رواية بيوت الصفيح الفصل الثاني عشر 12 بقلم زهراء السراي
رواية بيوت الصفيح الجزء الثاني عشر
رواية بيوت الصفيح البارت الثاني عشر
رواية بيوت الصفيح الحلقة الثانية عشر
معاذ الله أني مايأست
ولكنها والله أيام ثقال
.
.
صِبى
_____________________
“الفقد ياخذ منا هواي مو بس الناس اللي نحبهم
الفقد مو بس يغيب وجه
يزرع وجع ما يروح
وخوف ما ينطفي
گاعدة عالكرسي وعيني
من علاماتها الحيوية النبض مرتفع
والتنفس عالي الضغط السكر
كل شي جان مخربط والأطباء يحاولون
أن يعدلو حتى تصحى غيبوبة سكر مفاجئة
وأرتفاع بالضغط مصاحب لجلطة دماغية
مُنى اللي مافارگت السرير طول الليل
وغِنى اللي صرختها شگت گلبي
عيونها تدور الدموع بيها وتوگع وتمسحها
بهدوء
فزيت راكضة للغرفة غِنى و مُنى حاضنات خالتي
اللي الرغوة تنزل من حلگها وعيونها مگلوبة
مااتذكر شلون طلعت راكضة للشارع
بعباية الصلاة اوگف تكسي رجعت
لبست عباية أسلامية
على ملابسي ورفعنا خالتي ثلاثتنا
للسيارة وقفلنا البيت أسرع بينا
السايق وأستلموها الاطباء من عدنا
وبعد الاجراءات والعلاج أستقرو
عالتشخيص غيبوبة سكر وجلطة
نايمة أحنا حواليها عمري ماشفت غِنى
متأثرة هيج تفتر حوالين السرير بخوف
وكل شوية عينها الباكية ترتفع للأجهزة
بعدلها يومين لأمتحانها وصار اللي صار
تلفونها بيدها بعد
ماعده اربع ساعات على خالتي بالمستشفى
اتصل بيها أيمن وأنهارت بالبچي گدامه
وأسمعها تنطي العنوان بالتلفون وغلقته
ماطول ساعتين وصار يمنا دخل بعد
ماسلم وبدأ يفتر يشوف شنو وضعها
رجع يحاجيني
-شوفي خويه عناية مركزة ممنوع تبقون
وياها
-شلون نتركها
-أخاف عليهم والله
-آني أمر اطمأن عليهم شگلتي
نطت غِنى
-ماارجع باقية هنا مااروح
باوعلهة صفح
-أمشي عمو مُنى ويانه يلا
وأن شاء الله الحجية تگوم بالسلامة
شوفي خويه ارجع البنات للبيت وراجعلج تمام
-لتتعب نفسك والله ماعندي شي
طلعو وهو اخذ غِنى غصباً عنها
بعد مرور ساعتين بحدود الساعة ١١ بالليل
أجاني ممخلي شي مجايبه
-هاي شغلات بسيطة خاف تجوعين
ومي هذا اكو براد يم غرفة الممرضات خلي
يمهن والرقم يمج لا تتردين بالاتصال فهمتيني
-متقصر أبو حمادة
-أهل أحنه البنات بالحفظ والصون ليظل بالج
طلع تاركني لأن ممنوع الحديث
وامتد بيه السهر للفجر غفيت شويه
الساعة بحدود السبعة ونص أجاني
أتصال
-الووو صباح الخير
-صباح الخير أستاذ
-شلونج صِبى عذريني عالاتصال المبكر
بس محتاجج من وقت وصيت السايق يوصلج
قبلي الشغل هوووايه وعدنا طلعة للمحكمة
-خالتي ضربتها جلطة أستاذ وحالياً
بالعناية المركزة كلش تعبان وضعها
-لا صدگ وينج انتِ هسه
-يمها أستاذ بالمستشفى
