رواية أعظم خيانة الفصل الثاني عشر 12 بقلم الزهيرية الزهيرية
رواية أعظم خيانة الجزء الثاني عشر
رواية أعظم خيانة البارت الثاني عشر
رواية أعظم خيانة الحلقة الثانية عشر
بقانون عزة النفس إذا كان
خصمك رخيص لا تحاربه
ريماس/ اكبر غبي الي يظن نفسه اذكى الناس لانه عامةً الذكي اكو الأذكى منه والغبي كذلك اكو الاغبى منه وهذا چان حال صفيه ظنت نفسها ذكيه وتگدر تتلاعب ويه ام رحاب بس ام رحاب فشلت كل مخططات صفيه لانه طلعت ام رحاب مو وحدها بهذا الشغل اكو وراها ناس ماكو احد يگدر يلعب وياهم لانه اللعب وياهم ومثل اللعب بالنار لانه اكيد اليلعب بالنار ما يحرگ بس روحه وصفيه يا ريت بس حرگت روحها لا عمت على جهالها
وبيوم اجوي ذوله الملثمين بالليل موقف انه أريد اوصف رعبه ما ينوصف وعلى الرغم انه صفيه قبلت ارجع اشتغل وياهم إلا هذا الچان يأمرهم ما اهتم لكلام صفيه وگال لذوله الملثمين شوفوا شغلكم
واكو اثنين منهم اخذوا اخوتي الولد وخطيه چانوا نايمين خلوا أيديهم على حلگهم وشالوهم واخذوهم هنا صفيه تخبلت ظلت تتوسل بهذا اليآمر انه يرجع ولدها
بس هو گاللها/ اششش ولا كلمه ذوله راح يبقون رهينه عدنه خاف بيوم تفكرين تلعبين ويانه ذوله نجيبهم ونذبحهم گدامچ وظلت تتوسل صفيه بيهم بس ابد واني هذا الچان مخلي ايده على حلگي عافني وكلهم طلعوا بقينه اني وصفيه واخواتي الاثنين
وصفيه تخبلت گبل لبست عباتها وطلعت وهي تردد ويه نفسها يمه اخذوا ولدي وصفيه البنات عدها الكبار وبعدين يله جابت ولد اثنين وهمه من أخذوهم واحد عمره 6 والثاني عمره 5 سنين وبقيت وحدي لأنه اخواتي نايمات وحدود ساعه رجعت صفيه وياها ام رحاب
وگعدن بالصاله وسمعت ام رحاب تگول / خلي عقلچ براسچ ولدچ بآمان همه فتره إذا شافوچ ساكته وما تحچين ولا تعترضين شغلهم يرجعوهم الچ
ريماس/ بس هذا الحچي ما ينفع ويه صفيه وهي تتوسل انه يرجعون ولدها لكن لا حياة لمن تنادي ام رحاب چانت بس صبر بيها وبعدها راحت ام رحاب واي كلمه اگولها بحق صفيه ما توصف شنو تحس بي او شنو حالتها خطيه مره ادگ وتطلم على وجهها بكل قوتها ومره جر بشعرها وتفتر بالبيت شلون الوحده تطلگ وتبچي
ومر الليل وطلع الصبح وصفيه گد ما تعبت نامت واني هم نمت وگعدت على اختي تكعد بيه وچانت دنيا الظهر وهي تسألني على امها وأخوانها
گمت افتر بالبيت بس اخواتي بالبيت وحتى خطيه جوعانات سويت اكل الهن وگعدنه ناكل وبعدها رحت اتصلت على ام رحاب سالت على صفيه
ام رحاب / اي موجوده انطيتها ابره مهدئ ونايمه من تگعد تجيكم
ريماس/ غلقت الخط وياها وظليت صافنه ذوله هسه وين اخذوا اخواني وگدامي اخواتي گعدات والله يكسرن باب الگلب مكسورات لا حول ولا قوه الهن واگول ويه نفسي معقوله يلاگن نفس المصير مالتي تاليتهن مثلي اشتغل يم ام رحاب
اخواتي رغم ما امهن موجوده تحسهن يتيمات صحت عليهن اجني عليه اثنيهن حضنتهن وظليت ابوس بيهن وسالتني اختي شنو راح تعوفينه جاوبتها / انه مستحيل بيوم اعوفهن وظليت وياهن إلى العصر اجتي صفيه شلون عبالك وحده سكرانه ما مسيطره على نفسها وبس دخلت لغرفتها ذبت روحها ونامت
واني رحت اسوگت من المحل وحتى خبز جبت وخليت لأخواتي حتى فلوس وصيتهن بس اطلع يقفلن الابواب ما يفتحنها لاي مخلوق وبالليل ينامن يم امهن وبوستهن وطلعت وصلت يم بيت ام رحاب ومن دخلت ام رحاب گاعده اسوي عصير طبيعي وسألتها على اخواني جوابها واحد همه بالحفظ والصون دخلت لغرفة رحاب لگيتها موجوده هاي المره ورحاب من شفتها وشافتني تنظف بجسمها
