رواية غصون في مهب الريح الفصل الثامن 8 بقلم عبير سليم

رواية غصون في مهب الريح الجزء الثامن

رواية غصون في مهب الريح البارت الثامن

رواية غصون في مهب الريح الحلقة الثامنة

أيعقل ما أراه بعيني منذ متى و هو يتصل بي
بالتأكيد يود معرفة هوية من كنت بصحبته اليوم كم أشعر بالارتياح لذاك الأمر حتى اخبره بحقيقة الوضع فلا ينتابه الشك من ناحيتي
_ما هذا الذي أفعله ولما
انه أمر لم أفكر به من قبل ولم يأتي على خاطري يوما هل جننت فلتغلق الهاتف سريعا قبل أن ترد و لك أن تقول لها انه اتصال خاطئ
ياللحظ العسر فلقد أجابت علي سريعا فأنا مضطر الآن أن أتحدث اليها
مساء الخير يا وعد
وعد : مساء النور ازي حضرتك يا دكتور يوسف
يوسف : ازيك انتي عامله ايه بتذاكري
وعد : الحمد لله والله اه اه بذاكر
يوسف : مالك يا وعد في حاجه
وعد : لا مفيش دكتور يوسف اللي انا كنت معاه في العربيه النهارده ده ابن عمي
يوسف : انا مسألتكيش ياوعد
وعد : لو مسألتنيش ابقى مش غاليه عندك و مفرقش معاك
يوسف : ربنا يعلم انتي غاليه عندي ازاي أنا إذا كنت مسألتش فده لثقتي فيكي ياوعد
الموضوع بالنسبه لي ممكن يكون بس استغراب مش اكتر وخصوصا ان ضياء مكنش معاكي
وانا عارف ان ضياء مبيفارقكيش
وعد : ربنا يخليك يارب
بس أمال حضرتك متصل علية ليه هو في حاجه حصلت اوعى تقول الله يخليك انك رجعت فكلامك ومش حتلغي حاجه من المنهج
يوسف: ايه لا طبعا انا بس حبيت اطمن عليكي مش اكتر
وعد : واشمعنى النهارده دكتور لا الحقيقه ان حضرتك متصل عشان تعرف انا كنت راكبه مع مين ومش عاوز تصرحلي بده خايف اني ازعل من أن حضرتك تكون شكيت فية بالعكس والله يا دكتور ده شىء يفرحني جدا
يوسف: ماشي يا وعد انا مش حعطلك اكتر من كده حسيبك تذاكري
وعد: ماشي يا دكتور
مع السلامه
ما أن يضع اصبعه على زر القفل حتى يسمع صوتها تتحدث : دكتور يوسف
يوسف: أيوة يا وعد
وعد : انا متشكرة جدا لاهتمام حضرتك بية
يوسف : انتي غاليه عندي أوي يا وعد تصبحي على خير
وعد : وحضرتك من اهل الخير
ياااه الحمد لله حاسه كأنه هم وانزاح طبعا شك فية وقال البت بتلف من ورا خطيبها يالهوي ده انا نسيت اقولله ميقلش لضياء لا بس هو يعني دكتور يوسف اهبل عشان يقولله
طب انا اكلمه أأكد عليه أفضل
يضع الهاتف بجانبه فيتفاجأ بمعاودة اتصالها: ايوة يا وعد
وعد : دكتور يوسف الله يخليك متجبش سيرة أدام ضياء عن اني ركبت عربيه مع حد
يوسف : هههههههه شايفاني اهبل كده
وعد : انا اسفه والله يا دكتور انا مقصدش انا بس خفت الكلام ييجي كده من غير قصد