-ليييييش مااتصلتي بية صِبى
-متقصر والله بس انت هم عندك مسؤوليات
جايج فد شوية بس گولي وين
-مستشفى ال……
-تمام انتظريني
ردت أسدة اجاني صوته
-اوگفي صِبى محتاجة شي
-سلامتك أستاذ
-صباح النور أستاذ جلطة وأرتفاع سكر مسبب غيبوبة
كل وضعها مخربط
-تردين ننقلها لمستشفى أهلية
-لا أستاذ والله ماقصرو هنا كل شي منظمي
بس منتظريها تصحى من غيبوبة السكر
-أعذريني صِبى آني والله على عيني چان بقيت وياج
بس اليوم قضية هذا الشاب المعاق وتعرفين
وضع عائلته بغيابه
-توكل أستاذ ويارب القضية رابحة
-دعواتج صِبى وشوكت مااحتاجيتي شي أتصلي
اني هم أمرلج بس اكمل شغلي تمام
سلم عليه وطلع مسرع بسبب الازدحامات يادوب يلحگ يوصل المحكمة
أمتدت الساعات كل شويه اتصل بالبنات
غِنى قلقة و مُنى بكل اتصال تبجي
للظهر جابهن أيمن بقت مُنى حاضنة
خالتي ونايمة بجانبها
للعصر الحمد لله فاقت بس چان
لسانهة ثگيل ومتركز بس اطمأنن عليها البنات رجعهن أيمن للبيت لليل صحت بشكل
كامل عيونها مفتوحة بتركيز گعدت يمهة حضنتها
-شنووو خالة جاي تجربين معزتج بگلبنا
گوة طلعت الكلمة من حلگها
-البنات وينهن
-بالبيت خالة
رجعت سكتت تتنفس بعمق مرن
يومين الحمد لله تحسنت وحجت ووكلناها
أكلات خفيفة اليوم الثالث سمحولنا نطلع
طول هالأيام أستاذ أسد يجي ساعة يطمأن
علينة ويروح أما أيمن فهذا الأخ اللي چان يكون
علي فررقد لو باقي عايش
بيدة اجه طلعنا وصلنا البيت اول مادخلنا مُنى تطش جُكليت على خالة غِنى فرحانة بيها
ممتحنة چانت أول أمتحان ماخذها أيمن ومرجعها
بعد ماسلم أيمن راح وأحنه حاوطنا خالتي
مُنى متمددة بحظنهل و غِنى مخلية كتابهة وتقرأ يمها
وكل شوية مسويتلها شي يضحكها سويت عشا
نتعشى و غِنى مخلية الشوربة توكلها وتضحك بيها
-مرت أبي الدنغوزة قررت بس تصيرين زينة
نروح نزور كربلاء حتى أكسب أجر بزيارة ثعبانة
تخيلي آني أول وحدة تاخذ وياها حية رگطة للزيارة
ضحكت خالتي وفتحت حلگها تاكل
مُنى تشربها مي وآني أدلك رجليها وأكتافها
خلصت وأرتاحت بعد ماانطيتها العلاج
ثاني يوم راحت غِنى أمتحنت وگعدت
آني يمها باوعتلي وأشرت بيدها
-ها خالة
جانت تحجي على كيفها بسبب التعب
-باوعي يمه ذني أخواتج صغار ومايعرفن من الدنيا
شي مُنى طايرة لسان وضحوكية يجوز الناس تفهمها غلط عينج منها
غِنى ااااااخ يا غِنى هاي أم گلب محد يعرفها مثلي
چانت صغيرة تتعارك وياي
وبالليل تنهزم من الغرفة يمي آني و مُنى
وتلزم طرف ثوبي يلة تنام بالج عليها گلبها
رهيف وماتتحمل
-حبيبتي ليش توصيني بوجودج راح يكبرن ويقون ويصيرن أصلا راح تشوفين أحفادج
-الدنيا أمر وقدر أنت سبعة وهذا الوليد أيمن أبن
