رواية بيت ابوعلي الفصل الرابع 4 بقلم زهرة الربيع

رواية بيت ابوعلي الجزء الرابع

رواية بيت ابوعلي البارت الرابع

رواية بيت ابوعلي الحلقة الرابعة

مين ده يا نولا الشوفير بتاع عربيتك الجديده …وضحكو كلهم سوا
حسن بص لها بحده نظره ارعبتها وقال….. لولا ان ربنا اكرمكم وكلكم بنات كنت رجعت وريتك انا مين وعرفتك اللي دفعتيها دي تبقى مين …..بس هقول لك كلمتين خديهم حكمه ..الفلوس مبتعليش صاحبها….. المعفن بيفضل معفن والجزمه لو عبيتيها فلوس بتفضل جزمه….. والفقر ما بينقصش برده من قيمة صاحبه الغالي بيفضل غالي والجواهر لو لفيتيها في خيش بتفضل جواهر
واخد نوال من ايدها على التاكس بتاعه وسابهم واقفين يبصوا له بغيظ
في العربيه نوال ابتسمت له بدموع وقالت …شكرا بجد..كنت فاكره نفسي لوحدي
حسن ابتسم ومسح دموعها وقال…اللي زيك ما تبقاش لوحدها ابدا يا بت …عمر الورود ما بقت وحيده حتى لو فضلت لوحدها في البستان لا النحل ولا الفراشات بيسيبوها
نوال ابتسمت باعجاب وقالت… كلامك حلو قوي يا حسن
حسن ابتسم وقال…. الحلو للحلو
نوال ابتسمت وقالت..انت رجعت ليه
حسن قال …انا ممشتش اصلا فضلت مستنيكي من بعيد لحد ما اطمن انك دخلتي وشفتهم بضايقوكي… ها بقى صلي على النبي كده وقوليلي ايه اللي حصل
نوال بدات تحكيله كل اللي حصل وهيه مرتاحه بالكلام معاه حتى حكايه ايمن قالت بدموع…. كنا خلاص هنتجوز بس لما عرف انا بابا خلاص افلس ما بقتش أنفعهم… وراح من ضمن اللي راح
حسن ابتسم بحزن عليها وقال …..لازم تعرفي كده ان هو كمان زي اللي راح ملوش قيمه.. ربنا اكرمك باللي حصل وبينلك معدنه لو كان انسان كويس ما كانش فرق معاه ده كله اللي زيك ما تشتريهاش فلوس الدنيا كلها … ولا تزعلي نفسك شبشب وغار وانا اجيب لك احلى شبشب بداله
نوال ضحكت جامد وقالت …بجد تسلم لي…انت اجمل حاجه في اللي حصلي كلو
خرجت جملتها بتلقائيه بس اخترقت قلبو حرفيا وبقى يبصلها بابتسامه جميله
نوال نزلت عيونها بكسوف لما خدت بالها للي قالتو وقالت…احم..انا…انا عايزه ارجع البيت مش هقدر اروح الجامعه انهارده
حسن ابتسم وهز راسو بالموافقه ولسه هيمشي بصلها وقال ..بمشاكسه زي العاده….انا حاسس انك متوتره وزعلانه واعصابك مش تمام ما تيجي تريحي على كتفي شويه انا حاسس انك هترتاحي
نوال هزت راسها بيأس وقالت بضحك….. اطلع يا حسن
حسن ابتسم بخبث وهو بيبص للبنات صحابها اللي واقفين بيضحكوا مع بعض وقال..هطلع بس دقيقه واحده
نوال بصت له باستغراب لما مشي ناحيتهم وقالت ….انت راجع ليه احنا مش هنمشي من الطريق دي
بس حسن مردش عليها وطلع بالتاكس بسرعه كبيره ناحيتهم وكانت فيه ميه وسخه في الارض داس فيها جامد ودور في نفس الوقت الميه جت عليهم وعلى هدومهم ووشوشهم
البنات شهقو وصرخوا جامد بزهول وهو بصلهم وقال…شوية ميه وانت معدي…. يبينوا معدن المصدي
وجري بسرعه بالتاكس وهما بيبصو لطيفهم بذهول وغضب وغيظ شديد
نوال ضحكت بقوه وسعاده شديده ومسكت ايده وابتسمت بامتنان
حسن ضغط على ايدها بحنيه وغمز بطرف عينه وقال…. اي خدمه
وراجعو على البيت بسعاده بس مالقوش والدت حسن
حسن اتصل عليها وعرف انها عند خالتو قال…ماما عند خالتي الظاهر اننا هنغدي نفسنا بنفسنا انهارده وراح على المطبخ
نوال راحت وراه باستغراب وقالت… يعني هنفضل لوحدنا ولا ايه
حسن ضحك وقال …متخافيش انا مش بعض..وشدها عليه بقوه وبص لعيونها وقال…. انا باكل على طول
خصوصا لو كانت الاكله جامده كده
نوال نزلت عيونها بكسوف شديد وقالت برقه…. سيبني يا حسن
حسن دق قلبه بقوه من رقتها وقال… قولي حسن تاني كده
نوال ابتسمت بكسوف وقالت….. حسن كفايه بقى
