رواية إن الأسود فرائس الغزلان الفصل السادس 6 بقلم جوهرة
رواية إن الأسود فرائس الغزلان الجزء السادس
رواية إن الأسود فرائس الغزلان البارت السادس
رواية إن الأسود فرائس الغزلان الحلقة السادسة
لا تخاف من الذي يأخذ حقه بيده ، خاف من الذي يتركها لله
ــــــــــــــــــــــــــ
ميثاء / انتي شبيج ؟!!! هذا عقلج بي شي احنا شنو اتفقنا هاا
رفيدة بعدت اصبع ميثاء اللي وكزته براسها معترضة / يوو خلاص لاتلحين صارلج اسبوع تنقين براسي من يوم اجت عمة حليمة ( ام تغلب) ، بعدين احنا ما اتفقنا ، انتي بكيفج تخططين صايرة المرأة الحديدية ومادريت بيج
ميثاء بضجر / بالله بلا استعباط ، فكري بمستقبلج شنو تبقين طول عمري بلا زواج
رفيدة / منو كالج اريد اتزوج ، ونفرض فكرت اتزوج شنو ماكو زلم بس ابن عمج
ميثاء بغضب / اي ماكو زلم ماكو ، تدرين ليش لان بنظرهم هم احسن الناس وساري هذا لو تسحلين روحج وتموتين مايعوفج لغيره مايخليج تتزوجين برجال غيره ، ولاتكليلي أعنس حتى احط طلقة براسج والله
رفيدة بهلع عاطت / ميثااااء وسم ترى كاعدة تخوفيني شنو هالتصرفات والكلام شبيج لخاطر الله ترى كلش متغيرة
ميثاء بجدية وعناد / مايبقى شي على حاله ، وساري تقبلين بي ، روحي صلي استخارة وإذا ما ارتاحيتي مو ترفضينه لا تقبلين بي
رفيدة عضت على لسانها بقهر وقررت تماشيها تشوف وين تريد توصل / تمام الي تريدينه اسوي بس اذا رجعت ثاني يوم العرس مو توكفيلي سجينة خاصرة
ميثاء فكت عيونها بفزع / اعوذ بالله من سوالفج ، بالله هذه سالفة يالغمة تسولفينها
رفيدة / بكيفي ، انتي مو تريدين تمشيني على هواج اني هم اسوي اللي على هواي
اندكت الباب والتفتن اثنينهن على دخلة دلال ، ميثاء نترت / خير شنو تردين
دلال / وين عمتي اريد استاذن منها
ميثاء وكفت وتقربت بخطوات بطيئة وصارت قريبة على الباب الواكفه عنده دلال / وبشنو تستاذنين
دلال رفعت حاجبها اللي مرتبته بحف جديد خلت ميثاء تتعوذها بداخلها / سهى عزمتني كلت اروح لبيتها
ميثاء وايدها بخصرها خزرت دلال / وشنو مناسبة العزيمة فرحانة بحملها لو زواج رجلها
رفيدة طكتها ضحكة لأن الاثنين مراهمات أبيت جلال لا خلفة عدهم ولا زواج
دلال / انطي خبر لعمتي اني طالعه ، حيدوري ماقبل يجي وياية بقى يلعب بالهول
عافتهن وطلعت وميثاء راحت وراها صاحت عليها / تعااااي وين مولية قبل اسبوع جنتي أبيت جلال شنو هي سفردحة منين اجت الحنية والمواصل انتي وسهى
دلال التفتت / صديقتي شكو بيها يعني اذا رحت لبيتها
ميثاء / بيت هذا العار ممنوع ترحين افتهمتي
دلال / وانتي شعليج ؟ والله حلوة هذه ميثاء تريد تحكمني
ميثاء من شافت دلال ماعبرتها وطلعت للكراج راحت وراها وسحبتها من شالها / والله ماخليج تطلعين على شنو رايحة رادة متستحين شوية اثكلي
ام منذر اللي دخلت من برا جانت طالعة يم الجيران وسمعت صياحهن نترت بيهن/ ولجن الصوت برا طالع بالشارع وسمعته تردن تفضحني تالي عمري
ميثاء دفعت دلال وهي تتنفس بقوة وتاشر عليها / هذه وحدة ماتستحي شعدها رايحة رادة لبيت جلال شنو نست منو جلال وشنو سوى لمنذر