أوادم راح يصيرلجن سند والأيام راح تثبتلجن
تمسكي بأستاذ أسد اشتغلي ويا لا ترحين لغير مكان
الدنيا مرات تطلب منه نطاطي ونتواضع ميخالف
الدنيا أخذ وعطى خلي كلامج للمعارك التسوى
فهمتيني
صباوي الراح راح مو بس رضا زلمة بهالدنيا
باوعي حواليج زين اكو هووواي أمور تستحق
التجربة رضا أعتبري تجربة وعدت
هو لو بي خير ماطلگ غيابي جان واجه
-تدرين خالة هسه عرفت ابوي موقع الأوراق بدالي
-تطلع من عويمر الله يطيح حظه ويكفي على خشمه بجهنم
بس يمه هو هم مابي خير
لو زلمة صدگ جان واجه وفهمج بالموضوع اني من البداية گتلج يمة صِبى خل يولي هذا قِصٌصٌ مَآيِّ هِوِبَِّس فگر بس راح يشوف راح يتسودن گلتي لا خالة رضا يشبه عيشتي وماراح يقصر
-وقصر خالة طلع كلامج صح وعندج نظرة بعيدة
للأمور
-بعدج باول العشرينات واني مأمنة رب العالمين
ضاملج الزين بأيامج الجاية عيشي صباوي
وفرحي الدنيا بيها اليستاهل الفرح
انكفيت على كفها أبوسه وبقت تسولف
سوالف قديمة ومُنى گعدت من النوم ويانه
بين مااجت غِنى غدتها وتسولف وياها
تركتهن وطلعت اشتغل والعصرية طلعناها
للحديقة گعدناها بالكرسي مُنى مگابلتها
وگاعدة
-أگلج يمة خل نطلعج شبيج
-مااگدر يمة تعبانة
-نفرفرج بالكرسي حبابة
-اخذني للكاظم اذا تگدرن شو مشتاقة للزيارة
گالتلها غِنى
-ها الثعبانة تردين ترحين تدعين علينا
أبتسمت وگالتلها
-أروح أدعيلجن بالصبر
وكفت غِنى
-اييييه محتاجين هيج دعوة
شتگولن نسوي الزيارة ليلية
-يلا
جاوبتها واني ادفع خالتي للبيت
جهزتها ورة صلاة المغرب وطلعنا اخذنا
تكسي بين تفتيش وطبة وطلعة دخلنا
غِنى افترت بخالتي زورتها وگعدنا بالحرم
بهدوء خالتي ساندة راس مُنى على كتفها وتحجي
ويا الأمام وتهمس
ساعتين من الهدوء والراحة النفسية طلعنا
راجعين للبيت ألتمينا يمها بالغرفة تسولف عركاتها ويا غِنى وتضحك
-اييييه ولچن ومرة وگفتلي بالباب بيدها طابوگة
تگلي انتِ أخذتي ابويه من عدنا
عود أبوها السلطان قابوس
-ايييع مدري شچنت أحس
-صغيرونة ماتفهمين چنتي
سألتها آني مستفسرة
-خالة أبد ماحاجيتلنا على زواجج الأول
تنفست براحة وگعدت تحجي
-چنت مثلج هيج شعري طويل يلامس ركبة رجلي
وخمرية شحلاتني رغم فقر الحال أمي الله يرحمها
مدللتنا اني وامكم تزوجت امج واني وراها بسنة
بمرة رايحة للسوگ وجان الحجاب مو هواي
ضفيرتي على ظهري ومثل غنيوة لساني يلوط أذاني
مااسكت عن حقي تسوگنا ورحنا لأبو الجملة
نشتري دهن خشاب وزن أباوع للعامل دگ الميزان
ورجع اخذ من الدهن كمشه رجعها للتنكة باوعتله ايده
مثگلة الميزان صحت بي
-اليغش الميزان مصيرة جهنم
التفت صاحب المحل باوعلي
