وبصتله وتابعت بضحك بعدين صحيح انت هتتربى غصب عنك انا ناسيه خالص افتكرت دلوقتي
مازن بستغراب ناسيه ايه ??
ياسمين بضحك مش هينفع يحصل حاجه اصلا مراتك تعبانه يعمري
مازن برفعه حاجب مراتي مين اللي تعبانه ?
ياسمين بضحك انا يحبيبي مالك في ايه هو حرام ما كل بنات الدنيا بيجي عليها 3 ايام بتتعب وربنا بيريحنا انت عايز تتعبني ليه هاا
مازن لا ازاي طبعا مقدرش ومسك الفون بص للتاريخ وتابع اممم يعني مش لسه فاضل 12 يوم
ياسمين اتصدمت وفضلت تضحك بشده وتابعت يخربيتك انت عارف مواعيدي منين ياا ماازن اما هي اخر مره جات خلصت قبل فرحنا ب
مازن بابتسامه وبمقاطعه بيومين .. خلصت قبل فرحنا بيومين مش كده
ياسمين فضلت تضحك بشده وتابعت يا قليل الادب ياللي متربتش انت بجد عرفت منيين يا مااازن يعني اخر مره جات مكنتش مراتك اصلا علشاان تعرف
مازن يعني بذكاء اهلك بحبك بقالي 10 سنين ومتربيه على ايدي ومفيش مره في شهر من ال 120 شهر اللي عديتهم معاكي دول خدت باالي انك بتيجي اخر كل شهر تتغيري وتعيطي وتتخانقي علي اتفه الاسباب ??
ياسمين نامت في حضنه وفضلت تضحك بشده وتابعت يخربيت الاحرااج يعني انا كنت بتكشف كل مره يا فضيحتك يا ياسمين
مازن فضل يضحك وتابع ده المشكله مش في انك كنتي بتتكشفي زمان لا المشكله فعلا في الحوار اللي عملتيه عليا دلوقتي
ياسمين بضحك وحياتك عندي كنت بهزر بحرق دمك شويه وهقولك الحقيقه ايش عرفني انك حافظ وواخد بالك من التفاصيل كده
مازن اعتلاها وتابع بحب لو معرفتش تفاصيلك انتي هعرف تفاصيل مين يعني ?? وده من حظك الاسود بقى انك حب عمري فحافظ كل حاجه فيكي
ياسمين ضحكت وتابعت بحب بلعكس والله ده انت مرايتي وكتابي المفتوح ده يبختي انك نصيبي
مازن بحب طب اقولك حاجه ده حقيقي فعلا القاعده معاكي حتى لو هنهزر ونضحك بس احسن من 100 قاعده قهوه
ياسمين بضحك شوفت بقى علشان تصدقني وشكله البتاع اللي انت مختاره ده عمل شغل
مازن فضل يضحك وتابع اه بصراحه حقيقي زي القمر كلمه قليله
ياسمين ابتسمت بحب وتابعت والله دي عيونك اللي قمر
مازن ابتسم ووطي باسها بحب وهي حطت ايديها حوالين رقبته وقربته منها وفونه رن
فغمض عينيه بضيق وتابع بهمس لا كده كتير بجدد
ياسمين اتعدلت وتابعت بضحك حقك عليا هي الصفرا بنت الصفرا حاطه عينيها في اليوم
مازن فضل يضحك وتابع اه والله شكله كده واتعدل مسك الفون وتابع بتنهيده الدكتور ووطى يجيب التيشرت وتابع هنزل اجيب الدوا اديهولها وجاي خليكي زي ما انتي
ياسمين مسكت ايديه قبل مايلبس وتابعت بحب لالا خلي حد غيرك يستلم احمد مثلا وينادي يديهولها وخليك انت معايا
مازن بضحك والله فكره حلوه لحسن انتي لما بتفصلي بفضل اسايس فيكي لحد ما تطلعي روحي واخرهم حوارات تعبك ده
ياسمين فضلت تضحك وتابعت ببقى بهزر والله عيب عليك
مازن بعت لاحمد يستلم الادويه وتابع بس كده هقفل ام الفون بقى علشان حقيقي مش ناقص وش تاني وقفله ورماه على جمب وشد ياسمين ليه وتابع بحب كلاكيت تالت مره ويارب تكون الاخيره كنا بنقول ايه بقى
ياسمين ضحكت وتابعت بحب وهي بتحط ايديها على رقبته: ان عيونك القمر
مازن بضحك لا عديناها دي خلاص افتكرت وقربها منه وباسها بحب
———-
في شقه سيف في القاهره الباب خبط
سيف راح فتح فتابع بحب حبيبي ادخل
يونس كان باصصله بصدمه وتابع ايه ده ??