نزعت الجبه والشال وگعدت باوعت عليه بطرف عينها
رحاب / طلعيها للبحصه واگفه بلعومچ احسن ما تموتين منها
ريماس/ وعبالك چنت منتظره احد يسألني حچيت كل الصار
رحاب / حبيبتي إذا چنتي مصوره خروجچ من المستنقع مثل دخولچ اله انتي غلطانه ليوم اطلعين منه تكونين جثه ساعتها تكونين صحيح طلعتي لانه تقابلين رب كريم وهي لو الخروج من المستنقع سهل چان غيرچ أشطر
ريماس/ ليش اكو غيري
رحاب / لعد اني گدامج شنو
ريماس/ أني متعجبه شلون أمچ شلون تخليچ هيچ تشتغلين
ضحكت رحاب ماتت من الضحك وهي تگلي
رحاب / ليش انتي عبالچ ام رحاب امي انتي شگد على نيتچ وغشيمه لا حبيبتي امي ماتت وام رحاب مو امي أصلاً ما اعرفها جامعتني بيها المصلحه الي هو الشغل لا اكثر ولا اقل والناس من انتقلنه هنا عبالهم إني بنتها وللعلم اني أصلاً مو اسمي رحاب بس همه هنا ينطوچ اسم غير اسمج وراح اگلچ شي طالما البارحه دخلوا عليكم للبيت وانتي موجوده وما سووا شي ألج يعني مخليچ لشغله اكبر وگولي رحاب گالت على گولتچ
ريماس/ زين هسه اني طمست بالخره افتهمنه اخواني وين شو ام رحاب تگول بالحفظ والصون
وظلت تضحك رحاب وتهز بيدها وتگول / بابا انتي مصيبه من مصايب الدنيا ليش انتي أصلاً موجوده هنا بالحفظ والصون بابا شغلي عقلج وخلي قاعده في بالچ اليروح ما يرجع بعد واياچ الصار وياكم تحچي لاي انسان ولا تسألين عليهم ام رحاب لانه اي كلمه تنطقين بيها ام رحاب تنقلها الهم اگوم اجهز نفسي افضل
ريماس/ عافتني رحاب واني دوامه بأفكاري وحدود ساعه 10 باليل جابولي صفحة شخص وطلبوا مني أتعرف عليه وبعدها استمر الحال على ما هو عليه انه يجيبولي اشخاص أتعرف عليهم وسوي وياهم مثل ما سويت ويه زياد واني صرت اجمع فلوس اما صفيه صارت عايشه على المهدئات لانه إذا ما تاخذ مهدئ تتخبل على مود ولدها ومن اخذوا اخواني اثنينهم بعد ما شفناهم ابد واستمر بينه الحال هذا وضعنه 11 شهر تقريباً
وبيوم ام رحاب گالت / ريماس باچر الصبح نريدچ بموضوع ولد بالجمارك
ريماس/ يعني شنو ما فهمت شنو اسويله
ام رحاب / تقرين عليه اية الكرسي بلكي يتوب على ايدچ ماخذتچ حتى تنسقين ويا فهمتي لهذا راح نروحله لدائره بدوامه والا وين نشوفه واريدچ تعتنين بنفسچ اريده من يشوفچ يسحل روحه جوه رجلچ فهمتي
ريماس/ ما حچيت شي بس هزيت براسي بعدها وعلى ثاني يوم گعدت من الصبح وحضرت نفسي وساعه اخط بالمكياج والعطر وأعدل بروحي وحتى ام رحاب ظلت متعجبه شلون مرتبه روحي طلعنه لگينه سياره بيها ولد شاب رحنه صعدنه بيها وصلنه يم بنايه دخلنه نمشي ونسال المدير التنفيذي وين لما وصلنه يم مكتب دگينه الباب شويه وصوت گال تفضلوا
دخلنه اكو ولد گاعد على مكتب واكو قطعه مكتوب عليها المدير التنفيذي مهند وبقيه الاسم وبعد ما سلمنه عليه بدت الكلام
ام رحاب / بلا زحمه اني حمايه يشتغل هنا واحنه جايين عليه بس هو بالضبط وين يشتغل ما اعرف إذا تگدر تساعدنه وتگلنه هو وين يشتغل
مهند / تفضلوا ليش واگفين استريحوا وتدللون ما يكون خاطركم إلا طيب أنطوني اسمه
ريماس/ ومهند من اول ما دخلنه يمه ابد ما نزل عينه مني ابد حتى نظراته جريئه وام رحاب انطته اسم ثلاثي ما اعرف منين جابت الاسم ومهند اتصل بواحد وگال