-منو غاشج يابه
-ابنك هز ايده
-ياابني هذا العامل وعمالي أمينين
الدهن بالجيس بيد امي
باوعتله جريته وصحتله
-اوزن وبعدين دافع عالباطل
وزن وشاف النقص المهم اعتذر
ومرة على مرة كتل روحة عليه وتزوجنا
جان طاير بيه بس من عبرنا السنة بدت مشاكل اهله
معيار وحجي لأن الصوج مني آني لا أگلج ولا تگليلي
ثلث سنوات كظيتهن عرك شو هو هم فجأة تغير
ولزمني الباب طلعن امه وخواته مرتباتله زواجة
جديدة من سمعت هيج دست على گلبي بأعتگ
قندرة برجلي وتطلگت ومرت السنين
شي تجر شي لحد ما ماتت المرحومة امي گالتلي
اختج ماتت وبنيتها فرخة نفاس كعدي عالجهال يمه
حتى لو ردتي تعرسين هم مابيج ضنى وصدگ
وافقت من سود الله وجهي
لزمت وجه مُنى باسته
-بس طلعت من هالزواجة المصخمة بعايله
وربيت مناوي والله احسها طالعة من بطني
ضحكت غِنى وتتشاقه وياها
-من اگللكم مرت ابوكم حية ماتصدگون
شوفو ماتحب بس مُنى
ضحكت وغمت غِنى
-ولچن شفت المرار وية عامر سنين
آني ألم بخيسته ورا أكو سوالف
ماتنحجي ولا تتسولف ماچنت اخليچن تحسن
احلها واصم حلگي وأسكت أخاف عليجن من هيج
شغلات اگول بنات ماافتح عينهن
فتحتلها غِنى عينها حيل وضحكت
-خالة ترى مفتحين باللبن سولفيلنا
أشرت خالتي على غِنى وضحكت
-شوفن هاي فويسدة بيها ساس عامر الخايس
-خلف الله عليج
-كافي ونين وسمعن صِبى تتذكر أم باسل
-اي اي خالة أتذكرها هاي المدلعة الدائما
شعرهة أصفر
-اييييي هي هاي چانت مرافگة أبوجن
-وانتِ تدرين
-اي أدري وشگيت راس عامر تتذكرن من گال
ضربوني حرامية واني ماشي بالليل
فزت غِنى
-اي اتذكر اني
-بيومهة اني تصديتله من وره الحايط وشمرت علي ثليثية شگت راسه
-ليش
– ولجن انتن بالمدرسة واني طلعت احف للنسوان
رجعت لگيته جايبها للبيت وعلى جربايتي
شهگت اني وهي كملت
-واني ماسكتت توليتهم بعودة مال سعف اصيح
علي ولك بناتك بالمدرسة لو راجعات وشايفاتك ويا هاي البربوگ
-وشصار
-گام ياخذها وفلاح النذل يدبرلهم مكان لحد مامرة
دزلياها حامل
ضربت على صدري وهي ضحكت
-شفتن ولچن چانت على ذمة رجال بس سافلة
-وتالي
-وتالي هي تلطم وتصيح بس يدري رجلي يكتلكم ورجلها شرطي عاد أبوج خيرني يااشوفلي قابلة تسقطها يا يطلگني
وهو لزمني من ايدي التوجعني لأن ماعندي مكان اروحله وأمي ماتت
-وسويتي اليريده
-اي بيعني گلادتي الجبتها وياي مال زواجي الاول
وسقطناها الله لا يوفقه ركبني الحرام بسبب نجاسته
واستمر حديثنا للساعة ١١ شفتها تعبت
توزعنا كل وحدة لمكانها مُنى حاظنتها
غِنى صعدت تقرأ واني رحت اخذلي غفوة حسيت أن
كل شي صار تمام الحمد لله
لكن ماچنت أعتقد الدنيا بعدها
ضامتلي بخبايا أيامها وجع جديد
.