سيف دخل مطبخه المطل على الصالون وتابع بضحك وهو بيصب القهوه ايه في ايه
يونس قفل الباب وبصله وتابع بحده يخربيت اهلك يا شيخ قول انك مش عايز ترجع اسيوط علشان منظرك ده مش علشان العميد عايزك
سيف بضحك مالك يا يونس في ايه من امتى وانت بتندب زي امي كده
يونس بحده سيف انا مبهزرش احترم نفسك واتكلم جد
سيف بحب طب اعملك قهوه ??
يونس ضرب كف في كف وتابع بحده يا حول الله يارب شوف انا بقوله ايه وهو بيقول ايه لا مش عايز زفت ده انت حقيقي مفيش دم
سيف خد كوبايته وخرج بيها وقعد في الصالون وتابع بتنهيده اصل اللي حصل حصل كلامك ده هيغير ايه يعني خلاص
يونس راح قعد قدامه وتابع بحده اه وده من ايه ده فهمني
سيف بضحك انت ليه محسسني اني شغال في السيرك القومي يا باشا انا ظابط جيش يعني حدود ومهمات وكتايب وحوارات زي الفل ودي اصاابه من اخر مهمه وكده خفت والله يا يونس ده دماغي كانت مفتوحه عن كده ومكنتش بحرك ايدي حلو من الرصاصه نحمد ربنا بجد
يونس بخوف وعمر حصله حاجه ??
سيف وهو بيشرب القهوه تابع تؤ عيب عليك عمر انا افديه برقبتي عارف زينب تموت لو رجعلها فيه خدش ده ربنا يستر لما تشوف ضهره علشان انا زقيته زقه جامده كنت بافديه فوقع اتخبط في صخره عورته جامد
يونس بحده والله انا ما عارف اقولكم ايه طب عمر وزينب معاه وهتهتم بيه انت بقى ايه معندكش اهل يسالو فيك ولا ايه ??!! يا ابني حافظ على نفسك شويه حرام عليك امك الغلبانه دي والله قلبها كان حاسس لما انت كلمتها قولتلها مش هرجع عندي شغل في القاهره قالتلي الواد اتصاب روح شوفه وطمني ونور قفلت من شويه قولتلها لسه موصلتش بلذمه اقولهم ايه بجد حرام على اهلك ياخي
سيف بتنهيده يونس متكبرش الموضوع بقى دي كلها اصاابات خفيفه
يونس بحده اصاابات ايه اللي خفيفه ?!! دراعك واخد رصاصه ودماغك متعوره بلمنظر ده وبتقولي كده خفت كمان وخفيفه !!! لالا انت هتشلني
سيف بضحك انت ليه محسسني انك خلفتني ونسيتني بجد
يونس بحده هو انت بتقول فيها يعلم الله انت هتموتني في مره ده حقيقي
سيف فضل يضحك وتابع بعد الشر عليك يا بابا حقك عليا
يونس بضحك ابوك في عينك يا شيخ وبس بجد يا سيف علشان انت فايق ورايق وبتهزر وحقيقي صدق اللي قال عليك قلبك ميت
سيف قام قعد جمبه وباس راسه وتابع والله غصب عني يا يونس ادعيلي
يونس بتنهيده ربنا يقويك يحبيبي ويحفظكم جميعا والله بدعيلكم بس ابوس ايدك مش كده حافظ على نفسك شويه يا سيف
سيف بحب اللهم امين يارب وحاضر والله متخافش عليا المهم طمني عليهم عاملين ايه كلهم
يونس بتنهيده الحمدلله كلهم كويسين
سيف بضحك ايه صح حوار مازن واختك ده انا عرفت من عمر الاخبار
يونس بستغراب وعمر عرف ازاي اصلا
سيف بضحك الخباصه اللي قاعده وسطكم قالتله مش جوزها
يونس بضحك تصدق صح زيينب مجتش في بالي خالص ده من امتى وزينب بتحب اللت بتاع الحريم ده
سيف بضحك يبااشا هما كلهم صنف بيعشق اللت زي عينيه بيتجوزوا ومبيلاقوش حاجه يعملوها بقى فبيرغوا
يونس بضحك على رايك والله وتنهد وتابع والله ياسمين مبسوطه بس انا اتمنى تفضل كده وتكون قد القرار اللي قررته
سيف بتنهيده بص اقولك الصراحه وعمر لما قالي قولتله نفس الكلام .. اختك بتحب مازن كان هيبقى حرام عليها لو اتجوزت اخوه هتقهر الكل ومحدش هيعيش مرتاح كده عملت الصح وياما رجاله بتتجوز بلاربعه وعايشين ده هما اتنين بس ومازن بيفرشلها الارض ورد فالحمدلله جوازتها تطمنك كفايه انه مازن