مهند / اگلك عبد الرحمن هذا الاسم دگه بالحاسبه وشوفه وين يشتغل بأي قسم عدنه
ريماس/ وبهاي الأثناء دگ موبايل مهند وهو يحچي بالموبايل وعينه عليه ويگول /
مهند / هاااا بيان خيرك العمى عماك هسه وكت تتصل على عمك مهند روح وبعدين اني اتصل بيك
بيان / الإمام علي عليه السلام يگول عجبت على قوم إن احترمتهم احتقروك وان احتقرتهم إحترموك
وهذا الشي شفته بميقات واهله من چانت ميقات يمي چنت محترمها ومراعي الله بيها چانوا يحتقروني ومن هسه اني احتقرتهم صاروا يحترموني وبحضور الباحثه گالت ميقات انه هي مستعده تسكن ويه زوجتي
وطلبت الباحثه انه افكر والطلاگ مو هين وحددت موعد لجلسه يم القاضي بعد عشرة ايام وقعت على انه استلمت التبليغ وطلعت ولگيت ام ميقات گدامي وچنت راح اعبر من يمها وهي اجتي عليه
ام ميقات / يمه بيان احنه غلطنه وانت ابن حموله وسبحانه الما يغلط واحنه عرفنه غلطنه اريد من الله ومنك ترجع ميقات وشگد صرفت على البناء احنه ندفعه الك وعفى الله عما سلف
بيان / عمه هذا الكلام چان ممكن قبل بس موضوع الخلاف كبر وصارت محاكم وعمامي عرفوا واني هسه مزوج لا تنسين زوجتي اشور ابويه وعمامي وزوجتي واشوفهم شنو يگولون واردلكم خبر
من حچيت هيچ ميقات چانت اجتي يمي بسرعه گالت بعصبيه/ شنو تاخذ رأي لميس خاتون حتى ترجعني أكيد ما تقبل ترى هي نزلت عليه ضره مو اني نزلت عليها ضره
بيان / اكيد ابلغها وأخذ رايها واني ما تزوجت إلا انتي رفعتي عليه قضية طلاگ لانه عمي وسام ما يزوجني بنته على ضره لهذا لازم اخذ رأيهم والما عنده چبير يشدله عمامه ويستشير
وعفتهن متخبلات اما ميقات الله لا يكذبني يمكن راح تنجلط بس ما اهتميت لانه گلبي نغسل من يمها ركبت سيارتي ورحت لدوامي وهذا الوقت كله لميس تتصل بيه وما رديت عليها وللعصر لما خلص دوامي يله رجعت للمزرعه
واكو ملاحظه انتبهت عليها بلميس وهي شگد تكون نار وتغلي بداخلها بس ابد ما تبين هذا الشي ويايه كله تدلل حبيبي ويه بيبي وأبويه خادمتهم بمي عيونها وأسلوبها أسلوب عمه لقاء امها وهي المسايسه يعني لميس تعرف اني عندي جلسه بالمحكمه وميقات راح تجي وشگد اتصلت وما رديت عليها ردت اشوف شنو ردت فعلها راح سوي مثل ميقات وثور وتعصب وتتعارك
لكن لميس خيبت ظني وما سوت شي ولا سألت شنو صار بالمحكمه بحيث من دخلت لگيتها گاعده بالصاله ويه بيبي وابويه واول ما شافتني ضحكت بوجهي وگالت / الله يساعدك حبيبي
وراحت جابت مي بين ما راحت واجتي اني گعدت على القنفه انطتني المي واجتي گعدت يم رجلي نزعتني حذائي وجواريبي ظليت صافن عليها شگد عشت ويه ميقات والله ما اذكر يوم جابت گلاص مي إلا اطلبه منها لميس سوي كل شي بدون ما اطلب
لميس / حبيبي محضرتلك الحمام وملابسك تسبح بالحمام الفوگ لو بالحمام الجوه والغده حاضر
بيان / تغديت بالدوام بس اريد چاي والملابس نزليهن جوه راح اسبح جوه ما بيه حيل اصعد فوگ تعبان جيبي الملابس والچاي وره ما اسبح
وبالفعل رحت للحمام سبحت بس فتحت باب الحمام اريد اصيح عليها لگيتها لازمه ملابسي واگفه بباب الحمام اخذتهن منها بدلت وطلعت وبسرعة البرق جابت الچاي صابه للكل هنا أبويه سالني شسويت بالمحكمه
جاوبته / گعدنه يم الباحثه وحچينه وهي وامها يتوسلن
سامي / على شنو التوسل غير هي رافعه قضيه تريد طلاگ
بيان / اي من شافتها صدگ تتوسل تريد ترجع