مُنى
_________________________
تجي بالعمر لحظات تمر بينا بوجع
وخوف تكون ثقيلة بثقل غيمة
محملة مطر منتظرة تنزل قطراتها حتى
تخف
هيچ چان شعوري وآني أنتظر خالتي
تتحسن وتطلع من المستشفى كل ليلة
أتصل بصِبى أربع مرات خمسة حتى
أتأكد منها مابيها شي وماأطمأن ولا أنام
الا أشوف صورة الها تدزها من المستشفى يلا
أرتاح
بيوم اللي گالو راح يطلعوها لبست الشحاطة
وطگيت الشال والعباية مال غِنى تسحل ورايه
وطلعت للأسواق بنهاية الشارع اجيب جُكليت
غِنى بعدها بالدوام و صِبى يمها بالمستشفى
مشيت مسرعة وبالشارع أطفال اثنين يلعبون
طوبة واني ماشية شمروها ناحيتي باوعتلهم
لعبتلهم حواجبي
-تلعبون
-نلعب
-من شنو
سألني الجبير بيهم
-من حاجة مثلا أذا سجلت عليكم هدف
تشترولي
مد الجبير بيهم ايده بجيبه وطلع خمسة
-مووووافق
وگفو عالگول واني مسنترة الطوبة
حركت رجلي بسرعة وصدوها وگامو يضحكون
ابتسمتلهم
-يلة اشتريلنا
-تعالو وياي للأسواق
مشو ويايا للأسواق افترو بس يستحون
اشتريتلهم وطلعو راكضين بقيت ادور جُكليت
زين اباوع عالرفوف العالية ولگطت النوع اللي أريده
أمتدت أيد قبلي نزلت العلبة
التفتت فتحت عيني علي
حجة بدون ميباوع
-شعندج طالعة بوحدج لج
عدلت وگفتي وباوعتله
-أولا مااسمي لج أسمي مُنى
-اي تشرفنا عوووود اسمج شكبره اللي يسمعة يگول
هاي مدرسة متقاعدة مو زعطوطة
-على حوووور أسمك
رفعلي حاجبة بمعنى شنو
-عموووووو حمزة
-أمشي اشتري ورجعي للبيت لج
-أهلي يدروووون
-ديلا يلا حبابة اخذي التردي وروووووحي
گالهة بنفاذ صبر
سحبت العلبة من ايده ومشيت بالممرات وين اوگف اباوع تمتد ايده تاخذ اللي أريده ويمشي تاركني
رحت للكاشير أحاسب عالجُكليت وكم حاجة اخذتهن
اندفعت الأغراض گدامي يحجي ويا الكاشير وهو مكشر ماعاجبه شي
-أحسب الجُكليت وياهن
سحبت العلبة وخليت العشرة عالميز
-الجُكليت احسبة وحد
ولا اهتم هو سحب العشرة من يمي لزمها شگگها سواها فتافيت تحت صدمتي
وخلاها بجيبه وكمل الحساب طلعت تاركة العلبة
ورايه ومشيت ثواني وأرتفع صوته
-اذا ما وگفتي أقسم بالله أسحلج گدام الناس
التفتت خازرته
-اول شي عينج الوكحة هايه نزليها لا أفگسها
-لا لا لا أنت تجاوزت حدوووودك هووووايه
-صوتج زعطوطة
-احتررررم …………
-اذا كملتي الجملة راح يطيح حظج
-آني أساساً طايحة حظ وبقررررة لأن اوگف كل مرة واباوع بوجهك الكئيب واسمعلك
مارد علية بقى ساكت وأني صافنة منتظرة ردة حتى أتعارك
-شتريد بقرة لافاش كيري صافنة بوجهي
قصفني واني ممنتبهة دگيت الگاع برجلي
ومشيت نص الشارع وتوقفت سيارته
-تعاي صعدي نوصلج
ماباوعتلة أصلا
أجاني صوت قمر تسوي صوت البقرة
-موووووو
التفتت ضاحكة ووگفت
-ياطايحة الحظ هاي عليمن
-صعدي ولج اني جاية اشوفج بسرعة وأروح
صعدت وايديها امتدت احتضنت ايدي
وگفنا بالباب وهي نزلت ويايه وهو بالسيارة
-تعاي دخلي شبيييج
-والله اجيت فرحانة لأن گلتي امج راح تطلع من المستشفى وجبت خالو سحل حتى گعدته من النوم
تقربت منها اهمس
-وخالج ماعندة شغل وعمل
-مهندس شغله عالطلب عيوووني
-مهندس ميهندس وجهه الكئيب
-لج هالجمال كلة ومعاجبج
-عفية منين مخلوووق شگد غثيث
-لااااا عفيه والله كيووووت
-كيوووت وحمزة ميرهمن يرادله تنكر سڤن يلة ينبلع
ضحكت مكممة حلگها
نزل طبگ الباب حيل
-راح تبقن بالشارع تكهكهن يلة لچ مو شفتيها امشي
اوديج لأمج خبصتني بالتلفون