دلال بغضب / انتي الماتستحين بس تتدخلين بحياتي ، شعليج بية منو خلاج وصية علية
ام منذر / وقز القرط انتي وياها يلا ادخلن للبيت وانتي انضبي واكعدي بالبيت ماكو طلعة
دخلت دلال وهي تدعي على ميثاء اللي خربت عليها طلعتها
ام منذر تتنهد وهي تكعد عالكرسي بالكراج / ليش يمه ميثة ليش تتعاركين وياها مرة اخوج وأمانته هذه
ميثاء بزعل وقهر / والله يمه انتي ماتدرين شي خليني ساكتة احسن
التفت ميثاء على رفيدة طلعت لابسة جبة سودا وشايلة جنطتها بيدها / محتاجة شغلات من السوك ترحين وياية
ميثاء / مو وكتج ابدااا
رفيدة / يلا ميثة والله شغلات ضرورية وما اكدر اروح بوحدي
ام منذر / روحي وية اخيتج لا تبقين محبوسة بهالبيت
دلال اللي اذنها يمهن طلعت وهي تعاتب عمتها / ها عمة بنتج تردينها تتونس واني الحجي والغلط علية
ام منذر / بنتي وين طالعة شو مكابلة البيت ودك شغل البيت كله فوك راسها خلها تتنفس شوية قابل وين رايحة شو حدها السوك وراجعه ، انتي معليج بيها كابلي ابنج اهتمي بي هو اللي يفيدج
سكتت دلال وبداخلها مغتاضة منهن ، ومن شافتهن طلعن قررت هي هم أدبر حجة وتطلع ، ورى شوية بعدما صعدت لغرفتها ونزلت لابسة عباه إسلامية / عمة اروح الصيدلية محتاجة علاج ضروري
ام منذر ضيكت عيونها وردت / خابري عالبنات يجيبن العلاج وياهن
دلال / ماعندي رصيد خلص
ام منذر / شوفي موبايلي بي رصيد وخابري
دخلت دلال وجهها مكلوب دورت عالموبايل أخذته وشمرته جوة قنفة التخم وطلعت
دلال / ماكو دورت عليه مالكيته
ام منذر / شوفي بيد حيدوري يلعب بي
دلال / حيدر ملتهي يلعب بالمكعبات ، عمة ما اتاخر
ام منذر تنهدت / دروحي شكد تلحين ، لا تتاخرين
ـــــــــــــــــــــ
دلال طلعت موبايلها من الجزدان من صارت بالشارع وخابرت / الو ، هلو وينك اني اجيت للبيت
جلال / هلو بالحلوة يلا اني انتظرج لأن سهى راحت لبيت اهلها
وصلت بسرعة لأن البيت بنفس المنطقة وبدون ما تضرب باب أو جرس فتحت الباب ودخلت لاكاها جلال مبتسم وسحبها من أيدها بعدما قفل باب الحوش ودخلوا للبيت
!!!!!!!!!!! ؟؟؟؟؟؟؟
،،،،،
دلال بعدما لفت شالها بترتيب / يلا اني اروح لأن تاخرت يادوب كلت أمر الصيدلية هسة عمتي تسويلي سالفة هي وميثاء
جلال باوع عليها وهو يمسح على شعره بهدوء / انتظري خل اشوف الباب بعدها اطلعي
طلع ودلال طلعت وراه وعند الباب التفت عليها وهو يغمزلها / نبقى عالاتصال
كورت شفتها ونغزته بصدره باصبعها / بكيفي شوكت ما اتصل عليك تفتح خط
جلال / دروحي ولج لا تبقين تسحسلين بروحج يلا استعجلي
دلال وهي تاشر / الكاميرات اللي بالباب
جلال / لاتخافين مطفيها قبل ما تجين
دلال / يلا رايحة باي
تنفس بعمق وسد الباب رجع للبيت سبح ولبس وطلع لبيت اهله اللي يبعد خطوات ، شاف تغلب بالباب خازرة ، سلم ووكف وهو يسأل تغلب / خير ليش خازرني
تغلب وبصوت ناصي لايسمعونه الحرس اللي قريبة نقطة حراستهم عالبيت / زوجتك بالبيت
جلال / راحت من الصبح لأهلها ليش تسال ؟!
