رواية بنت إبليس الفصل الرابع والعشرون 24 بقلم حياة محمد

رواية بنت إبليس الجزء الرابع والعشرون

رواية بنت إبليس البارت الرابع والعشرون

رواية بنت إبليس الحلقة الرابعة والعشرون

السيدات و الساده تسمحوا لى انى اتغر وأمدح نفسى شويه (( ياسلام عليكي يا أم عمر يا جامده ياخطيرة يا غير متوقعه))
كفايه عليا غرور لحد كده بس هقول لكم السبب هو انى اتحديت نفسى قبل مااكتب الروايه دى بأنى زى ما أخليكم تكرهوا سيد(( إبليس))هاخليكم تعاطفوا معاه وتشفقوا عليه واظن ده حصل والدليل على كده تعليقاتكم إللى وصلتنى البارت إللى فات شكرا جدا لكم وأتمنى تستمتعوا بالبارت الجديد
&&&&&&&&&&&&&&&&&&&&
دعاء: : يعنى إيه يا مصطفى ؟
مصطفى: زى ما قلت لك يا ماما
دعاء: ما انا مش فاهمه حاجه يعني إيه طلقها ويتنازل عن ابنه
مصطفى : لأ وكاتب التنازل بخط إيده.
دعاء: يعنى إيه يعنى مالناش أى حق في انس لو امانى اتجوزت مقدرش أطالب بحضانته .
مصطفى: لأ ومتنازل لها عن الشقه يعنى تتجوز وتجيب جوزها يعيش في شقتنا ومنقدرش نفتح بؤقنا.
دعاء: انا مش عارفه اخوك كان بيفكر في إيه ولا كان هدفه إيه من حركته دى.
مصطفى: هو الوحيد إللى يجاوب على اسئلتك دى
دعاء: طب هو فين ؟.مادام طلقها مجاش هنا ليه ؟ لاتكون عملت في اخوك حاجه وحشه ؟
(( وبخضه)) مصطفى اخوك فين يا مصطفى اخوك مختفى لاتكون قت*لته ولا خلصت عليه وعامله حكايه التنازل دى لعبه.لأ ده انا هبلغ البوليس عليها يودوها في ستين داهيه
مصطفى: حيلك حيلك اهدى يا ماما فادى مسافر انا كلمت بابا إمبارح وقالى انه بعت له التأشيرة وهو سافر عند بابا.
دعاء: يعنى يطلق مراته ويتنازل عن ابنه ويسافر ده إيه عدم المسؤليه دى
مصطفى: هو انتى هتتجددى على ابنك ماهو فعلا معندوش مسؤولية.
دعاء: طب أمانى قالت لك هيا ناويه على إيه ؟يعنى هاتتجوز هتحرمنا من الولد يعنى قالت لك إيه؟
مصطفى: ولا حاجه ماقالتش حاجه كل إللى قالته أنه طلقها وبس وبعدين لسه بدري اوى على كلامك ده ده لسه بدرى على ما شهور العده تنتهى وبعدها نبقى نتكلم ومين عارف يمكن تحصل في الأمور امور .
&&&&&&—-&&&&&&&٥٥&&&&
ماشى فى الشوارع مش عارف يروح فين ولا عارف يجى منين معدته بتتلوى من الجوع وحاسس بدوخه شديدة.ملقاش غير إنه يقعد على الرصيف زى أى متشرد ..
-((لا إله إلا الله محمد رسول الله.)) إلحقنى يا واد يا عبده بزى كل يوم عشان انا واقع
عبده: من عنيا يأ عم بسيوني أجيبوا عندك ولا هتاكل هنا.
بسيوني: لأ عندى انا قاعد أهو.وأوعى تنسى البصل.خلى الواحد ياكل بنفس
عبده: من عنيا وأدى احلى صنيه لعم بسيوني
بسيوني: تسلم يا عبده.