يونس بتنهيده انا معاك بس بصراحه يا سيف موضوع الضره ده مش داخل دماغي خالص ياسمين حساسه وبتموت في مازن كلمه قليله وجودي مش ساهله وكياده اوي فبص حقيقي ربنا يخلف ظني ويسعدها
سيف بحب عارف والله بس اختك بردو مش هتسكتلها الواحده لما بتحب بتبقى عامله زي القطه اللي ممكن تخربش اي حد يهوب ناحيه عيالها فا دي هتكيدها ودي هتكيدها وضحك وتابع هو ابن عمك اللي ربنا معاه
يونس بضحك اه بصرااحه من ناحيه ربنا معاه فا ربنا معااه
سيف بتنهيده شاف كتير والله كفايه اوي حتت انه ساب ياسمين لاحمد دي لوحدها تقهر وتكسر اي راجل مهما كان قوي اصل مش اي حد ده اخوه
يونس بتنهيده حزينه : اه طبعا بصراحه دي النقطه اللي خلتني فعلا اتعاطف معاه مع اني شوفتها في البدايه انه بايعها بس لما جدك كلمني وركزت شويه لاقيت ان اختي اللي عاندت ووصلتهم لكل ده وهو بيموت زيها واكتر منها الف مره كمان وهو شايفها مع اخوه فحقيقي الحمدلله انهم بقيوا سوا ربنا يسعدهم
سيف بحب يارب بجد وحسام اخباره ايه واخبار تجهيزات فرحه
يونس انت حتى دي عرفتها !!! لالا يخربيتك يا زينب
سيف بضحك مابقولك فاضيه بقى مش قعدها عمر من الشغل فبتشوف اي حاجه تعملها
يونس بضحك بتهزر قعدها فعلا
سيف اه والله راجل بلا قله ادب مكنش بيعجبني بياتها برا البيت بليل ده
يونس بضحك ده حقيقي فعلا راجل عمل اللي محدش عرف يعملوا
سيف ياباشا انا وحسام قولنا لا بس عمك وجدك شجعوها فمنقدرش ننطق انما ده جوزها بقى يحكمها ميخصناش لا وايه هي لما قالتله اتخانق معاها ورفض وجايه تقولي سيف علشان خاطري اقنعه في الشغل
يونس لا طبعا مينفعش متدخلش يا سيف انت سيبه يحكم بيته بمعرفته
سيف بضحك يباشا سيبك منها اما انا ضد شغلها هروح اقنعه بأي منطق فقولتلها انا مش راجل عليه هو جوزك ويحكم بيته فبعلي وتيره صوتي سيكا بس وانا بتكلم لقيتها زي الكتكوت المبلول وخافت وقالتلي بس بس علشان ميسمعش وكأني مقولتلكش حاجه خلاص طب ليه يابنتي ليه
يونس فضل يضحك وتابع لا طلع مسيطر الواد عمر
سيف راجل وعارف يحكم بيته ومحافظ عليها وبيحبها ومخليها عامله لكلمته احترام في غيابه ووجوده وانا لو مش عارفه هيبقى كده ويستاهلها وتستاهلوا مكنتش وافقت اديه اختي ده يوم العوده يا يونس والله العظيم انا اللي بيقولوا عليا مبحسش قطعت قلبي من عياطها عليه
يونس ابتسم بحب وتابع يعسل ربنا يديمهم لبعض بجد وتقوم بالف خير ويفرحوا بابنهم
سيف بضحك اهو انا اول واحد عارف انها حامل وقولتلها هتطلعي حامل ولما كلمتني في الجيش اكدتلي بس قالتلي معرفش عمر زمانه عرف دلوقتي والله يجدع الواحد ما مصدق مبالك هو
يونس بضحك اه والله متخيل زينب هتبقى ام الزمن جري بشكل غريب وعمر على قد فرحته على قد صدمته
سيف فضل يضحك وتابع انت بتقول فيها نازل مخطط وراسم ورايق فعلا وعمال يحرق في دمي طول الطريق ابن الجزمه ويقولي اختك واحشتني يا قائد
يونس فضل يضحك بشده وتابع يخربيت فقرك يا عمر لالا مش قادر مشوفتش في بجاحته
سيف بضحك بالله يستاهل الصدمه والمفاجاه اللي في بعض دول وصح محكتلكش ده انا طلعت عين اهلهم المره دي
يونس بضحك ايه الجديد بذمتك
سيف بضحك لا ولاد الجزم استغفلوا اخوك يرضيك ??
يونس بضحك لا ميرضنيش احكي
سيف بضحك هقولك
———-
عند شهد في البرنده كانت قاعده بتذاكر
احمد جيه وتابع بحب ممكن الدكتوره تسمح بخمس دقايق من وقتها
شهد شابت القلم وتابعت بابتسامه اكيد طبعا اتفضل
احمد شد الكرسي وقعد قدامها وتابع ولا حاجه ياستي كل ما في الامر اني بفكر اطور علاقتنا
شهد بستغراب تطور علاقتنا !! وضحكت وتابعت تطورها ازاي يعني مش فاهمه ?