تغلب / وإذا مو بالبيت شعدها مرة منذر ابيتك
جلال / اجت على سهى وكلتلها عد اهلها ورجعت
تغلب يأشر بغضب / نص ساعة بقت عندك بالبيت نص ساااعة شسوي هااا شسوي انت وياها ، جلال انت اخوي واعرفك مثل هذه راحة ايدي كافي تلعب بذيلك ترى لعبت نفسي من تصرفاتك
جلال باعتراض / يمعود شبيك كبيت بية كلتلك اجت على مرتي ورجعت بسرعة يانص ساعة
تغلب / والكاميرات اللي لكطتكم هم تجذب ؟!! كافي رحمة لأهلك
جلال سكت ما يكدر يحجي بعد مادام تغلب مراقبه ماراح يكدر ينكر
ـــــــــــــــــــ
ميثاء بضجر / رجلية توجعني من الفرفرة هذه وانتي كلتي شغلات ضرورية ونرجع
رفيدة / ماصار ساعة من اجينا خل نفتر شوية
ميثاء / ترى السوك يحتاج فلوس وعلى حطت ايدج يادوب الفلس العدنه يكفي لرأس الشهر مساعدة التزامات اللي ورانا أجور االكهرباء والمولدة وقسط الثلاجة اللي بعد ما سددناه
رفيدة / ادري والله بكل هالاشياء بس ترى نفسنا هم الها حق علينا ولا تشيلين هم اني مجمعه جم فلس من الراتب على جهة
ميثاء / همزين عندج راتب جان تبهذلنا
رفيدة / الحمدلله ، وإن شاء الله يطلع تعيينج وترتاحين
ميثاء / يارب ، اي والله تتغير هواي أمور
رفيدة / سمعت الشهر الجاي تنزل قوائم بالاسماء إن شاء الله اسمج من بينهم
ميثاء اخذت نفس وهي تردد يارب
رفيدة بغيض / اعوذ بالله ما ادري شلون مرينا من هذا الشارع ليش ما ذكرتيني يا ميثاء
ميثاء مستغربة / سم شبيج تتعوذين
رفيدة / ابن عمج حامي الحمى ابو زيد الهلالي شوفي شلون يباوع علينا
ميثاء تلفتت / وينه وينه
رفيدة سحبتها من أيدها ودخلن للمحل القريب / بالطرف الثاني من الشارع واكف يم محلاتهم
ميثاء / اي والله هذه المنطقه من السوك مليانه بمحلاتهم
رفيدة مبوزة / لا بالله على أساس ما ادري بس نسيت وانتي ما ذكرتيني المفروض ما تمر بهذا الشارع
ميثاء / بلا دلع بنات المفروض والمفروض ، اشتري وخل نرجع والرجال واكف على جهة شعليج انتي لو بدينا نفكر صح ؟؟
رفيدة / ممفكرة بكولشي لا بكيفج تحجين
ميثاء / مو على أساس كلتي لعمتي اريد مهلة افكر
رفيدة رفعت حاجبها / المهلة راح اطول ياحبي
ميثاء / عليج الله
رفيدة / والله ،،، خلي يستوي على جمر مو نار
ميثاء ابتسمت بخبث / تعجبني الفاهمة
رفيدة اختلست نظرة من زجاج المحل شافت ساري يعبر الشارع ومتقدم بخطوات سريعة جهتهم ، تقربت همست لأختها / اجى ساري شسوي
ميثاء بنفس الهمس / سوي روحج ما شفتي شي خليج ريلاكس اهدي بس
رفيدة / عشتو ومنو كالج خفت
باوعت ميثاء عليها بنظرة ضيقة / افحصي دكات گلبج زادت لو نقصت
رفيدة عافتها وراحت تتعامل وية صاحب المحل عالسعر
طلعنا من المحل وساري موجود واكف بالباب سلمت عليه ورفيدة اكتفت بالصمت رد علية وعينه تترقب رفيدة اللي مشغولة بموبايلها
ساري / محتاجين شي
ميثاء بهدوء / مشكور اصلا راجعين للبيت
ساري / لعد اوصلكم بطريقي
ميثاء / مابيها داع احنا راجعين نتمشى مو بعيد البيت
ساري / ولو ، مادام شفتكم ميصير بعد لزوم اوصلكم
رفيدة / زحمة توصلنا
ساري بنظرة قوية / وليش خاتون اكو سبب
رفيدة / كل الأسباب ، تريد اعددهن واحد واحد
ميثاء / رفيدة كلش مو وكتج ، مشكور ساري اكيد وراك اشغال احنا راجعين للبيت بوحدنا
ساري بإصرار لأن استفزته رفيدة / سيارتي هذه كبال المحل يلا خوما نظل واكفين منا العالم
