رواية بنت إبليس الفصل السابع والعشرون 27 بقلم حياة محمد

رواية بنت إبليس الجزء السابع والعشرون

رواية بنت إبليس البارت السابع والعشرون

رواية بنت إبليس الحلقة السابعة والعشرون

دخل يوسف قاعة الاجتماعات ووقف مرتبك وخاصه لما لقى كل العيون بتبص عليه.إلا أنه تشجع وقرب من زينب وقال: ممكن اعرف إيه اللى بيحصل هنا
زينب ببساطه: أهلا يا يوسف.استنى خمس دقايق وهفضى لك.
يوسف: بس أنا عايز
زينب: خمس دقايق مش أكتر تقدر تستنانى في مكتبى ولو حابب ممكن ترتاح على الكنبه هناك. لو سمحت
حس يوسف بالغيظ وخاصه انها بتتكلم بهدوء ولكن في صوتها نبرة تهديد وكأنها بتقول له (( اياك تعمل فضايح)) فاضطر انه يقعد على الكنبه ويتابعها وهيا بتتعامل مع رؤساء الأقسام بكل جدية ومهنيه.لحد ما خلصت الإجتماع.فقامت من مكانها وراحت له وقالت ببساطه: ايوه يا حبيبي كنت عايز إيه؟
والغريبة ان كل الكلام إللى كان مجهزه لها تقريبا نسيه فقال بنبره مهزوزة: ليه عملتى اجتماع مع رؤساء الأقسام ؟
زينب: شئ طبيعي وخاصة اننا جايبن من اجازه فلازم اعمل اجتماع عشان احدد المستجدات وأعرف سير العمل.
يوسف: انا عارف ده كله بس أنا فين من الاجتماع ده.
زينب بعدم فهم: يعنى هتكون فين أكيد في مكتبك.
يوسف بغضب: يعنى إيه في مكتبى مش المفروض اكون معاكم في الاجتماع ده.!
زينب تعمل إيه معانا.
يوسف: انتى هتستهبلى!
زينب: لا والله بس بجد مش فاهمه
يوسف: مش المفروض اكون موجود في اجتماعكوا وبعدين المفروض يكون ليا مكتب لواحدى فأتفاجأ ان مكتبى القديم زى ما هو ومفيش حاجه اتغيرت!.
زينب: : وإيه إللى اتغير انك بقيت جوزى.
يوسف: انا مسمحلكيش تقولى كده
زينب ببرود: ليه مش هيا دى الحقيقية التغيير الوحيد إللى حصل انك بقيت جوزى وده مش سبب تطلب عشانه مكتب وترقية.
يوسف بغضب: بطلى تتفهى وجودى وتحقرى منى بالشكل ده أنا مهندس في الشركه مش جوز الست وإللى بطلبه حقى إزاى امانى ترقيها لرئيسه الشؤون المالية وانا مترقينيش.
زينب: وانت عايزنى أرقيك تبقى إيه.
يوسف: على الاقل اكون رئيس القسم الهندسي في الشركه.
زينب: ماينفعش.
يوسف بغضب: ليه ماينفعش ولا عشان انتى صاحبه الشركه هتذلينى وتتحكمى فيا.
زينب بهدوء: يوسف ماتخشش من السكه دى عشان مش لايقه علينا
يوسف: سكة ايه ان شاءالله
يوسف: سكة مراتى مدير عام دى مش لايقه علينا لسببين أولهم انك مش أمور ذى صلاح ذو الفقار وأنا صوتى وحش أوى فهتزعل منى شاديه.
يوسف: انتى بتهزرى انتى شايفه اننا في موقف يتحمل الهزار.
زينب: انا شايفه اننا في موقف ماينفعش فيه إلا الهزار
يوسف: عشان بأطلب بحقى
زينب: وإيه هو حقك انك تبقى رئيس قسم الهنندسه في الشركه انا بقولها لك ماينفعش.لأنك كده بتتعدى على حق الباشمهندس راضي إللى هو رئيس القسم من زمان اوى يمكن من قبل مانشترى الشركه بعشر سنين وده شخص عنده خبره كبيره جدا
وانا ابقى غبيه لو ضيعتها وده عكسك انت اللى حتى الأن مالكش اى خبره حتى انك حتى الأن معملتش مشروع واحد بإسمك.