احمد بابتسامه يعني مثلا انتي تلفي ورق عنب وانا اجيب زبادي وفينو وانا جاي
شهد ضحكت وتابعت ده اللي هو ازاي يعني احمد قول عايز ايه بجد مش بفهم التلميحات حقيقي
احمد بضحك انتي امتى فهمتي يا شهد انتي علطول بتقولي جمله مش فاهمه اكتر ما بتاكلي طب بصي ياستي فكك من ورق العنب والزبادي والفينو علشان شكلك غبيه فكري معايا في هديه لعيد ميلاد امي
شهد بحب هي مرات عمي عيد ميلادها قرب ولا ايه
احمد بحب اه اجبلها ايه بقى
شهد فكرت وتابعت بابتسامه عادي يعني شوف هي بتحب ايه وهاته وغمزت وتابعت بضحك ولو عايز مساعدتي عنيا ليك هعرفلك منها
احمد بضحك لا خلاص انتي كده بسطتيها خالص وابتسم بحب وتابع هي بتحبك انتي وضحك وتابع فهنيجي ناخدك من يونس اللي عامل فيها خطيبك ده علشان كده كتير الصراحه
شهد اتفاجئت وتابعت بضحك لا مش فاااهمه
احمد بضحك لا متقوليهااش ابوس ايدك مش فاهمه ايه يا شهد الله يخربيت اهلك هو في اوضح من كده
شهد بضحك مفرح: لا بجد مش فاهمه وضح اكتر بالله عليك
احمد بضحك بحبك وعايز اتجوزك يا شهد يخربيت اهلك بوظتي كل الرومانسيه اللي كنت محضرها
شهد اتفاجئت بشده وتابعت بضحك مفرح : بتحبيني !! وتتجوزني !!! وحطت ايديها على جبينها وتابعت بضحك يالهوي يا احمد يخربيتك
احمد بضحك خربيته من قبل ما يتعمر يا بنت عز
شهد حطت ايديها على جبينها وتابعت لالا دوخت امسكني
احمد قام بسرعه سندها وتابع بضحك بت يخربيت اهلك انتي هتخشي اخرى قبل مانخش دنيا ولا ايه
شهد بضحك لا اصبر بجد وسندت راسها على صدره لحد ما الدوخه قلت وبصت حواليها وبصتله وتابعت بضحك عيد تاني بقى عايز ايه مطلعتش بحلم
احمد بضحك لا كده كتيير بصراحه مالك يا شهد شاربه ايه انهارده
شهد بضحك لالا استنى بس يعني بالله عليك انا مش بحلم وهصحى دلوقتي
احمد فضل يضحك وتابع استني بس علشان شكلي هطير من الفرح دلوقتي افهم من كلامك ده انك بتحبيني زي ما بحبك فمش مصدقه من الفرح صح ?? قولي صح وغلاوه يونس يا شيخه
شهد ضحكت وتابعت صح علشان حلفتني بلغالي بس
احمد بفرح والله العظيم بتتكملي جد ???
شهد بضحك اه وربنا وضربته في كتفه وتابعت والبعيد مفيش دم ولا احساس غور جتك الارف صحيح
احمد بضحك بت بت مش من اولها نكد وهرمونات انا عشت عمري كله بصاحب بس ومبعرفش ولا احب ولا اتنيل متخلنيش اندم ان سمحت لقلبي ينبض كان بيدخ دم وبيعمل المطلوب منه وساكت
شهد برفعه حاجب هو انت هتقولي انا يقلبي على صحابك البنات ده احنا دافنينه سوا
احمد بضحك ادعي عليه صح
شهد برفعه حاجب هو مين ??