تنهدت ميثاء ورفعت حاجبها لأختها من شافت ساري سبقهم للسيارة / امشي ما اسمع حرف منج ام لسان
رفيدة مبتسمة / ايباه شوفو منو تحجي
ميثاء سكتت وراحت صعدت بالسيارة بالمقعد الامامي وهي تكول / المفروض رفيدة تكعد هنا بس متسويها
ساري ابتسمت / كل الهلا بنات عمي نورتن سيارتي المتواضعة
رفيدة اللي سدت الباب بقوة / واضح التواضع
ساري اغتاض من صوت الباب عرف بيها متعمدة بس سكت
وبالطريق سألها وعينه عليها بالمراية/ شنو قرارج بنت عمي
رفيدة يلا تفكير / مهلة سنة
ميثاء فكت عينها بقوة وانتظرت تسمع رد ساري اللي ضحك ورد / بهذه السنة يكون عدنا طفل واحتمال تكونين حامل هم
رفيدة صاحت بذعر وهي تتخيل المشهد / عزااا
ساري ضحك بصوت اعلى وبعدها رد / انتظر الموافقه نهاية الأسبوع
رفيدة بإصرار / والله مو هسة ، شنو اسبوع لا لا ما اقبل
ساري وحس بذعرها حب يماشيها / خلها شهر وكافي تماطلين
ميثاء / خلاص رفيدة خلاااص
وصلهم ساري وشكرته ميثاء ونزلت وهي ادردم على رفيدة اللي سبقتها للبيت
،،،،
العصر كاعدات بالهول وحيدر بحظن رغد تكلب بموبايلها وهو صافن وياها ، رفيدة انتبهت على دلال مشغولة تراسل بموبايلها سالتها / اشوف الموبايل ما يوكع من ايدج هالفترة
دلال رفعت راسها وردت / اراسل اختي شكو بيها لو الا تخلين إن بالسالفة
رفيدة / شخبارها اختج سلمينا عليها
دلال / الله يسلمج
رفيدة لفت راسها لجهة ميثاء مبوزة ماعجبها حال دلال وسألتها / موبايل امي مدري وين ما شفتي
ميثاء / دورت عليه وسالت حيدر يكول ما ادري
ام منذر اللي مددة ومخدة جوة راسها تباوع على مسلسل معروض عالتلفزيون/ دلال رادت تخابرج اجيبيلها علاج دورت عليه كالت ماكو
ميثاء ضيكت حاجبها وسالت امها وعينها خزرت دلال اللي كل انتباها وياهن صار / علاج شنو ؟ ليش شبيج مريضة
دلال / ها ، ردت علاج مغص ورحت جبته من الصيدلية
ميثاء / يعني ما ارتاحيتي الا طلعتي يممه شلون عرمة ، انتي تدرين زين عدنا هذا العلاج بصيدلية البيت
دلال / اهوو كلشي سويتي سالفة ، رحت أخذته ورجعت بسرعة شنو كفرت خوما كفرت
ام منذر / كافي مناكر شبيجن دخيل الله
دلال ودموعها تنزل بقوة / تتربصلي عالطالعة والنازلة مدري شبيها علية
ميثاء / والله اللي ابعبه صخيل يكول مااع ، على شنو هالدموع عشرة عشرة تنزل مهضومة يعيوني
دلال وهي تمسح بدموعها / انتي تكرهيني من يوم مات منذر وانتي شادة وياية
ميثاء / الله يرحمه برحمته ، من تذكرينه ترحميله لو هذه هم نسيتيها مثل هواية اشياء
عافتهن وصعدت لغرفتها لأن ماتتحمل مناكر وكلام ميثاء اللي يدك بالعظم
ام منذر / عوفيها شبيج عليها
ميثاء / خل تولي ، رفيدة اتصلي على رقم امي خل نسمعه بلكن يطلع هنا
اتصلت رفيدة ومن اول رنة انتبهن عليه مدت ميثاء أيدها جوة القنفه وسحبته وانطته لامها
وهي تكول اكيد واحد شمره هنا وواضح منو
رفيدة / كولشي نتوقع والله
،،،
ثاني يوم من الصبح دلال لابسة جبة والجنطه بيدها نزلت صبحت عليهن كاعدات يتريكن
دلال / عمة اروح اقبض الراتب من المصرف
( بهذه الفترة مجان متوفرة بطاقة الماستر كارد والكل يستلمون الرواتب من المصارف )
ام منذر / أخذي وحدة من البنات خوما ترحين بوحدج
دلال / ذاك الشهر رفيدة سوتلي سالفة بس تتأفاف وتحجي
ام منذر / ميثاء تروح وياج
دلال ضغطت شفتها مغتاضة / يلا لعد انتظرها
ميثاء بطول خلك / خل اتريك على راحتي شكو ورانا اقبضي راتبج اني هم اقبض راتب التقاعد اكيد نزل