حسن سابها بالعافيه وقال ربنا يستر وامي تيجي بسرعه وتتاخر لاني مش عايزها تيجي
نوال بصتلو بدهشه وضحكت وقالت… ايه الجمله دي يعني انت عايزها تيجي ولا ما تجيش
حسن اتنهد وقال…. والله الاحسن ليا انها ما تجيش بس الاحسن ليكي ان هتيجي
نوال ضحكت بخفه وبقت تحضر الاكل معاه وقالت قولي بقى ….اقول لك يا حسونه ولا يا ابو علي
حسن ابتسم وقال…. لا قولي لي يا ابو علي …وانا اقول لك يا ام علي…. ما تيجي نجيب علي
نوال ضربته في صدره بخفه وقالت…. وبعدين بقى طيب قول لي يا ابو علي ما جبتش علي لحد دلوقتي ليه قصدي ما اتجوزتش يعني لحد دلوقتي ليه
حسن قال…ما لقيتش البنت اللي في دماغي..اللي تخليني اكتفي بيها من اول دقيقه
نوال قالت بضيق….ليه عبله مالها…انا شايفه انها بسم الله ما شاء الله امكانيات يعني
حسن ضحك جامد وقال…. امكانيات ومقلناش حاجه بس اللي زي دي ليلتين ثلاثه وتتزهق منها
نوال قالت بدهشه…. يا سلام يعني امال انت عايز تتجوز مين يعني مارلين منرو الله يرحمها
حسن ضحك وقال….. مع احترامي ليها الله يرحمها بس برده ما تنفعش…و قرب منها قوي وقال…. انا عايز الراحه عايز البيت عايز واحده عيونها طيبين… طيبين قوي يخطفوا قلبي في الامان اللي بشوفه فيهم
نوال بصت لعيونه بقوه وابتسامه جميله على شفايفها وهو تاه في عيونهاو لسه هيقرب الباب اتفتح وامه قالت….. واد يا حسن انت هنا يا واد
بعده عن بعض بخضه وهو مسح على شعره وقال بضيق
….. الله يسامحك ياما
نوال ارتبكت واخدت نفس وقالت..الحمد لله
وهو طلع وقال …احم ايوه انا هنا ياما
امه قالت الابتسامه… طب كويس اصلي كنت هتأخر خالتك تعبت شويه بس الحمد لله بقت احسن كويس اني لحقت اجي عشان اغديكم
حسن اتنهد وقال…. يا ريتها فضلت تعبانه ياما
امه بصتلو باستغراب وقالت… نعم
حسن قال بسرعه ….لا ابدا قصدي حمد لله على سلامتها ودخلت بقت تحضر مع نوال وعملوا الاكل واتغدوا
ونوال دخلت على اوضتها بسعاده شديده لاول مره قلبها يدق بالطريقه دي وهي بتفتكر وقت ما كانت هتقع وسندها وقربه منها ودعموا ليها والكلام اللي قاله للبنات كل كلمه منو بتخليها طايره من السعاده
وعدوا ايام وكانو تقريبا اجمل الايام بالنسبه لهم كان بياخدها كل الصبح يوديها الجامعه بيرجع في الظهر يجيبها
وهي بتفضل تذاكر وتساعد والدته في البيت مبسوطين قوي والجو عائلي جدا مع بعض
في يوم كانو قاعدين بيتعشوا ووالدته قالت…. انا هخلص لم الأكل وهدخل اصلي العشاء وانام تعبانه شويه
نوال قالت باستغراب… هتنامي من دلوقتي اقعدي اسهري معانا شويه
قالت بسرعه …لا مش هقدر خالص بجد تعبانه
حسن قال بقلق…تعبانه ازاي تروحي دكتور
ابتسمت وقالت…لا يا حبيبي مش للدرجادي هريح بس
نوال قالت …طيب خلاص خليكي انا هلم السفره
امه قالت ….يا بتتي تاعبينك معانا ومش بتلحقي تذاكري
نوال قالت بسرعه…. لا انا هلمها والله اصلا خلصت مذاكرتي كلها
حسن قال… انا هساعدها يا ماما متقلقيش
امه دخلت تنام
ونوال خلصت لم الاكل …وقعدت على الكنبه وحطت السماعه في ودنها على اللاب بتاعها بتكمل مذاكرتها
حسن قعد جنبها وشد السماعه من على ودنها وبصلها وقال هتذاكري وتسيبيني ولا ايه مش تذاكري لي معاكي
نوال ضحكت وقالت …حسن وبعدين
حسن ابتسم وقال….انا مش ذاكرت لك في العصر وقلتي انك خلصتي مذاكره… ولا انتي بتتهربي من القعده معايا
نوال قالت بارتباك ….الصراحه بتهرب عشان انت مش بتقعد عاقل
حسن ضحك وقال…. طب ايه رايك هنلعب لعبه
نوال ابتسمت وقالت بحماس…. لعبه بجد هنلعب ايه
حسن قال السماعه دي بتتوصل بالتلفزيون
نوال قالت باستغراب…. اه ليه
حسن راح وصلها بالتلفزيون ولبسها وكتم صوته