احمد بضحك قلبي علشان ساب بنات الدنيا كلها وراح حب اللي عارفه كل بلاويه من يوم ما اتولد
شهد بابتسامه بلعكس بقى دي حاجه حلوه علشان تتربى عليهم حاجه حاجه وتتوب من قلبك بحق وحقيقي
احمد فضل يضحك بعدين باس ايديه وش وضهر وتابع الحمد والشكر لله توبنا وعقلنا وابتسم بحب وتابع وعايزين نتجوز ونحب في الحلال كمان ويوم ما فكرنا في الحلال انا وقلبي ملنقاش اجمل منك نختاره
شهد دموعها نزلت بفرح وتابعت احمد انت بتتكلم جد بالله عليك ??? علشان انا والله لسه مش قادره اصدق
احمد مسح دموعها ومسك ايديها باسها وتابع بحب هو انا مثلا لو بكدب يوم ما اجي اعشم واحد واقولها بحبك وهتجوزك تبقي انتي !!! بنت عمي !! ليه من قله البنات يعني وضحك وتابع وبعدين بقى انا مش مستغني عن صحتي ده يونس لو اداني علقه زي اللي سمعت بيها اداها لمازن دي هروح فيها انا مريض قلب
شهد بدموع ولهفه ضربته في كتفه وتابعت بس بس اخص عليك بعد الشر ايه اللي بتقوله ده وفضلت تعيط وحطت ايديها على بوقها
احمد بضحك بس بس خلاص حقك عليا ومسح دموعها بايديه الاتنين وباس جبينها وتابع بقولك كده عايزك تصدقي مش انتي اللي مش مصدقاني
شهد بدموع مش مصدقاك لان انت ياما قولت لبنات بحبك وهتجوزك ووعدت كتير
احمد فضل يضحك وتابع ياا شهد حرام على اهلك ده انا كنت عيل صغير في اعدادي بتاخدي الكلمه مني مصدقه ازاي بس
شهد بغيره ودموع لا ياخويا ولما كبرت شويه كمان انت متلمتش غير لما دخلت الجامعه
احمد بضحك عارف والله بس اتغيرت وربنا هداني اهو وكل الشباب بتبقى كده بس الحمدلله ربنا هدانا انتي مسك الختام خلاص وباس جبينها وتابع بحب مش عارف بعد كل اللي تعرفيه ده هتصدقيني ولالا بس انا قلبي محبش بجد غيرك كل اللي قبلك مراهقه وشغل عيال
شهد رايحه تتكلم فابتسم وتابع بمقاطعه عاارف هتقولي ايه بلنسبه لاختك انا محبتهاش وهي تقولك لو عايزه تستريحي وتتاكدي انا اللي طلبت ننفصل وبما انك بتحبي الشاعر عمرو حسن هقولك زي ما هو قال لحبيبته «” قبلك حبيت كنت بفكر ان انا حبيت بس قابلتك بعدها ولقيت الحب بشكل جديد خالص ..كان دايما في حاجه متظبطش ..كان دايما في احساس ناقص “» الحته دي بلذات بتوصفني لان حرفياا كل االي قبلك منكرش فكرتهم حب بس ولا واحده حسيت معاها اللي انا حاسه دلوقتي ده …. وكان حقيقي دايما في حاجه متظبطش وفي احساس ناقص كنت بقول لنفسي مالك يا احمد ما اهي بنت ناس ماهي محترمه ما اهي فيها وفيها من ناس كتير واشكال الوان ما انتي عارفه بقى بس حقيقي طول الوقت كنت حاسس ان في حته ناقصه مش راضيه تكمل زي لعبه البازل كده مهما جبتي قطع هي قطعه واحده بس اللي هتبقي مثاليه بلظبط وتكملها وشبك ايديه في ايديها ورفعها وتابع بحب وايدك انتي بس اللي كملتني من يومك اتخلقتي من ضلعي وعلشاني بس انا كنت غبي ويبختي انك بتحبيني وصبرتي على غبائي واديني عرفت قيمتك ومش طالب غير وجودك جمبي العمر كله
شهد عيطت بفرح وتابعت احمد انا .. انا بجد مش عارفه اقولك ايه وحطت ايديه التانيه على بوقها وتابعت انا متوتره ومتلغبطه وفرحانه وجوايا مشاعر كتير بس حاسه لساني اتلجم بجد
احمد بحب حاسس على فكره ومش مستني منك كلام انتي اثبتي الحب كتير اوي في افعالك بس انا كنت اعمى وباس جبينها وتابع خلصي تالته وهتقدملك وعلشان مكنش بعمل حاجه غلط هقول لابوكي ويونس
شهد ضحكت بدموع فرح وتابعت مش عارفه اقولك ايه انا لسه مش مستوعبه اصلا حاسه اني بحلم
احمد بضحك طب اقعدي انتي كملي مذاكره وانا لما يجي يونس هقوله هو وابوكي تكوني استوعبتي يلا يحبيبتي
شهد بضحك مذاكره ايه بجد انا اعصابي سابت
احمد بضحك لا ده انا اللي اعصابي هتسيب عليكي دلوقتي وهتاكلي علقه اقعدي يا بت علشان انتي اللي هتذاكري للعيال انا مش فاضي
شهد بضحك نعم يا اخوياا ليه ان شاء الله مش مفروض تساعدني
احمد بضحك منا هجيبهم انتي ربيهم
شهد فضلت تضحك وتابعت انت متربتش والله العظيم
احمد بغمز وضحك هو حد يبقى قدامه البطل ده ويتربي بردو
شهد بضحك احمددد
احمد بضحك عيون احمد
شهد خبت وشها في الكتاب وتابعت امشي اطلع فوق يلا واعملي قهوه معلش