ابتسمت قمر بأحراج فرغم علاقتنا القوية لازالت ماحاجيتلي سر عيشتها يم بيت جدها وبعدها عن أمها
-جاية خالو بس شووووويه حباب
مارد عليها فتح باب السيارة وطلع العلاگة شكبرها
تقدم واختفت عقدة حواجبه مدلي العلاگة
بأدب
-الحمد لله على سلامة والدتج
شو خجلت من هدوءه
-الله يسلمك عمووو
-بعرررتها
گال الكلمة ومشى للسيارة
ضحكت قمر وحضنتني
-والله تاخذيلي بثاري من تگليله عمو يبقى
نهار كامل متنرفز
-حلفي
-وروح بابا يبقى مشتعل نااااار
-يبقى ينطح
-لج لا يسمعج يجي ينظف بيج رصيف الشارع
-قمرررررررر
سلمت عليه وراحت للسيارة راكضة وهو ياشرلي بيده
عود دخلي
دخلت وحركت سيارتهم ضحكت علي
عرفت منين يتنرفز فتحت العلاگة مليانة
حلويات وعصاير وسوالف بنات هذا هم
يفهم وعندة ذوق گعدت انحبش واكل
و منتظرة رجعة امي وأخيراً
نوووور البيت بوجودها يومين طايرين بيها
زورناها وتونسنا باللمة والسوالف
جمعتنا بليلتها تحجيلنا شغلات عمرنا مسامعيها
ب١١ صِبى گالت خليها ترتاح
راحت لغرفتها و غِنى صعدت اشرتلي بيدها تمددت
بحظنها باوعتلي
-شهالحسن يمه
-اني حلوة بعيونج انتِ
-لا أنتِ حلوة الحلوات مناوي اسولف وياج
-گليلي يوم
-تعرفين البنية من تكبر زينتها حجابها
واني أشوفج مرات تشمرين حجابج شمر
-مرات اختنگ منه والله
-تدرين الاهل يتحاسبون على ستر بناتهم
-اي خلي ابوووي يتچوة شويه بجهنم
-لا ولچ اني أمج أتحاسب عليج
حظنتها
-والله بعد التزم بي
-مناوي يمه الدنيا هاي مو مال عنتكة مو كل
الأمور تنأخذ بدفع صدر لازم تفكرين بالكلمة
قبل لا ترديها وتخلين اعتبار للبشر الگدامج اذا
چبير ولا تضحكين وين ماكان بعض الناس ماتفهم
طبعج البشوش عبالهم هاي خفة ويطعنونج بظهرج بكلامهم
البنية صاحبتج هاي قمر لا تصاحبين غيرها هاي
روحها مثل روحج ومؤدبة
اخواتج سمعي كلامهن هنة الكبار ويعرفن مصلحتج
باست جبيني ومسحت على رموشي
وانطلقت بكلام ومشاعر اول مرة
تحجيهن بصوت عالي
-تدرين يمة مناوي من ماتت أمج بيبيتج
جابتچ اليه بالبيت أول أسبوع جنت من گد شوگي أن أگون أم رغم ادري صدري مابي حليب اخليج على صدري وسرح بيه فكري وأتخيل آني الولدتج رغم حزني على أختي الوحيدة
لكن فرحت بيج بالبداية گالولي حتى لو ربيتيها
ماراح تجازيج مادامها مو من صلبج بس مااهتميت
چنت اريد أكون الحضن اللي لمچ والصدر اللي رضعچ حنية رغم جفافة والچفوف اللي نشفت دمعج
كل شي سويته إلج جنت أحسه حلم جنت أتمناه
أول مرة مشيتي أول مرة گلتي يمه بكل خطوة جنت أبجي
مو من الوجع من الفرح اللي حسيته
من كبرتي وفهمتي جنتي تسأليني
يمة اني بالصدگ بنت اختج
رديت عليها واني أبجي واحضنها
-اييييي وجنتي تگليلي لا انتِ بنت روحي
انتِ جابج رب العالمين الية هدية حتى من افارگ
هالدنيا اروح مطمأنة أني عشت أحساس الأم وربيت وتعبت
بجيت واني أبوس كفوفها
-ماقصرتي يمه والله مالحظة حسيت بفرق
دللتيني وربيتني وتعبتي ويايه وويا اخواني
مسحت على راسي وباسته
-أنت صح مو من بطني بس من دمي
من دمعتي من صلاتي كل ليلة واني ادعي
يارب لا تضيع حلمي واجيتي أنتِ حققتي هالحلم
ماجنتي بس بنت أختي ولا بنتي
لا انتِ امومتي الضايعة اللي لگيتها بعد حزن وكسرة گلب
حضتني لامتني بكفوفها واخذتني الغفوة
براحة بين اديها وكأني رجعت طفلة
غفيت لوقت طويل فزيت بي على
صوت شهگات غِنى المكتومة
معلنة حزن جديد
.