يوسف: بس انتى شغلتى أمانى.رئ
زينب: أمانى حاجه تانيه امانى بتشتغل هنا في الشركه من زمان اوى بتشتغل معايا واحنا لسه طلبه في الجامعه يعنى عندها خبره حافظه الشغل صم ده اولا اما ثانيا هيا ماتعدتش على حق حد لان المنصب كان فاضى ولازم حد يكون ثقه ويشغله وانا بثق في أمانى أوى.. يا يوسف انا اقدر احطك في اى منصب يعجبك ومايهمنيش حد بس أنا بعمل كده عشان براعى شعورك
يوسف: ياسلام انك ماتعملش لى اعتبار تبقى بتراعى شعورى
زينب: طبعا لما اجيب واحد خبرته قليلة وبقاله حوالى ست شهور بس في الشركه وأخليه رئيس على ناس بقالهم عشرة وعشرين سنة متخيل هيقولوا عنك إيه؟
هيقولوا جوز الست
يوسف: انا مش هسمح لحد يقول كده
زينب: وهو ده اللى انا عايزاه انا عايزاك تجتهد اوى فى شغلك وتبدع عايزه يتقال الشركه من غيرة تضيع عشان لما ارقيك محدش يقدر يقول جوز الست.فهمت ليه انا سيبتك في مكانك.
يوسف: طب وانا هدنى كده كتير
زينب: انت وشطارتك.وأنا عارفه انك شاطر.
&&&&&&&&&&&&&&&&&&
ركن العربيه جنب البيت وفتح شنطه العربية ويشيل الاكياس الكتيره ويركنها أصل النهارده أول الشهر وقرر يزور أهله واشترى من أفخم سوبر ماركت كل احتياجات البيت.
احساس حلو أوى انك تكون غنى ومعاك فلوس كتيره وتشترى كل إللى تجبوا فبالرغم من كونه لسه مهندس في الشركه إلا أن زينب تقريبا ضاعفت راتبه عشان مايحسش بالنقص.
(( إزيك يا يوسف عامل إيه))
إلتفت يوسف ناحية الصوت واتفاجأ لما شافها جنبه
يوسف: رباب!!!!
رباب: عامل إيه يا يوسف.
يوسف بدهشة: أنا الحمد لله كويس أوى.وانتى
رباب: واضح إنك كويس (( بصت له وللعربيه))وحالك افضل بكتير عما كنا مع بعض.
يوسف: اكيد افضل إلا انت هنا كنتى بتزورى أهلك.
رباب: هو إنت ما تعرفش
يوسف: اعرف إيه ؟
رباب: انا اتطلقت .
يوسف: نعم!!!!!!!! امتى
رباب: بقالى خمس شهور وانا دلوقتي عايشه في بيت بابا انا وبنتى.مش هتسألنى عن سبب طلاقى…
يوسف: لأ
رباب: ليه يا يوسف اشمت فيا وقولى تستاهلى عشان سببتينى واتجوزتى راجل تانى عشان فلوسه.قولى فادتك فلوسه بإيه؟ قولى كنتى سعيده معاه.عشان اقول لك لأ ماكنتش سعيده معاه لأنى سيبت الحب عشان الفلوس.الفلوس عمرها ما بتشترى سعادة عمرها ما عوضتنى بعدك.يوسف أنا…
(( انت واقف كده ليه يا يوسف))
إلتفت يوسف وقال: انا كنت طالع دلوقتي يا ماما.
رجاء: طب استنى اشيل معاك الأكياس دى ويالا ندخل.
يوسف: عن إذنك يا رباب
رباب: اتفضل يا يوسف..إزيك يا ماما رجاء.
رجاء: احنا كويسين ابقى سلمى لى على أمك.. يالا يا يوسف.
وبعد ما دخلوا البيت
يوسف: ليه ماقولتيش لي ان رباب اتطلقت.
رجاء: وانت مالك تهمك في إيه عشان أقول لك.
يوسف: انا اقصد بس عشان
رجاء: عشان إيه.اهى اتجوزت واتطلقت احنا مالنا وبعدين انت تبص لمستقبلك لواحدك. وماتشغلش نفسك بحد
يوسف: انتى فاهمانى غلط أنا بسأل عشان دى جارتى.وأنا بسأ
رجاء: انت اتجوزت وعشت حياتك خلاص يبقى ماتبصش وراك
يوسف: غريبه انا متوقعتش انك تتقبلى زينب وترضى عنها
رجاء: انا لا اتقبلت ولا نيله بس دى بقت مراتك وبعدين انا عارفه رباب بترسم على إيه رباب بتدور على حد يصرف عليها وعلى بنتها.
يوسف: انتى بتقولى إيه يا ماما هو إنت متوقعه انى
رجاء: انا مش عايزة اتوقع حاجه انا بقولها لك كلمه حطها حلقه في ودنك ((حاجى على بيتك وحافظ عليه.))
&&&&&&&&&&&&&&&&
دخل مصطفى البيت واتفاجأ لما لقى أمانى وأنس في البيت.