احمد لا انتي لسه شاربه واحده اهو
شهد بحب دي من بدري بالله عليك اعملي بحبها منك مع انك ساعات بتنيلها وبتبقى سايسه بس بردو بحبها
احمد بضحك مش هضعف بردو لا .. صحتك اهم كفايه كده انهارده وتابع بصوت مسموع ماازن .. يا مااازن
نور ردت من البلكونه وتابعت ايوه يا احمد
احمد بحب احدفي الشال بتاعي من عندك يا نور
نور حاضر ودخلت جابته وتابعت امسك اهو ورميته
احمد مسكه منها وهي دخلت وراح فرده وحطه على شهد وغطاها كويس بيه وتابع بحب وهو بيبوس راسها ركزي الله يخليكي هانت خلاص
شهد ابتسمت بفرح وتابعت حاضر والله متقلقش
احمد مش عارف ايه ديتك في انك تذاكري هنا بصراحه ماتطلعي فوق طيب
شهد بحب لا شكل الزرع والهدوء ونسمه الهوا دي بيدوني باور
احمد بص للساعه وتابع طب ساعتين بلظبط واطلعي يا شهد قبل ما الدنيا تليل
شهد بحب حاضر
احمد بحب يحضرلك كل خير يعيوني
———
في المطعم عند عمر وزينب قاعدين قدام البحر وبيشربوا العصير بعد ما اكلوا
زينب بضيق سموزي النعناع ده طلع طعمه يقرف مش عاجبني
عمر بضحك ماقولتلك كده يخرابي عليكي هاتي وخدي البرتقال
زينب لالا وانت مالك حرام انا هشربه ورايحه تشربه فخده منها وتابع بحب لا عادي انا بشربه بس بفضل البرتقاال وطلما معجبكيش خدي ده وبدله معاها
زينب بضحك والله انت حبيبي بجد
عمر فتح دراعه فسندت راسها على صدره فتابع بحب احنا تحت امر زوزا هي بس تطلب
زينب بحب والله انت قلب زوزا
عمر بضحك مش علشاانك ولا حاجه بس علشان لو شربتي حاجه مش عجباكي هترجعي وتتعبي وانا مش عايز اتعب حبيب بابا
زينب بصتله بصدمه وتابعت عمر انت بتتكلم جد ??
عمر فضل يضحك وتابع وهو بيشرب لالا انتي مش معقوله بجد يخربيت دماغك يا شيخه اللي شايلينها دي وحاطين مكانها راس بخاخه
زينب بضحك عمر بجد متهزرش علشان بصدق وبغير
عمر بضحك لا انتي مخك تعبان بجد
زينب ضحكت وتابعت تشكر وشربت وتابعت باستمتاع : اممم ده اجمل بجد
عمر بضحك ما لو نسمع الكلام بس اتسحبتي من لسانك وقال ايه مش عايز اجيبه علشان مستحرم ادفع فلوس واخليكي تجربي حاجه متعرفيهاش
زينب بضحك انا متربتش معترفه
عمر بضحك منا عارف هو انتي هتقوليلي المهم يلا قومي علشان نروح
زينب لالا ليه ما ادينا قاعدين
عمر بحب وحياتك لو عليا من عيني نقعد براحتك بس انا راجع من سفر وتعبان فمش قادر يادوبك اروح اخد شاور واخدك في حضني وانام لتاني يوم
زينب بحزن اه اه صح حقك عليا يعمري نسيت انك راجع هتموت وتنام اكيد خلاص يلا قوم
عمر بحب خلصي اللي في ايدك وهنمشي
زينب لالا هشربه في الطريق عاادي وقامت وقفت وتابع يلا قوم ومسكت ايده قومته فقام عمر وطلع الفلوس حطها على الترابيزه وتابع بحب حقك عليا هجيبك تاني
زينب بحب يحبيبي ماالك ما احنا كالنا وشربنا وقعدنا خلاص والله كفايه صح ده انت اللي حقك عليا بجد فرحتي بقعدتي معاك نستني انك مهدود تعبتك بجد
عمر حط ايديه على كتفه وتابع بحب وهما ماشين بس يهبله مفيش اي تعب انا معملتش حاجه اصلا وفتحلها الباب فركبت وقفل ولف قعد جمبها وساق وبعد شويه كانت عينيه بتغمض غصب عنه وبيفوق نفسه
زينب بقلق حبيبي ابوس ايدك ركز او اقف شويه اغسل وشك
عمر بتعب متخافيش مركز
زينب بخوف مخافش ايه بالله عليك ده انت عينك حمرا دم وقفلت خالص
عمر بتعب حقيقي خلصان
زينب مشت ايديها على كتفه وتابعت بحزن يعمري ربنا يقويك يارب يقطع الشغل وسنينه بجد
عمر ولما يقطعه نعيش منين يا ام لسان طويل
زينب بحزن انت مش شايف شكلك فاسكت بجد ده يارب نوصل على خير
عمر بضحك متخافيش والله مش للدرجه دي وكان بيفوق نفسه بلعافيه لحد ما وصلوا ودخل ياخد شاور وزينب غيرت هدومها لكاش مايوه حمالات وفردت شعرها ونامت واتغطت وشويه وعمر خرج لافف على وسطه فوطه وتابع بتعب يا زينب مش قايلك دخليلي هدومي
زينب ااه حقك عليا نسيت والله افتح الدولاب اهو وهات اول طقم انا كنت محضراه بس نسيت ادخلهولك والله
عمر ابتسم بتعب وتابع ولا يهمك يعمري خلاص وفتح الدولاب فبصت زينب عليه اتصدمت من اللي في ضهره وتابعت بدموع وصدمه ايه ده ياعمر !!