ركن بسيوني صندوقه بعيد وخرج إزازة ميه وفتحها وغسل إيديه وسمى بالله وقبل ما ياكل شاف عنين بتبص على الأكل اوى
فشاور له وقال: بسم الله
سيد وريقه بيجرى: لا شكرا كتر خيرك
فعرف بسيونى إنه جعان بس مكسوف فشال الصنيه وقربها من سيد وقال: شكرا إيه على أساس جايب لحمه ده كله طبق فول وطعميه تعال تعال كل معايا وافتح نفسى يالا قرب وسمى بالله (( وحط الرغيف في إيد سيد)) ولأن سيد كان جعان أوى فكان بياكل بسرعه شديده حتى إنه خلص طبق الفول كله قبل ما ياكل بسيوني منه .فحس بسيوني إنه لسه جعان فشاور لعبده إللى جاب صينيه تانيه حتى إنه طلب له طبق بطاطس ومسقعه وقعد ياكل معاه
سيد بكسوف: الحمد لله كتر خيرك
بسيوني: بألف هنا استنى ونادى وهو في مكانه (( إلحقنا يا عبده بكوبايتن شاى))
وفي نفس الوقت جت بنت صغيره ماسكه كيس اسود وقالت: عم بسيونى ماما بتقولك ورنشها بسرعه عشان بابا مستعجل
بسيوني: من عنيا حالا (( وخرج من الصندوق علبه ورنيش وفرشه)) وسيد بيراقبه وهو بيشتغل فقال في سره:(( على اخر الرمن يا ابراهيم تاكل من إيد واحد بيمسح الجزم))
جه عبده بالشاي وقدمه لهم ومشى وبعدها جه لبسيونى اكتر من واحد يمسح له جزمته او يخيطها له.
بسيوني: يا ماشاءالله تبارك الله الظاهر انك وشك حلو الشغل كتير النهارده..
وبعدها سمع صوت الاذان فقام
سيد بفزع: على فين
بسيوني: هروح أصلى العصر في الجامع ده وبعدها هرجع
سيد ‘ وسايب عدتك كده في الشارع مش خايف لتتسرق
بسيونى: ومين الحرامى المعفن إللى هيطمع في كام علبة ورنيش وفرشه.
سيد: ولو خدها معاك في الجامع
بسيوني: مينفعش ريحة الورنيش وحشه وانا ماحبش احط في بيت ربنا حاجه وحشه وبعدين الدار أمان وانا موصى أصحاب المحلات ياخدوا بالهم من الصندوق.يالا انا همشى عشان متأخرش على الصلاة
وبعد الصلاه رجع بسيوني قعد مكانه شويه وبدأ يلم حاجته
سيد بقلق: على فين لسه بدرى
بسيوني: عارف ماانا جبرت وكفايه لحد كده هروح اعمل لى لقمه وأريح شويه سلام عليكم.
سيد: طب استنى شويه يمكن يجي ناس تانيه وتشتغل أكتر
بسيوني: لا الحمد لله اوى انا كده جبرت واترزقت كده رضا اوى ربنا يديمها نعمه ويحفظها من الزوال وبعدين أنا طولت النهارده اكتر من العاده وتعبت هروح اريح شويه
بص له سيد بخوف وكأنه عايز يقول له: طب وانا هاعمل إيه ؟
&&&&&&——-&&&&&&&&&
وصلت العربية للشاليه في الغردقه بص له يوسف بإحباط أصله كان متوقع إنه هيقضى شهر العسل في قصر ولا ڤيلا أو حتى شاليه ضخم في وسط المدينه لكنه اتفاجأ لما شاف شاليه صغير جدا تقريبا أوضتين وصاله صغيره وحمام ومطبخ مساحته كلها حوالى ١٠٠ متر.وكمان متطرف بعيد عن المدينه
زينب: إيه رأيك في الشاليه مش يجنن
بص له يوسف وقال بضيق: يعنى حلو بس بعيد شويه وبعدين صغير أوى يعنى الخدامين هيقعدوا فين؟
زينب: خدامين إيه يا حبيبي مفيش خدامين فيه أنا وإنت وبس
يوسف: وهنعيش إزاى من غير خدامه مين هيطبخ ؟ ومين هيروق ومين هي
زينب: انا هاعمل كل حاجه
يوسف: انتى
زينب: وانت أكيد هتساعدنى
يوسف: إحنا جايين ننبسط ولا نشتغل ونضيع وقتنا في الكنس والتنظيف
زينب: انا حابه كده حابه نعيش حياتنا زى اى اتنين متجوزين في بدايه حياتهم وهما بيتشاركوا كل حياتهم مع بعض.تعال تعال أفرجك عليه من جوه واخدت إيد يوسف ودخلت.
