رواية خطة محكمة الفصل الأول 1 بقلم فيروز عادل

رواية خطة محكمة الجزء الأول

رواية خطة محكمة البارت الأول

رواية خطة محكمة الحلقة الأولى

هو ايه اللي اتجوز مكانك!
انتي مريضة ولا ايه؟
مسكت ايدي وهي بتشدني من جمب الباب:انتي صوتك عالي ليه ياللي منك لله.
سابتني وراحت ناحية الباب علشان تقفله كويس وانا لسه واقفة مش قادرة استوعب الجملة اللي قالتها.
-صوتي عالي؟ يعني ايه صوتي عالي؟
قربت منها وانا بحط ايدي على راسها بقلق:بت ياخديجة انتي سخنة؟
نزلت ايدي بعد ما لقيت ان حرارتها مش عالية وانا لسه بتكلم:لا مش سخنة، طب مين شربك حاجة كده ولا كده يخربيتك.
-خلصتي ولا لسه؟
-انتي مبتهزريش ولا ايه؟
-انتي مأفورة الموضوع ليه مبقولكيش اتجوزي مكاني بقولك هتقضي اليوم مكاني بس وبعدين دي خطوبة يازينة مش فرح.
-تصدقي صح انا اوفر.. لو خطوبة مش فرح يبقى ماشي اقعد مكانك اهي كلها ساعتين والليلة تخلص.
-بتتريقي؟
بصتلها بانفعال:انتي مجنونة يابت اقضي اليوم مكانك ازاي؟
-يازينة والله ماهينفع انا مش هتجوز الا محمد وانتي عارفة ابوكي وابويا مش هيجوا الا كده.
-لا ياقلب زينة انتي اللي شكلك مش عارفة ابويا وابوكي، دول يجوزوني فيها عادي علشان شكلهم قدام الناس ميحصلوش حاجة وبرضو مش هيجوزوكي محمد بتاعك ده.
قعدت على السرير وراها والدموع بتتجمع في عينيها:طب اعمل ايه دلوقتي طيب، بيشتروا ويبيعوا فينا لاجل مصلحتهم وبس، ده حتى العريس شكله هو كمان مش عايز وبيعمل كده بسبب ابوه،
اصل يعني ايه يوافق على جوازة من غير حتى ما يشوف العروسة او يقعد ولو لمرة واحدة معاها!
روحت قعدت قدامها مسكت ايديها وانا بتنهد، في الحقيقة معرفش انا كمان المفروض نعمل ايه دلوقتي وايه الصح من الغلط،
بس الأكيد واللي انا واثقة منه ان اللي بيحصل ده مش الصح ابداً.
لحد ما بعد دقايق قومت وقفت وانا بمسح دموعها ولقيتني بقولها:قومي يا خديجة… الليلة دي مش هتتم حتى لو على جثتي، انا هعرف اخلي عمي وعمك دول يتهدوا كويس.
قامت وقفت قدامي وهي مش فاهمة حاجة:هنعمل ايه؟
اتكلمت وانا بجيب شنطتها حطيت فيها اي حاجة قدامي جت في عيني ممكن تحتاجها.. حطيتها في ايديها وشدتها معايا للبلكونة:مش هتعملي حاجة هتنزلي من البلكونة وبس… انا اللي هعمل.