عمر بستغراب ايه في ايه ??
زينب قامت وحطت ايديها على ضهره فاتأوه بوجع وتابع اااه حرام عليكي ليه وغمض عينيه بألم
زينب بعياط من ايه ده يحبيبي يانهار اسود
عمر بوجع من الشغل يا زينب هيكون من ايه يعني
زينب بعياط ليه يعني هو انت كنت بتحارب
عمر ضحك بتعب وتابع: والله ابغى اقولك ايوه بس استحي اومال انا بهبب ايه يا زينب انتي هتعصبي ام الواحد ليه على المسا ورايح يلبس التيشرت مسكت ايده وتابعت بعياط لا استنى متلبسهوش هحطلك حاجه علي ضهرك ده
عمر بتعب يابت فكك هتخف مالها يعني عايز انام مش قادر بجد
زينب بعياط لالا استنى وراحت فضلت تدور في الدرج وعمر لبس البنطلون ونشف شعره وهي جابت مرهم وتابعت بدموع تعالى نام
عمر بحب يحبيبتي خلاص محصلش حاجه والله اهدي متعيطيش
زينب بعياط معيطش ايه بس ده ضهرك متعور ولاا اكنك اتسحلت في الارض
عمر بحب بسيطه والله العظيم نحمد ربنا في ناس اتصابت
زينب بخوف واخويااا وعيطت وتابعت بلهفه سيف يا عمر سيف م
عمر بمقاطعه : مفيهوش خدش متخافيش ربنا ستر
زينب بعياط والله انتوا الاتنين هتموتوني قريب بجد
عمر حضنها وفضل يطبطب عليها وتنهد بعمق وتابع حقك عليا اهدي طيب انا مكنتش عايز اوريهالك علشان كده بجد بس تعبان مركزتش
زينب بدموع هتخبيها علي مراتك ازاي يعني مهما خبيتها كنت هشوفك
عمر بتنهيده قولت بصراحه دول 3 ايام هيعدوا
زينب بدموع اخص عليك بجد تعالى نام انت علي بطنك وانا هدهنهولك
عمر بحب حاضر بس متعيطيش اهدي وراح نام وزينب قعدت جمبه وبدات تحطله المرهم وتابعت بدموع ده بجد الله يحرق الشغل على اللي عمل حاجه اسمها حربيه
عمر بضحك والله العظيم ما عارف اقولك ايه هو في بلد في الدنيا مفيهاش جيش يا زينب ياللي هتجلطيني ده الهكسوس والتتار دول جيش ودي مهنه موجوده من قبل وجود عيلتنا وعليه عيلتنا كلها شخصيا على الارض من ايام الفراعنه نفسهم
زينب بضحك من بين دموعها يبقى العيب فيك انت وسيف متربتوش علشان اختارتوا كده
عمر بضحك يابت اتلمي هقوملك
زينب بضحك لالا خلاص خليك وخلصت دهن المرهم وقفلته ووطت باست خد عمر ونامت جمبه وتابعت ينشف وهغطيك حقك عليا
عمر بحب ده انا تعبتك ينورعيني
زينب بحب تعبك راحه يغالي متقولش كده
——-
بعد شهر في الفندق المقرر اقامه فيه فرح امنيه وحسام كان عمر وسيف رجعوا الجيش ومازن وياسمين علاقتهم بقيت اقوى وجودي بتحاول تفرق بينهم بس مش عارفه واحمد قال لعز ويونس على شهد وزينب بقيت حامل في شهرين ونص وفرحانه بلبيبي جداا
في اوضه امنيه قاعده بتعمل ميكاب والبنات واقفين حواليها لابسين وجاهزين
ياسمين ها خلصتي
البنت بحب خلاص قربت اهو بعملها اخر حاجه
نور بحب حقيقي طالعه زي القمر
امنيه بحب يعمري عقبالك بجد
نور بحماس يارب يسمع منك ربنا
ياسمين بضحك علي ايه يا شيخه اقعدي
شهد بضحك شوف مين بتتكلم اكتر واحده ملزقه سيبك منها يابت يا نور دي اكتر واحده هايصه وبتغزي العين
ياسمين فضلت تضحك واكملت لا الجواز حلو مكدبش بس المسئوليه صعبه ومرهقه
زينب بحب اتفق بجد نفس الكلام وخصوصا في وضعي ده شايله مسئوليه جداا لوحدي
شهد بحب ربنا يقويكي يارب يحبيبتي انتي واللي زيك حقيقي
امنيه علي كده اخوه وجوزك هيجوا ولا ايه بالله ما بنتلم عليهم خالص
زينب بضحك قولي يارب عمر كلمني بيقولي سيف بيتحايل بس انسي حقيقي
نور بحزن ده غلب والله
ياسمين بتنهيده اه حقيقي ربنا يقويهم ويحفظهم بجد
الجميع بحب اللهم امين يارب
جودي بضيق ياسمين مازن فين
ياسمين برفعه حاجب ايش عرفني كنت امه ولا ايه
جودي بضيق منا شيفاه قالك رايح حته متعصبنيش وقولي
ياسمين بحده رايح يدور على مفتاح عربيته في البيت ارتاحتي ??