مصطفى: أهلا اهلا بأنس وأم أنس
أمانى: إزيك يا مصطفى عامل إيه
قعد على الكنبه التانيه بتعب وشال انس وقعد يلاعبه: والله هلكان تعب ونفسى انام.
أمانى: على العموم احنا كنا هنمشى دلوقتي
مصطفى: تمشى إيه ده أنا ماصدقت انى شفت انس تقولى أمشى.
أمانى: خليه لك حلال عليك.
مصطفى: وانا موافق إيه رأيك يا أنس تقعد مع عمو
ضحك أنس لعمه.
أمانى: انا مش غايظنى إلا إنه بيضحك ويلعب معاك اما معايا فدايما فاتح لى السرينه
مصطفى: الله اكبر من عينك شوفت يا أنوسه ماما غيرانه منى.
أمانى؛: على إيه خليه عندكم وأراهنك انك هتقول لى خدى فلوس وماشوفش وشه تانى
دعاء: مش للدرجه دى
أمانى: وأكتر يا ماما وخاصة بعد ما الباشا مابقى بيزحف بتبقى عايزه تفضى البيت كله عشان الكوارث إللى بيعملها.
دعاء: على قلبى زى العسل ده أنا الود ودى اقول لك تجيبيه عندى هنا وانتى فى الشغل وبلاش الحضانه.
مصطفى: والله فكره حلوه حتى يسلى ماما واحنا في الشغل.
أمانى: لا يا ماما هيتعبك احسن انه يدنه في الحضانه وانا باجى لكم كل اسبوع نشوفكم وتشوفوا انس.يالا انوس عشان اتأخرنا
مصطفى: لسه بدري اقعدى كمان شويه لسه ما شبعتش من انس.
دعاء: هو فيه حد بيشبع من الامور ده ده حتى جدوا هيتجنن من صوره إللى بعتها له من اسبوعين وكل ما يتصل يقول إدينى انس أكلمه.
أمانى: معلش المره الجايه عشان تعبانه أوى وعايزه اروح ارتاح شويه
مصطفى: طب ما ترتاحى جوه في أوضه فادى.
أمانى: لا مش بحب ارتاح إلا في بيتى يالا يا أنس.
قام مصطفى وقال: استنى هاوصلك
أمانى: خليك انت استريح انا معايا عربيتى.
مصطفى:: هوصلك برضوا يالا إتفضلى.
فى كافيه هادئ على النيل.
أمانى: أدينا قعدنا اهو فى حته هاديه خير
مصطفى: ماتقومى تتخانقى معايا اعوذ بالله منك يا شيخه.إيه الكأبه دى
أمانى: خلاص يا سيدي انا اسفه ها قول عايز ايه ؟
مصطفى: انتى مستعجله أوى كده ليه ماتقعدى.
أمانى: مش مستعجله بس ما صدقت ان انس نام وعايزه استغل الفرصه وانام انا كمان.
مصطفى: خلاص انا هجيبها من الأخر وبطريقه مباشره.تتجوزينى يا أمانى
ابتسمت أمانى واحمر وشها أوى وبعدها سكتت.
مصطفى: قولتى إيه؟ اعتبر السكوت علامة الرضا واعتبرك موافقه.
أمانى: اسفه جدا يا مصطفى بس أنا مش موافقه..
يوسف: مش موافقه!.ليه يا أمانى
أمانى: ماتزعلش منى يا مصطفى انت الراجل الصح في الوقت الغلط
مصطفى: يعنى إيه ؟
امانى: انت الراجل المثالى والزوج الصالح إللى الواحده تعتمد عليه بس مايتفعش اجوزك
مصطفى: عشان فادى صح لسه بتحبيه.
أمانى: فادى أخوك دمر كل معنى حلو في حياتى ومشى بس مش هو السبب السبب كلام الناس عارف الناس هتقول عنا ايه لو اتجوزتك هتقول ان كان فيه بينا حاجة وانا على ذمة أخوك عشان كده اتجوزنا بعد ما اتطلقت منه او يمكن يقولوا ان اخوك مسكنا واحنا بنخونه عشان كده طلقنى وماستحملش خيانتنا له فساب البلد.
مصطفى: بس احنا معملناش كده وربنا شاهد
أمانى: انا عارفه بس الناس لسانها مابيرحمش
مصطفى: وانتى فارق معاكى كلام الناس.ماهى هتتكلم شويه وبعدين تسكت.
أمانى: أنا مدمرنيش إلا انى ماهتمتش بكلام الناس كنت عايزه أعمل إللى يعجبنى وطظ فيهم فمشيت ورا أخوك ونسيت العرف ومهتمتش بكلام الناس وكانت النتيجه إنى اتدمرت وخسرت أهلى.وانا مش مستعده اخسرهم تانى.