غِنى
________________________
يگولون أن تأتي متأخراً خيراً
من أن لا تأتي
بعد يومين من تحسن خالتي وزيارتنا
أستعديت للأمتحان الثالث بعد سوالف وضحك صعدت خليتها ترتاح خلصت قراءة أمتحاني بغرفتي
فوگ ونزلت بحدود الساعة ثنتين بالليل اطمأن
عليها باوعت مُنى حاضنتها وغاطة بالنوم
أشوفها هي گاعدة تسبح تمشيت يمها
-خالة محتاجة شي
-ايييي تعاي تعاي شربيني مي ونومي مناوي
عدل
سحبت مُنى اللي تصير جثة من تنام متحس بنفسها
خليتها على مخدتها وغطيتها
وتوجهت لخالتي شربتها مي
وگعدت عالكرسي گبالها
-ليش سهرانة
-عيني مااخذت نوم شو انتِ ليش گاعدة
-اني هم عندي أرق باجر ثالث أمتحان
ومااگدر أنام
اشرتلي اتقربلها تقربت صرت ملاصقة للجرباية
اشرتلي تشاورني تقربت باستني حيل
ضحكت وبستها
-ها مرت أبي الثعبانة اليوم حابتني
-كل يوم احبجن بناتي أنتن دخلت البيت وانتِ عمرج
سبع سنين قبل لا تموت أمج جنتي من تجين تلزگين بية وين مااروح بس من ماتت تغيرتي وصرت
هجومية ومتسمعين كلمتي ولا ترديني
صفنت بوجها أبرر تصرفاتي
-والله عبالي انتِ تردين تصيرين بمكان أمي
وجنت أغار
ابتسمت وطبطبت على ايدي
-أدري بيج تغارين من مُنى تدرين مرة
لگيتج راضعة ممتها وماعدنا حليب وخليتيني
افر بأذني
-وكتلتيني يادنغوزة
ضحكت
-ولج ابوج مرمرني يخلي الطفلة شابعة جوع
والكم فلس الاطلعهن واليجيبهن فرقد وهو طفل
سودة عليه
يكتلنا ويروح يشرب بيهن والله عشت ويا سنين
سودة كظيتها تعب بتعب
تنفست قهر عليها وعلينا
-خالة أنت مسامحة أبوية
-لا والله ماباريته الذمة منا ليوم الدين
باوعتلي وسألتني وعيونها افترت بيهة الدموع
-واني مسامحتني غنوة
تقربت يمهة اشاورها واشاكسها
-لا ما مسامحتج
وگعت دموعها ومسحتهن الها
ضحكت واني الزم كفوفها وانطلق احجيلهت
كل شي يدور ببالي بخجل
-ليش بيش قصرتي حتى مااسامحج
جنت شاهدة على تعبج وعذابج جنت طفلة ومراهقة
اشاكس واخبث بس احبج عمرج ماقصرتي اباوعلج من جنتي تسوين الاكل توكلينا وتظلين جوعانة
لو من ترحين تغيبين بالساعات واني اتابعج ادري
بيج حتى تنظيف وخدمة خدمتي الناس حتى توكلينا
بينما ابونا غايب بمزاجه
جنت من اخاف بالليل اركض أنام بحافة الجرباية
امد ايدي الزم ثوبج يلة انام
خالة لا عبالج انت قليلة بعيني جبيرة انتِ هواي
جبيرة لكن وضعنا خلاني جامدة ولازلت مااعرف
اگول شكرا ولا اعبر عن مشاعري بس يشهد
الله وروح فرقد
ماجنت أعرف وعرفت من كبرت نظراتج اللي بيها خوف حرص
سؤالج أكلتي ليش ساكتة ليش ماتقرين ليش نايمة
كل شي جنت أفسره تحكم اكتشفت بعدين هاي حنية