رفيدة / لا مانزل مو موعده
ميثاء / عبالي اقبضه واخلص مالي خلك رايحة رادة
دلال / ديلا استعجلي
ميثاء / شبيج تتحركصين شكو وراج
دلال / اكول اروح بوحدي احسن شسوي بيج ماخذتج شنو ما اندل
ميثاء / اي هذا اللي تريدينه تطلعين بوحدج
ام منذر / ميثة كومي تحضري روحي وياها
دلال عافتهن وطلعت وهي تكول / الله لايعوزني الها شنو ذالتني ذل اني اروح
ضحكت ميثاء بسخرية وهي نصفك بيديها / والله العظيم هذه وراها بلوة وما اتسمى ميثاء إذا ما عدها شي
ام منذر بعصبية / استغفري ربج لا تتهمينها
ميثاء / استغفر الله يارب ، ترى والله وضعها تعبان
ام منذر بحرگة گلب مقهورة / اوف يمه وليدي راح جوة التراب وعافجن تتمالخن
ميثاء بقهر على حال امها وكلامها / يمة والله ماريد الناس تحجي بيها ، انتي مو تشوفين بعينج شكلها ولبسها الضيك اللي يجيب العين عليها يمه هي مامحترمة روحها واني ماريد الناس تحجي بيها لأن زوجة منذر الله يرحمه
رفيدة / صلن على النبي شبيجن خل نتريك وراية دوام
ميثاء وامها / اللهم صل وسلم عليك يا رسول الله
رفيدة / يمة بلغي عمتي حليمة ماريد يصير شي الا تطلع سنوية اخوية الله يرحمه
ام منذر / يعني قبلتي
رفيدة / اي بس مو هسة اريد جم شهر يمرن يلا
ميثاء / المهم وافقتي والباقي بسيط
رفيدة / وعيونج الباقي صعب كولش صعب على ساري
رغد بضحكة / مسكين ساري راح تمقلبه رفيدة
رفيدة / انتي مو وراج دوام ليش ما رحتي اليوم
رغد / إجازة صحية
رفيدة / ممم والله مال تسخت انتي
ـــــــــــــــــ
ام تغلب / يمة ساري هذا كلام مرة عمك وانت بكيفك بعد
ساري اللي صافن بكلام أمه قبل شوية وقرار رفيدة اللي تريد سنوية اخوها تمر يلا تقبل بالخطوبة رد على أمه / ماظل شي أقل من ثلاث اشهر ونشوف تاليها وية رفيدة
ام تغلب وعينها على تغلب اللي مدد عالفراش وابنه بحظنه يلعب بموبايله حجت متعمدة / الله يسهلك امورك ويسر خاطرك والله يعوض اخيك ابو غياث ويرزقه بالمرة اللي تسعده
تغلب غمض عيونه وتنهد / يمه ادعي لساري اني شكو
ام تغلب / خوما تبقى بلا مرة
تغلب / مو وكت هالكلام ماصار اشهر عالوفاة الله يرحمها برحمته اترجاج امي لا تحجين بهذا الموضوع
ام تغلب سكتت مقهورة على حال ابنها اللي تشوفه دوم مهموم وساكت
عافهم تغلب وطلع برا التفت ساري لامه / واضح مقهور ، يمه فدوة اروحلج لاتحجين وياه بطاري الزواج
ام تغلب / ترى من حقه يتزوج خوما يدفن روحه بعدين كلنا ندري هو جان يريد ميثة صح شيداء والنعم منها جانت نعم الزوجة الله يرحمها بس ابني يحتاج مرة تسنده وتسعده
واذا تريد رايي ميثة خوش اختيار
ساري / يمممه صظك تحجين مالكيتي الا ميثاء والله تسوي حياته جحيم ، خل الرجال رأسه بارد
ام تغلب / هذه بنيتنا ام بيت وفاهمة واحسن تربية متربية
ساري / والنعم منها والله ، بس اللي بينا مشاكل وسوء فهم وميثاء ما تحاول تفهم الوضع سادة اذانها ماتسمع
ام تغلب / الصار بيهم مو قليل وانتم ما قصرتو
ساري تنهد / والله يمه شأحجي ماصدكين
ام تغلب / لا تبيض صفحتكم انت واخوتك كاومتو ( حاربتو )ابن عمكم
ساري / يمة الوضع جان غير ومنذر ماجان يتفاهم عباله غدرنا بي
ام تغلب / الله يعلم ، الله يرحمك عمة منذر
ـــــــــــــــــــــــــ
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية إن الأسود فرائس الغزلان)