مصطفى: وانتى هتخسريهم لما تتجوزيني.
أمانى: انا اسفه والله ما أقصد انت شرف لأى واحده انها ترتبط بيك بس وصعنا حساس لأنى طليقة اخوك وارتباطنا مع بعض هيعرضنا لكلام كتير إحنا في غنا عنه وبعدين انا دلوقتي مافيش فى حياتى الا هدفين انى اربى ابنى وارضى اهلى وبس.
وبعدين أنا عارفة انت طلبتنى ليه.عشان تربى ابن اخوك صح.
مصطفى: مانكرش ان أنس هو السبب الرئيسي في إنى أطلب الجواز منك بس برضو مانكرش انى برتاح لك
أمانى: مش بقول لك انت الشخص الصح في الوقت الغلط.
ذ&&&&&&&&&&&&&&ـ
دخل سيد البيت اخر النهار لقى بسيوني مستنيه.
بسيوني: كنت فين يا سيد
سيد: كنت بلف في الشارع بلقط رزقى
بسيوني: لأ يا سيد انت ماكنتش بتشتغل.قولى كنت فين.؟
سيد بتعب: يعنى هكون فين اكيد تحت اى كوبرى بمسح جزم الناس.
بسيوني: بتكدب ليه يا سيد انا عارف كنت فين زى ما انا عارف المشوار إللى بتروحوا كل يوم الصبح.انت بتروح عند بنتك في الشركه صح.بتروح ليه يا سيد.
قعد سيد بتعب وهده وقال: خمس شهور.رجعت من السفر مع جوزها من اكتر من خمس شهور..
بسيوني: وانت بتروح لها ليه يا مجنون مش خايف لترجع تحبسك تانى
سيد: كنت فاكر نفسى عمرى ما هسأل عنها تانى بعد ما هربت منها.بس بعد شهر واحد قلبى حن لها وبقى نفسى اشوفها مش عايز فلوس انا عايز اشوفها وأطمن عليها.بقف كل يوم قريب من الشركه اراقب إللى داخل وإللى خارج مستنيها تعدى بس عشان ألمحها.وهيا داخله الشركه بالعربيه واستنى بالساعات مستنيها لما تخرج وأسال نفسى هيا حنت ليا واشتاقت ليا زى ما أنا هموت عليها.هل قلبها بيوجعها عليا.زى قلبى ما بيوجعنى عليها..ومجرد ما تعدى ألاقيها زى القمر ومش فارق معاها بعدى اقول هيا جابت قسوة القلب دى منين افتكر نفسى وانا سايب ابويا ومبسألش عنه.كل ما افتكر شوقى لبنتى افتكر اد ايه كنت بجح وقاسى وقلبى زى الحجر وانا واقف اتبجح على ابويا واامر واتشرط عليه واقول له طلق مراتك وانا هشوف لك أوضه تعيش فيها واتريق عليه وهو بيقول خد كل الفلوس بس ماتبعدنيش عنك.اقول له انت عندك حاجه تتاخد (( سالت دموعه وبصوت موجوع)) كنت بجح وقلبى زى الحجر مابيلنش ولما استغرب منين جابت بنتى قسوة قلبها افتكر انى انا إللى علمتها إزاى مايصعبش عليها حد علمتها مايفرقش معاها حد علمتها تدوس على الناس وبدم بارد علمتها وكل الدروس إللى علمتها لها طبقتها عليا حرف حرف.وقبل ما اعترض واقول ليه افتكر دعوة ابويا عليا لما قال (( إلاهى تشوفها من اعز اولادك)) وأهى بنتى الوحيده هيا إللى كسرتنى وذلتنى واخدت حق جدها منى وانفجر في البكا بوجع وحسرة
قرب منه بسيوني وقاله: تعال ياسيد تعال معايا
سيد بوجع: هنروح فين يا بسيوني انا مش قادر اقف على رجليا.
بسيوني: هريحك يا سيد هنروح بيت ربنا اشكيله وعيط وانت ساجد بين إيديه قوله على كل إللى واجعك قوله على كل همومك.استسمحه يرضى عنك ويسامحك عن ذنب ابوك.واشكى له من بنتك وادعى لها بالهدايه.
سيد: مش قادر مكسوف منه اوى اقول له إيه ده انا ذنوبى كتيره اوي.
بسيوني: ارجع له ياسيد وتوب إليه وهو هيسامحك وان شاء الله هيقبل توبتك مادامت من قلبك.
سيد: يارب سامحنى انا ظلمت نفسي وظلمت ناس كتير اوى يارب اغفر لى ذنوبى يارب واهدى لى بنتى
&&&&&&&&&&&&&&ـــ&&&&