يوسف : بس اللي انا اعرفه انه عارف كل حاجه عنك وانتي ما دمتي مش عاوزاه يعرف حاجه زي دي تبقي عارفه انها اكيد حتزعله
وعد : ايوة لأنه مبيحبنيش أركب مع حد
يوسف : بس ده مش حد ده ابن عمك
وعد : ضياء بيغير علية بشكل جنوني يا دكتور
يوسف : انتي حتقوليلي على يدي
وانتي بتحبيه زي ماهو بيحبك واللا هو بيحبك اكتر
وعد : ضياء ده روحي عمري النفس اللي بيخرج مني و بستناه يرجع عشان أعرف أعيش يوسف هو حياتي كلها الماضي و الحاضر والمستقبل
يوسف: وعد عاوز أسالك سؤال وجاوبيني بصراحه
وعد : اتفضل يا دكتور
يوسف :لو بعد جوازكم اكتشفتي مثلا ان ضياء تعبان و مش حيقدر يخلف و يخليكي ام تسيبيه
وعد : أسيب مين ضياء أسيب روحي استحاله طبعا انا صحيح نفسي اكون ام ودي حاجه مفيهاش كلام لكن حبي لضياء اكبر من حبي لأي حاجه تانيه في الدنيا انا ضياء عارفاه لكن اللي جاي انا معرفهوش مشفتهوش لكن ضياء انا عرفته و شفت حبه لية و خوفه علية انا لو ضياء مش فحياتي وكل الدنيا معايا يبقى ملهاش أي لزمه
_بجد انا فخور بحبكم لبعض ربنا يخليكم لبعض ياوعد
يغلق معها المكالمه فيتفاجأ بها أمامه: خلصت المكالمه
يوسف : أيوة يا نيهال خلصت
نيهال : يوسف من فضلك عاوزين ننهي كل حاجه بهدوء ومن غير مشاكل
يوسف : يا خسارة يا نيهال كنت فاكرك حتتمسكي بية اكتر من كده
_انا اتمسكت بيك كتير يا يوسف سنين عمري كلها ضاعت وانا متمسكه بيك عارفه انك مقصرتش بس انا مش قادرة حس بية مش قادرة اكمل حياتي وانا وحيده من غير طفل يقوللي ماما
_بتقوليلي بعد السنين دي كلها احس بيكي و هو مين طول عمرك بيحس بيكي غيري طب وانا مين يحس بية عالعموم انا مش حتحايل عليكي تفضلي معايا اكتر من كده و مش عاوز اتكلم اكتر من كده لأن الكلام خلاص مبقاش ليه لزوم حاضر يا نيهال انا حكلم المحامي يخلص كل حاجه و كل حقوقك حتاخديها
_انا مش عاوزة حاجه
_لا كترخيرك
حقوقك حتاخديها كلها يا نيهال وبعد كده حطلقك ويارب تلاقي اللي نفسك فيه و تحققي فيه السعاده اللي بتتمنيها
يالها من حسرة تغمر قلبه وهو يرى زوجته التي تزوجها لسنوات تتخللى عنه و تتركه لسبب ليس بيده و لكن لا مفر فلقد قضي الأمر
تمر الأيام سريعا وقد أوشكت الامتحانات و أصبحت على مشارفها الجميع يستعد لامتحانات اخر العام
لم ينفذ أمير تهديده لوعد بل ظل معهم وهذا الأمر جعلها تطمئن و تظن انه قد عدل عما كان يريده وأنه عاد لرشده مما جعلها تنتبه لمذاكرتها ولا تشغل بالها بشئ أخر
…………….