&&&&&&&&&&&٥-&&
خرج بسيونى يشترى كيس لسان عصفور فلقى سيد على نفس وضعه وفي نفس مكانه فقرب منه وقاله: إنت لسه ماروحتش.
هز سيد راسه بلأ.
بسيوني: الدنيا قربت تليل وانت لسه في مكانك كده أهلك هيقلقوا عليك.
بص له سيد بكسره فقاله بسيونى: هما مش هيقلقوا عليك.
هز سيد راسه وقال: ماليش حد هيقلق عليا
بسيوني: الظاهر وراك حكايه كبيره طب انت هتدنك هنا عندك مكان تنام فيه؟
هز سيد راسه بلأ.
بسيوني: طب قوم قوم تعال.معايا
سيد: على فين؟
بسيوني: هاخدك مطرحى تريح شويه وبكره يحلها رينا تعال تعال.
قام معاه سيد لحد مادخلوا عماره قديمه أوى ودخلوا شقه بسيوني في الدور الاول وكانت شقه صغيره اوى حوالى ٦٠ متر وعفشها كله قديم .
بسيوني: يا أهلا وسهلا تعال نورت البيت
سيد: الله يخليك منور بيك
بسيوني: فيه حمام هناك أهو خش اغسل وشك وفوق كده على ما أفرغ الأكل
خرج سيد من الحمام بعد ما غسل وشه وفوق شويه.
بسيوني: معلش هتاكل معايا ربع الفرخه دى أصلى ماكنتش عامل حسابى بس أهى لقمه هنيه تكفي ميه
سيد: كتر خيرك انا عارف انى متقل عليك.
بسيوني: ولا متقل ولا حاجه تعال يا…..إلا انت اسمك إيه؟
سيد بدهشه: مش عارف اسمى ايه ومدخلنى بيتك مش خايف يمكن اكون حرامى وأسرقك.
بسيوني: يادى الحرامى إللى شاغل بالك…..لأ يا سيدي مش خايف ولو انت حرامى وعايز تسرقنى فخد إللى انت عايزه حلال عليك من غير سرقه وفرهده بس تعال كل الاول قبل ماببرد الأكل.
قعد سيد وهو مستغرب اوى من شخصية بسيونى الغريبه
بسيوني: إلا هتقولى اسمك إيه ولا لسه هتفكر في الحرامى
سيد: اسمى سيد
بسيوني: عاشت الاسامي ياسيد خد بقى نص صدر الفرخه دى وسمى بالله ودوق شويه الشوربة دول حاجه أخر مذاج..
شرب سيد شويه من الشربه وقال بجد حلوه اوي.
بسيوني: طيب كل بالهنا وأنا هاعمل لنا اتنين شاى مظبوطين على الأخر.نشربهم قبل ما ابدأ في الشغل
قعد بسيوني وحط كوباية الشاى جنبه وفتح صندوق العده وبدأ في خياطة الجزم: طب مش هتقولى انت منين؟:وإيه حكايتك.
سيد: حكايتى طويلة.
بسيوني: وانا فاضي احكى.
سيد: بس انت هتكرهنى لما تسمع حكايتى؟
بسيوني وهو بيشتغل: ليه قتلت حد وهربان من السجن.
سيد: لأ
بسيوني: يبقى احكى
سيد: حاضر.
&&&&&ـــ&&&&&&&&&&&
زينب: صباح الفل يا حبيبي قوم عملت لك أحلى فطار شغل فنادق
يوسف: صباح النور كويس عشان انا واقع من الجوع.