واني احچي اباوع بطرف عيني على لميس الإنزعاج بين على وجهه
سامي / اي وشنو جوابك الها
بيان / والله بعدني ما مقرر لهذا ما انطيت اي جواب
وابويه ظل يگلي بكيفك انت شنو تريد سوي بس فكر الف مره قبل ما تخطي اي خطوه شربت الچاي ونمت على القنفه وما حسيت غير واحد يگعد بيه رفعت راسي
وسام / گوم صحي النوم ساعه 8 بالليل اگعد نريد نشوفك
بيان / سلمت على عمي ورحت للمغسله سمعت صوت عمه لقاء بالمطبخ سلمت عليها ورجعت يم المغسله دى اغسل وجهي بس انداريت لكيت لميس بوجهي انطتني الخاولي وهي تگلي
لميس / حبيبي العشه حاضر تريد اسويلك شي محدد
بيان / لا عادي شنو سوين اكل بس اهم شي الچاي
ومن دى ارجع الخاولي لمكانه
لميس / اوگف اكو وغف مال صابون هنا
بيان / من ردت التفت على المرايه اشوف وين الوغف خلت ايدها على شفايفي وهي تگلي مسحته بعد ماكو هنا فهمت خطة لميس
جاوبته / مره ثانيه لا تخلين ايدچ عليه فهمتي
وچنت مصور راح تعصب بس ذكاء لميس فاق كل الحدود وبابتسامه خفيفه گالت تدلل
عفتها ورحت لصاله وجابوا العشه وشگد دورت على غلطه الزمها على لميس ماكو كل واجباتها مكملتها على اكمل وجه واني قررت اسلك سلوكها گدام آهلها بحيث من سألني عمي وسام شنو صار بالمحكمه ويه ميقات وحچيتله كل شي حتى مال اخذ رأي لميس گتله عليه جاوب عمي
وسام / بيان هذا الشي إنت تقرره اما لميس ما مزوجه ميقات حتى تحدد رجعت ميقات او لا لكن نصيحتي إذا تريد ترجعها لا تروح بنفس البيت البنيته انت خليها بغير مكان شرط بعيده عن اهلها
بيان / وبعد سوالف هواي انتبهت انه عمي وسام ما يريد انطي مجال لبنته لميس وإني اقرر
وما يقارب الساعه 11 بالليل راحوا بيت عمي وسام صعدت فوگ لغرفتي وبعدي تقريباً بعشر دقايق اجتي لميس ودخلت للحمام وبعد نص ساعه طلعت بملابس نوم ومكيجه وعطرها سابقها
وگعدت يمي وظلت ساكته وآني مجاهلها بعدها حچت
لميس / بيان اني ما اعرف انت ليش كل ما اتقرب منك تبتعد وگدام اهلي تگول اخذ رأيها
بيان / نفس اسلوبچ لميس ومنكم نتعلم شوفي اني ما دى انتقص منچ وانتي ما بيچ شي والف واحد يتمناچ بس اني مو من ضمن ذوله الألف گتلچ اعتبرچ مثل اختي يا بنت الحلال ارفضي من يمچ اني ما گدرت ارفض حتى لا صير قطيعه بيني وبين عمي وسام على شبيها بنتي وما تريدها
لميس / اني احبك بيان بشنو تريد احلفلك اموت عليك ومستعده انتظرك العمر كله يكفي انه انت زوجي وأصبح وأمسي عليك
بيان/ بعدني أريد اجاوبها دگ موبايلي شفته مكتوب ميقات تتصل بك وهي هم انتبهت رديت على ميقات
ميقات / شلونك بيان
بيان / اهلاً وسهلاً تفضلي
ميقات / شنو قررت بيان
بيان / بعدنه بسم الله بالطبگ اليوم چانت جلسة الباحثه بعدني ما اجيتي على بالي شقرر گتلچ لازم اخذ رآي الكل وموافقتهم لانه انتي حمدلله والشكر ما خليتي خط رجعه
وسبحان الله نفس أسلوبها ظلت تذمر وعصبت وتتهمني انه اني ملتهي بلميس ولازم توافق المسمومه لميس يله ارجع
صحت بيها گتلها / شوفي لچ هذا اسلوبچ بدلي احسن الچ زمان الاول تحول بيان قبل غير بيان هسه وخلي في بالچ بعد اقل كلمه منچ ارگعچ مية قندره عليها فهمتي
ومن عطت بيها سكتت وانطت الموبايل لامها ولازمتني امها ساعه تتوسل
بيان / اني عندي شروط إذا نفذتوا الشروط كلها أرجعها
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أعظم خيانة)