ياللا يا قلب ماما عشان تنامي
غصون : لسه ياماما مخلصتش
هبه : كفايه عليكي كده عشان تلحقي تنامي كام ساعه عاوزاكي تركزي في الامتحان
غصون : حاضر يا مامتي
هبه : حجيبلك كوباية لبن دافيه تشربيها عشان تهديلك أعصابك و تنامي علطول
غصون : طب ينفع تحطيلي عليه سكر
هبه : ححطلك سكر دايت حاضر
غصون : حبيبتي يا هوبه
تذهب هبه لتأتي لها باللبن فتتصل على رفيقتها : خلصتي مذاكره
فريده: أيوة يا نونه لسه مخلصه انا و مامي
غصون : طب اشربي لبن زيي عشان تعرفي تنامي
فريده : حاضر مع اني مبحبهوش بس حشربه عشان خاطرك بس
غصون : متتاخريش الصبح
فريده: بابي ومامي حيوصلوني بدري
غصون : تمام تصبحي على خير يا فيري
فريده: وانتي من اهل الخير يا قلب فيري
بينما في مكان آخر
احقني يا تياء
ضياء : في إيه عملت إيه بس
تدخل منى : عمايله سوده و منيله على دماغه
ضياء: لاياماما ده فارس عسل
منى : عسل اسود و منيل
يعني الناس مستحملين شقاوته و ضربه لبنتهم و يطفشوه ويرجعوا ينادوه لكن توصل انه يفتح اقفاص العصافير و يطيرها و يفتح الباب و ينزل القطط ينفع كده يا ضياء
الست و جوزها و ولادها عمالين يلموا قططهم من الشارع وانت عارف قططهم عندهم ايه دي أغلى عندهم من ولادهم ذات نفسهم أعمل فيه ايه انا دلوقتي
ضياء : ليه بس كده يا فارس
فارس :انا مكنث قثدي والله هما ثعبوا علية وهما محبوثين كوة انت تلضا حت يحبثت تده
ضياء : ياحبيبي أفهم دول مش زي العصافير اللي بنشوفهم عالشجر و لا القطط دي متعودين عالشارع دول متعودين يعيشوا في البيوت لو نزلوا الشارع يتبهدلوا مش كل حاجه احنا بنشوفها بعنينا بتكون صح يا فارس في حاجات كتير لازم نفكر فيها و نحسبها صح عشان نقدر نستوعبها
مش دايما الظاهر هو الصح يا حبيبي انزل اعتذر ليهم وإياك بعد كده تتسرع وتحكم على حاجه من نفسك
منى : أدامي يا وش الهم تعالى انزل معاك تتأسفلهم
تدخل رنا و هي بتضحك بشده: هههههههه هههههههه
منى : الصبر من عندك يارب عيالي كلهم هبل يا ناس
رنا : هههههههه اصل هههههههه بينادوا عليه عشان ينزل عندهم
منى : لا وربنا ده ما تمثيل ده بجد و بحق وحقيقي هي الناس دي عبط ده انا قلت حيقطعوا علاقتهم بينا للأبد اللا قوللي يا فارس هو انت يا حبيبي ماسك عليهم ذله و اللا حاجه
فارس : اه اثلي قلتلهم حتكوث غثل
منى : اه قلتلي وعدتهم تتجوز غزل خير ما اختاروا والله طب يشربوا بقى انزلهم يا عريس الغفله
ضياء و رنا : هههههههه هههههههه
منى : قوموا يا حبايبي ناموا عندكم امتحانات الصبح ربنا ينجحكم ياولادي يارب و يفرح قلبي بيكم
يمر الليل ويأتي الصباح حيث يتجه كل الطلاب حيث تأدية امتحاناتهم كانت غصون و فريده في نفس اللجنه و طوال الوقت ينظران لبعضهم و كأنما يطمئنان انفسهما بينما على الجانب الآخر كانت وعد و ضياء كلا منهما يمتحن في مكان بعيد عن الآخر