وجاب شريط وربطو على عينيها وقال ….دلوقتي انت مش شايفه ولا سامعه التلفزيون حتى
نوال قالت باستغراب… اه
حسن قال…. طيب بصي انا لبست السماعه وهقلب عشوائيا على اي قناه والمشهد اللي هيجي قدامي هاحاول اقلده بصوت الممثل والممثله وانتي عليكي تعرفي من فيلم ايه
نوال ابتسمت بحماس وقالت…. ده انا شاطره قوي في الافلام يلا ابدأ
حسن جاب اول قناه وسمع المشهد شويه وبص لها وقال …بصي يا ستي … الفرح باظ يامااااااا
وقلد صوت واحده ست وقال بطريقه كوميديه…. عمرو دياب هيبوظ لك الفرح
كمل وقال ….امال ابو تريكه اللي هيبوظلي الفرح
نوال ضحكت جامد على طريقه تقليده وقالت…. بجد انت مسخره.. فيلم عندليب الدقي.. عرفته
حسن ضحك وقال…. شاطره
وجاب قناه تانيه…وقلد صوت بنت وقال…. هتعملي ايه يعني هترميني في الميه ما بغرقش… ولا حتى بتبل
وكمل بصوت راجل وقال…. ليه ما بتتبليش ليه يعني
وقلد البنت تاني وقال….. ما اعرفش اسكت انت
نوال ضحكت وقالت…. ايوه عارفاه بتاع محمد امام يا ربي ..ايوه لص بغداد ..لص بغداد
حسن ضحك وقال…. لو شاطره في دراستك كده زي الافلام كان زمانك نجحتي
نوال قالت…. انجح فين الامتحان لسه
حسن قال..اه صح خلاص اأجل الجمله بعد ما تسقطي يعني
نوال قالت بزهول…. يخربيتك متفولش ايه ده
حسن ضحك وقلب على فيلم اجنبي وكان مشهد رومانسي جدا سمعه وقال باللغه الانجليزيه…. رائعه ايتها السارقه اختلستي القلب دون ان اشعر
نوال قالت باستغراب …كمل وبعدين ردت عليه قالت له ايه
حسن بص على المشهد وكانوا قربوا من بعض بلع ريو و قال اللي بعد كده ما ما يتمثلش
نوال قالت باستغراب ….ليه يعني
حسن ارتبك اكتر وقال… مش هعرف امثله
نوال قالت بسرعه…. يبقى انت اللي تخسر مش هتعرف تمثله
حسن قال … اخسر ليه هو ..هو اللي ما يتمثلش
نوال ضحكت و قالت ….ما ليش فيه يا تمثلو يا تخسر دي قوانين اللعبه
بص لملامحها باعجاب وقرب منها بقوه في لحظه اتمناها من اول يوم شافها
نوال اتصدمت بشده وشدة الغطاء من على عينها وبصيت له بزهول ودفعته وقالت…. انت بتعمل ايه انت بتخم يا حسن
حسن قال بسعاده…..هو المشهد كده قلت لك ما رضيتيش اعمل لك ايه
رمت عليه الاشارب اللي كان على عنيها وقالت بغضب…. انا الغلطانه اللي بسمع كلام واحد واطي زيك
ولسه هتمشي شدها عليه وبص لعيونها وقال ….هو تمثيلي وحش ولا ايه
نوال نزلت عنها بكسوف وقالت… حسن عيب كده اللي بتعمله ما يصحش
حسن رفع وشها ليه و بص لعيونها جامد وقال…. انتي عملتي فيا ايه ….رائعه أيتها السارقه اختلستي القلب دون ان اشعر المشهد ده كان طالع من قلبي
نوال بلعت ريقها ولسه هتتكلم سمعو خبط شديد على الباب بعدو عن بعض بسرعه
حسن نفخ بضيق و قال مين اللي جاي دلوقتي بس
و راح فتح وكان المعلم سنجه ومع الصبي بتاعه وجايبين هدايا وحاجات كثيره
المعلم دخل وقال…. مساء الخير يا اسطى حسن.. عايزينك في موضوع مهم
حسن استغرب و المعلم سلم على نوال و بص لها بوقاحه وقال ازيك يا ست نوال ….حط الحاجه دي عندك يا واد
نوال قالت بضيق…..انا هدخل انام يا حسن
سنجه قال …لا استني عايزينك الموضوع اللي هنتكلم فيه لازم تكوني انت موجوده فيه
نوال وقفت باستغراب وحسن قال …خير يا معلم سنجه
المعلم بقى يبص لها من فوق لتحت
وحسن اتنهد بخنقه وغيره وقال…. ادخلي اعملي كوبايه قهوه للمعلم يا نوال
نوال هزت راسها بالموافقه ولسه هتمشي المعلم قال بسرعه…. لا قهوه ايه المره الجايه وان شاء الله تكون شربات
بصوا له باستغراب وهو قال… بما ان الست نوال قريبتك انا جاي داخل البيت من بابه وجايب معايا الهدايا دي كلها للست وطالب ايدها على سنه الله ورسوله
نوال وحسن اتصدمو ووو