جودي بحده طب انتي بتزعقي كده ليه هو سؤال سالته وبعدين ده خلاص هيبقى جوزي زي ماهو جوزك ده ايه القرف ده انا سيبهالكم خالص وطلعت من الاوضه وقفلت
ياسمين رايحه تعيط فتابعت امنيه لالا ابوس ايدك لا انهارده متعيطيش علشان خاطري
ياسمين مسكت دموعها ودخلت البلكونه فشهد رايحه تدخل وراها تابعت نور بحزن سيبيها لوحدها علشان متتحرجش انها بتعيط خليها براحتها ولما يجي مازن هقوله يراضيها
شهد بحزن انا تعبتلها بجد
زينب بحزن حقيقي الله يكون في عونها
عايده دخلت وتابعت بت يا شهد انزلي احمد عايزك تحت بيقول الفوتوجرافر هيصور حسام كام صوره لوحده فهياخد الكاميرا تتصوروا انتي وهو
شهد بفرح ده تمام جدا يلا باي انتوا دلوقتي ونزلت بسرعه
زينب بضحك باعتكم في ثانيه
عايده بضحك اه اومال انتي فاكره ايه ربنا يسعدهم يارب
زينب بحب والله يبختها بحماه زيك يا مرات عمي
عايده بحب حبيبتي والله يا زوزا وده حقيقي هي وياسمين بناتي وشهد بلذات الكتكوته بتاعتنا فبصي في ركن كده لوحدها
زينب بحب هو يا زين ما اختار والله ربنا يسعدهم
عايده بحب يارب يابنتي كلكم
في الطرقه تحت حسام ماشي فسمع جودي بتتكلم وبتزعق في الفون
جودي بعصبيه بقولك مش هينفع نتقابل تااني انت مبتفهمش ده لو حد عرف بس ان اللي في بطني مش ابن مازن هروح في ستين داهيه تقوم تقولي كل شويه مقابلات وقرف انت ايه معندكش دم
حسام اتصدم بشده وراح مسك دراعها جامد وتابع بعصبيه انتي بتكلمي مين يحيوانه يا زبااله انطقييي مين ابو اللي في بطنك ده
جودي اتصدمت وخافت جدا وتابعت بتوتر انت .. انت بتخرف بتقول ايه انت اتجننت اوعااا كده ورايحه تمشي حسام مسكها من شعرها وتابع بعصبيه انتي لو مقولتليش حاالا مين ابو اللي في بطنك انا هفضحك هنا وهخربها فوق راس اهلك اخلصي
جودي بعياط ووجع اوعااا كده انا مش فاهمه انت بتتكلم عن ايه سبني
حسام رايح ياخد الفون راحت رامته في البيسين بتاع الجنينه فتابع بعصبيه اه يابنت الكلب يا زبااله وضربها بلقلم بقوه وتابع وهو بيمسكها من شعرها ده انا هطلع عين اهلك وهعرف مازن كل حاجه يكون احسنلك لو تختفي من اللي هتشوفيه وزقها بقوه وكلم مازن وتابع انت فين يا مازن
مازن بستغراب في البيت بدور علي مفتاحي مال صوتك
حسام بحده سيبك من كل حاجه تعالالي بسرعه بعيدا عن جو الفرح ده على الشقه بتاعت النيل عايزك في حوار ضروري مينفعش في الفون ومشي بسرعه
مازن بستغراب يا ابني طب ماتقول انت فرحك انهارده مش وقته
حسام لالا عادي كده كده رايح علشان اجيب بدلتي التانيه من هناك نسيتها لما اشتريتها سبتها هناك فتعاالي علشان اقولك لان كده كده انت مش هينفع تتصرف غير بعد الفرح مش وقته فضايح
مازن بستغراب تمام باي
حسام باي
ومشي وبعد نص ساعه مازن راح البيت وطلع لقى باب الشقه مفتوح استغرب ودخل اتصدم من اللي شافه

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية غموض الحب)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى