رواية سينما 59 الفصل الخامس 5 بقلم بيتر ايفانجل
رواية سينما 59 الجزء الخامس
رواية سينما 59 البارت الخامس
رواية سينما 59 الحلقة الخامسة
رياض كان سامعنى وماردش عليا ، رفع عينه ناحيتى ورجع تانى يبص فى الكتاب اللى بين ايديه ، فقولتله :-
– انا فعلاً محتاجك تساعدنى ، انا كل حياتى بتضيع منى وقتلت مراتى
قفل الكتاب اللي في ايده وقالي :
= وقتلتها ليه ؟
– عشان شوفتها بتخوني وماقدرتش اتمالك اعصابي وفقدت السيطرة على نفسي
= وأيه دخل ده بعالم الارواح ؟
– الموضوع محتاج شرح طويل لو تحب تسمعني ، واوعدك انك هتسمع قصة غريبة ومريبة تخص عالم الارواح.
= إحكي سامعك
حكيتله زي ماحكيت للظابط والنيابة والدكتور أيوب حكيت كل حاجه بادق التفاصيل اللي يمكن مقولتهاش لحد قبله كنت مركز إني مانساش أي حاجه وأقول كل حاجه زي ماهي ولاحظت عليه علامات وتعبيرات غريبة وكان بيكتب ورايا، مابقتش فاهم اذا كان هو مستغرب ولا مش مصدق ولاعارف وفاهم اللي بحكيه لحد ماوصلت للافعى اللي قتلتها برجلي وشافها الدكتور والممرضين والعساكر،
لاقيته رفع ايده إني أوقف كلام فسكت وإستنيته يعلق على اللي قولته ، فتح درج من جنب سريره وطلع كتاب تاني كبير وتقريبا مكتوب باللغة العبرية او لغة من اللغات القديمة ، وفضل يقرأ من الكتاب وسايبني لحد ما سألني وقالي :-
– انت اتجوزت يوم ٩/ ٥ / ٢٠١١ ؟
= مظبوط
– تاريخ ميلادك ايه ؟
= ٥ / ٩ / ١٩٨٤
– وعيد ميلاد مراتك ؟
= عيد ميلادها يو … ايه ده ؟ انا ازاي كنت ناسي ؟
– كنت ناسي ايه ؟
= الشيطانه اللي كانت بتكلمنا من خلال شاشة العرض قالتلي ان سمر اختارت يوم ٩ / ٥ / ٢٠١١ يكون يوم جوازنا عشان يتوافق مع عيد ميلاد حبيبها القديم, ونسيت ان هي اختارت اليوم ده عشان موافق ليوم عيد ميلادها هي !
سمر مواليد ٩ / ٥ / ١٩٨٧
– سمر عايشه ؛ مراتك لسه حية وانت مقتلتهاش
= انت بتقول ايه معقول ده ؟ انا كنت بعذبها وقتلتها بايدي وحرقت الغرفة بيها
– اللي هقولهولك ده ميتقالش لحد تاني غير سمر لما تلاقيها قربب
= اوعدك مش هقول لحد بس فهمني أرجوك يعني إيه سمر عايشه وازاي ؟
– الشيطان رقم 59 من العشيرة 11 هو المسؤول عن كل اللي بيحصل معاك
تاريخ ميلادك بيرمز لـ رقم 59 معكوس مع نفس تاريخ ميلاد سمر اللي بيرمز لـ 59 صريح واتعرفتم على بعض يوم 59 اللي هو 9 /5 واتجوزتم يوم 59 اللي هو برضو 9 /5 كلها كانت تاكيدات استدعاء للشيطان 59 و بـتوافق اليوم مع سنة 11 اللي هو رقم عشيرته حققتوا الاستدعاء الكامل
= شيطان ؟! في شيطان اسمه 59 احنا استدعيناه وكان سبب كل ده من غير مانقصد
– الأرقام جواها قوة روحيه مش كتير يعرفها ، في أرقام خير وأرقام شر وارقام نحس وارقام حظ أرقام شياطين وارقام ملايكه من 1لـ 9 كل رقم بيرمز لحاجه وبتكون الكارثة فى تركيبة الارقام مع بعض وتاكيدها وتكررها
= بس انا برضو مش فاهم ازاي تكون سمر عايشه وانا اللي قاتلها بايدي
– سمر ببساطه شافت نفس اللي انت شوفته بس هي اللي كانت بتعذبك وبتقتلك،
الساعة 11:59 انفصلتوا عن الواقع الحقيقي ودخلتم في عالم موازي اسمه البعد 59 بيتحكم فيه الشيطان صاحب نفس الرقم يعني انتوا كنتوا العرض نفسه والشاشه مجرد اداة مساعدة
= يعني سمر بالنسبالها انا اللي مقتول على ايديها طب هتقتلني ليه ؟
– قصة وهمية عاشتها تشبه اللي انت شوفته عنها ، سمر ماخانتكش اكيد وهي كمان شافت حاجه مشينه عنك عملتها في حقها لا تغتفر تستحق القتل ، يعني كنتوا سوا اه ، بس كل واحد فيكم عايش قصة منفصلة باحداث مختلفة
= الكلام ده معقول ؟ حقيقي اللي بتقوله ده يعني سمر عايشه وكمان ممكن تكون هربانة أو بيحصلها نفس اللي بيحصلي دلوقت
– الشيطان 59 سابلك رساله إنها عايشه وكان عارف انك مش هتفهمها
= رسالة إيه وسبهالي فين ؟
– الأفعي السودا اللي انت قتلتها
= مش فاهم وضحلى بسرعة اكتر من فضلك
– 59 كان عايز يقولك اللي بيموت بيظهرله جثة
لما قتلت الافعي اتشافت من الكل ، لكن عشان سمر عايشه ماحدش لاقى جثتها
= تفسير منطقي جدآ لو فعلا سمر عايشة هتكون أعظم عالم شوفته في حياتي وعمرى ماهنسا فضلك ده
– هتطلع عايشه انا واثق من كل كلمة قولتهالك
= طب هو كده فهيم صاحبي كان بيساعد الشيطان ؟
– اكيد الشيطان استغل الفرصة لغياب فهيم في اجازة وانه شخص ثقه ليك ودخلك من ناحيته واتجسد في شكله وهيئته عشان تحضر العرض ده برضا وقناعة منك ومنها
= طب وصاحبة سمر اللي بعتتلها الدعوة ؟
– سمر نفسها مشافتهاش حقيقي قبل كده يعني برضو كانت مجرد اداة تأهيل لليوم ده
= وليه سمر كانت ادمنت كل قصص واشكال الرعب بشكل مش طبيعي كده ؟
– تحضيرات من 59 ، هو كان بيجهزها ويجهزك للنتيجة دي ان ادمانها الشديد اللي بقى مبالغ فيه هيجركم ليوم العرض
= ايه كل ده ؟
– انت فاكر الشيطان بيخبطك مره واحده ؟ ده بيفضل يأهل فيك لخطته واحده واحده ويوصلك انك تنفذها بايدك ويخدرك عشان ماتتراجعش
= ياااه ، طب و59 ده اخلص منه ازاي ؟
– 59 عنيد ومحارب وصياد بارع ، وأغلب حالات الانتحار في العالم كانت بسببه بيوصلك انك تكفر بالدنيا وخالقها بنفس راضية ، للخلاص من عذاب الارض عشان تنتقل لجحيمه هو بسهوله ، الإنتحار بالنسباله أسرع وسيلة لحصاد أكبر عدد من البشر لكن أنت مش محتاج تخلص منه ،
= ازاي ويفضل ملازمني طول العمر لحد مانتحر
– هو مش غبي وذكائه غير عادي بمجرد مايعرف انك فهمت اللي حصل هينسحب عشان خططه ماتتحرقش، وانه يخسر معركة مع شخص واحد أفضل مايخسر حرب كاملة مع ملايين
= وهيعرف منين اني عرفت ؟
– اكيد هو عارف دلوقت وممكن يكون شايفنا حالاً ، ومش بعيد يبقى عايز يتخلص مني انا ، لما تلاقي سمر ، غير عنوان سكنك وطلقها في اي يوم مفيهوش ولا ٩ ولا ٥ ولا حتى ١١ واتجوزها بعدها بسبع شهور وعندك فرصة ذهبيه دلوقت ..
– فرصة ايه؟
= احنا في شهر 12 لو طلقتها دلوقت هتتجوزها تاني بعد 7 شهور ، في شهر 7 ويستحسن يكون يوم 7 تكرار الرقم سبعه لـ3 مرات جواه قوة مضادة للشيطان 59
– طب بس الاقي سمر إزاي وانا هعمل كل اللي تقوله بالحرف
= مش هعرف أفيدك لكن أن شاء الله هتظهر قريب وهتكون بخير ،
ويالا بقى قوم من وشي ورايا حاجات أهم من رغيك قوووم
مره واحده لاقيته زعقلي ووشه قلب عليا وحسيت أنه هيستخدم العنف ضدي قومت من جانبه بسرعة واتحركت ناحية سريرى وانا مستغرب ماله الراجل ده ماكان عاقل لسه ؟ مصيبة ليكون كل اللي قاله كلام جنان وانا اللي فاكره عاقل ورازين وعالم ، فضلت أراقب تصرفاته وحركاته لاقيته بيتصرف بنفس أسلوبه الطبيعي ، الهدوء والصمت والقرايه في كتاب ومش بيبص ناحية أي حد ومع نفسه ..
نمت اليوم ده وانا محتار ياترى كلامه صح ولا غلط وبقيت اتمنى تكون سمر عايشه ويطلع كل ده مجرد عالم شيطاني دخلنا فيه مخادع للحقيقه ،
صحيت تاني يوم على صوت هرجله وناس صوتها عالي ورجالة اسعاف وشرطة في المستشفى ، قومت جريت ناحية الباب الحديد بتاع العنبر وسألت ممرض عن اللي بيحصل بره ، رد وقالي إن الاستاذ رياض مات لكن مايعرفوش لسه اذا كان إنتحار او جريمة قتل ، بصيت ناحية سرير رياض ملاقتهوش عليه ،
وسألت الممرض تاني هو مات ازاي وإمتى؟ ده كان لسه هنا ! ،
لكن الممرض تجاهلني وسابني ومشي ، الدنيا بقت تلف بيا وأعصابي كانت مشدودة ومش قادر اقف على رجلي إتحركت ناحية سريري بالعافيه وانا بنهج ، وعمال اقول ازاي ده حصل ؟
يعني ايه مات ؟ معقول انتحر ؟
اكيد ده بسبب كلامه معايا امبارح ، بس ليه ينتحر ؟ ولو مقتول مين هيكون قتله ؟
٥ ساعات مروا عليا وانا فى قمة التوتر والضغط العصبي ، لحد المستشفى ما هديت ومبقاش في حركه كتير وجالي ممرض يستدعيني للدكتور أيوب كنت ماصدقت إني هلاقي حد أكلمه واقدر اسأله عن اللي بيحصل قومت واتحركت بخطوات سريعه ورا الممرض لحد ماوصلت مكتب الدكتور ايوب ودخلت باندافع وانا بسأله
رياض مات ازاي يادكتور ؟
– انتحر ياحليم
= يعني ايه انتحر ؟ اكيد حد قتله ، ده كان لسه بيتكلم معايا طبيعي امبارح ماكنش في اي حاجه تدل انه هينتحر
– قطع شرايين أيده بموس حلاقه ، معرفش وصله ازاي برغم اننا هنا مانعين اي أدوات حادة منها الأمواس
والحلاقه عندنا بمكن بلاستيك إستخدام مره واحده وبنفتش يومياً كل الغرف والعنابر بس مع ذلك قدر ينتحر !
= انا مش مصدق انه ينتحر في حاجه غلط !
– اكيد في حاجه غلط ، لكن مش ده الموضوع اللي طالبك عشانه ياحليم انا طالبك عشان أقولك مبروك ..
= مبروك على ايه ؟
– مراتك سمر عايشه ؛
= بتتكلم بجد يادكتور والله سمر عايشه معقول سمر عايشه ؟
– لاقوها في حالة صعبه ، نايمه تحت كوبري مشاه وكانت خايفه وزي ماتكون هربانه ومش بوعي كامل وجمعية خاصه بالمشردين اخدتها ،
وبلغت الشرطه عنها لزوم الإجراءات القانونية والشرطة اتعرفت عليها انها سمر اللي المفروض قتيله واتسلمت لأهلها …
= سمر عايشه وانا مش قاتل ؟ انا مش عارف اقول ايه انا قلبي هيقف من الفرحه
– ماتقولش حاجه ربنا بيحبك ونجاك ونجاها ، انا جهزتلك تقرير خروج انك بكامل قواك العقليه والنفسيه وهترجع مع الشرطه وتخرج من النيابة لعدم وجود جريمة تعاقب عليها ..
.
= انا عايز ابوسك يادكتور عايز احضنك وابوسك
– هاهاهاها مبروك ياحليم
وخرجت من المستشفى للنيابه وهناك اخلوا سبيلي لعدم وجود تهمة وعدم وقوع اي جريمة مني ، وجريت على بيت أهل سمر ، كنت ماشي في الشارع عايز احضن كل الناس وبضحك زي المجنون والفرحه مش سيعاني سمر عايشه والكابوس انتهى؟!
لحد ماوصلت لبيت أهلها وبقيت أحضن وابوس فيهم ودخلت على اوضة سمر جري ،
لما شوفتها قاعده ع السرير دموعي نزلت من الفرح
وهي كمان بقت تعيط قامت وواقفت قدامي وفضلنا واقفين قدام بعض دموعنا نازله من غير كلام لحد مادخلت جوه حضني وحضنتها بكل قوتي وكلي اشتياق وفرح بيها
وقالتلي انت لسه عايش ياحليم ؟ انا مش مجرمه ؟
– شششش انسي خلاص كله انتهى واحنا بخير
= ايوه بس ازاي انت عايش ؟
– حكاية طويله هقولك عليها بعدين ، بس من النهاردة مافيش افلام رعب تاني ولا في رعب خالص عشان انا اتهريت ، وحلو اوي كده ،
= لا خلاص هتفرج على انمي بس
– ايوه ياسمر خلاص كفايه رعب ، بس في حاجه بالمناسبة السعيده دي لازم اعملها عشان نبدأ حياتنا بشكل جديد
= حاجة ايه ؟
– انتي طالق
= نعم ؟ بتقول ايه ؟
– طلقتك عادي يعني، هبقى افهمك بس نروح للمأذون نعمل إجراءات الطلاق وهحكيلك كل حاجه، يالا البسي ..
= انت طبيعي ؟ انت بتتكلم جد ؟
– ده انا جد الجد اوي يالا ياسمر هفهمك كل حاجه والله !
خرجنا سوا وفهمت سمر كل حاجه في الطريق واقتنعت واتطلقنا فعلاً ، وفضلنا ٧ شهور بنحب في بعض زي المخطوبين ، وغيرت مكان السكن ورجعنا اتجوزنا تاني يوم 7/7 ومن وقتها وهي مابتشوفش أي افلام او أي حاجه رعب وبقيت ديما أفتش وراها لحسن ترجع في الاتفاق من ورايا
وبعد سنه ..
جه فهيم في يوم وقالي :
– عيد جواز مين اللي قرب ؟
= مين ؟
– مين ؟ انت وسمر عيد جوازكم بعد يومين انت نسيت ؟
= اه صح ، انا فعلاً عايز اعملها مفاجأة تسعدها وتفرحها
– عندي الطلعه دي يامعلم ، معايا ليكم دعوتين مسرح ؛
= مسرح ايه يافهيم ؟
– مسرح ايه ازاي ! ماتعرفش المسرح ؟ بص هو غريب شويه وفي تعليمات لازم تنفذها قب……
= انت اكيد في أجازه دلوقت صح ؟ انت مش حقيقي ..
– إجازة ايه ياابني افهم هقولك التعليمات
حليم ..
حليم ..
هو جري ليه المجنون ده ؟..
انتهت
الى اللقاء في الجزء التاني (بعلزبول – سينما 59 الجزء الثاني )
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية سينما 59)