جنتي تعتقدين انج مااخذتي مكان أمي
بس بالحقيقة قبل لا تكونين زوجة أب صرتي أمنا الثانية
بدون ماندري
تسأليني مسامحتج خالة
انتِ سامحيني لأن كلشي فهمته متأخر
سامحيني لأني شفتج مرة أب ونسيت إنج خالتي
الأم الثانية اللي دافعت وتعبت وربت
كل شي نمر بي هسه هو نتيجة تعبج ويانه
ماقصرتي ربي يخليج ألنة وتفرحين حتى بأطفالنا
سحبتني حظنت راسي يمها
تمتم
-يابعد روحي غناوي باوعيلي
يمه الدنيا طوووويلة تحتاجين مرات بيها اليسندج
لازم تصيرن مثل عودة الخيزران مرنة بالتعامل بس
تلسعين اللي يقل الأدب
جرت أذني ضاحكة
-ولج غنوة خليج ويا أبو حمادة هالوليد ماكو منه
عبالج اني ماادري ولج ادري بي مو منا وادري بي مو موظف بس شوفي الدنيا مرات تجيبلج غريب يزرعلج
دربج ورد وريحان بدل القريب مثل رضا اللي زرع
درب صِبى شوك وتعب وخلاها حزينة
هالدنيا راح تشوفج هووووايه خلي هالوليد
مرجعج بكل شي صار عمر وياج مامرة شكيتي
منة شگد ماالمرة قوية تحتاج بدنيتها رجال
تحت اي ظرف اخو ابو زوج لازم اكو رجال بحياتجن
وآني مأمنة لهالولد عبالك فريقد بيناتنا بعده
جرت حسرة تكمل
-آآآخ فرقد حسرة موتك بعدها گاعدة بصدري
حسبن هالولد اخيجن وخلي يتصدر الكلفات
يمه لا تواجهن الدنيا وحدجن فهمتيني
-عدناااااا انتِ خالة تسوين عشر زلم
-ميخالف يمه الدنيا هاي مامضمونة
لازم نحسب حساب لكل شي غناوي تدرين انت تشبهيني
بالشخصية جان خشمي ماتوجر علي الذبانة
وتالي اجاني عويمر كسر جناحاتي
بااااالج تاخذين واحد يكسر جناحاتج
اخذي اليكبرج ويعليج ويملي صدرج دفو فهمتيني
هزيت راسي وسحبتني باست جبيني
-ولج شو تعبت وانت وراج أمتحان
گعديني ويا صلاة الصبح
هزبتلها راسي وغمضت هي واني
سندت راسي على كفوفها بتعب
بعد الاعتراف بالمشاعر المتأخرة واخذتني
اغفاءة فزيت بيها على صوت المنبه
نايمة واني ساندة نفسي عالجرباية وايد خالتي
باوعت للساعة ب٦ وربع
مسحت على كفوفها لأن تعبتها
بنومتي
-خالة راح وقت الصلاة گعدي نصلي
توقف كفي بعد أحساس كفوفها
الباردة رفعت راسي لوجها
جانت نايمة بهدوء خليت راسي
على صدرها ماكو بس الفراغ
توقف گلب خالتي
ورحلت عن الدنيا بهدوء
احتضنتها معلنة النهاية
-ما لحگت أعتذرلج عالسنين اللي گضيتها أصيحلج
خالة وأني بگلبي أصيحلج يمه
سامحيني لأن مامرة گتلج أحبج لأن محبتج
جانت تضيع بهوسة خجلي
انكفيت عليهة بحزن
وأرتفع صوت البكاء يعلن النهاية
________________________
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية بيوت الصفيح)