بينما كانت وعد منهمكه في الإجابه تشعر بمن ينظر بورقتها ترفع رأسها فتجده دكتور يوسف فيبتسم لها ابتسامه تشعرها بالطمأنينه : برافو يا وعد كملي
تبتسم له وتشعر بالراحه و تكمل الامتحان
يكمل مروره على جميع الطلاب و يطمئن عليهم جميعا
حتى يصل إلى ضياء و يطمئن عليه هو الآخر: شاطر يا عريسنا عاوزين بقى تبقى الفرحه فرحتين
ضياء : ان شاء الله يا دكتور
دكتور احنا حنعمل الخطوبه بعد الامتحانات وحضرتك لازم تشرفنا
يوسف : ده أكيد طبعا ربنا يسعدكم
كمل امتحانك يا ضياء
يتجه إلى مكتبه ويطلب فنجانا من القهوه وبينما يشربه يدخل له زميله : اطمنت على تلاميذك
يوسف : مانت عارف يا محيي مبقدرش اقعد من غير ما اطمن عليهم واتأكد ان مفيش حاجه ادامهم صعبه
او مش واضحه
_مالك يا يوسف انت مش عاجبني
يوسف وقد اغرورقت عيناه بالدموع : مخنوق و تعبان اوي يا محيي
محيي : معلش يا يوسف عشان الموضوع لسه في بدايته بكرة تنسى و تعيش حياتك
_حياتي وهيا فين حياتي دي لا بيت و لا زوجه و لا ولاد حتى اعز الطلبه عندي خلاص مش حشوفهم تاني
_الحياة مبتقفش عند حد يا يوسف و حتمشي وكله بيعدي و الطلبه حييجوا غيرهم و غيرهم الا بقى اذا كان في حد معين انت متضايق انك مش حتشوفه تاني
_حد تاني تقصد مين
_اقصد مين طب عيني فعينك كده
_ايه شغل العيال ده يا محيي
_هههههههه ما هو شغل العيال ده هو اللي وقعك فيها و خلاك من غير ما تحس تسمحلها تتسحب وتقتحم حياتك وقلبك من غير استئذان
_والله انت شكلك فاضي وانا ولا فايق و لا رايق
_يوسف قللي بصراحه انت بتحب وعد
_وعد انت بتقول إيه يا محيي انت اتجننت
_لا انا متجننتش الجنان الحقيقي اللي انت فيه خصوصا وانك عارف و الدنيا كلها عارفه ان هي و زميلها داخلين نفس الكليه سوا من حبهم لبعض
ليه كده يا صاحبي ليه توجع قلبك كده هي الدنيا يعني خلصت عشان يقوم ما قلبك يحب يقوم يحب واحده عمرها ما حبتك و لا حبت غيرك لانها عمرها ما حتحب غير زميلها
واحده عمرها ما شافتك غير استاذها و مثلها الأعلى
لا يا يوسف انت مش قليل عشان تعمل في نفسك كده انت يوم ما تقول يا حب الف مين تتمنى اسمها يرتبط باسم دكتور يوسف فؤاد
يوسف : محيي انا عمري ما عملت و لا بعمل حاجه غلط
_عيب عليك لما تقوللي انا الكلام ده وانا عارف مين يوسف فؤاد وعارف اخلاقك ايه
انا فعلا مش قادر أستوعب ليه هيا اشمعنى هيا بالذات هي صحيح حلوة مش حنقدر ننكر دمها خفيف و نشيطه لكن في زيها و احسن منها كتير و مناسبين ليك يبقى ليه هيا
_صدقني يا محيي لو قلتلك اني انا نفسي مستغرب نفسي و مش عارف اشمعنى هيا اللي شاغله حيز كبير من تفكيري غصب عني لقيتني بفكر فيها اقسم بالله العظيم اني بتمنالها هي و ضياء كل السعاده وبتمنى اشوفهم زوجين سعدا و اولادهم حواليهم لكن بعد ما عديت عليها في اللجنه النهارده شفت فعنيها كلمة الوداع مع السلامه خلاص مش حشوفك تاني معرفش ليه حسيت بخنقه و بضيقه حسيت اني حزين أوي