زينب: طب تعال في البارندا بره الهوا يجنن
خرج يوسف شاف الشط والرمله والجو كان حلو بس المنطقة متطرفه شويه عن المدينة: إيه ده هو الفول ورانا ورانا.
زينب: طب ليه مركز على الفول طب فيه لانشون وبيض وعسل ومربه.. وبعدين أنا بحب الفول ماستغناش عنه أبدا
قعد يوسف يفطر: ماشى يا بتاعت الفول هنروح فين دلوقتي
زينب: فين يعنى من هنا على البحر على طول.
يوسف: ياخساره لو كان فيه (( جيت اسكى))
ولا الحاجات إللى بنسمع عنها في الفنادق الكبيره دى كنا انبسطنا
زينب: يا اخى بلاش بواخه وتعال البحر شكله حلو أوى ومش عايز اى اضافات وبعدين أنا جيبت معايا صنارتين عشان نصطاد سمك.
يوسف: نصطاد سمك في شهر العسل
زينب: ونشويه سوا على الشط هنا شفت الرومانسيه.
يوسف: افكارك عن الرومانسيه غلط خالص قومى قومى يا فالحه غيرى هدومك.
&&&&&&&&&&&&&&&&ــ
بسيوني: صباح الخير يا سيد قوم جبت لك فطار انما إيه فول عجب وطعميه سخنه موحوحه.
سيد: صباح النور كنت صحيت من شويه لاقيت البيت فاضي
بسيوني: أصلى بحب بعد ما أصلى الفجر أقعد في الجامع اسبح واستغفر لحد ما النهار يطلع وبعدين اجيب الفطار.تعال سم بالله
سيد: انا مش عارف من غيرك كنت هاعمل إيه ومش عارف هاروح فين وإلا هاجى منين
بسيوني ‘: وليه تروح ولا تيجى ما تخليك قاعد ورزقى ورزقك على الله.
سيد: بجد يا بسيونى.
بسيوني: وفيها إيه مانت شايفنى أهو عايش بطولى يعنى لا عيل ولاتيل.
سيد: يعنى مش هتدايق منى عشان يعنى هاجى أقاسمك في بيتك
بسيوني: انا كنت متجوز واحده كانت زى النسمه غلبانه جبت كتير حامده ربنا جيب قليل حامده ربنا وعمرها ما اشتكت حتى لما ربنا حرمنا من الحلفه حمدت ربنا وما اعترصتش.عاشت معايا على الحلوه وعلى المره عشرين سنه ولما ماتت مافكتش اجيب غيرها.اما القريب فهم من بعيد لبعيد والدنيا بتلهى وأديك تونسنى وأونسك ورزقى ورزقك على الله.
سيد: ومأمنى على بيتك مش خايف لأغدر بيك
بسيوني:شوف يا سيد انت امبارح ماحكتش ليا حاجه غير أن بنتك سرقتك وحبستك وبتدور عليك عشان تحبسك وانت هربت منها.
سيد: هو ده إللى حصل
بسيوني: بس ماقلتش ليا إيه السبب إللى يخلى بنتك تعمل فيك كل ده أصل مستحيل هتعمل.كده من غير سبب.صح.
سيد: …….
بسيونى: تعال افطر معايا عشان ألحق شغلى وأكل عيشى
سيد: أصلى بصراحه مكسوف منك ومش عارف احكيلك إيه.كنت زمان مابتكسفش ويتكلم وقلبى جامد بس دلوقتي مش عارف أقول حاجه.
بسيوني: شوف يا سيد إذا كان الكلام هيريحك احكى لو مش هيريحك أسكت
سيد: لا يا بسيوني انا هحكى لك كل حاجه لأنى بجد عايز ارتاح.
&&&&&&&&&&&&&&&&&
إيه رأيكم في الشخصية الجديدة (( بسيوني))
وياترى هيكون له تأثير على شخصية سيد
وياترى هيعمل ايه يوسف مع زينب وأمانى مع أهل فادى.