_عارف يا يوسف انت محتاج ست تدخل حياتك
مش الشاعر، بيقول و داوني بالتي كانت هي الداء
انت لازم تدخل ست فحياتك وان شاء الله تنسيك كل اللي عيشته سواء،حياتك مع نيهال او قلبك اللي راح مع وعد وتقدر تداوي جروحك
يوسف : تفتكر ده ممكن يحصل يا محيي
_ و ايه المانع
_ محيي انا بفكر اسافر
_تسافر
_أيوة في اكتر من جامعه برة عارضين علية اشتغل عندهم ده غير انا لية أصحاب كتير برة نفسهم اني اشتغل معاهم بفكر اسافر وارمي كل الماضي ورا ضهري سواء،كان حب محكوم عليه بالإ عدام او جواز او اي حاجه نفسي افتح صفحه جديده مع الدنيا يمكن اقدر انسى وابدا من جديد
_ولو ان اللي انت عاوز تعمله ده ميتفسرش غير انه هروب بس لو ده حيريحك مش حقدر اقولك غير اتوكل على الله يا يوسف
يوسف انت طول عمرك طيب و محترم و ابن ناس و اتأكد ان كل اللي مريت بيه اكيد لحكمه عنده وإن شاء الله ربنا يعوضك عن كل اللي فات
_يارب يا محيي يارب
تمر أيام الامتحانات سريعا وبعد انتهائها بأسبوع تظهر النتيجه لطلاب الصف الثاني الثانوي
لوووولي لوووولي الف مبروك يا حبيبة قلبي يا رونا عقبال الثانويه العامه يارب
رنا : الله يبارك فيكي يا ماما
منى : عقبال ما اطمن على اخوكي يارب
فارس : حينكح متخافيث تياء،ثاطل
منى : ماشي يا اخرة صبري
اما اشوف انت حتعمل ايه في المدرسه وحيكون نظامك ايه
رنا : هههههههه لا اطمني ياماما هو صحيح فارس لسانه رايح فداهيه لكن هو ذكي و شاطر وان شاء الله حيحقق حلمك هو ويبقى دكتور،فارس
فارس : اه انا حبقى دتتول فالث و أدى الناس حقنه ثي اللي بابا بيتهيهالك في الاوته بالليل
منى :يخرببيت سنينك امشي يا زفت ده انت مصيبه
رنا :هههههههه هههههههه وربنا فارس ده ملوش حل
امال فين ضياء،يا ماما
منى : نزل هو و وعد يحجزوا القاعه عقبال ما افرح بيكي يا حبيبتي يارب
رنا : بس مش عاوزة واحد مسحسح و منحنح زي ضياء عشان صراحه هما يشللوا
منى : ليه بتقولي كده
رنا : مشفتيهمش يوم ما كنا بنشتري الشبكه دول كانوا حيجلطوني هو يتحايل عليها تاخد كوليه مع الاسورة و هي تقوله لا يا حبيبي مش عاوزة اكلفك انا عارفه ظروفك
وهو يقوللها انا لو اطول اجبلك نجمه من السما بااختي المرارة كانت حتنفقع منهم
فارس : حثان هي بتحبه يا لنا ومث حاوثاه يتفح تتيل
منى : وانت ايه فهمك في الحب انت يا زفت وبعدين هو كان دفع ايه ما ابوك ربنا يخليهلكم هو اللي صارف و مكلف
فارس : ايوة مانا بحب خثل و حكوثها
منى : بتحب غزل يالهوي يا اني يا خلفتك السوده يا منى وبعدين امانت بتحبها نازل فيها ضرب كل يوم ليه
فارس : حثان بتتليأ علية
بينما في بيت أخر الله ده حلو اوي يا اونكل زين
زين : عجبك الخاتم يا غصون
غصون : أوي أوي ده تحفه ربنا يخليك يارب
زين : الف مبروك يا غصون
محمود : تعبت نفسك والله يا بشمهندس
زين : مفيش تعب و لا حاجه يا محمود غصون زي فريده وزي ماجبت لفريده جبت لغصون عقبال ما اجيبلهم في الثانويه العامه ان شاء الله و عقبال ما نشوفهم عرايس يارب و يجيلهم اللي يستاهلهم
محمود : يارب ربنا يطمن قلوبنا عليها هي و فريده يا رب
في اليوم التالي
يجلس بمكتبه فيتفاجأ بمن يطرق عليه الباب و يدخل ممكن أدخل يا دكتور
لم يشعر سوى بالابتسامة تملاء وجهه و الفرحه تغمر،قلبه
وانتي محتاجه استئذان عشان تدخلي يا وعد
تقدم عليه و تسلم عليه بيدها
يمد لها يده ولكنه يسحبها سريعا حتى لا يشعر بحرارة يدها التي تلهب مشاعره تجاهها
عامله ايه طمنيني عليكي
_الحمد لله بخير يا دكتور بس فنفس الوقت قلقانه اوي و مش حطمن غير اما النتيجه تظهر
_ماتقلقيش ان شاء الله خير
_ان شاء الله
دكتور انا جايه لحضرتك النهارده انا وضياء
_ضياء،هو فين
_برة بيسلم على دكتور كامل و بيديله دعوة الخطوبه
_خطوبه
_ايوة احنا حجزنا امبارح القاعه هي قاعه ثغنتوته كده بس حلوة اوي والله
_هي حلوة عشان انتوا اللي حتحلوها بوجودكم
_ربنا يخليك يارب يا دكتور
يدخل ضياء و يسلم عليه ازي حضرتك يا دكتور يوسف
احنا والله قلنا اول حد لازم نعزمه هو حضرتك طبعا حضرتك مش محتاج عزومه اصلا بس بردو قلنا نأكد على حضرتك اتفضل الدعوة ان شاءالله يوم الخميس بعد الجاي
_على خير ان شاء الله والف مبروك ياولاد
_الله يبارك فحضرتك يا دكتور
وعد : اوعى حضرتك متجيش حزعل جدا والله
يوسف : وانا مقدرش ازعل عرايسنا الحلوين الف مبروك يا ولاد
ضياء : الله يبارك في حضرتك يا دكتور
يوسف : طب اقعدوا شويه مستعجلين ليه
ضياء : معلش والله يا دكتور مرة تانيه ان شاء الله
حننتظر حضرتك
_ ان شاء الله حاجي
يأخذها من يدها ويخرجان وعيناه تتابعهما بشعور لا يعرف له تفسير
يجده كالعاده يدخل إليه و بدون مقدمات يسأله حتروح الخطوبه
مش عارف يا محي مش عارف
يقوم بتوصيلها إلى البيت تفتح الباب و الضحكات على وجوههم : حرام عليك يا ضياء الفستان جميل
ضياء : جميل فعينك يا جذمه عاوزة تلبيسيلي فستان احمر و تبقي شبه العفاريت
عفاريت : هههههههه
_مش كفابه مجننه أمي كمان عاوزه تجنني الناس
قبل ان ترد عليه ينقطع الحديث على لسانها بمجرد رؤيته امامها و هو يستمع لحوارهما أثناء دخولهما البيت عندهم
_أمير
أمير : اهلا بالعرسان اللي خطوبتهم كمان اسبوع وانا آخر من يعلم هو مش المفروض بردو من الأصول يابت عمي ان ابن عمك يكون اول واحد يعرف بمعاد خطوبتك واللا انا زيي زي اي حد بعرف وقت ما بتعزموا و السلام
انتهت الحلقه عاوزة اشوف تفاعل الله يخليكم
تفتكروا الخطوبه حتتعمل واللا لاء
يا ترى لو اتعملت يوسف حيحضر و اللا لاء
ويا ترى أمير حيسيبهم يفرحوا و اللا حيعمل حاجه
طب يا ترى يوسف فعلا حيسافر و بكده يكون دوره انتهى في الروايه بس هو لو سافر و دوره انتهى يبقى كان ايه لزومه وجوده اصلا من اول الروايه